انتي واعية انتي بتقولي اي يا هدي ؟ معقوله هتسيبي جوزك يتجوز عليكي ؟

هدي بحزن:  عاوزاني اعمل اي يا زينب مهو حقه مقدرش اتكلم 

زينب بجمود :  طب انتي عارفة هو هيتجوز مين ولا هياخد اي واحده وخلاص

هدي بجمود: مش فارقه معايا براحته هو اللي هيختار .. بس عالاقل  احسن ما كان يطلقني ولا يرميني في الشارع وانا متعلقه بيه. 

زينب بغيظ: طب مش هو هيتجوز عشان يخلف صح؟ لي انتي مش تنقيله العروسة بنفسك. 

هدي بحزن:  انا انقي له اللي هيتجوزها هو انا اعرف حد يا حسرة. 

زينب بحماس:  ما انا موجوده اهو.. قصدي يعني يتجوزني انا علي الاقل انا وانتي ولاد خالة و مش هنكون زي الضراير .. هنكون اخوات و عيالي هما عيالك في المستقبل. 

هدي بصدمة:  انتي بتقولي اي يا زينب عاوزة تتجوزي جوزي؟ 

زينب بغيظ:  ما هو كدا كدا هيتجوز.. فيها اي لو اتجوزته واحنا اهل كلنا. 

هدي بغضب:  انتي حاطه عينك عليه بقا من زمان مش كدا. 

زينب بتوتر:  احط اي انا مش قصدي علي فكرة انا عاوزة مصلحتك مش اكتر مش احسن ما يحب اللي هيتجوزها دي و تطردك من البيت. 

.. بيدخل مازن بابتسامة و ماسك ايد بنت منقبة... 

بصوا له باستغراب.. 

مازن بابتسامة:  خشي يا فريدة... هدي احب اقدم لك فريدة مراتي. 

هدي بابتسامة:  تعالي يا حبيبتي نورتي بيتك متتكسفيش. 

فريدة دخلت بتوتر ودموعها نازلة تحت النقاب... 

هدي بحنان:  مالك خايفه لي وبعدين مش كنت تقولي يا مازن انك هتتجوزها بسرعه كدا كنت اجهز ليها اوضتها. 

زينب بغيظ:  وهي دي بقا اللي انت اختارتها الف مبروك. 

مازن ببرود:  الله يبارك فيكي يلا يا فريدة خشي مع هدي هتوريكي اوضتك ومش عاوزك تقلقي خالص هدي طيبة و بنت اصول. 

فريدة بتوتر:  حاضر اتفضلي يا طنط هدي. 

هدي بابتسامة:   طنط اي انا زي اختك الكبيرة بلاش طنط دي. 

فريدة ابتسمت ودخلت معاها الاوضة

اول ما دخلت هدي زقتها علي الارض.. 

هدي بغل مسكتها من دراعها وقالت بهمس: لو فتحتي بوقك هجيب اجلك... قوليلي بقي هيا مين دي اللي طنط يا روح امك ازاي تتجرأي وتتجوزي جوزي هااا انتي فاكراني هسكت لك وهسيبهولك تبقي غلطانه دا اللي جاي كله دمار عليكي وعلي اهلك. 

فريدة بألم وصدمة:  انتي كنتي بتعامليني كويس برا. 

هدي بغل:  دا قدامهم بس تعرفي لو حد عرف اي حاجه بتحصل بينا صدقيني هشوهك خالص فاهمه وريني وشك اما اشوف البيه جابلي اي. 

.. شدت النقاب من عليها بغيرة... 

فريدة كانت احلى واصغر منها بكتير.. 

هدي بغيرة وحقد:  انتي مش حلوة اوي يعني عشان يبص لك. 

فريدة بقهر:  والله العظيم انا وافقت غصب عني اكيد مفيش بنت هترضا تكون زوجه تانية. 

هدي بغل:  انتي هتعمليهم عليا مين اللي غصبك يا روح امك. 

فريدة بكسرة:  جوز امي ما صدق حد يتقدم لي ووافق وكتبوا الكتاب علطول. 

هدي بسخرية:  تلاقيكي عاملة مصايب قد كدا عشان كده ما صدق انه خلص منك.

فريدة بحزن:  الله يسامحك انا والله في حالي وعارفة انك مقهورة بس صدقيني مليش ذنب. 

هدي اتنهدت: اوووف ... بصي انا اسفة علي اسلوبي معاكي بس انا فعلا موجوعه متزعليش مني. 

فريدة بحزن:  مش زعلانه انا حاسة بيكي والله وعندك حق في اي حاجه تعمليها. 

هدي بجمود:  هو انا اكيد مش هستحمل وجودك هنا و ممكن يكون وجودك تقيل عليا كمان لأنك هتشاركيني جوزي وحب عمري بس هحاول اتأقلم

. 

.. هدي ابتسمت وخرجت و فريدة بصت لطيفها بحزن

.. 

عند مازن... 

كان قاعد بيلعب في التليفون زينب قربت قعدت جنبه. 

زينب بدلع: كنت عايزة أكلمك في حاجة يعني ليه عملت كدا واتجوزت. 

مازن ببرود : عملت إيه  يعني يا زينب اتجوزت دا حقي وشرع ربنا و مراتي نفسها موافقة. 

زينب بحزن مصطنع: مش قصدي على الجواز نفسه يا حبيبي قصدي ليه فريدة تحديداً اي عجبك فيها . 

مازن بجمود : حبيب مين  الكلام ده ما يتقالش في بيتي وبعدين اختياري يخصني ولا كنتي فاكرة إني مش فاهم اللي كان بيدور بينك وبين هدى. 

زينب بتوتر : بيدور إيه يا مازن أنت فاهم غلط دي كلها كانت غيرة عليكم وبعدين أنا مش بعيدة عنكم كنت أنا أولى بيك يعني. 

مازن بسخرية : أنتي أولى اي يا زينب..  ضحكتيني والله  هدى دي بنت خالتك وأنتي إنسانة  رخيصة وأنا فاهمك كويس أنا عايز ست بيت محترمه وتكون أم لولادي مش زوجة تانية بتنافس الأولى على انها تكون ست البيت. 

زينب حطت إيدها بدلع على كتفه: بس أنا كنت هعمل اللي هدى ما عرفتش تعمله وكنت هحافظ عليك وعليها عشان إحنا أهل أنا أدلعك يا مازن وأنت محتاج الدلع ده أنا متأكدة من كلام كويس.. 

مازن نفض إيدها بقوة.

مازن بجمود : شوفي يا زينب أنا اتجوزت فريدة لأسباب تخصني  لوحدي وهيا دلوقتي مراتي ولو كلمة طلعت منك برا أو حسيت إنك بتدخلي في حياتي أنا وهدى صدقيني مش هتدخلي البيت ده تاني ولا تكلمي هدي نفسها و مظنش انه دا يفرق معاكي اصلا. 

زينب بغيظ: أنت كده بتظلمني أنا كنت فاكرة انك اكتر حد فاهمني كويس وان... 

مازن مُقاطعاً: لا وياريت تخليكي في حالك احسن ولمي كرامتك اللي بعترتيها دي. 

زينب بهمس : خسارة فيك الدلع يا مازن ماشي أنا مش هسكت على اللي حصل دا كله انا لسة ما خلصتش وبعدين ادي لنفسك فرصه تفكر حتي .

مازن بحدة : يوووه انا قولت اللي عندي يا زينب  . 

قبل ما زينب ترد الباب بيتفتح بهدوء.

هدى بابتسامة قرف : أنا اللي هرد عليكي يا زينب وبعدين أنتي لسه هنا ولسه بتحاولي تكسبي أي حاجة من جوزي 

زينب  ببجاحه : في اي يا هدي  انا كنت ببارك له على العوض الجديد وبصراحة كنت بسأله عن البنت المنقبة دي اللي أنا مش عارفة جابها منين أصلاً لا عارفين أصلها ولا فصلها ولا عارفين النقاب دا مداري وراه اي... لكن  أنا بنت خالتك أحسن منها ألف مرة وست بيت معروفة وكنت أصونك أنتي كمان واصون جوزك مش زي ضرتك اللي جابها جوا دي... دا ضفري برقبتها. 

مازن بغضب: زينب احترمي نفسك دي مراتي. 

زينب بغل:  انا محترمة نفسي المنقبات دول اغلبهم بيتدارو فيها  . 

هدى بغضب : أنتي مالك يا زينب..مازن هو اللي اختارها وأنا راضية بيه وهي ست محترمة أحسن من واحده بتحاول تخطف جوز بنت خالتها اطلعي برا يالله انتي اتكشفتي علي حقيقتك 

زينب بسخرية: أطلع برا؟  بتطردي اللي من دمك وكمان أنتي اللي بتدافعي عن ضرتك يا هدي؟ لا برافو عليكي  بس فيه سؤال محيرني بعد كل اللي بتعمليه ده ودفاعك عن ضرتك.. هتعرفي تخلفي ولا في الآخر هتفضلي أرض بور كده وفي الاخر ضرتك هتخلي مازن يطردك برا زي الكلاب؟ 

.. مازن عينه بتوسع من الصدمة هو وهدي .... 

زينب ببرود : بتبصيلي كده ليه؟هو انتي فاكرة نفسك هتعيشي طول عمرك ملكة وانتي عقيمه؟ أنتي دلوقتي نص بيتك او كله بقا ليها هيا وصدقيني بكرا مازن وفريده هيزهقو منك ويرموكي في اقرب زبالة