سمعت صوت المسدج ، راحت مسكت الفون وبصِت فيه لاقتو كاتبلها " قوليلهم إنك نازلة تتمشي شوية وجايه أو رايحه لِواحدة من صحابك ومتخافيش مش هأخرك " 

بعتتلو مسدج وقالت " تمام هظبط أموري بس هتوديني فين ؟ " 

رد عليها وقال " فين دي سيبيها عليا لما تنزلي ، وأنا 7 بالدقيقه هرن عليكي أقولك نتقابل فين " 

سابت الفون من إيديها ودخلت لِمامتها وقالت : بقولك يا ست الكل 

ردت سعاد وقالت : مفيش نزول 

قربت سندس وبا|ستها من خدها وقالت : ماما من فضلك ، مخنوقه والله من قاعدة البيت ، أنا من مدرسه لِبيت ومن بيت لِمدرسه فَعلشان خاطري خليني أروح أتمشي شوية أفك الخنقه اللي أنا فيها دي من فضلك..

فضلت تبو|س في خد سعاد لِحد ما قالتلها : هوفف يخربيتك خلاص هتنزلي إمتي ؟ 

إبتسمت وقالت : 7 يا قمرايه 

هزت سعاد راسها وقالت : خلاص ماشي بس وقت ما أرن عليكي وأقولك ترجعي تلفي وترجعي مفهوم!

با|ستها سندس من خدها وقالت : مفهوم يا ست الناس مفهوم

سابتها سندس ودخلت أوضتها وهي بتنقي طقم حلو ومُناسب تلبسو وتنزل بيه وهي بتفكر فيه كتير 

| الساعه7 مساءً |

كانت واقفه قدام المرايه بتظبط شعرها ولقِت فونها بينور وهو بيتهز علي التسريحة 

مسكت الفون وفتحت وقالت : ألو..

جالها صوت حمزة وهو بيقول : هي مدرستك بعيدة عن البيت بتاعك ؟

سندس : تؤ مش بعيدة ولا حاجة 

حمزة : تمام تعالي عند الكافيه اللي بتقعدي فيه دا نتقابل هناك 

كشرت وقالت : هنقعد فيه ؟

ضحك حمزة وقال : الصبح بقولك متجيش فيه ودلوقتي أخدك فيه! ، أكيد لأ طبعاً ، بس هنتقابل هناك قدامو وهاخدك وأمشي

إبتسمت وقالت : تمام ، مسافة السكه

قفلت معاه وبصِت بصه أخيره علي شكلها وخرجت من الأوضة وقالت بِصوت عالي : سُعاد 

ردت سُعاد وقالت : خلاص روحي معاكي فلوس الأول ؟

فتحت سندس شنطتها الصغيرة وبصِت فيها وقالت : معايا ، يلا باي 

فتحت باب شقتهم ونزلت وهي مبسوطة أوي 

ركبت تاكسي ونزلت عند الكافيه اللي جمب مدرستها 

أول ما نزلت لقِت حمزة واقف ساند علي عربيه وباصص للسما 

قربت منو وكحت 

نزل راسو وبصلها من فوق لِتحت بإعجاب وقال : إزيك ؟

إبتسمت وقالت : تمام 

بعد عن العربيه وقال وهو بيفتحلها الباب : إركبي

بصِت لِباب العربيه المفتوح وبصتلو قام هو قال : دي عربيتي متقلقيش هنستعملها بس نروح بيها مكان 

هزت راسها وركبت وهو قفل الباب ولف وركب هو كمان

بصتلو وقالت : هنروح فين ؟

إبتسم وقال : هوديكي كافيه بحب أقعد فيه دايماً 

هزت راسها وبصِت ناحيه الشباك وهي ساكته بس بتفرك في إيديها 

ضحك حمزة وقال : متوترة ليه يا سندس ، متقلقيش مش هخ|طفك 

بصتلو وإبتسمت وقالت : مفيش بس..يعني أول مره أخرج مع شاب وكدا فَبالنسبالي الموضوع أول مرة وتوتر وكدا 

إبتسم وقال : متقلقيش ، أنا مش من شباب اليومين دول ، مش هعمل فيكي حاجة وحشه 

إبتسمت ومردتش وبصِت للشباك تاني

وقف العربيه قدام كافيه ونزل وفتحلها الباب ونزلت 

مد إيدو ليها وقال : تسمحيلي 

بصِت علي إيديه وبعدها بصتلو ومدت إيديها وحطتها في إيدو 

دخل بيها جوا الكافيه لاقتو كافيه كلو إزاز وبيطل علي البحر إبتسمت وهي سامعه صوت الموج الشديد مع الميوزك الهاديه وحاجة في منتهي الهدوء والروقان 

دخل وقعد بيها علي ترابيزة وقال : تحبي تشربي إيه ؟

إبتمست وقالت : مع الجو دا عايزة كوباية قهوة

طلب حمزة إتنين قهوة ليهم وفضل باصص ناحية الإزاز علي البحر وسندس كانت باصه بس من الوقت للتاني بتبصلو بِطرف عينيها لِحد ما هو قال فاجأه : ليه وافقتي أخرجك ؟ 

سندت خدها علي إيديها وهي بصالو وقالت : مش عارفه بس حسيتك جدع ، إستجدعتك من يوم ما سيبتني أمشي ومروحتش فتنت عليا وكمان ضر|بت الولد علشاني ، إنت ممكن تفتكر بسبب إن وافقت يبقا حصلت كتير لأ بالعكس ، دي أول مره أنزل مع شاب وأتعامل مع شاب أساساً ، صحابي كلهم بيكلمو ومرتبطين بس أنا دايماً بقولهم لأ النصيب والرسمي أحلي علشان معشمش قلبي وأوجعو 

إبتسم وقال : عجبني تفكيرك 

جات القهوة وفضلو قاعدين يهزرو ويضحكو سوا ويحكو عن ذكريات ليهم وهي إتعلقت بيه جداً