بكتب مسدج.. " فاضي شوية نشرب قهوة ف حتة بعيدة؟"

بعمل paused للغنوة، بدوس send بقوم أدخل البلكونة.

 وقبل ما أولع لمبة البلكونة النيون، بفتكر إنها اتحرقت مني ونسيت أشتري غيرها، بقعد على أرضية البلكونة على ضوء أباليج الشارع الصفرا، بسحب صينية فيها سبرتاية وكوباية فاضية، بولعها، بحط البراد اللي يدوب قدها، هعمل شاي زاردة..

 بضيف شاي ونعناع وسكر وماية، بحط الهاند وبسمع..

" اعزمني على نكتة جديدة وخلّي حساب الضحك عليّا، دا إحنا يا دوب، مالحقناش نقرا المكتوب، علشان نلقى هموم وقسية"

_ إنتي عارفة إنك حلوة؟ 

_ عارفة.

_ يا باي عليكي، رخمة..

_ برضه عارفة.

_ شيلي صورك طيب.

_ غيران؟

_ إحنا صحاب هغير ليه، إنتي بس اللي بتحلوي بشكل مبالغ.

_ رخم.

_ حلوة، حلوة كتير، مصنوعة من السكر.

الشاي بيغلي، بفتح غطا البراد، بقلب وبضيف نعناع تاني، بنفخ ف الدُبارة، بتنطفي، اممممم زينا، بصب الشاي وبحاوط الكوباية بإيديا الاتنين، الهوا بيطير شعري، بلمه كحكة لفوق، وبسيب كام خصلة وقعوا مني.. 

"عارفك مشغول الأيام دي، ما أنا زيك بس عندي حكايات صعب أخبيها، واكمنك داري بحالي، مذاكرني وعارف مالي، مستني عشان أحكيها" 

_ بقرا رواية الغريب لألبير كامو.

_ باكل رنجة.

_ قطعتي بطاطس طبعًا..

_ أكيد، ومولعة ع الشاي.

_ إنتي حلوة..

_ إنت لطيف.

_ بحبك.

_....

ما برودش..

باخد شفطة من كوباية الشاي، ماكنش ينفع يعترف بيها، إحنا صحاب وجيران، بين أي اتنين كلمة بحبك بتمحي الصعوبات، لكن بيني وبينه هو بالذات بحبك يعني هجر.بُعد

ليه قالها، ليه عاوز يمشي؟

"موج الدنيا أناني وعالي، وإنت لوحدك وأنا لسه لي، عمر هعيشه معاك.. لو يوم"

صوت رنة الموبايل، بشوف رقمه، بقرأ:

_ " ليل هو الراجل اللي على أول الشارع بيبيع شاي باللبن؟"

_ اسمها إمه.

_ عنده ولا لأ يا لِمضة؟

_ خلي الشاي باللبن عليا، ومتعملش دوشة في البلكونة عشان ماما متصحاش..

_ لأ ما أنا هحكي لك عن حاجات كتير حصلت وإنتي مخصماني وغالبًا أمي وأمك هيصحو وهيقولوا الجملة المعتادة

بنقولها في صوت واحد" ما تتجوزوا بدل وقفة البلكونات دي، موقفين حال بعض على الفاضي.

بنضحك سوا

 باخد شفطة من الشاي ببعت: 

_ " هات بقسماط بالسمسم علشان نسقي" 

_ " مجنونة، هنرجع نعمل قلق؟ بقالك فترة مش بتبعتي سندوتشات جبنة شيدر بالكابوتشي، بليل لما أجي نقعد ف البلكونة وتعملي لي سندوتشات وشاي باللبن، هجيب لك مكسرات وويفر ونناول لبعض، أو نقعد على السلم نحكي..

_ يا ابني ارحمني مامتك اخدة موقف مني عاوزها تتخانق معايا إنت.

_ محدش هيزعلك طول ما أنا عايش، وعلى فكرة بحبك ومش ذنبك إنك شايفة إننا مننفعش غير صحاب، وعلى فكرة إنتي بتحبيني وأوي كمان بس خوافة" 

بضحك والغنوة بتكمل "ماشي براحتك بس راهنني، على يوم منّك وسنين مني، إنك مابتعرفش تعوم، ومايهمكش عادي، مش وقت عتاب أو لوم"

ببعت له مع أخر شفطة "فيها إيه لو نرجع تاني، وبدل ما تكون وحداني، تسندني معاك ونقوم،.

ببعت له..

_صحبك على عيبه، هات لي لب مع السوداني وإنت جاي وإدهوني مالبلكونة، متخافش صالحت طنط، دخلت لها باستا فلورا، هتقعد لها كام يوم يوم راضية عننا.

ـ بيقولوا سحرالي، لما أنا من غير أسحار وواقع من الدور التلاتشر أومال لو سحرالي هعمل إيه؟

ببتسم وبستناه في البلكونة.