كنت قاعدة بقرأ قرآن لما أحمد جه وقالي

_ حور أنا عايز أتجوز 

حسيت بقشعريرة وخبطة في قلبي 

غمضت عيني وخدت نَفَس عميق

رفعت عيوني اتلاقت مع عيونه

مكانش أحمد الي أنا أعرفه 

عيونه باهتة ميتة 

تعبيرات وشه متجمدة

مفيش أي مشاعر 

توتر، حزن، ترقب، شفقة، فرح

حرفيا ولا حاجة 

قلتله بصوت طلعته ثابت بالعافية 

_ متأكد ؟ 

هز راسه ب آه

اتعدلت وقعدت قريبة منه علشان ينتبهلي 

_ أحمد انت مش كويس، مش مهيأ تاخد قرار زي دا دلوقتي

مردش عليا وفصل باصصلي بثبات

فهمت إنه خد قراره خلاص 

قرر يلبي رغبة والدته رحمة بيها

ولا هو فعلا اقتنع بإنه محتاج يجيب عيل؟ 

نزلت راسي وفضلت باصة على الأرض شوية 

مش أنا الي كنت بزن عليه يتجوز؟ 

لي موجوعة أوي كدا دلوقتي 

لي حاسة بتقل على قلبي

لي هعيط 

حبست دموعي ودفنتها جوايا 

مش عايزاه يرجع في قراره بسببي

دا الأفضل ليه

مسكت ايده وقلتله 

_ انت عارف إني أكبر داعم للقرار دا ، عايزاك تعرف كمان إني بحبك جدا صعب عليا إن واحدة تانية تشاركني فيك ، بس أنا من حبي فيك راضية أضحي بنص منك علشانك .

قام أحمد ومشي من غير ولا كلمة 

وفرشت أنا المصلاية صليت قيام ليل وقلت لربنا كل الي جوايا وأنا منهارة من العياط 

حسيت براحة نفسية وسكينة بردت قلبي 

تاني يوم اتقدم أحمد لمريم

معملوش حفلة خطوبة 

كتبو كتاب علطول 

بحكم إنهم عارفين بعض 

الموضوع كان سريع 

بس هي أصرت تعمل فرح 

أحمد كان رافض بس أمه كانت موافقة

أظن متخيلين السيناريو بعد كدا 

كنت شايفة تجهيزات زواجه بعيني

كل يوم كنت بنهار أكتر من الي قبله 

قصادها حماتي كانت بتتعافى بطريقة غريبة

لدرجة كنت هشك إنها كانت بتمثل 

لولا إني شفتها كانت تعبانة إزاي

عدت الأيام بصعوبة 

يوم ورا يوم لحد ما كملنا شهر 

خلال الشهر دا متكلمناش انا وأحمد خالص

كنت كل ما أحاول نتكلم يتهرب مني

بس بييجي يقولي آخر الأخبار من على الباب 

ويمشي قبل ما يسمع مني أي حاجة 

فهمت إنه خايف يواجهني ليرجع في قراره

مكانش واثق 

مكنتش هتكلم في الموضوع 

بس مكنتش عايزاه يأثر علينا

متتهدش علاقتنا

لكن للأسف واضح إنها كانت آمال

جه يوم الفرح

مكنتش عارفة أروح ولا لأ

أي حد عاقل مكاني مش هيروح

بس أنا خلاص خدت القرار 

فتحت التلفون طلعت اسم مالك 

رنيت عليه وقلتله 

_ مالك تعالى خدني عندك