كنت مرة ماشية على شط البحر في الشاطبي، قابلتني ست من اللي بيقروا الودع..

ـ تقري الودع يا انسه؟ 

مردتش عليها، بس هي كانت ماشية ورايا، كإنها قصداني، الناس كان بينادوها " يا غجرية سمرة" مكانتش بترد عليهم

مسكتني من إيدي، معرفش كان شكلها بالنسبة لي مخيف، كحلتها السايحة التقيلة، والدق عند دقنها..

حواجبها مرسومة بحدة..

ـ شكلك حلو بس نصيبك أعور، ملعونة من حياة تانية، مكتوب عليكي تحبي ومتطوليش..

فلتت إيديها..

روحت خيمة الخوص بتاعتي، لميت حاجتي وروحت على البيت!

بعد ما روحت البيت، وبغير هدومي، شوفت علامة إيد " الغجرية سمرة" على دراعي..

الدنيا علمتني محبش حاجة زيادة عن اللزوم، عشان كده أنا بخاف من اعترافات الحب، ولما عابد اعترف لي بحبه، اتخضيت وخوفت.

ليلة إمبارح كان مر على خصامنا ٣ شهور وأربع أيام و٨ ساعات.. 

طول الفترة دي كان بيصنع الصدف عشان يراضيني وأنا كنت مكابرة، وفي الأخر انهزمت..

بعت له يجيب حاجات حلوة وهو جاي، وإني هستناه في البلكونة..

عابد هو جاري الوسيم، اسمراني، عيونه بنية وعنده غمازات في وشه، طويل ورياضي بحكم شغله، مدرب في نادي حرس الحدود..

انتقل عندنا هو وطنط سهر مامته، بقاله ٨ سنين ساكن في نفس عمارتي، الشقة اللي جمبي، بتفصلنا حيطة بس! 

لو سألتوني إيه سبب الخصام الطويل ده هرد: 

ـــ قالي بحبك، وهو عارف إني رافضة الحب.

اتصالحنا إمبارح وأما قالي إنه " بيحبني" للمرة المعرفش الكام، حسيت إني مش عاوزة اخسره بشوية ظنون..

وهواجس، معقول حد متعلم زيي يصدق كلام عرافة غجرية!

قفلت المفكرة اللي بكتب فيها يومياتي، لما رن المنبه إن ده ميعاد نزولي الشغل!

نزلت وأنا بحط شنطتي على كتفي، سمعت صوت بابهم، لفيت راسي وغمزت له..

ضحك وشاور لي استنى لحد ما يلبس الكوتشي، بس طبعًا تجاهلته، لو كان عاوز يشوفني كان صحي بدري!

بعد دقيقتين..

لقيته ماشي جنبي من غير سلام..

ثانيتين صمت..

وبعدين قال اسمي كده.. 

ـ هند..

كإنه بينادي على حاجة ضاعت منه ولقاها.

ـ صباح الخير.

ـ صباح النور.

ـ صاحيه من غير ما تصدعينا بصوت فيروز على الصبح يعني؟

بصيت له من فوق لتحت" أكتر بصه بيكرهها" 

ضربني بصوباعه على راسي..

ـ ولما أصوت دلوقتي وأقول إنك حرامي..

ـ حلو، بس إنتي قدها يعني؟

حركت راسي يمين، شمال بغرور..

وإحنا مستنين الأسانسير ييجي، بص عليه لقاها لسه في الدور التاسع، حط ايديه الاتنين على باب الاسانسير وانا كنت في النص..

ـ إنت بتعمل إيه؟

ـ أنا حرامي..

ـ بطل هزار، الاسانسير في الخامس أهو وهيفتح..

ـ قولي انك بتحبيني يا إما خليهم يتفرجوا علينا..

إحنا في الدور التالت، وكنت مضطرة، ماكنش عندي اختيار..

ـ بحبك.

شال إيده بسرعة في نفس الوقت اللي الاسانسير قرر يتفتح لحظتها..

دخلنا الاسانسير..

كان حاطت إيده على راسه من ورا وبيبص لي ومبتسم..

وأنا كنت ببص على كل حاجة إلا هو!