مهما بلغ مستوى يقينك فى حالات التلبس وخبرتك لازم تفرق بوضوح بين المرض النفسى والمس الأرضى والتلبس قبل ما تتخذ إى إجراء، استخدام الكيان لقوته وصلنى لمرحلة اليقين التام لتواجده داخل جسد مروة. 

مفيش ريح بتعصف خارج العماره  عشان الباب يتقفل من تلقاء نفسه، والشباك إلى اترزع فى الحيط والبرودة المفاجأة إلى نزلت على الغرفه بتقولى ان الكيان بيتحاور معايا، بيقولى انا موجود هنا، ودا قلقنى جدا ،رغم انى نجحت فى استفزازة بسهوله وخليته يبعت رسايل إلا أنه ثقته فى نفسه ضخمه

الكيانات الضعيفه مش بتبعت رسايل ،بتختفى داخل الجسد لحد ما نجبرها على الظهور بالقوة، لكن دا كيان متمرس وعارف بيعمل ايه كويس.

استعذت بالله من الشيطان الرجيم وانا سامع صوت والدتى ووالدة مروة خارج الغرفه بيحاولو يفتحو الباب وبيسألو عن سبب غلقه، اول ضربة من الكيان محاولة تشتيتى وتفكيرى فى إيجاد مبرر مقنع لوالدة مروة ووالدتى ان الباب اتقفل من تلقاء نفسه وان وجودى مع مروه إلى فى نفس عمرى داخل غرفه مغلقه وجود بريء خاص بالعلاج.

كان لازم اتخلص من تشتتى قبل ما احارب الكيان ولأول مره أشعر بوجوده، مروه بتبصلى بسخريه مبتسمه وقفت جنب الباب حاولت افتحه وانا بطمن والدة مروه ان دا شغل الكيان المتلبس بنتها ،تسرعى فى تبرير نفسى ارتد على بالعكس ،هى ملبوسه يا احمد يا ابنى ؟ يا مرارى يا لهوى

انا والله كنت جايباك كده وكده عشان اطمن لكن مش للدرجه دى....

اوكرة الباب عصلجت كأنها مكسوره كان مستحيل افتح الباب من غير كسره وكنت مضطر لفتحه، قرأت قرأن وعزمت وطلبت المعونه ضميت قبضتى على اوكرة الباب وانا متأكد انه هينفتح، شديت الاوكره بكل عزمى وفجأه صرخت

معدن اوكرة الباب تحول لجمر ساخن لسع قبضة ايدى

رجعت خطوة لورا وانا عمال ابص فى ايدى إلى جلدها اتهرى

فيه ايه يا ابنى خضتنا عليك! ؟،اسمع صوتهم بره الغرفه وصوت الكيان يدوى داخلها بضحكه ساخره طويله.

حاولت اتمالك اعصابى ،مفيش حاجه رجلى خبطت فى الكرسى ،ياريت إلى حافظ فيكم قرأن يقراء والى مش حافظ يجيب مصحف ويقراء منه.

غمضت عنيه لحظه واحده، مش اول مره اتعامل مع كيان

لكن صحاب البيت بيكونو عارفين وموجودين ،هنا والد مروه ميعرفش ورافض الفكره واعتقادى ان الكيان بيلعب على النقطه دى حضور والد مروه من الخارج لان جارتى وداد قالت انه هيرجع كمان شويه.

كان لازم أواجه الكيان اصفعه اوضحله انى كمان قوى استدرت وعلى لسانى هردد الاذان..

ثم تسمرت فى مكانى ،تفاجأت ان مروه كانت واقفه خلف ضهرى تماما ولما لفيت جسمى بقى مقابلة جسمها لدرجة التلامس.

أنفاس فمها المنفره المتعفنه التى تحمل قذارات الكيان بتدخل جوة فمى ،نفس النظره الميته الساخرة والابتسامه المرعبه ،ولأول مره اسأل نفسى هل انا بدفع تمن ثقتى الزائدة فى عدم إحضار مرافق لى فى الجلسه ؟

لكن دا مش بيحصل إلا فى حالات طرد الجان العلوى او أمراء الشياطين ودا شيء نادر الحدوث مش بتقابله غير مره فى العمر ويمكن ميحصلش وطوال مرافقتى لشيخى فخر الدين الرازى مقابلتش حاله ذى كده، لكن فى دفاتر الشيخ كان فى حاله قرأت عنها تعامل معاها فى ليبيا..

مجرد اكتشافى للحقيقه خلى جسمى يرتعش غصب عنى

غلط، غلط، عارف ان المعالج مش لازم يدخل قلبه الخوف ولا يظهر قدام الكيان لأنه حامل كتاب الله ومحمى بيه

همست مروه بصوتها العادى __مش هتقراء قرأن يا احممممممد ولا ايه  ؟

قلت فى محاوله للثبات هقراء وهتخرج...

لم ينفعل الكيان لم يسخر منى هذه المره

رفعت مروة أيدها طيب يلا ،يمكن يطلع صوتك حلو ذى بتوع إذاعة القرأن الكريم.

جوايا كنت عارف ان الكيان انتصر عليه من زمان، دا حتى مكلفش نفسه يتكلم بصوته الحقيقى  بيتكلم بصوت مروه

الكيان ببساطه بيستلى بيا دا مصطلح متعارف عليه لما يكون المعالج ضعيف لكن هنا فيه حاجه غامضه شويه، الكيان اكتشف ضعفى ليه مش بيحاول يستخدمه ؟

ليه مكتفى بالتسليه والسخريه منى ؟ دا يقدر كمان يتلاعب بى ويمارس عليه قوته ويتلبسنى، ليه محاولش يظهر بصورته الحقيقيه..

لكن مجرد وجود مروه قدام وشى بحجم السخريه والاستفزاز ضيع اخر ذرة يقين وثبات عنى.

مروه رجعت قعدت على السرير وعملت حركه قذره

وقالت احممممممد _ طالما مش هتقراء وتسمعنى صوتك العذب ،امشى وبعد ما كانت مديانى ضهرها استدارت تانى وبصت عليه بنظره متفحصه وهزت كتفها أكثر من مره وبقها سال منه اللعاب،

وهمست  روح يا احمد، ارجع لكتبك وصلاتك ومكتبك ،اخرج لأن والدى تحت العماره ، اعتبرها خدمه يا احمد ،كادوة

خدمه بلا مقابل، الباب المقفول انفتح من تلقاء نفسه، ثم اطبق فم مروة على بعضه وصمتت

الكيان حس بالملل، كنت عارف انك مش لازم تصدق اى حرف يقوله كيان شرير، بس انا صدقتة.

طلعت من الغرفه مهتز بلا ثقه بجر رجليه بالعافيه

يلا بينا يا امى عم فتحى والد مروة  على السلم زمانه طالع دلوقتى ،تركت  نظرات وداد والدة مروة تلتهمنى بالاسأله

وخرجنا من الشقه واحنا بنفتح باب شقتنا والد مروه وصل ودخل شقته.

مردتش على كلام والدتى واسألتها إلى ملهاش نهايه ،دخلت غرفتى وقفلت الباب على نفسى، انا انهزمت ،مش بس خسرت، لا دا كمان الكيان تلاعب بيا ذى ما هو عايز وفى الآخر صفح عنى مرضيش يأذينى ،منكرش ان كل الحالات الى عالجتها الرقيه الشرعيه كانت كفيله، حالات سهله

لكن مع مروة فمى كان رافض الكلام مقدرتش حتى اقول إلى أنا حافظه واتعلمته..

عاقبت نفسى ولمتها كتير اوى، رفضت الاكل مع والدتى ،ودى كانت اسوء ليله فى حياتى ،مش قادر افتح كتاب ولا مصحف

لكن الواجب كان بيحتم عليه اقول لوالدتى الحقيقه

جبتها قدامى وقلتلها ان مروة عليها كيان شرير قوى ولازم تتعالج بسرعه قبل ما يقضى عليها ،انصحى والدتها تجيب معالج خبره مشهور لانى مش هقدر اعالجها

انا أضعف من انى اعالجها يا امى ،والدتى حاولت تواسينى

متزعلش نفسك يا احمد، المهم انك دخلت عندها وخرجت سليم يا ابنى ودى مش حاجه سهله، لو كان كيان قوى وانا ضعيف كان زمانه اتغذى عليك ،لكنك خرجت سليم يمكن لأن الكيان كان خايف منك أو يمكن لانك قوى.

عن اى قوة تتحدث والدتى ؟  وانا الى هربت من داخل الغرفه بعد ما الكيان ما عمل الى هو عايزه؟..

الأمور تطورت بسرعه، كأن الكيان كان منتظر دخولى عنده عشان ينفجر ويظهر قوته ،مروة اختلت خالص، صراخ من الوجع، تكسير المعدات والاثاث ،كلام فاحش ،حركات لا منطقيه كانت بتعملها ،والدها عرضها على اكتر من عشرة دكاتره نفسين ،جرعات علاج وكهربه واخيرا رضخ لرأى مراته

وجاب شيخ يعالجها بعد ما خطيبها فسخ الخطوبه ولغى الجواز.. الشيخ مقدرش يتعامل مع الكيان وبقول كده لأن الكيان لم يمنحه إى فرصه، الشيخ خرج من داخل غرفتها يصرخ، ،يركض مثل طفل مزعور كنت بسمع كلام والدتى بتحكى على الاكل واعمل نفسى مش واخد بالى، لكن انا كنت مركز فى كل حرف، ووصل شيخ تانى وتالت من غير فايده

الكيان إلى كان رحيم معايا كان بيبهدلهم، من اول تمزيق الملابس، وضرب، وتبول ،لحد ما عرفت من، والدتى ان فيه معالج كبير هيوصل عشان يعالج مروه ،كنت اسمع عن المعالج دة واعرف قوته الكبيره فى محاربة الكيانات وانه هيقدر يخلص مروه من شره وترقبت وصوله وانا بعد كل دقيقه

والدتى قالت لو عايز تروح تتابع روح يا ابنى يمكن تتعلم حاجه.