صوت خبط ورزع جاي من بلكونتي، بلبس روبي الشتوي وبطلع أشوف في إيه..

صوت مبحوح من تحت بيتكلم وأنا ساكنة في الدور الرابع..

_ بس، بس، يا أبو الغباء إنتي..

بضحك وبلاقيه عابد جاري في الشقة اللي جمبي ومساحتي الآمنة، بكلمه بنفس تون الصوت عشان مامتي ومامته ما يسمعوناش.

=عاوز إيه؟

_ عاوزك..

= بطل هزار إخلص عاوز إيه؟ 

_ تعالي معايا نروح المكس..

= دلوقتي؟

_ الساعة لسه ٦ يا أوفر، أنا سيبت النادي والتدريب عشان نروح نشوف ظاهرة اصطفاف الكواكب سوا..

= بس أنا مش عاملة حسابي، شكلي منعكش أوي، هاخد وقت..

_ استنيتك سنين جات على ساعة، روحي الله يهديكي البسي ومتتأخريش، العربية موجودة في الشارع اللي ورانا عشان اللي بالي بالك، اعملي لي سندوتش جبنة بالطماطم ملحقتش أكل..

= حاضر..

_ لو جه ساقع هغرقك في البحر..

= كفاية صياح قلت حاضر.

بجري على اوضتي أختار طقم حلو..

لبست جيبة سودا فيها كسرات كتيرة، وجاكت بيج قصير الجو في إسكندرية مش مضمون، رفعت شعري ديل حصان، وطبعًا منستش الروج البرجاندي المفضل ليا، جريت على المطبخ وعملت سندوتش جبنة بالطماطم لصالح ونزلت لقيته ساند على العربية وبيبتسم وكالعادة فاتح دراعاته..

_ القمر بنفسه قصادي..

= لم دراعاتك دي الأول وخد سندوتش الجبنة بالطماطم، بذمتك مش المفروض تعزمني على الغدا..

ــ واقع من الجوع 

= يا سلام

بيبتسم بخبث، بياخد إيدي ويبوسها فبتصدم..

_ بتلكك عشان أبوس إيدك وأنا بقولك تسلم إيدك..

بتوتر وبضربه على راسه..

_ شغلي لنا طيب حاجة لطيفة لحد ما نوصل..

" حبيت كتير وفارقت كتير، أنا عمري كله أنصاص مشاير، وإزاي هفكر قبل ما أحب والحب أسرع من التفكير" 

_ إنتي يا نكدية، طفي الزفت اللي بينوح ده، عاوزة جنازة وتشبعي فيها لطم.

بكمل غنى..

"يلي إنت قلبك ياما أذاك، تهرب لفين من شيء جواك، وتخبي نفسك فين من الحب، كل السكك بتودي هناك" 

= أتصدق الأغنية دي شبهي..

_ ده أنا ما شوفتش أبطء منك ١٠ سنين loyel لشخص مش موجود..

= ملكش دعوة وسوق وإنت ساكت.

بيشد فرامل وبيتكلم بعصبية وصوت عالي..

_ مش هسكت، إنتي هتفوقي إمتى؟ عمرك بيجري قصاد عينك مش صعبان عليكي أهلك؟ بلاش إنتي نفسك مش حباها للدرجة دي، رامية نفسك بين أطلال راجل محدش عارف هو عايش حتى ولا ميت! 

= قلت لك أسكت..

بنسكت إحنا الاتنين، هو بيكمل سواقة وأنا بفتح الشباك أبص على الناس يمكن ألاقي حد شبهي يحس بيا..

عابد فاكر إني مش عاوزة أنسى، أنا بحاول أنسى،  بس مش قادرة أرمي روحي في حدوتة ويتكرر نفس السيناريو، مش عارفة أدي الثقة لحد تاني ويخذلني، شعور الأمان اتسلب مني مرتين مرة يوم موت أبويا ومرة يوم ما صحيت لقيت بحر اتبخر.

بيقطع صوت سكاتي..

_ أنا آسف..

= بسيطة.

_ أنا بجد أسف، ماكنش يصح أنفعل عليكي بالشكل ده ولا كان يصح أقولك الكلام ده..

= إنت مقولتش حاجة جديدة يا عابد، أنا كل يوم بقول لنفسي كده، أنا بحاول والله بس بفشل..

_ امممم، يبقى لسه بتحبيه؟

= لأ، أنا خلصت وبطلت أحب بحر من زمان، أنا بحاول أتخطى إني كنت العبيطة في رواية أحدهم، أنا لو اقدر أثق في حد كل مشاكلي هتتحل، بس مش شايفة حد ينفع..

_ مش شايفة يا هند يا حبيبتي، ألف سلامة اتعميني في عينك..

بنضحك سوا..

_ عيطي لو ده هيريحك بدل ما إنتي بتتلاشي تبصي لي، بالمناسبة مش أول مرة أشوفك والكحل سايح وحالتك كرب..

= بطل بقى غلاسة..

_ يلا الله لا يسيئك، وصلنا الشط، لا ولابس ومتأنتك وهربان من شغلي وتقولي مش شايفة..

= بطل برطمة..

بننزل من العربية ونمشي لحد البرجولة اللي يعتبر بتاعتنا مكانها جمب الفنار الأسود، عم درويش حارس الشط بيبتسم لنا وبيعمل بإيده حركة" تشربوا شاي" بنحرك راسنا إننا موافقين نشرب أحلى واروق شاي بالنعناع على راكية العم درويش..

_ هو أنا شخص وحش؟

= لأ طبعًا، مين قال كده.

_ هل كذبت عليكي في يوم؟

= لا إله إلا الله، عاوز توصل لإيه؟

_ ردي عليا يا ستي، اعتبريني العبيط في روايتك.

= ماشوفتش منك غير كل خير ورعاية، إنت مستحملني على الدوشة اللي عملاهالك.

_ جميل، هل أنا إنسان ينفع حد ما يثقش فيه؟

= مين الأعمى اللي قال عليك كده، قولي مين واحدة ولا واحد وأروح واضربهولك..

_ إنتي العامية.

 أول مرة أحس إن عابد قلبه موجوع بسببي، الشخص اللي دايمًا بيضحك فجأة حزن العالم كله اتجمع في وشه وف رعشة إيده.

= مش عاوزة أخسرك، أنا لو خسرتك إنت كمان مش هيبقالي حاجة تانية في الدنيا اتسند عليها.

_ تفتكري هقعد مستنيكي تحني عليا وتبصي لي برضا ومحبة لحد إمتى؟ أنا مش عاوز عمري يجري وإنتي مش قدامي، أنا قلبي وعى عليكي، بتهيألي استاهل فرصة عندك..

= الصحوبية سهل تقلب حب لكن الحب صعب يرجع لصحوبية، مش عاوزة أقول "يا ريتنا فضلنا صحاب" 

_ هنبقى أحلى اتنين صحاب وحبايب وزوجين في الدنيا، أي نعم إنتي زنانة وعندك ربع ضارب بس حلوة لدرجة تذهب العقل! 

= وإنت عاوز عقلك يذهب..

_ طب ما أنا كده كده عقلي وقلبي عندك مختلفناش يعني، يا ستي اتجوزيني واكسبي ثوابي، على الأقل مش هعرف اختفي إنتي عارفة عيلتي نفر نفر..

قاطعته..

= بص يا عابد في نجوم كتير متجمعة..

_ ردك وصلني.

بيوصل عم درويش بالشاي، بنشكره، ببص للسما وهو بيبص لي.

= موافقة بس مترجعش تشتكي.

ـ يعني بجد هتتجوزيني؟

ـ مين اللي بيزن دلوقتي؟ اديني فرصة طيب استوعب النقلة اللي هنعملها دي..

= انتي لو استوعبتي مش هيحصل حاجة، خلينا ناخدك كده وإنتي مش فاهمه، واستوعبي براحتك في بيتنا.

بيقوم ياخد إيدي وبيتنطط، بسند براسي على كتفه..