يمنى باستغراب : هيا اللعبة دي بتبصلي كدة ليه ؟

ليلة : دي حلا صاحبتي .. تعالي يا بت اعرفك على مامي

حلا بتوتر : بعدين بعدين .. سلامو عليكو

يمنى : الصوت ده مش غريب عليا

دينا : عادي دي الهبلة بتاعتنا

يمنى بشك : طب ليه ما تقلع الراس ده و توريني وشها .. هيا خايفة من حاجة ؟

حلا باندفاع : و هخاف ليه ؟ اتفضلو الناس مستنينا جوا

يمنى بصدمة : معقولة انتي حلا حسين ؟!

حلا بتوتر : حسين مين ؟!

دينا : ايوة هيا .. انتو تعرفو بعض ؟

يمنى بضحك : ايوة طبعا .. بس انتي ايه الي عمل فيكي كدة ؟!

خلعت حلا الرأس و قالت : اعمل ايه ده سبوع ابن اختي و قولت اعمل جو يعني

يمنى بضحك : مستحيل اصدق ان انتي انسة حلا بتاعة حقوق المرأة .. نهلة بتقول فيكي شعر على مدى انضباطك و هدوئك

ليلة : هدوء ايه و انضباط ايه يمامي … دي ما بتعملش حاجة غير الزعيق و الضرب

حلا : هو انتي يمنى مرات حازم الي بيقولو عليها دي ؟!

يمنى بضحك : ايوة انا يا خرابة البيوت العمرانة

حلا باحراج : ايه الكلام ده يا مدام يمنى .. ده شغلي

يمنى : شغلك بيقولك طلقي الستات من جوزاتها ؟! ده انتي خربتي بيت اخويا

حلا : انا مش بعمل حاجة غير اني انصح الستات عشان يفوقو .. ما الي بيحصل ده مش منطقي

يمنى : بس المفروض يكون عندك حدود واضحة .. مش نسخن الستات و خلاص

دينا : بعدين تبقو تتكلمو بالموضوع ده .. اتفضلو الناس مستنيا جوا

دلفت حلا بسرعة و بدأت بالرقص مع ليلة و كارما و الاطفال بشكل جنوني بينما انشغلت باقي البنات بتوزيع الضيافة و الهدايا على الحضور

دينا باستغراب : مين الي لابس بطوط ده ؟

لارا : مش عارفة .. ممكن قريبة حبيبة

دينا : لا بنات خالتها قاعدين هناك اهم .. معقولة فارس ؟!

لارا : لا فارس برا مع الاولاد .. بعدين لو دخل هنا جدو هينفخه

نظرت دينا له مجددا و جدته يقترب من ليلة و يرقص معها

دينا : باااااس .. ده مصطفى .. و ديني لانفخه

لارا بحماس : هروح اقول لجدو و يعاقبه ايه رأيك ؟!

دينا : اتلمي يا بت .. عايزة نعملك محكمة تانية ؟! .. هروح اخرجه قبل ما الستات تشوفه

ركضت دينا الى بطوط و شدته من الخلف ثم سحبته نحو الخارج

مصطفى : فيييي ايييه ما تسيبني ارقص معاهم

دينا بحدة : اتلم يالا انت بقيت راجل .. ازاي تدخل عند الستات كدة ؟!

مصطفى : فيها ايه دي حفلة يعني نرقص براحتنا بقا

دينا : اخرس لاحسن اقول لجدو و هو ينفخك

مصطفى بخوف : خلاص خلاص همشي .. بس و النبي ما تقوليش لحد

دينا : غور من هنا مش هقول حاجة

**********************

في المساء … انتهى الاحتفال و اجتمعت البنات في اوضة حلا و دينا

فريدة بعناد : برضو لازم تتعاقب يا دينا .. الي عملته مش حاجة عادية

دينا : بقولك الفكرة كانت فكرة زيزي

حلا : بس هيا الي نفذت يبقى لازم نأدبها

فريدة : صح .. اساسا موضوع الصمت العقابي ده عبط المفروض شيلناها شغل البيت كله

كارما : انتو بجد معندكمش ريحة الدم .. حرام عليكي يا فريدة دي بنت عمنا

فريدة : اسكتي انتي .. بكرا لما تعمل كدة معاكي نشوف وقتها هتقولي ايه

غادة : فريدة .. المفروض انتي اكتر واحدة واعية هنا .. عيب تفكري بالقسوة دي .. احنا اتفقنا من البداية اننا عايزين نساعدها تتغير مش ننتقم و خلاص

دينا : صح .. كان هدفنا شريف و الموضوع بالاول و الاخر يخصني لوحدي

فريدة : لا مش لوحدك .. طالما اعلنا الحرب يبقى يخصنا كلنا

دينا : يا فريدة افهمي .. لارا اتعرضت للتنمر و دي حاجة صعبة جدا .. تريقتنا عليها هي الي وصلتها للمرحلة دي … احنا كلنا بنجرحها من غير ما نحس … محدش هنا بيدافع عنها و على طول بتتظلم من الي حواليها .. انا بعد ما سمعتها اتعاطفت معاها بصراحة

حلا : لا حنينة اوي يا بت

دينا : حلا اتلمي .. مش كفاية فضحتينا النهاردة

حلا : انا كنت بعمل جو بس

غادة : كفاية يا جماعة .. انا بقول ان احنا كمان لازم نرجع نتكلم مع لارا كويس .. احنا اهلها المفروض نوعيها

فريدة : اختك ما اتربتش و احنا بنحاول نربيها

غادة بنرفزة : فريدة كفاية كدة

دينا : بصو .. انا قدامكم اهو .. اوعدكم لو حسنتو معاملتكم ليها هتتغير و تبقى بني ادمة طبيعية .. انا متأكدة

حلا : ليه هو احنا بنعملها ايه يعني ؟! ما احنا بنتعامل معاها عادي

دينا : لا طبعا .. لازم نعاملها باسلوب مختلف تماما عن ده

غادة باستغراب : الي هو ازاي يعني ؟؟

دينا بخبث : لازم نجاملها كتير .. نسمعها كلام معسول يرفعلها الادرينالين .. نخلي رقبتها زي الزرافة من كتر المدح

حلا بانفعال : هنعمل ايه يعني اكتر من كدة ؟ نبوسها من بوقها عشان تستريحي ؟!

دينا : اتلمي يا زبالة .. قصدي لما نكلمها لازم نحسسها قد ايه هيا مميزة .. و لما بتعمل حاجة نقولها شاطرة و مفيش احسن منك و من الكلام ده

حلا : اه قصدك نكدب عليها يعني … اشطا و لا يهمك

غادة : ده مش كدب .. ده من باب جبر الخواطر … و الكلمة الطيبة صدقة يا حلا

حلا : اوك بس لو فقعتلي مرارتي هبعترها

كارما : و الله لارا طيبة بس انتو مش فاهمينها

دينا : عشان كدة بنحاول نساعدها يا كرملة .. عايزينها تظهر الجانب الكويس و تسيب الدبش بتاعها ده

كارما : انا كلمت جدو عشان يصالحها .. ده اتعصب على طنط خديجة و قالها كلام صعب اوي

دينا : و الله طنطك خديجة دي سبب كل مصايب البيت ده

غادة بحدة : دينا اتلمي

فريدة : فين حبيبة يا بنات ؟؟

حلا بضحكة : مودام حبيبة بقت ست و بتقعد مع الكبار .. ما سابتش جوزها من ساعة ما وصل

دينا بسخرية : فترة بسيطة جدا و تبقي زيها .. يمنى سألت عليكي و عايزة تكلمك على الجمعية و قرفها

حلا بغضب : دينا اخرسي و ما تشتميش الجمعية بتاعتي

غادة : يعني تشتمك انتي عادي ؟

حلا : اه .. كله الا شغلي

********************

في الاسفل

كانت يمنى تحمل كنان و تلاعبه بابتسامة

يمنى : ربنا يخليهولك و تفرحي بيه يا رب

ابتسمت حبيبة و استلطفتها

حازم : ليلة يلا اطلعي هاتي حاجتك عشان نمشي

زياد : تمشي فين يعم ؟! انت مش هتحضر الفرح ؟

حازم : لا هحضر بس اجرت شقة هنا عشان نسيبكم براحتكم

زياد : كدة برضو يا زوما ؟ ده احنا اهل .. مفيش مرواح على حتة … هتبات هنا و الا هسلط عليك جدي

حازم بتحذير : زياااد .. انت عارف طبعي ما بحبش الدوشة

زياد : طب خلاص امشو انتو و سيب ليلة هنا

حازم : لا بنتي وحشتني و عايز اشوفها

يمنى : يلا يا ليلة اجهزي

ليلة بضيق : مش عايزة امشي يمامي .. روحو انتو و بعد الفرح نسافر مع بعض

يمنى : ليلة .. هزعل منك

ليلة برجاء : انا بحب البيت ده اوي و اتعودت على جدو عبدالله و البنات .. مش عايزة اسيبهم يمامي عشان خاطري

يمنى : ما احنا هنيجي هنا بكرا و بعده .. بس عيب تفضلي هنا لوحدك

ليلة : لا مش عيب .. دول اهلي

حبيبة : خلاص يا مدام يمنى سيبيها عندنا .. احنا كمان اتعودنا على وجودها وسطنا

يمنى : مش هينفع و الله .. بقالها فترة هنا و وحشتنا اوي

حازم : ليلة .. مش عايز اسمع اعتراض .. يلا اطلعي هاتي حاجتك بسرعة

دلفت حلا و غادة و دينا جلسن معهم

حبيبة : في ايه ؟!

حلا : مفيش يا ستهم .. جايين نرحب بالضيوف

ليلة برجاء : حلااا .. قولي لمامي تسيبني هنا

حلا : ليه يا يمنى هانم عايزاها تمشي ؟ سيبها يومين كمان مش هيجرا حاجة

يمنى : مينفعش و الله .. بقالها فترة طويلة هنا ما يصحش كدة

التفتت الى غادة و قالت : ازيك يا مدام غادة

غادة : الحمدلله

يمنى بابتسامة: زياد كان على طول بيكلمني عليكي .. مبسوطة اوي انكم هتتجوزو .. بجد زياد بيحبك اوي

حلا : و سي اوس ما كانش بيكلمك على حبيبة و لا ايه ؟!

يمنى : ليه هو احنا كنا بنشوفه اصلا ؟! ده كان على طول هو و حازم بالشغل ..بس بصراحة اتصدمت لما عرفت انك قريبته .. دلوقتي فهمت ليه نهلة كانت بتسألني عليه

حلا : ايه ده انتي ما شوفتيش اخر بودكاست ليا ؟! كان هو ضيف الحلقة

يمنى : لا و الله ما كانش عندي وقت .. بس فكرة ممتازة خصوصا ان شغله بيهتم بالمرأة .. ممكن يساعدك اكتر في الدعاية

حلا : طبعا طبعا .. اساسا اوس هو الي عرض عليا استضيفه بالبرنامج بتاعي .. و اكيد هيساعدني بالدعاية مش كدة يا حبيبة ؟

نظر لها الجميع بصدمة خصوصا اوس الذي انتبه لحديثها للتو

حبيبة باستنكار : هو الي عرض عليكي يا حلا ؟!

حلا : ما تركزيش معاها … انتي مش فاهمة انا و اوس علاقتنا اكتر من الاخوات و ما بيرفضليش طلب .. ده من كتر محبته ليا جيه يتجوز اختي

اوس بصدمة : اناااا ؟!

حلا : ايوة ده حتى كان مسميني الملاك الحارس .. و انا الي اقنعت بابا بموضوع خطوبتهم مش كدة يا حبيبة ؟!

حبيبة بذهول : حلا !!

حلا : عارفة اوس ده .. كان بيتحايل عليا دايما عشان اغطي على غياب حبيبة لما تخرج معاه .. و عشان احنا قريبين من بعض اوي مرة عرض عليا اتجوز صاحبه الضابط تخيلي

يمنى : ربنا يخليكم لبعض واضح انه بيحبكم اوي بصراحة

حلا : اومال ايييه .. ده احنا ايد وحدة كدة و عمره ما زعلني ابدا … خصوصا يعني بعد ما جوزته اختي الي طلعت عينه و عيني و احنا بنتحايل عليها عشان تصالحه

دينا بغيظ : اتفضلي انتحلي شخصيتي يا حلا هانم .. يلا .. مستنية ايه ؟!

غادة بهمس : حلا اتلمي .. حرام تكدبي كدة

زياد بضحك : يخربيتك يا شيخة .. ده انا صدقتك

حلا : احنا كدة عيلة بتحب الهزار و متمسكين ببعض اوي اوي

يمنى : و الله باين من غير ما تقولي … عشان كدة ليلة مصرة تفضل هنا

حلا : ايوة طبعا دي بقت وحدة مننا اصلا

يمنى : الا ايه حكاية العقوبة دي يا زياد ؟!

زياد باحراج : انتي عرفتي ؟

يمنى بتلاعب : ايوة .. سمعت انك بتتعاقب يا عريس

حلا بضحك : عريس مسخرة و الله

زياد لحلا : اتلمي … على اساس يعني انتي مش معاقبة ؟! احنا كلنا معاقبين هنا .. حتى ليلة معاقبة معانا

حازم : ليه عملت ايه ؟

زياد: اهدى يا عم …كلنا عملنا مش لوحدها يعني

يمنى بصدمة و ضحك : ثانية وحدة .. كلكم معاقبين ؟! يعني حبيبة هانم و مستر اوس برضو معاقبين ؟!

دينا بضحك : حبيبة هانم دي عمرها ما اتعاقبت .. و سي اوس مستبعد من العقوبة المرادي .. بس قبل كدة اتعاقب كتير

ادارت يمنى وجهها و حاولت اخفاء ضحكتها

حازم : و عشان كدة كنتو هتموتو على الاجازة انت و هو ؟!

زفر اوس بنفاذ صبر بينما زياد يحاول كتم ضحكته

وقف حازم و قال : طب عن اذنكم احنا اتاخرنا اوي

يمنى : ليلة .. يلا اطلعي هاتي حاجتك

ليلة بعبوس : مش عايزة امشي

دينا : كفاية يا جماعة سيبوها عندنا مش هناكلها يعني

حازم : مينفعش و الله …

دينا بمقاطعة : لا ينفع دي بنتنا اصلا .. يلا اتكلو على الله و عيشو حياتكم .. روح خد مراتك و عرفها على سوهاج .. ليلة بنتنا و هتفضل هنا لغاية فرح اخوها و لا ايه يا زيزو

زياد : انتي صح طبعا .. يومين مش هيأثرو يا زوما

حازم بزفير : ماشي .. يومين بس .. بعد الفرح على طول هاجي اخدها

*******************

دلفت حبيبة اوضتها و وضعت كنان في سريره بهدوء .. اقترب منها اوس و حضنها من الخلف

حبيبة بابتسامة : وحشتني اوي .. مش عارفة اليوم ده عدا ازاي و الله

اوس : دي اخر مرة اسافر من غيرك يا حبيبة .. انا لغاية دلوقتي ما نمتش من ساعة ما سافرت

حبيبة بدلع : ليه بقا ؟!

اوس : مش متعود انام بعيد عن حضن حبيبتي

حبيبة : تصدق انا كمان ما عرفتش انام ابدا .. و كل ما كنت امسك الموبايل و هكلمك خلاص ارجع اقول لا اكيد مشغول و تعبان

صمت اوس قليلا ثم قال : حبيبة … بعد الفرح هنمشي من هنا

استدارت له و قالت باستغراب : ليه ؟!

اوس : مش هينفع اسيب الشغل شهر كمان .. لو حصل اي خلل هبقى انا المسؤول .. و مش عايز مشكلة امبارح تتكرر

حبيبة : و جدو هيوافق ؟!

اوس :اكيد .. طالما حاجة فيها مصلحتنا هيوافق طبعا

حبيبة بضحك : على سيرة المصلحة .. ايه رأيك بكلام حلا ؟!

اوس بضحكة ساخرة : اختك دي عجيبة.. استغلالية لابعد الحدود .. اساسا هيا المصيبة الوحيدة بحياتي

حبيبة : حرام عليك و الله هيا طيبة اوي

اوس : ابوس ايديك اقفلي الموضوع ده و خلينا نتكلم باي حاجة تانية غيرها .. البنت دي بالذات مش بستحمل اسمع اسمها حتى

حبيبة بضحك : ماشي .. هغير هدومي و نتكلم

اوس بخبث : طب ايه مش عايزة حد يفكلك السوستة ؟

حبيبة بتحذير : اوس .. اتلم

اوس : طب يلا فكيها لوحدك

رفعت يدها للخلف و حاولت فكها بكل الطرق و لكنها فشلت

اوس بتلاعب : ها ؟ تحبي اساعدك و لا لا ؟

حبيبة : لا

اتجهت للدولاب و اخرجت فستان مريح اكثر .. اقترب منها ببطىء و وضع يده على ظهرها و شد سحاب الفستان للاسفل

حبيبة بتوتر : ش..شكرا

وضع يده على ظهرها المشكوف بسرعة فانتفضت و اندفعت للامام

حبيبة : اييه ده .. ايدك ساقعة زي التلج

اوس بضحك : منا عارف

***************************

في اليوم التالي

حلا بغضب : هو ايه الهبل ده انا مش فاهمة .. ازاي هنرقص و نترقص من غير اغاني و طبل و فرقة موسيقية ؟!

غادة : يعني ايه هنكسر كلام جدو مثلا ؟

حلا : مهو ما كانش كلامه … ده كلامك انتي يا خايبة

غادة : انا مش عايزة اخد ذنوب … انتي المفروض تشجعني مش تبهدليني يا حلا

حلا بغيظ : طب هنرقص شرقي ازااااي ؟! تكونيش عايزة تنزلي ترقصي على الاناشيد ؟!

غادة بضيق : و بعدين معاكي يا حلا .. انتي كدة بتقنعيني اعمل حاجة حرام و هتاخدي اثم كل الناس الي هتسمع … بكرا في فرحك اعملي الي انتي عايزاه اوك ؟!

دلف فارس و قال : عروستنا مقموصة ليه ؟! دي حنتك يا دودو لازم تكوني مبسوطة

غادة : ما تشوف خطيبتك يا فارس .. قال عايزاني اشغل اغاني بالفرح عادي

فارس : و فين المشكلة ؟!

غادة : انا قولتلكم عايزة الفرح اسلامي بالكامل .. مش هقبل اني اخد ذنب حد برقبتي و اتحاسب عليه قدام ربنا

فارس : طب و الي يحل المشكلة دي هتديه ايه ؟!

غادة باستغراب : مش فاهمة

اخرج من جيبه فلاشة و مدها لها

فارس : امسكي دي

غادة : ايه دي ؟

فارس : فصلت طول الليل اشيلك الموسيقى من الاغاني الي انتي بتحبيها و جمعتلك اناشيد الافراح و الاغاني الي بيستعملو فيها الدف بس … و حطيتهم كلهم على الفلاشة دي

غادة بتعجب : يعني مفيش موسيقى ابدا ؟!

فارس : لا مفيش خالص .. ده انا حتى اخترتلك كل الاغاني الي مفيهاش كلام قليل ادب … اسمعيها و عددي الجمايل بقا

غادة بسعادة : انا بجد مش عارفة اشكرك ازاي .. انت حلتلي مشكلة مع ماما الي هتدبحني دي .. ربنا ما يحرمني منك يا حبيبي

حضنته بقوة ثم ركضت و تناولت اللابتوب و خرجت … التفت فارس الى حلا

فارس : ها مفيش حضن و لا ايه ؟!

حلا بزفير : انا هتجنن .. عيلة تشل اقسم بالله

فارس : ده بدل ما تشكريني و تبوسيني …. ده انا قعدت مع نفسي و قولت الاقيلها حل يرضيها و يرضينا كلنا .. خصوصا اني عارف تفكيرك زي تفكير ماما بالزبط

حلا بغيظ : فارس .. غور من هنا مش عايزة اطحنك دلوقتي

فارس : الله يسامحك يا مزتي

دلفت لارا و قالت باستغراب : بتعملو ايه في اوضتي ؟!

حلا : مفيش .. هتلبسي ايه النهاردة

لارا برفعة حاجب : بتسألي ليه ؟!

حلا بغمرة : عشان خايفة تغطي عليا بجمالك يا لولو

فارس بصدمة : لولو ؟!

حلا : طبعا .. دي حبيبتي اصلا

فارس : اصلا ؟!

لارا بغيظ : اطلعو برا

حلا : حاضر يقلبي .. امشي يا فارس عشان ما ندايقهاش

امسكت يده و قالت : باي لولو .. لو احتجتي حاجة اندهيلي و هتلاقيني بقفاكي على طول

نظرت لها لارا بصدمة بينما هي سحبت فارس للخارح معها

***********************

بعد عدة ساعات .. دلفت حبيبة و دينا اوضة غادة

حبيبة بابتسامة : ايه الحلاوة دي يا غادة

غادة : بجد ؟ شكلي حلو ؟

دينا : قمر يا اخواتي .. اخيرا هتتجوزو و اخلص انا بقا

اتجهت غادة لدينا و حضنتها بقوة

دينا بضحك : جرا ايه يا اختي وفري الاحضان دي لعريسك

غادة : انا بجد مش عارفة اشكرك ازاي .. انتي اكتر حد كويس عرفته بحياتي .. ربنا ما يحرمني منك يا دينا

دينا بخجل : ايه الكلام ده بس .. ده انتي حبيبتي

غادة : ما تزعليش مني يا دينا لو كنت دايقتك قبل كدة .. انتي اكتر بنت بتدي من قلبها من غير مقابل .. لولا وجودك جنبي كان زماني ما اتجوزتش الراجل الي بحبه و بيحبني

دينا : انا ما عملتش حاجة .. ده حق الصداقة يا غادة

غادة : انتي اجدع بنت في الدينا دي كلها .. مش هنسى وقفتك معايا و مع لارا .. انتي وقفتي مع بنات العيلة كلها .. و الله انا كل يوم بدعيلك

دينا باندفاع : ايوااااا .. تدعيلي .. كتري دعا و النبي يا غادة لاحسن امي مش ناوية على خير و شكلي مش هتجوز بسنتي السودة دي

غادة بضحكة : ما تقوليش كدة .. ربنا كبير و اكيد هيحنن قلبها عليكي و على خطيبك .. و انا هفضل ادعيلك على طول

حبيبة : و ما تنسينيش انا كمان .. محتاجة دعوات كتيييير .. ادعيلي اخلص جامعة بسرعة

غادة بضحك : حاضر يا حبيبة .. اول ما اوصل الكعبة هدعيلك انتي بالذات

دينا : طب يلا ننزل عشان فريدة عاملة حماية و هيا الي بعتتنا ليكي

نزلن للاسفل حيث تجمع النساء …. استقبلن غادة بالزغاريد و التصفيق .. اقتربت منها خديجة محاولة حبس دموعها و سحبتها ناحية ساحة الرقص

حلا : البت دي هتفضحنا … هروح ارقصها يمكن تتدردح شوية

دينا بضحك : و الله ما حد هيفضحنا غيرك

ركضت حلا و امسكت يد غادة و بدأت بالرقص معها و انضمت لهن فريدة و كارما

حبيبة : الفستان هياكل منك حتة يا لولو

لارا باستغراب : بتكلميني انا ؟!

حبيبة : امم .. فستانك يجنن .. ده انتي احلى وحدة هنا .. هتاكلي الجو من غادة

لارا بصدمة : بجد ؟

حبيبة : ايوة … مالك واقفة كدة ؟ تعالي ننزل نرقص معاهم يلا

سحبتها قبل سماع ردها و اخذتها لساحة الرقص … فاندمجت لارا بالرقص مع غادة و كارما بسرعة

دينا بضحك : حرااام و الله البنت دي غلبانة اوي

حلا : طريقتك دي هايلة يا بت ازاي اتقلبت كدة ؟!

دينا : مهو عشان تلاقي الدواء المناسب لازم تعرف الداء .. قولتلك انا فهمت هيا عايزة ايه لما كلمتها

حلا : انا عمري ما توقعت اشوف حبيبة و لارا كدة ابدا .. ده و لا احلام العصر اقسم بالله

دينا : المهم كملي على الخطة و هنشوف النتيجة بعدين

حلا : منا مش هقدر امسك لساني كتير .. و لو مسكته .. ازاي همسك ايدي ؟!

دينا : اتلمي .. احنا هننتقل لخطة علاجك انتي كمان بس نخلص من دي الاول

************************

في الخارج .. كانت حفلة الرجال .. يجلس زياد على كرسي و اصحابه يلطخونه بالحناء

زياد بانفعال : ايييه ده ؟! هو انا هستحمى بالحنة دي ؟!

فارس بضحك : استنى بس هرسمك شنب

زياد بنرفزة : بسسس .. ايه الهبل ده

فارس : يعم فك شوية ده انت عريس

تلقى زياد ضربة من الخلف على رقبته كانت من صاحبه

زياد : ما بس يا علي .. هو انت بتشطب حيطة ؟!

مصطفى : هات ايدك اكتبلك اسم عروستك

زياد : اتلم … احنا اتفقنا مفيش ضرب يا شباب

كان تميم و اوس و يزن يقفون على بعد منه يضربون النار بالسماء حتى صعد زياد على حصانه بعد ان اغتسل من الحناء و امسك بندقيته و بدأ بضرب النار في السماء كتحية للحضور

اتجه فارس لحيث يجلس الكبار و من بينهم حازم

فارس : ما تفك يا زوما .. مالك قاعد بتبص عليهم كدة زي العواجيز ؟! ما تيجي تتبسط معانا

حازم : انا صدعت من الاصوات دي ما بالك لو روحت عندهم

عدنان : معلش الشباب عايزين يفرحو

حازم : ربنا يديم افراحكم يا عدنان بيه

فارس : انا فرحي بعد فترة .. اوعا ما تجيش هزعل منك يا زوما

حازم : ليه هو انا اعرفك اصلا ؟! و بعدين انت هتتجوز ازاي بهطلك ده ؟!

فارس : معلش قسمة و نصيب .. ما تيجي ارسمك شنب بدل الشعرايتين الي انت

فراحان بيهم دول

حازم بنرفزة : قوم من هنا يالا و الا هضربك بالنار

فارس بشهقة : تقتلني قبل ما اتجوز يا زوما ؟!

عدنان : فارررس .. اتلم

********************

بعد منتصف الليل .. ذهبت غادة لاوضتها لتستريح .. بينما اجتمعت الفتيات في اوضة كارما

دينا : بس ايه الحلاوة دي يا بت يا لارا ؟! مش معقول كل الستات بقو يسألو عليكي و على جمالك

حلا : صحيح .. دول افتكروها العروسة

كارما بهمس : حلا من غير مبالغة ارجوكي .. لارا مش عبيطة

لارا باستغراب : هو انتو ايه الي حصلكم ؟! ايه بقيتو تحبوني فجأة كدة ؟!

فريدة : بصراحة يعني احنا راجعنا نفسنا و لقينا اننا ظلمناكي كتير اوي .. فقولنا خلاص من النهاردة هنعاملك زي ما بنتعامل مع بعض عادي .. و بصراحة بصراحة .. انتي كنتي احلى وحدة النهاردة

لارا : و الله ؟!

حبيبة : اه و الله .. اول مرة احس ان في بنت بتنافسني

كارما بضحك : يا سلام على الغرور

حبيبة برفعة حاجب : ليه هو انتي شايفة غير كدة ؟!

دينا : عشان نقول الحق .. حبيبة دايما كانت احلى واحدة في كل مناسبة .. بس خلاص اتجوزت و الناس مبقتش مهتمة ليها .. دلوقتي العين على لولو

لارا بخجل : بجد ؟

كارما : انا كنت فاكرة اني هبقى احلى وحدة في فرح اخويا جيتي انتي و سرقتي الاضواء مني

لارا بابتسامة : بس برضو انتي كنتي حلوة اوي

فريدة : كلنا حلوين .. بس الجمال درجات يعني .. و انتي التوب يا لارا

لارا بخجل و توتر : طب … انا هروح انام

خرجت من الاوضة سريعا بينما ابتسمت دينا بانتصار

دينا : مش قولتلكم

حبيبة بغيظ : اداء مبالغ فيه جدا … مش لدرجة تحتقروني يعني

دينا بضحك : انتي اتقمصتي ولا ايه ؟! ده كدة و كدة يعني

حبيبة : اوك هيا كانت حلوة اوي بصراحة بس مش بحب جو المقارنات ده

حلا بخبث : واضح ان الغيرة كانت متبادلة يا بنات

حبيبة : اتلمي .. اكيد مش هغير منها .. بس مهما كان دي كان عينها من جوزي

دينا بسخرية : و الله كان عينها من جوزاتنا كلنا .. اتلمي يا حبيبة الي فات مات

فريدة بتوتر : يا بنات .. انا عايزة اقولكم حاجة كدة .. بس خايفة زياد و غادة يزعلو مني

حبيبة : في ايه يا فريدة ؟!

فريدة : …………. يتبع