دقت الساعة الواحدة صباحا ومازالت فريدة لا تستطيع النوم ، أضاءت مصباح الغرفة وقامت وارتدت الروب الخاص بالبيجاما التى ترتديها ، خرجت للشرفة وجلست على أحد الكراسى وارتدت بظهرها للخلف وأسندت رأسها لحرف الكرسى ، عادت بعقلها ، للطريق الذى بدأته ، وأخذت تحدث نفسها بشأنه

...هتقدرى يافريدة ، هتقدرى تقابلى اكتر ناس دمروا أمك ، من يوم ماتت وانتى مكرسة حياتك كلها للانتقام ليها ، بتأذى كل إنسان اذاها فى يوم ، أما دلوقتى

هتدخلى عش الحيات زى ما أمك كانت مسمياه ، عيلة بتمشيها شوية نسوان ، بس مش أى نسوان ،

ده نسوان قادرة ، شوية تعالب اتلموا فى عيلة واحدة ، تفتكرى هتقدرى عليهم وكمان تنتقمى من اللى عملوه فى أمك ،

ابوكى، واكتفيتى انك تعذبيه بمعاملتك السلبية والباردة ليه ، وتفكريه باللى عمله فى أمك طول الوقت ، سحر رمضان وصلاح الكحلاوى ضيعتيهم تماما ودمرتى مستقبلهم تماما ، وغيرهم وغيرهم ،لكن الناس دى بقى هتعملى معاها ايه ؟

...فريدة ..

..بابا ؟! مش فى باب برده تخبط عليه ..

..خبطت كتير بس واضح انك كنتى سرحانة ، انا قلت أنك نمتى وسايبة النور ، كنت هطفيه وأخرج ، لكن ايه اللى مصحيكى لحد دلوقتى ؟ ، الساعة عدت اتنين ...

...اللى مصحينى هو نفسه اللى مصحيك يابابا ...

.. ما أنا قولتلك أنى خلاص مش عايزلك الجوازة دى يافريدة ...

... دلوقتى ، مبقاش ينفع انت اللى تقول يادكتور ، كلامى انا اللى هيمشى وانا خلاص وافقت ، وده آخر كلام عندى ..

...وأكرم المصرى اللى هيجيلك انهارضة ده ، عايزاه فى ايه ؟ هو جالى مرة وانتى وافقتى وخلاص ، فى ايه تانى ؟

...هو قال هييجى ، والله كويس ، امتى ؟

..الساعة 6 ،، انتى ناوية على ايه بالظبط ؟

... متاخدش فى بالك ، انا هقوم انا عشان اقدر أصحى لشغلى ، عندى تحقيقين، ولازم أبقى فايقة ، وحضرتك اتفضل نام عشان شغلك انت كمان ...

أنهت فريدة دوام عملها بكامل التحقيقات فيه ، وكالعادة تصل دائما للحقيقة ، فهى فنانة فى إيقاع من أمامها فى الكلام لتصل به ليقول الحقيقة ، وقد اشتهرت بين جميع المحققين الموجودين فى القطاع بذلك ، وبدأ رؤسائها يوكلون لها القضايا الصعبة .

وصلت للمنزل قبل الخامسة بدقائق بعدما نزلت للتسوق مع إثنين من زميلاتها ، واشترت بعض الأشياء التى تحتاجها . دخلت لتبدل ملابسها ولتستريح بعض الوقت قبل الميعاد المنتظر .

بالفعل وصل أكرم المصرى فى تمام السادسة ،

كان يجلس مع والدها فى الصالون حتى تأتى هى للقائه ، بالرغم من مرور أكثر من 25 عاما على رفض عائلة المصرى لولدها كزوج لابنتهم ، إلا أن جو التوتر مازال سيد الموقف بينه وبين أى فرد من أفرادها ، لهذا كان الصمت هو سيد الموقف فى هذه الجلسة

دق الباب ودخلت فريدة ،

...مساء الخير ...

...مساء النور يافريدة ، انا مستنيكى من بدرى ...

...آسفة أنى عطلت حضرتك ، انا اصلا جاية متأخرة اوى من شغلى ...

...ولا عطلة ولا حاجة يافريدة ، وحمدالله على السلامة ...

..الله يسلمك ..

التفتت لوالدها ....بعد اذنك يادكتور ، ممكن تسيبنا لوحدنا شوية ...

إصابته الدهشة من طلبها إلا أنه لم يستطع حتى الاعتراض

بعدما خرج عادت بوجهها لزائرها ، من المفترض أن هذا الزائر خالها ، اخوا والدتها ، لكنها لا تعترف بذلك حتى الآن .

...ليه بتندهيله بدكتور ، دى تالت مرة اسمعها منك ، مسمعتيكيش بتندهيله ببابا خالص ...

...غريب سؤالك ، لكن إجابته مش دلوقتى ، أصل كل إجابة فى حياتنا ليها أوانها ، ودلوقتى أوان الإجابات اللى انا محتاجاها من حضرتك ...

...خير ، إجابات ايه ؟...

...الأول توعدنى انك هتكلمنى بصراحة ومن غير كدب ولا حتى لف ودوران ...

..كدب ، الله يسامحك يابنتى ..

..متزعليش منى ، كل الحكاية أن المواضيع اللى هكلمك فيها ممكن تكون حساسة ، بس انا للأسف مش هقدر أكمل فى الموضوع ده من غير ما أبقى فاهمة ، وملقيتش الإجابات اللى انا عايزاها عند عادل ...

..اتفضلى ، وأنا سامعك ، وهجاوبك بصراحة زى ما انتى عايزة ..

...اللى أعرفه ان عادل كان متجوز بنتك ، أول مرة اشوف حما هو اللى يخطب لجوز بنته بعد ما يطلقها ..

...الموضوع بسيط يافريدة ، عادل ونيرة مختلفين تماما ، جدهم هو اللى عاند الموضوع ده وصمم يجوزهم ، ورغم رفضى انا ، مهمهوش رأيي ونفذ اللى هو عايزه ، كان عايز يثبت عادل وخلاص ، لأنه كان حاسس انه بيتسرب من تحت أيده وبيبعد عنه بدراسته وشغله ، وكانت نييرة الوحيدة المتاحة فى الوقت ده ، وطبعا طلاقهم جه أسرع بكتير مما تخيلنا ، والحمد لله من غير خلفة ، جدك برده كان مصمم أن الطلاق ميحصلش ، ولما حصل صمم انه يرجعهم لبعض ، فى الوقت ده انا اللى وقفت فى الموضوع، ووقفت المهزلة دى عشانها وعشانه ، وصممت أنى اجوزه ، حد يكون كويس ويعشله ويعوضه ، لان عادل بالنسبالى ابنى ، ربنا عوضنى بيه عن الصبيان اللى مخلفتهمش ، لما قابلتك واتكلمت معاكى بعد السنين دى كلها ، شفت فيكى مرات عادل ، قلبى بيقوللى انك هتعوضيه يابنتى ، أدى كل الحكاية وبصراحة جدا ، فى ايه تانى عندك ...

...مراتك ..

...أفندم ؟

..مراتك ، سميرة هانم ، وكمان مرات اخوك ، اللى هى أم عادل ، كانوا بيكرهوا أمى ، فطبيعى انهم بيكرهونى ومش قابلني ، رد فعلهم ايه على الجوازة دى ..

..يافريدة ، انتى لو فكرتى فى الموضوع ده مش هتتحركى من مكانك ، حماتي مبتحبنيش ومش عارف ايه ، كبرى دماغك يابنتى ، انا لما سألت عليكى وعرفت قوة شخصيتك وتحملك للمواقف ، مقلقتش من اللى الكلام اللى انتى بتقوليه ده ، مش كدة وبس ، رجوعك للعيلة رد اعتبار ليكى ولأمك ، وكمان انا عند وعدى ، هرجعلك ميراثك بالكامل ، وجدك وافق على كدة ، فمتفكريش فى الحاجات الصغيرة دى ...

... مش عارفة ليه مرتاحة لكلامك ..

..عشان بتكلم بالعقل ، وحاولى تفكرى انتى كمان بالطريقه دى ، فى حاجة تانية عايزة تعرفيها ؟