نسمة أخت عاصم اللي بتتميز بطيبتها ورقتها نزلت من البيت وهي بتبص في ساعتها .

عاصم اللى كان قاعد قدام ورشته ابتسم لما شافها وقرب منها:راحه الكليه يا نسمه ؟!

نسمه:ايوا يا عصوم بس هستنى فاطمه وايمان .

عاصم:مش محتاجه فلوس او اى حاجه يا حبيبتى ؟

نسمه:معايا يا عصوم وبعدين هو انت مخلينى محتاجه حاجه ربنا يخليك لينا يارب .

نزلت فاطمة وهي بتجري على السلم وبتلبس الكوتشي في رجليها:جيت أهو يا نوسة .. والله ايمان هي اللي أخرتني عمالة تعيد وتزيد في لفة الطرحة كأننا رايحين فرح مش رايحين محاسبة وتكاليف .

فاطمه بصت لعاصم:صباح الخير يا معلم عاصم .

عاصم:صباح النور يا فاطمه .... اخبار الحاج منصور ايه ؟

فاطمه:الحمدلله بخير .

عاصم:وصليله سلامى .

فاطمه:اكيد يوصل .

عاصم سابهم وراح لخالد اللى جاله وقعدو قدام الورشه .

نسمه:ايمان اول مرة تتاخر هى مش راحه ولا ايه ؟!

فاطمه:بذمتك ايمان تفوت محاضرة ... ده الدكتور بذات نفسه يغيب وايمان اختى لا ... وبعدين بقولك بتلف الطرحه .

نسمه بتحاول تكتم ضحكتها لانهم واقفين فى الشارع:طب رنى عليها كدا هنتاخر .

فاطمه سابتها  ودخلت بيتهم وبصت لفوق ونادت بصوت مش عالى اوى:يا ايمان يلا بقااا هنتاخر .

مجدى ابن عمها كان نازل:اكتمى صوتك ده يا بت .

فاطمه بضيق:ليا اسم على فكرة .

مجدى بسخريه:متاسفين يا ست الداكتورة .

فاطمه همست:غبي .

مجدى قرب منها بعصبيه:بتقولى ايه يا بت !

فاطمه:بقولك ايه يا مجدى فكك منى مش كل يوم هنتخانق سوا كدا .... وبعدين مالكش دعوة بيا اعلى صوتى اوطيه حاجه متخصش حضرتك .

مجدى:اتعدلى ياما والله هديكى بكف ايدى على وشك الوقت .

فاطمه بقوة وعصبيه قربت منه:طب فكر تعملها كدا .

ايمان نزلت بسرعه لما سمعتهم:انا جيت يا فاطمه خلينا نمشي يلا .

مجدى:هو انا شفاف قدامك انتى التانيه .

ايمان بتوتر:اسفه يا مجدى صباح الخير .

فاطمه:انتى بتتاسفى ليه يا ايمان انتى مغلطتش هو اللى صاحى طايح فى الكل ومش عجبه حد .... خلينا نمشي من هنا يلا ... الجو بقا يخنق .

ايمان وفاطمه مشو ومجدى كان مضايق منها .

عبد العزيز ابوه نزل وشايفه واقف متعصب:اتخانقت مع مين فيهم النهارده ؟!

مجدى:البت دى نفسي اقتلها .

عبد العزيز:منار ولا فاطمه مانت مش بتتخانق غير معاهم الاتنين التانين مش بنسمع صوتهم .

مجدى:وحياتك نفسي اقتل الاتنين واتجوز ايمان .

عبد العزيز:مانت اتقدمت ليها ورفضتك عايز ايه اكتر من كدا .

مجدى:مش هتكون لحد غيرى ... وبكرة تشوف .... هاخدها هى والارض كمان .

عبد العزيز:كان ابوك اشطر يا اخويا .

بقلم الكاتبه جنات 

ــــــــ★ـــــــ

خرجت إيمان مع فاطمه من البيت وقربو من نسمه .

ايمان:صباح الفل يا نسمه .

نسمه:صباح الجمال ... كل ده بتلفى الطرحه اخرتينا يا ايمو .

ايمان بصت لفاطمه اللى بتضحك:والله يا نسمة ما حصل دي فاطمة اللي كانت بتدور على الكتاب اللي ضيعته .

نسمة ضحكت وحضنتهم:ولا يهمكم يا قمرات المهم اننا اتجمعنا .. يلا بينا قبل ما الزحمة تزيد .

وهما ماشيين في الحارة لمحهم عاصم وهو واقف قدام الورشة ونادى عليهم بلهجته الحمشة:نسمة ... خدو بالكو من نفسكو ولو عوزتوا أي حاجة كلموني .. ومتاخروش في الرجوع.

فاطمة بهزار:علم وينفذ يا معلم عاصم احنا في حمايتك يا بطل.

إيمان اكتفت بابتسامة خجولة أما نسمة فكانت فخورة بأخوها اللي دايما عينه عليهم.

بعد شويا البنات وصلو الكلية وطبعا فاطمة كانت ماشية بتوزع سلامات على البنات اللى تعرفهم ونسمة وإيمان ماشيين جمبها .

فاطمة وقفت فجأة في نص الساحة: بقولكم ايه يا بنات أنا مش قادرة أدخل محاضرة المحاسبة دى .. الدكتور صوته بينيم العصافير ايه رأيكم نروح نفطر ساندوتشات كبدة من اللي ورا الكلية .

إيمان :يا فاطمة حرام عليكي دي محاضرة مهمة وبعدين بابا لو عرف إنك بتزوغى هيطير رقبتك .

نسمة وافقتها: ايمان عندها حق الامتحانات قربت يا فطومة احنا مش جايين نتفسح يلا يا بت قدامي على المدرج.

فاطمة وهي بتمثل الزعل:ماشي يا قمرات بكره تندم يا جميل.

ودخلوا المدرج والمحاضرة كانت هدوء تام والدكتور بيشرح مسألة معقدة جدا. 

فجأة موبايل فاطمة رن بأعلى صوت والمصيبة إن الرنة كانت أغنية شعبية  وهي نسيت تعمله صامت .

المدرج كله ضحك .

الدكتور وقف الشرح وبص بنظرة تخوف:مين اللي فتح الاغانى دى ؟!

فاطمة بدموع تماسيح وهي بتحاول تقفل الموبايل اللي علق:والله يا دكتور دي .. دي نغمة المنبه بس .. انا مركزه مع حضرتك والله أصلي بنسجم مع الأرقام أوي .

الدكتور بحده:منبه؟! طب اطلعي بره انتي والمنبه بتاعك ومش عايز أشوفك فى المحاضرة دي.

إيمان ونسمة كانوا بيكتمو ضحكتهم وفاطمة وهي خارجة غمزت لهم وهمست: اهو جات من عند ربنا .. أنا هستناكم عند بتاع الكبدة بقا .

بعد المحاضرة خرجت نسمة وإيمان وهما بيبرطموا على جنان فاطمه .

قرب منهم ولد من  الكلية وكان بيحاول يضايق إيمان بالكلام وهي مش عارفة ترد عليه .

نسمة لسه هتتكلم لقت فاطمة ظهرت من وراه فجأة وهي ماسكة ساندوتش الكبدة في إيدها وبصت للولد من فوق لتحت:جرى ايه يا حليوة؟ ضيعت مامتك ولا إيه؟ امشي من هنا بدل ما أخلي عيال السيدة زينب يعملوا عليك تخفيضات دلوقتي .

الولد خاف من منظرها وكلامها السرسجي المضحك وجري من قدامهم.

إيمان:يخرب عقلك يا فاطمة فضحتينا في الكلية .

فاطمة ببرود وهي بتاخد قطمة من الساندوتش:الفضيحة للي يسكت على حقه يا إيمو وبعدين الواد ده كان عايز قرصة ودن .. يلا بقى انا عملت حسابكو فى سندوتشات الكبده وبعدها نلحق الميكروباص عشان نروح .

بقلم الكاتبة جنات 

ــــــــ★ــــــــ

البنات كانو راجعين من الكليه والمشي فى السيده زينب ليه طعم تاني . 

نسمه ودعتهم وطلعت بيتها واينان فاطمه لسه هيطلعو بيتهم

بس أول ما شموا ريحة السمنة البلدي ومخبوزات من مخبز فتحى .

فاطمة وقفت فجأة قدام المخبز: بس ريحة الفطير المشلتت دي بتنادي على قلبي يا إيمان والمحاضرة بتاعة المحاسبة نشفت ريقي وعايز اللى يطريه .

إيمان وهى بتشدها:يا فاطمة يلا نروح وبعدين شكلنا وحش واحنا واقفين قدام المخبز كده والناس راحه جايه .

فاطمة بضحكة:يا بنتى فكى شوية وبعدين ايه اللي يكسف في الجوع؟ ده الجوع كافر ... أنا هشتري فطير يعنى هشترى وبعدين الواد فتحي ده ايده تتلف في حرير فطيره يرم العضم .

دخلت فاطمة المخبز ولقيت فتحي واقف لابس المريلة البيضاء وشغال  قدام الفرن .

أول ما شافها وشه نور والضحكة ملت وشه: يا ألف نهار أبيض المخبر نور والله .

فاطمة:منور بأصحابه يا بشمهندس الفطير .. مفيش واحدة بقا سخنة كدا تهدي الأعصاب .

فتحى ضحك:فين طبعا .

فاطمه:طب طلعلي بقا فطيرتين سخنين من اللي قلبك يحبهم وعليهم رشة سكر وقشطة عشان أختك ايمان دي هبطانة من العلم.

فتحي وهو بيطلع الفطير بالنشابة: عيني ليكي يا ست البنات .. ده أنا عامل حسابك في فطيرة مخصوص لسه طالعة حالا والسمنة البلدي فيها بتغني .

فتحي جاب الفطير وحط فوقيهم حتة قشطة وسكر ولفهم ومد ايده لفاطمة: خدي يا ست البنات دي تحية من المخبز ليكي وللأستاذة إيمان .

فاطمه:تسلم يا فتحى .

إيمان كانت واقفة بعيد ومكسوفة .

شافها خالد اللى جاى لفتحى:ازيك يا انسه ايمان ؟

ايمان من غير ما تبصله:بخير الحمدلله .

خالد:خير فى حاجه ليه واقفه كدا ؟!

إيمان بابتسامة رقيقة:فاطمة صممت تشتري فطير مش اكتر .

خالد بص لفاطمة وفتحي وضحك:ازيك يا انسه فاطمه .

فاطمه:اهلا بالاسطى بتاعنا بخير الحمدلله .

خالد:خدي فطيرك يا فاطمة ويلا على البيت عشان الوقفه دى ما تنفعش والحاج منصور لو شافك احتمال يعمل من فتحي فطيرة باللحمة المفرومة .

ومشيوا البنات وهما بيضحكوا . وفتحي فضل باصص وراهم وهو بيقول:والله الفطير مابقاش له طعم غير لما شوفت عينكى .

خالد:طب الحق الفطير اللى هيولع فى الفرن يا حبيب .

بقلم الكاتبه جنات 

ــــــــــ★ــــــــ

فى بيت منصور .

زينب كانت قاعدة مع ابوها بهدوء وهي بتسمعه كلام يطمن قلبه زينب هي عقل البيت اللي الكل بيعمل لرايها حساب .

دخلت عليهم منار وهي قالعة طرحتها ومتنرفزة:أنا مش عارفة يا بابا عمي عبد العزيز ده هيفضل لامته فاكر اننا ملناش صوت؟ قابلني تحت وفضل يلمح بالكلام عن الأرض وايرادها رديت عليه وقولتله الأرض دي بتاعتنا يا عمي واللي يقرب منها يبقى بيقرب من روحنا .

منصور بتعب:يا بنتي يا منار هدي اللعب شويا انتي عارفة عمك مبيحبش حد يكسر كلامه وأنا مش حمل مشاكل .

منار بحسم:الحق مايتسكتش عليه يا بابا وأنا مدرسة لغة عربية يعني عارفة الأصول والعدل بيقولوا إيه والسكوت عن الحق شيطان أخرس .

فجأة الباب اتفتح ودخلت فاطمة وهي بتغني بصوت عالي:يا أهل الدار ... الفطير السخن وصل فكوا التكشيرة دي بقى ويلا ناكل سوا .

دخلت وراها ايمان وهي بتكلم اختها: يا فاطمة وطي صوتك عيب كده الشارع كله تحت سمعو صوتك هيقولوا إيه ؟!

فاطمة بضحك:يقولوا اللي يقولوه يا ايمو احنا في بيتنا يا قطة .

بصت فاطمة لمنار وقالت: فكيها يا سيادة المدرسة وتعالي كلي معانا لقمة تنسيكى النحو والصرف بتوعك دول ... يلا انا هروح احضر وانتو هاتو بابا وتعالو ورايا ... مش مسؤوله بقا لو الفطير خلص انا اصلا جعانه .

زينب ضحكت:مش هتتغير ابداا ... وانتى يا منار ابعدى عن عمك وابنه وبلاش تتكلمى معاهم لان كل مرة تتكلمى معاهم بتحصل مشكله .

منار وهى خارجه من الاوضه:موعديكش يا زوزو. 

ايمان:يلا عشان نلحق الفطير وهو سخن .

زينب حركت كرسي والدها وخرجو من الاوضه .

بقلم الكاتبة جنات 

ـــــــــ★ـــــــــ

الليل دخل والحارة هديت والشباب  اتجمعوا في فوق السطح بيت عاصم .. وسط غية الحمام .

فتحي كان عمال يهز في رجله بتوتر وبص لعاصم وقال بقلب ملهوف: بقولك إيه يا عاصم .. أنا خلاص استويت أنا عايز أدخل البيت من بابه وأطلب ايد فاطمة .. البنت دي جنانها هو اللي محلي الحارة في عيني وأمي الحاجة اعتماد موافقة وبتقول مفيش أجدع من بنات منصور النجار.

عاصم ابتسم وربت على كتفه: فاطمة بـ ميت راجل يا فتحي بس هتقدر على جنانها؟ دي ممكن تبيعك في سوق الجمعة وتشتري بيك حمام زاجل .

الكل ضحكو .

بس عز كان باين عليه السرحان وقال بصوت واطي:والله يا جدعان أنا كمان واقع .. بس في الشرسة منار البت دي لسانها بينقط سم بس عقلها يوزن بلد وخايف أتقدم لها ترفضني وتقولي انت ابن العقربة نجاة زى ماهى مسمياها .

خالد كان قاعد ساكت وباصص للسما بسرحان وهو بيفكر في رقة إيمان وخجلها اللي خطف قلبه من زمان بس هو طبيعته ناشفة ومبيعرفش يعبر .

عز نكشه في كتفه:وانت يا تقيل يا اللي عينك مابتنزلش من على شباكها ابداا مش ناوي تنطق ولا هتفضل تتابعها بالسونار من بعيد لبعيد كده .

خالد رد بجمود وهو بيخبي مشاعره: يا عم فكك مني أنا ظروفي متلخبطة مع أبويا ومراته وإيمان دي نسمة رقيقة مش عايز أدخلها في دوامة مشاكلي .. كفاية عليها اللي بتشوفه من مجدي وأبوه.

عاصم قام وقف وبص ليهم كلهم بهيبة:اسمعوا يا رجالة .. بنات عمي منصور خط أحمر واللي ناوي يتقدم لازم يكون قد الكلمة. أنا هقف معاكم واحد واحد بس نخلص الأول من مكر عبد العزيز وابنه عشان البيت يصفى .

بقلم الكاتبه جنات 

ــــــــ★ـــــــــ

تانى يوم .

منار كانت نازلة من البيت ورايحة المدرسه وأول ما وصلت لمدخل البيت شافت مجدي واقف ساند ضهره على الحيطة وباصص لها بنظرة مستفزة .

مجدي بسخرية:على فين يا ست المدرسة؟ هو كل يوم خروج  مفيش مرة تقعدي في البيت تشوفي أبوكي اللي مش قادر يتحرك ده بدل ما احنا اللي شايلين همكم .

منار وقفت وحطت شنطتها على كتفها بكل ثبات وبصت له بهدوء يغيظ:والله يا ابن عمي هم أبويا متشال على اكتاف بناته اللي بياكلوا من شقاهم وبالحلال مش مستنيين حد يشيل عننا .. وبعدين التعليم ده قيمة كبيرة يمكن انت متعرفهاش لأنك كنت بتسقط حتى في امتحان التربية الوطنية .

مجدى بصوت عالي:جرى ايه يا بت ؟! اتكلمي معايا بأدب احسنلك وبعدين ايه حكاية الحلال دي؟ انتي بتقصدي ايه؟ ده خير ابويا مغرقكم ولا نسيتي ان لولا وجودنا في البيت ده كان زمانكم..

منار قاطعته بابتسامة باردة: كان زماننا ايه يا مجدى؟ البيت ده بيت جدي ونصيب بابا فيه زي نصيب ابوك بالظبط .... وخير ايه اللى مغرقنا انت بتتكلم مع ايراد الورشه اظن ده حق بابا ولا ايه ؟! .... وبعدين الفضل والشكر لله وحده يا محترم أما بالنسبة للأدب فأنا مدرسة وبوزع أدب على أجيال فلو محتاج درس خصوصي في أصول التعامل أنا موجودة بس خد بالك .. حصصي غالية عليك شوية .

مجدي وشه احمر من الغيظ: انتي فاكرة نفسك عشان مدرسة هتسوقي فيها؟ الأرض اللي في البلد دي مش هتشموا ريحتها والتوكيل هيمضي عليه أبوكي غصبن عنه .

منار عدلت طرحتها:الأرض دي ملك للي يصونها مش للي يبعزقها على القهاوى وبابا مش بيمضي على حاجه لأنه واثق إن وراه بنات بـ ميت راجل .. عن اذنك عشان متأخرة على ولادي في المدرسة أصل المواعيد دي للأكابر اللي بيحترموا كلمتهم بس.

سابته منار ومشيت بخطوات واثقة ومجدى  واقف بيبرطم بغل:ماشي يا منار طولى لسانك حلو انتى عايزة اللي يكسر مناخيرك .

بقلم الكاتبه جنات

ــــــــــ★ـــــــــ

بتعدى الايام بدون احداث تذكر .

وفى يوم فى بيت منصور .

الباب خبط وزينب لبست اسدالها وراحت تفتح واتفاجات بمجدى قدامها:خير يا مجدى .

مجدى:ايه ممنوع اجى بيت عمى .

زينب:لا اكيد مش ممنوع يا ابن عمى اتفضل .

مجدى دخل الصالة بخطوات تقيلة ووشه خالي من أي رحمة وقف قدام عمه منصور اللي قاعد على كرسيه المتحرك بقلة حيلة .

مجدي حط ازازة كانت فى ايده على التربيزة وقعد وبص لعمه بعيون حادة.

مجدي ببرود مستفز:بقولك ايه يا عمي .. احنا تعبنا من الكلام الكتير واللف والدوران ... الأرض دي لازم ترجع لأبويا والتوكيل لازم يتمضي ... بس أنا قولت أعمل معاك واجب وأحلها ودي .. أنا عايز أتجوز إيمان.

منصور بصدمة: تتجوز إيمان يا مجدي؟ انت اتقدم ليها قبل كدا وهى رفضت يا بنى وانا مش هقدر اضغط عليها انت عارف وبعدين دي لسه طالبة فى الجامعه وفي حالها .. عايز تاخدها عشان تذلها وتضمن الأرض انها تكون ليك .

مجدي قرب منه ووطى صوته بفحيح الأفاعي:اسمع يا حاج منصور .. الأرض دي لو متمضتش على التوكيل  وإيمان مابقتش في بيتي فانا هخلي الحارة كلها تتفرج عليها ... ايمان وهي رايحة الكلية ممكن فجأة تتخطف وماحدش يعرفلها طريق .. أو لا قدر الله وشها الحلو ده يتحرق ويتشوه بمية نار ويضيع مستقبلها وتتحبس بين الأربع حيطان طول عمرها ومحدش يرضي يتجوز واحده متشوهه حتى انا مش هرضي .. اختار بقى تديهالي بالحلال والرضا ولا اخدها بمعرفتي وأكسر قلبك عليها .

منصور وعينه مليانة دموع قهر: انت شيطان يا مجدي .. انت من دمنا وعايز تشوه بنت عمك عشان قرشين .

مجدي قام وقف وبكل جبروت:الدم ده كلام في الروايات يا عمي احنا في زمن القرش . قدامك لحد بكرة الصبح يا تمضي التوكيل وتوافق على الجوازة يا اما تودع وش ايمان الحلو وتحضر لها طرحة سودة بدل طرحة الفرح.

خرج مجدي وساب منصور في حالة ذهول وقهر ودموعه نزلت خوفا على بنته الرقيقه .

وفي اللحظة دي كانت منار واقفة ورا الباب وسمعت كل كلمة وبتلف لاقت ايمان فى وشها والدموع مغرقه وشها 

ورجليها مش شايلاها لدرجة انها  وقعت في الأرض وهي كاتمة صرختها بإيدها .. كلام مجدي كان زي السكاكين اللي بتقطع في روحها وفكرة ميا النار خلت جسمها كله يتنفض من الرعب ....

منار جرت عليها بسرعة و ايمان اترمت في حضنها وهي بتترعش ومنهارة وهمست:هيضيعني يا منار .. مجدي هيحرقني ويحرق قلب بابا عليا .. أنا مش عايزة أخرج من البيت تاني أنا خايفة اوى .

منار بجمود وقوة مسحت دموع أختها ومسكت وشها بين إيديها:اثبتي يا إيمان .. انتي بنت منصور النجار والمجرم ده مش هيطول شعرة منك وطول ما فيا نفس مش هخليه يلمح طيفك حتى ... اهدى يا حبيبتى .

إيمان بصوت مبحوح:ده شيطان يا منار ده هدد بابا بالخطف .. أنا مش هكمل دراستي أنا مش هروح الكلية تاني ومش هخرج تانى ابدااا .

منار بذكاء وشرارة في عينيها:بالعكس .. انتي هتروحي وهتمشي في الحارة وأحلى من الأول كمان بس بشرط .. احنا مش هنواجه مجدي بالصوت العالي احنا هنوقعه في شر أعماله .

ايمان بصتلها اوى 

ومنار قالتلها:مجدي فاكر انه ماسكنا من ايدينا اللي بتوجعنا .. بس هو نسي ان عاصم الحداد ضهر وسند لينا  وهو اكيد مش هيتخلى عننا ابداا .

 بقلم الكاتبه جنات 

ـــــــــ★ــــــــ