طالما بقت كدا وبتحرقى الهدايا بتاعتى بكل بجاحه فانا عايز الدهب يايارا

يارا بغضب: وانت فاكر كنت هخليهم عندى.... ثانية واحدة

فتحية : استهدوا بالله ياجماعه ميصحش كدا

دخلت يارا اوضتها فتحت دولابها ال كانت مخبية فيه الدهب الا انها انصدمت انه مش موجود بحثت عنه فى مكان لكنه بالفعل مكنش موجود ومحمود كان منتظرها بغضب شديد تجيب الدهب

محمود بسخرية وغضب: بقالها ساعة بتدور عليه هيا ضيعته ولا ايه

سنية بانفعال: احترم نفسك يامحمود واتكلم بأدب وانتى ياراما ادخلى شوفى اختك غابت ليه

راما: حاضر ياماما

محمود بسخرية: ادينا مستنيين

دخلت راما اوضة يارا اتفاجأت بيارا قاعدة على سريرها وبتعيط والاوضه كلها فوضى

راما بقلق: يارا مالك

مردتش يارا واستمرت فى البكا

انتى ملقتيش الدهب محمود برا مستنى وماما والكل

يارا بحزن ودموعها نازله: قلبت الاوضة بس مش موجود انا متأكده انه كان فى دولابى مش عارفه اعمل ايه

راما: مايمكن نقلتيه فى مكان تانى خلينا نرجع ندور

يارا بيأس وصوت حزين: مفيش فايده انا متأكده مليون فى المية انى حطيته فى دولابى واصلا مغيرتش مكانه خالص

راما وهيا بتمسح دموعها بحنان: هندور وهنلاقيه يعنى هيروح فين اكيد فى مكان فى الشقة

هزت يارا راسها بموافقة

خدعة الحب

فتحية بمكر: ايه ياسنية احنا ندخل واحدة عشان تجيبها تقوم تتأخر هيا كمان

ميار بشهقة مبالغه: ليكون الدهب انسر*ق يامامى

فى اللحظة دى خرجت يارا ومعاها راما

سنية باندفاع: ارميله الدهب بتاعه فى وشه يابنتى

سكتت يارا وهيا مش عارفة ترد تقول ايه

فتحية بخبث: اومال فين الدهب ياحبيبتي

محمود بجدية: ماتردى ياست يارا الدهب فين مش كنتى من شوية بتتكلمى بغرور وقلب جامد

نطقت يارا بصعوبة وهيا بتبص لامها ال كانت عينها عليها وكأنها فهمت ال حصل بس رافضة تستوعبه

= مش.. مش لاقية الدهب

شهقت سنية بصدمه صفعت وجهها غير مصدقة وصاحت

= ازاى مش لاقياه انتى دورتى كويس

هزت يارا راسها بحزن وهمست

= مش عارفة كأنه اختفى

محمود بسخرية وغضب: اختفى بردوا ولا اتباع

بصتله يارا بصدمه وقالت بغضب

= انت تقصد ايه!

محمود بغضب: كلامى واضح زى الشمس انتى ال بعتى الدهب وعاملالى فيها عندك كرامه ومش عايزة من وشى حاجة وقال يعنى بتحرقى الهدايا بتاعتى عشان اما اطلب الدهب تقولى انه اضاع ومشكش فيكى لا برافو عليكى خطه فى منتهى الذكاء

نزلت دموع يارا زى الشلال وكانت بتسمعه وهيا مش مصدقة

= هو ده تفكيرك فيا بعد ماعاشرتنى سنتين شايفانى بالطريقة دى؟

محمود بقسوة: والله انا بقول ال شايفه

فتحية : صدق المثل ياما ورا السواهى دواهى

راما بغضب: جرى ايه ياست انتى.. انتى معانا ولا علينا

فتحية باندفاع: ماتخلى بنتك تلم نفسها ياسنية شايفة بتشخط فيا ازاى ومش محترمانى

سنية بنرفزة: لو سمحتى يافتحية روحى بيتك دى مشكله خاصة وهنحلها لوحدنا

فتحية بسخط: يعنى هيا بقت كدا ماشى ياسنية.. يلا يابت ياميار من هنااا

ميار بهمس وهيا ماشية معاها: مامى مش هنعرف ايه ال حصل كدا

فتحية بصوت واطى: هبعت الشملو*ل اخوكى يصنط ويجيبلنا الاخبار كلها

قطعت أروى الصمت وقالت بمكر

= مش عيب يايارا انك تعترفى بغلطك محمود قلبه طيب وهيسامحك

يارا بغضب: غلط ايه انتى بتقولى ايه احترمى نفسك

محمود بقسوة: ماهو حاجة من الاتنين ياتجيبى الدهب وحالا ياتعترفى بعتى الدهب ولا ودتيه فين

يارا بعصبية: حقيقى انا معرفش الدهب فين ومبعتش حاجة

محمود: معنى كلامك ان الدهب اتسرق من البيت يعنى انتى بتتهمى حد من اهلك بسرقة الدهب

سنية باندفاع: سرق! شايفنا قدامك حرامية انا عيالى متربيين احسن تربية وحاسب على كلامك يامحمود

محمود بغضب: انتم عارفين سعر الدهب ده كام! اسمعونى كويس يا الدهب يرجع يايارا ياتعترفى عملتى فيه ايه وهسامحك اما شغل الاستعباط ده ميدخلش دماغ عيل صغير

يارا بتحدى: ادينى يومين اتنين يالدهب بتاعك يرجع او هكون ملزمه ادفعلك حقه بالسعر ال تقدره

محمود ببرود: وانا موافق

يارا بجرأة: ويلا اتفضل الباب يفوت جمل

بصلها بغضب ومشى

أروى بصوت رقيق مبالغ فيه وهيا بتلحقه: استنى يامحمود

مسكت سنية دراعها بقسوة قبل ماتروح وراه

أروى بوجع: ماما سيبى دراعى محمود طلع زعلان هصال..

انصدمت بصفعة والدتها القوية حطت ايدها على وشها بعدم تصديق

= ماما انتى بتمدى ايدك عليا

سنية بعصبية: واكسر دماغك كمان انتى يابت ملتك ايه مفيش عندك دم خالص

أروى بتبرم: وانا عملت ايه يعنى

سنية بحدة: داخلة ايدك فى ايده وقدام الناس اتكسفى على دمك ياشيخه او حتى اعملى حساب لسمعتنا ال بقت فى الأرض بسببك

أروى بصوت عالى: زعلانة اوى انى جاية معاه وبتضربينى ومكلمتيش بنتك ال باعت الدهب

التفتت سنية ليارا ال كانت شاردة بحزن قالت بحدة

= وانتى فين الدهب يايارا؟

يارا بصدمه: ماما انتى هتشكى فيا وتصدقى كلامهم

فى اللحظة دى كان حامد جه

شهقت سنية مجرد ماشافته كان وشه فيه بعض الكدمات البسيطة

= ايه يابنى مين عمل فيك كدا

حامد بضيق: شوفت الزفت ال اسمه محمود واتخانقت معاه

أروى بسخرية: بعنى هو ال ضرب*ك وعمل فيك كدا

حامد بحدة: لا انا ال ضرب*ته ودلوقتى هاجى اكمل فيكى لو مخرستي*ش

أروى باستفزاز: انتو تيجوا مضروب*ين من برة وتتعصبوا علينا

طب والله مانا سايبك

حاشته سنية وصاحت: خلينا فى المصيبة ال احنا فيها دهب اختك انسرق

حامد بضيق: مانا عرفت من الزفت محمود انا عايز افهم ازاى ينسرق من البيت فى حد غريب دخل

يارا بجمود: انا خلاص عرفت مين ال خده

بصت لاروى وقالت: انتى ياأروى

أروى بغضب: انتى اتجنن*تى لا بقولك ايه مترميش بلاكى عليا ياختى

حامد بحدة: اخرسوا انتم الاتنين ولا كلمه مش بيجيلنا من وراكم غير الغم ووجع الدماغ

دخلت يارا اوضتها وهبدت الباب بغضب وهيا بتفكر هتعمل ايه وبقت شبه متأكده ان اختها اروى ال سرقت الدهب رغم ان معندهاش اى دليل

خدعة الحب

بعد مرور يومين

راما: ماما انا رايحه الدرس

سنية: تخلصى الدرس وتيجى علطول عشان اخوكى ميزعقش

راما بتافف: حاضر ياماما

خرجت يارا وكانت لابسة لبس خروج

سنية باستغراب: على فين يايارا

يارا بتوتر: رايحه الشغل ياماما

سنية بشك: شغل ايه وده يوم اجازتك

ارتبكت يارا وبان جدا على ملامحها لكن سرعان ماقالت

ماهو فيه غلطه فى الحسابات هراجع الحسابات وجاية علطول

مشيت يارا علطول قبل ماوالدتها تسألها اى سؤال تانى وتشك فيها

وبعد مدة قصيرة كانت وصلت لمعرض عربيات كبير

فين محمود!

رد الاخر باحترام: اتفضلى ارتاحى ياآنسة يارا وهندهله

هزت راسها بايجاب بعدها بدأت تبص على المكان لفت انتباهها التغييرات ال حصلت فيه الا انها مهتمتش قطع شردوها صوت محمود الساخر

= فى تطور صح

يارا ببرود: حاجة متخصنيش

محمود بهدوء: على العموم نورتى المكان

بص على ايدها وقال بسخرية : شايفك جاية من غير الدهب او الفلوس ايه نسيتى كلامك

يارا بحدة: اسمعنى يامحمود وعايز تصدق صدق مش عايز انت حر اليومين ال فاتوا مخلتش مكان مدورتش فيه على الدهب وحقيقى مش لاقياه

محمود ببرود: سهله هاتى الفلوس

يارا بجدية: ده مبلغ كبير مش هقدر أدفعه كله بس ممكن اديك جزء منه والباقى هدفعه فى الوقت المناسب

محمود ببرود: يارا انا رجل اعمال والكلام ده ميمشيش معايا

يارا بضيق: طب عايزنى اعمل ايه؟

خرج محمود شيك وقالها ببرود: انا قدرت المبلغ امضى على الشيك وادفعى الفلوس وقت ماتحبى وبكدة اكون ضمنت حقى

بصتله يارا باحتقار وقالت: هستغرب ليه مفروض اتوقع منك اى حاجة بعد ال عملته فيا

تجاهل محمود كلامها وقال بخبث

= على فكرة انا ممكن انسى حكاية الدهب دى وكمان مخلكيش تمضى على اى شيك بس بشرط واحد

بصتله يارا باستغراب فقرب منها خطوة وقال بهمس.....