-- عشان كده لما تيجى تشاور نفسك متتحيزش لقرارات عقلك بس خالى قلبك يشاركك ولو بنسبه بسيطه عشان لو عقلك قسى قلبك باللين يرجعك..

طبعت قبله على صدره داعيه له بصلاح الحال وغادرت..

تطلع أصلان لآثار يتمعن فى مفردات حديثها واستدار يدلف إلى مكتبه يباشر عمله..

✨✨✨✨✨✨✨✨

صعدت صفاء للطابق العلوي تستعد للخروج وقبل أن تلج إلى غرفتها سمعت صوت شهاقات بكاء ابنتها طرقت الباب وبعد أن أذنت لها "جميله" بالدخول أغلقت الباب خلفها وجلست بجوارها على الفراش تسألها:

-- ممكن اعرف انتي ليه بتعيطي. 

اجابتها جميله بعتاب ولوم:

-- علشان حضرتك عارفه كل اللي بيني وبين "باسم" ومش بتدخلي رغم كل عيوبه وطمعه فيا.. هتخليني اتجوز شخص أنتِ عارفه أنى مش هرتاح معاه وحضرتك رفضاه بكل تصرفاته.. واللي قهرني أكتر  إنك عارفه أن حماتي مش بتحبني وسيباها تبيع وتشتري فيا..

شهقت بشجن

-- ليه يا أمي كده هو أنا مش بنتك.

بقلب أم تعشق ابنائها ولا تسمح لأحد أن يجرحهم ولو بكلمه هتفت :

-- معاشت ولا كانت اللي تبيع وتشتري فيكي وانا عيشه عالدنيا ده أنا أنسفها من على وش الأرض نسف.. مبقاش صفاء الألفي أن مكنتش أخذ لك حباب عينيها قصاد كل دمعه نزلت من عينيك.. 

مسحت على وجنتيها تزيل الدموع المنسابه من عينيها هاتفه بحب

-- يا خايبه ده أنتى بنتي ونور عيني وقلبي من جوه كمان.. ومستحيل اسيب شعره منك تتأذي بس أنا حذرتك منهم كثير وأنتي مش مصدقه.. قلت اسيبك تتعاملي معاهم وتكتشفي عيوبهم لوحدك.. وبرضو وأنتي تحت عيني يا قلب أمك.. سيبتك تفهميهم وتشوفيهم على حقيقتهم لاني كنت واثقه في تربيتك وان كرامتك وعزه نفسك أهم عندك من راجل خسيس زي "باسم".. وبعدين أحب أقولك لآخر مره البشر نوعين نوع يحط الفلوس على دماغه لحد ما طمعه في الدنيا وفي اللي حواليه يدفنه بالحيا وده نوع خطيبك وأمه.. ونوع زينا وزي ناس كثير يمكن ما يكونش معاهم نفس الفلوس اللي معانا يحطوا المال تحت رجليهم فيعليهم ويعلى بيهم ويخافوا ربنا في تعاملهم مع الناس ويراعوا ربنا في كل حاجه بيعملوها.. وصدقيني النوعين دول من البشر ما ينفعش يكملوا بعض  ديما هتلاقيهم ضد بعض.. وفي الاخر اللي معاه ربنا هو اللي بيفوز بالدنيا والاخره.. قومي يلا اغسلي وشك وسيبيها على ربنا وربك تدابيره كبيره وحكيم وانا متأكده أنه هيقف جنبك. 

ارتمت "جميله" في أحضانها تبوح عن ما كان يغص داخلها :

-- ريحتيني يا أمي أنا كنت خايفه ومرعوبه لحضرتك تكوني اتخليتي عني..

أخرجتها صفاء من صدرها واستقامت تبتعد عنها قائله بتهكم

-- قومي يا خايبه اجهزي علشان نلحق ميعاد العقيقه بتاعة بنت خالتك.. واعملي حسابك هنبيت معاهم عشان خالتك متزعلش.. وشيلى الأفكار العبيطه دى من دماغك..

زفرت بتعب وهى تغمض عينيها من تخبط ابنتها ثم اشاحت لها بيدها وتركتها وغادرت لكي تستعد للذهاب هي الاخرى..

ابتسمت "جميله" براحه بعد هذا الحديث تشحذ عزيمتها على التغيير وحسن التصرف، نهضت من على فراشها وتوجهت لحجرة الحمام تغتسل وتستعد كما أمرتها والدتها وهي تحمد ربها داخلها انه رزقها بأم حنونه القلب عطوفه المعامله رزينه العقل .

✨✨✨✨✨

في نفس الأثناء كان أصلان يجلس خلف مكتبه يتابع عمله عبر حاسوبه النقال انتبه على صوت طرقات باب المكتب أمر الطارق بالدخول ثم رفع قامته لكي يعلم هويتها وجدها الممرضه ألقت عليه التحيه باحترام..

 نظر إليها بقلق يتبعه تساؤل ولهفه في صوته

-- كهرمان كويسه

 أجابته تطمئنه باندفاع من هيئته:

-- الحمد لله يا فندم هي كويسه وهتفوق كمان ساعه..

تنحنحت بتخوف

-- بس أنا كان ليا رجاء عند حضرتك

اشار لها أصلان أن تكمل حديثها تحدثت وهي تتلجلج في نبرتها:

-- كنت بستاذن حضرتك امشي قبل معيادي بساعه علشان ميعاد دكتور أمي وأنا عارفه أن ده ممنوع وان الدكتوره محذرانا.. بس أنا فعلا والدتي تعبانه النهارده وأنا محتاجه للشغل ده جدا لأن النهارده جلسه الغسيل الكلوي لأمي وزميلتي على وصول.. يعني حضرتك متقلقش من حاجه.. هي نايمه ومش هتفوق دلوقتي..

استقام أصلان واقترب منها متفهما ظروفها واخرج من جيب سترته حفنة نقود واعطاهم لها قائلا:

-- اتفضلي الفلوس دي خليها معاكي علشان خاطر والدتك ولو حابه تغيبي بكره اتفضلي وأنا معها.. ومتخافيش هبلغ الدكتوره بنفسى وهخليها ما تتكلمش معاكي..

هزت رأسها خوفا من أن تستغني الطبيبه عنها قائله 

-- لا يا فندم أنا محتاجه اخرج ساعه بدري بس..

اشار لها بالموافقه قائلا 

-- اتفضلي

أومأت له بطاعه واثناء انصرافها من غرفة المكتب دلفت والدته وأخته.

ابتسمت صفاء الى الممرضه قائله:

-- طمنيني يا بنتي على "كهرمان" عامله أيه دلوقتي وفاقت ولا لسه نايمه..

 اجابتها الممرضه تطمئنه على حالتها:

-- لا يا فندم هتفوق كمان ساعه لما زميلتي تيجي.. بس هي حالتها مستقره..

أومأت لها صفاء داعيه لهم بالتوفيق:

-- ماشي يا حبيبتي ربنا يوفقكم ويشفيها يا رب هى وجميع ما خلق..

أمن الجميع على دعوتها وغادرت الممرضه وبقي ثلاثتهم بمفردهم..

اقترب أصلان من والدته

--  خلاص يا امي ماشيه دلوقتي