-الطفل دا هيكون ابني أنا ….

بصت ليه بصدمة ،وهيا مش مستوعبة إزاي عاوز طفل من الحرام يكون ابنه ؟؟لكن هزت راسها بالرفض 

-لا طبعًا وأنت تشيل شيله غير شيلتك ليه ،أنا رافضة القصه دي 

وبعدين بصتله برجاء وقالت

-سيبني امشي ارجوك أنا مش عاوزه ادخلك معايا في مشاكل ،مصيبتي وشيلتي وأنا اللي هشيلها 

ضحك بسخرية خفيفة وقال

-بت أنتِ فاكره انهم اتنين كيلو طماطم هتشليهم 

سكتت حسنة، وربعت إيديها قدامها ولفت وشها للناحية التانية من غير ما ترد.

وقف كاظم ومشى ناحية المطبخ، وقال وهو مديها ضهره

-ادخلي نامي والصباح رباح وهتتحل من فوق

جت تتكلم تاني لكن لف ليها وقال بملل

-مبتزهقيش من الكلام قومي ،الاوضة اللي على ايدك اليمين وهتلاقي هدومي البس اي حاجه مناسبه ،يلا .

في مكان آخر ..بيقولوا عليه غُرزة 

كان المكان مليان دخان وسواد ،قاعدين مجموعة من الشباب الفاسده والضياع ،ريحة المواد المُخدرة مسيطرة على المكان ،جميع أنواع الخمور .

مد أحدهم ايده وقال 

-ما تخلص ياض ،هات نفس .

رد عليه التاني وهو بيضحك ومش حاسس بالدنيا 

-خد ياعم ما أنت من حقك ،مش عملت اللي أنت عاوزه وكسرتها 

سحب نفس عميق من السجا*ره وقال بتفاخر

-لا ومش اي حق ،دا حق معلم ابن معلمين ،علشان تعرف إني يتبصلي مش تكرفلي .

رد أشرف وكان اسمه خسارة فيه 

-طب هتعمل ايه ،دا طلعت حامل يا معلم هتلبس عيل ومن الحرام ؟ 

ضحك حاتم وهو بيرجع راسه لورا وقاله 

-قايل يعني أنا اللي ابن حلال أوي ،مطيرش الدماغ اللي عاملها ياعم .

-على رايك .

تاني يوم 

خرجت حسنة وهيا سامعة صوت كركبة جاية من المطبخ ،كانت لابسه تيشرت بكم قماش وبنطلون من هدوم كاظم 

لقيته واقف قدام الرخامة ف المطبخ بيحاول يقطع بطاطس وكل شويه يرفع قطعتين بطاطس  قدام عينه ويشوف المقاس بينهم عامل إزاي .

ابتسمت نص ابتسامه وقالت 

-أنا ممكن اساعدك يا استاذ …

سكتت لأنها لحد دلوقتي متعرفش اسمه ،فضل باصص للبطاطس وقالها 

-كاظم ،اسمي كاظم ،يعني قاعده في بيتي من امبارح وماتعرفيش اسمي 

قالت بإحراج خفيف 

-مجتش فرصه ،ممكن اساعدك !؟ 

لف ليها وفتح ايده كانه بيقولها اتفضلي 

رجعت شعرها لورا ودنها واتقدمت دخلت المطبخ وبدات تقطع البطاطس بالتساوي وبسرعة  وبعدين فتحت عليها مايه وحطت ملح وخل .

اتكلم كاظم  وهو واقف يراقبها وقالها 

-اي رايك ندردش وأنتِ بتعملي فطار ،فكره حلوه 

سكت لحظة وكمل بجديه 

-على فكره أوعى تفتكري إني راجل حقير معنديش نخوة والشغل دا ،لا عندي بس حابب أشوف الموضوع من منظور تأنّي الصراحه،بصي مش هكذب عليكِ وأقولك غلطانة والكلام دا زي ما المعظم بيجيب الغلط على البنت وخلاص ،لأن كلنا هنقف نتحاسب بس ممكن يكون عليكِ ذنب برده 

ضحكت ضحكة عاليه وبسخرية وقالت 

-ذنب ايه يا أستاذ ؟؟احنا عايشين مع ذئاب بشرية وكلمة ذئاب خسارة كمان ،أنت مشوفتش الخمسه اللي اعتدو على كلبة ؟؟؟ 

بص ليها بصدمة وقالها 

-أنتِ بتقولي ايه ؟

-بقول اللي أنت سامعه يا كابتن ،شكلك كنت بره مصر 

-اه من زمان 

فتحت التلاجة وطلعت منها بيض وهى مستمره في الكلام 

-عارف الفرق بينا ايه هما كفره عارفين دي بس محدش بياخد حاجه من وحده غصب ولو حصل بيكون قليل ،تعال اسمع هنا بقا اللي اعتدى على طفله واللي اعتدى على كلبة وكده ماشي مع كله 

وصت ليه مباشرة وكملت 

-بس الحق مع الراجل والباطل مع الست وهيا دايره كده بقا .

رفع حاجبه ليها باستغراب وقالها 

-ولو أنتِ مظلومة،ابوكي هيقول عليكِ كده ليه 

ردت بهدوء مؤلم 

-علشان هو صدق اللي اتقال عليا ، مكنش عنده ثقة ف تربيته بس عادي بقا .

سألها  سؤال صريح لما حس فعلًا إنها مظلومة 

-مين عمل فيكِ كده؟ 

-مش فارقه ..بس هقولك

رفعت عينيها ناحيته وقالت

-المفروض كان اخويا…..

يتبع………