استنوني ، وقفوا الباص كنت بقولها وانا بجري ورا الباص بجر شنطتي وبكل قوتي بجري لعلا وعسى الحقهم

وقفت بيأس وحزن اني ملحقتهمش بس لقيت الباص وقف ، جريت عليه بفرحة

أنا اسفة اني اتأخرت

كويس انك لحقتينا ياانسة ، وكل الشكر للبشمهندس مراد

بصتله وشكرته

ببص ملقتش غير مكان واحد ، جنبه

بصيت بكل توتر ع المكان لقيته قام من مكانه

لو حابة تقعدي جنب الشباك مفيش مانع

هزيت راسي بتوتر

شكرا ، قعدت جنب الشباك مبسوطة من القعدة ومتوترة من ان ف شاب غريب قاعد جنبي

........

اكيد بتقرأو كلامي دلوقتي ومستغربين عدم وجودي ف يوم الاجازة بتاعتي ، بس مكنش قدامي حل غير ده ، أنا زهقت من تحكماتكم فيا وكل اللي يشغلكم ان محدش يكون احسن مني زهقت من المقارنات عايزه اعيش حياتي أنا بقيت كبيرة ومسؤولة عن نفسي ، أنا حجزت ف الرحلة اللي كنتوا رافضين اني اروحها من وراكم ، اتمنى تتفهمو اللي عملته ومتزعلوش مني ...

بحبكم بنتكم فيروز

اااه يابنت ال..، بتعصي اوامري يافيروز

اهدى يحبيبي ، نرن عليها ممكن تكون لسه ممشتش

-ازاي بس يانادية ، الرحلة بتتحرك الساعة 6والساعة دلوقتي 10 زمانها ف الطريق

رن عليها بس ياهادي ممكن نلحقها بردو احنا فيها

حاضر

= الرقم الذي طلبته غير متاح بالخدمة

قفلت موبايلها

احنا مكنش لازم نشد عليها كده ، احنا غلطانين

احنا معملناش حاجة لينا كل ده ف مصلحتها

سيبها ياهادي ، ولما تيجي يكون لينا تصرف تاني

مممم ، سبيني لوحدي يانادية لو سمحتي

حاضر ياحبيبي ، هعملك قهوة وهجبهالك ، بس هدي نفسك

...

افتكرت اللي عملته وايه اللي وصلني ل كده مكنتش اتمنى أبداً اني اعمل حاجة من وراهم بس هما اللي وصلوني ل كده مكنش قدامي حل غير كده

كنت نازلة من الشغل ولقيت اعلان عن رحلة متنقلة لمدة شهر

رحلة أفكارها جديدة وغريبة وممتعة كل اسبوع ف مكان شكل وسفاري وافكار كريتڤ شدني الاعلان قررت اني هروح واتشجعت وقولت ل اهلي بس جالي رفض قاطع منهم واني ليه اضيع وقت ف كلام فارغ وكان زماني استغليت الفترة دي واتعلمت حاجات كتيرة ل شغلي بدل م حد يكون احسن مني وبلا بلابلا بلا وزي مانتوا شايفين كده قررت اروح من وراهم واحطهم قدام الأمر الواقع

.....

فوقت من سرحاني ع صوت الباص

هنا مكان الاستراحة قدامكم نص ساعة اللي عايز ينزل يشرب حاجة ولا يجيب حاجة بس متتأخروش ومتروحوش مكان بعيد .

بدأو ينزلو كلهم ، كل شخص جاي مع مجموعة سواء أصحاب أو أسرة

هتنزلي ؟

فوقت ع صوت اللي كان قاعد جنبي

ها ، اه هنزل

وانا كمان

هزيت راسي بهدوء ونزلنا

كنت حساني تايهة اول مرة اكون لوحدي ف مكان جديد بس لازم اكون اقوى واعتمد ع نفسي كنت لسه بشوف هعمل ايه ، قاطعني الاستاذ ، مش فاهمة ماهو والله ، بس اللي اكتشفته إن هو كمان لوحده مش جاي مع أصحابه ولا أسرته. حاله من حالي يعني

أنا جعان اوي

وانا كمان اوي

تعالي ناكل هناك ، شاور ع عربية صغيرة فيها اكل ومكنش عليها زحمة

ايوا بس كده مش هنتأخر

لا ، معندوش حد ف الطلبية هتجهز بسرعة

طب تمام مفيش مشكلة

روحنا قعدنا قدام العربية ف مكان كده عليه زي شمسية بتحجب الشمس

طلبنا سندوتشات لأنها اسرع حاجة ممكن تتعمل

ممكن شاي بدون سكر جمب الاكل لو سمحت

تمام يافندم ، حاجة تانية

لا شكرا

-خليهم اتنين ياصحبي

تمام ماشي

متأخرش زي ماقال فعلا خمس دقايق وكل حاجة كانت جاهزة

مكنتش اعرف ان حد بيحب يشرب شاي جنب الاكل زي

احلا حاجة تتعمل بجد ، لو كلت من غير شاي مبكونش مرتاحة بحس ان ف حاجة ناقصة

فعلا ، ويسلام بقا لو بنعناع

بحب الشاي من غير اضافات بيبقا احسن

طب ع فكرة بالنعناع احلا

لا من غيره احلا ، قولتها بتحدي وبعفوية

خلاص ياستي عرفنا أنه بالنعناع احلا

ايوا شوفت ، اييه بس انا مقولتش كده

هه لا قولتي اهو

انت اللي وقعتني

مليش دعوا بيه احلا

يووووه ، لا خد بالك انت كده مبتحبش الشاي

ازاي ده بقا

عشاق الشاي بس اللي بيحبوه بدون اضافات

خلاص اقنعتيني ياا، صحيح اسمك ايه

-فيروز

-جميل شبهك

-شكرا

عدا نص ساعة وركبنا

......

نسيت اعرفكم بنفسي أنا فيروز عندي 27سنة كل حياتي كانت عبارة عن مذاكرة عشان بس محدش يكون احسن مني وده مش كلامي ده كلام ماما وبابا

-بابا عايزه العب

= لا مفيش لعب ذاكري ابن عمك بيذاكر وبيجيب درجات عالية متكسفناش قدام العيلة

-ماما ممكن ننزل نخرج عشان زهقانة

= لا مينفعش وراكِ مذاكرة كتير

-بس احنا ف اجازة

بلاش دلع بنت خالتك بتاكل الكتب اكل اجازة ودراسة ايه هي احسن منك ف ايه موفرينلك كل حاجة اكل وشرب

-بس

= مفيش بس يلا ع اوضتك ذاكري

دي كانت حياتي من البيت للدرس للمدرسة ومفيش جديد حتى ف الاجازة دراسة مفيش وقت للرفهية طفولتي مكنتش زي اي طفولة معشتهاش كان نفسي العب زي الاطفال كان نفسي اتمرجح زي اي طفل ف بداية حياته ،حياة مملة روتيينية حياتي كانت بين الكتب

.......

وصلنا الاوتيل بعد تعب استنينا ف الريسبشن شوية لحد اما يظبطوا حجز الغرف ع حسب المجموعات في اوض ل فرد وأوض لأكثر.

وصلت لاوضتي اخيرا اخدت شاور ع السريع وحدفت نفسي ع السرير معرفش نمت قد ايه صحيت من النوم مش عارفه الساعة كام ، أنا فين ، خمس دقايق بحاول استوعب وفعلا استوعبت ، لقيت الساعة 10 بليل كنا واصلين الساعة الساعة 2 الضهر نايمة من وقتها بقا ، بس مش نومتك دي يابت ياروز والله

فتحت فوني لقيت مكلمات كتيرة اوي ، اكيد مفيش غيرهم هيرن عليا ، زعلانة اني حطيتهم ف موقف زي ده بس غصب عني بقالي 27سنة محبوسة ف محيط واحد حياتي مملة مفيش جديد كان لازم اعمل كده عشان لما اتجوز احكي ل عيالي مغامراتي مش لما يسألوني اقولهم كنت بذاكر ومكونتش اصدقاء .كنت قاعدة ف البلكونة لقيت حد بيغني صوته لطيف فضلت مركزة مع الصوت حسيته قريب ،قربت من الصوت لقيته البلكونة اللي جنب بلكونتي

فضلت مستمتعة بالصوت والأغنية

"قلب ف الدفاتر

تلقى الشعر بيحكي عنا فاكر

ايام ماكنا بنحلم نبقى تحت ضل ساتر

قل اللي بينا بالايام وصبح كلامنا فاتر

مش لاقي حد غيرك حتى ف البعاد اغازل "

اتمنى صوتي يكون عجبك

انت !!!

ايه معجبش ولا معجبش

مش قصدي بس اتخضيت مش اكتر

ماشي ياستي مقبولة منك

بس صوتك حلو اوي

الله يسترك

ابتسمت وبصيت قدامي

تعالي ننزل نتمشا ع الشط

عادي ؟

اه، اول مرة تيجي هنا

اول مرة أخرج من حياتي ..

بصلي شوية بيحاول يستوعب بقول ايه

بما أنه ينفع ، ف خمس دقايق اجهز وانزل

ماشي متتأخريش

لا اتأخر ايه بس فوريرة

بعد ساعة نزلنا ف الريسبشن

هو ده اللي خمس دقايق وفوريرة ، ياشيخة حرام عليكِ ده انت خللت من الانتظار

مكنتش ساعة اللي اتاخرتها يعني

من بكرة مفيش تأخير هيفوتك حاجات كتيرة

لا إن شاء الله هظبط مواعيدي

مشينا ع البحر فضلنا ساكتين شوية

كان قصدك ايه لما قولتِ انك اول مرة تخرجي من حياتك

فضلت شوية مردتش

لو سؤالي ضايقك مفيش مشكلة

كنت طفلة مش فاهمة حاجة غير اني شايفة جميع الأطفال بتلعب وبتجري وبتتفسح وبتتمرجح ف كنت عايزه اعمل زيهم ، بس ماما وبابا كان ليهم رأي تاني

ازاي

يعني ليه العب مثلا وف الوقت ده اذاكر واعرف حاجات تفيدني وتخليني احسن من ابن عمي أو بنت خالتي أو او او ... ،كنت بشوف قرايبي اللي بتقارن بيهم ديما بيلعبوا اهلهم سايبنهم ، بيذاكروا منكرش كده بس وقت الإجازات حياتهم بتختلف عن حياتي خروج وسفر ولعب وهزار عشان يجددوا طاقتهم لسنة جديدة للدراسة ، أنا كنت غير ....

العودة_للماضي

ماما

نعم ياروز

احنا ف اجازة

ايوا عايزه ايه يعني

مينفعش نصيف أو نروح اي رحلة

جه صوت بابا من ورايا

انتِ بتقولي ايه ؟

أنا زهقانة يابابا وزهقت من جو الدراسة والمذاكرة

انتِ عايزه ولاد عمك يكونوا احسن منك ولا ايه

بس هما اصلا سافروا ومنزلين صورهم ف اشمعنا أنا

ف الوقت اللي بيغيروا جو فيه انتِ لازم تذاكري وتكوني احسن واشطر منهم

بس يابابا

من غير بس وهاتي موبايلك ده عشان متتعطليش بيه وملكيش دعوة بمين سافر ومين لا ركزي ف مذاكرتك وبس

دخلت اوضتي وقلبي بيتقطع من الحزن بعد فترة مش كبيرة دخل عليا وجابلي كتب كتيرة

بكرة بليل هختبرك ف اجزاء فيهم وهسألك كتير ف ذاكري وده احسنلك

عودة من_الماضي_

وبس كده دي كانت نبذة عن حياتي

-احنا فيها اهو هنعوض الايام دي طول الرحلة

ياريت بجد أنا كنت متحمسة للرحلة دي اوي

فضلنا كتير نتكلم هزار ، كنت مستغربة جرأتي وكلامي معاه بس الفكرة مفيش غيره لوحده مش هينفع اروح ل مجموعة أصحاب أو لأسرة اقولهم فسحوني معاكم هبقا متطفلة اوي وهو لذيذ بصراحة يعني ....

صباح يوم جديد مليان امل وحماس وخطط ومن ناحية أخرى مستقبل غامض للجميع ...

قومت بكل نشاط وحماس ع غير العادي خدت شاور ع السريع وقفت قدام الدولاب حيرانة انهي دريس البسه مش وقت حيرة مفيش وقت

خدت دريس موف جزء منه فيه فراشات والاحب ع قلبي والجزء التاني سادة لميت شعري ديل حصان روج خفيف مسكرا ،كحل وبس كده عال اوي ياروزي بصيت ف الساعة لقيتها بقت 10 الا عشرة. والمعاد 10 اووف يدوبك لبست كوتش ابيض مريح جريت لميت كل حاجة محتاجاها رميتها ف شنطتي بعشوائية خدتها جري وانا بعدل ف شنطتي خبطت ف شخص

اااااه مراد ، انت كمان متأخر !!

لا ياستي مش متأخر ، كنت جاي استعجلك كالعادة متأخرة

احم ولا متأخرة ولا حاجة ، بصيت ف الساعة اوبس دي بقت الا خمسة معتش غير 5 دقايق ، اجرييي

خدناها للباص جري ولحقناهم ف اخر لحظة

-هيييح الحمد لله لحقناهم

بأعجوبة

-يلا فدايا كده كده

-ده اصلا

-خليك فريش يبو الصحاب لحقناهم

ماشي يازميلي عشان خاطر عيونك بس

كل ذوق والله

وصلنا مكان للفطار هو كافيه بس ع البحر لك حق الاختيار لإما تاخد الفطار وتاكل ع الشط قدام البحر أو تقعد ف الكافيه بيطل برضو ع البحر اتحدد وقت ساعتين

قررنا ناكل ف الكافيه وبعدين نتمشا ع البحر

عدا الوقت وركبنا زورنا أماكن كتير سياحية كنت بصور وبتصور ومراد أصر أنه يصورني، صورني صور كتيرة حلو و تغفيلات اتصورنا سوا خلينا حد يصورنا وسيلفي كان وقت جميل جدا

جه بليل وروحنا ملاهي

كنت ببص بحماس وخوف لاول مرة هحقق حلم طفولتي

-ها ياستي هتركبي ايه

بصيت ع كل الالعاب الصعبة والسهلة والتافهة

-هركب دي الاول، شاورت ع السلسلة بكل حماس ،ياا بسرعة نلحق مكان

منكرش اني كنت مرعوبة من الفكرة بس دي فرصة مش هتتكرر

طب يلا بينا

ركبنا اتنين قريبين من بعض بدأت تشتغل بالراحة وترتفع طلعت الفون صورت اللحظة بدأت تسرع وترتفع اكتر قفلت الفون حطيته ف الشنطة رفعت ايدي بكل سعادة وبدأت اصرخ بفرحة مراد بدأ يشاركني وعمل زيي

نزلنا منها وركبنا كتير غيرها وقفنا قدام بيت الرعب والثري دي

-ندخل انهي الاول

-بيت الرعب

طب ماندخل الثري دي ونجيب فيلم رعب

طب ماندخل بيت الرعب وبعد كده الثري دي ونجيب فيلم مغامرة اكتر

-مابلاش هيكون صعب

-بيت رعب لعبة يامراد انت خايف ولا ايه

طب يلا بينا ياسكر ونشوف مين اللي خايف

دخلنا بيت الرعب ،الدنيا ضلمة ومرعبة بشكل اصوات خفيفة من بعيد كل اما نقرب بتزيد

-انا رجعت ف كلامي ممكن نخرج

بيت رعب يامراد انت خايف ولا ايه ونينينينيني ، ايه مش كنتِ عاملة فيها شبح

أنا عيلة والله ، بتاخد بكلام عيلة

مينفعش نخرج من البوابة اللي دخلنا منها بتتقفل ورانا

-طب وبعدين

لازم نشوف المخرج بس لازم تكوني مستعدة للي هنشوفه

-احنا هنشوف ايه ؟ قولتها برعب

لا دي حاجات بسيطة ، يلا يابرنسيسة

احم اصلا عادي مش خايفة

ماشي ياستي بس حاااسبي

اااااه يمامييي ف ايه

متخافيش بهزر معاكِ

ده انت رخم وبايخ يجدع

فضلنا ماشين الاصوات بتزيد ، كان فيه بصيص من النور بدأ يختفي ، فضلنا ماشين كنت خايفة اوي ماشية برعب فاجئة ظهر صوت وشخص شكله يرعب وصوته وحش

يماميي ، مراد أنا خايفة طلعني من هنا

متخافيش أنا معاكِ, هاتي ايدك كده واجمدي كده

مسك ايدي سرحت شوية احساس غريب جوايا حسيته لما مسك ايدي فوقت ع صوت صريخ مستفز ومرعب ، مسكت أيده جامد

وهوب صوت قلم نزل ع وش مراد

هو ايه ده اللي حصل

اه يولاد المض*ايقة

فضلت اضحك ع منظره والصدمة اللي ع وشه يعيني القلم صعب اوي

ثانكس جود منضربتش ،ولسه مكملتش كلامي لقيت القلم نازل ع قفايا

اااااه دي بتوجع ياشوية حيوا*نات

احسن احسن ، كنتِ فرحانة فيا

فضلنا شوية ماشين مع الرعب والتفاصيل اللي جوا لحد ما اخيرا لقينا الباب جرينا عليه وخرجنا

هييييح الحمدلله، لو حد سمعني بقول ندخل بيت الرعب تاني يقتلني

من عنيا ، انت تؤمر يجميل

حب الناس ده نعمة خد بالك

خلص الوقت من هزار ولعب وتهيس

وروحنا يوم كان مرهق بس لذيذ

.......

بس ياهادي مينفعش نجبرها ع حاجة بمجرد أنها غلطت غلطة زي دي

فيروز لازم تتربى وتتعلم ازاي تحترم قراري ومتعصينيش

ياحبيبي مهما حصل مينفعش تجوزها ل ابن عمها من غير ما تاخد رأيها

مفيش عندنا بنات بيتاخد رأيهم البنت لابن عمها

بس هي متعرفوش ولا عمرها شافته لانه كان مسافر

تبقا تتعرف عليه بعد الجواز ، كلمة وادتها وانا اتفقت مع أبوه وده كلام رجالة

بس ياهادي ..

-جرا ايه يانادية هتنزلي كلامي ف الأرض ولا ايه ، عايزه اخويا يقول عليا عيل

لا عاش ولا كان اللي يقول عليك كده ده انت سيد الرجالة

خلاص اقفلي ع الموضوع لحد اما تشرف ست الحسن

سكتت نادية وهي قلبها واكلها ع بنتها نفسها تطمن عليها ، وخايفة من قرار جوزها ل مسير بنتها

.....

يتبع