ـ بس يا هادي..

-جرا ايه يانادية هتنزلي كلامي ف الأرض ولا ايه ، عايزه اخويا يقول عليا عيل 

- لا عاش ولا كان اللي يقول عليك كده ده انت سيد الرجالة 

- خلاص اقفلي ع الموضوع لحد اما تشرف ست الحسن 

سكتت نادية وهي قلبها واكلها ع بنتها نفسها تطمن عليها ، وخايفة من قرار جوزها ل مسير بنتها

.....

صحيت الفجر صليته وقعدت شوية ف البلكونة سرحت ف حياتي 

عودة_للماضي 

- ناقصة درجة يافيروز ، درجة ايه الاستهتار ده 

- يابابا مهو لازم أنقص ، لازم اغلط عشان اتعلم 

- انتِ بتردي عليا كمان بالغلط ، معندناش حد بينقص درجة ولا ربع كمان 

- مكنش قصدي ،انا بس..

- ابن عمك مقفل كل المواد منقصش الدرجة ، عايزه عمك يقول عليا ايه بنتي فاشلة 

- أنا مالي بيه دي حياتي ليه كل شوية اتقارن بيه ، ليه لازم أبقا نسخه طبق الاصل منهم ، طب ماتحبوني زي ماانا لازم اكون متفوقة وطالعة الاوائل عشان تحبوني 

- اه لو عايزانا نحبك لازم تسمعي كلامنا ومتنقصيش 

- يابابا مهو غصب عني 

- مفيش حاجة اسمها غصب عنك انتِ بس لو متفكريش ف الاجازات والرحلات كنتِ مغلطتيش الغلطة دي 

- بس انا مبخرجش من البيت من حقي أخرج، اصيف، اتفسح  ده حتى الاجازة بذاكر فيها دي مش عيشة دي 

لقيت قلم نازل ع وشي ، من صدمتي مقدرتش اتحرك 

وقتها حسيت الدنيا بتلف بيا واغمى عليا 

......

- فيروز ، فيروووووووووز 

- ها 

- سرحانة ف ايه بقالي ساعة بنده عليكي 

لاحظت دموعي نازلة ع خدي وديت وشي الناحية التانية مسحت دموعي وابتسمت 

- مفيش حاجة ، كنت عايز حاجة ولا ايه 

- اه ، تيجي ننزل نتمشا ع البحر الجو ده تحفة ونادر لما حد بينزل ف الوقت ده 

- مفيش مشكلة 

نزلنا واتمشينا ع البحر نفس السكوت حل بينا وقفت شوية  قربت من الماية وإحساس بيشدني بإني انزل البحر 

قربت منه الماية لمست رجلي حبيت الاحساس ده نزلت اكتر بدأت العب ف الماية وانا مبسوطة وبعدها بشوية صغيرين مراد دخل معايا فضلنا نرش ع بعض ماية ، معرفش فضلنا قد ايه وخرجنا 

قعدنا ع الشط 

-انت مكلمتنيش عن نفسك ،انت مين وليه جاي لوحدك

-انا مراد مهندس اتخرجت من كلية ف كندا خدت كورسات كتيرة واشتغلت ف كذا مكان لحد اما وصلت للمكان اللي وصلته 

- ايه خلاك تيجي هنا ولوحدك 

- بابا مش فاضي وراه شغل وماما مش هتعرف  تسيبه واصحابي كل واحد بقا ليه حياته اللي اتجوز واللي سافر 

- ممممم ، ماشي 

فضلنا ساكتين شوية 

-كنتِ سرحانة ف ايه بقا 

- ساعات بحسني بكره ابن عمي 

- ليه عملك ايه 

- للاسف معمليش حاجة ، أنا عمري ماتعاملت معاه ، من وانا عندي 6 سنين اخر مرة أخرج واتعامل معاه كنت طفلة مرحة بس انطفيت بسبب اهلي 

- طب بتكرهيه ليه 

- كل حاجة كنت بعملها لازم تتقارن ب ابن عمي ، انتِ نقصتي درجة ، ابن عمك قفل كل المواد ، انتِ مبتذاكريش ليه  ابن عمك بيذاكر وبياكل الكتب اكل ، ماسكة الفون ليه مش كان زمانك ذاكرتي عايزه ابن عمك يكون احسن منك ، اجازة ودراسة مذاكرة مليت حياة روتينية حستني انسان آلي لازم يسمع الكلام ويحفظ، ويذاكر ،ويقرأ ويفهم وحوارات كتيرة خارج إرادتي لو غلطت يبقا أنا مقصرة وابن عمي احسن مني وعمي هياكل وش بابا بنته فاشلة بقا ، ف حساني مش حباه مع أنه ممكن يكون شخص كويس ملوش علاقة بحياتي وباللي حصلها مكنش يقصد يحصلي كل ده بس بسببهم كرهته 

- شايلة كتير أوي جواكي 

-عارف ساعات بحس ماما عايزه تساعدني وتخرجني من اللي انا فيه بس مبتقدرش تعصي كلام بابا ، كنت محتاجة حد ياخد ب ايدي بس ملقتش ....

عدا الوقت وفاضل يومين  برحلات مختلفة مغامرات كتيرة وجديدة وقت سعيد ايام حماسية ، خوفي بيزيد اما الوقت بيخلص بإني هرجع تاني لنفس النقطة نفس الحياة والعقاب اللي هواجه منهم لما ارجع ومش بعيد يقتلوني ...

كنا ماشين ونزلنا والدنيا كانت بتمطر الكل بيجري يستخبا من المطر 

بدأت امشي ف اتجاه المطر بفرحة ولفيت حوالين نفسي لقيت مراد بيبصلي ومبتسم وبعد كده جه وقرب مني شغل اغنية 

- تسمحيلي بالرقصة دي 

هزيت راسي باإبتسامة  

ف الخلفية 

" ازازة فو'دكا مرمية ع الكورنيش 

وانا وانتِ بنرقص ف الطريق مجانين 

هوا ساقع يضايق عسكري ف الجيش

غريبة البرد ده كله ومش حاسيين" ...

بنرقص والناس ببتبص علينا بإستغراب الجو برد والمطر بيزيد واحنا بنرقص وبنغني مع الأغنية ومندمجين معرفش فضلنا قد ايه بس  كنت مبسوطة دماغي فاضية مبتفكرش بحاول استمتع بكل لحظة بعيشها مش هتتكرر تاني

" أنا وانتِ جنان رسمي ف كون مجنون بنسكن فيه 

ولو طولنا ف الراقصة هقولك ع اللي حاسس بيه " 

كان بيغني وبيبصلي ف عيوني احساس غريب جوايا بتشد ليه اكتر مبسوطة بالأحساس ده بس خايفة اكتر ، قلبي بيقولي ان في مخاطر جاية 

خلص اليومين وخلاص هرجع للروتين والملل والمواجهة اللي هتحصلي ، كنت قاعده ف الباص سرحانه ف اللي جاي واللي هيحصل ...

- تعرفي اني حزين جدا !

- ليه ؟

- هفتقد الايام دي جدا وهفتقدك 

- وانا كمان ، قولتها بحزن وبصيت ع الطريق مش عارفة اعمل ايه مبحبش الوداع 

- عارفة أنا هرجع اخيرا للبيت بعد6 سنين غربة 

- اكيد فرحان انك هتشوفهم 

- اه أكيد 

-منزلتش ع طول ع بيتك ليه 

-مكنش حد موجود ف الوقت ده ف قولت استغل الفترة دي ...

- مش عايزه ارجع لنفس الحياة تاني 

- تيجي اخطفك

- ياريت ، قولتها بدون قصد ، ها مكنش قصدي 

- مالك احنا بنهزر عادي 

- خايفة من اللي جاي 

- متخافيش زي مااقدرتي تاخدي قرار انك تيجي اكيد هتقدري تاخدي قرار ف حياتك 

- اقولك ع سر؟ 

- قولي 

- أنا جيت هنا من وراهم 

-ايه ؟ قالها بصدمه واستغراب 

- هما كانوا رافضين  اشتراكي ف الرحلة واني اصلا ليه اضيع وقت ماكنت درست وزودت خبرتي ف الشغل بتاعي  فضلت يومين بفكر ف اني لازم اخد قرار لازم اقدر اعيش لوحدي  جهزت شنطتي وهما مش ف البيت وخبيتها تحت السرير  وكتبت رسالة  ظبطت المنبه بدري  وهما كانو نايمين ، عارف انا اتأخرت ليه؟ 

- ليه ؟

- بابا صحا يشرب ودخل يتطمن عليا ، وقتها جريت  نمت وحطيت البطانية عليا  وفضلت شوية لحد اما اتأكدت أنه نام جيت جري ولحسن حظي اني لحقتكم 

- مخاطرة  كبيرة مكنتش متوقعها منك 

- مكنش قدامي حل غير كده 

- محاولتيش معاهم كتير ليه 

- فضلت اسبوع بتحايل عليهم  ، كل اللي بيقولوه لا ابنك عمك وابن خالتك و و و و و .....

- احلا حاجة اتعملت اني قابلتك .

......

- فيروز اصحي فيروز 

- مممم شوية بس 

- قومي وصلنا 

قومت بكسل وبحزن مكنتش عايزه الوقت يخلص ويعدي حساني كنت ف حلم جميل بس اكيد هصحا منه والوقت جه وصحيت فعلا منه ، نزلنا من الباص 

- هنتقابل تاني ؟ 

- مش عارفه ، مش ضامنة اللي هيحصل الفترة الجاية 

- اتمنى حياتك تتعدل وتبقا احسن 

- وانا كمان 

مشينا كل واحد ف اتجاه ، بنفكر ف بعض ف حياتنا من غير مناكفتنا وهزارنا ياترى لينا نصيب للقاء ولا لا ....

وصلت البيت لقيته هادي مفيهوش حد الساعة 12 الضهر طبيعي يكونوا ف الشغل 

 ظبطت هدومي دخلت خدت شاور وقعدت مستنياهم ومستنية اللي هيحصلي والمواجهة 

بصيت ع الساعة بملل لقيتها بقت 3  وقت العودة صوت المفتاح ف الباب ضربات قلبي بتزيد من الخوف ايدي بترتعش متعودتش ع المواجهة معاهم ....

_يتبع_

ياترى المواجهة هتبقا عاملة ازاي!!

#سوزان_عبدالله

تنبيه: هذا ليس إلا اسكريبت خيالي

سفر فيروز من غير إذن أهلها حرام ومينفعش 

تعامل فيروز ومراد مع بعض حرام ومينفعش ابدا 

مسك الايد حرام مينفعش بنت تلمس ايد شاب الا لو كان محلل لها سواء اب اخ او خال أو عم غير كده حرام 

للتأكيد التلامس والاختلاط بين فيروز ومراد حرام..

الحجاب الشرعي واجب لا خلاف فيه