رؤيه//هو بابا فين؟ 

مودة//نزل مع عابد و داوود يلعبوا كورة

رؤيه//تمام....هي حور جت

مودة//ايوة.....بفكر نبقي نعزم نوح واهله عشان تتعرفي عليهم

رؤيه//مش مهم أكيد هشوفهم بعدين 

مودة//هما عارفين انك مسافرة.....

رؤيه//اممم.....المهم انا كنت خارجة عشان اسألك لسه معاكي رقم عفراء؟؟ 

مودة//اكيد طبعا...عوزاه!!! 

رؤيه//ايوه

كنت فاهمه سبب استغرابها كويس.....مش معقول اكيد بعد ما انا اللي قطعت علاقتي بيها....ارجع اكلمها تاني دلوقتي...باخد الرقم منها وبدخل اوضتي...بسيب موبايلي علي السرير 

وبقعد علي مكتبي....وانا قدامي ورقة ببدا اكتب كل حاجة خسرتها بسبب يونس.....وبكتشف اني مكنتش بعمل حاجة غير اني اخسر كل حاجة عشان ارضيه

وفي المقابل هو مخسرش اي حاجة!!! بالعكس هو كسب كتير.....والنتيجة....كنت بالنسباله ست نكدية عيوطة.....بندب علي اي وكل حاجة.....مكنش قادر يشوف ان هو اللي عمل كدا وان كل حاجة نتيجة تصرفاته.....

رؤيه//مساء الخير ياا آنسة يا مقموصه

عفراء//مين؟؟؟ 

رؤيه//مسحتي رقمي ده حتي مغيرتوش!! 

عفراء//رؤيه؟؟!! 

رؤيه//بقولك ايه اطلعي البلاكونة انا في البيت 

عفراء//مش فاضيه

رؤيه//انجزي يابت هستناكي

بقفل بسرعة قبل ما ترد.....وبستغل عدم وجود عابد وبدخل اوضته.....وباخد بالي انه شايل صورنا اللي كانت علي المكتب بتاعه.....بدخل البلاكونة وبتكون لسه مخرجتش.... 

بستني شوية.....وبكتشف التغيرات اللي حصلت في البلاكونة....النعناع.....وكتب عابد...الديكور اللي علي الحيطه....والكنبه....كل حاجة كان شكلها مريح

رؤيه//أخيراً خرجتي كنت لسه هدخل

عفراء//في حاجة 

متغيرتش.....عكس الباقي ملامحها زي ما هي....

رؤيه//أنتِ هتعملي زيهم أنتِ كمان 

عفراء//زي مين؟ 

رؤيه//عابد...داوود....حور

عفراء//حقهم بصراحة.....انا اصلا استغربت انك هنا واضح ان عمو سليمان كان عنده حق اوي......

رؤيه//هو واضح ان الكل كان شايف حجات مكنتش قادره اشوفها فيه

عفراء//هو انتي مكنتيش شايفة اصلا لكن مش موضوعنا دلوقتي....عوزه ايه كلمتيني ليه

رؤيه//في ايه يا عفراء انتي محسساني انك واقفه علي نار

عفراء//عشان بجد مشوفتش كده.....انتي قدرتي تكلميني ازاي اصلا 

رؤيه//بطلي اسلوب الهجوم ده شوية......انا بجد مكنتش قاصده اعمل معاكي كده

عفراء//قصدك مكنتيش عوزة تستغفليني.....وتستغلي اني بثق فيكي وبصدقك عشان تخربي كل حاجة 

انا كنت بعتبرك اخت تانيه ليا وانتي اتصرفتي بكل حقارة سواء معايا او مع غفران 

رؤيه//انتي كنتي شايفة اللي بيحصل وقتها....و... 

عفراء//بس بس مش عوزه اسمع اي مبرر....عشان اي كلام هتقولي برضو مش هيطلعك مش غلطانه انتي مكنش كفايه كل اللي حصل واللي استغلتيني فيه.... كمان قولتي سري ومش لاخوكي بس.....

رؤيه//......طيب انا غلطت معاكي....وكل حاجة وقتها كانت غلط اصلا.....لكن انا فعلاً مكنش نيتي اي اذي ليكي

عفراء//اعمل ايه بنيتك يعني......المهم اللي عملتيه في الاخر......وعلي فكرة عشان اكيد متعرفيش حاجة حصلت بعدها......داوود قابلني بعدها وفهمني انه بيعتبرني زي اخته.....وانه بيحبني وبيعزني جدا زيك بالضبط كأخت

قبل ما تدخل وقفتها......كنت مصدومه فعلا انه كلمها لاني معرفش....وكنت فاكرة الموضوع هياخد وقت وينتهي 

رؤية//لحظه لحظه.....انا بجد مكنتش اعرف....ولا اقصد احطك في موقف زي ده

عفراء//اسكتي بقي.....انتي خلتيني في مواقف كلها احقر من بعض......لما اخوكي عرف وده كان سر بيني وبينك وعرفتيه اني بحبه.......وقرر يقابلني عشان يقولي كده الغبي.....وكرمتي اللي كانت في الأرض وانا واقفه قدامه عشان يرفضني ويقولي انتي زي اختي وكبريائي اللي اتكسر مليون حته بسببك ولحد دلوقتي 

وياريت الموضوع كان علي قد اللي حصل واللي قاله وقتها انتي قولتي لاكتر واحده انتي عارفة اننا مش بنطيق بعض والناس كلها بقت عارفة اني بحبه انتي خلتيني مش عارفة اروح فين ولا اعمل ايه بعد اللي عملتيه

رؤيه//عفراء انا اسفة.....عارفة ان الموضوع اكبر من اسفي بس بجد مكنتش عوزة اسببلك اذي انا كنت فاكره داوود بيحبك وكنت عوزة اضايقه بسبب اللي بيعمله

عفراء//عذر اقبح من ذنب بجد ف تعملي فيا كده انا لحد دلوقتي فاكره كل كلامه وكل حاجة حصلت.... وعلي قد بجد ما حبيته وقتها.....بعدها مبقتش اكره حد قده كان ممكن يسكت.....بس طلع غبي شبهك

رؤيه//عفراء انتي عارفة انك غاليه جدا عندي والله لو اعرف ان كل ده هيحصل كنت سكت

عفراء//اه عارفة وشوفت غلاوتي عندك كويس اتمني تخليها بعد كدا لنفسك.......وبعدين متنسيش ان كمان غفران مش طيقاكي......انتي مسبتيش حاجه ولا حد يشفعلك ابقي خلي استاذ يونس ينفعك 

♡_♡_♡_♡_♡_♡_♡_♡_♡_♡_♡_♡_♡_♡_♡_♡

عابد//اوووووووو الله عليا بجد فنااااان

سليمان//ده انت بتعمل موڤ اون بجد بقي

عابد//قولتلك خاف مني

بنكمل لعب.....ومعانا سيف....سليمان بيعتبره زي اخوه رغم انهم عرفوا بعض لما بقينا جيران...لكن كان سيف فعلاً زي الاخ.....ولينا كان عمو الرخم اللي بيزعق علي الصوت.....لكن مش هنكر حلاوة سيف....ولا هدوء وجمال عم سيف......اللي خد قلبي ونسي يرجعه تاني وانا هنا مش قصدي سيف لان بينا مصانع الحداد اصلا 

سيف//شاطر ياعابد اول مره اشوفك عارف تلعب

عابد//انا بتهزق؟؟؟؟؟؟؟؟ 

نوح//ابقي فكرني يا عابد لو هتلعب كده المره الجايه ابقي معاك

سليمان//سبتك بمزاجي 

داوود//نبطل شغل الضراير ده ممكن عااااوز اكل

سيف//يابني انت مش لسه واكل قبل ما نلعب

داوود//اللعب بيجوع.....هاا هناكل ايه بقي

عابد//تعاله نجيب شاورما.....بس تجيب انت انا مفرهد

داوود//طيب تعاله يااانوح نجيبها

نوح//اشمعنا نوح يعني هو أنا خالتك

داوود//يلااااااااا انت لسه هتجادل

بيشده من كتفه.......وبنقعد علي القهوة وانا مستني الاكل بفارغ الصبر........وبقرر ارجع راسي لوراء واسند علي الحيطه بما ان سيف وسليمان اللي هيتكلموا وكالعاده هطلع الابن العاق......اللي هحط سليمان في دار مسنين الرحمه اللي علي اول الشارع 

سيف//ابقي تعاله اتغدا معايا بكرة

سليمان//ابن حلال كنت لسه هعزم نفسي عندك بكرة بس مش لوحدي عابد و داوود معايا عشان عوزك 

عابد//عابد مين انتوا عندكم عبيد غيري؟؟؟ 

سليمان//نام تاني يلااا

عابد//انا مش فاضي بكرة عندي ميتنج مهم في المزرعه السعيدة

سليمان//كلمة زيادة وبالشاي في وشك هشوهك

سيف//تنور يا سليمان انت و داوود بس هو في حاجة؟ 

عابد//وانا محصل كهرباء يعني ولا ايه

سيف//انت مش ببلعك سبحان الله اقعد ساكت

عابد//اي يارب القعدة اللي مفيهاش حد بيحبني غيري دي

نوح//اااه الكرسي بتاعي حبيبي 

عابد//اخيراااااا جيتوا

داوود//براحه علي الشنط ياحبيبي انت مش في غزوة

بنخلص اكل وبنقرر نرجع البيت.....وبمشي انا و داوود ونوح مع بعض وسليمان وسيف مع بعض قدامنا

وانا من جوايا بتمني الاقيها واقفه في البلاكونة....رغم ان كل مره بقرر اغض بصري ومن جوايا هموت والمحها........بحس ان ملامحها وحشتيني 

ابتسامتها....كل حاجة....واي حاجة تخصها....بتخطف قلبي....غصب عني

سيف//متنساش بكرة هجهز السمك

سليمان//عيب عليك هتلاقيني عندك من الفطار

برفع عنيا لثواني للبلاكونة....يمكن الاقي حرامية النعناع.....عمري ما حبيت النعناع ولا جربت اشربه.... زرعته عشانها....وحطيته في مكان قريب عشان تاخده وبعد خطط كتيرة......نجحت خطتي وكل يوم بشوف اثر النعناع اللي خدته.....

مش بلاقيها.....نور الاوضه مقفول....برجع البيت... وبدخل الاوضه بملل وانا شايل هم بكرة ونزولي مع رؤية

مكنش عارف انسى اللي عملته.....ولا دموع غفران وهي بتكلمني....مكنتش فاهم ازاي تعمل معايا كده!! وهي الوحيدة اللي كانت عارفة بحبي لغفران..... تستغلني كده عشان يونس؟!!!!! 

«فلاش» 

رؤيه//يااا عابد افهمني بقي يعني انت كل رفضك ليونس عشان هو مش من مستوانا المادي؟؟؟ 

عابد//ولا حتي الاجتماعي....انتي اتعاملتي مع امه؟ ست بيئه جداا وسليطه اللسان تفكيرها اصلا كله علي بعضه معاق......هتعيشي معاهم ازاي دول

رؤيه//يونس مش زيها انا هعيش معاه هو انا مالي بأمه

عابد//مفيش حاجة اسمها كده.....هو انتي فاكرة الجواز لعبه....وبعدين دي عيله تربطي ولادك بيهم

يونس التافهه المايع ده عوزاه اب لعيالك؟؟؟؟؟ 

رؤيه//عاااابد....خلي بالك من كلامك يونس مش تافهه ولا مايع.....انا مش فاهمه انتوا ليه كلكم شايفين انه مستهتر

عابد//ده بقي ملفتش نظرك لحاجه؟؟؟ 

رؤيه//عابد عشان خاطري خلي بابا يوافق بالله عليك كلمه

عابد//رؤيه الموضوع انتهى.....انا مش فاهم انتي ليه متمسكه اوي بيه كده

رؤيه//اخر كلام عندك يا عابد؟؟؟ 

بتحرك من مكاني وانا بمسح دموعي......ونظراتي كلها تحدي لعابد.....وانا عارفة انا هضايقه ازاي....او علي الاقل يحس باللي حاسه بيه يمكن يساعدني

رؤيه//انا هقعد بره مع عفراء..... 

مودة//طيب 

بخرج علي السلم وبقعد انا وعفراء......وانا باين علي ملامحي اني كنت بعيط.....

عفراء//مالك.....يونس برضو 

رؤيه//مش عارفة ليه رفضين اووي كده

عفراء//رؤيه فكري كويس بالعقل يونس فعلاً شخص مش مناسب نهائي ليكِ وماشي هنبعد عن اهله ومستواه المادي....هو اصلا اخلاقه ضايعه ده مستهتر جدا 

رؤيه//حتي انتي يا عفراء.....ما اختك بتحب عابد وهو بقي اسوء من يونس كمان 

عفراء//انتي بتقارني مين بمين.......عابد مش كويس؟؟ 

رؤيه//............اه علي الاقل يونس مش بيشرب مخد رات......ولا مرتبط بيا وبيحاول يبتزني بصوري

عفراء//نعم؟؟؟؟؟؟؟؟؟؟ ده انتي دماغك ضاعت خالص عابد كده!!!!!!!!!!!!مستحيل اصدقك

رؤيه//متصدقيش......مش مهم.....بس يونس مش وحش والله 

باخد بالي انها بدات متركزش مع كلامي.......ملامحها مصدومة.....بتفكر.....بدات احس ان خطتي بتنجح.... لكن كان جوايا شعور بالخوف....حاجه بتقولي اوقف اللي بعمله ده....

عفراء//طيب يا رؤيه معلش هدخل انا عشان ماما قالتلي ادخل علي طول

بتدخل شقتها....وبكون واثقه انها دخلت عشان تقول لغفران.....

♡••••••••••♡

عفراء//غفران تعالي عوزاكي بسرعة 

غفران//في اييييه......مش فضيالك دلوقتي بختار هلبس ايه بكره

عفراء//تلبسي ايه بس دلوقتي ركزي معايا 

غفران//يارب عليكي يا عفراء اجلي كلامك بعدين انا دلوقتي مبسوطه ماليش مزاج بصراحة اتشل منك

عفراء//حتي لو قولتلك ان الموضوع علي عابد

غفران//عابد.....اوعي تقولي انه كلم بابا ومش جاي بكرة..... 

عفراء//........لا....كنت بره مع رؤيه وقالتلي حاجة كده 

غفران//في ايه

بقعد قدامها ونظراتي عليها بقلق.....بتنهد وانا بسند الدريس علي رجلي وبركز عشان اسمعها وبتحكيلي كل حاجة رؤيه قالتها......وانا بسمع وبس

غفران//كدابة....مستحيل عابد مش كده انا واثقه فيه مستحيل يكون كده أبداً 

عفراء//ما انا قولت كده برضو....بس هي هتستفاد ايه لما تكدب.....انا فاهمه انها بدافع عن يونس بس كان في مليون طريقة.....او ممكن لو بتكدب كانت قالت كده علي داوود عشان كدبها محدش يعرفه وتكون مشكلة.....

غفران//......برضو مش مصدقه.....عابد!!!....انا هسأله هو احسن

عفراء//وهو لو الكلام ده بجد مستنيه يقولك اااه ويعترف مثلا؟؟؟؟؟؟؟؟ 

غفران//اومال اعمل اييييه انا مش قادره اصدقهاا

عفراء//غفران انا فهماكي انك بتحبي بس بلاش حبك ده يخليكي تنكري اللي عرفتيه......اي يخليها تقول كده كدب عن اخوها.......ده اخوها يعني مش بنت غريبه نقول بتحبه

غفران//بس بتحب يونس 

عفراء//لو كدب كانت كدبت عن داوود مش عابد يا غبيه لان عابد عاوز يخطبك ولو رفضتي هيتعرف رفضك ليه ووقتها كدبها هيتعرف وهتكون مشكلة كبيره انما داوود هنعرف ونسكت ملناش دعوة 

بسيب الدريس جمبي علي السرير......وانا ساكته دموعي بتنزل في صمت.....قلبي مش عاوز يصدقها حاسه انها كدابة.....مستحيل عابد يعمل كده.....مكنتش قادره حتي اشك فيه.......ولو سألته وقال محصلش هصدقة......مش عشان عوزة كده..... 

لان دي الحقيقة بجد.....انا عرفااه كويس.....

عفراء//ارفضي يا غفران....لو طلع كده بجد هتكون مشكلة ووقتها هتتجرحي اكتر 

غفران//عفراء......انا عارفة عابد هو مش كده 

عفراء//غفران متديش اعذار

«باااااااااااااااااك»

داوود//سرحان في ايييه

عابد//يابني خضتني حد يدخل علي حد كده

داوود//كنت بتفكر في ايه

بيقولها بغمزة وبفهم قصده....وبتجاهل وانا بقعد علي السرير عشان انام

عابد//اطلع بره واقفل النور

داوود//انت لسه بتفكر فيها....

عابد//بفكر في مين

داوود//اعمل فيها عبيط

عابد//داوود اطلع بره مش ناقصك

داوود//طيب يابني تاعب نفسك ليه ما تقولها انك لسه بتحبها.......اقولك هطلع انا اقولها من البلاكونة

عابد//ولاااااااااا تعاله هناااا

بيتحرك اتجاااه البلاكونة....وانا بتحرك بسرعة امسكه قبل ماا يعمل حاجة...بما انه مجنون ويعملها عادي... وبلحق امسكه من رجله....وانا نص جسمي لسه علي السرير......لثواني حسيت نفسي بالرينا

داوود//البنطلوووووووووون

عابد//يخربيتك جالي الديسك ارجع تاني 

داوود//يابني العمر ليله خلصنا بقي من جو قيس وليلة الحزين ده

عابد//انت ماااااالك ياااا تنح انا بحب الدراما انتش مالك

سليمان//صوتكم عالي كده ليه......واي الوضع المخل للاداب ده

داوود//اوعا تفهمني صح.....انا بحاول احافظ علي بنطلوني دلوقتي 

سليمان//هو انتوا عيال 

عابد//الحقني يا سليمان ضهري في ذمة الله 

سليمان//عنيه حاضر هلحقك

بيشد الحزام.....ووقتها بكتشف ان عندي لياقة بدنيه عاليه.....وبسيب داوود وانا مركز مع حركة الحزام لحد ما بقدر اطلع بره الاوضة...... 

داوود//يااااااواطي ده انا اخوك

بسمع صوت داوود.....ويتبعه الحزام...وانا بختار الكرت الكسبان وبقف وراء مودة.....عشان ميعرفش يضربني

بيخرج داوود وهو بيجري وبيقف جمبي.....وبعده سليمان 

سليمان//انتوا كده يعني مش هتضربوا؟؟؟؟؟ 

وفي لحظات خيانة....بتقوم مودة بكل هدوء كأن مفيش اي حاجة.....وانا نظرات الخذلان لا تفارقني....

عابد//صحيح الضربه مش بتوجع اووي الا لو..... 

مش بلحق اكمل كلامي وبيكون سليمان سلم عليا بالحزام

عابد//اوووووووف....براحه انت بتنجد مرتبه

بسيبه وانا بجري علي الكرسي اللي جمب الكنبة.... لكن بنسي موضوع الطول ده....وبيستمر الصمت بينا للحظات بعد صوت كسر قوية نزلت علي الأرض.... ما الإنسان احيانا بينسي حجات مهمه برضو

سليمان//ينهاااااارك ابيض....النجفه

بتخرج مودة علي صوت الكسر....وعنيها كلها شر لينا

مودة//مين فيكم اللي وقعها؟؟؟؟؟

عابد//داوود

داوود//عابد

النهاردة يوم الاكتشاف العظيم.....سليمان بينسحب وبيسيبها علينا وبيدخل اوضته.......وانا بكتشف ان مودة عندها قدرات خارقه في الرمايه بالشبشب..... والعض!!! 

عابد//كتفييييييييييي......مش بتاكلي لحمه

مودة//ده انا هموووووووتك 

عابد//كل ده عشان نجفه؟؟؟؟ 

مودة//النجفه دي هتخليك تبات بره متدخلش البيت من غير نجفه اختهاااااا......

عابد//مودة....متهزريش انتي عارفة الساعة كام 

داوود//بتهزر بتهزر ادخل نام كفايه عليك كده

مودة//طيب اي رآيك هتطلع معاااه يلااااااا انت وهو بقي من هنا

عابد//لو قدرتي تقوميني هجبلك نجفه غيرها

بقعد علي الكنبة وانا عنيا عليها......بتغيب ثواني وبيخرج سليمان.....وهي وراااه وعنيها عليا بشماته وانا مشدود من كتفي وبطرد انا و داوود زي القطط علي السلم.......

عابد//الست دي مش ام....دي اكيد مرات عم

داوود//منك لله يعني لازم تكسر النجفه

عابد//يعني هو انا كان قصدي

داوود//اتفضل بقي تقدر تقولي هنعمل ايه!!! 

عابد//هنعمل اي يعني هنجيب النجفة

♡_♡_♡_♡_♡_♡_♡_♡_♡_♡_♡_♡_♡_♡_♡_♡_

«فلاش» 

عابد//انتي قولتي لغفران ايه

رؤيه//انت بتنهج كده ليه

بيفتح باب الاوضه علي طول....بيدخل عليا وهو بينهج ومتعصب بتحرك من علي السرير بقلق من شكله.... 

عابد//ردي عليااااااا قولتي ايييييه

رؤيه//هقول ايه انا مش فاهمه منك حاجة 

عابد//غفران رفضت.....رفضت فجاة كده وهي كانت موافقة انطقي وقولي عملتي ايه انا متاكد انك السبب

رؤيه//انت بتقول ايه....انا مالي توافق ولا ترفض حد قالك اني ابوهاا....روح اسألها هي اسهل

عابد//عارفة يا رؤيه لو عرفت انك السبب

رؤيه//خير هتعمل ايه؟؟؟....لما الادوار اتبدلت زعلت ولما بقيت انت اللي بتخسر حسيت بيا

عابد//يعني انتي اللي عملتي كده بجد!! 

مش برد عليه وبسيبه.....بيخرج من الأوضة وهو متعصب...وبكون خايفة يعرف انا قولت ايه عنه وبقعد مكاني وانا قلقانه.....

♡•••••••••••••••••••••••••••♡

بخرج من الأوضة بتاعتي بعد ما بتاكد ان مفيش اثر لدموعي....وبشوفو وهو قاعد مستني....بكون عارفة جاي ليه و هيسأل عن ايه وببقي مش عارفة اقوله ايه....او اعرفه اصلا ولالا.....

غفران//خير يا عابد  

عابد//رفضتي ليه.....هو انتي شيفاني عيل يا غفران عشان تلعبي معايا كده......وتغيري رآيك بين يوم وليله؟؟؟ 

غفران//لا.....بس مفيش نصيب وخلاص 

عابد//ايوه ليه.......ما تقولي سبب

بقرر احكيله اللي حصل......وبيسمع كلامي للاخر....وهو ساكت لكن باين عليه الصدمة.....

عابد//رؤيه قالت كده!!!!!!!! 

غفران//ايوه انا مزودتش علي الكلام اللي قالته عفراء

عابد//وانتي صدقتي يا غفران 

غفران//لا والله.....انا واثقه فيك ياعابد

باخد بالي من ردي....اللي نبرتي اتغيرت فيه في ثواني وتعبيرات وشي.....بستدرك نفسي بسرعة وهو بيسكت غالبا بيفهم....باخد نفس وانا بحاول اهداء

غفران//قصدي يعني ان كلنا عارفين انك محترم....بس لو وافقت عفراء كانت هتعرف بابا من قلقها بس عليا وانا مكنتش حابه حد يعرف والموضوع يكبر وقولت انت ممكن تحلها من غير مشاكل.......لان الموضوع مش بسيط يعني لو حاجة زي دي اتعرفت حتي لو كدب هتكون مشكلة 

عابد//يعني انتي مش رافضه 

غفران//..................

بسكت......وهو بيفهم سكوتي....وفي الحقيقة انا بكون موافقه.....وقلبي بيفرح ان الموضوع لسه منتهاش بينا وهو فهم سبب رفضي......مكنش عندي شك فيه... كنت واثقه انها كدب.....لاني عرفااه وقلبي كان حاسس 

بيمشي وانا برجع اوضتي تاني......وانا جوايا في نور من الامل ان القرف اللي رؤيه عملته ده ينتهي من غير ما حد يعرف 

♡••••••••••••••••••••••••••••♡

عابد//انتي قولتي ايه لعفراء

رؤيه//تاني.....هو انت مش بتزهق

عابد//تحبي اقولك انا المرادي

رؤيه//نعم 

عابد//انا عرفت انتي عملتي ايه

رؤيه//هي السنيوريتا بتاعتك لحقت كدبت عليك وخلتك تصدق

عابد//انتي ازاي تطلعي بالقرف ده؟؟؟ 

ازاي تقولي عني كده.....وازاي اصلا تعملي كل ده....كل ده عشان يونس فاكره نفسك كده يعني هتخليني اساعدك 

رؤيه//لا.....بس هتفهم يعني ايه البنت اللي بتحبها ترفضك وتسيبك.....انا قولتلك اني بحب يونس وانت مصمم علي رفضك ومش عاوز تساعدني 

بيسكت........ونظراته علياا....حسيت بمشاعر مختلفه... خذلان او عدم اقتناع.......صدمة مع قرف....حجات كتيره مختلفه وبعيده عن بعض..... لكن كل ده بيسكت للحظات بعد ماا بفوق من صدمتي......من ضربته ليا بالقلم ونظراته اللي بقت بارده.....ملامحه اللي مفيهاش اي تعبير اتجاهي

عابد//ده انتي طلعتي إنسانة حقيرة.......وكمان غبيه.... اياكِ تتعاملي معايا تاني.....وبالنسبة ليونس.....برضو مش هوافق وجوازك من الحيوان ده تنسي انتي فاهمه

«باااااااااااااااااك» 

♡_♡_♡_♡_♡_♡_♡_♡_♡_♡_♡_♡_♡_♡_♡_♡_♡

عابد//اانا عاوز نفس اللي في الصورة عندك ولالا

#//يابني سهله اجبهالك بس بكرة الموديل ده غالي 

عابد//طيب افهمه ازاي طيب 

داوود//احنا عاوزينها ضروري مش هنعرف نروح البيت من غيرها الله يكرمك

عابد//لو تعرف تجبها دلوقتي يبقي كتر خيرك 

#//يابني الوقت متأخر اصلا انا فاتح لحد دلوقتي صدفه ودي في المخزن مستحيل اجبهالك النهاردة 

داوود//يعني يرضيك نبات في الشارع

للحظات بحس ان انا و داوود متسولين من ايجبت كل محاولاتنا لاقناعه يجبهالنا بتفشل......لحد ما تقريبا بيزهق او بيحس بالشفقه وبيعرض علينا نبات في المحل لحد ما ابنه يجي بكره يجبلنا النجفه

داوود//لا فهمت غلط احنا مش متسولين بس الوالده النجفه كانت غاليه عليها واضايقت لما اتكسرت ف قولنا نجيب غيرها عادي

عابد//لا الواد ده كداب احنا مطرودين فعلا انت فهمت صح وموافق عادي جداً ابات في المحل 

بتجاهل نظرات داوود.....لاني بكون فعلا تعبت جدا وعاوز انام.....وفعلا الراجل بيسيبنا في المحل صحيح لسه الدنيا بخير......بنام في المكتب......كل واحد فينا علي كنبه ورغم اني تعبان إلا ان داوود بينام في ثواني 

وانا كالعاده بفتكرها.......... 

«فلاش» 

عابد//انا مش فاهم فين السبب برضو.....هو حصل حاجة 

سيف//عابد الموضوع انتهي ومعنديش رد تاني وياريت متحاولش فيه تاني وكفاية كده

عابد//ما انت مش عاوز تقولي السبب ومش فاهم حصل ايه 

سيف//محصلش حاجة وانا مش موافق عليك لبنتي خلصنا

بكون واقفه وراء الستاره......سامعه كلامهم.....وزيارات عابد الكتيره مؤخرا عشان يفهم سبب رفض بابا المفاجئ اللي من غير سبب...... انا كمان مكنتش فاهمه ليه فجاة بقي رافض عابد بالشكل ده بعد ما كان موافق جدا عليه وشايف انه كويس ويقدر يطمن عليا معاه

فجاة رفض.......وصمم علي رآيه.....عابد بيقوم عشان يمشي....للحظات بس نظراتنا بتتقابل.....مكنتش حاسة بدموعي اللي بتنزل.....وانا قلبي بيقولي انه مش هيجي تاني 

«بااااااااااااااااااااااك» 

داوود//لسه صاحي؟ 

عابد//انت منمتش

داوود//لسه.....منمتش ليه بقي انت

عابد//تفتكر ممكن يكون سيف رفض ليه 

داوود//ينهاري عليك يا عابد انت لسه في الموضوع ده 

عابد//كل ما بفتكر اخر مره كنت فيها هناك ونظراتها ليا ودموعها بحس ان قلبي وجعني عليها.......غصب عني بجد.....مش قادره انساها ولا عارف اشوف غيرها

داوود//تفتكر رؤيه تكون عملت حاجة وقتها؟؟

عابد//...........يتبع