قعد وانا باخذ صباع محشي وحتت فرخه في بوقي 

ماما اتكلمت باندهاش وهي بتبصلي،

-انتي بابت مش لسه اكله مش شويه!!!

بصتلها وانا مكشره ملامحي،

-بقي كده شوفت يابابا مش عايزاني اكل انا هقوم 

بابا اتكلم ،

-بس اقعدي كملي اكلك 

كمل وهو بيوجه كلامه لماما ،

-في اي يانجاة ده كلام !!

بصيت لماما وانا برفع حواجبي بمناكشه 

اتكلمت بغيظ،

-شوف شوف بنتك الي بدافع عنها بترفعلي حواجبها ازاي 

بصلي فابصتله وانا ببتسم بهدوء وحطيت صباع محشي تاني في بوقي بسرعه 

رجع يكمل اكله وهو بيهز راسه يمين وشمال بغلب 

ماما بصتلي بغيظ وميلت عليا وهي بتقول ،

-ماشي يابنت حسن انا هوريكي 

اتكلمت بعد لما بلعت ،

-كلي ياماما ياحبيبتي انتي تعبانه من الصبح 

-ماهو فعلاً تعبانه مش لاقيه حد يساعدني 

يزن اتكلم بخبث،

-والله انا مش عارف ياماما انتي مش بتقعدي لي وتخليها  تطبخ وتعمل شغل البيت 

بصتله بغيظ وانا بعض علي شفايفي وهو بصلي وعمل نفسه من اليونان 

ماما بتقيد ،

-فعلاً عندك حق يايزن 

-اي ده انا مش بساعدك اي الناس الي بتنسي دي !!

اتكلم يزن بنبره درامياً خلت ماما صعبت عليها نفسها والدمعه هتنزل من عنيها،

-ده انا برجع من بره  بلاقي امك بتغسل المواعين وبتغسل الغسيل وكمان بتمسح الشبابيك والارض وو. 

سكت وهو بيفكر اتكلمت وانا منبهره بطريقته الي خلت ماما سكتت وهي مركزه في كلامه وعماله تهز راسها بأه بأن كلامه صح 

كمل كلامه وهو بيقول ،

-والاقي بقي ست أبرار قاعده علي السرير ماسكه الموبايل وبتبرد ضوافرها

اتكلمت باندفاع،

-اي الفيلم الهندي الكذاب ده !!!

كمل كلامه بعد لما بلع حتت فرحه ولا أكني اتكلمت ،

-لاء وبعد ده كله بتعمليلها الي انتي عايزا ياأمي ياحبيبتي والله انتي غلبانه 

ماما بحزن وهي بترد عليه،

-عندك حق والله ياحبيبي انت الي كنت بتساعدني فاكر

-لو مكنتش بشتغل والله كنت هعملك الي عايزا 

-لا ياحبيبي كتر خيرك كفايه بتجبلي الي عايزا 

عماله ابص لده شويه وده شويه باندهاش ده بيغنو وبيردو علي بعض بجد 

سقفت وانا بقول،

-ستوب خلاص ياحبايبي المشهد خلص 

ماما بصتلي بقرف وقالت،

-شوفتي حتي اخوكي اهو بيقول انه بيشوفني ديماً انا الي بعمل كل حاجه 

-انااا مش بساعدك انا!!!

اتكلمت بشرار بعد لما كانت من شويه قطه والدمعه هتنزل ،

-بتساعديني فين انت عمرك شوفتها يايزن بتطبخ؟؟

يزن هز راسه بالاء 

كملت،

-طب شوفتها بتغسل؟!!

هز راسه بتمثيل الحزن،

-خلاص ياأمي متزعليش نفسك 

حطيت ايدي علي راسي ،

-خلاص ياجماعه انا قايمه شوفت يابابا بيفترو عليا ازاي 

بابا بصلي وقال،

-هو انتي بتطبخي ياحبيبتي !!

-احم اي يابابا انت بقيت معاهم ولا اي !!

سيف،

-خلاص ياجماعه حرام ده انا بسمعها وهي بتصلي الفجر وبتقول يارب ادي ماما الصحه وعينها علي شغل البيت 

برقت وانا ببص لسيف الي فضحني 

يزن بشماته،

-اهو سمعتي ياأمي بتدعيلك علشان عارفه انها مش بتعمل حاجه 

بصيت لسيف بغيظ وانا عايزه اقوم اعجنه وهو بصلي ببراءه وهو بيقول،

-هو انا قولت حاجه غلط 

يزن البوتجاز رد ،

-لا ياحبيبي مقولتش حاجه غلط 

-بس بس كفايه انا قايمه 

دخلت وسيبتهم المصيبه ان مفيش هزار ماما بتاخد الكلام من يزن جد وانا والله بساعد بس بصراحه ا احم مش اوي يعني بس يزن ده والله لاوري

لبست الاسدال وصليت المغرب وطلعت وانا علي وضعي علشان هنزل لهمس 

-بابا انا هنزل اقعد مع همس

-ماشي ياحبيبتي 

يزن وقفني ،

-متتأخريش 

رديت في سري بسخريه ،

-هسافر وارجع علطول 

-بتقولي اي 

-ولا حاجه طيب خلاص 

قفلت الباب ورايا ونزلت لقيت في وشي سُليمان وهو 

لسه هيفتح الباب بالمفتاح 

بلعت ريقي بتوتر وكنت مكمله نزول من كتر مانا مش عارفه اعمل اي 

وقفني صوته،

-راحه فين؟!!

لفيت واتكلمت وانا ببص بعيد عنه،

-ا اي جايه لهمس 

رفع حاجبه بسخريه،

-وهي همس في الشارع ولا اي 

بتوتر وانا بفرك ايدي انا مش عارفه مالي مش عارفه اتكلم كلمتين علي بعض ،

-ا احم ماهو يعني م

اتكلم وهو بيفتح الباب،

-تعالي خشي خلاص متتوتريش 

دخل وانا نفخت بضيق هو اخد باله!!! 

خضني لما طلع راسه وقال،

-تعالي خشي 

دخلت وهو قفل الباب ومعرفش راح فين بقي  وهمس طلعت. من المطبخ وهي ماسكه كوبايه قهوه ومكشره،

-بري شوفتي قهوه بتاعت ماما طلع طعمها وحش حتي دوقي 

قربتها من بوقي وانا دوقتها وقولت ،

-وحشه اوي اي ده!!

-شوفتي ممكن تيجي تعمليها انتي بقي 

هزيت راسي ،

-ماشي 

وانا بعمل القهوه بصتلها وهي قاعده علي كرسي الي في المطبخ باندهاش،

-بابت ال اي خلتيني برده اعملها !!

بصتلي بتمثيل الاستغراب ،

-تعملي اي بس

-مثلي مثلي هو في اي انهارده كلكو عمالين تجربو شغل  التمثيل عليا 

ضحكت ،

-ماهو انتي بتعمليها حلوه والله 

كنت هتكلم بس سُليمان دخل المطبخ وهو بيقول ،

-اعمليلي قهوه ياهمس بسرعه 

حطيت الكوبايه  بتاعت همس قدامها بعد لما خلصتها وعملت بتاعتي كمان ،

-يلا قومي ياشاطره اعمليها 

همس قالت لسُليمان الي كان هيطلع ،

-بري هتعملك بتعملها جامده 

رد عليها،

-اعمليها انتي ياهمس واخلصي 

رديت ببرود وانا ضهري ليه ،

-مكنتش هعملك اصلاً

همس بمسايره وهي بتقول ،

-خلاص بلاش تشدي معا 

بضيق،

-اصل اي الي اعمليها انتي ياهمس!!!

ضحكت علي تمثيلي لطريقه اخوها 

-مش قادره انتي بتتكلمي زيه 

ضحكت انا كمان و دخل أحمد علينا المطبخ وهو بيقول ،

-اي ده !!! بتشربو قهوه طب وانا !!

همس اتكلمت ،

-بري بتعمل قهوه خطيره خليها تعملك 

أحمد باستغراب ،

-مين بري دي قطه!!!

ضحكت وهي بتشاور عليا، 

-بري ياأحمد 

أحمد. ضحك وهو بيوجهلي الكلام،

-بقي اسمك بري ؟!!

ضحكت وانا برفع كتافي،

-اختك بقي اعمل فيها اي !

-لا بس حلو حلو يلا بقي قومي اعملي قهوه

بصيت لهمس وانا بضيق عيوني بغيظ،

-طب والله انتي شكلك بتنزليني علشان القهوه 

بهزار وهي بتغمزلي ،

-بطلعلك واعملكو الغدا 

-لا بالله عليكي اسكتي امي هتفضل بقي تقولي شوفي بتعمل معايا وانتي مبتساعدنيش 

أحمد اتكلم وهو بيطلع من المطبخ ،

-طب اخلصو عايز قهوتي تيجي عندي في الصاله 

همس بصتله بقرف وبعدين قالتلي ،

-يلا يابري قومي اعملي 

قومت وانا بتكلم بسخريه ،

-انا مش فاهمه هو كل الي يدخل المطبخ هتقولي بري بتعمل قهوه خطيره اوي في اي بتعمليلي اعلان مش كده والله 

-اي ده انا مش بتكلم كده 

بتهديد وانا بوشح بالمعلقه،

-لا بتتكلمي كده هااا في مانع ولا حاجه!!

اتكلمت باستتسلام ،

-لا مفيش 

-شاطره ياحبيبتي 

عملت قهوه لأحمد الاول وطلع بيشربها مظبوط ومن كتر زن همس علي وداني عملت لسُليمان ساده شبه بالظبط دمه في بوقه اي ده يعني اي !!! اي الي بقولو ده مع علينا عملت اخر فنجان بتاع سُلميان وهمس مسكته

همس وهي بطفي نور المطبخ،

-يلا نطلع نقعد بره 

جريت طلعت بسرعه وراها علشان بخاف من العتمه وعلشان الصالون كبير ومتقسم لركنه وشاشه والجنب الي جمبه لمكان الضيوف بس أحمد كان قاعد ماسك الموبايل وسُليمان نفس الوضع وطنط حياة كانت مندمجه مع المسلسل التركي في عالم تاني 

قعد جمب طنط حياة وانا بقولها ،

-اي ده انتي برده بتحبي التركي 

-اه بموت فيه وانتي كمان!!!

-اه جداً هو ده جديد

-اه لسه نازل 

-اممم شكلي هتفرج معاكي 

لقيت ايد همس بتشدني وهي بتقومني بصتلها وانا بقول،

-في اي؟!!

-وراكي حفظ ياحبيبتي يلا وانا لسه هسمع لأحمد 

-اه صح 

قعدنا وهمس بدأت تسمع وكان قرأتها كويسه اللهم بارك وشويه وخلصت وسُلميان حط الفنجان الي خلص علي التربيزه وقال ،

-أخيراً عملتيها مظبوطه ياهمس 

همس ضحكت وهي بتبصلي وبتغمزلي وانا برقتلها اتكلمت ،

-لا ماهو مش انا الي عملاها دي بري 

بصيت لأحمد وقولت بغلب،

-يادي ام بري الي ماسكا ده

أحمد بضحكه،

-دلع رهيب 

همس اتكلمت بابتسامه لاعوبه مش فاهمه هي البت دي تعبانه،

-حلوه مش كده !!!

رد بهدوء ،

-شغاله 

اتنفست بضيق وهمس عملتيلي حركه بايديها الي اهو اهدي أحمد اتكلم ،

-بس لا والله بتعمليها احلي من البت همس 

-ألف هنا 

همس اتكلمت بفرحه،

-مش كده انا بقول كده برده معتش حد بقي يطلبها مني بقي في بري للقهوه 

شاورت عليها وانا بتكلم ،

-اهو بص ده الي هي  عايزه توصلو 

أحمد ضحك وهو بيتكلم،

-علشان احنا بنفضل نطلب منها قهوه فهي ماصدقت لقت غيرها بيعرف يعملها 

اتكلمت بهزار،

-انا معتش نازله تاني البت دي بتضحك عليا وتقولي اي تعالي اقعدي معايا والاقيها مدخلاني المطبخ 

اتكلم سُليمان وهو عينه في الموبايل ،

-بلاش أفور القهوه عاديه