اني مش هخليك تتكسر قدام الناس يا سراج... أني هروح معاك وعارفة إن ربي كبير وعارفة إنك مستحيل تسبني في الظلم ده أنت اللي هتخرجني منها يا سيد الرجالة

رباب وقعت على الكرسي: يا مري الدوار خرب يا ناس شمس تروح القسم والكلبش في يدها

صابرين بتمثيل وحسرة: ادعي لها يا خالة ربنا يتوب عليها من اللي عملته والله قلبي بيتقطع عليكي يا شمس مهما كان أنتي أختي

شمس بصت لصابرين بقرف: الحساب يجمع يا صابرين واليوم اللي هخرج فيه هطلع روحك بيدي

في القسم

شمس بدموع: صابرين هي اللي عملت كل ده اعترفت لي في الدوار بكل حاجة قالت إنها غرزت السكينة في حبيبة عشان خافت من الفضيحة وخدت السكينة من أوضتنا عشان تلبسني التهمة سراج أنت لازم تصدقني صابرين حية ومخبية سمها ورا وشها البريء ده

سراج بص لها ببرود

شمس باستغراب: سراج أنت ساكت ليه البرود ده وراه إيه أني بكلمك في عرضي وحياتي

سراج بزعيق: بس كفاية كدب وتأليف أنتي فاكرة إني عيل صغير هتضحكي عليه بشويتين تمثيل البصمات بصماتك والسكينة سكينتك وحبيبة مقتولة بدافع الغل اللي مالي قلبك من ناحيتها

شمس بصدمة: سراج أنت بتكدبني بتصدق الورق وتكدب مرتك صابرين هي اللي قتلت

سراج بتريقة: صابرين الغلبانة مكسورة الجناح أنتي اللي غيرانة منها يا شمس غيرانة إنها هتتجوز عطوة وهتشاركك في الدار وفي العز قولتِ تخلصي من حبيبة وتلبسيها لصابرين عشان تضربي عصفورين بحجر واحد بس حظك الفقر إن البصمات مابتجاملش

شمس قامت وقفت وزعقت بهستيريا: غيرانة من مين يا واد الدمنهوري أني شمس المحمدي أغير من الحية دي ده أني اللي لميتها من الشارع وقعدتها في دارك أنت إزاي اتقلب حالك كدة فين الحب فين نور عيني اللي كنت بتقولها

سراج بغضب: الحب ده مات مع أول قطرة دم نزفتها حبيبة بسببك أنتي طلعتي واحدة تانية خالص واحدة بتقتل بدم بارد وتلفق التهم لأختها الشقيقة أنتي مريضة يا شمس

شمس بغضب: أني مريضة طب وحق ربي اللي خلقني وخلقك صابرين هي اللي عملتها وساعتها هتعرف إنك ضيعت الست اللي كانت مستعدة تموت عشانك

سراج بجمود: اني مش هستنى لما أعرف أني خلاص غسلت يدي منك وما يشرفنيش إن واحدة زيك تشيل اسمي أو تعيش في داري ليلة واحدة كمان

شمس برعب: قصدك إيه يا سراج

سراج ببرود: أنتي طالق يا شمس وعلاقتك بدوار الدمنهوري انتهت اهنة وقضيتك مع المشنقة هي اللي باقية

شمس وقعت على الكرسي كأن روحها اتسحبت عينيها برقت بصدمة مفيش بعدها كلام سراج ساب الأوضة وخرج بجمود

بعد شوي في الدار

صابرين بخبث: شوفتي يا خالة أدي أخرة الدلع والطيبة اللي شمس كانت بتتمسح فيها طلعت شيطانه كيف ولبستنا الفضيحة وسط النجع كله والله يا مري أني خايفة على سراج من كلام الناس يقولوا إيه مرته خلصت سلفيتها عشان الغل

رباب بتريقة: وفري سمك ده يا صابرين شمس لسه مطلعش عليها حكم والنجع خابر زين مين شمس ومين غيرها وبعدين أنتي مالك محروقة قوي كدة ما تهدي بدل ما أنتي عاملة زي الحية اللي بتدور على جحر

صابرين بغل مكتوم: أني خايفة على سمعة الدوار يا خالة مش أكتر ولا أنتي لسه بتدافعي عنها بعد ما بصماتها فضحتها

رباب بجمود: البصمات دي ورقة والقلوب يعلم بيها ربنا والظالم هيبان واليوم ده مانيش هرحم فيه اللي كان السبب

فجأة دخل سراج

رباب قامت وقفت بلهفة: سراج يا ولدي طمني عملت إيه مع شمس خرجتها ولا لسه

سراج بجمود: شمس مبقاش ليها صالح بالدوار ده يا ياما شمس خلاص طلقتها ورجعت غريبة عني وعن الدار

رباب بصدمة: وه طلقتها طلقت عرضك وسندك وهي في المحنة دي يا سراج أنت بعت مرتك في أول خبطة يا مري على الرجولية اللي ضاعت

سراج ببرود وقسوة: الرجولية مابتقبلش الخيانة ولا القتل يا ياما وأني مش هعيش مع واحدة زيها انتهى الموضوع

صابرين بتمثيل الزعل: لاه يا سراج ليه كدة مهما كان دي أختي ولحمي كنت استنى لما الحقيقة تبان حرام تكسر بخاطرها وهي ورا القضبان يا حبيبتي يا شمس نصيبك واعر جوي

سراج بجمود: وفري كلامك يا صابرين اللي حصل حصل والشرع والقانون خدوا مجراهم أني طالع أوضتي ومش عاوز حد يزعجني واصل

سراج سابهم وطلع

صابرين بابتسامة نصر: شوفتي سراج نفسه مصدق يبقالي حق أنا بقى أزعل

رباب بغل: افرحي يا صابرين افرحي دلوقت بس افتكري كلامي زين الدوار ده له رب والشر اللي بتزرعيه هيطلع عليكي نخل مر وساعتها مانيش هسمي عليكي غوري من قدامي

صابرين ببرود: الدوار دلوقت فضي ليا يا حماتي والملكة الحقيقية هي اللي بتفضل للأخر تصبحي على خير

طلعت ببرود

بعد دقايق

سراج كان قاعد في أوضته والضلمة محوطاه من كل ناحية:

الباب اتفتح ودخلت صابرين وحطت إيدها على كتفه بحنان

صابرين بصوت واطي: سراج كفاية وجع يا سيد الرجال الدنيا متستاهلش إنك تحرق دمك عشان واحدة باعتك وباعت الدوار كله وراحت للسكة السودة:

سراج نفض إيدها بعنف وقام وقف بجمود: صابرين اطلعي برا: أني مش طايق أسمع صوت حد ولا أشوف خيال حد واصل

صابرين قربت منه تاني: لاه مش هخرج يا سراج أني الوحيدة اللي حاسة بالنار اللي في قلبك وأني الوحيدة اللي باقية لك ومخلصة ليك من زمان قوي سراج أني بحبك

سراج بص لها بصدمة: أنتي بتقولي إيه يا مخبولة أنتي إنتي واعية للحديت اللي بتنطقيه ده

صابرين بلهفة وحب: واعية ومخي في راسي أني عشقتك من يوم ما دخلت الدوار ده بس كنت بداري عشان شمس دلوقت الطريق فضي لينا يا سراج اتجوزني يا سيد الرجال وهخليك تنسى الدنيا باللي فيها

سراج بذهول وصدمة: أتجوزك أنتي خطيبة أخوي يا صابرين كتب كتابك على عطوة بعد بكرة أنتي اتجنيتي رسمي:

صابرين بتريقة: عطوة ده قلبه اندفن مع حبيبة في القبر وعمره ما هيتجوز ولا هيهني واحدة بعديها واصل هو مكسور وأني مش عاوزاه أني عاوزاك أنت يا سراج أني عشت العمر كله بحلم باللحظة اللي أكون فيها ملكك

سراج بجمود: وأختك اللي في السجن دي والحزن اللي مالي الدار ملهوش مقام عندك

صابرين ببرود ودموع تماسيح: شمس اختارت طريقها بيديها وهي اللي جابت لنفسها الخراب أني أحسن منها يا سراج أني هصونك وهشيلك في عيوني اتجوزني يا سراج وناخد بعض ونسافر بعيد عن النجع وهمه وقرفه نسافر البندر ونعيش حياتنا هناك بعيد عن كلام الناس وفضايح شمس

سراج سكت

صابرين بدلع: وافق يا سراج وافق وخلينا نبدأ صفحة جديدة

سراج بجمود: موافق يا صابرين هتجوزك ونسافر في أسرع وقت

صابرين بفرحه: بجد يا سراج يا مري مش مصدقة أخيراً هكون ليك يا حبيبي هروح أحضر كل حاجة واللم هدومي ونغور من اهنة في أقرب وقت

خرجت صابرين وهي طايرة من الفرحة

في القسم

شمس كانت قاعدة الباب اتفتح ودخل العسكري ومعاه عطوة وشه كان دبلان وعيونه غارقة في الحزن

شمس باستغراب: عطوة جاي ليه جاي تتشفى فيا ولا جاي تخلص على اللي حبيبة قلبك

عطوة بحزن: شمس بصي في عيني وقوليلي الحقيقة أنتي فعلاً غرزتي السكينة في رقبة حبيبة أنتي اللي قتلتِ عشقي الوحيد

شمس بهستيريا: والله ما حصل والله ما لمستها ولا شوفتها الليلة دي واصل صابرين هي اللي عملت كل حاجة لبستني التهمة وخدت السكينة من أوضتي صدقني يا عطوة أني مظلومة

عطوة اتنهد بوجع: أني مصدقك يا شمس عارف إن قلبك أبيض وميعرفش الغدر ده

شمس بذهول: مصدقني كنت فاكرة إنك أول واحد هيخلص عليا بيده عشان تبرد نار قلبك على حبيبة إزاي صدقتني

عطوة بحزن: القاتل مبيعيطش بدموع زي دموعك دي والغل اللي شوفته في عين صابرين مش عادي حبيبة راحت بس حقها مش هيضيع في ظلمك يا شمس

شمس بدموع: بس مفيش دليل يا عطوة صابرين حية ومكارة مسحت كل خيط يوصل لها ولبستني التهمة بالمللي والكل صدقها حتى سراج سراج رماني وطلقني يا عطوة

عطوة بغل: سراج عقله طار منه بس أني لاه أني هساعدك يا شمس وهكشف صابرين وهخليها تنطق بالحقيقة قدام النجع كله وحياة دم حبيبة اللي راح هدر لأخلي صابرين تتمنى الموت ومتحصلهوش

شمس بوجع: سراج كسرني يا عطوة بعني في ثانية وصدق الغريب وكدب مرته مكنتش أتخيل إن حبه لي يطلع بالرخص ده

عطوة بصوت واطي: اهدي يا شمس سراج دلوقت عامي الشك قلبه بس لما الحقيقة تظهر هيندم ندم عمره أني هتحرك من دلوقت وصابرين نهايتها هتكون على يدي

بليل

عطوة دخل بغضب لقى سراج قاعد وصابرين جنبه بتتمايل بضحكة صفرا

عطوة بزعيق: بعت عرضك يا سراج بعت شمس اللي كانت ست الحريم كلهم وصدقت الحية اللي جنبك دي بعت روحي وروحك عشان تهمه ملفقة

سراج بجمود: شمس مبقتش عرضي يا عطوة شمس قتالة قتلة وأني مش هقبل بواحدة زي دي في داري انتهى الحديت

صابرين بغيظ: جرا إيه يا عطوة جاي تهزق سيدك وسيد الدوار كله عشان واحدة مجرمة شمس خلاص غارت في ستين داهية والكلبش في يدها احترم نفسك وأنت واقف قدام سراج بيه

عطوة بقرف: اخرسي يا واكلة ناسك إياكي تنطقي اسم شمس على لسانك ده أني خابر زين إنك أنتي اللي اللي عملتيها ولبستي شمس التهمة أنتي حية وماشية بتبخي سمك فينا كلنا

سراج قام وقف فجأة ونزل بكف على وش عطوة: لاه يا عطوة لحد اهنة واقطع لسانك بتغلط في صابرين في داري قدام عيني بتغلط في اللي هتكون مرتي وأم عيالي

عطوة بصدمة: 

يتبع....