• بابا ممكن افهمك! 

: تفهميني أي غير إللي شفته، دكتورة زيك واقفة بتعمل مشاريب على البار ليه! 

• الموضوع مش كده والله أنا كنت بساعد بس 

: بتساعدي مين هو مين ده عشان تساعديه؟ 

• حصل بينا سوء تفاهم وغلطت في حقه وبحاول اساعد 

: لما تحبي تساعدي حد زي ده تديه قرشين في أيده مش تقفي معاه علىٰ البار وتعملوا مشاريب يا دكتورة 

• الموضوع مش مستاهل كل ده

: طب احمدي ربنا أن خطيبك لسه ميعرفش وإلا منعرفش ساعتها الموضوع كان هيستاهل ولا لا

• وخطيبي مين هيقوله!

: الله أعلم بقا 

فضلت أبص علىٰ شهد وحاسة أني عايزة افصص جسمها من بعضه، معرفش جايبة البجاحة دي منين، فضلت هي واقفة قصادي لحد ما سبتلها المكان كله ومشيت، لأني معرفش لو فضلت أكتر من كده كنت هعمل أي . 

مكنتش فاهم أي إللي بيحصل لحد ما لقيت بسمة بتقول أنه والدها، فضل يزعق في المكان وسحب بسمة من ايديها واخدها ومشي، واللي كانت جاية معاه قربت مني وقالتلي .. 

: علىٰ فكرة القهوة إللي بتعملها حلوة عجبتني، بس المرة الجاية الأفضل أنك متبصش لفوق وأنت وبتعمل القهوة عشان متتدلقش عليك تزعلك، ابقى بص علىٰ قدك . 

مفهمتش قصدها أي واخدت بعضها ومشيت، مش فاهم أي حاجة حقيقي ومن كتر مأنا كنت متضايق بسبب إللي حصل قفلت بدري ومشيت لأني مكنتش قادر أقف ولا أعمل أي حاجة تاني .

• اتكلمي براحة طيب عشان افهم 

: مش عارفة يا زينب حاسة دماغي هتفرقع من الوجع ومش عايزة أقعد في البيت

• ما تخرجي طيب

: ابويا مانع عني أخرج لحد ما خطيبي يجي 

• هو عرف؟ 

: لسه بس قالي أنه هيقوله 

• لا لا معتقدش أن ابوكي ممكن يعمل حاجة زي دي 

: يبنتي ده مانع عني أخرج واخد التليفون حتىٰ العيادة كلمهم وقالهم أنها هتاخد اجازة 

• ليه كل ده هو الموضوع يستاهل 

: معرفش حقيقي 

• هو شافكم مع بعض إزاي؟ 

: كنت واقفة معاه بنجهز الطلبات

• وأنتي كنتي منشكحة ومبسوطة

: ايوة يا زينب كنت مبسوطة مكنتش واعية بنفسي مش هكذب يعني، أول مرة احس أني مرتاحة أنا وبعمل حاجة مع حد وعايزة أعمل كده

• بس مينفعش يا بسمة

: أنا عارفة أنه مينفعش وعارفة أنه غلط بس والله محصلش حاجة ولا هو تخطىٰ حدوده بالعكس كان بيتعامل معايا بحذر زيادة عن اللزوم 

• حتىٰ بردو الصورة نفسها بتاعتكم مع بعض هتلاقي رد فعل من إللي حواليكي عكس الحقيقة إللي جواكم

: يعني أي! 

• يعني الناس بتحكم باللي بتشوفه بس متعرفش أي إللي بيحصل في الكواليس 

: طب وإحنا أي ذنبنا

• ذنبنا أننا عملنا حاجة مش علىٰ هواهم

: وأحنا هنفضل نعمل إللي علىٰ هوا الناس بس

• ده الواقع 

: يولع يا زينب يولع الواقع وتولع أي حاجة تعكنن عليا 

قفلت مع زينب وأنا شايطة وحاسة أني عايزة اولع في الدنيا كلها حواليا، كانت عندي طاقة غضب فظيعة قادرة أنها تاكل أي حاجة في طريقها، قعدت علىٰ الارض واخدت نفسي بصعوبة، حسيت بحاجة واقفة علىٰ الرئة مش قادرة اتنفس والدنيا بدأت تلف بيا لحد ما وقعت علىٰ الأرض .

: إزيك يا عمر 

كنت واقف بجهز الطلبات وسمعت صوت حد بيقول أسمي، بصيت عليه لقيته .. 

• دكتور يوسف بنفسه هنا 

: كنت بعمل حاجة هنا قولت اعدي أسلم عليك وأشوفك 

• خير 

: لا خير إن شاء الله أمك بتسلم عليك وبتقولك كفاية إللي بتعمله في نفسك 

• تشرب أي يا يوسف؟ 

: الحقيقة أنا مش جاي أشرب أنا جيت بس أشوفك عشان أمك قالتلي أنك قهوجي بس الموضوع طلع ارقىٰ بكتير من قهوجي دي 

• روح يا دكتور أمشي واقعد جمب الوالدة وخليها تديك مصروفك عشان تقعد مع صحابك الدكاترة إللي شبهك وسيبني أنا في إللي بعمله هو صحيح مصروفك بقي كام دلوقتي! 

لبس نضارته بعد الكلمتين إللي سمعهم ومشي من غير ما يرد عليا، اصل كان هيرد يقول أي يعني، يدوب خرج يوسف ودخلت وراه واحدة بتتلفت حواليها كتير لحد ما وقفت قدامي .. 

: مساء الخير 

• مساء النور إتفضلي 

: حضرتك الأستاذ عمر؟ 

• ايوة أنا 

: بسمة بتسلم عليك وبتقولك أنها كان نفسها تيجي تساعدك بس مش هتقدر بسبب أنها مشغولة 

• هي كويسة؟ 

: اه كويسة متقلقش هي بس قالتلي اطمنك 

• شكرًا حقيقي يا زينب 

: عرفت أسمي منين! 

• هو مش أسمك إللي مكتوب علىٰ الشنطة ده؟ 

لقيتها بصت علىٰ الشنطة وهي مترددة ولسه بتبص حواليها كأنها خايفة حد يشوفها .. 

: ايوة أسمي صحيح 

• طيب 

سلمت عليها ومشيت علىٰ طول، بس فرحت جدًا لما قالتلي أن بسمة إللي بعتتها عشان تطمني، هي عرفت منين أني قلقان عليها من ساعة إللي حصل، ومكنتش عارف اوصلها ولا عارف اوصل لرقم تليفونها، ولكن زينب كانت طوق نجاة ليا حقيقي بعد ما طمنتني عليها وعرفت أنها بخير .

: هو كويس؟ 

• ايوة يستي كويس وبيسلم عليكي وبيقولك أنك وحشاه جدًا وعايز يشوفك 

: بجد! 

• بجد في عينك لا طبعًا مقالش كده بس عيونه كانت فضحاه

: عيونه فضحاه إزاي؟ 

• كان قلقان عليكي وملهوف يعرف أخبارك يروحي 

: ما تتكلمي عدل اي المحن ده 

• أنا إللي محن بردو يا بسبوسة

: اه محن إحنا بس يعني مرتاحين لبعض مش أكتر مفيش حاجة من إللي بتقوليها دي 

• طب عيني في عينك كده 

بصيتلها ولقيت نفسي فجأة دموعي بتنزل من كتر مأنا مش قادرة أصدق أني مرتاحة بس، عيطت فجأة كده ودخلت في حضن زينب علىٰ طول، أنا مفضوحة أصلًا .. 

: متاكدة أنك مرتاحة بس

• هعضك يا زينب في كتفك اسكتي 

: لا ياحبيبتي علىٰ أي خلاص نمشيها أنك مرتاحة بس ومفيش حاجة تاني 

أول مرة أفهم شعور الراحة مع حد عايزة ابقىٰ معاه وجمبه وشيفاه وواقفة قصاده واشوف نفسي في عينه، مشاعر متلغبطة كده أول مرة تزورني بس مرتاحالها، ببقىٰ مبسوطة وأنا متلغبطة كده، قطع عليا اللحظة دي صوت الباب إللي دخلت منه شهد عشان تقولي أن خطيبي مستنيني تحت، خرجت من حضن زينب إللي مسحتلي دموعي وقامت عشان تساعدني أغير هدومي واظبط شكلي عشان ميبنش عليا حاجة . 

: تعرفي تسيبيني في حالي يا أمي أنا مرتاح كده انتو عايزين مني أي مش كفاية إبنك إللي بعتيه يسمعني كلمتين ملهمش لازمة ويمشي 

• إحنا خايفين عليك 

: انتو كده بتموتوني مش خايفين عليا انتو عاملين زي القطة لما بتخاف علىٰ عيالها بتاكلهم 

• يعني أنت عجباك القهوة إللي شغال فيها دي! 

: مرة قهوجي ومرة قهوة انتو حد قالكم أني شغال في حارة ولا علىٰ أول الناصية 

• أمال إللي بيعمل شاي وقهوة اسمه أي عندكم! 

: إسمه قهوجي يا أمي واقفلي بالله عليكي أنا مش ناقص اسمع أكتر من كده 

أحيانًا ربنا بيبتلينا عشان يعرف قدرتنا علىٰ الصبر والتحمل ويخلينا قادرين نواجه أي حاجة، بس أنه يبتليني في أهلي ده أصعب إبتلاء ممكن أي حاجة يواجهه، مش قادر أفهم تفكيرهم ولا كلامهم ولا نظرتهم، مش قادر افهمهم حقيقي ولا أفهم اي الغرض من كل إللي بيعملوه ده وعايزين يوصلوا لأي، يعني بدل ما يساعدوا ولادهم ولا يسيبوهم في حالهم، إنما دول لا بيساعدوا ولا سايبين حد في حاله، الساعة عدت 12 بليل والمكان بقي فاضي، من كتر التعب سندت راسي علىٰ أيدي لحد ما سمعت صوت حد دخل وفتح الباب .. 

: إحم إحم 

• بسمة! 

: أي جيت متأخرة وهتقفل دلوقتي؟ 

• لا لسه شوية 

: اصل شايفة المكان هادي 

• لا عادي 

: عامل أي؟ 

كنت عايز أقولها مش كويس، ولا عارف ابقىٰ كويس غير معاها، حاولت اداري دموعي إللي قربت تنزل وتفضحني بسبب أنها وحشاني ومش مصدق أنها واقفة قصادي دلوقتي .. 

• أنا كويس أنتي إللي عاملة أي واختفيتي كل ده ليه؟ 

: دي قصة طويلة هبقىٰ احكيهالك لما تكون فاضي

• بس أنا دلوقتي فاضي

: عايز تسمع؟ 

• حابب أسمع 

لقيتها بصالي بصة غريبة شايلة جواها حاجات كتير مش مفهومة، قلعت الشنطة وفضلت تحكيلي، وأنا كنت بسمع أو حابب أسمع، دخلت من جوه وبدأت تعملنا قهوة بايديها، مرضتش اقولها أي حاجة ولا اقاطعها، سبتها تتكلم وتعمل إللي هي عايزاه براحتها، ودي أقصىٰ حاجة ممكن اعملهالها .

عدىٰ شهر من ساعة آخر مرة شفت بسمة فيها، في خلال الشهر ده عملت حاجات كتير جدًا، قدرت أفتح مكان تاني جمب الكافية وعملته مطعم، جددت المكان وفتحتهم علىٰ بعض، وغيرت الديكورات والاشكال كلها، وقدرت اتواصل مع مهندس ديكور يظبطلي الدنيا دي كلها عشان تخلص في أسرع وقت، وفعلا في خلال شهر كان المطعم والكافية شغالين، وتواصلت مع طباخين كويسين، وجبت استفّ للكافية كمان عشان افضي نفسي واتابع الشغل هنا وهنا . 

: عمر إزيك 

• زينب؟ 

: كنت جاية أقولك حاجة بس وامشي

• خير 

: بسمة في المستشفى 

• مالها 

: تعبت الفترة الاخيرة واتحجزت ليها كام يوم 

• طب هي في مستشفى أي اروحلها

: لا مينفعش تروح أنا هبقىٰ أقولك تروح إمتى وهبعتلك العنوان بتاع المستشفى إللي هي فيها 

مشيت زينب وفضلت افكر أي إللي حصل معاها، فضلت طول اليوم مستنيها لحد ما بعتتلي المعاد والعنوان بتاع المستشفى، ويدوب روحت غيرت هدومي وروحتلها علىٰ طول . 

: بتتكلمي بجد؟ 

• ايوة والمكان جمب الكافية ومفتوحين علىٰ بعض 

: ياربي بجد والله يستاهل كل خير 

• باين أنه أبن حلال

: حصل

• وبيحبك 

: هو قالك؟ 

• مقاليش بس باين عليه يا بسبوسة

: طب اسكتي عشان كل ما تقولي كده بفتكر اللقمة إللي واقفة في زوري

• سي السيد! 

: هو سي زفت

• طب لي ده حتىٰ دكتور وزي القمر

: خديه يا زينب انا أصلا مش عايزاه

• لا ياحبيبتي ده بتاع أمه 

: لا والنبي دلوقتي بقي بتاع أمه 

• واضح أوي علىٰ فكرة ومعندوش شخصية كده 

: بس متجيبيش سيرته عشان نفسي بتتسد

• يستي حاضر 

فضلت قاعدة علىٰ نار مستنية عمر، ما صدقت أهلي مشيوا كلهم بعد ما زينب اقنعتهم أنها هتقعد معايا النهاردة، ومفيش كام ثانية ولقيت الباب بيخبط ودخل عمر، قرب مني وشفت اللهفة إللي في عينه وهو بيقولي ..

: أنتي كويسة مالك حصل أي؟ 

حسيت لأول مرة أني لقيت حد بيخاف عليا بجد ومستني يتطمن عليا، مش قادرة استحمل الشعور المريح ده من غير ما أعيط، ولكن تماسكت شوية وفضلت ادوس علىٰ أيد زينب عشان معيطش ..

: أنا كويسة الحمدلله متقلقش هو الضغط واطي بس واتحجزت عشان يتطمنوا عليا 

• أي إللي حصل طيب

: محصلش حاجة متقلقش هو ضغط الشغل بس 

• بجد! 

: بجد يا عمر هكذب عليك ليه 

ولقيت زينب بتدوس علىٰ أيدي هي كمان وردت عليه .. 

: متقلقش هي كويسة وزي الفل هي بس بتتدلع شوية لأنها مش متعودة 

• مش متعودة علىٰ أي! 

: علىٰ المح ..

حطيت أيدي علىٰ بؤقها بسرعة قبل ما تفضحني المصيبة دي .. 

: قصدها المحاضرات إللي بديها لطلاب 

• طيب متضغطيش نفسك اهو شايفة حالتك عاملة إزاي 

: حاضر .. أنا عايزة اشرب قهوة بس الدكتورة مانع أني اشرب بس أنا هموت واشرب 

• كان نفسي اجيبلك بس مينفعش عشان صحتك 

: معلش يا عمر بجد مش قادرة 

• ده إدمان بقا 

: شكله كده 

قام وراح يجيبلي القهوة لأني فعلاً عايزة أشرب قهوة بأي طريقة، سابت زينب أيدي .. 

: كنتي هتكسريلي أيدي 

• مكنتش قادرة أمسك نفسي كانت خلاص دموعي هتنزل

: شفتي عيونه كانت عاملة إزاي؟ 

• شفت

: ومتاكدة أنكم مرتاحين لبعض بس! 

• تفتكري أنه هو كمان بيحبني! 

ولسه مكملتش الكلمة ولقيت الباب بيخبط، استغربت أن عمر إزاي رجع بسرعة كده، بس مطلعش عمر إللي بيخبط . 

نزلت جبت القهوة بسرعة لـ بسمة عشان باين عليها فعلاً محتاجة القهوة، جبتها ورجعت بسرعة علىٰ المستشفى، خبطت الباب ودخلت علىٰ طول، ولسه بقول القهوة سخنة يدوب تلحقي تشربيها لقيت .. 

: يوسف! 

• أنت بتعمل أي هنا ؟ 

بصيت علىٰ بسمة لقيتها متوترة وبتبص علىٰ يوسف أخويا وبتحاول تقول حاجة .. 

: يوسف خطيبي يا عمر . 

يتبع ..