الساعه العاشره صباحاً في مقر الشركه

مسح وشه بكف أيديه وقال بعصبيه وهو ماسك الأستقاله:

- مُستحيل تتقفل كدا، أنا اللي بنيت الشركه دي طوبه طوبه

بعصبيه قُلت:

- محصلش، جدي هو اللي تعب فيها

بهدوء قال:

- بنيتها، ولا سرقتها يا شريف!!

- أنا مسرقتش، أنا كُنت بقوّم الشركه وبخليها تُقف على رجليها

- تقومها ولا توقعها

فتح الفايل اللي في أيديه ورمى الورق اللي فيها في وشه وقال:

- الورق ده قادر يوديك في ستين داهيه

وطى  على الأرض عشان يجيبهُم وقال:

- الورق ده متزور

ضحك وقال وهو بيشاور:

- هتمضي على الأستقاله ولا أسمع كُل الشركه مين هو شريف بيه الهلالي!!

شريف عينيه راحت ناحية ما هو بيشاور في ثانيه، كان كُل الشركه واقفه تتفرج، مهو طبيعي صوتنا كان عالي.

رجع بص لتميم وقال وهو بيصُب عرق من التوتُر:

- أنا مش هسكُت على الكلام ده، أكيد أنتوا اللي مزورين

كُنت هتكلم بس تميم شاور لي بأيديه عشان أسكُت، مسك الريموت وقال وهو بيشغل الشاشه:

- وصوتك برضو ده متزور!!

السماعات ضربت في الشركه كُلها، فضل يمسح عرق جيينه بكف أيديه.

صوت شريف واضح بطريقه تخوف، صوته كان بارد، كأنه عدو، مُستحيل يكون ده عمي اللي كان بيزعل على زعلنا ويضحك معانا، وناكُل على سُفره واحده.

- أكسر سعرهُم، متقلقش هعرف أحطم السعر بتاعنا، أبويا كبيره يقعُد على الكُرسي، مش أكتر.

موظف أخيراً أتكلم وقال:

- ده صوت شريف بيه

- كُل السنين دي كان بيخدعنا!!

تميم ربع أيديه وقال:

- هتمشي بكرامتك ولا أجيب الأمن!!

شاور لتميم بصبُاعه من فوق لتحت وقال:

- مين أنتَ عشان تمشيني، أنا أبن صاحب الشركه، يعني ليّ أسهُم

ضحك وقال:

- دي حقيقه، الا أذا لو كان صاحب الشركه ذات نفسه طلعك من الورث

- يعني أيه!!

ضحك ببرود وقال:

- يعني أنا وهند الورثه الشرعيين لعائلة الهلالي

بزعيق قال:

- كذب، أكيد كذب

- لا يا شريف بيه،  عزت بيه كتب وصيته كُلها للأنسه هند والأُستاذ تميم، ده غير والد هند طبعاً اللي ليه ورث بس هو أتنازل عنه لهند

بزعيق وعصبيه قال:

- كذب، كُله كذب، أنا مش هتحرك من هنا، دي شركتي أنا، أنا اللي عملتها

تميم شاور للأمن، وفي ثانيه كان الأمن بيطلعوا شريف ويرموه برا الشركه.

بصيت في عيون الناس، لقيت اللي مبسوط بطلوع شريف، واللي مصدوم من الحقيقه اللي سمعها.

كُله قرب عشان يبارك، وكأنهُم مصدقوا أن حد ينجدهُم من أيد شريف.