رائد: بقولك وحشتيني.!

نيروز: رائد لو حد شافنا هتبقى مصيبه

راىد: سيبي الدنيا كلها وركزي معايا دلوقتي جيتي مع ياسين ليه

نيروز بإرتباك: ااااعادي

رائد: لا مش عادي يا فراوله ردي عليا

نيروز: رائد بقى.!

رائد: ياعيون رائد وروح رائد وكل حاجه في رائد عاجبك اللي عملتيه فيا ده؟ شهرين بس سرقتيني بكل حواسي اتفضلي بقى حاسبي على قلبي اللي سرقتيه

نيروز بعدم بفهم: ايه احاسب ازاي يعني؟

رائد بخبث: بوسيني

نيروز بصدمه: نعم؟

رائد: بقولك بوسيني

نيروز: رائد انت اكيد اتجننت وسع كده خليني امشي

رائد: ورحمة امي ما انتي متحركه من هنا الا لما تبوسيني

نيروز: يارائد مينفعش اللي بتعمله ده

رائد: قدامك خمس ثواني لو مصالحتنيش انا هتصالح بمعرفتي خلص كلامه وعينه نزلت لشفايفها وغمزلها بشقاوه

نيروز: يخربيتك يخربيتك يخربيتك ساااافل

رائد: لا يا غزاله السفاله لسه جايه قدام يلا 1/2

ملحقش يكمل العد كانت نيروز باسته على خده بسرعه وزقته وطلعت تجري

رائد: بصدمه اه يابنت المجنونه خدي هنا يابت انتي بتبوسي ابن اختك

نيروز: دا بعينك سافل ووقح وقليل الادب

رائد فضل واقف مكانه لحد اما اختفت بعيد عن عينه وحط ايده على خده وقال: ماشي يا فراوله مسيرنا هيتقفل علينا باب واحد اتكي على الصبر بس وساعتها هطلع عليكي القديم والجديد

بعد شويه كانوا كلهم في اوضة زين وبيضحكوا سوا قال رائد: احم اسمعوني شويه وركزوا معايا بالمناسبه الجميله دي وبما اننا متجمعين كلنا ف حابب اقول حاجه وعارف انه مش وقته بس خلاص معدتش قادر

بصوله كلهم بإستغراب مستنينه يكمل

قرب رائد من نيروز ومسك اديها ورفعها قدامهم وقال: فاكره مين دي يا امي؟؟؟

سمر دققت في ملامحها وحست انها تعرفها بس معرفتش تجمع وقالت: لا بس شكلها مش غريب عليا

رائد: دي نيروز المصري بنت اللواء سامح الله يرحمه

سمر بفرحه: ازيك يا حبيبتي عامله ايه ماشاء الله عليكي كبرتي واحلويتي اخر مره شوفتك فيها وانتي عندك 5 سنين

نيروز بإحراج: الحمدلله يا طنط بخير

أدهم: يعني القمر دي تبقى اختك يا ياسين

ياسين: ايوه يا عمي

رائد: المهم يا جماعه مش هنخرج عن موضوعنا الاساسي انا بحب نيروز وعاوز اتقدملها واخدت معاد من ياسين الاسبوع الحاي موافقين؟ ولو مش موافقين يعني البت لقطه وصاروخ ارض جو ومتتفوتش الصراحه

نيروز اتحرجت وخبت وشها في ضهر ياسين بسرعه اللي ضرب رائد على كتفه وقال: كلمه كمان وهحلف بالله اجوزهال

..

ملحقش يكمل الجمله قاطعه رائد اللي قال: لالالا والله ما يحصل الفراوله اتخلقت عشان تكون ليا

سمر قالت: الف بركه يا نور عيني دا يوم المنى اما اشوفك عريس واروح اطلبهالك بنفسي يا حبيبي ونيروز بنت حلال ومتربيه

بدأو كلهم يباركوا ليهم بفرحه صافيه خارجه من قلوب الجميع

هيثم: الله الله يعني بتشقط مزز من غيري يا سي رائد؟

ضحكوا على طريقته الطفوليه ونزل رائد لمستواه وقال في ودنه: هجوزك بنتي ايه رأيك

هيثم: اذا كان كده ماشي انا موافق

_______________________________

بعد مرور اسبوع  في قصر المغربي وتحديدًا في اوضة رائد

كان واقف بيسرح شعره قدام المرايه خلص وبدأ يرش برفانه في الوقت ده الباب خبط

دخل يامن وقال: اوبا ايه الحلاوه دي يا راجل دا انت لو بنت عليا الطلاق كنت كتبت عليك حالًا

لبس رائد چاكت البدله بغرور وقال: متمدحش كتير عارف اني مز متقلقش

يامن: مز بس دم اهلك يلطش مش عارف حبت فيك ايه البت دي والله

رائد: اخلع انت منها بس والدنيا هتمشي زي السمنه على العسل

يامن: ايوه ياعم من لقى احبابه نسى اصحابه طب يلا يا اخويا عشان ما تتأخرش على حبيبة القلب

رائد: يلا يا حيلتها

نزلوا الاتنين وقف رائد في نص القصر وقال بصوت عالي: يا أهل الداااااااار اين انتم هنتأخر حرام عليكم

في الوقت ده نزل ادهم وسمر

سمر بدموع: بسم الله ماشاء الله عليك ياقلب امك ربنا يحرصك من العين يا ضنايا

قرب منها رائد وباس راسها وقال: الله طب ليه الدموع بس يا سوسو

سمر: من زمان وانا نفسي اشوفكم عرسان وبتخيل شكلكم بس عمري ما توقعت تطلع بالحلاوه دي الله اكبر عليك ياقلب امك

زين قال وهو نازل ووراه ايسل: الله الله ياست سوسو ما انتي مخلفتيش الا سي رائد بقى

سمر: قلب سوسو

زين: كلي بعقلي حلاوه كلي

ضحكوا كلهم بحب قال رائد: طب ايه يا جماعه هنخلل هنا يعني ولا ايه انا عريس والمفروض تهتموا بيا

يامن: عريس الغلفه يا اخويا يلا يلا خلونا نمشي احسن الواد لو وقف هنا ثانيه كمان محدش هيعرف يلمه

ضحكوا كلهم مد زين ايده ل أيسل وقال: هتنازل وهعتبرك زي اختي وانجشك

أيسل: لا ياشيخ وجاي على نفسك كده ليه

زين بغرور وهو بيعدل چاكت البدله: يلا والله مش عارف من غيري كنتوا هتعيشوا ازاي

ضحكوا كلهم وهو مد ايده ليها ومسكت فيه وخرجوا كلهم من القصر وركبوا العربيات

في عربية رائد كان سايق العربيه وجمبه يامن وزين ورا

رائد طلع موبايله واتصل على نيروز وقال: ياصباح التفاح قشرلي وانا ارتاح

نيروز بنوم بصت في الموبايل واتأكدت انه رقم رائد ورجعت حطت الموبايل على ودنها تاني وقالت: نعم؟

رائد بنفاذ صبر: هو ايه اللي نعم؟ دا انا لو بكلم بهيمه كانت فهمت انتي لسه نايمه يابت؟

نيروز واثر النوم لسه في صوتها: عاوز ايه يا رائد بقى سيبني انام النهاردة الجمعه يعني مفيش شغل

رائد عينه وسعت بصدمه وهو سايق وقال: اسيبك ايه يختي؟ جاي اشرب قهوه بملح على مين انا على الكرسي؟

نيروز: مش فاهمه تشرب قهوه بملح ليه

رائد: يختاااي طمنتيني على مستقبل العيال يا فراوله نيروز يا حبيبتي هو النهاردة ايه

نيروز اتعدلت وبصت في الموبايل وقالت بصدمه: نهار اسود دا ياسين صحاني وقال انكم جاين وانا فكرت اني بحلم

رائد بحصره: بتحلمي اه طب قومي اجهزي عشان هاجي اطلع عين اهلك

نيروز: خلاص خلاص ياعم متزقش

قفل في وشها بغيظ

زين بإستفزاز: يا خسارة الهيبه ياواد يا يامن الواد كان زي الفل والله

يامن: اه والله الحب بيغير فعلا الحمدلله الذي عافانا

رائد: جرا ايه ياض منك ليه اما نشوفك يا حبيبي انت وهو هتعملوا ايه

يامن: انا لالالا استغفرالله ايه الكلام ده اخينا احتشم شويه

ضحك زين وقال: جرا ايه يا جماعه احنا مش قاعدين في عذاء شغلنا ياض يا رائد البتاع ده خلينا نفرفش شويه

رائد: وانا مال امي معاك موبايلك وصل البلتوث وشغل

زين: عز الطلب ياقلب اخوك

وصل زين الموبايل بسماعة العربيه وشغل اغنيه

وطلع من فتحة السقف بتاعت العربيه وبدأ يرقص وهو بيغني معاها وبيقول: لمو كل العيله وشغلوا الديچيهات عشان عريس الليه السكر الشربات

في العربيه التانيه اللي فيها ادهم وسمر اتصدموا الاول من صوت الاغاني العالي واللي زين بيعمله

بس مره واحده ضحكوا وبدأو يتفاعلوا معاهم وهما ماشين على الطريق وطلعت أيسل هي كمان من سقف العربيه وبدأت تتفاعل مع زين وكانوا بيغنوا مع تناغم الاغنيه

وطلع يامن من العربيه وبدأ يضرب نار في السما وكان شكلهم وسط العربيات اقل ما يقال عنهم تحفه

يمرور الوقت كانوا وصلوا الحاره ودخلوا

وقفوا العربيات قدام بيت نيروز وكان ياسين واقف في انتظارهم

أول ما وقفت العربيات الفخمة قدام البيت أهل الحارة المحلات يبصوا باستغراب

واحد من الرجالة قال:

يا ساتر يا رب... مين اللي جاي بالحشد ده؟

واحدة من الستات ردت وهي بتحاول تبص من الشباك:

شكلهم ناس مهمين أوي... استني بس أشوف

نزل رائد الأول من العربية وبعده يامن وزين وبعدها نزل أدهم وسمر

فجأة ملامح الدهشة اتحولت لفرحة عند ناس كتير اول ما شافوهم

عم حسين قرب بسرعة وقال:

الحاج أدهم؟! معقول؟!

أدهم ابتسم وفتح دراعه:

وحشتني يا عم حسين والله

سلم عليه الراجل بحرارة وقال:

والله الحارة كلها كانت مفتقداك يا أدهم من يوم ما نقلتوا واحنا مش بنشوف اخباركم الا من على النت

واحدة من الجارات قربت من سمر وحضنتها:

سمر  أخيرًا شوفناكي عامله ايه يا ام رائد

سمر ضحكت وهي بتسلم عليها:

والله أنتم اللي وحشتونا أكتر

بدأت الناس تتجمع حواليهم وكل واحد فيهم كان  بيسلم عليهم ويتطمن عليهم والحارة كلها بقت ممزوجه بين الدهشه والفرحه من حضورهم الا من كام شخص كانوا بيبصوا عليهم بحقد

زين بص ليامن وقال:

  هو إحنا جايين نخطب ولا عاملين مؤتمر شعبي

ضحك يامن وقال: هو يوم باين من اوله يا حبيبي

بعد السلامات من الجميع فتح رائد شنطة العربيه وخرج منها هدايا كتير وعلب شكولاته وبوكيه ورد كبير بدأ زين ويامن يشيلو معاه وبعدها قفلوا العربيات واتحركوا للبيت

ياسين: الحمدلله على السلامة نورتوا الحاره من تاني

ابتسموا ليه بهدوء وطلعوا كلهم خبط ياسين وفتحت هانم الباب نزلوا الشباب عنيهم في الارض احترامًا لحرمة البيت

هانم أول ما شافت سمر فتحت دراعاتها وقالت:

نورتي بيتنا يا حبيبتي

سمر حضنتها بحب:

ده البيت منور بأهله يا حبيبتي

رائد كان واقف بيدور بعينه على اللي اهلكت قلبُه وسرقت كيانُه

دخلوا و قعدوا كلهم في الصالون، وكان رائد عمال يبص يمين وشمال بيدور بعينه عليها

يامن لاحظ نظراته وقال بخبث: بتدور على ايه يا عريس

رائد: اخرس خالص

زين بمكر: سيبه ياض يا يامن دا قاعد عينه بتطلع قلوب وبيبص للسقف ولا اكن حبيبة القلب هتنزل بالبراشوت

ضحكوا الاتنين بس سكتوا بسرعه لما شافوا نظراته

هانم: نورتوا يا جماعه والله

أدهم: دا نورك يا ام ياسين

سمر: امال فين عروستنا؟

ياسين: هدخل اجيبها

قام ياسين وراح عند اوضتها خبط عليها ودخل

كانت رايحه جايه في الاوضه بتوتر ياسين سند على الباب وصفر بإعجاب وقال: طب ما ليه حق الواد يتجنن عليكي ما انتي الله اكبر طلقه

نيروز بإحراج: ياسين بقى وربنا هعيط.!!!!

ياسين: لالا وعلى ايه يلا يا بيبي عشان الواد شويه وهيدخل يجيبك بنفسه دا من وقت ما دخل وعينه لفت الشقه كلها وبيدور عليكي

نيروز فركت اديها بإحراج وهو قرب منها وباس راسها وقال: انا مهما حاولت اوصفلك شعوري ايه دلوقتي مش هعرف.!!  مش مصدق اني شايف بنتي الصغيره كبرت قدامي ودلوقتي في حد جاي ياخدها مني

نيروز: خلاص بقى يا ياسو مش هنقلبها نكد

ياسين باس راسها ومسك اديها وقال: يلا ياقلب ياسو

خرج وهو ماسك اديها مشيوا في الترقه لحد ما وصلوا للصالون اما رائد كان صوت خطواتها وهي بتقرب بتلعب على اوتار قلبُه

واخيرًا رُوحه اتردتله من تاني اول ما القمر طل عليهم اتجمد مكانه ثواني اول ما شافها

كانت لابسة فستان سماوي بسيط، وشعرها نازل على ضهرها ووشها متورد من التوتر

يامن خبّط رائد في كتفه وقال بمكر:

إقفل بوقك يا عريس الدبان دخل

رائد من غير ما يشيل عينه عنها:

شششش اسكت انت دلوقتي ياباااي دا انا احمد ربنا وابوس ايدي وش وضهر انكم قاعدين

زين كتم ضحكته وقال:

لالا بالراحه على نفسك مش كده يا شبح انت لسه هتتقدم يا حبيبي امال لما تكتب الكتاب هتعمل ايه

يامن ضحك وقال: لا وقتها هياخدها من قدامنا كلنا وينفرد بيها زباله وانا عارفه

قربت نيروز وبدأت تسلم عليهم

أدهم: ماشاءالله زين ما اختارت يا رائد

سمر: بسم الله ماشاء الله عليكي ياقلبي عروسة الغالي

سلمت على أيسل اللي قالت: وربنا حتة قشطه بالمناجا مش خساره فيك يا رايدو

ضحكت نيروز بخجل وقالت: والله ما في قشطه هنا غيرك

ضحكوا كلهم وقربت نيروز وقف قدام رائد عشان تسلم عليه

قام وقف وهو ماسك بوكيه الورد ومد ايده عشان يسلم عليها وبص في عنيها اللي بيعشقها ولوهله حس نفسه انفصل عن العالم

يامن بخبث: ايدك لزقت ولا ايه يا رائودي اجي اسلكلك يا حبيبي

رائد بصله بصه خرسته

وحمحم بإحراج وبعد عنها ومد ليها بوكيه الورد وقال: جيت النهاردة انا وال99 ورده عشان اطلب ايد الورده ال100

نيروز وشها احمر بإحراج اما يامن وزين صفروا بحماس

وقال زين: وحيات ربنا اخوك ده جامد

نيروز: ااا ورده؟

رائد: واحلى ورده في حياتي

تعالت الزغاريط وقعدوا الاتنين جمب بعض

هانم مكنتش عارفه تحدد موقفها هل هي متضايقه بسبب انها عاوزه تجوزها لابن اختها ولا هل لقيتها فرصه حلوه تطلع بنتها من المستنقع ده

بدأو يتكلموا ويتفقوا في نفس الوقت جرز الباب رن قام ياسين فتح واتصدم لما لقاه احمد اللي كان وشه كله غضب

ياسين: هو انا مش قولتلك يلا ملمحش وش اهلك هنا تاني؟

احمد زقه ودخل وبص لكل اللي قاعدين ولرائد اللي جمب نيروز بغل

قاموا وقفوا كلهم وهو بص لنيروز بغضب وراح عشان يشدها من اديها بس ايد رائد اللي كانت زي السيخ اللي اخترق جسمه مسكته بحده وقال: جرا ايه ياروح امك هي امك مكانتش فاضيه تربيك وتعرفك ان الحاجه اللي متخصكش ايدك ما تتمدش عليها ولا ايه؟

أحمد: وسع كده انت كمان بقى ده يا هانك اللي انتي سايباني وبتتمرقعي عشانه دا انا هطلع عين اهلك.!!!!

هانم بخوف: بس بس يا احمد عشان خاطري بلاش فضايح

ياسين: كلمه زياده من امك وهفصل راسك عن جسمك

احمد: جرا ايه يا خالتي هي دي ربايتك اللي ماشيه بتتفاخري بيها قدام الناس ماشيه مع مديرها في الشغل و...

ملحقش يكمل الجمله لان رائد كان ضربه بوكس في وشه وقال:...........

يتبع.......