خديجه موبايلها رن.. 

بصت في الموبايل لقت اسم  مالك..اتوترت وقالت: ده بيرن اعمل ايه..اهدي يا خديجه يلا ردي..

خديجه بهدوء: الو...

مالك: الو يا خديجه..انا مش عارف انام..

خديجه باستغراب: ليه..فيه حاجه..

مالك: كل ما افتكر اللي البني ادم ده عمله احس اني عايز امسكه..اضربه واديله علقه..

خديجه ضحكت وقالت: انت عايز تفهميني انك مضربتوش..

مالك: بس برضو..كل ما افتكر اللي عمله معاكي..بتعصب اوي والله..

خديجه ابتسمت وسكتت...

مالك: ايه يا خديجه سكتي ليه..

خديجه: يعني بفكر اني من غيركوا كنت هعمل ايه..

مالك: حتي لو مش احنا يا خديجه..اكيد ربنا كان هيحلها مش مهم الطريقه..

خديجه: ونعم بالله..

مالك: بس انا برضو..مضايق منك..انك خبيتي عليا..

خديجه: يعني انت كنت عايزني اقولك ايه..وهو قالي قبل كده انه لو شافني راكبه معاك..هيعمل مشكله..فنا خفت احسن تقع في مشكله..

مالك : يعني كنت خايفه عليا..

خديجه قلبها دق..و سكتت ثواني..وقالت: لا مش قصدي كده..يعني هيحصلك مشكله بسببي يعني..ده اللي اقصده..

مالك: امم...الاهم من ده كله انك كويسه..حقك رجعلك..

خديجه: اه الحمد لله..

مالك سكت ثواني وقال: طيب اشوفك بكره..

خديجه : تمام..

مالك: عايزه حاجه..

خديجه: لا سلامتك..

مالك: تمام..مع السلامه تصبحي علي خير..

خديجه: وانت من اهله..سلام..وقفلت..

خديجه حطت الموبايل علي السرير..وفضلت مبتسمه وتفكر في مالك..وانه من اول يوم وهو دايما معاها...وشكلها كده حبته..

◇◇◇◇◇

خديجه: الحمد لله شبعت....بقولك صحيح..احنا معزومين عند إسراء..ابقي اجهزي عشان نروح..

فاطمه : لا مش هقدر...انتي عارفه اني مش بحب الكلام ده..روحي انتي وانا هروح عند خالتك منال  نقعد مع بعض شويه وخلاص...

خديجه: تمام يا حبيبتي..اللي يريحك..انا همشي انا..مع السلامه..

فاطمه: مع السلامه يا حبيبتي..

في الكافيه>>>>

مالك كان باصص في اللاب ومركز في شغله..

خديجه دخلت المكان..شافته وابتسمت وراحت عنده..

خديجه بابتسامة: صباح الخير..

مالك رفع رأسه وابتسم وقال: صباح..النور يا خديجه..

خديجه: باين عليك مشغول اوي..

مالك: اه في شويه شغل..كده..اه صحيح..بكره في خطوبه في الكافيه..فطبعا محتاجين نجهز لها فانهارده..هعمل انا وانتي المشروبات..ودي الورقه بالمشروبات..

خديجه: تمام..انا هدخل اجهز المكونات..

مالك: وانا هخلص واجيلك..

خديجه بابتسامة: تمام..

خديجه طلعت تجيب حاجه...سمعت مالك كان بيتكلم في الموبايل..

مالك: يا ماما حاضر..هفطر والله..هخلص اللي في ايدي بس..وهاخد العلاج حاضر..وقفل معاها وفضل يكح جامد..

خديجه بحزن: ده باين عليه تعبان اوي..

بعد شويه....خديجه حضرت اكل وراحتله..

خديجه: مستر مالك..لسه مخلصتش؟..

مالك رفع رأسه من اللاب وابتسم وقال: لسه خمس دقايق وهخلص..

خديجه حطت طبق صغير وكوباية عصير قدامه وقالت: طب كل الأول..

مالك بص للطبق باستغراب وقال: ده لمين؟

خديجه: ليك..سمعتك وإنت بتكلم مامتك...بتقول إنك مفطرتش ولسه مخدتش العلاج..

مالك ابتسم وقال: انتي عملتي ده كله عشاني؟

خديجه بابتسامة خجولة: يعني... مينفعش تاخد العلاج على معدة فاضية.

مالك بصلها كام ثانية وهو ساكت، وقال بهدوء: شكراً يا خديجه..

خديجه: مفيش شكر بينا..يلا كل قبل ما يبرد.

مالك: حاضر.

خديجه لفت عشان تمشي..لكن مالك ناداها..

مالك: خديجه..

خديجه لفتله: نعم؟

مالك: انتي كلتي؟

خديجه ابتسمت وقالت: أيوه كلت.

مالك ضيق عينيه وقال : متأكده؟

خديجه ضحكت وقالت: والله كلت وشبعانه..

مالك:شبعانه اوي يعني..

خديجه ضحكت وقالت: ايوا والله..

مالك: طيب...

ومشت وهي مبتسمة..

أحمد كان واقف من بعيد بيتابع اللي حصل..بص لساره وقال وهو بيضحك: أنا شايف إن مستر مالك بقى بيجيله فطار لحد عنده.

ساره ضحكت وقالت: وعصير وحركات..

أحمد: ربنا يسهله يا عم..

ساره ضربته بخفه على كتفه وقالت: اسكت بدل ما يسمعك.

أحمد: خلاص خلاص سكت..

بعد كام دقيقه..

مالك خلص أكله وخاد العلاج..

مالك: الحمد لله..جاهزه؟

خديجه: جاهزه.

مالك: يلا بقى..ورانا شغل كتير.

خديجه بابتسامة: إن شاء الله نخلصه بسرعه.

بدأوا يجهزوا كل حاجه للحفله..خديجه كانت بتحضر المكونات..ومالك بيظبط الطلبات ويراجع الورقه.

مالك: أول طلب..لاتيه..وكابتشينو..وإسبريسو.

خديجه: حاضر.

مالك كان بيشتغل..ولاحظ إن خديجه واقفه عماله تشب.. بتحاول تجيب علبة من الرف العالي..

مالك راح ناحيتها وقال: استني.

خديجه: لا خلاص هعرف أجيبها.

مالك مد إيده وجاب العلبة بسهولة وحطها قدامها وقال: كده أحسن.

خديجه ابتسمت وقالت: شكرا..

مالك بص لها وقال بابتسامة: شكرا تاني..

خديجه ضحكت وقالت: يووه انا اتعودت اقول شكرا..

مالك ضحك هو كمان وقال: طيب يا خديجه..

خديجه كانت بتعمل المشروبات بسرعه وإتقان..ومالك كل شويه يبصلها يطمن إنها ماشيه صح..

بعد حوالي ساعه..

مالك بص لخديجة لقاها باين عليها تعبت..

مالك: خديجه..بقولك ايه اقعدي وانا هكمل..

خديجه: لا مش مشكله..هكمل وخلاص..

مالك: خديجه اسمعي الكلام..اقعدي بقالك كتير واقفه... وفضل يكح..

خديجه: حاضر....استني هعمل حاجه واقعد..

مالك : هتعملي ايه..

خديجه: ثانيه بس.. وبدأت تعمل في مشروب كده..وبعد شويه..

مالك باستغراب: ايه ده ؟

خديجه: اتفضل..اشربه..

مالك: اشربه ليه..

خديجه: دي اعشاب كده بتهدي الكحه..اشربها هتبقي كويس..

مالك بابتسامة: علي ضمانتك..

خديجه : جرب..

مالك حطلها كرسي: يلا اقعدي..وانا كمان هقعد اشربها ناخد استراحه..

خديجه: حاضر..

قعدت على الكرسي وهي بتبصله وهو بيشرب من المشروب.

مالك : هو طعمه مر كده ليه..

خديجه ضحكت وقالت: لازم مش اعشاب..بعدين يعني انت متعود..دايما بتشرب القهوه ساده..

مالك: لا القهوه دي حاجه كده مزاج... ده هيجيب مفعول يعني

خديجه: اشربه كله..وبعدين احكم.

مالك وهو بيشرب : بصراحة...طعمه مش وحش اوي..

خديجه : انت كده..بتجامل بقي..

مالك ابتسم وقال: لا..أنا مبجاملش والله مش وحش..

خديجه: الحمد لله.

في اللحظة دي أحمد عدى من قدامهم وقال: يا جماعة خلصتوا ولا ايه..

مالك: خمس دقايق وهنكمل..

أحمد بص لخديجة وقال:  تعرفي..ده أول مرة أشوفه يسيب الشغل ويقعد يستريح.

مالك بصله وقال: انا علطول باخد بس انت مش بتشوفني..

أحمد ضحك وقال: اه انت هتقولي كنت بقعد ابوس ايدك عشان استريح انا وانت  خمس..دقايق..

مالك بص لخديجة وقال: متصدقيهوش ده نصاب..

خديجه ضحكت وقالت : لا متخفش..

أحمد: دي خديجه اكتر واحده شاهده..

خديجه بصت لاحمد وقالت: اه انا شفته الصراحه..

مالك: انتوا هتعملوا عليا عصابه..

أحمد ضحك ومشي وهو بيقول: انا ماشي قبل ما يتخصملي مش ناقص..

مالك وهوبيضحك: شاطر..

خديجه ضحكت وقالت: واضح انك مسيطر اوي..

مالك وهو بيعدل هدومه: ايه ده خدتي بالك..باين عليا مش كده..

خديجه ضحكت جامد وقالت: اه من اول ما شفتك..هيبه ماشاء الله..

مالك ضحك وقال: خدتي بالك من دي كمان..

خديجه ضحكت عليه..

وفضلوا يتكلموا ويهزروا....

◇◇◇◇◇

بعد ما خلصوا شغل..

مالك قفل الحساب...وبص لخديجه وقال: يلا؟

خديجه بابتسامة: يلا..

خرجوا من الكافيه..ومالك فتحلها باب العربيه.

مالك ابتسم وقال: اتفضلي.

خديجه ابتسمت...وقالت: شكرا..وركبت.

مالك قفل الباب بهدوء..ولف ركب مكانه وشغل العربيه.

سكتوا شويه...ومالك كان كل شويه يبصلها وهي مش واخده بالها.. ويرجع يبص للطريق.

خديجه كانت باصه من الشباك..وفضلت سرحانه.

مالك: ساكته ليه؟

خديجه لفتله وقالت: مفيش..بس اول مره احس ان يوم يعدي بسرعه كده.

مالك ابتسم وقال: من كتر الشغل.

خديجه هزت راسها وقالت: يمكن.

مالك: تعبتي النهارده؟

خديجه: شويه..بس استريحت لما قعدنا.

مالك: كويس..المهم متتعبيش نفسك اوي لما تتعبي ادي لنفسك راحه...

خديجه ابتسمت وقالت: حاضر.

وبعد لحظه...

الراديو اشتغل على أغنية هادية.

خديجه بصت للراديو وابتسمت من غير ما تتكلم.

مالك لاحظها

 وقال: شكلك بتحبي الأغنيه.

خديجه: اه..بحبها من زمان.

مالك ابتسم  وقال: يبقى نسيبها شغاله.

خديجه بصتله بابتسامة وقالت: تمام.

رجع الصمت بينهم تاني...بس المره دي كان صمت مريح.

كل واحد فيهم كان بيفكر في التاني...من غير ما يعترف.

بعد حوالي عشر دقايق...

مالك وقف بالعربيه قدام بيت أدهم وإسراء.

مالك: وصلنا.

خديجه بصت للبيت وقالت: بجد وصلنا بسرعه..

مالك : عشان كنتي سرحانه..

خديجه ابتسمت وقالت: فعلا... يلا ننزل.

نزلوا من العربيه...وإسراء أول ما شافتهم من البلكونه نادت بصوت عالي:

إسراء: أخيرًااا...كنتوا فين كل ده؟

خديجه ضحكت وقالت وهي رافعه راسها: اهو جينا.

إسراء: طب اطلعوا بسرعه..الأكل هيبرد.

مالك بص لخديجه وهو بيضحك وقال: يلا بسرعه..

خديجه ضحكت وقالت..: حاضر

وطلعوا السلم...وكل واحد فيهم اتشد للتاني...ومش راضي يعترف..بس الليله دي هتخلي كل واحد...يفهم مشاعره بجد..

يتبع...