سقط الكلام من بق مروان كأنه قنبلة، وأحدث سكون تام في البيت كله..تيبس جسد فريدة وهي بتبص للدبلة الملقاة على الترابيزة بذهول، ورجعت تبص لمروان بصدمة.تحرك حماد وهو بيستند على عكازه بنفاد صبر وهتف بصوت مرعش:— يعني إيه اللي عتقوله ده يا مروان؟ يعني أنا بنتي موجودة ولقيتوها؟! عتتكلم جد يا ولدي؟ قلبي مش عيتحمل واصل يا مروان !

رد مروان وعيونه بتلمع بالدموع:— آه يا با لسه عايشة.. وربي المعبود لسه عايشة!صرخت غرام بلهفة الأمومة الطاغية وهي بتسحب طرحتها وتغطي رأسها:— يلا يا مروان خدني عندها يلا بسرعة.. يلا اوام!

مروان بلهفة:— حاضر يا أمه غرام من عيني، يلا بينا.مسك مروان يد أبوه ومشيوا على بره، وسابوا وراهم فريدة وهي عتعض في صوابعها من الندم والقهر.ساق مروان العربية بسرعة جنونية ومعاه أمه وأبوه وأخته الصغيرة، والوقت كان كأنه واقف بالنسبة لهم. أما فريدة، فخرجت من البيت وهي بتبكي بقهر، وقررت تروح جِري على عمتها رقية عشان تلحقها.

في المستشفى..وصل مروان وعيلته، وكانت زينة قاعدة على الكرسي قدام العناية المركزة، وقلبها بيرتجف من الخوف على بنتها.وكان أسد قاعد قصادها، بيبص عليها بحنان كبير وجوا نفسه مشاعر ملخبطة..أسد في باله: (وبعدين معاك يا أسد؟ دي دلوقتي بقت بنت عمك، لحمك ودمك.. يعني أنت أولى واحد يحميها ويخاف عليها، مش تتأمل في ملامحها وتوه في جمالها!).

فجأة، سمع صوت كتم صرخة طالعة من زوجة عمه الغالية، الخالة غرام.لف وجهه بسرعة وشاف دموعها نازلة شلال وهي بتحاول تتكلم ومش قادرة من الصدمة.

قرب أسد بسرعة وسند عمه حماد، بينما مروان كان ساند أمه غرام اللي رجليها مش شايلاها.غرام وهي بتبص بحب وشوق لزينة بذهول ودموعها مغرقة وشها:— هي صح؟ بنتي.. والله بنتي يا ناس!أسد هز رأسه بنعم وأكد لها الحقيقة.

جِريت غرام بكل قوتها وهي بتصرخ:— بنتي.. حبيبتي يا نن عيني!وقفت زينة مخضوضة وهي بتبص للست دي اللي مظهرش عليها السن من كتر جمالها، وفجأة لقت نفسها جوه حضنها.

غرام وهي بتاخدها في حضنها وبتعيط بكسرة:— حبيبتي يا بنتي.. يا نن عيني من جوة، حرموني منك يا ضي عيني وعذبو قلبي!وزينة، لأول مرة في حياتها تحس بالحنان والأمان الحقيقي ده، مقدرتش تتكلم ولا تنطق بحرف، هي بس استسلمت للحضن وغمضت عيونها وكأنها بتعوض سنين العذاب والذل في حضن أمها.

قرب حماد ودموعه على خده وقال بصوت حنين:— بعدي يا غرامي.. بعدي خليني أشوف حبة قلب أبوها من جوة.

غرام بدموع وفرحة:— سبني شويه يا حماد لسه مشبعتش منها انا مش مصدقه نفسي بنتنا يا حماد.. أهي معانا ورجعت لحضننا!

أخدها حماد من حضن غرام وضمها لصدره بقوة، كأنه بيبث فيها كل الحب والحنان اللي اتحرم منه وهي كمان ، وعيط زي العيل الصغير فرحاً برجوع غاليته.حماد وهو بيقبل رأسها:— يا قلب أبوكي من جوة.. يا روح الروح وضي العين، اتوحشتي قلبي وعيني يا بنتي.

!زينة بتوهان وصوت يادوب مسموع:— شكراً..

مقدرتش تنطق بكلمة زيادة، الصدمة كانت لسه مجمداها.

تدخل أسد عشان ينهي نوبة الأحضان والبكاء دي وقال بحسم:— يا جماعة، إحنا دلوقتي لازم نشوف موضوع التحليل فوراً، مفيش وقت للتأخير عشان الطفلة.

غرام وهي بتمسح دموعها:— فعلاً معاك حق. يا اسد . يلا يا مروان اوام.