_ انتي الي كاتبة كتاب كيف تصطادين عريساً؟

= أنتي العروسة ؟ 

_ انتي الخاطبة؟

= ايه خاطبة دي يا حبيبت قلبي متكرهوناش في مساعدة الغير بقي ،  اقعدي ، خير؟

_ عاوزة اتجوز 

= مين؟

_ أي حد، هتفرق؟

= اه هتفرق ، أنا بساعدك تتجوزي الي انتي عوزاه ، مش أي جوازة والسلام! ، مش عاوزة أي حد؟

سكتت ف بصتلها = قولي عادي ، مش هتبقي الجوازة المستحيلة يعني 

_ هو صاحب اخويا بس مستحيل نبقي سوا 

= وليه مستحيل؟

_ هو اغني واشيك ، اكيد مش هيبصلي أنا! فيه بنات كتير حواليه ف هيختار الي شبهه 

= مينفعش أبداً تقللي من نفسك وبعدين انتي شكلك حلو أوي يعني مش هنعمل أي مجهود هتعمليه ف..؟

_ نعمل ايه؟

= نخليه هو الي يجري وراكي 

_ ودي نعملها ازاي؟

= اتجاهليه ، لو حس لحظة انك واقعة لشوشتك صدقيني مش هيفكر فيكي ثانيتين ولا يتردد أنه يمشي ، مش بتقولي حواليه بنات كتير؟

_ أيوة 

= وتلاقيه عشان لفهة كل الي حواليه مقتنع أنه مينفعش يبقي مع حد فيهم ، ف لازم انتي الي تكوني مختلفة 

_ تفتكري؟

= جربي ، ولو حصل أي جديد كلميني 

_ متشكرة اوي ، علي فكرة الرواية حلوة جداً ، ومتشكرة كمان انك رديتي عليا واختارتي تساعديني 

= متشكرة يا أمل ، إن شاء الله لما نتقابل المرة الجاية تكوني جايبة معاكي أخبار حلوة 

بقالي ٨ سنين بكتب ، كان حلمي إني اكتب كتاب بعد ما حلمي إني ابقي دكتورة فشلت فيه ، سمعت لوم من كل الي حواليا اني فاشلة معرفتش أوصل لأي حاجة ، مشتغلتش ب شهادتي وقررت اني أتفرغ تماماً للكتابة ، اكتر حاجة بحبها والحاجة الوحيدة الي بعرف اقول فيها كل الي جوايا ، كان البطل (أحمد) صاحبي الوحيد ، بطل مش موجود في الواقع عشان مستحيل ألاقي راجل فيه كل الي بكتبه عنه! ، ف بقي الراجل الوحيدة الي متقبلاه في دماغي لإني أنا الي بقدر أخليه احسن راجل ممكن بنت تتمناه ، لكن كرهي للرجالة مقلش ، يمكن كان خوف أكتر من كراهية ؟ ، مش عارفة ، كل الي كنت عرفاه اني مستحيل احب ابداً ولا اتقبل أي راجل يربطني بيه الجواز ، ببساطة؟ عمري ما وثقت فيهم ، البدايات بتبقي كأنك مالكة الدنيا كلها بين إديكٍ لكن في النهاية مبتكونيش غير ست قليلة الحيلة صدقت كلمتين حلوين من راجل سابها ومشي أول ما زهق وملفش وشه تاني ليها ف تدفعي انتي كل التمن ، والتمن هنا بيكون قلبك .

واجهت انتقادات كتير اوي من كل العيلة 

ازاي اسيب وظيفتي عشان أكتب؟

مستقبلك هتضحي بيه عشان شوية ورق؟

محدش فيهم قدر يفهمني ولا يفهم أنا عاوزة ايه ، كلمة فاشلة كانت علي لسان بابا دايما ونظرات خيبة الأمل مش بتفارق عيون ماما كل ما تيجي عليا ، مش يمكن ابقي اختارت نفسي؟ ليه لازم اضحي ب كل حاجة لمجرد إن المجتمع ميشوفنيش غبية؟ ، كان المفروض اختار واختارت الي انا عوزاه بغض النظر عن كل الكلام الي بسمعه .

رجعت البيت وأول ما فتحت باب الشقة لقيت ماما في وشي كأنها كانت مستنية لحظة رجوعي 

° كنتي فين؟

= كنت في كافيه برا ، مالك يا ماما مبسوطة كده ليه؟ 

° خالتك سحر رجعت النهارده الصبح 

= بتتكلمي بجد؟ ، أخيراً رجعت بعد سبع سنين ، دي وحشاني اوي 

° اسمعي بقي الي هقولك عليه ، فاكرة أحمد؟

= أحمد مين؟

° احمد ابن خالتك ، كنتوا بتلعبوا مع بعض وانتوا صغيرين وسره دايما كان معاكي لغاية ما قرروا يسافروا عشان شغل باباه ويكمل تعليمه برا 

= اه افتكرت ، ماله؟

° راجع عشان يتجوز 

= بجد؟ ألف مبروك ربنا يرزقه ببنت الحلال 

° الصبر من عندك يارب بدل ما أخبطها بحاجة تجيب أجلها

= فيه ايه يحبيبتي بس هو انا قولت حاجة غلط؟

° سمعت إن كل بنات خالتك هيحاولوا يلفتوا نظره ، من الصبح مفيش سيرة غير عنه ، عارفة يعني ايه؟

بصيتلها بملل = يعني ايه يا ماما؟

° يعني عريس لقطة ، مهندس ملو هدومه ، طول بعرض ويشرح القلب و..

= عملالنا غدا ايه النهارده؟

° لاء احنا كلنا معزومين في بيت جدتك النهارده 

= معزومين ولا رايحين نستعرض نفسنا عشان المهندس يختار مننا واحدة؟ أنا مستحيل اعمل كده 

° لاء هتعملي ، ومش هروح من غيرك يا مريم والا والله ما اخليكي تروحي حفلة توقيع كتابك الي دوشانا بيه دا

= نعم؟ ، انتي اكيد مش هتساوميني علي اليوم الي بستناه يا ماما! 

° مش بساومك أنا عاوزة مصلحتك 

= وانا مش عاوزة اتجوز ، لو كنت عاوزة كان حصل من زمان لكن محصلش ، ايه الي هيتغير دلوقتي؟

° ان احمد ميعيبوش حاجة 

= لو طالبة معاكم اوي كده يبقي من نصيب حد ف اي بنت في العيلة تجتهد ، أنا مش هعمل اي حاجة عشان اعجب المهندس الي نازل عشان يتجوز!

° طيب ، ادخلي إجهزي عشان نروح ، زمانهم كلهم هناك ومستنينا مينفعش نتأخر عن كده 

بصيتلها لقيتها مصرة، كنت عارفة اني لو مروحتش هتنفذ كلامها ومش هروح حفل توقيع الرواية الي حطيت فيها كل وقتي ، مكنش قدامي حل تاني غير اني أروح معاها ، فكرت لقيت بنات العيلة كلهم حلوين اكيد مش هيسيبهم كلهم ويختارني أنا ف روحت وانا عارفة السيناريو الي هيحصل ، 

روحنا بيت جدتي ، سلمت علي خالتي وحضنتها ودخلوا يجيبوا بقيت الأكل ، السفرة الكبيرة اتملت أكل ، عزومة محصلش زيها بمناسبة رجوع خالتي وجوزها وابنهم ، بنات خالاتي قاعدين جنب بعض وهو قدامهم ، متغيرش كتير ، ربي دقنه ، شعر مهندم ، ساعة ماركة ، هدوم براند ، منظر يدل أنه شاب وسيم وعريس يستاهل الحرب الي هتقوم في العيلة .

قعدت وبدأت أكل وانا ملانة ، كل شوية واحدة فيهم بتحاول تفتح معاه موضوع 

ليلي : عجبك الاكل يا ابن خالتي؟

_ أه جدا ، تسلم ايديكم 

ليلي : أنا الي طابخة 

شهد : وانا الي محضرة الاكل قبلها بيوم

سلمي : وانا الي شارية الخضار بتاع العزومة كلها 

كانت كل واحدة بتعلي علي التانية لحد ما فلتت مني ضحكة غصب عني ف الكل بصلي 

= ال.. أكل هايل ، ما شاء الله عليكم أنا لو راجل أنقي منكم طبعاً ، تستاهلوا شكاير عرسان 

ضحك وبصلي _ انتي اكيد مريم مش كده؟ بنت خالتي زينب؟

= أيوة ، أهلاً بيك 

قومت من مكاني قبل ما ماما تعلق وندخل في اقل من خمس دقايق في حوار القايمة والنيش لمجرد اني قولتله أهلاً بيك ، طلعت البلكونة وخرجت نوتة من شنطة الضهر بتاعتي وبدأت أكتب حكاية جديدة ، سمعت البنات جوا بيقولوا مأهلهم الدراسي ، دخلنا في مرحلة التعليم؟ يعني أروح فين وأجي منين دلوقتي ؟

بعد خمس دقايق دخل ومعاه فنجان قهوة 

_ ممكن أقعد؟

بصيت وراه لقيت ماما واقفة بتبصلي عشان ارد ، رديت ب ابتسامة مصطنعة =  اه أكيد ، مع اني اشك إن القعدة هتعجبك 

قعد _ ليه بتقولي كده؟ 

= حد يسيب الي بيحصل جوا ويطلع البلكونة ؟

بص علي النوتة ورجع بصلي _ قالولي جوا انك كاتبة ، فعلاً؟ 

بصيت النحية التانية = سمعني بقي اني بعمل اي كلام زي ما الكل هنا بيقولي ، بس أنا بكتب كويس ، أنا مقتنعة ب دا ودا المهم عندي

_ دي حاجة كويسة جداً ، بتحبي الكتابة؟

= عشان بحبها مستحملة كل الي بيتقالي كل مرة بنتجمع هنا في بيت العيلة، بس دا حلمي لو مكنتش حققته مستحيل كنت أحس اني عايشة 

_ انا كنت شايفك دايما اذكي واحدة في العيلة 

= أنا!! 

_ الي تمسك في حلمها مهما قال الي حواليها تبقي ذكية 

= محدش شايف دا ، كل الي شايفينه اني اتنازلت عن الوظيفة عشان وهم 

_ علي الأقل عرفتي تعملي الي معرفتش أعمله 

= انت؟ ، انت مهندس شاطر جداً، ومعروف برا كمان، إنما أنا لسه في الأول 

_ بس عرفتي انتي عاوزة ايه ، أنا دخلت هندسة عشان ارضي ابويا وامي ويبقي ابنهم مهندس ، عارفة؟ أنا لسه فاكر يوم نتيجة ثانوية عامة عندي 

= وانا كمان ، حد ينسي الي حصل يومها؟ ، دا العيلة كلها جيت تقنعك تدخل هندسة عشان جايب مجموع كبير ، قعدنا في الموال دا اسبوع لحد ما وافقت

_ كمية الضغط الي عليا خلتني أدخل كلية مبحبهاش ، يمكن شاطر في شغلي بس مبحسش اني مبسوط فيه ، ساعات بحس أن فيه حد أولي بالكرسي الي انا قاعد عليه في الشركة ، هو كان هيبقي حابب ومبدع في شغله اكتر مني ، وانا كنت هدخل تربية رياضية 

= تربية رياضية! 

_ كنت قولتلك زمان أنه كان حلمي ابقي لعيب كورة ، كنت موهوب ،  امسك بس الكورة وكل الملعب بيبقي متأكد إني خلاص هجيب جون ، لما روحت قولت ل ابويا قالي سيبك من الاحلام وركز علي مستقبلك انت مش هتبقي حاجة غير مهندس ، ملقتش أي حد يدعمني أو يمدلي إيده ، كان بيجي عليا وقت واقول مش هذاكر عشان معرفش أحل وارجع اشوف شقا ابويا وامي في المصاريف ، كان جوايا دايماً حاجتين وكنت أنا الي في النص ، الكل شايف حياتي مثالية بس انا عمري ما كنت مبسوط ، مكنتش بتبسط غير واحنا نازلين سوا حجز الكورة 

ضحكت = ياه لسه فاكر؟ بس انا مكنتش بعرف ألعب كورة ، كنت بعرف ألعب..

_ سلة 

بصيتله = فاكرين عن بعض كل حاجة كأن مفيش حاجة اتغيرت مع إن كل حاجة اتغيرت ، انت ليه بتقولي الكلام دا دلوقتي؟

_ عشان الكلام الي بتسمعيه يمكن في يوم يخليكي متكمليش ، بس كملي طول ما انتي بتعملي الحاجة الي بتخليكي مبسوطة 

= شكراً يا احمد ، أنا مقدرة كلامك 

_ لاء يستي انا عاوز الكتاب بتاعك وعليه امضتك

طلعته من شنطتي وادتهوله كتاب من اول طبعة ومضيت ب إسمي عليه 

_ كيف تصطادين عريساً؟ 

= مهو مكنش لازم الحماس ياخدني واطلع الكتاب وانا ناسية اسمه

ضحك _ اسم لذيذ ، هقرأه واقولك رأيي أنا متأكد أنه هيعجبني 

= متشكرة ، بقولك ايه همشي أنا بقي عشان بنات العيلة ميقيموش عليا الحد ، كل شوية واحدة تيجي تبص انت بتعمل ايه ، علي فكرة كل واحدة فيهم هايلة يعني مهتمك الي جاي عشانها اتسهلت 

_ استني ، عرفتي منين انا نازل ليه؟

=بذمتك حد يقول ل أمه سره؟

_ هي قالت لحد!!

= وانا جاية عمو ابراهيم غمز وقال ربنا يتممله علي خير 

_ هو باين اوي ؟

= ايه يخليك تنزل مصر غير انك تتجوز ؟ 

_ يعني بلدي وحشتني مثلاً 

= يا وطني ، ناوي تكمل شغل هنا ولا هترجع تاني ؟ 

_ اه إن شاء الله، هستقر هنا وافتح شركة زي ما..

= باباك عاوز 

حط وشه في الارض وبعد كده بصلي = حاول زي ما بترضيهم ترضي نفسك بدل ما يجي يوم تندم انك ضحيت وتكتشف متأخر إن التضحية دي كانت عمرك 

كان باصصلي ف خدت الشنطة 

= ورايا حاجات لازم أخلصها ، سلام

_ فيه عزومة بكرة عندنا في البيت والعيله كلها جاية ، هتيجي مع خالتي ؟

= وهي خالتك هتسيبني؟ ، حمدالله علي السلامة يا باشمهندس 

طلعت الصالة أدور علي ماما = ماما ، أنا ماشية 

° اتكلمتوا مع بعض؟

= كلام عادي مفيش حاجة 

° تفتكري ألبس فستان ولا اشتري عباية جديدة؟

= فين؟

° في فرحكم 

= ماما أنا مروحة، تعالي انتي علي مهلك 

روحت البيت ونمت من التعب ، صحيت الصبح علي صوت ماما وهي بتصحيني عشان نروح العزومة 

= طب انتي عاوزة تجاملي أختك وتساعديها في الطبيخ، أنا مالي؟ ما كنت أجي علي ميعاد الغدا 

° ويتقال عليكي همك علي بطنك؟

= طب ما ليه الشك ما دي الحقيقة

° إلبسي وخلصي عشان يدوب مسافة السكة 

لبست وروحنا علي هناك ، لقيت خالاتي هناك من بدري هما وبناتهم ، ماما واخواتها دخلوا كلهم المطبخ عشان يجهزوا العزومة سوا ، قعدت علي الركنة ف جيت بنات خالتي الأربعة قعدوا حواليا 

إنجي : بصي بقي يا مريومة احنا عاوزينك في خدمة 

= يعني ، متوقع جدا انتوا عاوزين ايه

سلمي : مهو متنفعيش الغريب وتستكتري نصايحك علينا ، دا انتي مجوزة خمس عرايس قبل كده 

= عاوزين ايه يعني دلوقتي؟ 

شهد : انتي مش بتشتغلي في كده أصلا يمريم؟

= يعني مش بالظبط 

شهد : يعني مش بتشتغلي خاطبة؟

= مبلاش الكلام الي يخليني اقوم اكسر الصالون عليكم دا ، فيه بنات بتاخد رأيي وساعات كلامي بينجح والموضوع ربنا بيسهله ف دا ملوش علاقة اني اشتغل خاطبة

ليلي : خلاص يستي ، خاطبة أونلاين 

= انتي كده صلحتيها يا ليلي؟ ما تبطلوا غباء دا انتوا كرهتوني اتناقش معاكم

ردوا كلهم : بس انتي بجد هتساعدينا احنا متأكدين

= قولت لاء يعني لاء ، مش مكلماه في الموضوع دا إنسوا ، علي جثتي 

بعد الغدا قعد في الصالون وكان قدامه علي الطربيزة صورهم ، بصتلهم وبعد كده غمضت عيني ونفخت ، يمكن دي الطريقة الي تخليه يختار واحدة فيهم واترحم من زن ماما؟ ،  قعدت علي الكرسي الي جمبه

= ركز معايا ، عاوز طباخة محصلش تبقي ليلي ، عليها أكل ما شاء الله عليها بجد تقدم على توب شيف مستريح 

_ اه 

مسكت صورة انجي = ولو عاوز شكل ولبس ومظهر عام ولا غلطة تبقي إنجي ، لبسها كله براند ولبقة جدا في الكلام ، هتشرفك في أي عزومة عشا في الشغل

_ أمممم

= ولو عاوز واحدة تدبرلك مصروف البيت مفيش احسن من سلمي ، بتعرف تجيب كيلو الطماطم ب خمسة جنيه وبتلم السوق علي الفكهاني عشان عاوز يبيعلها المانجا ب ستين وفي الاخر بتاخد الاتنين كيلو ب اربعين

ضحك ف كملت = ولو عاوز واحدة تخلي البيت مملكة ف مفيش غير شهد ، بتعرف تنضف كويس جدا وتخلي البيت بريمو ، يعني هترجع من الشغل مش هتلاقي سبب تتخانق عشانه 

كان ماسك الصور وحط قدامي صورة _ طب ودي؟

وشي جاب ألوان = دي ، أنا!! هي ماما حاطة صورتي وسطهم؟