انا حاليا بعد ظهور حضرتك بقيت الإكس بتاعها..انت بقى مين يا قلب اخوك ؟؟؟

فايز اتصدم بكلامه وبالمطوه اللي رافعها عليه وقال....ايه ده ايه ده.... مين ده ياروعه 

روعه لسه هتنطق مختار قال بغضب ..سيبك منه وردي عليا انا لارتكب جنايه هنا...مين ده اللي عماله تبوسي وتحضني فيه قدامي وشويه وهتاخدو اوضة سوا 

فايز بصله بذهول وقال...اوضه !!! بيقول ايه الحيوان ده...مين ده يا روعه ردي عليا 

روعه كانت في موقف لا تحسد عليه بصت لمختار وقالت بصدمه...انت بتعمل ايه الله يخرب بيتك...نزل الزفت اللي في ايدك دي...انا اسفه...اسفه جدت يا فايز حقك عليا

بس مختار  كان هيتجنن حرفيا وفاكر انها مخطوبه او متجوزه وكانت مخبيه عليه من ضمن خطتها زي كل اللي خبته والفكره دي طيرت عقله مسكما من دراعها بغيره شديده وقال..انا اللي بكلمك هنا يطلع مين فايز باشا ده ...اوعي تقولي انك متجوزه ولا مخطوبه بعد ما كنتي بتشاغليني وتدلعيلي طول الفتره اللي فاتت ..اقسم بالله اقلعلك ملط هنا وما يهمني ولا شرطه ولا مخابرات

هنا روعه شدته من قميصه وضربت دماغها في دماغه علشان يفوق لنفسه وقالت من بين اسنانها بغضب....ده فايز الجندي اخويا

مختار اتجمد مكانه من الصدمه لان الشاب طلع اخوها فرك دماغه بايده بوجع وقال بتوتر ..احم....كنتي قولي انه اخوكي ...انا افتكرت انه ....عموما تشرفنا

وخبى المطوه بسرعه ومد ايده بحرج وقال ...انا مختار ...مختار الديب

فايز بص لايده بقرف وغضب وقال ...مش هتقوليلي مين الاخ

روعه قالت بتوتر...مختار يبقى..احم...يبقى....انسى.... هو تبع الشغل موضوعه طويل..... تعالى بقى انت واحشني قوي نفسي اتكلم معاك

واخدته وقعدته على الكنبه وقعدت جنبه وهيه ماسكه في دراعه وبتقول بسعاده..كنت هموت واشوفك عمي اللي بعتك هنا صح

فايز كانت عيونه على المكان وبيبص يمين وشمال وقال....اه عمك....هو انتو هنا لوحدكم

روعه اتوترت وقبل ما ترد مختار ضحك وقعد على الكنبه وقال قاصد يغيظها....اه لوحدنا احنا متعودين نقعد لوحدنا كتيييير 

روعه بصتله بتوعد وفايز قال بغضب...متعودين ازاي يعني مش فاهم

روعه قالت بسرعه...فايز سيبك منه خالص ده عادته كده مبيقولش كلمتين على بعض من غير ما يستظرف 

مختار حط رجل على رجل وقال....حفظاني البت دي.... انا لو منك اسألها عرفت عاداتي منين

فايز قال بسرعه ..اه صحيح انتي تعرفي عاداته منين...مين ده يا روعه

روعه مبقتش عارفه ترد ومختار وقف وقال بابتسامه بارده طب انا هسيبك تاخدي وتدي مع اخوكي ..وبما اننا هنطول هنا كلمي عمك ده ولا مش عارف مين يجبلي اللي هحتاجه... عايز هدوم ومفرش ومخده مش بنام على حاجات قديمه... وعايز معجون اسنان وفرشه وبرفان وشامبو وبلسم ومتنسيش الغيارات الداخليه كتري منها انتي عارفه عاداتي بقى 

وغمز وطلع وهو بيضحك على شكلها 

فايز قال بذهول.... هو انتي هتقعدي مع البتاع ده هنا لوحدكم روعه لسه هتتكلم مختار قال بصوت عالي من بره..... لا متقلقش مش لوحدنا اخويا جاي كمان شويه ... اختك بتحب الزحمه

فايز اتنفض من مكانه وقال...ايه

روعه حطت ايدها على دماغها بذهول وقالت بهمس...الله يخربيتك يا سافل يا واطي

بقلم....زهرة الربيع

عند عزيز وقف العربيه قدام البيت بتاع نسيم وحمزه وقال لشاكر...متاكد هو ده البيت

شاكر قال بحزن.... ايوه هو ....يا باشا حمزه ده دكتور في حاله ملوش دعوه بال...

بس عزيز رفع ايده وقال...اششش اخرس يلاا مش فايقلك

وبص لرامي وقال...انزل مع الرجاله وجبوه بسرعه....وهاتو البت اللي معاه كمان

رامي هز راسه بطاعه ونزل هو ورجالته 

بقى يضرب الجرس بس مفيش حد بيرد

فشاور للرجاله كسروا الباب بقوه واقتحموا المكان  بس اتفاجأو بالبيت فاضي مفيهوش حد والدفايه فيها التليفون محروق ومتفتت مية حته

بعد شويه من التفتيش طلع لابوه وقال ....مفيش حد جوه ...مشيو ولاد الكلب ...قدرو يهربوا

عزيز قال بغضب....متاكد انهم كانو جوه

رامي قال ايوه اكيد ..فيه تليفون محروق في الدفايه وفيه حاجات كتير بتدل انهم يادوب مشيو من شويه

عزيز قال بغضب...تليفون محروق....كده يبقى ابن الديب وصله قبلنا....بس انا عارف هعمل ايه

عند مختار كان رايح جاي بقلق في الجنينه ومستني مكالمة اخوه والتوتر هيقتله

بعد شويه من الانتظار المميت جاله اتصال فتح بسرعه واتسعت ابتسامته لما سمع صوت حمزه وقال....ايوه يا حمزه ....انتو بخير

وسمعه شويع وقال بسعاده.....الحمد لله يعني انتو وصلتوا الطريق العمومي دلوقت ...طيب طيب خليك مكمل سواقه زي ما قولتلك لحد ما توصل لاول بنزينه وانا جايلك على طول

ودخل لروعه جري وقال بسعاده....حمزه اتصل يا روعه ...هو على الطريق خلاص وقولتله يستنى عند البنزينه زي ما قولتي

روعه فرحت جدا وقالت..الحمد لله...الحمد لله...بس اتأكد انكم كلكم هتكونو هنا في امان...ويبدا العد التنازلي في حياة عزيز ابو العزم

مختار قال بقلق بيحاول يخبيه....انا ...انا شايف انك تسافري اضمن.... اطلعي بره البلد ...بصي خلينا كلنا نسافر ....مفيش حاجه اهم من حياتك ...قصدي من حياتنا يعني

روعه ابتسمت لانها عارفه انه قلقان عليها قربت منه وقالت ...ما انت عندك احساس اهوه امال ايه لزوم تصرفات الخنازير اللي عملتها قدام فايز دي....انا عيني طلعت لحد ما شرحتله الوضع الملخبط اللي احنا فيه ده

مختار ضحك بخفه وقال..هو فين صحيح

روعه قالت بضيق...راح يعمله قهوه

مختار اتنهد وقال بجديه....روعه عشان خاطري فكري في اللي بقوله....انتي لسه صغيره..بلاش تغامري بحياتك

روعه ابتسمت وقالت..ده شغلي يا مختار....من وقت ما قررت اشتغله وانا غامرت بحياتي...المهم عندي انت واخوك واخويا لازم امنكم قبل اي خطوه

ولسه هتمشي مسك ايدها وقال...بس انا مش هغامر بيكي ...ومش هسيبك ورجلي على رجلك لاخر خطوه 

روعه اتنهدت وقالت....للاسف مشوراك معايا اخره هنا....عمي هيجهز لكم اوراقكم وهتسافر انت واخوك وفايز...لحد ما اخلص القضيه..وقتها تقدروا ترجعو في امان 

مختار اتسعت عنيه بدهشه وقال...نعم...نسافر من غيرك...مستحيل طبعا...لا والف لا

روعه قالت بتوتر ..يا مختار اسمعني

مختار قال بسرعه ورفض شديد..مش هيحصل...خلي حمزه وفايز يسافره..انا مش هتحرك من هنا الا وانتي معايا...ولو فيها موت نموت سوا....خلص الكلام...خلصي اللي معاكي وحصليني بسرعه علشان نجيب حمزه

قال كده وطلع على الجنينه بغضب  وهيه اتنهدت بيأس وقالت بصوت عالي...فايز انا هطلع نص ساعه وراجعه

فايز طلع من المطبخ وقال..والجدع اللي بره ده نظامه ايه

روعه قالت بتوتر....هاخده معايا هنروح نجيب اخوه

فايز قال بغضب...يبقى اجي معاكم

روعه قالت باستعجال...وبعدين يا فايز ما انا حكتلك كل حاجه هتيجي تعمل ايه ....متقلقش مش هتأخر

ومشيت بسرعه قبل ما يلحق يعترض

عند حمزه كان واقف في المكان اللي وصفهوله مختار واشترى عصير لنسيم وقال...اتفضلي

نسيم مسكت العصير وقالت بقلق...احنا رايحين فين....هو انا ازاي وصلت لكده ...انا حتى مش فاهمه فيه ايه

حمزه اتنهد وقال...والله ولا انا فاهم...بس مختار بيقول فيه مشكله كبيره ...وهو مش هيقولنا نخرج بسرعه كده الا لو كان فيه حاجه تستاهل

نسيم بصتله وقالت بغضب..كل ده بسببك اصلا...هتوديني وتودي نفسك في داهيه ..تقدر تقولي اخرة اللي بتعمله ده ايه....هنفضل هربانين طول العمر...حمزه انا خايفه على امي واخويا ولازم ارجع 

حمزه اتنهد وقال...حاضر يا نسبم ...هشوف مختار عايز ايه...وايه الحكايه وارجعك....انا اصلا شايف ان الهروب مش هيحل حاجه....هتواصل مع جوزك وادفعله الفلوس اللي عايزها ويطلقك ونخلص

نسيم شرقت وهيه بتشرب وضحكت جامد وقالت...ده بجد....هو انت فاكر لو دفعتله الفلوس خلاص كده....يابني مهو استغنى عن كل الفلوس دي من الاول علشان يبتزنا ...ده بني ادم مريض ومش عايز فلوس

حمزه قرب منها وقال ....فاهم..هو عايزك وبس....ومعاه حق بصراحه ....بس المهم انتي عايزه مين 

نسيم نزلت عيونها  وحمزه رفع وشها ليه وبص في عيونها وقال....مش قادر اوصفلك فرحتي انهارده...كنت حاسس انك مش حامل منه ...كان عندي احساس ان اطفالك هيكونوا مني انا وبس....ليه عملتي كده...ليه كدبتي على الدكتوره نجوى وعيشتيني اصعب وقت مر عليا

نسيم بصتله بدهشه وقالت....انا مكدبتش عليها....انا كنت رايحه اتعالج علشان حاجه تانيه خالص ومجبتلهاش سيرة الحمل اصلا

حمزه قال باستغراب...ازاي ...هيه قالتلي انك عملتي تحاليل وكنتي رايحه علشان الخلفه

نسيم قالت بغيظ...اممم ...وياترى عملت كده ليه....تفتكر ليه كدبت عليك

حمزه اتفاجأ جدا وفهم ان نجوى عملت كده لان عندها مشاعر ليه قال بارتباك....احم..مش عارف بقى لما ابقى اسالها 

نسيم ضحكت وقالت بسخريه..مش محتاجه سؤال يا دكتور....المشاعر بتبان في العيون...والدكتوره واضح ان عينها منك

حمزه قال بسرعه....لا لا انتي فاهمه غلط.....هيه تلاقيها اتلخبطت او الاعراض اتشابهت معاها

نسيم قالت بسرعه وغيره...اتشابهت ازاي يعني اذا كنت انا قولتلها بلساني اني باخد موانع وموقفتهاش هبقى حامل ازاي

حمزه بصلها بعمق وقلبه دق بسرعه وهو مش مصدق اللي بيسمعه وقال ...عملتي كده علشاني....علشان وعدك ليا ...كنتي بتاخدي موانع علشان متخلفيش من غيري 

نسيم بعدت عيونها وقالت ...لا انا..احم انا مكنتش عايزه اطفال متفسرش على هواك

حمزه ابتسم وقال بحب شديد....مفيش حاجه حرقت قلبي قد البعد اللي بنا .....رغم انك جنبي بس مش عارف اخدك في حضني في اجمل وقت بيعدي عليا

نسيم ابتسمت على الحب اللي في عيونه واتنهدت وقالت ..انت اجمل انسان عرفته يا حمزه ...بجد انت تستاهل خير الدنيا كله

حمزه قال بسرعه....يعني انا الوحيد الي استاهلك ...الحمد لله قزلتيها بلسانك

نسيم ضحكت بخفه وقالت....انا قصدي انت والدكتوره بجد لايقين لبعض نفس المركذ ونفس الشغل وهتتفاهموا سوا

حمزه ضحك وقال.....انا مش عارف  اللي بتقوليه ده عبط وقلة عقل...ولا دي بس نار الغيره

نسيم قالت ..غيره..واغير منها ليه ان شاء الله

حمزه قال بغمز...يمكن لانك شاكه انها بتحبني مثلا

نسيم بصت لعيونه وقالت بثقه....انا متأكده انها بتحبك مش شاكه...بس المهم انت بتحب مين ...مش ده كلامك

حمزه ابتسم وقلبه بيرقص جوه صدره وقال...بحبك وبس ..ولاخر العمر

نسيم ابتسمت بسعاده ونزلت عيونها بكسوف شديد وقبل ما ترد سمعو صوت تلاكس وراهم ومختار بيقول بصوت عالي...حمزه....خد يلا مش وقت تسبيل

بقلم..زهرة الربيع

حمزه مبصلوش وقال بغيظ....هو مش وقتك انت خالص

نسيم ضحكت وراحو لمختار واتفاجأو بروعه هيه اللي سايقه العربيه 

حمزه قال باستغراب ....هيه البت دي لسه معاك

مختار قال بسخريه...لا المرادي انا اللي معاها زي ما انت شايف كده.....يلا اركب وهفهمك 

حمزه لسه هيركب ورا هو ونسيم روعه قالتلها...لا تعالي انتي هنا جنبي...وخليهم هما ورا 

وبصت لمختار وقالت...يلا انزل اقعد جنب اخوك صدعه شويه

مختار قال بدهشه....بقى كده

روعه قالت بتاكيد...ايوه كده يلا انزل

مختار نزل وراح قعد جمب حمزه وروعه ابتسمت لنسيم وقالت...تعالي انتي جنبي خلي الواحد يشوف حاجه حلوه تفتح النفس

نسيم ضحكت وحمزه ميل على مختار وقال باستغراب....هيه البت دي مالها اتبدلت كده ليه

مختار اتنهد وقال...اقولك ايه ولا ايه....دخل في بقها رائد ومن وقتها وهيه على الحاله دي

حمزه قال باستفهام..رائد مين

مختار اتنهد و قال...لا متشغلش بالك ده واحد صاحبنا

بعد شويه وصلوا البيت وقعدو كلهم في الصاله وروعه حكت قدام الكل كل حاجه حصلت معاهم من البدايه علشان تفهمهم الوضع وقالت في نهاية كلامها  ......متقلقوش قبل ما نكمل المهمه كلكم هتكونو في امان وهسفركم

نسيم قالت بسرعه...لا طبعا....مقدرش اسافر انا اهلي هنا ومقدرش اسبهم

روعه اتنهدت وقالت..للاسف يا نسيم ..زمان شاكر حكى لعزيز عن وجودك مع حمزه ولو رجعتي هتبقي في خطر علشان يستخدموكي سلاح تهديد...انا ممكن اتكلم مع عمي والاقي حل غير السفر متقلقوش خالص مش هنعرض اي حد للخطر

حمزه بص لاخوه باسف وغضب وقال...ايه اللي هببته ده...مكناش مضطرين لكل ده ...ليه تعمل كده وتغرق نفسك ليه...وايه القرف اللي كنت هتعمله ده...يعني لو وقعت في ايدك بنت بريئه غيرها كنت هترميها كده علشان تنقذ نفسك

مختار اتنهد بحزن وكان منزل راسه بكسوف وقال...انا عارف اني غلطت...وندمان ...وعارف اني مليش عذر 

حمزه هز دماغه بيأس واسف

وروعه قالت بسرعه....مختار وقع في مصيدة عزيز وكان لازم ينقذ نفسه...مش بس هو اللي كان في خطر انت كمان كنت مهدد متظلمهوش محدش عاش التوتر اللي هو عاشه...ماشي هو غلط بس حاول يصلح غلطه ولسه بيحاول

مختار بصلها بابتسامة امتنان وهو مش مصدق انها بتدافع عنه بعد كل اللي تعرفه

وحمزه وقف وقال بخنقه....طيب ودلوقت الخطوه الجايه ايه

روعه قالت...الخطوات انا اللي هكملها كل اللي عليكم تفضلوا هنا لحد ما اظبط الدنيا مع عمي

حمزه اتنهد وقال..... طيب تمام ...بما اني هفضل هنا عايز تليفون يكون امان...لازم اكلم عم غانم...الوقت كده ممكن يطول ولازم اطمن عليه واتاكد ان محدش وصله

روعه قالت بسخريه..اطمن ده الوحيد اللي محدش هيوصله

مفيش افاعي بتلدغ بعضها

مختار وقف بقلق على اخوه خاف ميستحملش الحقيقه قال بسرعه...روعه ..بس

روعه قالت باصرار ...مختار اخوك لازم يعرف...علشان ميقعش في مصيدته ..خصوصا الفتره دي

حمزه بصلهم باستغراب وقال.... اعرف ايه....هو فيه ايه لسه مقولتهوش

روعه اتنهدت وقالت...غانم شغال لصالح عزيز....وهو اللي بيديله اخبار البيت...وهو كمان اللي حط المخدرات لاخوك في العربيه وسجنه...ومش بس كده

مختار صعب عليه جدا اللي اخوه هيعرفه خصوصا موضوع امه لانه عارف حبه لغانم  وقفها وقال ....روعه كفايه...كفايه لو سمحتي

بس روعه مسمعتش منه وكملت وقالت ....غانم هو اللي سمم والدتك في العلاج اللي كانت بتاخده في المستشفى يا حمزه ووووو