رواية كيف تصطادين عريسا الفصل الثاني 2 بقلم مريم سمير
رواية كيف تصطادين عريسا الفصل الثاني 2 هى رواية من كتابة مريم سمير رواية كيف تصطادين عريسا الفصل الثاني 2 صدر لاول مرة على موقع التواصل الاجتماعى فيسبوك رواية كيف تصطادين عريسا الفصل الثاني 2 حقق تفاعل كبير على الفيسبوك لذلك سنعرض لكم رواية كيف تصطادين عريسا الفصل الثاني 2
رواية كيف تصطادين عريسا الفصل الثاني 2
وشي جاب ألوان = دي ، أنا!! هي ماما حاطة صورتي وسطهم؟
ضحك _ يمكن
بصيت النحية التانية علي ماما الي بصت علي السقف
= ايه يقلبي لون سقف الشقة مش عاجبك ولا ايه؟، ايه الي جاب صورتي وسطهم يا ماما؟؟
° هي وسطهم؟ سبحان الله ، متيسرة ، قدريات ، إشارات ، جوازات
= ماما!!!!
رجعت بصيتله = بص ولا كأنك شوفت الصورة دي ، كنا بنقول ايه؟
_ لاء قوليلي مميزات الصورة زي ما قولتي علي كل الي فاتوا
= مفيش ، أنا لا بعرف أطبخ ولا ليا في الميكب ولا أصلح زوجة إطلاقاً
° إلحقيني ب دوا الضغط يا دعاء يختي
ضحكت = ماما ، خلاص بطلي!
رجع بصلي وهو بيضحك _ بس انا شايف غير كده
= مش فاهمة؟
_ شايف إن الي في الصورة ست بتعرف تعمل الي نفسها فيه وبتحاول دايما تبقي ناجحة ، والوحيدة الي معملتش أي حاجة عشان تقنعني
= انا برا المسابقة الي عاملينها دي ، شوف واحدة من الأربع بنات
_ طب والخامسة؟
= لاء أنسي الخامسة مش في دماغي الموضوع دا ، نرجع نكمل عشان تختار؟
_ أنا مش عاوز
مامته وباباه بصوله ومامته قالت
' أمال احنا نازلين ليه؟ ، بنات خالاتك مننا وعلينا والي هتاخدها هتستحملك في الحلو والوحش بدل ما تتجوز بنت غريبة عننا منعرفهاش ويا عالم هتبقي كويسة ولا لاء
_ أنا محتاج أخرج اشم شوية هوا
في ثواني كانت البنات واقفة بيعدلوا هدومهم وتسريحة شعرهم ل الإستعداد أنه يختار واحدة تنزل تتمشي معاه ، فرصة هايلة أن واحدة فيهم تحاول تكسب قلبه
_ مريم؟
كنت فتحت شنطتي ومسكت النوتة أكتب حاجة جديدة
= نعم؟
_ ممكن تنزلي معايا؟ مش هنتأخر
فجأة كل الي موجود بصلي ف رجعت بصتله
= يستحسن بلاش أنا يا احمد
_ انتي مش حباة تنزلي؟
= اه ، ورايا شغل لازم أخلصه
ماما جت وقفت وسطنا ° بعد اذن بنت نجيب محفوظ ، متتأخروش يا احمد
بص لماما _ اه اكيد يا خالتي ، بس مريم مش فاضية و..
° انزلي مع احمد يا مريم وريه الشوارع
= هي شوارع الأقصر؟ خلي واحدة من البنات تنزل معاه
_ خلاص مش مهم ، مش ضروري
بصيتله ب استغراب لما رجع قعد علي الكرسي وبص قدامه = ماشي هأجل الي بعمله شوية ، يلا بينا
ماما قربت مني ° مريم ، تبقي في منتهي الأنوثة معاه
= أه أكيد طبعاً
° صوتك ميطلعش ، عوزاه يجي يحلف ما شاف في حياته رقة زي الي شافها عندك
= هخليه يحلف ما شاف رقة عندي حاضر
° واحترمي نفسك وبطلي دمك السم
= اه دا لازم ، ضروري
° خالاتك وعيالهم هيجرالهم حاجة أنه اختارك
= هو اختارني للجواز يماما؟ دي مجرد تمشية
° اسمعي الكلام بس واحنا هنضمن ترتيب كويس
ضحكت = هو ماتش صعود ؟ ، وسعي يماما هما عشر دقايق وهطلع
° بالدبلة؟
= لاء بالكاس ، عديني يماما عديني
نزلنا تحت العمارة وبصيتله = تحب تمشي في انهي طريق؟
_ مش كان هنا ملعب ؟
= كان حوش واتبني مكانه دلوقتي عمارة
_ خسارة ، طيب ممكن نمشي من هنا؟
مشينا في الطريق اليمين ، كان ساكت وباين عليه الضيق
= حد ضايقك فوق؟
_ لاء أبداً ، بس حوار اني لازم اتجوز واختار واقارن دا مضايقني
= ليه؟ انت ممكن تختار المناسبة جداً بالنسبالك ، اضمنلك ايا كان اختيارك ف هما الأربعة ستات بيوت محصلتش
_ المفروض اختار علي اساس اني بحب الست الي قدامي ، مش علي اساس انهي واحدة الاحسن ، لما يحصل أي مشكلة بينا بعد الجواز ايه هيخليني مخسرهاش غير اني بحبها وعاوزها معايا؟
= انت متعرفهومش كويس ، لو عرفتهم هتعرف تختار
_ وانا ليه اقعد ادرس كل واحدة فيهم وكل واحدة تبقي مقتنعة اني هختارها هي؟ مفيش واحدة فيهم هتتعامل بالطبيعي ، كل واحدة بتبين قد ايه هي مثالية قدامي لدرجة أن ابويا شايف اني مينفعش أفوت جوازة زي دي
= وانت شايف ايه؟
سكت ف كملت = مينفعش تحاول ترضيهم في جواز ، صدقني مينفعش
_ عارف بس هما مش قادرين يفهموا
= طب حاول تدي نفسك فرصة ، طول منتا حاطط في دماغك انك في مسابقة عمرك ما هتعرف تقرر حاجة
كملنا مشي ف بصلي _ شكراً يا مريم ، كنت محتاج أتكلم مع حد
= تحب اقولك مميزاتهم تاني؟
ضحك _ روحي البيت يا مريم
وقف فجأة ف بصيتله = فيه ايه؟
_ فاكرة عربية الفول دي؟
= ياه ، كنا بنفطر عليها كل خميس
_ وبنات خالتنا كانوا بيقولوا علينا بيئة
ضحكت = معاهم حق الصراحة، تصرفات قمة الاحراج
_ تيجي نتعشي عليها؟
= أنا؟ أنسي، مستحيل ، أنا دلوقتي اتغيرت يا احمد
بعد خمس دقايق = أيوة اتنين فول بالزيت الحار وزود بطاطس يا عم عبده الله يباركلك وعاوزة عيش بلدي
ضحك _ كملي كملي
= بصراحة ؟ أنا معنديش برستيج ، زود طحينة لو سمحت
وقفنا كلنا ، مكنتش اتبسطت كده من فترة كبيرة ، افتكرت ايام ما كنا اقرب اتنين لبعض بس الغربة هي الي خلتنا مجرد ولاد خالة ، وكرهي الشديد للرجالة والجواز خلاني أخاف منه لما عرفت اني ممكن انضم ل ليستة العرايس الي احتمال يختار منهم ، ساعتها نسيت أنه نفس الشاب الي كنت دايما علي طبيعتي معاه ولا احتاجت في يوم اتزوق ولا أدراي نفسي .
خلصنا أكل وحاسب وكملنا مشي
_ اتبسطت اوي
= كويس ، احسن من وشك من نص ساعة ، كان الله في عونها ب وشك دا
ضحك _ انتي بتقولي ايه؟
= انت مش حاسس بنفسك ف كان لازم أدهالك بالصدمة
_ علي فكرة ، قرأت شوية من الرواية بتاعتك ، عجبني أوي الفصل التاني ، بس اشمعنا اختارتي تكتبي رومانسي؟
= الناس بتحب النهايات السعيدة واغلب البنات عاوزين السعادة تبقي متعلقة بالحب
_ وانتي؟ مقتنعة بالحب؟
= الحب؟ لاء طبعاً
_ بس انتي كاتبة كده في الرواية بتاعتك
= أنا بحاول اساعد البنت تلاقي الشخص المناسب ليها
_ بس انتي مش كاتبة اي شخص مناسب يمريم ، كاتبة شخص هي عوزاه
= عشان تعرف تعيش معاه!
_ مش هتعرف تعيش معاه غير وهي حابة تعيش معاه
= لاء دا انت تيجي تكتب مكاني بقي
_ ليه بتبيعي للناس حاجة انتي مش مقتنعة بيها؟
=..
_ بتبيعي كتاب انتي نفسك مش مصدقاه، مفيش واحدة كارهة الرجالة والجواز وتكتب رواية زي دي
= عشان أنا بحب الكتابة
_ لاء ، عشان انتي وانتي بتكتبي بتبقي واحدة تانية ، لا انتي ولا احمد الي بتكتبي عنه موجودين ، زي ما هو وهم ، انتي كمان وهم
زعقت = انت متعرفش حاجة
_ معرفش ايه؟؟
غمضت عيني وانا بحاول أهدي = مفيش ، أنا عاوزة أروح
_ مريم أنا مش قصدي أضايقك ، أنا كنت بس عاوز افهم و..
= مش من حقك ، دي حياتي وانا حرة فيها ، مش عاجبك الكلام الي بكتبه متقرأهوش مش تيجي تحاسبني!!
_ احنا كنا..
= كنا ، دلوقتي انت ابن خالتي ، راجل ميربطنيش بيه غير القرابة الي بينا وبس
_ طيب أهدي مينفعش نرجع البيت وانتي مضايقة
= أنا مش مضايقة ، هترجع معايا ولا أرجع لوحدي؟
مشينا من غير ما حد فينا يقول كلمة زيادة ، رد فعلي كان مبالغ فيه؟ ولا يمكن خوفت أبان قدامه خايفة؟ سألني السؤال الي بهرب منه دايما ، كنت هقوله ايه؟ كان لازم أهرب ومعرفتش أعمل غير كده .
طلع علينا تلاتة واحنا ماشيين ، فضلوا يلفوا حوالينا
° علي فين؟
_ طب وانت مالك؟
° اهدي بس ومتنشفش عشان منروحكش علي نقالة وبعدين احنا مش قاصدينك انت ، قاصدين القمر الي جمبك
اتعصب وقلع الجاكت = لاء انت بتعمل ايه دول تلاتة! يلا نمشي
_ بس هنطلع علي السجل المدني
= اشمعنا؟
_ اغير اسمي ل سامية عشان هسيب شباب يعاكس وانا همشي ، امسكي الجاكت وأقفي في جمب
= يا احمد الجاكت دا هيبقي الحاجة السليمة بعد خمس دقايق ، استهدي بالله
_..
= متبصليش كده انت عاوز تروح تتخانق ؟
_ امسكي النضارة دي وملكيش دعوة
= اقول تكبيرات في ودنك ؟؟؟
_ امسكي الساعة دي وملكيش دعوة
= هو فيه ايه ؟ ، انت قاعد تمسكني حاجة كل شوية ، صدقني الحاجة الجاية هتبقي كرامتك ، يلا يباشمهندس نمشي
° مش هتمشوا ، هو الي هيمشي وانتي هتفضلي
= ايه هنعمل movie night ولا ايه مش فاهمة؟
_ انتي فيكي حيل تستخفي دمك بذمتك؟
وقف وسطهم ، ضرب واحد ف الاتنين التانيين مسكوه
= لا حول ولا قوه الا بالله، يلا يا ولي النعم
_ انتي بتعملي ايه؟
= انت واحد وانا واحد قسمة العدل
_ هو انا بوزع ورث؟ امشي يمريم من هنا
ضربت الواحد الي قصادي ف احمد والي معاه بصولي وهما فاتحين بوقهم = هتمشي ولا تحصل صحابك؟
طلع يجري ف احمد بصلي _ انتي عملتي كده ازاي؟
= واخدة كورس دفاع عن النفس
_ اللهم صلي علي النبي، بنت خالتي الاندرتيكر؟
= متهزرش عجبتك؟
_ دا انتي تحفة
= يعني ارجو الي حصل ميوصلش لحد عشان ماما مش هيعجبها نهائي
_ عيب عليكي سرك في بير
وصلنا البيت ودخلنا ، كلهم اجتمعوا حوالين احمد بسبب شكله الي كان متبهدل
خالتي سحر اتكلمت وهي مخضوصة ° حصل حاجة يا احمد؟ مالك ؟
_ لاء ولا حاجة ، دا شوية شباب وخدوا الي فيه النصيب
إنجي : واو!! انت ضربتهم؟
_ مريم الله ينور ، مسكت واحد عدمته العافية
بصيت علي ماما الي قامت من مكانها ووقفت قدامي ( كان بدأ وشها ينمل من الي بتسمعه )
_ ومسكته من الجاكت وهوب في وشه بقي علي الأرض مقامش تاني
= خلاص يا احمد
_ بتعرف تضرب حلو اوي ، لو شوفتوها هتنبهروا ، ما شاء الله حيطة
= أفندم؟؟ ، طب بص اسمع صلاة النبي حلو؟
_ عليه افضل الصلاة والسلام
= كلمة كمان وهعمل فيك الي عملتهه وأوريهم لايف، انت ايه الدنيا ؟
_ اهدي طيب انا كان قصدي أفخمك
ماما جت جمبي وابتسمت بتصنع وبعد كده همستلي
° هو دا الي خليكي رقيقة؟
= صدقيني كانوا هيتكاتروا عليه وهيبقي اول مهندس أعور في مصر
° هو دا الي خليكي بنت وصوتك ميطلعش؟
= هي دي عيشتي وهو دا حالي طب نعمل ايه يجدعان؟ ° بوظتي الجوازة يمريم؟ ربنا ينتقم منك ومن شورتك
= يست الكل الموضوع مش مستاهل
° مش مستاهل؟ دا شايفك راجل يحبيبت قلبي
= راجل مش مشكلة بس المهم يكون راجل جدع
هغمض عيني وأفتحها مشوفكيش قدامي
جريت طلعت علي البلكونة ف جم ورايا بنات خالتي
ليلي : كلمتيه علينا؟
= اه ، محتاج مهلة يفكر ، الصراحة ؟ الولد عنده حق
سلمي : انتي هتهزري يمريم؟
= اصل بتتعاملوا انكم شوية وانتوا الي هتتقدموله ، اتقلوا شوية
إنجي : نتقل ايه؟ انتي مش فاهمة الي هيختارها هتبقي ايه؟
فكرت دقيقة وجاوبت = مراته ، مثلا ؟
شهد : مش بس كده ، مفيش جوازة في العيلة زي الجوازة الي هتحصل دي ، مينفعش تقل لو حس إن واحدة فينا بتتقل عليه مش هيفكر فيها اصلاً
= ربنا يعينكم ، أنا عملت الي عليا وزيادة ، هو يختار بقي الي هو عاوزها أنا مليش دعوة ب حاجة تاني
_ لو سمحتوا
لفوا وشهم لقوا احمد ، ليلي : ايه جعان؟
_ لاء أنا..
شهد : محتاج تشرب حاجة ؟
_ لاء في الحقيقة كنت..
سلمي : عاوز ايه وانا أعملهولك
زعق _ عاوزكم تسكتوا، ممكن تخرجوا برا؟ عاوز مريم في كلمتين
= طبعاً مش هتسمعوا كلامه ، مفيش واحدة تتحرك من مكانها، مفيش راجل يمشوا كلمته عليكم
خرجوا في اقل من دقيقه ف رجعت بصيتله
= أنا في نص التيشيرت من الإحراج والله ، يعني معني كلمة جارية
ضحك وبعدين بصلي _ حقك عليا
روحت وقفت في اخر البلكونة وانا ببص قدامي ، جه وقف جمبي _اه ، كنت عارف انها مش سهلة
=..
_ حقك عليا مكنش ينفع أسالك عن حاجة تخصك ، بس انا كنت فاكر أننا لسه زي ما احنا ، كنت زمان بسألك عن كل حاجة ، متزعليش
= حصل خير
سكت وفضلنا واقفين في البلكونة ، مسكت الفون ونشرت حكاية جديدة _ انتي بتنزلي علي الفيس؟
= يعني ، مش علي طول
جالي نوتفيكيشن غيرت ملامح وشي كلها ، ( حفلة توقيع الرواية بعد تلت ايام )
= مش معقول!
طلعت الصالة وانا بتنطط من الفرحة حفلة توقيع الرواية بتاعتي كمان تلت ايام يماما
كل العيلة بدأت تتلم علي صوتي ، وقبل ما أي حد يبارك ، بابا سبقهم كلهم ° هتبقي فين؟
= في.. القاهرة
° ومين قالك انك هتروحي؟
= بابا طبيعي اروح ، دي الرواية بتاعتي!
° أنا معنديش بنات تسافر برا البلد لوحدها
= بس القاهرة مش بعيد أوي، أنا ممكن اروح بالقطر
° مش هتروحي ، أنا كنت رافض من الاول الي بتعمليه، ماسكة في حاجة عبيطة ومصدقاها وقولنا ماشي معلش سيبها بكرة تعقل ، لكن تسافري لوحدك ؟ دا الي لا يمكن أبداً
رديت وانا بعيط = ارجوك يا بابا ، أنا مينفعش مروحش ، دا اهم يوم بالنسبالي ، أنا مستنية اليوم دا من تمن سنين
° انتي الي اختارتي ، انتي الي فاشلة في كل حاجة حتي في اختيار مسار حياتك
صوت شهقات عياطي بدأت تعلي ، جريت علي الباب وفتحته وطلعت علي سطح العمارة ، حلمي الي بيني وبينه خطوة واحدة مش عارفة ألمسه بعد ما حسيت إن الدنيا كلها بين إيديا!!
_ مريم؟؟
= انت ايه الي مطلعك؟
_ اهدي مفيش حاجة ، مينفعش تفضلي هنا ، انزلي تحت كلهم قلقانين عليكي
= محدش اعترض حتي علي كلامه ، محدش في الي بتقول قلقانين عليا فكر يرد عليه
_ مينفعش حد يرد علي ابوكي
زعقت = عشان خايفين وانت كمان جبان زيهم ، سيبني لوحدي
نزل ف رجعت بصيت قدامي ، بعد ساعتين متواصلين من العياط نزلت وروحت بيتنا ، دخلت علي اوضتي من غير ما أكلم حد فيهم ، كنت كل شوية افتح الرسالة واقرأها وأعيط تاني ، وافهم حقيقة إن الاحلام طلعت مبتتحققش .
نمت من غير ما احس وصحيت علي صوت ماما
° مريم؟ اصحي خالتك سحر عوزاكي برا
قومت وطلعت الصالة = ازيك يخالتو؟
° الحمد لله يحبيبتي ، كنت عوزاكي في خدمة
= أكيد، اتفضلي
° انتي عارفة إن احمد خلاص هيشتغل وهيفتح شركة هنا عشان مش هيسافر تاني ف كنت عوزاكي تروحي معاه المكان الي اختاره عشان يفتح الشركة فيه
= ليه؟
° عشان الصراحة مش واثقة أنه ممكن يختار مكان يليق بيه ، انتي ليكي نظرة في الديكور والمباني ف عشان كده جيتلك
= أه اكيد يا خالتو مش مشكلة ، هو فين؟
° تحت في العربية
= طيب انا هدخل ألبس
دخلت لبست ونزلت ، فتحت باب العربية وركبت وانا ساكتة _ ازيك يا مريم؟
=..
_ أنا قولت ل امي متعبكيش بس هي أصرت وقالت انك بتفهمي في الحاجات دي وممكن تقولي رأيك فيها
= مفيش مشكلة
ساق ووصلنا المكان ، دخلنا الشركة وبدأ يشرحلي هو ناوي يعمل ايه بالظبط
= بس كده مش هتشد الموظفين عشان يشتغلوا فيها
_ قصدك ايه؟
= يعني لازم تعمل صلاحيات عشان تجذب المهندسين الكفؤ الي هيقدموا في الشركة ، يعني مثلاً مساحة المكاتب صغيرة جداً، لو مهندس خبرة مستحيل هيرضي يقعد فيه ، توسع المكاتب وتحط مراوح أكتر عشان الحر وميخملوش بسرعة ، وواحدة واحدة الشغل همشي إن شاء الله ويكبر وتوصل للي انت عاوزه
_ أنا مش عارف اقولك ايه
= ولا حاجة ، مبروك عليك ، يارب تكون فتحة خير
_ متشكر أوي
= ممكن تروحني؟
خرجنا وركبنا العربية ، بصلي ف بصيتله ب استغراب
= مش هتسوق؟
_ بصي في المرايا
بصيت في المرايا وبعد كده بصيتله
_ عينك وارمة من كتر العياط
= من قلة النوم بس ، لما اروح هنام وهبقي أحسن
_ فاكرة لما قولتلك إن هيحصل حاجات تخليكي متكمليش؟
دمعت = واهي حصلت ، المرادي مش عارفة اعمل اي حاجة ، هو عمره مشافني غير فاشلة وانا دلوقتي مصدقاه ، ممكن تسوق؟ أنا بجد محتاجة أروح
ساق ووصلني ، نزلت من العربية وطلعت علي أوضتي ، كان فيه تجمعات في العيلة بس مكنتش بروح ، ماما مضغطتش عليا زي كل مرة عشان شيفاني طول الوقت ساكتة ، بعيط ، ومش عاوزة حتي أكل من وقتها .
النهارده حفلة التوقيع ، هو ينفع الكاتبة متحضرش؟ دا هيوقع مبيعات الرواية! ، كنت قاعدة ولأول مرة احس اني عاجزة مش في ايدي أي حاجة اعملها .
الي عاملة الحفلة رنت عليا ، مسحت وشي وانا برتب هقولها ايه وبفكر في أي عذر
= أيوة؟
° بأكد عليكي تكوني موجودة الساعة اربعة النهارده في الحفلة يا مريم ، كتير جاي مخصوص عشانك
= أنا للأسف مش هعرف أجي
° أفندم؟ طب والحفلة؟ دي معمولة مخصوص عشان الرواية بتاعتك
= أنا آسفة، صدقيني غصب عني
° أنا مش هعرف ألغي حاجة ، انا بعتلك الرسالة بعد ما كنت جهزت كل حاجة
=..
° طيب ، ممكن اقدر أقولهم أي سبب لعدم وجودك بس يارب ميأثرش علي اي حاجة بعد كده
قفلت معاها وعياطي مالي وشي ، كانت أول بداية حقيقية ليا لدرجة اني مكنتش مصدقة اني عملت كتاب وبيتباع والناس بتبعتلي رأيهم فيه .
طلعت عشان اغسل وشي لقيت احمد في الصالة ، قام ووقف قدامي
_ هتروحي الحفلة بتاعتك ب وشك دا؟ ليه الرواية رعب؟
= سيبني في حالي يا احمد مش وقت هزار
_ أنا مش بهزر ، ادخلي إلبسي عشان يدوب نوصل علي ميعاد الحفلة بالظبط
= انت بتقول ايه؟ هنروح إزاي؟؟
_ مش باباكي كان معترض انك تستافري لوحدك؟ خلاص مفيش مشكلة أنا اقنعته اني هسافر معاكي وأخلي بالي منك وبالنسبة للمواصلات ف هنسافر ب عربيتي احسن من القطر عشان يبقي أمان أكتر
= انت هتعمل كده؟ طب وشغلك؟ والسفر دا طريق طويل وهتتعب لو فضلت سايق كل دا
_ مش مهم ، المهم انك تلحقي تمن سنين من عمرك
= يعني بابا قالك أنه خلاص وافق وعارف أننا هنمشي دلوقتي؟
_ دا لو دخلتي تجهزي عشان منتأخرش اكتر من كده
فضلت ساكتة دقيقة ف حرك أيده قدام عيني
= إخبطني ب حاجة
بصيت علي ماما الي غمزلتي ، افتكرت اني ممكن ابقي العروسة رقم خمسة! بس والله لو ايه هروح معاه ، مفيهاش .
° ابقي خلي بالك من مريم يا احمد
_ اكيد يا خالتي
= اخويا والله ، اخويا اخويا يعني
° طب قصري في يومك وادخلي أجهزي
دخلت لبست الفستان الي جبته مخصوص عشان الحفلة ، حطيت ميكب خفيف ولبست هيلز كعبه مش طويل وخرجت = أنا جاهزة
° ما شاء الله اللهم صلي على النبي ، ايه الحلاوة دي
= حبيبتي يا ماما
° هتتحسدي النهارده
= قلبي يحجة
° عروسة زي الفل
= اسكتي يحبيبتي الله يكرمك ، يلا يا احمد؟
نزلنا وبدأ يسوق ، كنت مع كل نسمة هوا احس اني بتنفس وعايشة ، كام كيلو وابقي في المكان الي كنت بحلم بيه هعوز ايه اكتر من كده؟
وصلنا ودخلت بسرعة ، اول ما دخلت منظمة الحفلة بصتلي وهي مش مصدقة ، غمضت عيني ليها إن خلاص معتش فيه مشكلة ، قعدت علي الكرسي في الطربيزة الموجودة في نص المكان ، بدأ الكل يجي عشان أوقعله الرواية ، كنت حاسة اني طايرة أو بحلم ولا يمكن أنا موجودة فعلاً هنا دلوقتي؟ وسط كل الناس الي شايفيني كاتبة ناجحة ؟ كنت عاوزة احس من زمان الي حساه دلوقتي ، كنت خلاص قربت اقتنع اني كنت ماشية ورا وهم واني فشلت اني اثبت للعيلة كلها ان كان عندي حق لما أختارت نفسي .
وسط كل دول احمد كان واقف في جمب ماسك الفون بتاعه ، شكرتهم كلهم ومع اخر كلمة قولتها خلص أحلي يوم في حياتي ، طلعنا من المكان ف سمعت شاب بيندهلي
° مريم؟؟
= أيوة؟
° أنا جاي مخصوص عشان اشوفك ، أنتي بجد بتكتبي حلو اوي
= متشكرة اوي ، مبسوطة إن الكتاب عجبك
° ممكن توقعيلي؟
= اه أكيد
خدت الكتاب منه وكتبت اسمي عليه ° الصراحة؟ مكنتش متخيل تبقي بالجمال دا
_ طب ايه ظابط الدش أنا علي القناة الأولى؟
= أحمد!!
رجعت بصيتله وابتسمت = شكراً علي المجاملة اللطيفة دا من ذوقك ، بعد اذنك عشان لازم اتحرك دلوقتي
° اه أكيد، مبسوط اوي اني لحقت اشوفك
مشي ف رجعت بصيت ل احمد
= كنت هتتخانق معاه!!
_ لاء كنت أشجعه يكمل ، انتي أمانة معايا
= ومحصلش حاجة خلاص هو مشي
_ طيب ، يلا عشان يدوب نلحق نوصل في الميعاد الي قولت ل باباكي عليه
ركبنا العربية وبصلي _ امسكي ، كلي
= أنا تمام
_ انتي مكلتيش خالص النهارده وعارف أن قبل كده مكلتيش بس مرضتش أضغط عليكي واحنا رايحين عشان كنتي متوترة
خدت منه الأكل = متشكرة يا احمد ، مش عارفة اقولك ايه
ساق وأداني فونه _ بعرف أصور حلو؟
شوفت الصور الي صورهالي لما هو كان قاعد، بصيتله ورفعت حاجبي = حلوة اوي بس.. ليه مجتش نتصور سوا؟
_ هو ينفع؟
وقف العربية ف ضحكت _ يلا وشغلي الفلاش
فضلنا نتصور سوا وصور وهو ماسك الرواية ، خدتها منه وفتحت اول صفحة وكتبت ( اهداء الي من أعاد حلمي للحياة، ل الرجل الوحيد الذي ساعدني ورأي أنني أستحق المحاولة ثانيةً )
بص علي الاهداء وبعدها بصلي وابتسملي
= امممم ، ايه هنفضل واقفين هنا؟
بدأ يدور العربية بس مشتغلتش ، بصلي وابتسم ب خوف
_ احتمال كام في المية تبقي خرجتنا بكرة الفجر لو قضينا الليلة هنا؟؟
= نعم؟؟؟؟؟