_إنت مضايق ليه طيب؟ 

_مش مضايق، انا خايف عليكي 

_من أخوك؟ 

_من الدنيا. 

معرفتش أرد عليه، أو كنت بحاول أستوعب كلامنا. 

أتنهد بسرعة وأتكلم بنبرة أخف 

_بصي يا ليل، أدهم أخويا طايش تصرفاته متهورة ممكن يعمل أي حاجة تضرك من غير ما ياخد باله، إنتي كبرتي دلوقتي والمفروض فاهمة وعارفة كل التصرفات بتاعته دي لو دلت علي حاجة فـ هتدل علي حاجة وحده بس. 

بصيت بإستغراب من تفكيره 

_لا مش هتدل علي حاجة يا يحيي، هو ميعرفنيش لسه، هو بس بيحاول يكون قريب مني واللي فهمته من شخصيته أنه شخص عفوي أجتماعي، معاك حق أن تصرفاته متهورة بس هو بيعاملني كـ قريبته أو كـ أخت 

_كـ إيه ياختي، بصي يا ليل أنا مش عاوز أفقد أعصابي من الآخر كده التصرفات دي متحصلش تاني وتقصري معاه. 

_ماشي مش مشكلة بس بما إني هقصر معاه وسعلي كده عشان همشي، عشان تصرفاتك دي لو هتدل علي حاجة فـ هتدل علي حاجة وحده بس. 

كنت همشي بس مسك إيدي ورجعني مكاني تاني 

_هو إيه هو ده، النقاش مش بيبقي كده، أنا خايف علي مصلحتك. 

_مصلحتي أنا أدري بيها ومعلش سيب إيدي. 

كان هيتعصب عليا بس حاول يهدي نفسه وحرك راسه الناحية التانيه وبعدين رجع بَصلي 

_إنتي دلوقتي عاوزة إيه، إيه اللي يرضيكي؟ 

_إنك تسيبني أمشي. 

_مش هتمشي، وكلامي هيتنفذ يا ليل سميها زي ما تسميها بقا تحكم خوف.. 

_غيرة. 

خرجت مني من غير ما أعمل حسابي. 

سكتت مستنية منه رد وقلبي صوته بقا عالي. 

قرب مني أكتر ونبرته بقت أوطي 

_آه غيرة هتعملي إيه بقا. 

توهت في عيونه وهي قريبة مني بالشكل ده، ظهرت مني أبتسامة خفيفة بس حاولت أتحكم فيها 

_يعني إيه بتغير؟ 

_يعني تلمي نفسك أحسنلك. 

_وإن ملمتهاش؟ 

_هلمها أنا. 

هربت بعيوني وبَصيت للناحية التانية وحاولت أداري ضحكتي. 

بعد عني وساب بينا مساحة كويسه 

_أضحكي متخبهاش. 

_مبضحكش. 

أبتسم هو أبتسامة أدفع عمري بس تفضل علي وشه علطول. 

_طيب يلا نروح نقعد معاهم. 

مشينا جنب بعض ووقفته قدام السوبر ماركت عشان نشتري. 

_عاوزة حاجة معينة أجبهالك. 

_لا شكرا. 

أخد العصير والبسكوت ووصلنا ليهم 

خالو أول ما شافنا أبتسم 

_دلوقتي عرفت لو عاوزين تعرفوا يحيي ماله ابعتوله ليل. 

ضحكت علي جملته وبصيت له كان باصص عليا ومبتسم. 

حطيت كام خصلة من شعري ورا ودني وبصيت لمرات خالو 

_جبنالك عصير أهو. 

_تسلمي يا عيوني. 

قعدنا وبدأنا نتكلم ونضحك، أدهم أقترح علينا 

_معايا كوتشينه يلا نلعب. 

قسمناها علينا وبدأنا نلعب الشايب.. 

يحيي خسر فـ ضحكنا كلنا عليه ومامته أتكلمت 

_يلا نحكم عليه دي فرصه بتيجي فالعمر مرة. 

ضحكنا وبدأنا نفكر مع بعض. 

اتكلمت مامته بحماس. 

_أحنا مش هنخليك تعمل حاجه، أحنا هنسألك سؤال وترد علينا من غير كذب. 

_حلو ده، قولي يا أمي عاوزة تعرفي إيه. 

_في حد شاغل قلبك يا واد ومش قايلي؟ 

كلنا كنا مستنين أجابته بس أنا أكتر وحده، كل حاجه فيا كانت منتبهه وبصتله بفضول. 

نظراته جات عليا أول ما مامته خلصت كلام وأبتسم بخفه. 

_مكنش فيه. 

_ودلوقتي؟ 

لسه عيونه متثبته عليا. 

هربت أنا بعيوني بتوتر

_بقا فيه. 

مامته شهقت بخفة ووجهت كلامها لخالو 

_شايف يا إبراهيم، الواد بيخبي عليا.

رجعت عيونها تاني عليه 

_مين دي يا يحيي، قولي بس وأحنا نخطبهالك علطول هي هتلاقي زيك فين. 

_ماما إنتي قولتي سؤال واحد وأرد من غير كذب خلاص بقا. 

_شايف يا إبراهيم أبنك بيكلمني ازاي. 

_ما تسبيه يا هناء. 

ضحك خالو وجهه نظراته عليا. 

_ده يوم الهنا، بس هو يقول. 

أتوترت أكتر وأنقذني أدهم. 

_خلاص عرفتوا اللي عاوزين تعرفوه يلا دور تاني بقا. 

لعبنا تاني والمرة دي كانت علي أدهم حكمنا عليه يروح يحضن الراجل اللي قاعد جمبنا ونفذها وقعدنا نضحك عليه. 

اليوم خلص وسط ضحكنا ولعبنا، ووسط نظرات يحيي ليا ومراقبته لكل حاجه بعملها. 

حاجة جوايا كانت فرحانه ومش مصدقة كل ده. 

ركبنا أنا وهو العربية تاني عشان نروح بس المرادي بشعور مختلف. 

كنا ساكتين، كنت قاعدة براقب الطريق، أو بحاول اراقب الطريق وأنسي وجوده جنبي لوحدنا! 

وصلنا للبيت وبعد ما قعدنا شوية ما بعضنا كل واحد بدأ يروح لأوضته. 

روحت المطبخ الأول عشان أخد مايه وفاكهه أتسلي عليها وأنا قاعده بكتب الرواية بتاعتي بما إني مبسوطة أنهارده. 

عرفت أنه دخل ورايا من ريحته فـ ابتسمت من قبل ما أشوفه. 

اتكلمت وانا لسه بقطع الفاكهه في الطبق 

_كل ما أروح حته تيجي ورايا. 

سمعت ضحكته 

_بس أنا جاي أخد مايه. 

أخدت الطبق والمايه وبصتله

_مفهوم مفهوم.

كنت همشي بس وقفني صوته 

_هو إنتي هتنامي دلوقتي يعني؟ 

أبتسمت 

_لا. 

حط إيديه علي شعره وهو بيظبطه 

_طب تيجي تقعدي معايا في الجنينة؟ 

بَصتله بتفكير وبعدين أتكلمت

_مفيش مشكلة. 

اخدنا المايه والطبق وطلعنا قعدنا علي الأرض وبصينا للسما. 

الجو كان هادي وفي نسمة هوا لطيفه. 

أتكلمت و أنا ببص للسما 

_ لو جايبني أقعد أراقب السما قولي. 

ضحك وبصلي. 

_أمتي كبرتي كده. 

أخدت قطعة بطيخ من الطبق بالشوكة وأتكلمت. 

_من زمان. 

_أزاي مكنتش بشوفك. 

بَصلته أنا كمان وبدأت أحس برعشة في إيدي.

_مكتوبلنا نتقابل دلوقتي. 

_معاكي حق. 

سكتنا شوية بس رجع يتكلم تاني 

_ليه مش عاوزة تقولي إن حسن اللي عمل فيكي كده؟ 

أتنهدت بخوف من سيرته بس. 

_عشان دي حاجة إنت مقتنع بيها لوحدك. 

_مفيش حرامي بيعمل كده يا ليل.. العلامات اللي عليكي دي ضربات غل وحد قاصد يدغدغك بالشكل ده. 

_معنديش أجابة. 

_بس أنا عندي، حد جيرانكم قالي أنه أتعدي عليكي بالضرب وسمعوا صوتك..أنا عارف يا ليل وقالب الدنيا عليه وهندمه علي اليوم اللي كرر يلمسك فيه. 

بَصتله وأنا مش مصدقة ودموعي بدأت تتجمع في عيوني. 

_حسن شراني ومش هيسكت. 

_وأنا جاهز.

هربت دموع من عيوني، مد إيديه علشان يمسحها من علي خدي. 

_العيون دي متستاهلش تنزل دموع بالشكل ده. 

_هو أنت إيه حكايتك؟ 

جاوبني بضياع 

_مش عارف. 

إيديه سابت خدي وبَص بعيد، 

سكتت ورجعت أبص تاني للسما 

الجو بقا متوتر وبدأ يبرد 

أتكلمت 

_أنا هطلع أنام، تصبح علي خير 

ظهرت أبتسامة خفيفه علي وشه وأنا مشيت بسرعة 

كنت بس محتاجة أوضتي دلوقتي. 

قفلت باب الأوضه بالمفتاح وقعدت علي السرير بحاول أجمع أحداث النهاردة. 

مسكت موبايلي وشوفت كومنتات كتير علي الصورة اللي نزلتها.

أبتسمت علي كلام البنات وبعدين قفلت الموبايل ودخلت الحمام 

أخدت شاور حاولت أهدي نفسي بيه وخرجت قعدت علي السرير وبدأت أكتب في الرواية بتاعتي. 

كنت بوصف يحيي وحركاته وكلامه، كتبت مشهد النادي بتاعنا بكل شغف وخرجت كل مشاعري علي هيئة حروف. 

غلبني النوم بعد ساعتين وسيبت موبايلي ونمت. 

تاني يوم نزلت متأخر شوية عن الميعاد بس كانوا هما كمان لسه محضروش الآكل. 

قعدت في مكاني وقعد جنبي أدهم 

بصيت ليحيي اللي كان قاعد من بدري. 

نظراته قالت كلام كتير. 

دورت علي حجة أقوم بيها من جنبه. 

_هقوم اساعدهم في المطبخ 

قومت بسرعه ولمحت أبتسامة يحيي 

روحت للمطبخ وبدأت احول معاهم الاطباق 

مسكت ماما قبل ما تروح تقعد

_بالله عليكي يا ماما أقعدي مكاني 

بصتلي بإستغراب 

_ليه؟ 

_مش حابة أقعد جنب أدهم، بيتكلم كتير وبصدع، معلش يا ماما 

_حد يقول كده علي السُكره ده

_أنا، يلا بقا. 

سمعت كلامي وراحت قعدت جنبه ومرات خالي قعدت جنبها. 

مكنش فيه مكان غير جنب يحيي فـ روحت قعدت جمبه. 

بدأنا ناكل ومال هو علي ودني واتكلم بصوت واطي

_شاطرة. 

حاولت أداري ابتسامتي وبدأت آكل. 

فجأة الباب خبط وأدهم قام يفتح. 

ظهرت بنت لابسه بلوزة سوده قصيرة وبنطلون جينز ونضاره مداريه نص وشها 

أتكلمت بنبرة حسيتها متكبرة. 

_جوزي فين؟ 

يتبع..