مالك: أنا مكنتش متوقع كده.. بس في النهاية ده قرارك.. بس أتمنى تكوني مش زعلانة مني..

خديجه: لا.. مش زعلانة.. وشكرًا على تفهمك..

في اللحظة دي دخل صبري الكافيه وقال:

صبري: فيه إيه يا ولاد واقفين كده ليه؟.. كمان شفت مها ماشية بسرعة.

مالك: في موضوع حصل.. وأنا مشيت مها.

صبري: ممكن أعرف الموضوع؟

ساره: أنا هحكيلك يا مستر صبري..

ساره حكتله كل اللي حصل من أول ما مها خدت المشروب، لحد ما اعترفت إنها هي اللي حطت الشطة.

صبري بص لخديجة، لقاها واقفة ساكتة وعينيها مليانة زعل.

صبري: تعالي يا بنتي.

خديجة قربت منه وهي متوترة.

صبري: أنا آسف على اللي حصل معاكي.

خديجه بسرعة: حضرتك متعتذرش.. حضرتك معملتش حاجة.

صبري: بس حصل ظلم ليكي جوه مكاني، وده يزعلني قبل ما يزعلك.

خديجة سكتت.

صبري: بصي يا بنتي.. الغلط وارد من أي حد، لكن الظلم هو اللي مينفعش يتكرر.

وبص لمالك وقال:

صبري: ومالك غلط لما استعجل وحكم قبل ما يتأكد.

مالك: عندك حق يا بابا.

صبري: لكن برضه أول ما عرف الحقيقة، اعترف بغلطه ومجاملش على حساب الحق.

وبص لخديجة تاني وقال:

صبري: وأنا بطلب منك متخليش موقف زي ده يخليكي تسيبي مكان تعبتي فيه، وحققتي فيه أول نجاح ليكي.

خديجة بصت لمالك، وبعدها بصت لصبري وقالت:

خديجه: أنا زعلت... مش علشان الكلام... زعلت علشان حسيت إن محدش صدقني.

مالك قرب خطوة وقال:

مالك: وأنا غلطت في حقك...انا عارف بس انا اهم حاجه عندي شغلي عشان تعبت فيه..فأي غلط بيحصل..بيبقي صعب بالنسبه لي..

صبري ابتسم وقال:

صبري: خلاص بقى... هو عرف غلطه، وأنا مش عايز أشوف الغلط ده تاني يا مالك..الا الظلم..قولتي ايه يا خديجه..

خديجة ابتسمت ابتسامة خفيفة وقالت:

خديجه: خلاص... حصل خير.

مالك بابتسامة: يعني هترجعي..

خديجه: امم..اه هرجع...

ساره جريت عليها وحضنتها بفرحه..وقالت: احلي ديجا في الدنيا..

خديجه بابتسامة: حبيبتي يا ساره..انتي جدعه...بجد يا بخت احمد بيكي..

احمد بص لساره وقال بحب: اه والله يا بختي..

مالك: احم احنا هنحب هنا ولا ايه..يلا يا ابو حميد علي شغلك..

احمد: حاضر يلا يا ساره..

ساره: يلا...

مالك قرب من خديجه وقال:

احنا كده اتصفينا ولا ايه..

خديجه: اه..خلاص مفيش حاجه..

مالك: صافي يا لبن..

خديجه بابتسامة: حليب يا اشطاا...

مالك ضحك وقال : تمام..تعرفي نفسي في ايه دلوقتى..

خديجه: نفسك في ايه..

مالك: عايز تعمليلي كوبايه من المشروب الجديد ده..

خديجه: حاضر..بالشطه بقي بس المرادي انا اللي هحطها...

مالك ضحك وقال: واضح انك صفيتي..

خديجه: جدا...لا متقلقش هعملك من غير شطه..

مالك: ايوا كده..مستني..

خديجه بابتسامة: حاضر..هروح اعمله..

مالك: تمام..وفضل باصص عليها وهي ماشيه وابتسم من غير ما يحس....

خديجه: انا جيت يا تيته..

فاطمه: عملتي ايه يا حبيبتي..ربنا كشف الحقيقه..

خديجه: اه الحمد لله يا تيته..واستاذ مالك اعتذر وكنت رافضه اكمل..بس استاذ صبري اقنعني..

فاطمه: الحمد لله يا حبيبتي..ربنا كريم..يلا ادخلي غيري...وتعالي عشان ناكل..

خديجه: حاضر ودخلت الاوضه..ورمت نفسها علي السرير بتعب وافتكرت مالك..وابتسمت..سمعت صوت موبايلها بيرن..باصت في الموبايل وابتسمت..

إسراء: الو يا ديجا..

خديجه: إسراء..عامله ايه..

إسراء: بخير الحمد لله وحشتني اوي يا ديجاا..

خديجه: وانتي والله وحشاني اوي..

إسراء: طيب يا ستي..ايه رأيك تيجي عندنا مناسبه..

خديجه: مناسبه ايه..

إسراء: مش انتي عارفه..ان ادهم عنده ابن..بقي عنده اربع سنين..وعاملين له عيد ميلاد..وعايزاكي تيجي واهو تتعرفي عليه هتحبيه اوي...

خديجه: طيب هو امتي...

إسراء: انهارده الساعه سبعه...

خديجه: انهارده..

إسراء: اه تعالي بقي يا ديجا..واهو تغيري جو..

خديجه: حاضر هاجي..

إسراء: طيب مستنياكي..واهو نتكلم شويه بقالك اسبوع مرنتيش عليا..

خديجه: اه فيه حاجات عايزه احكيهالك..

إسراء: وانا كمان...متتأخريش بقي..

خديجه: تمام..

إسراء: يلا سلام..

خديجه: سلام.......

....

إسراء: ادخلي يا خديجة... البيت نور.

خديجة: ده نورك...يا حبيبتي..

إسراء: هاتي حضن بقالي كتير مشفتكيش..

خديجه حضنتها وهي مبتسمة..

إسراء: يلا ادخلي...

دخلت خديجة وهي ماسكة الهدية، ولسه بتبص على الزينة...

فجأة سمعت صوت طفل بيجري وهو بيقول:

مازن: خديجة!

خديجة لفت بسرعة، وأول ما شافته فتحت عينيها بدهشة.

خديجة: مازن!

جري عليها وحضنها.

مازن: انتي جيتي!

خديجة شالته وهي بتضحك.

خديجة: يا حبيب قلبي... إنت هنا؟

إسراء بصتلهم باستغراب.

إسراء: هو إنتوا تعرفوا بعض؟

خديجة: أيوه... ده جه الكافيه اللي بشتغل فيه قبل كده، وقعدنا نهزر مع بعض.

إسراء ابتسمت وقالت:

إسراء: سبحان الله... الدنيا صغيرة أوي.

خديجة وهي لسه باصة لمازن قالت باستغراب:

خديجة: بس... هو ده ابن أدهم؟

إسراء هزت راسها: ايوه..

خديجة: غريبة بجد... أول مرة أعرف.. ثانيه يعني كده....

وفي اللحظة دي اتفتح باب الشقة.

مالك دخل وهو ماسك كيس فيه هدايا.

أول ما رفع عينه...

اتفاجئ بخديجة شايلة مازن.

مالك باستغراب: خديجة!

خديجة بصتله هي كمان واتفجأت..: استاذ مالك!

مازن بفرحة:

مازن: عمو مالك... بص خديجة جات.

إسراء بصت لمالك وقالت:

إسراء: تعرفها؟

مالك ابتسم وقال:

مالك: دي خديجة... شغالة معايا في الكافيه.

وفي نفس الوقت خرج أدهم من أوضة الصالون.

أدهم: مين اللي جه؟

إسراء ابتسمت وقالت:

إسراء: دي خديجة... صاحبتي اللي كنت بكلمك عنها.

أدهم رحب بيها، وبعدها بص لمالك وقال وهو بيضحك:

أدهم: واضح إنكم كلكم تعرفوا بعض.

صبري جه هو و ساميه...

مازن بفرحة: جدو ..تيته..

صبري شاله وقال: كل سنه وانت طيب يا زيزو...

ساميه قربت منه وباسته وقالت: حبيب قلبي تيته اللي كبر سنه...

إسراء ابتسمت وسلمت عليهم: تعالوا اقعدوا...

صبري لسه هيقعد شاف خديجه..ف بصلها وقال: خديجه..

خديجه: اهلا يا استاذ صبري..

صبري: ايه الصدف الحلوه دي..

إسراء بابتسامة: خديجه اقرب صاحبه ليا...

صبري: مبسوط اني شفتك يا خديجه..دي ساميه مراتي وطبعا مامت مالك..

خديجه بابتسامة: اهلا يا طنط..

ساميه بنفس الابتسامة: اهلا يا حبيبتي..ازيك..

خديجه : الحمد لله بخير..

إسراء: يلا يا جماعة... كل واحد يقعد مكانه علشان هنطفي الشمع 

إسراء: يا مازن... انزل بقى وسيب جدو يرتاح..

مازن: حاضر..خديجه اقعدي جنبي..

خديجة ضحكت وقالت:

خديجة: حاضر يا سيدي.

راحوا ناحية السفرة.

إسراء بصت حواليها وقالت:

إسراء: طيب... خديجة اقعدي كرسي فاضي اهوه..

وبالصدفة كان جنب مالك...

خديجة وقفت ثانية وبصت للكرسي، وبعدين قعدت وهي محرجة شوية...

مازن: يلا يا خديجه اقعدي..

خديجه قعدت...

مالك ابتسم ابتسامة خفيفة وقال:

مالك: شكل الصدف بتحبنا النهارده.

خديجة وهي بتضحك:واضح كده..

قبل ما يكملوا كلام...

مازن جري وقعد علي رجل خديجة.

مازن: أنا هقعد هنا.

مالك بصله وقال بتمثيل الزعل:

مالك: يعني سبت عمك؟

مازن هز راسه.

مازن: آه... علشان خديجة أحلى.

الكل ضحك.

مالك حط إيده على قلبه وقال:

مالك: كده يا زيزو...شوف قلبي اتكسر..

خديجة ضحكت عليه....

مالك بص لها وقال وهو بيبتسم:

مالك: كده خطفتي  الواد مني..

خديجة: أنا معملتش  حاجة...

في اللحظة دي...

أدهم قرب وهو شايل التورتة.

أدهم: يلا يا بطل... استعد.

الكل بدأ يغني:

"سنة حلوة يا جميل..."

مازن طفى الشمع وهو مبسوط، وبعدها بص لخديجة.

مازن: أول حتة ليكي.

خديجة أخدت منه الحتة وقالت:

خديجة: تسلم إيدك يا حبيب قلبي.

مالك مد إيده وقال:

مالك: وأنا؟

مازن بصله ثواني.

مازن: استنى.

الكل ضحك.

راح مازن خد حتة صغيرة جدًا، وحطها في إيد مالك.

مالك: دي؟!

مازن: علشان إنت كبير.

خديجة ضحكت جامد لأول مرة من قلبها.

مالك بصلها، ولأول مرة يشوف ضحكتها بالشكل ده... فضل باصص لها ثواني من غير ما يحس.

خديجة رفعت عينها بالصدفة، لقت مالك بيبصلها.

اتكسفت وبصت في الطبق اللي قدامها بسرعة.

مالك هو كمان أخد باله إنه سرح فيها، فعدل قعدته وقال وهو بيحاول يغير الموضوع:

مالك: يعني كده يا زيزو انا معتش صاحبك..

مازن حضن دراع خديجة وقال بسرعة:

مازن: دي صاحبتي.

خديجة ابتسمت ومسكته من خده  وقالت:

خديجة: وأنا مبسوطة إن عندي صاحب زيك.

إسراء بصت لأدهم وغمزت..، بينما أدهم فهم قصدها وهز راسه وهو بيضحك..

......

إسراء: هو نام..هاتيه وانا اطلعه اوضته..

خديجه: خدي..وطلعت إسراء..

مالك بص علي خديجه لقاها واقفه لوحدها..لسه هيروح لها...ادهم نده وقاله: بقولك يا مالك..تعالي كده..

مالك : حاضر...

إسراء: تعالي يا خديجه اما نقعد نتكلم شويه..

خديجه: ماشي وقعدت...

إسراء: مقلتليش انك اشتغلتي في الكافيه وكمان شفتي مازن..محيكتليش حاجات كتير..

خديجه: والله كنت مضغوطه اوي وبدور علي شغل ومن اول ما اشتغلت في الكافيه حصل كام حاجه كده..مره كبايه وقعت مني..مره تيته تعبت..وبعدين حصل مشكله وسبت الشغل ده كله في اربع ايام...

إسراء: بجد الف سلامه علي تيته فاطمه عايزه اجي اشوفها والله..وبعدين ايه اللي خلاكي تسيبي الشغل..

خديجه حكت لها اللي حصل..

إسراء: هي إزاي كده..وبعدين يا خديجه مرنتيش عليا ليه..كنت هونت عليكي شويه...

خديجه: قلت مزعلكيش..يلا بقي اهو اللي حصل..النونه عامله ايه صحيح..

إسراء: النونه تعباني اوي..

خديجه: انا عايزه اعرف ولد ولا بنت...

إسراء: يلا هانت كلها اسبوعين ونعرف..

خديجه: طيب ربنا يكملك علي خير..همشي بقي عشان الوقت اتأخر وتيته لوحدها..

إسراء: انتي لحقتي يا خديجه..

خديجه: بقالي ساعتين اهوه..

إسراء: طيب هستناكي تيجي تاني..مازن اول ما يقول عايز خديجه الاقيكي هنا..وانا مهصدق طبعا..

خديجه بابتسامة: حاضر..

إسراء: استني..يا مالك انت ماشي ولا ايه..

مالك: اه..عندي مشوار..

إسراء: طيب.......بقولك وانت ماشي ممكن تاخد خديجه في طريقك..

خديجه خبطتها في كوعها وهمست: اسكتي يا إسراء..لا..

مالك : تمام مفيش مشكله..لو خديجه معندهاش مانع يعني..

خديجه: لا ابدا مش عايزه اتعبك..

مالك  بابتسامة خفيفه: لا مفيش تعب ولا حاجه ده نفس الطريق...

إسراء: تمام يا مالك تسلم...

مالك: يلا يا خديجه..

إسراء قربت منها وحضنتها وقالت: حبيبتي يا ديجاا...

خديجه وهي حضنها: ماشي يا إسراء..دنا هنفخك..

إسراء : وانتي كمان هتوحشيني يا ديجاا...سلام..

مالك: يلا بينا يا خديجه..

خديجه : ماشي يلا سلام يا إسراء..

إسراء: سلام..وابتسمت وقالت: يا سلام علي دماغك يا بت يا إسراء..

يتبع....