سمر كانت بنت جدعة وبمية راجل.. دمها خفيف ولسانها طويل ومبتسكتش لحد.. بس طيبة اوي وغلبانة.

عاصم كلمها وقالها فيه شغلانة ليكي هتاخدي فيها مبلغ محترم.. تعالي قابلي فهد.

اتقابلوا في الكافيه.. فهد شاف سمر.. لابسة لبس بسيط وطرحة بسيطة ووشها من غير مكياج كتير.. اول ما قعد قالتله بص يا استاذ فهد.. عاصم قالي انك عايز بنت تمثل انها مراتك.. انا بصراحة مش بتاعة الحوارات دي.. بس انا محتاجة الفلوس عشان عملية امي وعشان مصاريف اختي ايمان في الدروس.. فلو الموضوع بجد ومفيهوش قلة ادب انا موافقة.. بس بشروطي.

فهد استغرب من جرأتها.. قالها شروطك ايه؟

قالتله اولا الجواز هيبقى على الورق بس قدام الناس.. يعني جواز رسمي عشان جدك ميحسش بحاجة بس بيني وبينك مفيش اي حاجة.. كل واحد في اوضة.. ثانيا محدش يلمسني ولا يتعرضلي.. ثالثا المدة تلات شهور بس وبعدها كل واحد يروح لحاله وتديني باقي الفلوس.. ورابعا محدش من عيلتك يهينني ولا يعاملني وحش.

فهد وافق على كل حاجة.. وفعلا راحوا للمأذون وكتبوا الكتاب.. وعملوا فرح صغير اوي في بيت الحاج مختار في المنصورة عشان يفرحوه.. الحاج مختار لما شاف سمر دخلت عليه بالفستان الابيض البسيط قام من السرير من الفرحة.. حضن فهد وقعد يعيط ويقول اخيرا اتطمنت عليك يا ابن الغالي.. سمر كانت بتمثل كويس اوي.. قعدت جنب الحاج وباسته على راسه وقالتله متقلقش يا جدو انا هاخد بالي من فهد ومنك.. الحاج مختار حبها من اول لحظة.

الخطة كانت انهم يقعدوا مع الحاج اسبوع في المنصورة وبعدها يرجعوا القاهرة ويقولوا انهم قاعدين في الفيلا وان الحاج لو عايز يزورهم في اي وقت يجي.

اول اسبوع عدى صعب جدا.. سمر مش واخدة على جو الفيلل والخدم.. وفهد مش واخد على ان فيه واحدة ست في البيت بتقوله انت سايب هدومك مرمية ليه وشيل طبقك.. كانوا بيتخانقوا طول النهار قدام الحاج والحاج يضحك ويقول ايوه كده.. هو ده الجواز ولا بلاش.. ماهو لازم تتخانقوا وتتصالحوا.

بس بعد ما رجعوا القاهرة الدنيا اتغيرت.. الفيلا كانت كبيرة اوي وفاضية.. فهد كان متعود يرجع يلاقيها ضلمة وساكتة.. دلوقتي بيرجع يلاقي صوت سمر وهي بتزعق لايمان اختها في التليفون عشان بتذاكرش.. ويلاقي ريحة طبيخ مالية البيت.. سمر كانت شاطرة اوي في الطبيخ.. كانت بتعمله محشي وملوخية وحاجات عمره ما داقها في حياته غير عند جده زمان.

فهد ابتدا يحب القعدة في البيت.. وبقى يستنى سمر ترجع من عند امها اللي كانت بتروحلها كل يوم تطمن عليها.. وبقوا يتكلموا كتير بليل في الجنينة.. سمر حكتله عن حلمها انها تفتح حضانة صغيرة للاطفال.. وفهد حكالها عن وحدته وازاي هو من جواه مش مبسوط بالفلوس.

في يوم وهم قاعدين سوا جالهم تليفون قلب كل الموازين.. عمته بتقول الحاج مختار خف وبقى زي الفل.. الدكتور قال دي معجزة.. ده قام من السرير وبقى يمشي وياكل كويس.. والاجمل من كده انه قرر يجي يعيش معاكم في القاهرة عشان يبقى جنبكم وياخد باله منكم.

فهد وسمر بصوا لبعض واتصدموا.. الخطة باظت.. ده المفروض كان تعبان ويفضل في المنصورة.. دلوقتي جاي يعيش معاهم في نفس الفيلا.. يعني الكدبة هتتكشف.. يعني لازم يمثلوا انهم متجوزين بجد اربعة وعشرين ساعة.

سمر قالتله يا نهار اسود.. هنعمل ايه دلوقتي؟ هنام ازاي؟ هنمثل ازاي؟ جدك ده مش عبيط ده راجل ناصح اوي وهيقفشنا.

فهد قالها هنتصرف.. مفيش حل غير اننا نكمل التمثيلية لحد ما التلات شهور يخلصوا.. وبعدها نبقى نقول اننا اتطلقنا.

الحاج مختار وصل تاني يوم ومعاه شنطته.. دخل الفيلا وبص حواليه وقال بسم الله ما شاء الله.. بس ايه ده؟ ليه فيه اوضتين مقفولين؟ فين اوضتكم انتوا الاتنين؟ المفروض المتجوزين بيناموا في اوضة واحدة.

سمر اتوترت وقالت بسرعة اصل انا بقلق في النوم يا جدو وفهد بيشخر فقولنا نريح بعض.. الحاج ضحك وقال تشخير ايه؟ ده انا كنت بنام جنب جدتك وكانت بتقولي صوت شخيرك بيجيب اخر الشارع وكنا بننام في حضن بعض.. لا يا حبايبي الكلام ده مينفعش.. من الليلة هتناموا في اوضة واحدة وانا هنام في الاوضة اللي جنبكم عشان اتطمن عليكم.

فهد وسمر اضطروا يناموا في اوضة واحدة.. حطوا مخدات في النص بينهم كسور.. وكل واحد مدي ضهره للتاني.. بس طول الليل مكانوش عارفين يناموا من التوتر.

الحاج مختار مكنش مجرد ضيف.. ده كان صاحب البيت.. كان يصحى الفجر يصلي وينزل الجنينة يسقي الزرع.. وكان يدخل المطبخ يعمل شاي لسمر ويقولها يا بت انتي مرات حفيدي يعني بنتي.. وكان يقعد مع فهد يعلمه ازاي يبقى راجل بجد ويشيل مسئولية.

وجوده خلى فهد وسمر يقربوا من بعض غصب عنهم.. بقوا يفطروا مع بعض كل يوم.. وبقوا يخرجوا التلاتة يتمشوا بليل.. وسمر بقت تحب الحاج مختار اوي زي جدها اللي مات.. والحاج كان بيحبها اكتر من فهد نفسه.. كان دايما يقول لفهد يا واد يا فهد خلي بالك من سمر.. البت دي جوهرة.. اوعى تزعلها في يوم.

فهد ابتدا يحس بحاجة غريبة.. بقى يغير على سمر لما عاصم يهزر معاها.. وبقى يضايق لما تلبس لبس قصير شوية وتخرج.. وبقى يستناها لما تتأخر عند امها ويقعد يتصل بيها كل شوية.

وسمر كمان اتغيرت.. بقت تشوف فهد مش مجرد ولد غني تافه.. شافته راجل حنين وطيب وبيحب جده وبيحاول يبقى كويس.. بقت تفرح لما يضحك بسببها.. وبقت تزعل لما تشوفه متضايق من الشغل.

عدى شهرين ونص.. فاضل اسبوعين والاتفاق يخلص.. فهد كان كل يوم يقول هقولها اني مش عايز اطلق.. بس يخاف ترفضه وتقوله انت فاكرني لعبة؟ وسمر كانت كل يوم تقول خلاص فاضل شوية وهرجع شبرا تاني.. بس كانت بتعيط بليل من غير ما حد يشوفها.

وفي يوم الحاج مختار تعب شوية تاني.. جاله دور برد جامد.. سمر فضلت سهرانة جنبه طول الليل بتعمله كمادات وبتديله الدوا.. فهد صحي الفجر لقاها نايمة على الارض جنب سرير جده وايديها ماسكة ايده.. ساعتها حس انه مش هيقدر يسيبها تمشي ابدا.

تاني يوم الفجر فهد صحى الحاج مختار وقاله يا جدي انا عايز اعترفلك بحاجة.. انا وسمر جوازنا مكنش حقيقي في الاول.. انا اتفقت معاها تمثل انها مراتي عشان تفرحك لما كنت تعبان.. بس والله العظيم انا دلوقتي بحبها بجد ومش قادر استغنى عنها.. وسمر دي احسن حاجة حصلتلي في حياتي.

الحاج مختار بصله وضحك ضحكة كبيرة وقال يا اهبل.. انت فاكرني عبيط ولا ايه؟ انا من اول اسبوع وانا عارف انكم بتمثلوا.. هو فيه اتنين متجوزين بيحطوا مخدات بينهم؟ وانا سامعكم بودني وانتو بتتفقوا على التمثيلية في المنصورة.. بس قولت اسيبكم.. قولت اما اشوف اخرتها ايه.. ولما لقيتكم بتحبوا بعض بجد قولت اجي اعيش معاكم عشان اقربكم من بعض اكتر.. وانا اصلا مكنتش تعبان اوي كده.. انا كنت بتدلع عليكم عشان اشوفكم متجوزين.

فهد اتصدم.. قاله يعني انت كنت عارف كل حاجة؟.. الحاج قاله ايوه يا ابن الكلب يا اللي كنت هتضحك على جدك.. بس يلا.. انا مسامحك عشان جيت واعترفت.

فهد جري صحى سمر وحكالها كل حاجة.. سمر قعدت تعيط وتضحك في نفس الوقت.. قالتله يعني جدك كان بيمثل علينا احنا كمان؟.. فهد قالها شكلها كده جوازة السيزون دي بقت جوازة العمر كله.

راحوا للحاج مختار سوا.. سمر قالتله يا جدو انا كنت جاية تمثيلية بس والله حبيتكم من قلبي وحبيت فهد.. الحاج حضنها وقالها وانا اعتبرتك حفيدتي من اول ما شفتك يا بنتي.. ولو فهد زعلك قوليلي وانا اكسر دماغه.

فهد ساعتها مسك ايد سمر قدام جده وقالها تتجوزيني بجد بقى المرة دي؟ مش تلات شهور.. العمر كله؟.. سمر ضحكت وعينيها مليانة دموع وقالتله ايوه موافقة.. بس المرة دي هتجيبلي شبكة بجد ومهر بجد وفرح كبير في شبرا عشان امي وايمان وريم يفرحوا بيا.

وفعلا عملوا فرح كبير اوي.. واحد في القاهرة وواحد في شبرا.. ريم جت من اسكندرية هي وجوزها.. وايمان كانت طايرة من الفرحة.. وعاصم كان واقف بيغني ويرقص ويقول انا السبب في الجوازة دي.. والحاج مختار كان قاعد في الكوشة جنبهم ولابس بدلة جديدة وفرحان اكتر من العريس نفسه.

وبعد الفرح الحاج مختار فضل عايش معاهم في الفيلا.. وسمر فتحت الحضانة اللي كانت بتحلم بيها بفلوس فهد بس بمجهودها هي.. وفهد بقى انسان تاني خالص.. بقى يروح الشغل بدري ويرجع بدري عشان يقعد مع مراته وجده.. وعرف ان الفلوس عمرها ما كانت بتعمل بيت.. اللي بيعمل البيت هو الحب والدفا واللمة.

تمت بحمدلله