: أنا عايز أعرف مين الاستاذة المحترمة إللي قالت لبنتي كده 

• أكيد سوء تفاهم حضرتك متقصدش حاجة 

: سوء تفاهم أي إللي يخلي واحدة تقول لطفلة أنتي أمك معرفتش تربيكي ووالدتها متوفية، ليه بنتي ترجع بتعيط من المدرسة إللي المفروض بندفعلها فلوس عشان نلاقي إهتمام واسلوب كويس، بس الواضح أن لا في إهتمام ولا في أسلوب كويس 

لقيت رهف إمبارح جاية بتعيط من المدرسة بسبب أن الميس بتاعتها قالتلها أمك معرفتش تربيكي، ورهف أول ما بتيجي سيرة أمها بتعيط مبتستحملش، اخدتها تاني يوم وروحت معاها المدرسة مخصوص عشان أشوف الحوار ده، مفيش كام دقيقة بعد ما قابلت المديرة عشان نشوف الميس إللي قالت كده، دخلت واحدة علينا المكتب واضح من شكلها أنها الميس وأول ما شافت رهف راحت نحيتها .. 

: أنتي بجد زعلتي أنك قولتلك كده؟ 

• ايوة عشان مبحبش حد يجيب سيرة ماما بحاجة 

: وهي فين ماما ؟ 

• ماما عند ربنا 

لقيتها أخدت رهف في حضنها وهي قاعدة جمبها علىٰ الارض، وسابتها وقامت وهي بتمسح عيونها وجت نحيت ما كنت واقف أنا والمديرة .. 

: أنا آسفة علىٰ إللي حصل حقيقي مكنتش أقصد، الموضوع كان فعلاً سوء تفاهم وكنت بهزر معاهم وخرجت مني الجملة دي من غير قصد 

أنا معرفتش أرد عليها بعد إللي قالته واللي عملته مع رهف، ومعلقتش علىٰ أي حاجة تاني، وصلت رهف للفصل بتاعها .. 

: عايزة حاجة يا رهوف! 

• هتيجي تاخدني ولا أركب الباص؟ 

: أنتي عايزة أي؟ 

• أروح معاك 

: فل هتلاقيني مستنيكي، تحبي نتغدى اي النهاردة؟ 

• لا لا لما نروح البيت نعمل مع بعض 

: اتفقنا يلا طيري 

سلمت عليها وطارت راحت الفصل بتاعها، هي دي إللي مصبراني علىٰ كل حاجة بعد والدتها الله يرحمها بعد ما سابتها وهي عندها 4 سنين، ملك عرفت تتعامل مع رهف كأنها مشروع بتستثمر فيه، عايزة تعمل من رهف شخصية مختلفة، كانت عايزة تربيها تربية سوية تخليها تتعامل مع العالم الخارجي بشكل طبيعي من غير انحياز، وأنا بحاول أكمل إللي كانت بتعمله ملك معاها، ودايمًا ببقىٰ خايف أني مقدرش أعمل إللي كانت نفسها تشوفه في رهف .

: مكنتش أعرف والله خرجت مني بشكل عفوي

• البت واضح أنها تأثرت جامد

: ايوة كان واضح عليها وانا أول ما عرفت اخدتها في حضني معرفتش أقول حاجة 

• وابوها تلاقيه هزقك طبعًا

: لا خالص متكلمش معايا اعتذرت ليه علىٰ إللي حصل ومنطقش نهائي

• دي صفاء بتقول دخل يزعق ويهلل قولت انا هيمسك أسماء يغسلها

: لا الحمدلله مغسلنيش

• طيب روحي يلا عشان عندك حصة كمان شوية 

: أنا تعبانة أصلًا وعايزة اروح

• تروحي فين مفيش الكلام ده خلصي حصصك

اليوم كان طويل وأنا تعبت وكنت هموت واروح، واتفاجئت بموضوع رهف ووالدها كمان إللي جه معاها عشان يعرف إللي حصل، وأنا حقيقي مكنتش اقصد حاجة، نص الحصة كانت فاضية وأنا كنت بهزر مع الولاد عادي، ورهف كانت بتلعب وخرجت مني الجملة بشكل عفوي وبضحك، بس هي فعلاً بعد ما قولتلها كده قعدت ساكتة ومتحركتش لأخر الحصة، وانا محطتش في بالي أن حاجة زي دي ممكن تعمل مشكلة كبيرة، بس أنا زعلت من نفسي وصعبت هي كمان عليا، فكرة أن واحدة صغيرة عايشة من غير والدتها إللي في سن زي ده محتاجاها جمبها أكتر من أي حد تاني فكرة صعبة جدًا، كل ما أتخيل الفكرة ببقىٰ عايزة اعيط واخدها في حضني، بس حاولت اتماسك لحد ما اليوم خلص وروحت البيت .

لقيت حد بيخبط علىٰ ازاز العربية بعد ما وصلت رهف المدرسة الصبح، ولسه همشي لقيت حد بيخبط علىٰ الازاز، بصيت لقيتها .. 

: صباح الخير 

• صباح النور 

: كنت جاية أعتذر لحضرتك عن إللي حصل مع رهف وانا بجد مكنتش اقصد حاجة ومكنتش أعرف أنها ممكن تأثر عليها بالشكل ده، حتىٰ مكنتش اعرف ان والدتها متوفية

• عمومًا هو واضح أنه كان سوء تفاهم وان رهف فعلاً تأثرت بالكلام لأنها كانت متعلقة بوالدتها جامد

: ربنا يرحمها

• يا رب

: أنا آسفة بجد ورهف أنا هعرف اصالحها بطريقتي المهم حضرتك بس

• أنا بالنسبالي تمام أهم حاجة عندي رهف أنها تبقى كويسة 

: متقلقش 

• مش قلقان يا ميس .. 

: أسماء 

• اتشرفت يا ميس أسماء 

ولبست النضارة ومشيت علىٰ طول، واضح أنها شخصية محترمة فعلاً ملهاش في الحوارات ولا المشاكل، ولكن هو كان مجرد سوء تفاهم وده باين من كتر ماهي بتعتذر على إللي حصل، قفلت الموضوع خالص وكأنه محصلش، ومشيت روحت الشغل عشان الحق اخلص بدري أروح اجيب رهف من المدرسة . 

حسيت أني كنت محتاجة اعتذرله بشكل شخصي عن إللي حصل، وواضح أنه بيحب رهف جدًا وخايف عليها وده بسبب أن والدتها مش موجودة، فهو بيحاول بقدر الإمكان يحافظ عليها، وأنا احترمت ده جدًا واي حد لو مكانه كان هيعمل أكتر من كده ومكنش هيطنش ويكبر دماغه، سلمت علىٰ رهف واخدتها ودخلت بيها علىٰ طول، كنت طول الوقت مركزة معاها وخايفة عليها، وببقى مبسوطة وهي مركزة ومندمجة في الحصة، وسرحت بخيالي وشفت يوسف إبني قاعد وسطهم وبيلعب، كان نفسي أنه يبقى كويس ويقدر يلعب معاهم، بس الحمدلله ربنا يشفيه ويعافيه يا رب .

: الجميل قاعد كده لي؟ 

• زهقانة شوية

: خلصتي إللي وراكي؟ 

• اه خلصت كل حاجة ومفيش حاجة اعملها

: طب ما تيجي نخرج 

• ليه؟ 

: تعالي نجيب أي حاجة مثلا أي رأيك نجيب حلويات ونعدي على جدتك نقعد معاها

• اشطا موافقة

اخدت رهف بعد ما غيرت هدومي وروحنا نجيب حلويات ونعدي على أمي نقعد معاها شوية عشان ليا فترة مروحتلهاش، وهي بيصعب عليها لما بغيب عنها ومبسألش، الساعة كانت عدت 10 بليل وتقريبًا اغلب المحلات قفلت، بس لقيت محل قريب من مدرسة رهف لسه فاتح، نزلت عشات الحقه قبل ما يقفل والحمدلله لسه مقفلش، ولكن الغريب أني لقيت .. 

: ميس أسماء! 

• أستاذ خالد 

: هو أنتي اللي شغاله في المكان هنا؟ 

• لا انا صاحبة المكان

: ده بجد! 

• اه بجد انا إللي بعمل الحلويات بنفسي كمان

: انا كنت فاكر إنك مكتفية بالدراسة والتدريس بس

• لا مأنا عندي شغف تجاه الحلويات 

: لا واضح

• جرب واحكم

: حاضر

اخدت كوكيز اجربها مع ان شكلها كان حلو خالص وهي متزينة بالشيكولاتة من فوق، اكلتها ولقيت طعمها حلو جدًا حقيقي لدرجة أني خلصتها كلها من حلاوتها .. 

: تسلم إيدك بجد

• شغلنا كله هنا بالسمنة البلدي 

: عشان كده الطعم مختلف ومميز

• أكيد عشان لو معملناش كده هنبقى زي اي حد مبنقدمش حاجة جديدة

: طبعًا

قعدت معاها شوية فضلنا نتكلم مع بعض لحد ما نسيت أن رهف معايا ولقيتها داخلة علينا .. 

: اتأخرت كده ليه؟ 

• رهوف إزيك 

: ميس أسماء بتعملي اي هنا

• أنا صاحبة المكان 

: أنتي بتعرفي تعملي حلويات؟ 

• ايوة حتىٰ اسألي باباكي 

ولقيت رهف بتبصلي روحت غمزتلها وفضلت تضحك، سلمنا علىٰ ميس أسماء واخدنا شوية حلويات من عندها ومشينا علىٰ طول عشان نلحق نقعد مع أمي شوية قبل ما تنام، ولكن للاسف نامت رهف مني في الطريق قبل ما نوصل، واول ما وصلنا شلتها وطلعت بيها الشقة فوق واستقبلتنا أمي واخدت رهف عشان تنيمها علىٰ السرير وقعدت أنا معاها في الصالة .

: ماله يوسف بيعمل كده ليه؟ 

• مش عارفة لقيته مرة واحدة وشه بقي ازرق وبيخرج حاجات من بؤقة 

خلصت شغل وروحت البيت علىٰ طول عشان أنام شوية قبل ما اروح المدرسة الصبح، وأول ما دخلت سمعت صوت ريهام أختي بتنادي عليا بصوت عالي عشان اشوف يوسف ماله، لقيت وشه لونه ازرق، ومش بيفتح عيونه، وفي رغاوي طالعة من بؤقة، أول حاجة جت في بالي أن ده تسمم، اخدته وروحت علىٰ المستشفىٰ بسرعة وأنا مغيبة ومش عارفة هعمل أي لوحدي، وصلت المستشفىٰ ودخلوه اوضة العمليات وفضلت مستنية وأنا على نار مش قادرة استنى كتير وعايزة أدخل اشوفه واتطمن عليه، عدىٰ وقت كبير لحد ما خرج الدكتور وأكدلي فعلاً أنه جاله تسمم بسبب حاجة اكلها، خرجوه من اوضة العمليات ودخل اوضة الرعاية وعلقوله محاليل، وفضلت طول الليل قاعدة جمبه مش عارفة أنام من القلق والخوف عليه . 

حاولت اصحي رهف الصبح عشان تروح المدرسة ولكن لقيتها مش قادرة تقوم وبتتدلع، أمي قالتلي سيبها مش هتطلع دكتورة يعني لو راحت النهاردة، سبتها نايمة عند امي وروحت أنا البيت غيرت هدومي عشان أروح الشغل، لبست ومشيت علىٰ طول علىٰ المستشفىٰ، ومكنتش فايق خالص النهاردة وخُلقي كان ضيق جدًا لحد ما قابلت ميس أسماء لقيتها قاعدة على الأرض قدام غرف الرعاية .. 

: أسماء مالك في حاجة؟ 

• يوسف إبني تعب امبارح وقاعدة معاه 

: وقاعدة ليه كده على الأرض 

• مش راضيين يدخلوني 

: طب تعالي 

اخدتها ودخلت اتطمن علىٰ يوسف، كان واخد مسكنات وعامل غسيل معدة بسبب تسمم جاله، دخلتها تقعد معاه ووصيت التمريض عليها محدش يعترضها ويسيبها مع يوسف قاعدة . 

: هخلص إللي ورايا وهجيلك محتاجة حاجة

• لا شكرًا معلش تعبتك 

: لا مفيش تعب تقدري تنامي على السرير إللي جمبه وترتاحي ومحدش هيتكلم معاكي 

• حاضر 

سبتها ومشيت والتعب والارهاق باين عليها، وشكلها منامتش طول الليل، روحت أشوف الكشوفات إللي عندي عشان الحق اخلص واروح العيادة، وقبل ما أروح اتطمن علىٰ يوسف وأسماء . 

: يا حبيبتي هو انا اشتكيتلك

• مش لازم تشتكي علىٰ الأقل عشان رهف

: ورهف هي كمان مشتكتش 

• يابني علىٰ الأقل تبقى متطمن عليها وهتلاقي حد يراعيها 

: وأنا مقصرتش معاها عشان اتجوز واجيب واحدة تراعيها وتربيها وتهتم بيها 

• عمومًا العروسة موجودة مش هتتعب نفسك

: شهد بنت خالك تربية واخلاق وعارفينها ومننا وعلينا وهتصونك والبت متطلقة وكارهة الدنيا بس أنا هقنعهالك ترضى بيك وتتجوزك 

• اخدتهم من علىٰ لساني

: حفظتهم والله حفظتهم وبرددهم كل شوية 

• طب قولت أي؟ 

: لا إله إلا الله 

• سيدنا محمد رسول الله خد بس تعالى طب هشوفلك بنت خالتك طب سحر إللي كنت بتحبها 

أمي محسساني أني عنست مثلًا ولازم اتجوز دلوقتي حالًا عشان ميقولوش عليا إللي عنس اهو، انا راجل اتجوز وخلف ومراته اتوفت، وخلاص مش عايز اتجوز تاني مليش نفس ادخل في علاقة دلوقتي أو عمومًا، ولكن أمي عايزاني اتجوز أي حد وخلاص، وأنا شخص مش فارق معاه أي حاجة ولا مركز مع إللي بيحصل حواليه عشان متأثرش، لأن تركيزك مع إللي بيحصل حواليك هيخليك تتأثر بكل حاجة بتحصل، فضولك بمعرفة الأحداث إللي بتحصل جمبك أو مع أي حد حواليك هيخليك تتأثر باللي بيحصل، هتبقىٰ طول الوقت متأثر بيها ومتأثر بأي حاجة بتحصل كأنها حصلت معاك، مشاعرك هتبقىٰ مباحة دايمًا، ملكش دعوة بجارك إللي طلق مراته، متزعليش علىٰ البنت إللي سابها خطيبها بعد حب خمس سنين وراح لغيرها، ملكش دعوة بالراجل إللي بيعامل الناس معاملة وحشة، متبصيش علىٰ واحدة حياتها كويسة وتقولي اشمعنا أنا، متشغلش بالك بالواد إللي بيصرف عليه أبوه وأنت طالع عين أهلك في الشغل، أنت وهي هنا مسؤلين عن نفسكم وعن حياتكم بس، اتحطيتوا في ظروف مخترتوهاش، مفيش حد أختار ظروفه ولا حياته، ولكن أنت وهي قادرين أنكم تتعايشوا مع أي حاجة في حياتكم، المهم أنكم متركزوش مع أي حاجة بتحصل حواليكم، متشغلوش بالكم بأي حدث سواء حلو أو وحش، اه لو تقدر تساعد ماشي، تقدر تواسي ماشي، تقدر تقدم أي حاجة ماشي، ولكن بشرط أنك متتأثرش بأي حاجه، لأن ده هيأثر عليك وعلى نفسيتك وعلى حياتك، كل شخص مسؤل عن حياته وظروفه لوحده، إنما مسؤلية وظروف الناس أنت مش مطالب تتأثر بيها . 

: أنا هتجنن بجد يوسف كل شوية في حال شوية كويس وشوية تعبان 

• حتىٰ الدكاترة مستغربة أصلًا 

: والتحاليل مش مبينة أي حاجة أنا تعبت بجد مبقتش عارفة ماله

• أنا كلمت حد من إللي معايا في الشغل وقالولي علىٰ واحدة كويسة 

: مين دي؟ 

• بيقولوا عليها بركة كده وبتشفي الناس 

: دجالة يعني

• لا مش دجالة بس هي كويسة وبتشفي اي حد يروحلها وعندها علاج لكل حاجة

: لا يا ريهام مستحيل أروح 

• جربي مش هتخسري حاجة 

فضلت ريهام تزن عليا عشان نروح للي بتقول أنها مبروكة دي وبتشفي اي حد يروحلها، ولكن انا مش مقتنعة بالكلام ده اصلا ولا بصدق فيه، ولكن بعد زن كتير من ريهام اخدت يوسف وروحنا لست دي يمكن تكون بتعرف حاجة . 

دخلنا المكان وكان عبارة عن بيت قديم من بتوع زمان، والانوار بتاعته كله مصابيح غاز من بتاعت زمان بردو، دخلنا والمكان كان له رهبة كده أول ما دخلت وقلبي اتقبض من شكل المكان وريحته الغريبة إللي بتسد الرئة، دخلنا الاوضة إللي كانت فيها الست وقعدنا على طول من غير ما تقول أي كلمة، ولسه ريهام هتتكلم ولكن هي سبقتها .. 

: متقوليش يا ريهام حاجة انا عارفة سبب مجيتكم هنا أي تعالى يا يوسف 

لقيتها بتشاور ليوسف مكنتش هسيبه بس لقيت ريهام بتقولي متخافيش سيبيه، اخدته وقعد جمبها وحطت ايديها عليه وفضلت تتمتم بكلمات مش مفهومة بصوت واطي، غمضت عينيها وهي بتتكلم وفجأة فتحت عينيها بشكل مرعب، وشالت ايديها بسرعة من علىٰ رأس يوسف ورجع قعد جمبي .. 

: إبنك ممسوس

• يعني أي؟ 

: يعني في جن ملازم إبنك وكان سبب أنه يحرره من مكانه

• طب مش فاهمة يعني هتقدري تخرجيه؟ 

: هو طالما اتحرر لازم يفضل ملازم شخص وابنك هو إللي كان قدامه

• يعني مفيش حل؟ 

: لا في 

• أي هو؟ 

أول ما قالتلي الحل قومت وبصيتلها بصة بقرف ومشيت علىٰ طول وسبت ريهام قاعدة معاها، دي فعلاً اتجننت أنا مستحيل أعمل كده، وأكيد في حل، ويمكن أصلا تطلع نصابة ومفيش حاجة عنده .

كنت قاعد فاضي بعد الشغل ومكنتش عارف أعمل أي، ولقيت رهف التانية قاعدة مبتعملش حاجة وزهقانة هي كمان، اخدتها وخرجنا روحنا لـ اسماء المحل عشان نجيب حلويات من عندها، بس ده مكنش السبب الأساسي عمومًا ..  

: طب وعرفت تتعامل مع كل ده بعد وفات والدتها 

• حاولت وأمي كانت بتساعدني بصراحة وأنا مكنتش ببقى حابب اتقل عليها لحد ما ظبطت اموري وشغلي كويس وعرفت انظم كل حاجة 

: تلاقي والدتك أنت كمان بتزن عليك عشان تتجوز وتجيب واحدة تقعد مع رهف

• يلهوي دي كل ما تشوف وشي حرفيًا بتكلمني علىٰ عروسة شكل ولا كأنها بتلاقيهم قدامها وبتجيبهملي

: هي خايفة عليك مش اكتر وحاسة بيك واي ام مكانها هتبقى عايزة ابنها يتجوز

• أنا فاهم حاجة زي دي بس لما ابقى محتاج ده فعلاً 

: وانت مش محتاج؟ 

• مش عارف يمكن عشان مفكرتش أنا محتاج ولا لا

: اي المشكلة ادي نفسك فرصة تعرف أنت عايز اي

• انا محتاج اخد فرصة فعلاً 

الواحد فعلاً محتاج ياخد فرصة عشان يشوف نفسه محتاج اي وعايز أي، بدل ماهو بيعمل كل حاجة وهو مش عارف بيعملها عشان مضطر ولا بيعملها وهو عايز، ساعات مش بنشوف نفسنا محتاجين أي من كتر ماحنا مسحولين في حاجات إحنا مش عارفين بنعملها لي، وأحنا فعلا عايزينها ولا لا، حابينها ولا لا، بس بنعملها عشان لقينا نفسنا مجبرين نعملها بغض النظر عن أننا عايزينها ولا لا . 

كانت رهف بتلعب مع يوسف ومبسوطين في المكان، وفجأة دخلت علينا ريهام أختي، أول ما شفتها اتخضيت لأنها أول مرة تجيلي المكان هنا، وأول ما دخلت لقيتها ركزت مع خالد ورهف .. 

: معرفتنيش عليهم يعني

• لا عادي ده والد رهف إللي بديها في المدرسة عندي

: وبتعمل أي هي وابوها هنا بتديهم دروس! 

• عايزة اي يا ريهام؟ 

: جاية افكرك باللي قالته ليكي الست صباح 

• مش هعمل حاجة زي دي مستحيل يا ريهام

: طب وابنك هيخف ازاي والطب مش قادر يعالجه

• يعني صباح هي إللي هتعالجه

: ماهي قالتلك الحل

• ولو كان ده الحل الوحيد في الدنيا مش هعمله

: براحتك

لقيت فضلت تبص علىٰ يوسف ورهف وهما وبيلعبوا، وفضلت مركزة أكتر مع رهف وبعدها بصتلي وابتسمت ومشيت، ابتسامتها مكانتش مريحة بالنسبالي وكنت قلقانة منها، بس حمدت ربنا أنها مشيت من غير أي دوشة .

: لا مش عازماك أنت أنا بعزم رهوفة حبيبة قلبي

• طب وابو رهوفة حبيبة قلبك! 

: مش عارفة بصراحة هيوافق ولا لا

• أنتي أي رأيك؟ 

: يعني طالما رهف هتيجي فـ مينفعش تيجي لوحدها لازم تيجي أنت معاها

• وأنا هاجي معاها عشان مينفعش تيجي لوحدها ولا عشان معزوم معاها

: هتفرق؟ 

• كتير

: طب ماشي معزوم معاها عشان ميهونش عليا معزمكش على عيد ميلاد يوسف

• ماشي شكرًا كتر خيرك 

كنت بكلم أسماء واتس وعزمتني علىٰ عيد ميلاد ابنها يوسف بكره، مش عارف بصراحة حاسس بحاجة غريبة كده بس في نفس الوقت مريحة، واتمنى ميكونش إللي في بالي عشان انا لسه مش عارف هخوض تجربة تاني إزاي أصلًا، مهتمتش بأي حاجة ونزلت تاني يوم أنا ورهف دخلنا محل هدايا جبنا كام هدية كده لـ يوسف وروحنا علىٰ البيت عندهم علىٰ طول، بس المرة دي إللي استقبلتنا مش أسماء .. 

: اتفضلوا اتفضلوا

• أمال فين أسماء ويوسف! 

: موجودين كلهم فوق أنا ريهام اخت أسماء 

• اهلًا بيكي 

دخلت بعد ما سلمنا عليها وطلعنا فوق لقيناهم عاملين حفلة صغيرة كده على القد لـ يوسف، سلمنا عليهم وقعدنا نهيص وسطهم . 

: مكنش في داعي تتعب نفسك 

• دي حاجة مش مستاهلة 

: تسلم حقيقي

مكملناش ساعة معاهم واستأذنت واخدت رهف ومشينا علىٰ طول، حسيت الجو مكنش مريح خالص، وكان في حاجة غريبة مش فاهمها، اخت أسماء مكانتش شايلة عيونها من علينا وخصوصًا رهف، كانت مركزة معاها طول الوقت وهي مع العيال مشالتش عنيها من عليها، وأنا قلقت أصلًا واخدتها ومشينا علىٰ طول . 

: طب اي مفكرتيش بردو؟ 

• ريهام بس بقا وحتى لو فكرت هعمل كده إزاي 

: ماهو الحل قدامك

• فين وازاي هجيبلها طفل وتخليه قربان مكان يوسف

: الطفل موجود بس أنتي إللي مش واخدة بالك 

• قصدك مين! 

: رهف 

يتبع ..