مريم كانت بتجهز في اوضتها عشان تروح شغلها سمعت صوت بره فخرجت تشوف فيه ايه..

سمعت صوت ياسين فوقفت تسمع..

ياسين: بس يا خالتو زينب..فحسيت اني اه انا كويس وشغلي تمام بس مش مرتاح عايز  ابقي وسط اهلي..

زينب: خير ما عملت يا حبيبي..ربنا يوفقك.

ياسين: يارب.

مريم طلعت وقالت: ماما انا راحه الشغل.

زينب: مش تسلمي علي ياسين..

مريم : ازيك يا ياسين..

ياسين بابتسامة: الحمد لله..انتي عامله ايه..

مريم: انا كويسه..

مريم بصت لمامتها وقالت: فيه حاجه ولا ايه؟

زينب: ياسين جاي ياخدني عشان هحود علي خالتك وراحين مشوار.

مريم: امم طيب..انا همشي..

ياسين وقف وقال: استني يا مريم هوصلك في طريقنا..انتي لسه في نفس الشركه صح؟

مريم: اه نفسها..بس مش عايزه اتعبك انا هروح.

ياسين : مفيش تعب ولا حاجه ده نفس الطريق..

مريم هزت رأسها: تمام..

نزلوا وياسين شغل العربيه..

مريم جات تفتح الباب اللي ورا عشان تركب..

زينب: هتركبي فين يا مريم؟

مريم: هركب هنا يا ماما.

زينب: لا اركبي جنب ياسين عشان عايزه خالتك تقعد جنبي..

ياسين ابتسم..ومريم فتحت الباب وركبت جنبه..

وفضلت باصه من الشباك وساكته..

ياسين: مريم تسمعي حاجه..

مريم بصتله : شغل قرآن..

ياسين ابتسم وقال: حاضر..وانتي اخبارك ايه في الشغل؟

مريم: كويس..ركزت في شغلي واتجهدت واترقيت الحمد لله.

ياسين بابتسامة: مبروك..بس اتوقعت لانك طول عمرك شاطره وبتتمسكي بالحاجه اللي بتحبيها..

مريم : مش دايما..يعني لو ملقتش منها اللي انا كنت مستنياه مش هكمل..

ياسين فهم قصدها وقال: بس ساعات لو حاولتي مره تانيه واديتي فرصه كمان..تلاقي احسن من اللي كنت مستنياه..

مريم: بحسها حاجه مش مضمونه..لان لو ملقتش اللي رجعت عشانه الوجع هيبقي اضعاف..

ياسين هز رأسه وقال: واضح انك لسه بتخافي من الوجع 

مريم ضحكت وقالت: لا قلت احبه يمكن يسيبني زي كل حاجه حبيتها..

ياسين فضل باصصلها ثواني..فمريم هربت بعينها الناحيه التانيه..

>>>>>>>>>>>>>>

هنا كانت ماشيه مع صاحبتها راحين الكافيه ومشغوله في الكلام معاها...هوب خبطت في واحد وقهوته وقعت..

هنا: ينهار ابيض..انا اسفه اوي..

عمرو: خلاص حصل خير..

هنا: بس دي وقعت علي الارض..لحظه واحده..هجيبلك غيرها..

عمرو: لا متجبيش حاجه..مليش نصيب اشربها الحمد لله..

هنا: انا اسفه بجد مكنتش مركزه..

عمرو بابتسامة: ولا يهمك..دي كانت اول مره هجربها..فدي اشاره بقي..

هنا ضحكت وقالت: ممكن بس اسمحلي هجيبلك غيرها..

عمرو: لا متشكر..علي العموم حصل خير..

هنا بابتسامة: شكرا علي ذوقك..

عمرو: العفو ومشي..

فرح: باين عليه ذوق..

هنا بابتسامة: اه اوي..بس حاسه اني شفته قبل كده..

فرح: اكيد يا بنتي ده في شؤون الطلبه اصلا..

هنا: ايوا فعلا افتكرته..بس هو في قسمنا صح؟

فرح: لا..مش معانا..

هنا: امم طيب..

>>>>>>>>>>>>>>

ياسين: وانت خارج ورايح فين كده يا خالد..

خالد: ياعم رايح اشوف واحد صحبي..

ياسين: هتخرجوا او كده خدني معاك اغير جو..

خالد: لا مش هخرج انا رايحله شركته..

ياسين: هو مين ده..

خالد: احمد اللي شغال في شركه A&H للتسويق..

ياسين: دي نفس الشركه ال....وقام وقف وقال: خدني معاك..

خالد: اخدك معايا فين الشركه..

ياسين: اه يا عم اغير جو واتعرف عليه..

خالد: ماشي تعالي..

ياسين: يلا بينا..

بعد شويه وصلوا الشركه..

ياسين دخل وفضل يدور علي مريم بعينه..

خالد: ايه بتتلفت علي ايه؟

ياسين: بتفرج علي الشركه..

خالد خبط ودخلوا مكتب احمد..

احمد: اهلا يا خالد تعالي..

خالد: اهلا بيك ده ياسين صحبي..وسلم..علي احمد وقعدوا..

بعد شويه الباب خبط...

احمد: اتفضل..تعالي يا مريم..

مريم دخلت واول ما شافت ياسين اتفاجأت ووقفت مكانها..وياسين باصصلها..

أحمد: تعالي يا مريم وقفتي عندك ليه؟..

مريم : لا اصلي اتفجأت بس..

احمد: من ايه..

ياسين بابتسامة: اهلا يا مريم..

مريم: اهلا يا ياسين 

أحمد: انتوا تعرفوا بعض؟

مريم بصت لياسين وقالت: ياسين يبقي ابن عمتي..

ياسين ابتسم وقال: ايوا..

احمد: اتشرفت بيك..

ياسين: الشرف ليا..

مريم: ده ملف اللي طلبته يا مستر احمد..

أحمد: تمام..شكرا..

مريم: العفو وبصت لياسين وقالت: محتاجه اتكلم معاك بعد ما تخلص..

ياسين بابتسامة: تمام..

بعد شويه خلصوا وياسين طلع..

ياسين راح عند مريم المكتب وخبط الباب ودخل..

مريم: اتفضل...

ياسين قعد وقال: كنتي عايزاني ليه؟

مريم: ياسين انت ايه اللي جابك هنا؟

ياسين: نعم!!

مريم: يعني ايه اللي خلاك تيجي الشركه؟

ياسين: انا جات مع خالد كان يشوف احمد زميله..

مريم: مانت عارف اني شغاله في الشركه دي..

ياسين: ايوا..ماهي جات صدفه ماجيش عشان خاطر انتي موجوده ولا ايه؟

مريم: ياسين انا شفتك وانت داخل عمال تدور عليا وسألت السكرتيره..

ياسين: طب وايه المشكله..وبعدين لما انتي شفتيني مجاتيش كلمتيني ليه..

مريم بضيق: مكنتش فاضيه..

ياسين: لا يا مريم انتي دايما عايزه تهربي مني..

مريم وهي بتبص في الملف: وههرب منك ليه؟

ياسين: اهي بالطريقه دي انتي بتثبتيلي..

مريم سابت الملف وبصتله وقالت: اه يا ياسين بس مش بهرب..بس حطيت حدود انت ابن عمتي وانا بنت خالك وخلاص..

ياسين: تمام انتي معتبراني كده بس انا مش معتبرك كده..فخلاص اتصرفي زي مانتي عايزه بس ده مش هغير اللي جوايا..وانا برضو حر في تصرفاتي..

مريم: يعني ايه يا ياسين؟

ياسين وقف وقال: يعني يا مريم لو انا بقيت بالنسبالك عادي وابن عمتك وبس..فأنتي بالنسبالي مش عادي ولسه بحبك يا مريم..وبتلكك عشان اشوفك..وهفضل احاول يا مريم..سلام وخرج..

مريم  سندت ضهرها علي الكرسي وخدت نفس عميق وقالت: ده اللي وصلك يا ياسين..ياريتك بقيت بالنسبالي عادي..مكانش بقي ده حالي..

>>>>>>>>>>

هنا: الو يا مريومه..

مريم: الو يا هنا..عامله ايه.

هنا:الحمد لله..صوتك..ماله كده..

مريم اتنهدت وقالت: عايزه اقعد معاكي يا هنا..انا متلغبطه اوي..

هنا: ياسين مش كده؟

مريم: ايوا..

هنا: طيب خلصي وتعاليلي..

مريم: طب وياسين..

هنا: هنطلع نقعد علي السطح..وكوبايتين شاي كده..ونظبط الدنيا..

مريم: طيب..هخلص واجيلك..

بعد حوالي تلت ساعات مريم خلصت شغلها وراحت عند بيت مريم بس وقفت تحت ورنت علي  هنا..

هنا: الو وصلتي؟

مريم: اه..بس انا هروح السوبر ماركت اجيب شويه حاجات وهكلمك عشان نطلع فوق علطول..

هنا: طيب..

ياسين: انا خارج يا ياماما..

مها: ماشي يا حبيبي..

مريم كانت في السوبر ماركت..واقفه بتشتري..لقت ياسين  داخل بصت قدامها بسرعه وكملت كأنها مش شايفاه..

ياسين: لو سمحت هو المعطر بتاع العربيه في انهي رف؟

صاحب المحل وهو بيشاور: هناك..

ياسين: تمام ودخل شاف مريم..وابتسم..وراح ناحيتها..

ياسين: بتعملي ايه هنا يا مريم؟

مريم:  ياسين..انت جات امتي؟

ياسين: لسه جاي بجيب حاجات للعربيه..

مريم: امم طيب انا بجيب شويه حاجات ليا انا وهنا..

ياسين: انتي راحه عندنا؟

مريم: ايوا..

ياسين: تمام..انا هروح اجيب اللي انا عايزه بقي..

مريم: تمام..

وخلصوا مريم كانت واقفه عند الكاشير بتحاسب..ياسين جه عشان يحاسب هو كمان..

ياسين: اتفضل..خلصتي؟

مريم: ايوا..

الراجل: كده تمام..وياسين خد الفيزا ومشي

مريم: كده حسابي كام؟

الراجل: ماهو الاستاذ دفع الحساب..  

مريم وهي بتبص عليه وهو ماشي: تمام شكرا...

>>>>>>>>>>>

هنا : دانتي جايبه حاجات حلوه اوي..

مريم: مش انا اللي دفعت الحساب..

هنا: امال مين؟

مريم: اخوكي..

هنا: بجد انتوا اتقابلتوا وانتي رضيتي..

مريم: من غير منا اعرف..

هنا: اخويا جنتل اوي..

مريم: اه يختي..

هنا: يلا احكيلي..

>>>>>>>>>>>>

جنا: ماما..يا ماما..

زينب: ايه يا بت..

جنا بفرحه: كريم قالي انه هييجي بكره ويحدد مع بابا كتب الكتاب..

زينب: بجد الف مبروك يا حبيبتي..ربنا يكملكوا علي خير يارب..

جنا: يارب يا ماما..

ياسين خلص مشواره ورجع الشقه..

مها: انت جيت؟

ياسين: اه..هي هنا في اوضتها؟

مها: لا هي ومريم علي السطح...

ياسين: طيب..الله انا بحب الفيلم ده اوي..

مها: تعالي اقعد..ياسين قعد يتفرج معاها..

هنا: بجد..دانتوا طول اليوم في وش بعض..

مريم: اه شفتي بقي..

هنا: معلش يا مريم..اصبري يمكن مع الوقت كل حاجه تتصلح..

مريم: مش عارفه يا هنا..انا هقوم امشي بقي عشان اتأخرت..

هنا: لسه بدري يا مريومه..

مريم: لسه بدري ايه..بقالنا تلت ساعات قاعدين..عايزه انام ورايا شغل الصبح..

هنا: طيب يا مريومه..مع السلامه..

مريم: سلام..يا هنون..ومشيت ولسه نازله ..اتزلحقت ووقعت علي السلم..وصوتت جامد..

ياسين سمع الصوت وفتح الباب وطلع بسرعه..

هنا بقلق: مريم..انتي كويسه؟

مريم : دراعي..اااه

ياسين طلع لقي مريم ماسكه دراعها وبتعيط..جري عليها..

ياسين بخوف : في ايه يا مريم...بتعيطي ليه؟

مريم وهي بتعيط: وقعت علي دراعي..ووجعني اوي..

ياسين: طيب اهدي..وريني كده..وبدأ يحرك في دراعها براحه...

مريم بوجع: اه..بيوجع اوي..

مها: معلش يا مريم..ده وارم وباين عليه في كسر..

ياسين: ايوا لازم نوديها المستشفى..انا هنزل اشغل العربيه..

هنا: قومي يلا يا مريم براحه..

مريم :مش قادره اقوم..حاسه رجلي مش شيلاني..

ياسين قرب منها وشالها من غير كلام وهي كانت بصاله بصدمه...وقال: هنا هاتي مفتاح العربيه من جوه بسرعه..

يتبع...