: إزاي بنتي مراحتش المدرسة أنا موصلها لحد باب المدرسة الصبح

• حضرتك بناخد الغياب ومكانتش موجودة 

: بقول لحضرتك أنا موصلها بنفسي الصبح ودخلت قدامي 

نزلت من الشغل بسرعة روحت المدرسة بعد ما المشرفة بتاعت المدرسة كلمتني عشان تبلغني بغياب رهف، إللي هو إزاي وانا وصلتها قبل ما أروح الشغل ودخلت من باب المدرسة قدام عيني، نزلت بسرعة ومفيش دقايق وكنت قدام المدرسة بركن العربية ودخلت بسرعة .. 

: إحنا بناخد الغياب يوميًا بعد الطبور الصباحي عشان نتأكد من وجود التلاميذ، ولو حد غايب بنتواصل مع اهله عشان نعرف سبب الغياب، عشان كده كلمنا حضرتك

• بس رهف جت المدرسة وأنا وصلتها لحد قدام المدرسة، طب ممكن تتاكدوا معلش تكون راحت هنا ولا هنا 

قعدت في أوضة المكتب بتاع المديرة وأنا علىٰ اعصابي، وفي نفس الوقت مش عايز انفعل عشان يمكن تكون بتلعب مع صحابها أو راحت مكان تاني وهترجع، حاولت اسيطر على اعصابي لحد ما لقيت الميس فتحت الباب وهي مفزوعة عشان تبلغ المديرة أنها تيجي بسرعة، روحت وراهم في آخر مبنى في المدرسة إللي يعتبر مهجور أو مش شغال، ويدوب فتحت الباب كان في شعر مقصوص واقع علىٰ الأرض! 

قربت من الشعر المقصوص والتوكة إللي كانت مسكاه، دي توكة رهف أنا إللي حطيتهالها في شعرها الصبح بعد ما سرحتهولها، فضلت واقف مكاني مش مستوعب أي حاجة نهائي، يعني ده شعر رهف إللي علىٰ الارض، ودي التوكة بتاعتها، معنىٰ كده أن رهف اتخطفت .

: لقيتلك قضية طازة هتفيدك جدًا 

• قضية أي؟ 

: بنت مخطوفة من مدرسة ولقيوا شعرها مقصوص ومختفية لحد دلوقتي 

• من أمته الكلام ده ؟ 

: النهاردة الصبح

• عرفتي اي تفاصيل تاني؟ 

: البنت عندها 8 سنين عايشها مع والدها وامها متوفية 

• وعنوان البيت؟ 

: اهو 

• شكرًا ما منمون . 

انبسطت جدًا أول ما منة قالتلي علىٰ القضية، حسيت أن شغفي بدأ يرجعلي تاني عشان أعيد السيناريوهات إللي كنت بعملها، معشتش التجربة ليا فترة كبيرة، ودلوقتي جت اللحظة إللي هستعيد فيها نفسي من أول وجديد . 

حاولت اتماسك بعد إللي حصل ولكن لسه مش مستوعب أي حاجة، بلغوا الشرطة وجت عشان تحقق في المدرسة ويعرفوا أي إللي حصل، وانا كنت في وادي تاني خالص مكنتش واعي لأي حاجة، الصداع كان ماسك دماغي مش راضي يسيبها، لحد ما الظابط جالي .. 

: متقلقش أن شاء الله هنلاقيها إحنا هنعمل كل إللي نقدر عليه وزيادة 

شاورتله بدماغي ومشي، وانا مكنتش قادر أقف علىٰ رجلي من الخضة، مكنتش مستوعب أني هرجع البيت من غير رهف، بحاول اتماسك بالقدر إللي يخليني أقدر اتحمل اعيش، روحت البيت ومحستش بنفسي ومش طايق البيت ولا طايق أعمل اي حاجة، دخلت نمت علىٰ طول ومحستش بنفسي نهائي .

صحيت ومكنتش أعرف الساعة كام ولا اي اللي حصل، قومت من النوم ودماغي مصدعة، دخلت أعمل قهوة بعد ما غيرت هدومي وخرجت اقف في البلكونة، فضلت سرحان وبستعيد إللي حصل وغياب رهف، حسيت بنغزة في قلبي وانا مش فاهم أي حاجة، ولا عارف هي فين دلوقتي ولا عاملة أي، قطع تفكيري واحدة كانت بتمشي في الجنينة بتاعت البيت وماسكة كشكول وقلم وبتكتب حاجة، نزلت بسرعة واخدت المسدس معايا، ويدوب لسه هقرب منها لقيتها اتفزعت ووقعت علىٰ الارض .. 

: دخلتي هنا إزاي وأنتي مين؟ 

• أنا شهد 

: دخلتي هنا إزاي؟ 

• من الباب

: أكيد مش هتنزلي بطيارة فتحتي الباب إزاي ولا أنتي حرامية ولا بتعملي اي هنا ومين معاكي 

• والله دخلت من الباب وانا مش حرامية ولا معايا حد 

: امال أنتي مين! 

• أنا صحفية وجاية لحضرتك

حطيت المسدس في جنبي تاني بعد ما اتاكدت أنها مفيش وراها حاجة وباين عليها صحفية فعلاً من الورقة والقلم بتوعها، قامت من على الأرض ونضفت هدومها .. 

: انا آسفة علىٰ الاقتحام بس الباب كان مفتوح

• شكلي نسيته ومقفلتوش كويس

: طيب أنا جاية لحضرتك أعرف منك كام معلومة بس بخصوص بنتك رهف 

• معلومات أي! 

: كنت عايزة أعرف اخر مرة شفتها كانت أمتى؟ 

• لما وصلتها المدرسة الصبح ومشيت روحت الشغل

: ليها صحاب بيستنوها تدخل معاهم؟ 

• معتقدش لا 

: والشعر إللي كان موجود فعلاً شعرها؟ 

• ايوة شعرها عرفته من لونه ومن التوكة بتاعتها 

: أنت شفت التوكة؟ 

• أنا إللي حطيتهالها بعد ما سرحتلها شعرها 

لقيتها سابت القلم وبصتلي بشفقة وكأنها مستغربة أني بسرحلها شعرها .. 

: أنتوا مفيش حد عايش معاكم صح؟ 

• لا مفيش أنا ورهف بس ووالدتها متوفية 

: يعني أنت إللي بتراعيها وبتهتم بيها ؟ 

• وده هيفرق معاكي كصحفية في أي! 

: أنا آسفة مقصدش وبعتذر علىٰ إزعاج حضرتك مع السلامة 

مشيت علىٰ طول وشكلي كده احرجتها، لأني مش فاهم سؤال زي ده هيفرق معاها في أي، هي مشيت وانا قفلت الباب وراها واتاكدا أنه اتقفل كويس وركبت فوق غيرت هدومي وكلمت حد من صحابي محامي عشان اشوف المفروض هعمل أي .

: أنتي إللي خطفتي البنت! 

• بنت مين إللي خطفتها

: رجعي البنت يا ريهام

• خطفت مين وارجع أي مالك يا أسماء حد قالك أي عاملة عصابة 

: أمال مين إللي خطف البنت؟ 

• معرفش وأنا اللي كنت فاكراكي أنتي إللي هتخطفيها عشان إبنك 

: أبني كويس يا ريهام ومش دجالة هي إللي هتشفيه وتاخد روح بنت تانية ملهاش ذنب زي ما قالت ده كفر عارفة يعني أي 

• أنا كنت عايزة اساعدك بس 

: لا متساعدينيش بالطريقة مش هكفر عشان واحدة نصابة 

• أنا غلطانة كنت خايفة عليكم

: خايفة عليا تقومي توديني لواحدة زي كده عايزاني اخطف عيل تاني عشان ابني يخف

• كل حاجة وليها مقابل مفيش حاجة ببلاش وكل روح قصادها روح هو مش ربنا قال العين بالعين والسن بالسن

: والبادي أظلم يا ريهام

• يعني أي! 

: يعني نهايتها سودة 

ولقيتها اخدت شنطتها وسابتني ومشيت، وفضلت أنا قاعدة علىٰ اعصابي وحاسة أنها هي إللي ورا خطف رهف، ياريتني ما عزمتهم علىٰ العيد ميلاد ولا خليت ريهام تشوفها، فضل ضميري يأنب فيا وحاسة بالذنب تجاه البنت الغلبانة وابوها إللي ربنا يكون في عونه إللي مراته ماتت وبنته مخطوفة، كنت عايزة اكلمه بس مش قادرة أعمل كده، في حاجة بتمنعني اكلمه أو اتطمن عليه . 

: مفيش جديد يا خالد؟ 

• لسه يا أمي والله مفيش جديد 

: طيب هات هدومك وتعالى اقعد معايا 

• مش هينفع دلوقتي يا ماما 

: واي إللي يخليه مينفعش! 

• عشان ده مش وقته

: أمال أمته وقته يا خالد

• شايفة ان ده وقت نتكلم فيه عن الموضوع 

: أمال نتكلم فيه أمته، في الأول كانت حجتك مراتك ورهف ومراتك ماتت، وبعد كده حجتك بقت رهف ومش فاضي ومسحول معاها واهي رهف مش موجودة 

• ليه السواد ده كله مش فاهم انا عارف أنك بتكرهي ملك ومش بتحبيها ولكن رهف اي ذنبها

: أنا مبكرهش حد انا عايزاك جمبي

• وانا جمبك مقصرتش من نحيتك في حاجة

: لا مقصر لما ابقى محتاجاك وتقولي بيتي ومراتي وبنتي وانا اولع تبقى مقصر

• طيب نلاقي رهف ونتكلم في الموضوع ده 

: لما تلاقي رهف

وشوحتلي بإيديها وسابتني وقامت دخلت المطبخ، أمي طول الوقت محسساني أني مقصر معاها ومش بعمل أي حاجة، وان ملك ورهف كانوا واخديني منها، كانت بتعامل ملك أسوء معاملة لما كنا عايشين في بيت واحد، ولما نقلت كانت شايفة ملك أنها اخدتني وقطعتني منها، طب ماهي لو الحياة كده تبقي أنتي كمان اخدتي أبويا من أهله والدايرة مش هتخلص، دي سنة الحياة يعني مش موضوع شخصي، حاولت اتلاشى الموضوع لأنه مش وقته خالص في الظروف دي، ورهف عدىٰ تلات ايام ومفيش اي أخبار عنها، لدرجة أني بنادي عليها في البيت من كتر ما بنسى أنها مبقتش موجودة فيه .

فضلت واقفة قدام الباب مترددة ادخل ولا لا، لحد ما تماسكت وخبطت علىٰ الباب، ومفيش ثواني ولقيته فتحلي .. 

: صباح الخير 

• أنتي تاني! 

: أنا آسفة بس صحفية هعمل أي بقا شغلي 

• عايزة أي تاني؟ 

: في الأول جاية اعتذرلك علىٰ اقتحامي بيت حضرتك أول مرة، وبعتذر أني بقتحم بيت والدة حضرتك تاني مرة 

• كده مش باقي غير بيت عمي وعمتي وتبقي اقتحمتي بيوت العيلة كلها ادخلي ادخلي 

دخلت وأنا حاسة أني قليلة الذوق شوية على اقتحامي كل شوية، بس أعمل اي عندي شوية شغف خايفة عليهم يخلصوا او يصدوا من الركنة، بحاول أعمل اي حاجة عشان ارجع بنفس الشغف إللي كنت فيه في الأول . 

: وانت عايش مع والدتك ولا والدتك عايشة لوحدها

• لسه من ثواني كنا بنتخانق علىٰ الحوار ده 

: بجد؟ 

• ايوة تشربي أي؟ 

: أي حاجة فريش

• وجاية المرة دي تسألي عن أي، لون الاوتفيت ولا الشراب بتاعها

: يا أستاذ خالد الإهتمام بالتفاصيل ساعات بيحل قضايا كتير جدًا وانا قابلتني قضايا كتير اتحلت بسبب تفاصيل تافهة جدًا 

• ماشي عمومًا دي صورة رهف وده اوتفيت المدرسة بتاعها 

مسكت التليفون بتاعه وراني صورة رهف، البنوتة شكلها عسولة خالص حقيقي، ملامحها هادية ورقيقة كده، كانت متصورة وهي واقفة قدام باب المدرسة، فضلت مركزة مع الصورة وشوفت كذا صورة ليها ولاحظت كذا حاجة فيهم، ولكن فجأة دخلت أمه ولما شافتني وعرفت أني صحفية زعقت وعلت صوتها ..  

: معلش يا استاذة شهد بعتذرلك عن إللي حصل ممكن تتفضلي دلوقتي

• لا عادي مفيش حاجة 

نزلت بسرعة وأنا متضايقة وحاسة أني تسرعت في الحوار ده وندمت أني روحت أصلًا، لوهلة كنت خلاص هنفجر في وشها بس مسكت نفسي بالعافية، نزلت من البيت بتاعهم ولقيت الباب الأمامي مقفول، روحت من الباب إللي ورا، وماخدتش بالي واتكعبلت في حجر كبير وكنت هقع، لحقت نفسي بسرعة بس لمحت حاجة بتلمع جمب الحجر، لما قربت منه لقيته انسيال دهب، أخدته وحطيته في شطنتي ومشيت علىٰ طول .

: اي يا رهوف ياحبيبتي بتعيطي ليه بابا وحشك؟ 

• أنا عايزة أمشي 

: مانتي هتمشي بس مش علىٰ البيت

• عايزة بابا 

: وبابا كمان عايزك ياحبيبتي، مقولتليش أي رايك في شعرك إللي مبقاش موجود، بقيتي شبه أمك قبل ما تموت بالسرطان فيكم شبه بعض علىٰ فكرة 

يتبع ..