" يحيي من صدمته بكلام اخوه مبقاش عارف ينطق كلمه واحده ساكت ومستنيه يكمل ، لكن كريم ساكت مبينطقش ومش عارف يقول كلمه "

يحيي مسك ياقة تيشيرت احمد بجنون : انطق يابني ادم اتكلم بتحب واحده متجوزه وعندها بنتين ازاي مش فاهم دبيت الكلمه وقعدت ساكــت ليــــه؟ 

كريم بص علي ملامح اخوه اللي حرفيا بيتكلم بجنون وضحك جامد وقال: هدي نفسك وهدي اعصابك العصبيه الشديده مش حلوه كنت بهزر معاك والله متبقاش قفوش يا جدع كدا 

يحيي بصله بـشك لكن اعصابه بدأت تهدي شويه: بتهزر ولا بتتكلم جد؟ 

كريم بضحك: والله العظيم بهزر يعني معقول هسيب بنات العالم كله وهروح احب واحده متجوزه بعيالها كمان دا امك كانت جرستني في الشـون كلها

يحيي اتنهد بغلب وقال : وقتها كنت هحسب ربك مخلقكش وهدفنك بإيدي مربتكش بدم قلبي علشان تجيبلي العار انتو الاربعه افديكم بروحي من غير ما اتردد لكن مسمحش لحد فيكم بالغلط 

كريم ابتسم لـحُـب اخوه وقال بتردد: يحيي هو انت ليه طلقت مراتك الاولي وليه مخبي السر لحد دلوقتي....ومتقولش مفيش سر علشان كلنا عارفين ان في حاجه بس انت مخبيها 

يحيي السيره نفسها بضايقه لكن قال بهدوء: احنا بشر والبشر كله بيغلط لكن اللي بيستر علينا هو ربنا فـ مينفعش ربنا يستر بني ادم ويجي عبد يفضحه لمجرد انه بيدردش في وقت هو فاضي فيه لذالك متسألنيش السؤال دا تاني 

" كريم سكت لكن كلام يحيي عملة علامات اسفهام كتيره، يعني مراته كان فيها عيب وهو ستره، ولا يقصد ايه بالكلام اللي قاله دا، قطع تفكيره اذان الفجر "

يحيي قام وقف وقال بهدوء: يلا ننزل نصلي متوضي ولا هتتوضي في الجامع؟ 

كريم قام وقف وقال: متوضي " خرج يحيي وكريم من البيت للجامع وكان احمد قاعد مستني الإقامه وايوب جنبه ، راح قعد علي يمينه يحيي وعلي شماله كريم "

كريم بهمس: مش متعود عليك نازل لصلاة الفجر قبل الإقامه هتتحسد " وقال بشهقه " ولا تكون عفريت مُسلم متجسد فيك 

ايوب قاعد قدامهم فـقال: وانا والله اول ما جيت ولقيته تاني واحد في المسجد فكرته عفريت 

كريم بص لأيوب بحاجب مرفوع: قال يعني انت اللي مقطع السجاده مبنشوفكش غير في صلاة الجمعه 

ايوب بغيظ: امال انا هنا بعمل ايه دلوقتي مش دي صلاة الفجر برضو ولا انا فاهم التوقيت غلط 

كريم بهمس: whatever بس برضو مبتجيش المسجد يوميا 

ايوب بتريقه: whatever! الله يرحم جدك كان بيستحمي بخرطوم الغساله 

احمد بصلهم ببتسامه وقال بصوت عالي نسبيا : بس يالا انت وهز اخرسو انا هنا من الساعه ٤ بالظبط قاعد بدعي وبحمد ربنا علي النعمه اللي بعتهالي " وبص علي وشوشهم وشاف الاستغراب فـقال " رحمـه حامل.. 

يحيي ابتسم بسعاده ومسح علي ضهره ببتسامه: مبـارك يا ابو حميد ربنا يقومها بالسلامه وينور الدنيا شافي معافي يحبيبي 

احمد ببتسامه: عقبال فرحتك الكبيره وبعدها بـ تسع شهور ينور الدنيا ولي العهد الحقيقي لعيلة رضوان الشيخ يا اخويـا 

الشيخ علي بص لـيحيي: ساو الصفوص يا جماعه قوم قيم الصلاه وصلي بينا انت يا يحيي " وفعلا صلي بيهم يحيي بصوته الهادي المريح وقرأته الصحيح في القرآن "

" الستات في مُصلي السيدات بيصلو بخشوع ورا يحيي اللي كل فين وفين بيصلي بيهم، من ضمن الستات رقيـه وآيـه ونيـرا "

                    " بعد صلاة الفجر "

آيـه قعدت قدام نيرا ورقيـه وقالت بهمس علشان محدش من الستات يسمع: ايوب جيه معاكو صح؟ 

نيرا برفع حاجب: استغفر الله العظيم ناس جايا تصلي لله وناس جايا علشان تشوف ايوب ابو دماغين 

آيـه بصتلها بغيظ: جايا اصلي برضو يا استاذه بس مفيش مانع لما اشوفه برضو 

رقيـه كانت بتسبح علي ايدها فـسكتت وقالت: غُضي بصرك يا محترمه ومتضيعيش مننا صلاة الفجر بعدين الدنيا ضاقت بيكي اوي كدا ملقتيش غير ايوب ابن عمي 

آيـه قلبت شفايفها اللي تحت وقالت: بحبـه طيب اعمل ايه، ما انتي كمان الدنيا ضاقت بيكي اوي وملقتيش غير يحيي اخويا رغم انه كان متجوز قبل كدا 

رقيـه اضايقت جواها لكن ردت بهدوء: وايه يعني لما يكون كان متجوز قبل كدا وطلق ملوش حق يتجوز تاني ويستقر في حياته؟ 

آيـه ردت بتبرير: ليه حق اكيد بس بيقولك العين لازم تكون شوافه يعني يتجوز واحده ارمله مطلقه زيه مش بنت لسه 

رقيـه قالت بدفاع: ليه ميتجوزش بنت هو معيوب ولا ايه دا بنات الشـون كلها هتموت علي كلمه منه وانا اولهم بعدين انتي ازاي تتكلمي عن اخوكي كدا يا آيـه؟ 

آيـه بهدوء: زي ما انتي مش متقبله كلمه علي حبيبك انا برضو مش متقبله كلمه علي حبيبي هتقوليلي دا ابن عمي وانا حره اقول اللي اقوله هقولك ودا اخويا انا حره اقول اللي اقوله انا بحب ايوب زي ما انتي حبيتي يحيي واكتر بمراحل ومستحيل اتخلي عن حبه 

نيرا بعقل: بس هل ايوب حاسس بيكي ولا هو شايفك اصلا يا آيـه بجد انا حاسه ان بعيد قصة رقيـه ويحيي من تاني بختلاف الاسماء 

آيـه بهجوم: وهل يحيي كان حاسس بحب رقيـه يا نيرا؟ 

رقيـه اضايقت من كتر ما هي عماله تذكر اسمها واسم يحيي وقامت وقفت وقالت بضيق: استغفر الله العظيم نيرا انا هستناكي قدام المسجد تحت " وسابتهم ونزلت وهي متغاظه "

" الشباب كلهم كانو واقفين تحت قدام المسجد زي العاده بيتكلمو شويه قبل ما يروحو "

كريم شاف رقيـه نازله من مُصلي السيدات بتنفخ فـقال: جماعتك نازله من مُصلي السيدات يا يحيي بس الله يعينك علي البركان القادم منها 

يحيي استغرب جماعته مين وبص وراه لمح رقيـه واقفه مربعه ايدها وسانده علي الحيطه مستنيه البنات تلقائي رفع حاجبه وراح عندها: صباح الخير 

رقيـه بصتله واترسمت ابتسامه علي وشها: صباح النور يا يحيي 

يحيي برفع حاجب: وحضرتك بتعملي ايه هنا يا انسـه؟ 

رقيـه بعفويه: جيت اصلي الفجر جماعه مع نيرا وايوب 

يحيي بحده خفيفه: في زفت بني ادم اسمه خطيبك لو مش واخده بالك يعني كنتي عرفيه من باب العلم بشيئ حتي بدل ما انا متفاجئ بيكي كدا 

رقيـه بغباء : هو لازم استأذنك لما اجي اصلي؟ 

يحيي مسح وشه وحاول يكون هادي لكن معرفتش فـ اتكلم بنبره حاده: لو نازله من سلالم بيتكم للبوابه تحت تعرفيني انك نازله وانا سبقك وقولتلك معنديش ستات بتطلع تصلي الفجر في مساجد صح ولا انا غلطان 

رقيـه خافت من نبرة صوته اللي اول مره يتكلم بيها وقالت بخوف : آيـه فوق علي فكره كانت بتصلي معانا 

يحيي ضغط علي سنانه وقال: سمعتي الكلام اللي قولته صح " رقيـه هزت راسها بموافقه " حلو قولتيلي آيـه فوق معاكو صح " هزت راسها تاني بـ اه " وانا هعرف اربيها صح علشان بعد كدا متخرجش بدون علمي لكن كلامي معاكي دلوقتي لو الحركه دي اتكررت تاني متلومنيش علي ردة فعلي 

رقيـه هزت راسها بخوف وقالت بصوت مهزوز: خلاص يا يحيي مش هكررها تاني بس بلاش تخوفني منك 

يحيي ركز علي ملامحها الخايفه والبريئه في نفس الوقت ملامح عاديه بس هو ليه مشدودلها كدا ومش عارف يبطل يبصلها مسح وشه وبيحاول يرتب افكاره وقال بهدوء : مفيش خروج غير بإذني بعد كدا يا رقيـه تمام 

رقيـه بهمس : تمام اوعدك مش هخرج غير لما اعرفك بعد كدا " نيرا وآيـه نزلو ورا بعض، آيـه اول ما شافت يحيي خافت لتكون رقيـه قالتله بسبب نظرته الناريه ليها "

آيـه نزلت وبصت لـ رقيـه بغضب وقالت: انتي لحقتي تسخنيه عليا طب اصبري لما تدخلي البيت حتي 

يحيي اتصدم من كلام اخته وبصلها بغضب: انا مش عايز صوتي يطلع في الشارع بسبب حريمي اطلعي علي البيت واستنيني علي ما اجيلك " وزعق " اخلصي يا آيـه " وبص لخواته " خدو آيـه واسبقوني يا رجاله خمسه وجاي وراكم 

" آيـه بصت لـ رقيـه بغضب قبل ما تروح علي بيتهم مع كريم واحمد "

نيـرا حست الجو متوتر فـقالت بهدوء: طيب انا هسبقك علي البيت يا رقيـه " وسابتهم وطلعت علي بيتهم اللي جنب المسجد علطول "

رقيـه بصوت واطي: اطلع بيتنا يا يحيي؟ 

يحيي بنرفزه: آيـه تقصد ايه بكلمتين اللي قالتهم دول حصل بينكم ايه فوق خلاكي نزلتي قبلهم وخلاها نازله تقولك كدا، ومتكدبيش 

رقيـه بتوتر: محصلش حاجه شدينا مع بعض بسبب تافهـه اصلا 

يحيي وهو بيسمعلها: ايوا يعني ايه السبب التافهه دا عايز اعرفه 

رقيـه اتنهدت وقالت : متجبرنيش احكي حاجه علشان خاطري آيـه صحبتي وانا متعودتش افتش سر حد انا وهي اتخانقنا فوق خناقه عاديه وهي قالتلي الكلمتين دول علشان انا ضايقتها بس كدا 

الشيخ علي خرج من المسجد شافهم مع بعض فـقال بنبره مضايقه : مكنتش دبله لبستيها يا ست رقيـه لسه كل حاجه متحرمه زي ما هيا واولهم انكم تقفو مع بعض بالشكل دا وفي الوقت دا ولا ايه يا يحيي 

يحيي بصله: بعتذرك يا شيخـي والله انا اللي خليتها تنزل تصلي الفجر النهارده حقك علي راسي 

الشيخ علي بص لـ رقيـه: اطلعي البيت يلا " رقيـه طلعت علي البيت علطول " ايه مشكلتك يا يحيي 

يحيي ابتسم وراح عنده وقال: النظره مش حرام يا شيخنا ولا كلامي معاها حرام " يحيي شاف ملامح الشيخ اضايقت فـقال " مره جيه واحد من الصحابه للرسول عليه الصلاه والسلام قاله انه خطب بنت فـ الرسول قاله انظرت لها فـ الشاب قال لاء فـ الرسول قاله انظر اليها فإنه احري ان يُؤدم بينكما يعني شوفها كويس ادرسها صح علشان تعرف هل هيبقي فيه توافق بينكم ولا لاء انت ليه محرم ان اتعرف عليها والنبي نفسه حلل الرؤيه الشرعيه 

الشيخ علي بستنكار: اسغفر الله متحرمنيش حجات انا محرمتهاش انا امتي حرمت الرؤيه الشرعيه؟ 

يحيي ببتسامه : وهل الرؤيه الشرعيه مره واحده بس يا شيخـي 

الشيخ علي عاتبه بهدوء : بس الرؤيه الشرعيه مبتبقاش في المسجد ساعة فجر يا يحيي 

يحيي حط ايده علي صدره: حقك علي راسي في الجزء دا مكنش ينفع فعلا اشوفها في ساعة زي كدا 

الشيخ علي سند علي ايده علشان ينزل السلم: قابل اعتذارك يا عم يحيي لما نشوف اخرتها معاك 

يحيي وقفه وقال بهدوء: مش هنحدد معاد لكتب الكتاب بقا انا شايف اننا منتظرين علي الفاضي 

الشيخ علي وقف في نص السلم وبصله بتركيز: انت عرضت عليا عرض قبل كدا قولت شقتك جاهزه جهاز عريس وعروسه وقتها انا قولتلك والقايمه وانت قولت هكتبلها قايمه صح 

يحيي بموافقه: صح وانا لسه عند كلامي 

الشيخ علي بصله وقال ببتسامه: لو رقيـه اتجوزت علي عفشك من غير ما اجبلها جهازها انا مش هقبل ان اكتب قايمه " يحيي هيعترض لكن الشيخ قال بصوت قاطع " متعترضش انا شيخ حافظ كتاب الله وعارف شرع ربنا وانا شايف اللي انا بعمله دا مش عدل الله فـ انا عايز اعيش مرتاح فـ لو هتتجوز في شقتك بعفشك مش هتكتب قايمه اتفقنا 

يحيي معرفش يرد فـقال: مش هضغط عليك اللي تشوفه هيريحك انا هعمله بس عندي طلب بلاش تأخر كتب الكتاب 

الشيخ علي سكت شويه وقاله ببتسامه: نكتبه بكرا في المسجد ورقيـه تجيلك البيت الخميس الجاي