_ بابا… أنا عاوزة أطلق!. 

_ إيه؟!. 

قالها سيف بصدمة وأنا بصاله بحزن وغضب في نفس الوقت، كانت متوقع إيه بعد كل اللي عمله؟، حاول سيف يقرب منه لكن منعه إياد وهو بيقوله 

_ متقربش!. 

_ مقربش إيه، دي مراتي!. 

_ بس هنطلق يا سيف. 

قلتها بزعيق وأنا مفيش حاجة جوايا اتغيرت بل زادت لما شوفتها وهيا جاية معاه!، للدرجة دي مش قادر يسيبها، تأففت بغضب لما شفته بيحاول بتحكم في غضبه لكن وقبل ما يدي ردت فعل كان بابا أتكلم بغضب وقال 

_ إيه الهبل اللي أنتم بتقولوه ده!، ويا تري بقي ياست إيلول عايزة تطلقي ليه؟

غمضت عيني بحزن وأنا متأكدة لو بابا عرف مستحيل يخلينا نكمل ويصر أكتر علي الطلاق، كان جوايا حيرة أقول ولا لا، أخرب بيتي زي ما بيقولوا ولا أسكت وهو كمان هيرجعلي؟ 

_ كل ده بتفكري؟!. 

قالها بابا بعصبية مفرطة ودي حاجة كلنا مكتسبنها منه وهيا العصبية علي أقل حاجه، قلت بقلق 

_ علشان سيـــــــ… 

_ علشان مجبتلهاش حاجة حلوة يا عمي بمناسبة يعني إن النهارده كان يوم جوازنا… 

بصيتله بصدمة من كذبه!، أنا كنت هقول علي اللي حصل لكن بكدبته هيطلعني غلطانة!، بصيت لإياد واللي كان بيقابلني بنفس الصدمة برضه؛ بصيت بخوف لبابا اللي غضبه كان بيزيد لدرجة إن حسيت إن تنفسي قل، واللي كان لاحظ فيهم هو سيف علشان كده قرب وقعد جنبي، مسك أيدي وبص لعيني وقال بحب مكنتش شوفته بقالي فترة 

_ معلش يا عمي، يمكن دي حاجه تافهه بالنسبة لحضرتك، بس فعلآ دي حاجه كبيرة عند إيلول تبقي كبيرة عندي بالظبط. 

قرب مني راسي فغمضت عيني لما حسيت ببوسة علي راسي ورجع وكمل وقال 

_ ومراتي أنا عارف هصالحها إزاي، الدكتور كتب ليها علي خروج تقدروا تتفضلوا أنتم وأنا هخدها وهنروح. 

كان بابا لسه هيتكلم فسحبه إياد وماما وخرجوا، لكن فضلت رغد مكانها فبصيت ليها وأنا بمسك إيد سيف وبقول 

_ إيه يا رغد مسمعتيش سيف وهو بيقول الكل يخرج؟، معلش بقي أصله عاوز يصالحني!. 

قلتها بكسوف مصطنع وأنا بصالها بكيد لما شفت غضبها وخرجت وأول ما خرجت بعدت عنه بغضب وأنا ببصله بقرف، فأترسمت معايير الدهشه علي ملامحه وتمتم بصدمة 

_ مش كنتِ لسه ماسكة أيدي وجوزي، أتغير في لحظه!.

_ لأ يا سيف مفيش حاجة أتغيرت غيرك!، بقيت طول الوقت معاها، بتاكل من أكلها هيا ومش بتفطر معايا، بقيت لما بترجع مش بتستني الغداء و تقف تحكيلي اللي حصل، أنت اللي جيت ومديت إيدك وانت حتي مكلفتش نفسك تعرف إيه اللي حصل أو هيا قالت إيه، خليني أقولها إن أنت حابب وجود رغد في حياتك علشان لو مكنتش عاوزها كنت بعدتها عنك وأنا وأنت عارفين كده!، مفيش حاجة أتغيرت غيرك فعلآ. 

كنت باصه ليه بعتاب من كل اللي قلته، يمكن ديه حاجة صغيرة من اللي جوايا، أو حتي صغيرة من اللي قلته، مكنتش عارفه أقوله إنها قايله في العلن إنها بتحبه! وكأنها قالتها ليا إنها هتخده مني!. 

قرب مني بحزن وقال بعد ما باس أيدي 

_ وأنا والله مافيه أغلي منك في حياتي، أنا مش عاوز حد غيرك يا إيلول، أنا يمكن قصرت في حقك لكن عمر ما حبي قل ليكِ أو حتي هيتغير… 

خدني في حضنه ووقتها حسيت فعلآ إني مطمنة إنه لسه سيف اللي حبيته واللي حبني، بعدت عنه بعد ما قال بمناكشه

_ وعلشان ياستي معندناش أغلي من الست إيلول فيلا علشان نخرج ناكل وبعدها نتفسح شويه. 

_ بجد يا سيف؟