شمس ومروان  كانوا قاعدين في المطعم بياكلوا..

مروان: هااه راضيه عني ولا ايه؟

شمس: انا راضيه عنك من غير ده كله اصلا..

مروان ابتسم وقال: انا مش عارف احنا  بقينا في حياه بعض ازاي فجأه كده..بس اللي اعرفه انك بقيتي اغلي حاجه فيها..

شمس بحب: وانت كمان والله..

مروان: يعني انا بجد محظوظ ان قابلتك وبقيتي جزء من يومي..قاعد بسمعك وانتي بتكلمي بشوف ضحكتك وفرحتك بابسط حاجه في الدنيا..

شمس كانت بصاله وهي مبتسمه..

مروان كمل وقال: يمكن اللي انا بتمناه من ربنا دلوقتي انك.. تفضلي جنبي علطول..ونكمل حياتنا مع بعض..

شمس: ان شاء الله يا حبيبي..تعرف يمكن انا مكنتش مبينه ده بس انا كنت بحب وجودك واهتمامك بيا..وانك تحاول تراضيني ومتسبنيش لدماغي..فنا بجد بقيت مرتاحه لوجودك و بلاقي نفسي معاك..انت جميل اوي يا مروان وبتدي حب وحنيه من كل قلبك...

مروان ابتسم وقال: ان شاء الله اقدر اخليكي مرتاحه دايما واشيلك في عينيا.

شمس بابتسامة: وانا واثقه في ده..

>>>>>>>>>>>>>>>>>>>>>>

عدي كام يوم وجه يوم خطوبه هنا وآسر..

شمس بابتسامة: لايقين علي بعض اوي..

مروان: ايوا فعلا..

شمس: آسر صاحبك مسبهاش غير لما وقعها و لبسها الدبلة..

مروان: آسر كده لما يحط عينه علي حاجه مش بيرتاح غير لما ياخدها..

شمس بضحك: ايوه..

مروان: خلي بالك بقي ده قدوتي..يعني مهما تروحي هفضل وراكي..

شمس: يعني خلاص كده..انا لبست فيك..

مروان: ايه مش عاجبك ولا حاجه؟

شمس ابتسمت وقالت: ده عاجبني اوي..

مروان بابتسامة: شطوره..

هنا بابتسامة: مامتك طلعت عسل بجد..

آسر: هي حبتك اوي علي فكره.

هنا: واناا كمان..

آسر: يااه اخيرا يا هنون..انا كده اعاكس براحتي بقي..

هنا بضحك: انت محسسني انك قبل كده كنت بتقول كلام ديني..

آسر:لا بس دلوقتي اعاكس وقلبي جامد..

هنا بضحك: مانت دافع بقي..

آسر: بس ايه الحلاوه والجمال ده كله..

هنا: دي المره العاشره اللي تقولي فيها..

آسر: احلي من جورجينا ياخواتي.

هنا: اشمعنا جورجينا؟!

آسر: اللي جات في بالي..

هنا: واما انكد عليك دلوقتي..

آسر: بعد الخطوبه طيب..

هنا: عينيا..

آسر قرب منها وقال: بحبك يا هنون..

هنا ابتسمت بخجل وقالت: شكرا...

آسر: احنا هنقضيها شكرا..

هنا: عندك مانع ؟

آسر: لا العفو يستي..

مروان: بقولك ايه يا شمس..

شمس: ايه؟

مروان: انا عايز خطوبه تاني..

شمس: ليه؟

مروان: عشان نقعد نحب في بعض كده شكلهم..

شمس ضحكت وقالت: لا بس متنكرش ان خطوبتنا كانت حلوه...

مروان: اه كنت مبسوط اوي اليوم ده..

شمس بابتسامة: بجد؟

مروان: اه وقلت بقي اساهيكي لحد ما تقلب جد..

شمس: مش سهل انت..

مروان: عيب عليكي..

شمس: بقولك تعالي نروح نرقص معاهم..

مروان: مفيش منه الكلام ده..

شمس: ليه؟

مروان: اخليكي ترقصي والناس تتفرج يعني؟!

شمس: ده كلهم اهلنا وصحابنا..

مروان: قلت لا.

شمس: طب خلاص هسقف بس..

مروان: ماشي يلا..

" وراحوا عندهم وفضلوا يضحكوا ويسقفوا وشمس كل ما تيجي ترقص مروان يبرقلها فتقف مكانها وتسقف بس"

مروان: اخيرا يا آسر لقيت حاجه تشغلك عني.. 

آسر: عيب عليك يا صحبي..عمري ما حاجه تشغلني عنك..

مروان: ياعم انا اللي بقولك..

آسر: مقدرش دانت قلبي..

كلهم ضحكوا عليه ومروان حضنه وقال: وانت حبيبي الف مبروك يا صاحبي..

آسر: الله يبارك فيك يا حبيبي..

شمس: تعالي يا هنون اما نصور الدبل بتاعتنا..

هنا بابتسامة: يلا..

>>>>>>>>>>>>>>>>>>>>>>>>>>

عدي تلت شهور وعلاقتهم كانت كويسه وكل واحد بدأ يفهم التاني اكتر..

شمس ومروان كانوا قاعدين مع بعض..

شمس: مالك كده فيه حاجه مضايقاك؟

مروان: شمس انا عايز اقولك اقولك حاجه..

شمس: قول..

مروان: انا هسافر..

شمس: بجد؟

مروان: اتعرض عليا في الشغل اني اسافر دبي سنه اشتغل في الفرع اللي هناك كمان مش بيختاروا اي حد ودي فرصه كويسه اوي ليا..

شمس ابتسمت غصب عنها وقالت: تمام سافر..

مروان: طب وانتي؟

شمس: وانا ايه؟

مروان: انا مش هبعد عنك كل ده..

شمس:  ماهو عشان شغلك وفرصه كويسه ليك..

مروان: شمس انا قدامي شهر واسافر..

شمس: بس؟

مروان: ايوا..عشان كده انا فكرت في حاجه..

شمس: إيه هي؟

مروان: شمس انا عايز اكتب كتابنا قبل ما اسافر عايز احس اني في حاجه ربطاني بيكي مش مجرد خطوبه..

شمس فرحت وقالت: وانا معنديش مانع بس ناخد رأي اهلنا..

مروان: متقلقيش هما هيوافقوا هنكتب الكتاب واول ما ارجع هنعمل الفرح علطول..

شمس بابتسامة: موافقه..

مروان بابتسامة: ده هيبقي اسعد يوم في حياتي..

شمس : وانا كمان..

>>>>>>>>>>>>>>>>>>>>>>>>>

"يوم كتب الكتاب"

شمس : انا متوتره اوي يا هنا..

هنا: اهدي يا حبيبتي مفيش اي حاجه هتبقي زي القمر وكل حاجه هتعدي..

شمس: ايه ده مروان بيرن..

هنا: ردي..

شمس: استني وخدت نفس عميق وردت..

مروان: صباح الفل علي احلي عروسه في الدنيا..

شمس: مروان انا حاسه اني مش مستوعبه انا هبقي مراتك..

مروان: والله انا اللي مش مصدق..جوايا دلوقتي احلي احساس ممكن اي حد يحسه..

شمس: وانا كمان..مروان..

مروان: نعم يا قلبي.

شمس: اوعدني انك هتخليك حنين عليا ومش هتزعلني..

مروان: والله العظيم هشيلك في عيوني ولا هسيبك زعلانه لحظه انتي لو تشوفي في اللي قلبي ليكي عمرك ما هتفكري في كده..

شمس ابتسمت وقالت: انا عارفه يا حبيبي والله بس انا دلوقتي متوتره جامد..

مروان: اهدي خالص كل ده هيعدي واليوم هيبقي حلو ان شاء الله..

شمس: ان شاء الله..هروح انا اكمل عشان بعمل الميكب..

مروان: تمام يا حبيبتي..

شمس: سلام يا حبيبي..

مروان: متنسيش تاكلي..

شمس بابتسامة: حاضر...

بليل كانوا قاعدين علي ترابيزه كتب الكتاب وشمس قاعده جنب مروان والتوتر باين عليها..وهي بتمضي ايدها بتترعش..

مروان: اهدي يا حبيبتي..

وخلصوا والمأذون اعلنهم زوج وزوجه خلاص..

شمس فضلت باصه لمروان بس مقدرتش تمسك دموعها وعيطت..

مروان قام وقف ومسك ايدها وشدها لحضنه بحنيه..

شمس حضنته جامد ومش عارفه تسيطر علي دموعها..

مروان بحنيه: متعيطيش يا شمس..ومسحلها دموعها بإيده وباس رأسها..

شمس ابتسمت له بحب ورفعت صابعها اللي عليه البصمه وقالت: انا بقيت علي اسمك يا مروان..

مروان ابتسم ومسك اديها وباسها وقال: ولحد اخر يوم في عمري..

هنا بابتسامة: الله بجد..

آسر: عقبالنا يا هنون..

هنا بابتسامة: ان شاء الله..

" وهنا شمس اتأكدت ان الحب مش دايما اخرته وجع او أذيه..وان الحب عشان يكمل محتاج الشخص اللي بيعافر عشان حبيبه"

>>>>>>>>>>>>>>>>>>>>>>>>>

" عدي سنه وفي الوقت ده مروان خلاص قرب يخلص شغله وينزل اما شمس فكانت بتعد الايام عشان تشوفه قدامها وتعيش معاه تفاصيل كتير "

اما هنا وآسر فكان فرحهم قرب وكانوا مشغولين بالتجهيزات..

شمس: تفتكري مروان هيلحق ينزل ويحضر الفرح..

هنا: ان شاء الله يا شمس..

شمس: وحشني اوي بجد..قالي سنه وهاجي ودلوقتي داخل علي سنه وشهرين..

هنا: غصب عنه يا شمس..عشان الشغل..

شمس: بجد بقيت اصبر نفسي انه خلاص هانت بس فين..

هنا: ان شاء الله ييجي قريب..

شمس: ان شاء الله..

هنا: ايه اختار انهو واحد؟

شمس : الاول خالص..

هنا: انا قلت كده برضو..خلاص متزعليش نفسك بقي..

شمس ابتسمت وقالت: حاضر..

>>>>>>>>>>>>>>>>

جه يوم الفرح ومروان مكنش رجع من السفر..

شمس بابتسامة: بسم الله ماشاء الله شكلك حلو اوي..

هنا بابتسامة: بجد؟

شمس: اجمل عروسه شافتها عيني بجد..

هنا: عقبالك يا حبيبه قلبي..

شمس: ان شاء الله..

هنا: مالك؟

شمس: مفيش شديت مع مروان شويه..

هنا: يمكن غصب عنه فعلا يا شمس..

شمس: بس ازاي ميحضرش فرح اقرب صاحب ليه كان ينزل اجازه حتي..

هنا: ما يمكن ييجي..

شمس ضحكت وقالت: في الحلم بقي ده الفرح كمان ساعتين..

هنا: معاكي حق قلت اديكي امل..

شمس: كتر خيرك..المهم انتي عروسه دلوقتي متشليش همي..

هنا بحماس: آسر وصل تحت..

شمس: يلا عشان بقي عشان تعملوا الفيريست لوك..

هنا: شكلي حلو..؟

شمس: شكلك حلو اوي..يا بخته بجد..

هنا: بحبك يا شموسه..

شمس : انا اكتر..

هنا: ايه هننزل؟

شمس: ايوا يلا...

هنا مسكت موبايلها بصت فيه وبعدين قالت: طب انزلي انتي الاول عشان تشوفي الدنيا تحت وكده..

شمس : حاضر...كانت بتنزل السلم بتبص لقت مروان واقف في وشها ولابس بدله..

شمس اتجمدت مكانها وبصتله بصدمه..

مروان بابتسامة: وحشتيني..

شمس حطت ايدها علي بقها بصدمه وعنيها دمعت..

مروان: بلاش عياط بالله عليكي..

شمس: انا مش فاهمه حاجه..

مروان فتح ايده الاتنين وقال بابتسامة: تعالي..

شمس نزلت السلم بسرعه وجريت علي حضنه..

مروان: حاسس اني روحي رجعتلي..

شمس بعياط: مروان متسبنيش لوحدي تاني..

مروان: حاضر..ومسك وشها بحنيه وقال: شمس انا كنت تايه اوي من غيرك..

شمس: طيب خلاص متسافرش تاني يا مروان..خليك معايا..

مروان بابتسامة: مش هيحصل..انا هخليني دايما جنبك يا حبيبتي..

>>>>>>>>>>>>>>>>>>>>>

عدي فتره وشمس ومروان عملوا الفرح واتجوزوا وطبعا هنا وآسر اتجوزوا..

هنا: اصحي يلا يا حبيبي عشان الشغل..

آسر بنوم: سبيني بس انام كمان شويه..

هنا: واما ارش عليك مايه ترجع تزعل..

آسر قام وقال: مايه!! يابنتي انا جوزك تصحيني كده بدلع تيجي تلعبي بخدودي كده..

هنا: انا اعرف اننا بنعمل كده للبيبي بس..بس انت ماشاء الله راجل ملو هدومك..

آسر: أقنعتيني..

هنا بابتسامة: تعالي شوف عملتك فطار..

آسر: الله تسلم ايدك يا حبيبتي..تعالي..

هنا: ليه؟

آسر باسها من خدها..

هنا ابتسمت وقالت: حبيبي يا ناس..

آسر: إيه رايك نتغدي بره انهارده..

هنا: يلا..

آسر بضحك: نتغدي!! يا هنا..لسه هروح الشغل واجي وبعدين نروح..

هنا: ماشي يا حبيبي تيجي بالسلامة..اقعد افطر بقي..

آسر: الاكل شكله توحفه..

هنا: بالهنا والشفا..

>>>>>>>>>>>>>>>>>>>>>

شمس: مروووان..

مروان: فيه إيه يا حبيبتي؟!

شمس: انا عملت مصيبه..

مروان: استر يارب عملتي ايه؟

شمس: التيشرت الاسود بتاعك

مروان: ماله؟

شمس: مبقاش اسود..

مروان: سحر يعني ولا ايه؟

شمس: لا انا حطيته في الغساله وكان اسود والله العظيم طلع لقيته ابيض كده..

مروان: سبحان الله لوحده كده..

شمس: اه محطتش اي حاجه..غير كلور..

مروان: ده لوحده كفايه يا حبيبتي..

شمس:اعمل ايه طب انا مكنتش اعرف..

مروان: انتي هتعيطي ولا ايه؟

شمس: اصل انا زهقت كل حاجه عماله تبوظ مني..وانت صعبت عليا الصراحه..

مروان: يا خبر ابيض..فداكي ياقلبي انتي بوظي وانا اشتري..

شمس: يعني انت مش زعلان..

مروان: انت هبله هزعل علي ايه وبعدين بصي علي الجانب الايجابي بقي عندي تيشرت ابيض زياده..

شمس: تصدق صح مش عايز بنطلون ابيض كمان؟

مروان: لااا عندي خليه اسود حلو..

شمس: خلاص براحتك..

مروان: بس متزعليش نفسك..جربي وحاولي عادي عشان تتعلمي..

شمس: اوعي تكون بتشتكي لامك من ورايا..

مروان ضحك وقال: واقسم بالله ما حصل..وبعدين مالاقوش في الورد عيب قاله يا احمر الخدين..

شمس: اقسم بالله انت قمر..

مروان: اقسم بالله ما فيه قمر زيك في الدنيا..

شمس: يخرابي يولاد دنا لو رجع بيا الزمن هتجوزك كل يوم..

مروان بابتسامة: بحبك يا شموستي..

شمس: انا اكتر يا حبيب قلبي..

تمت♡ بفضل الله♡