ـ يعني اي الكلام دا..؟! 

*زي ما سمعتي ، انا مش مستعده اصرف عليكي كفايه عليا اوي احمد واميره واهو زي مانتي شايفه عاوزين تقلهم فلوس 

ـ وانا ذنبي اي أن انتي عودتي عيالك على كدا ! 

ذنبي اي أن ابنك ماشي يكلم في دي ودي ويصرف عليهم ! 

ولا بنتك اللي دولابها من كتر الهدوم هيقع والميكب بقا والحاجات 

دانا يشيخه مبطلبش الا اللقمه اللي باكلها بس وحتى دي مستكتراها عليا ! 

*والله اللي اعرفه ان خلاص ابوكي مات

يعني ملكيش مكان هنا ف ياريت تاخدي هدومك وتمشي عشان ناخد راحتنا كدا 

ـ مليش حاجه ازاي؟! 

دا بيت ابويا وليا فيه قبل منك اصلا 

وهنا اتدخل احمد اللي كان بيسمع الحوار بتسليه وقال بزعيق: 

ليكي فيه منين يبت ابوكي كتب البيت لأمي من زمان اوي واظن كدا ملكيش فيه 

وحتى لو ليكي هتطلعي منه بمزاجك أو غصب عنك 

ـ يعني اي ابويا كتب البيت لأمك؟! 

أحمد: يعني زي ما سمعتي 

ولو مش مصدقه العقد جوه يثبت دا 

ودخل احمد جاب العقد وشوفته بعيني ويارتني ما شوفته...

لقيت أن البيت مكتوب لسميره "مرات ابويا " من 3 سنين ! 

يعني من بعد ما اتجوزها بسنه واحده بس! 

وثق فيها ازاي أنه يكتبهولها بالسرعه دي 

طب وانا ؟! 

انا اعمل اي 

مليش بيت ولا ليا حد اقعد عنده 

من بعد وفاة ماما وكل اهلي قاطعوني عشان هما مكانوش راضيين عن جوازة ماما وبابا وخيروني اقعد مع بابا ولا معاهم 

واخترته..

ويارتني ما اخترته 

بعد 4 شهور بس 

4 شهور من موت امي ولقيته راح اتجوز 

واتجوز واحده معاها بنت وولد 

بقا يصرف عليها وعلى عيالها وهي تعاملني اسوأ معامله 

كانت بتذلني على اللقمه وكانت الجلبيه تقعد عليا بالأيام عشان معنديش غيرها 

كنت اشتكي لبابا منها لكن لا حياة لمن تنادي 

كان بيبهدلني ويزعقلي عشانها 

فكرت كتير اروح لاهل ماما لكن صراحه خوفت يطردوني 

خوفت يقولوا ما خيرناكي من الاول واختارتيه 

اتحملي نتيجة اختيارك 

فضلت ابص للعقد بزهول لحد ما سحبته مني مرات ابويا بشده وقالت

*اتأكدتي يماما ؟ 

يلا بالسلامه شوفيلك حته تقعدي فيها 

وزقتني طلعتني بره البيت 

وانا من الصدمه محاولتش حتى اني اقاوم أو اتكلم أو اي حاجه 

اتقفل الباب في وشي 

ومعاها حسيت أني عاجزه 

مش بإيدي حلول 

حسيت اني مليش حد 

حتى أهل بابا معرفش حد فيهم 

بابا مكنش الشخص المثالي وكان مقاطعهم كلهم 

وانا كنت عيلة صغيره لما خيروني بينه وبين أهل ماما 

كان عندي 16 سنه ! 

معرفش يعني اي اختار اصلا 

واختارته 

واهو دلوقتي عندي 20 سنه

ولا معايا شهاده ولا غيره 

كنت متفوقه جدا لكن طلعتني من تانيه ثانوي 

خافت ابقى اشطر من بنتها الفاشله اللي مصاحبه بدل الواحد عشره 

وبابا معارضش 

مقالش لا بنتي تكمل تعليمها 

ملهاش الا شهادتها 

وان دي فلوسي وتصرف براحتها 

مقالش اي حاجه  

قالّها عندك حق هتاخد اي من التعليم 

واديني اهو 

حتى الشغل مش هلاقيه 

فضلت اتمشى في الشوارع 

كانت الساعه 11 بليل 

كنت جعانه جدا 

مانا بقالي 4 ساعات بلف 

بشوف اي اعلان لشغل 

لكن مفيش خالص 

/اي اللي ممشّيك لوحدك كدا يباشا 

بصيت لقيت واحد أقل ما يقال عنه أنه شمام 

فضل ماشي ورايا يعاكس وانا بسرع في خطوتي 

دموعي نزلت وانا بفكر في اللي ممكن يحصل خصوصا اننا في الشتا ومفيش حد في الشارع خالص 

/ طب تعالي بس اقولك...

وقرب مسك ايدي 

وهنا لقيت حد جه من ورا ضربه بالبوكس 

بصيت لقيته شاب لابس لبس كاجوال 

مسك الراجل دا وفضل يضربه 

لحد ما الراجل قام وطلع يجري 

جالي وقال

& اي ممشّيكي في الوقت دا 

وهنا حسيت اني محرجه جدا من الموقف ومقدرتش امسك نفسي وقعدت أعيط 

عيطت بحرقه على حالي 

وعالّي وصلتله 

وهو مكنش عارف يعمل ايه 

شاورلي اقعد وقعدت على الرصيف وسابني أعيط 

محاولش يتكلم 

فضل بس متابعني 

لحد ما هديت 

& بقيتي احسن؟ 

ـ الحمد لله

& طيب ممكن تحكيلي فيه اي

يمكن اقدر اساعدك 

قررت احكيله 

مش التفاصيل اوي 

لكن قولت ان والدي اتوفى وان مرات ابويا طردتني 

وان مليش مكان 

& طب بصي 

ينفع تيجي معايا؟ 

بصيتله بصدمه ولسا هزعق صحح بسرعه 

& والله ما اقصد حاجه قصدي تعالي بيتنا مع امي واخواتي وكدا 

احنا عايشين في بيت عيله 

وعندنا بيت عمتي اللي جدي عمله ومحدش قاعد فيه دلوقتي 

ممكن تيجي تباتي عندنا النهارده ونظبطلك البيت دا تقعدي فيه ولما تشتغلي تقدري تأجري شقه 

ـ طب وايه يخليك تعمل كدا أو تفكر اني مثلا مش حراميه 

& شكلك ميقولش كدا اصلا 

وبعدين انا عندي اخوات بنات واللي مرضاهوش لأخواتي مرضاهوش لحد 

وبالفعل قومت معاه 

فضلنا ماشيين حوالي 10 دقايق 

متكلمناش خالص 

لحد ما وصلنا 

لقيت جنينه جميله تحت وناس قاعده ومولعيين نار وبيشوو دره وبيشربوا شاي وبيضحكوا بصوت عالي 

يوسف نده: يا جدو 

بص الجد قدامه واتصدم : يقين ؟!!! 

يتبع.....