-دخلت اوضتي عشان الم حجاتي وامشي..بس سمعت موبايلي رن..رديت وكانت ماما..

- الو يا هيومه..عامله ايه يا حبيبتي؟

- بخير يا ماما الحمد لله..

- مبسوطه يا حبيبتي؟

- سكتت ثواني وخدت نفس عميق ولقيتني بقول: ايوا يا ماما مبسوطه الحمد لله..

- يارب دايما..سلميلي علي نديم..

- حاضر يا حبيبتي..

- ماشي يا حبيبتي هبقي اكلمك تاني..

- تمام يا ماما..

- مع السلامه..

- سلام يا حبيبتي..رميت الموبايل علي السرير وقعدت مكاني هعمل ايه همشي ازاي بس؟

- بعد شويه نديم جه وخبط عليها الباب..

- ادخل..

- نديم دخل وقال: انا شايفك هديتي..

- قمت وقفت وقلتله : ولله ما هداني غير تليفون ماما ليا..حرام اكسر فرحتها واروح اقلبها نكد.

- هيام انا عارف اني غلطت وغلطتي ميتسامحش عليها بس معلش..يعني حاولي مع الوقت صدقيني هتتقبلي الوضع..وهنعيش وكل حاجه هتبقي كويسه..

- نديم انا عيشت طول حياتي لو فيه حاجه انا مقدرش اعيش من غيرها بس بتأذيني او مخلياني جايه علي نفسي بسيبها مبحبش اعيش في وضع انا مش مرتاحه فيه..

- انا فاهم كل ده..بس ساعات الظروف بتكون اقوي مننا..

- سكتت شويه وقلتله: تمام يا نديم انا هستحمل لحد ما اشوف هنوصل لإيه بس اللي عايزاك تتأكد منه اني عمري ما هسامحك..

- انتي مش هتعرفي تكرهي حد يا هيام...قلبك ده ميعرفش القاسيه..

- لا عرفها علي ايدك..ومتقلقش بقيت اعرف والوقت هيثبتلك..

- تمام يا هيام..

- تمام..اتفضل بقي..

- نديم لف عشان يمشي بس رجع وقال: هيام!!

- عايز ايه تاني؟

- انتي مأكلتيش اي حاجه من امبارح؟

- لا عادي مش جايلي نفس..

- ازاي يا هيام؟ بس انتي دايمًا وانتي زهقانه كنتي بتحبي تأكلي..

- رديت وقلتله: اديك قلت لو زهقانه!! بس دلوقتي مش زهقانه انا فاضل سنه وهولع في نفسي وفيك..

- استهدي بالله..

- امشي يا نديم امشي من وشي..

- حاضر..

- يلا..

- ابقي كلي..

- ياعم انا حره..ولا انت خايف احسن اموت والبسك مصيبه..

- اكيد لا بعد الشر..

- مين قالك ان الموت شر؟

- هيام حقك عليا..انا غلطان اني اتكلمت خلاص براحتك..

- ماهو اكيد براحتيي..امال براحتك..

- بقولك ايه يا هياام..

- نعم هتقول ايه؟

- هقول لا إله إلا الله..

- محمد رسول الله..

- حلو انا ماشيي.

- بالسلامه..

- الله يسلمك..

>>>>>>>>>>>>>>>>>>>>>>>>>>>>>>>>>>

نديم دخل عند هيام الاوضه..

- نديم: بقولك ايه يا هيومه؟

- بتقول ايه ياخويا سمعني؟

- هيومه..

- اول واخر مره اسمعك تقولها..

- وفيها ايه يعني اما اقولها؟

- لا متقلش مش عايزه اسمعها منك تاني..

- منا طول عمري بقولهالك..

- و من دلوقتي الوضع اختلف..كل حاجه اتغيرت..

- هيام بس انا مش عايز ده..

- ومين فينا عايزه كنت خيرتني قبل ما تعمل اللي عملته..

- هيام..انا بجد بقيت بتعب كل شويه تلفي وترجعي لنفس الموضوع..نفسي تنسيه بقي..

- كنت نسيت انت اللي اتعمل فيك..بالعكس انتي بوظت حياه واحده عشان تنسي ومعرفتش فمتجيش تلومني علي الكلمتين بتوعي..

- نديم اتعصب وقال: يا شيخه كفايه بقي حرام عليكي كل شويه تقولي هي عملت فيك وسوت..قلتلك ايوا عملت فيا وانا غلطت وظلمتك خلاص بقي كرهيتني في نفسي..

- وانتي مكرهتنيش في نفسي لما تيجي تقولي انا معرفتش احبك حاولت بس مش قادر ..جيت اقولك عشان مش طايق اعيش معاكي حياه طبيعيه..

- عشان دي الحقيقة..ده قلبي وانا مقدرش اتحكم فيه..

- ولا اني وده قلبي برضو ومش هيقدر ينسي ولا يسامحك لحد اخر يوم في عمري يا نديم..

- براحتك بقي..انا زهقت من الكلام معاكي..

- انا اللي طايقه اتكلم معاك يعني..؟!

- خلاص خلصنا..وطلع وسابها...

- وقفت مكاني وحسيت وقتها اني خلاص مش هقدر اكمل علي الوضع ده اعصابي تعبت معتش عارفه انا بعمل ايه غير اني عايزه اوجعه زي ما وجعني..عايزه اي تخليني اهدي واحس اني بقيت كويسه..

>>>>>>>>>>>>>>>>>>>>>>>>>>>>>>>>>>

-عدي كذا يوم وانا هو كنا بنحاول نتجاهل بعض..

دخلت المطبخ كنت عايزه اشرب كوبايه قهوه..واول ما دخلت لقيته جوا..

حاولت اتصرف ولا كأنه موجود..

جيت اخد المج قام مد ايده وخده..

- بصتله وقلت: هات المج..

- بس انا اخدته الاول..

- بس انا كنت لسه هاخده..

- مش ذنبي..

- طب هات المج يا نديم انا عايزه اشرب فيه..

- اشربي في اي حاجه تانيه..هتفرق معاكي يعني؟

- ايوا انا رسمت في دماغي قبل ما ادخل..وحسيت انه لايق مع مودي..

- ده كله علي المج ده؟

- ايوا..

- انتوا عليكوا حاجات غريبه..اتفضلي يستي..

- شكرا..

- افتكري الجمايل..

- اه طبعا جمايلك مغرقاني..

- لا ابوس ايدك متبدأيش..

- ليه نتسلي شويه؟

- لااا وخاد المج وطلع بسرعه..

- بصيت عليه وقلت يخساره هطلع الطاقه السلبيه دي في مين دلوقتي..وعملت القهوه وخدت المج وطلعت بره وقعدت قدام الشاشه..

- نديم: ايه ده؟

- إيه؟

- ايه اللي قعدك هنا؟طلعتي من الاوضه يعني؟

- اكيد مش هكمل حياتي في الاوضه هفوق لنفسي كده واشوف الدنيا..

- خلصتي اكتئاب يعني؟

- ومين قالك اصلا اني كنت مكتئبه؟! انا بس كنت بستعد الجاي واحط الخطه...

- ربنا يستر عليا..

- خاف علي نفسك بقي..

- اوعي تعملي حاجه كده ولا كده خالتك تزعل..

- اااه عارف لو انتي مش ابن خالتي..كان زماني مخلصه عليك من بدري..

- قصدك لو مش جوزك..

- لا لو مش ابن خالتي..

- الحمد لله اخترت صح..

- ضحكت بسخريه وقلت: اه عشان تعرف تلعبها بجد..

- انا خدت قرار من هنا ورايح اني مش هرد عليكي..

- مش شطاره منك بس مش عارف هترد تقول ايه..

- ما بلاش تنرفزيني يا هيام..

- هتعمل ايه برضو؟

- هسكت..

- لازم..

- هشرب القهوه واسكت..

- برافو..

>>>>>>>>>>>>>>>>>>>>>>>>>>>>>>>>>>

تاني يوم نديم كان خلاص نازل الشغل..

- كنت نايمه وصحيت علي ريحه برفان بيترش..فتحت عيني وبصيت عليه لقيته واقف في قدام المرايه بيجهز.. قلتله : خير يا باشا بتعمل ايه في اوضتي دلوقتي..

- خلاص نازل الشغل..

- هي اجازتك خلصت؟

- اه منا كنت واخد اسبوع..

- ايوه صح معلش نسيت انك حاسبها بالمللي..

- اه يا هيام ومخطط ومدبر وعامل كل اللي قلتي عليه واللي لسه هتقوليه..

- طب خلاص براحه علي نفسك شويه..هو انا كنت بقول حاجه غلط يعني..؟!

- هو انتي عمرك تقولي حاجه غلط اللي انا بقول وانا بعمل كل حاجه..

- ضحكت وقلتله: انت مالك كده؟ فيه ايه من الصبح؟

- مذاكر  الاسطوانه كويس..

- عنيا اعملك احلي أسطوانه وهتعجبك اوي اكتر من التانيه..

- جهزيها بقي وانتي بتعملي الغدا..

- غدا؟!

- اه عايزك تعمليلي مكرونه بشاميل..

- ده عند مامتك..

- مش اسمها عند امك..

- لا خالتي مينفعش..

- ايوا صح..

- اطفي النور يلا عايز انام..

- هيام انا لو جيت وملقتش الاكل جاهز هنزعل كلنا..

- عايزه اجرب..

- تجربي ايه؟

- انك تزعلني وكده..

- مقدرش..

- ههههه ضحكتني..

- بالله عليكي تعملي اكل هاكل ايه يعني؟

- اشتري وانت جاي..

- مانتي عارفه اني مبحبش اكل بره..

- هات ليا وكل انت عيش وجبنه..

- مبهزرش..

- منا عارفه..

- يعني ايه يعني؟

- يعني مش هطبخ واللي عندك اعمله..

- دي مبقتش عيشه..

- لسه واخد بالك..

- يعني انتي مش هتاكي؟

- هطبخ لنفسي وانت مش هنا..

- هو عند وخلاص..

- لا استخسار...

- ماشي يا هيام..اما اجي من الشغل ونوصل لحل عشان متأخرش..

- يلا بقي مع السلامه..اطفي النور ده..

- طب مش طفيه..ومشي

- اااف بقي لسه هقوم..

>>>>>>>>>>>>>>>>>>>>>>>>>>>>>>>>>>

- افتحي يا صفصف..

- انتي يا بت انتي  مش عروسه ايه اللي نزلك..

- وحشتوني..

- وانت والله يا هيومه الواد نديم واخدك مننا..

- ضحكت وقلتلها: اه بس خلاص رجعتلكوا..

- حبيبه قلب خالتك..

- رحت حضنت خالتي وسلمت عليها: حبيبتي يا خالتو..

- وانتي يا خايبه مش عارفه تقعدي الواد جنبك نازل الشغل بعد اسبوع..

- شغله بقي..هعمل ايه..

-  منال:يلا عشان يوحشك..

- قلت في سري : اه امال..بقولك يا خالتو..

- نعم؟

- انا كنت نازله اسألك علي حاجه..

- أسألي..

- نديم بيحب المكرونه البشاميل جوسي ولا ماسكه نفسها؟

- صافيه: اوعا بقي القمر اللي هيطبخ..بيحبها جوسي يستي..

- ماشي هطلع انا عشان الحق اعمله قبل ما ييجي..

- منال: ماشي يا حبيبتي..

- مع السلامه هنزلكوا بليل..

- منال: طيب..هستناكي..

- وخرجت علي الباب و ضحكت بانتصار كده وطلعت شقتي..

- بعد ما نديم خلص شغله ورجع..

- سمعت باب الشقه بيفتح كنت قاعده قدام الشاشه وفضلت اضحك جامد..

- نديم دخل وراح عند هيام..وقال: كنت عارف اني مش ههون عليكي..

- مش فاهمه..

- فين المكرونه؟

- ومين قالك اني عملت مكرونه..

- كفايه تمثيل بقي يا هيام..

- بس انا معملتش بجد..

- ازاي انا حودت علي ماما وانا طالع وقالتلي انك عاملالي مكرونه..

- ضحكت وقلتله: ااه لا ده فيلم..

- نديم بعدم فهم: فيلم ازاي يعني؟

- مش عارف الفيلم خطه يعني عشان ابين ان انا بطبخلك وكده..

- والله؟

- ايوا خطه حلوه صح..قلت اتقمص الدور بقي وكده..

- لا شاطره والله..

- منا عارفه..

-  نديم بعصبيه:هيام انت ليه كده بجد؟

-  رديت عليه ببرود وقلت: انت مش عارف الاجابه؟

-  نديم سكت ثواني وقال: ماشي يا هيام اعملي اللي انتي عايزاه لو ده هيريحك..

-  لا كتر خيرك بيهمك راحتي اوي..

-  ايوا يا هيام بيهمني..

-  ضحكت بسخريه وقلتله: انت هتقولي..

-  نديم رمي الجاكيت علي الكرسي ودخل جوا..

-  تعالي شيل الجاكيت ده وانا لسه منضفه..

-  نديم مشي ومردش عليها..

-  اه اعمل مقموص بقي..ده اللي ناقص

>>>>>>>>>>>>>>>>>>>>>>>>>>>>>>>>>>

بليل نزلنا انا وهو عند خالتي..

- كفايه يا خالتو مش هناكل ده كله..

- استني في مانجا جوه انتي بتحبيها..

- لا مش عايزه متقوميش تاني..

- بقي كده يا هيام؟

- خلاص يا خالتو هقوم اجيب انا..

- هتلاقيها في الدرج..

- حاضر..

- نديم بص عليها وهي داخله وقال: وانا هدخل اجيب مايه..عشان عطشت..

- كنت واقفه لقيت نادين داخل..: ايه جيت ورايا ليه؟

- مستغرب الصراحه..

- من ايه؟

- عايشه الدور اوي..

- وليه متقولش ان ده اللي كان يحصل بجد مش صعب امثله يعني..

- ماشي ما احنا فيها لسه..

- انت بره بره خالص..بره تفكيري وبره حياتي ومش هتبقي فيها سامع؟

- لا عشان جوزك..

- ده في الحلم..

- لا في الحقيقه يعني اعمل اللي انا عايزه قدامهم بره ومحدش يقدر يقولي حاجه..

- ابقي اعمل كده ولا المسني هقطعلك ايدك علطول..

- ولا تعرفي تعملي حاجه..

- يبقي متعرفنيش وانت اصلا كنت هتعرفي منين؟

- يا دي النيله..

- وسع كده خليني اطلع واكل المانجا..

- كلي ياختي..

- هاكل ياخويا..

" وطلعنا قعدنا وفضلنا نضحك ونهزر وببقي مبسوطه وكل حاجه تمام لحد ما افتكر  الحقيقه أسأل نفسي ليه هي الفرحه دي كانت كتير عليا"

- نديم جاله مكالمه ودخل رد عليها في البلكونه..

- لما رجع حسيت ان ملامحه اتغيرت..وحط الموبايل علي الترابيزه...وقعد..

- منال: بقولك ايه يا نديم..

- نعم يا ماما؟

- السلك اللي بنشر عليه نزل لتحت شويه عايزاك ترفعهولي عشان هغسل بكره..

- حاضر يا ماما..

- تسلملي يا حبيبي..ونديم قام معاها عشان يعدل السلك..

- وقعدت انا وصافيه نتكلم مع بعض شويه بس انا كل تفكيري كان مع المكالمه وحسيت اني فيه حاجه..ببص علي الموبايل لقيته نور..: عملت نفسي كأني هبص علي الساعه..ولقيت الرساله باينه من بره ومكتوب فيها" براحتك يا نديم بس انا عارفه انك لسه بتحبني ومتنساش ميعاد بكره" بصيت للرساله وحسيت اني مش عارفه استوعب اي حاجه..

- صافيه: ايه يا بنتي روحتي فين..

-  رديت بهدوء عكس اللي جوايا وقلت :مفيش معاكي..