كريم كان واقف في وسط الصالة وجسمه كله بيترعش من كتر الغضب والكسرة والندم

 ماسك الفلاشة في ايده والدموع مغرقة وشه ونزل الشقة تحت لامه ورزع الباب بكل قوته لدرجة ان امه اتخضت وقامت من مكانها مخضوضة وبصتله وقالتله في ايه يا كريم يا ابني مالك شكلك عامل كدا ليه

 كريم قرب منها وعيونه فيها نظرة كره وعتاب عمرها ما شافتها منه ورمى الفلاشة والتليفون قدامها على الترابيزة وقالها بصوت هز الحيطان اسمعي اسمعي عمايلك الاسطوانة المشروخة اللي عيشتيني فيها وخلتيني اظلم انسانة ملهاش أي ذنب

 امه بدأت تتوتر وقالتله اسمع ايه يا ابني انت اتجننت انت بتكلم امك كدا ليه وبدأت تمثل التعب وتقول اه يا قلبي الحقني يا كريم

 كريم زعق بأعلى صوته وقالها بلاش تمثيل خلاص التمثيلية بتاعتك اتكشفت ونور سابت البيت واتطلقت مني غيابي وسابتلي التسجيل دا اللي بيبين حقيقتك

 امه حاولت تنكر وتقول دا كدب ومحصلش ودي بتتبلى عليا عشان تاخد الواد والفلوس بس كريم شغل التسجيل وصوت امه وهي بتتكلم بكل غل وبتعترف بكل المؤامرات وبأنها بتوقع نفسها عشان يضرب نور بقا مالي المكان امه اول ما سمعت صوتها لسانها اتلجم والدموع نزلت من عينيها وقالتله بنبرة انكسار وخوف انا عملت كل دا عشانكم عملت كدا من حرقة قلبي على اخوك اللي مات وسابنا وعشان الواد ميبعدش عننا

 كريم بصلها بسخرية ووجع وقالها كدابة انتي معملتيش كدا عشان اخويا ولا عشان حفيدك انتي عملتي كدا عشان الفلوس والورث وبس انتي همك المال والسيطرة وضيعتي اخويا ودلوقتي ضيعتيني وظلمتي غلبانة وخلتيني ابقى وحش ومجرم في حقها انا مش قاعد في البيت دا تاني وسابها وخرج وهو مش سامع صراخها ونداها عليه 

وأمه قعدت في الارض تعيط بحرقة وبدأت تحس بالذنب والندم بياكل قلبها بعد ما خسرت ابنها التاني بسبب طمعها 

كريم بقا يلف في الشوارع زي المجنون وبدأ يدور على نور في كل مكان راح لبيت ابوها وسأل جيرانها وسأل أصحابها ومحدش كان عارف طريقها كأن الارض انشقت وبلعتها وحس بعجز شديد وقعد في كافيه وهو تعبان ومتبهدل وطلع تليفونه ورن على رانيا زميلته اللي بيحبها وقالها بنبرة كلها رجاء وعياط رانيا انا محتاجك اوي تعاليلي في كافيه اللي جنب الشغل 

رانيا اتخضت من صوته وجت بسرعة واول ما دخلت وتصدمت من شكله عيونه حمرة ووشه دبلان وهدومه متبهدلة وقعدت جنبه وقالتله في ايه يا كريم مالك ايه اللي وصلك للحال دا كريم بدأ يحكيلها على كل حاجة من أول ما امه كدبت عليه لحد ما سمع التسجيل وعرف ظلم نور وهروبها ورانيا كانت بتسمعه وهي متأثرة وزعلانة على حاله وطبطبت على ايده وقالتله اهدا يا كريم انت غلطت عشان صدقت من غير ما تتأكد بس انت مكنتش تعرف الحقيقة وانا هفضل جنبك ومش هسيبك لحد ما تتخطى المحنة دي وتلاقيها وتعتذر منها

 على الجانب التاني خالص وفي بلد تانية بعيدة نور كانت قاعدة في شقة صغيرة هادية في السعودية الشقة دي كانت بتاعة باباها الله يرحمه لما كان شغال هناك زمان نور كانت واقفة في البلكونة وبتبص على الشوارع وهي حاسة بحزن ووجع جوة قلبها بس في نفس الوقت راضية ومطمنة عشان خاطر ابنها يوسف اللي نفسيته بقت احسن بكتير وبقى يضحك ويلعب بعد ما بعد عن نكد وزعيق بيت جدته وكريم نور حست انها انقذت ابنها وانقذت نفسها من جحيم حقيقي 

مرت خمس شهور ونور بدأت تتاقلم على حياتها الجديدة ومبتفكرش في اللي فات وبتحاول تقفل الصفحة دي تماما وفي يوم بالليل كانت قاعدة بتقلب في الفيسبوك وفجأة عينها وقعت على بوست الفرح بتاع كريم ورانيا وشافت صورهم وهما لابسين دبل وكاتبين كلام حب لبعض نور في اللحظة دي حست بشكة قوية في قلبها وقلبها اتكسر ميت حتة والدموع نزلت من عينيها بحرقة وزعلت اوي من نفسها ان في يوم صعب عليها الجوازة دي واكتشفت ان كريم مزعلش عليها ولا فكر في الظلم اللي عاشته معاه واتجوز حبيبته وعاش حياته والكسرة رجعت لقلبها تاني من جديد