وصلوا قدام البيت ومروان ركن العربيه ونزلوا..

شمس: يلا اتحرك كده..

مروان: أعمل إيه؟

شمس: شيل الشنط معيا يا مروان..

مروان: ليه..

شمس: خلاص انا هشيلهم لوحدي..

مروان: يستي بهزر معاكي..

شمس: كل حاجه عندك هزار يعني؟!

مروان: في إيه يا شمس؟!

شمس: مفيش..

مروان: خلاص يستي هشيلهم..

شمس: هو انتي بتعمل الحاجه غصب عنك..ولا مستخسر تساعدني..

مروان: مش كده والله..انا كنت بهزر بس..

شمس: ماشي..

مروان: اوعي وانا هشيلهم..

شمس: قلت لا..

مروان: خلاص بقي يا شمس..

شمس: كل حاجه خلاص انا مش هتكلم معاك تاني اصلا..

مروان: هنتخاصم يعني؟

شمس: اه انت  نفسك في كده اصلا..

مروان: ليه يا شمس هو انت ضرباني علي ايدي؟!..انا اللي عملت ده بمزاجي..ولو شايف انها هتبقي غصب عني مكنتش هعملها..

شمس: ماشي..

مروان: خلاص بقي متزعليش..

شمس: خلاص مفيش حاجه..

مروان: متأكدة؟

شمس: اه 

مروان: اوعي كده أما أساعدك..

شمس: لا هتشيلهم كلهم..

مروان: يستي كنت هشيلهم والله..

شمس: كنت اعملها من الاول..

مروان: يستي خلاص معلش..

شمس: يلا هاتهم و تعالي ورايا.. 

مروان بضحك: حاضر

>>>>>>>>>>>>>>>>>>>

عدي يومين وشمس مكنتش شافت مروان فيهم خالص ولا كلمها..

شمس: ماله مختفي ليه؟! خليه مش أنا كل مره اللي هسأل..

الباب خبط..

شمس: اتفضل..

هنا: ازيك يا بت يا شموسه..

شمس: اهلا يا هنون تعالي..

هنا: جهزتي الدريس عشان مستعجله..

شمس: اه اهوه..

هنا: شكرا..صحيح مش أنا قابلت مروان خطيبك في الكافيه..

شمس: بجد؟

هنا: اه وكان قاعد مع واحده..

شمس: واحده؟

هنا: اه انتي مش بتغيري عليه من الشغل ده اصله فيه بنات حلوه اوي..

شمس حست انها زعلت بس قالت بهدوء: لا انا واثقه فيه..

هنا: ايوا بقي ربنا يخليكوا بعض..

شمس: أمين..

هنا: انا همشي انا بقي..سلام..

شمس: مع السلامه...

هنا طلعت وشمس قعدت علي السرير وحست انها مضايقه ومش عارفه ليه وقالت: ماشي يا مروان انت حر..بس انا مش هجري عليك تاني..

بليل كانوا شمس قاعده بره مع مامتها..

زينب: بقولك ايه يا شمس..

شمس: نعم يا ماما..

زينب: اطلعي إرمي كيس الزباله بره..

شمس: طيب يا ماما شويه..

زينب: شويه وهتنسي ومش هطلعيه..

شمس: متخافيش..

زينب: بقولك قومي..احسن هطفي الشاشه دي خالص..

شمس: حاضر يا ماما...هو فين؟

زينب: هتلاقيه في المطبخ..

شمس: طيب..

شمس خدت كيس الزباله وطلعت رمته بتبص لقت مروان واقف بيركن عربيته..

عملت نفسها مش شيفاه وكملت مشي..

مروان: إيه هو انا شفاف؟

شمس: يمكن..اصلي مشفتكش خالص..

مروان: شكلك محتاجه نضاره بقي..

شمس: عشان اشوفك؟!

مروان: اه..

شمس: يبقي بلاش احسن..

مروان: يا بنتي بطلي..

شمس: مانت اللي بدأت الاول مترجعش تزعل بقي..

مروان:بس ايه الاسدال ده كنتي بصلي ولا ايه؟

شمس: اه عقبالك..كده.

مروان: صليت الحمد لله..

شمس: شطور..

مروان: ابقي فكريني ادعيلك..

شمس: بركاتك..يا مولانا..

مروان: مبتسأليش عليا يعني..

شمس: عندي حاجات أهم..

مروان: أهم مني..

شمس: انت شايف انك مهم؟

مروان: اه طبعا خطيبك..

شمس: ييوه علطول بنسي كده..

مروان: لا سلامه عقلك..

شمس: انت عايز مني إيه موقفني ليه دلوقتي؟

مروان: ايه وراكي مؤتمر..

شمس: اه متضيعش وقتي بقي..

مروان: بقي كده..وانا اللي جاي أطمن عليكي..واشوفك عامله ايه؟

شمس: لا كتر خيرك والله..

مروان: كان ورايا شغل كتير اوي اليومين اللي فاتوا..

شمس في سرها: اه في الكافيه..

مروان: بتقولي ايه؟

شمس: بقول ربنا معاك..

مروان: تمام..ابقي اسألي طيب..

شمس: ليه كنت من بقيت اهلي؟!

مروان: خلاص هسأل انا..

شمس: مش هرد عليك..

مروان: هجيلك تحت البلكونه..

شمس ضحكت وقالت: هندخل علي شغل بعض ولا إيه؟!

مروان: لا انا عندي رهاب اجتماعي..

شمس: سيب الموضوع ده عليا..

مروان: وماله..

شمس: يلا إلي اللقاء..

مروان بابتسامة: سلااام..يا شموسه..

شمس لفت وقالت: إيه؟

مروان:شموسه وحش؟

شمس: لا اكيد بس استغربت..

مروان: خطيبك وبدلعك بقي..

شمس: ماشي يا عم..

مروان: مش هتدلعيني انتي كمان ولا إيه؟

شمس: انا مبدعلش حد يابني شوف انت رايح فين..

مروان: رايح بيتي..

شمس: طب يلا..

>>>>>>>>>>>>>>>>>>>>>>>>

تاني يوم شمس كانت قاعده في اوضتها وفجأه موبايلها رن بصت علي الشاشه لقت مروان اللي بيتصل..ردت عليه..

شمس: مروان باشا مره واحده..

مروان: أيوه هو بذات نفسه..

شمس: التليفون مش مصدق نفسه..

مروان: التليفون ولا انتي؟

شمس: انت فاكر نفسك محور الكون؟!

مروان: بتعملي إيه كده؟

شمس: قاعده بقرأ روايه..

مروان: بتحبي الروايات والرومانسيه وكده؟!

شمس: انا معنديش مشاعر يعني ولا إيه؟

مروان: لا يستي كلك مشاعر وأحاسيس..

شمس: عارفه..

مروان: احكيلي كده اي حاجه..

شمس: انت فاضي يا مروان..

مروان: اه والله فاضي مش بعمل حاجه قلت ارن عليكي اتسلي شويه..

شمس: يلا وقتك خلص..

مروان: طب ما تقوليلي كده اي روايه اقرأها..

شمس: هتقرأ رومانسي؟

مروان: اه منا إنسان برضو

شمس: طيب هبعتلك شويه أسماء علي واتساب..

مروان: اوكيه..

شمس: طيب يلا سيبني أكمل بقي..

مروان: ماشي يلا سلاام

شمس قفلت معاه وكملت..

بعد حوالي نص ساعه..موبايلها رن تاني وكان مروان..

شمس: عايز ايه تاني؟

مروان: زهقت..

شمس: ليه؟

مروان: مش راضيين يعترفوا لبعض..

شمس: انت في البارت الكام؟

مروان: السابع..

شمس ضحكت وقالت: ده زمانهم لسه مفكروش في بعض بالغلط حتي..

مروان: أعمل ايه دلوقتى بقي؟

شمس: روح نام يا مروان..

مروان : انا بقول كده برضو...

شمس: ماشي سلام..

مروان: مع السلامه..

وقفلت ولسه بتحط الموبايل رن تاني..

شمس: انت مش وراك غيري ولا ايه؟.

مروان: إفتكرت حاجه هسألك عليها..

شمس: إرغي..

مروان: بقولك عندي اجتماع مهم بكره وفي تيشرت اسود كده البس عليه جينز ولا بيج كلاسيك كده؟

شمس: لو اجتماع  إلبس البيج..

مروان: انا قلت كده برضو..

شمس: وبتسألني ليه؟

مروان: قلت أرخم بس..

شمس: رنه كمان بقي ومتبقاش تزعل..

مروان: اعملي نفسك مهمه بقي..

شمس: ابقي المحك بترن بقي..

مروان: يا شيخه روحي..

شمس: ان معملتلكش بلوك مبقاش أنا..

مروان: هتروحي مني فين ده البيت لازق في البيت..

شمس: هعمل ايه يعني ربنا يعيني عليك..

>>>>>>>>>>>>>>>>>>

عند هنا كانت بتعمل مقابله في شركه عشان تشتغل..

هنا: يعني كده انا اتقبلت..

المدير: ايوا وتقدري تبدأي شغل من دلوقتي..

هنا : تمام شكرا لحضرتك...وطلعت وقفلت الباب..

لقته في وشها..

آسر: إيه ده هنا؟!

هنا: لا كده كتير بقي..

آسر: بتعملي إيه هنا؟!

هنا:انا هشتغل هنا..

آسر: احلفي..

هنا: اه والله..وانت بتعمل ايه هنا؟

آسر: انا شغال هنا برضو.

هنا: امم يعني مش هخلص منك..

آسر:نصيبك بقي..

هنا: امم طب ممكن تعرفني علي الاماكن اللي في الشركه؟

آسر: ده من عيوني..بس كده دانتي تؤمري..

هنا بضحك: طب يلا..

آسر: يلا..

هنا: طب واقف ليه؟

آسر وهو بيمشي: اه..صح..

هنا ضحكت عليه ومشيوا سوا..

>>>>>>>>>>>>>>>>>>>>

في اليوم اللي بعده، شمس كانت خارجة من البيت، ووقفت تستنى هنا..

وهي واقفة لمحت مروان واقف جنب عربيته وبيتكلم في التليفون..

شمس شافته وبعدين كانت هتكمل طريقها بس وقفت لما سمعته بيقول:

مروان: متقلقيش.. أنا هتصرف، بس خلي الموضوع بينا دلوقتي..

شمس وقفت مكانها وبصتله باستغراب..

شمس في سرها: بينا؟! مين دي بقى؟

حاولت تتجاهل الموضوع وكملت مشي..لكن مروان لمحها..

مروان: شمس!

شمس وقفت وبصتله: نعم؟

مروان: إنتي كنتي هنا من إمتى؟

شمس: من شوية.

مروان: ومجاتيش كلمتيني ليه؟

شمس : أصلك مش فاضي!

مروان: بتكلم في الموبايل عادي..

شمس: ما تتكلم..أنا مالي..؟!

مروان: مالك!

شمس: ايوا..روح كمّل مكالمتك.

مروان: إنتي بتتكلمي كده ليه؟

شمس: بتكلم عادي.

مروان: لا فيه حاجه؟

شمس: قلتلك لا الله..

وسابته ومشيت، ومروان فضل واقف مكانه بيبصلها باستغراب..

مروان: هي فهمت إيه دلوقتي؟!