رواية جوز حرامية الفصل الثالث 3 بقلم عمرو خالد

رواية جوز حرامية الفصل الثالث 3 بقلم عمرو خالد

رواية جوز حرامية الفصل الثالث 3 هى رواية من كتابة عمرو خالد رواية جوز حرامية الفصل الثالث 3 صدر لاول مرة على موقع التواصل الاجتماعى فيسبوك رواية جوز حرامية الفصل الثالث 3 حقق تفاعل كبير على الفيسبوك لذلك سنعرض لكم رواية جوز حرامية الفصل الثالث 3

رواية جوز حرامية بقلم عمرو خالد

رواية جوز حرامية الفصل الثالث 3

: مش عيب لما تبقى دكتور محترم وتسرق 
• ماهو أكيد السبب إللي يخلي دكتور زيي يسرق يخلي محامية زيك تسرق بردو 
: أنت عرفت! 
• سبحان الله وأنتي عرفتي إزاي؟ 
: بالنفس الطريقة اللي أنت عرفت بيها 
• من محفظتي؟ 
: لا من الممرضة إللي زعقتلها ومشيتها 
• ممرضة غبية كنت مفهمها متكلمنيش لحد ما أروح القسم
: وأنت إللي لقيت محفظتي
• ابقي خلي بالك من محفظتك بعد كده عشان عيب محامية شاطرة زيك تقع في غلطة زي دي 
: هخلي بالي حاضر وكلامنا لسه مخلصش 
• أكيد لسه مخلصش وشكرًا علىٰ إللي عملتيه مع فرح
: لا عادي ده واجبي هي إللي ظهرت قدامي فجاة وتعبت 
• اغمىٰ عليها ؟ 
: اه تقريبًا كانت بتجري من حاجة وخايفة وفجأة وقعت
• ماشي يا شهد شكرًا مرة تانية 
اتخضيت لما لقيت شهد إللي بتكلمني من تليفون فرح، جه في بالي خمسين سيناريو ورا بعض لحد ما لقيتها في المستشفىٰ جيباها بعد ما شافتها تعبانة، مجاش في بالي السيناريو ده ابدًا وقولت أكيد في سبب ورا الحوار ده، لحد ما اكتشفت أن فرح كويسة وبخير .. 
: مين دي! 
• دي محامية
: واضح أنك تعرفها عشان كده متفاجئتش أنها هي إللي كانت مع فرح
• يعني اعرفها صدفة
: صدفة غريبة بردو لما تكون هي إللي مع فرح لما تتعب وتتكرر نفس الصدفة
• عايزة أي يا رحمة
: مش عايزة حاجة تعالى عشان تشوف فرح
كنت حاسس أن المشهد ده مش هيكمل إلا لما رحمة تظهر الغيرة بتاعتها، دخلت الاوضة إللي كانت فيها فرح، وكانت فاقت الحمدلله واتطمنا عليها . 
: أي إللي حصل؟ 
لقيتها بتبص علىٰ أمي ورحمة وحسيت أنها مش هتعرف تتكلم وهما موجودين، خليتهم يخرجوا يجيبوا أي حاجة من غير ما يحسوا أن في حاجة أو في حوار .. 
: أي إللي حصل احكيلي
• فاكر الولد إللي قولتلك أنه بيضايقني؟ 
: أيوة 
• مطلعش معانا في الكلية
: أمال؟ 
• طلع مراقبني
: مراقبك إزاي وليه؟ 
• مش عارفة لاحظت أنه مبيدخلش أي محاضرة وقاعد طول الوقت في الكافتيريا وبيبص عليا
: وأنتي عرفتي إزاي؟ 
• ركزت معاه في الجامعة والنهاردة وأنا راجعة لقيته خارج من عربية وبيمشي ورايا وجريت منه لحد ما تعبت وخبطت في واحدة ومحستش بنفسي 
: إللي هي جابتك المستشفى؟ 
• ايوة
: طيب ارتاحي ومتخرجيش من البيت اليومين دول لحد ما نشوف هنعمل أي 
مش عارف حسيتها خايفة أو مش مجمعة أو بيتهيقلها، ممكن تكون مكانتش مركز أو تعبانة وحست أن في حد بيراقبها، أو ممكن خوفها من حاجة خلاها تحس بكده، وده خلاني أخاف عليها اكتر لأني مش عارف إذا كان في حد فعلاً بيراقبها ولا هي إللي مضغوطة وخايفة من حاجة .
روحت المكتب وأنا حاسة باليأس بعد ما يونس كشفني وكشف إللي بعمله، مش عارفة القضية دي هتخلص علىٰ أي لأني قلقانة وخايفة علىٰ أبويا إللي محبوس ظلم بسبب المخـدرات إللي لقيوها معاه، والغريب أنهم لقيوها في مكان محدش في الدنيا يتوقعه، لقيوها في الساعة بتاعته، ودي اعبث حاجة ممكن تحصل حقيقي . 
: عمر أي إللي جابك مقولتليش أنك جاي
• هو أنا عارف اوصلك
: ليه مش عارف ماهو البيت معروف والطريق ميتوهش
• طب مأنا كنت عندكم من يومين
: قالولي والله وكنت تعبانة ونايمة مأنت عارف الشغل
• والمرة إللي قبلها ؟ 
: بتاعت عيد ميلاد صحبتي! 
• أنتي بتتهربي ليه مني يا شهد
: عمر أنت أكتر واحد عارف أننا وافقنا علىٰ الخطوبة عشان خاطر أهلنا 
• طب ماهو اتحطينا في الأمر الواقع
: طيب خلاص وأنت زعلان ليه من الأمر الواقع هي دي حياتي ودي ظروفي ودي طريقتي ومش هتتغير لا قبل الخطوبة ولا بعدها
• أنتي شايفة كده؟ 
: ومش شايفة غير كده 
• إللي يريحك
واخد بعضه وقام مشي وأنا مش همسك فيه يعني ولا دايبة فيه، الباب قدامه وهو عارف طريقة وأنا مش هتعلق في حاجة أنا مش عايزاها، كفاية عليا أني بشتغل في مكان مش عايزاه، ودخلت كلية مش عايزاها، وخطبت شخص مش عايزاه، تقريبًا عايشة كل حاجة أنا مش عايزاها، أعتقد مفيش أسوء من كده تاني، بس بحاول اتعايش واعيش وامشي الدنيا عشان مش هتقف عليا ولا علىٰ غيري، ولكن اتعودت أني أعمل إللي عليا بغض النظر اذا كنت عايزاه ولا لا . 
: عمر كان بيسأل عليكي 
• ايوة ماهو كان عندي في المكتب
: وطبعًا كالعادة قفلتيها في وشه
• هو أنا حنفية هقفل في وشه هو إللي بيظهر في أوقات غريبة
: والمفروض يظهرلك أمته 
• يا ريت ميظهرليش أصلًا 
: والله أنتي شايفة كده 
• ومش شايفة غير كده يا جماعة هو أنا كل ما اكلم حد يقولي أنتي شايفة كده 
: إللي يريحك يا شهد
• ماهو لو أنا بعمل إللي بيريحني مكنتش هوصل للمرحلة دي أنا طول عمري بعمل إللي بيريحكم سيبوني مرة أعمل حاجة تريحني
وسبتها ومشيت دخلت اوضتي وأنا مش طايقة نفسي ولا طايقة حد أصلًا، محدش حاسس بيا ولا فاهم إللي أنا بعمله، طول الوقت محطوطة تحت ضغط ومطلوب مني أعمل كل حاجة، ومطلوب اعمل كل حاجة صح يعني مغلطش ولا اكسل ولا ابطل ولا أرفض ولا اعترض، وكأنك ربوت عايزين يحركوك يمين وشمال بمزاجهم، وأنا بطلت أراضي حد، وبقيت بمشي بمزاجي أنا، واعمل الصح إللي انا شايفة بالطريقة إللي تناسبني .
: طب أمال أي بسرق عشان جوز أمي ميطردنيش بره البيت وجو الصعبانيات ده مدخلش عليا
• يعني جو أنك بتسرق عشان الغلابة ده دخل عليا بردو 
: قولت أشوف اخرك 
• تمثيلك في السرقة فاشل يا دكتور حتىٰ الفاتورة بتاعت اللبن معرفتش تخبيها كويس عشان تبان حرامي بجد
: يعني أنتي إللي كنتي بتسرقي الساعات بجد
• ايوة ده بس عشان اتاكد من حاجة 
: حاجة أي؟ 
• خليل المصري مرفوع عليه قضية إستيراد مواد محظورة من الخارج 
: طب واي علاقة ده بالساعات
• عشان هو مبيستوردش غير الساعات
: اه يعني ممكن الحاجات دي تبقى موجودة في الساعات
• بالظبط والنوع ده الجرام بتاعه بألف دولار
: الف دولار! 
• ايوة والفكرة أن أبويا مقبوض عليه في قضية مخـدرات
: وده أي علاقته بالساعات؟ 
• ماهو المواد المخدرة إللي لقيوها مع أبويا 
: متقوليش أنها كانت في الساعة؟ 
• بالظبط
: وده حصل إزاي؟ 
• أبويا شغال في الجمارك ولما حاول حد يديله رشوة عشان يمشي الدنيا ورفض اداله الساعة كـ نوع من أنواع التقدير والامانة بتاعته
: وطبعًا الشخص ده تبع خليل المصري
• مأنت فهمت اهو 
: دي لفة طويلة
• أنا بس محتاجة أثبت أن الساعات إللي جاية من بره أن هي إللي فيها المواد المخدرة
: وده هتثبتيه إزاي! 
• من الساعة إللي معاك
: الساعة أنا بعتها وجبت الفلوس للولد
• يا دكتور عيب عليك هو أنت لما تظبط حوار زي ده وتتفق مع الولد أنا مش هعرف يعني الساعة فين يا دكتور
: يخربيت دماغك ده إنتي محامية ثعبانية
• أموت أنا في الحركات الثعبانية
دماغها مطلعتش سهلة نهائي دي بجد فظيعة، قدرت تعرف حوار اللبن وحوار الولد إللي اتفقت معاه، ضحكت على سذاجتي وضحكت أكتر علىٰ أني كنت فاكر نفسي ذكي وبتاع، روحت البيت عشان اجيبلها الساعة وكانت هي مستنياني تحت البيت في العربية، ولسه يدوب طالع الشقة بخبط علىٰ الباب لقيت الباب مفتوح ودي حاجة عمرها ما تحصل لأن أمي مبتسيبش الباب مفتوح، دخلت الشقة فضلت انادي علىٰ أمي وفرح محدش رد عليا، دورت في الشقة كلها ملقتش حد موجود، رنيت علىٰ أمي ولقيتها ردت .. 
: أختك في المستشفى دخلت فيها عربية
يدوب سمعتها بتقول كده ونزلت من الشقة علىٰ العربية جري علىٰ المستشفى، مفيش كام دقيقة وكنت قدام المستشفى، نزلت من العربية دخلت علىٰ الرسيبشن اسأل موظف الاستقبال وقالي أنهم في الدور التالت، طلعت جري على فوق علىٰ طول، وببص ورايا لقيت شهد ورايا بتجري، طلعت الدور التالت ولقيت أمي قاعدة على الأرض .. 
: في أي؟ 
• كنت واقفة في البلكونة برمي البطاقة لاختك من فوق عشان نسيتها، ويدوب بتاخدها من علىٰ الأرض وبتتحرك عشان تمشي دخلت فيها العربية وجريت علىٰ طول
: طب الدكتور قالكم أي ومحدش ليه كلمني 
• مفيش أعصاب فيا يا يونس انا يدوب نزلت الحقها والتليفون كان في ايدي أصلًا 
: طيب خير ان شاء الله 
اخدتها شهد وخلتها تقعد في الاستراحة لحد ما يخرج الدكتور ويطمنا علىٰ فرح، أنا كنت حاسس أن في حاجة معاها ومكنتش مرتاح، بس مكنتش مستوعب أن الموضوع ممكن يوصل للمرحلة دي، عدى خمس دقايق وخرج الدكتور ولسه هتكلم معاه .. 
: اتطمن مفيش حاجة كلها كدمات بسبب الدفعة بتاعت العربية وشرخ بسيط في دراعها اليمين 
• طب نقدر نشوفها ؟ 
: اه طبعًا تقدر عادي وممكن تمشي معاكم النهاردة كمان
• شكرًا يا دكتور
دخلت عشان اشوفها لقيتها بتعيط، أول مرة احس أني مقصر في حقها وإني عاجز من أني احميها واحافظ عليها، كنت طول الوقت شايف الخوف في عنيها، بس عمري ما كنت اتخيل أنها تبقى خايفة من حاجة فعلاً وأنا معرفش حاجة عنها، متكلمتش معاها ولا خليتها تقول حاجة، اخدتها في حضني وفضلت هي تعيط لحد ما أمي وشهد دخلوا علينا، سبتهم وخرجت بره عشان اجيبلهم شوية حاجات .
: هي أختك كويسة؟ 
• اه الحمدلله كويسة
: لا أختك في حاجة معاها
• في حاجة إزاي؟ 
: واضح عليها يا يونس أنت مش شايف حالتها عاملة إزاي البنت وشها مصفر والسواد إللي تحت عيونها ومش مركزة
• ممكن تكون تعبانة بسبب الخضة من الحادثة 
: ممكن بس معتقدش انا بنت زيها وحاسة أن في حاجة 
• هي من كام يوم حكتلي أن في حد بيضايقها في الكلية، ويوم ما أنتي لحقتيها قالتلي أنه كان بيراقبها وبيجري وراها وتعبت 
: مين الشخص ده؟ 
• معرفوش ولا هي تعرفه
: متأكد أنه كان بيجري وراها ؟
• معرفش علىٰ حسب كلامها أنا افتكرت أنه بيتهيقالها
: ماشي ماشي أنا هتصرف 
سابتني وخرجت عشان تتكلم في التليفون ودخلت أنا عشان اتطمن علىٰ فرح وأمي، ومفيش خمس دقايق وكانت رحمة وابوها وامها واخوها كلهم كانوا موجودين، قعدت معاه وهما مكملوش عشر دقايق ومشيوا ومفضلش غير رحمة، دخلت شهد وقعدت جمب فرح بعد ما سلمت علىٰ رحمة إللي كانت بتبصلها بنظرات غريبة، قعدت تتكلم مع شهد ومحدش كان سامعهم أصلًا، ولقيتها بتنادي عليا وخرجت معاها بره الغرفة .. 
: ده يوسف عباس 28 سنة ساكن في المنطقة إللي جمبكم
• وأنتي عرفتيه إزاي؟ 
: من الكاميرات إللي في الشارع وطلع فعلاً بيجري وراها ومن سوء حظه أنه وقف قصاد المحل بتاعنا إللي أنا اخدت فرح من قدامه
• وعرفتي إسمه إزاي؟ 
: حبايبنا كتير أخدت الصورة من شات وديتها لشات تاني وعرفت كل ده
• أنتي محامية ولا عفريت العلبة
: ثانية بس لما تعرف الباقي
• أي تاني! 
: أختك تعرفه
• بس هي قالتلي أنها متعرفوش
: أنا لما قولتلها أني عرفته وعرفت كل حاجة عنه هي حكتلي أنها تعرفه وماسك صور ليها
• صور! 
: ممكن تهدى ومتتكلمش معاها في أي حاجة هي وصلت للمرحلة دي عشان خايفة منك الله أعلم ممكن يحصل أي بعد كده 
• والمفروض أعمل اي بعد ما سمعت الكلام ده
: تهدى
• أهدى أي أنتي مستوعبة إللي حصل 
: أنا مستوعبة ومقدرة كل ده بس أعمل حساب أنها خايفة وممكن تعمل أي حاجة في نفسها 
• المفروض أي إللي يحصل دلوقتي 
: تخرج هي بالسلامة وأنا إللي هفهم منها الحوار كله وملكش أنت دعوة بيها نهائي ولا تتكلم معاها نهائي بردو ممكن؟ 
• يا شهد 
: بعد إذنك أنا هتصرف وسيبني اتصرف أنا بنت زيها ومفيش بنت هتلاقي بنت في الحالة دي وتسيبها غير لما تساعدها عشان خاطري
• ماشي
فضلت قاعد على اعصابي مش مستوعب إللي سمعته ولا قادر استوعب أن فرح ممكن تكلم حد من ورانا، لا وكمان تبعتله صورها ويهددها بيها وتوصل للمرحلة إللي هي فيها دي، حركة زي دي شقلبت حياتها وحياتنا كلنا، مكنتش قادر أمسك نفسي ولا اعصابي، روحت غسلت وشي ولما رجعت لقيت رحمة واقفة قدام الباب مستنياني وأنا عارف هي عايزة تقول أي . 
: اي إللي بيحصل ده مش فاهمة
• في أي يا رحمة
: هو أي إللي في أي أنت مش ملاحظ أن الصدف بتاعتكم كترت هي كمان جت معانا البيت
• الموضوع كبير يا رحمة مش وقته
: والموضوع صدفة بردو! 
• نخلص بس وافهمك كل حاجة
: يا ريت بجد واتمنى أننا نخلص بسرعة 
معرفتش أرد عليها أقول أي بس في الأول والآخر حقها، مفيش واحدة هتقبل أن خطيبها يكلم أو يتعامل مع واحدة تاني، فأنا بحاول أمشي الدنيا واوازن بين المشكلة إللي واقع فيها وبين غيرة رحمة عليا، أنا مقدر ده بس هي إللي مش عارفة تتحكم في مشاعرها، اتطمنا علىٰ فرح ومشينا، وخليت شهد تيجي معانا البيت وتتكلم مع فرح عشان أنا مش هعرف اتكلم معاها بعد إللي حصل، وكلمت واحد صحبي بيفهم في الهكر يجيلي البيت عشان اشوف هنتصرف إزاي في حوار الصور . 
كنت قلقانة علىٰ فرح وخوفت اسيبها من ساعة ما عرفت حوار الصور والولد إللي بيطاردها، بس لحد دلوقتي مش عارفة أي السبب إللي يخليه يطاردها بالشكل ده، وانا شاكة أن هو إللي ورا حوار العربية إللي خبطتها .. 
: هو يونس فين! 
• بره قاعد 
: هو عرف صح؟ 
• ايوة كان لازم يعرف يا فرح مكنش ينفع تخبي عليه حاجة زي دي 
: أنا عارفة والله وخوفت أقوله مش عارفة أي إللي خلاني أعمل كده انا عمري ما خبيت حاجة عليه 
• طب أهدي وكل حاجة هتتحل متقلقيش
: هتتحل إزاي ومعاه الصور بتاعتي 
• وأنتي أي إللي خلاكي تبعتيله حاجة 
: مبعتلوش حاجة والله أقسم بالله أنا ما عملت حاجة زي دي
• لا لا فهميني أمال تعرفيه إزاي؟ 
: أنا قولت لـ يونس أنه بيضايقني في الكلية وكان بيراقبني لما جريت منه ووقعت
• وده حصل فعلاً؟ 
: ايوة حصل بس كل ده حصل بعد ما رفضت اديله وش كان بيحاول يكلمني ويتلزق ويعمل تصرفات غريبة 
• هو معاكم في الكلية؟ 
: مش عارفة أنا عمري ما شفته في مدرج ولا بيعمل أي حاجة طول الوقت بشوفه في الكافتيريا والجنينة
• متأكدة أنك مبعتلوش أي حاجة؟ 
: اه والله مش بكذب
• طيب أهدي خلاص انا هتصرف
كنت حاسة من كلامها أنها فعلاً مبعتتلوش حاجة ومصدومة وفي نفس الوقت خايفة كأنها عملت جريمة، خرجت لـ يونس عشان افهمه إللي حصل .. 
: أي إللي حصل؟ 
• اتطمن بسيطة الولد مهكر التليفون بتاعها واخد الصور
: بس هي تعرفه! 
• متعرفوش هو كان بيحاول يقرب منها وهي مكانتش مدياه وش
: وأنتي صدقتيها؟ 
• ايوة صدقتها عشان هي مبتكذبش
: بس كذبت أول مرة
• كذبت عشان خايفة منك يا يونس
: طب وهنعمل أي دلوقتي أنا كلمت واحد صاحبي بيفهم في الهكر والكلام ده يشوف الموضوع 
• مكنش في داعي 
: الباب بيخبط تلاقيه هو هروح أفتح 
• لا سيبه هفتح أنا وأنت ادخل لـ فرح اتكلم معاها وحاول تطمنها 
: شهد
• أسمع الكلام وبراحة عليها بالله عليك هي واقفة علىٰ شعرة البنت معملتش حاجة وبدل ما نلومها ونحاسبها علىٰ حاجة هي معملتهاش نقف جنبها ونطمنها لحد ما نحل الموضوع 
: مش عارف جايبة الهدوء ده منين
• هبقى أقولك 
دخل هو لـ فرح وأنا روحت أفتح الباب واستغربت أن خطيبة يونس وأمه مش موجودين تقريبًا في أوضة تانية ولا في المطبخ، روحت أفتح الباب، ولسه بفتح سمعت صوت .. 
: شهد 
• عمر! 
لقيت في وشي عمر خطيبي ..
يتبع ..  

انضم لجروب التليجرام ( هينزل فيه الرواية كاملة ) اضغط هنا
للانضمام لقناة الواتساب اضغط هنا