بس أنا مش موافقة بكريم يا بابا غير لو صالح أمي الأول واعتذر لها كمان.

وقف كريم وهو بيقول لها باستغراب: نعم يا أختي؟ وأعمل إيه؟ ما هي أمك قدامك أهي، إنتِ زعلانة يا اعتماد؟

بصّت له اعتماد وهي من جواها مش طايقاه، بس هي عارفة إنه هيسعد بنتها، وغير كده سمعت سمر وهي بتكلم صحبتها وبتقول إنها باين حَبّته.

اتكلمت اعتماد بعد شوية من التفكير وهي بتقول: لا، مش زعلانة يا سمر، لكل فعل رد فعل، وأنا غلطت وأديني اتحملت نتيجة غلطي، ويعلم ربنا إن الكم يوم اللي عدّوا دول رجعوني لعقلي كويس جدًا.

ابتسم صلاح وهو بيقول بهدوء وبين نفسه: بس الوقت عدى خلاص يا اعتماد.

بعد كلام اعتماد ده ابتسمت سمر بهدوء وسكتت.

قال لها صلاح بحب: ها يا سمورة نقرأ الفاتحة؟

كانت لسه هتتكلم، بس سبقها كريم وهو بيقول: اسكتي إنتِ، نقرأ الفاتحة يا عمي.

وفعلًا قرأوا الفاتحة كلهم، واتفقوا إن الفرح بعد 5 شهور، لأن كريم جاهز وسمر كمان جاهزة. كل حاجة كانت ماشية وسط فرحة وحب من كل الموجودين، واعتماد قعدت تزغرط لحد ما كريم مشي.

بس قبل ما يمشي خدّه صلاح على جنب وقال له بتغير: فين الدهب يا كريم؟

ضحك كريم وقال له: موجود يا عمي، هجيبه لحضرتك إن شاء الله على المكتب بكرة، أو في المعاد اللي يناسبك، بس أرجوك بلاش تديهولها.

طبطب عليه صلاح وهو بيقول: ولا يهمك يا ابني، ولا متشغلش بالك، مش هديهولها.

وصحيح، عملت إيه في اللي قولتلك عليه التاني؟

ابتسامة كريم اتلاشت وقال له: ما بلاش يا عم صلاح، الحتة دي صعبة جدًا ومحدش هيستوعبها.

زعق صلاح وهو بيحاول يهدي نفسه، بس كمل وقال: هتعمل إيه يا كريم؟ هتساعدني ولا أشوف غيرك؟ ما هو الحكاية مش ناقصة، لازم نلاقي لها حد.

اتنهد كريم وقال له: خلاص تمام يا عمي، على اتفاقنا وهساعدك، بس يارب بس مترجعش تندم بعدين.

عدّى اليوم، والشهر الأول، والشهر التاني، والتالت، والرابع، والخامس كمان، وكلهم بيجهزوا لفرح سمر. حتى ريم كانت بتساعدهم في كل حاجة وكانت طايرة بيهم من الفرحة.

وكمان اعتماد، سبحان الله، ربنا هداها كتير عن الأول كمان، وكان خوفها على بنتها ليحصل فيها زي ما عملت في مراتات عيالها خلاها تبعد عن كل اللي كانت بتعمله.

وقبل الحنة بيومين، طلع آدم لشقة ملك، خبط عليها زي كل يوم ما بيعمل وهو بيحاول يصالحها، بس مفيش فايدة أبدًا فيها.

فتحت ملك الباب وهي مبتسمة له على غير العادة.

قال لها آدم بترجي: يا ملك، إحنا هنفضل كده كتير؟

دخلت ملك وسابت الباب مفتوح بمعنى إنه يدخل يعني، وفعلاً آدم دخل وراها.

قال لها بحزن: والله عرفت قيمتك، والله عمري ما هكرر اللي عملته ده تاني أبدًا، ولو حسيتي بيه مجرد إحساس يا ستي، ليكي حق تعملي كل اللي إنتِ عايزاه، ووقتها والله حتى مش هلومك أو هقولك بتعملي إيه، بس حقك عليا بقى، والله حقيقي مبقيتش قادر أقعد من غيرك أكتر من كده.

ابتسمت ملك وهي بتقول: مسامحاك يا آدم عشان ابننا وعشان البيت مايتخربش، بس لو ده حصل تاني صدقني إنت اللي هتكون خربته بإيدك من غير تردد.

طبطب عليها آدم وهو بيقول: عمرها ما هتحصل والله.

والحمد لله صالح آدم ملك ورجعوا كويسين تاني مع بعض.

أما في شقة اعتماد، كانت قاعدة حاضنة سمر وبتبكي وسط زغاريط من سيليا وقمر وريم اللي قاعدة بتجهز حاجات سمر، والجو مليان بهجة وحب.

كان واقف من بعيد صلاح بيتفرج عليهم وهو بيقول: يا ترى اللي أنا هعمله ده صح ولا غلط؟ يارب أعني على الصح، اللهم آمين يارب.

وخرج من البيت.

سابت ريم اللي كانت بتعمله وبصّت لاعتماد وهي بتقول: محتاجة أتكلم معاكي شوية.

هزت اعتماد راسها ودخلت معاها الأوضة. قعدت اعتماد على السرير وهي بتقول: في إيه يا ريم؟ حصل حاجة ولا إيه؟

قالت لها ريم: لا يا حماتي، محصلش حاجة، كنت عايزة أعرف حاجة واحدة بس...

إنتِ بتكرهيني كل الكره ده ليه؟

سكتت اعتماد شوية ودموعها بدأت تنزل وهي بتقول: صدقيني إنتِ فيكي شبه من ريما أوي أوي، وكل ما ببصلك بفتكرها، بفتكر إنها خدت أكتر شخص حبيته في حياتي.

ريم باستغراب: مش فاهمة حاجة، هو حضرتك تعرفي ماما أصلًا؟

ابتسمت اعتماد بوجع وهي بتحكيلها كل حاجة من ساعة ما دخلت الجامعة للآخر خالص.

وهي بتحكي، ريم كانت دموعها نازلة بوجع وحزن، مش على اعتماد، على إنها اتحملت نتيجة هي ملهاش أي علاقة بيها أصلًا، ولا حتى كان ذنب أمها، لأن من كلام اعتماد إن ريما مكانتش تعرف أصلًا إنها بتحب محمد.

خلصت اعتماد كلامها وهي بتطبطب على ريم وبتقول لها: أنا عارفة إنك زعلانة مني ومش هتسامحيني مهما حصل، بس صدقيني أنا والله قلبي واكلني على كل اللي عملته فيكي وفي سلايفك، وبالأخص إنتِ. صدقيني مش علشان بنت هتاخد أخوكي، أبدًا والله، بس قلبي وجعني على الطفل اللي راح بسببي ده، والأسخم إن ده ابن ابني. حقك عليا يا ريم، بالله تسامحيني إنتِ ومعتز، أنا عارفة إنه زعلان مني ومقهور من كل اللي حصل وحقه، بس أنا كمان أمه وقلبي يوجعني على زعله والله.

بصي يا بنتي، أنا عندي استعداد أعملك كل اللي تأمري بيه، بس تكوني مش زعلانة ونتعامل كأم وبنتها. أهي سمر هتمشي وهتسيبني، إنتِ وملك وقمر والمخفية سيليا تكونوا بدالها.

ضحكت ريم غصب عنها على آخر كلمة وهي بتقول: على فكرة سيليا غلبانة وطيبة أوي فوق ما تتخيلي، ولو عاملتيها على إنها بنتك هتلاقي منها حب واحترام لا تتوقعيه، وأنا واثقة من كل ده.

قالت لها اعتماد بحب: يعني مش زعلانة مني؟

هزت ريم راسها برفض وهي بتبتسم.

قالت لها اعتماد: يعني هتعتبريني زي أمك الله يرحمها؟

ردت ريم بدموع: أيوة يا ماما اعتماد.

فتحت لها اعتماد إيديها بمعنى إنها عايزة تحضنها، اترمت ريم في حضنها وقعدت تعيط. طبطبت عليها اعتماد بحب وهي بتقول لها: قوليلي بقى هتلبسي إيه في فرح البت سمر؟ جبتي فستان أصلًا؟

ردت عليها ريم وهي لسه في حضنها: لا والله لسه مجبناش أي حاجة، لا أنا ولا البنات.

قامت اعتماد اتحركت وراحت ناحية الدولاب وفتحت صندوق وطلعت منه 3 غوايش كبار، وراحت ناحية ريم ولبستهملها وقالت: كنت واخدة عهد على نفسي ألبس الغوايش دول لمرات ابني الكبير، بس لولا الخناقات اللي كانت ما بينا. وعلى فكرة دول أنا أخداهم من حماتي، حماتي برضه مكانتش بتحبني، وجِه وقت واتصافينا سوا كده، ووقتها ادتني الغوايش دول.

مسكت إيد ريم ولبستها الغوايش وكملت: أوعي تقلعيهم غير لما ربنا يكرمك وتجيبي ولد ويكبر ويتجوز، وقتها تقلعيهم لحد ما ييجي الوقت المناسب اللي تديهم لمرات ابنك فيه، فاهمة يا ريم؟