يونس//رؤيه.....خلينا ننفصل احسن

رؤيه//ده بقي كلامك ولا كلام مامتك

يونس//رؤيه....خلي بالك من كلامك

رؤيه//.......امشي يا يونس خد حاجتك وامشي....

يونس//انا فعلا همشي وهسيبلك البيت بس عشان ابني.... 

لكن لو فكرتي تتجوزي...انسى ان ليكِ ولد نهائي لان مش هسيبه 

مردتش عليه.....يمكن كان جوايا كلام كتير.....اسئلة اكتر.....خذلان....ندم.....لكن اختارت السكوت....يونس حب عمري...واللي وافقت انه يكون شريك حياتي....دلوقتي ومن قهرة قلبي...كل الكلام والعتاب كان علي هيئة سلسلة هدية يوم جوازنا!......وكأنها كانت حبل المشنقه و بداية حكايتي معااه.....سكوتي كان وجع.....مكنتش متخيلة ان الكلام ده يكون ليونس....ف قررت مقولش حاجة....يمكن بحلم او يكون كابوس ونهايته قربت

بياخد حاجته وبيمشي......من غير ما يقف ثواني او يتردد......وكأن اللي بينا مكنش سنين حب....وعشرة...وبينا ولد...وعود كتيرة...كل ذكرى تخصني مكنش ليها عنده اي قيمة لدرجة!!!!! 

بدخل اوضتي....في صمت...بقفل النور...بقعد علي سريري في محاولة ان استوعب كل اللي بيحصل.....باخد موبايلي وانا مستنية رد.....

رؤيه//سليمان.... 

سليمان//رؤيه انتي بتعيطي!!!!

رؤيه//......انا جوايا احساس غريب مخليني مش قادره اعيط اصلا.... 

حاسة ان حتي نفسي بيوجعني....في حاجة بتخنقني مش مستحملاها

سليمان//طيب اهدى....انا هجيلك دلوقتي

رؤيه//....طيب متقفلش...خليك لحد ما توصل 

ايدي كانت بترتعش بشكل غريب.....دموعي بتنزل في صمت مني.....يمكن لان صدمتي كانت من يونس....مكنتش عارفة استحملها....فجاة حسيت بعدم الامان.....برد!!!!....خوف وقلق غريب......

رؤيه//...قدامك كتير

سليمان//قربت اوصل 

رؤيه//انا خايفة....حاسة ان البيت ده مش بيتي...وان كل ركن فيه يرعب

كنت حاسه بالغربة في المكان اللي كان جنة بالنسبالي.....كل مكان بحس بطيفه فيه....ومعاه وجع...لكل ذكره وكل كلمه سمعتها منه وصدقت بسمع صوت الباب.....برمي موبايلي....وانا بفتح الباب بسرعة....

رؤيه//.....بابا

سليمان//........

مش بيتكلم....نظراته بيكون باين عليها الصدمة.....من هيئتي الغريبه....بيحضني وهو مش فاهم حصل ايه!!!!...... 

وانا بكون خايفة بس.....عوزة اتخلص من شعور البرد اللي جوايا....بالدفاء في وجوده....حنيته اللي كانت دايما قادرة تسكت اي قلق جوايا 

رؤيه//انا اسفة.... 

سليمان//علي ايه

رؤيه//عشان مسمعتش كلامك....وحبيته

بيتنهد وهو بيطبطب عليا....بيمشي ايده علي شعري......وكأني لسه طفلة.....الشخص الوحيد اللي مش مستوعب اني كبرت.... 

والشخص الوحيد اللي مش عوزاه يستوعب ده.....ويطبطب دايما عليا كأني عورت نفسي وانا بلعب من غير قصد....من غير ما يعاتب ولا يلوم ولا يسيبني لوحدي 

سليمان// يمكن كنت معارض وشايف انه مش مناسب ليكِ...

وانك غلطتي لما مشيت وراء قلبك بس....رغم ان اتكلمنا كتير

لكن مع الاسف ده مش سبب يخليني اسيبك تواجهي نتيجة اختيارك لوحدك 

رؤيه//انا بس مش فاهمه ليه....قدر يعمل معايا كده ليه!!!! انا هونت عليه اوي كده... هان عليه قلبي؟؟؟ 

قدر يحب بنت غيري.....يخليها مكاني!!! 

سليمان//......ممكن تحكيلي حصل ايه

رؤية//هيتجوز....بقي شايف اني نكدية... والحياة معايا صعبه.....وتقرف

هيتجوز بنت هو عارفها من بدري اصلا....عارفها وكان بيخوني

كان عايش معايا في نفس البيت هو بيخوني وانا زي الغبيه بفكر...

بفكر ازاي اخليه يرجع يحب البيت تاني.....مكنتش فاهمه ان عدم حبه للبيت

....ده عشان انا اللي فيه....هو مبقاش طايق وجودي

سليمان//رؤيه انتي بداتي تعصبيني......انتي من امتي بالضعف ده..... 

ما يغور في داهيه.....انتي بتكسري كرامتك عشان ايه

رؤيه//عشان انت اللي معايا....وانا مش قادره امثل أكتر.....

اني قادره استحمل واكمل....انا كنت بداري وجعي وكسرة قلبي....

قدامه....قدام جوزي....عشان احافظ علي اللي فاضل مني

سليمان//وحياتك هيتعلم الادب انا هعرفة ازاي ينزل دمعه واحده منك

رؤيه//انا مش عوزه حاجة.....انا بس عوزه امشي من هنا....

بيبدا يساعدني الم حاجتي....او بشكل اصح بيلمها هو...وانا ايدي بتكون بترتعش....بيسيبني عشان اغير هدومي....ووقتها بيغير مفتاح باب الشقة.....عشان يونس ميقدرش يدخل الشقه......بياخد الشنط....وبرجع معااه البيت...وانا شايله هم نظراتهم لياا....بعد ما الكل قالي بلاش خلاني راجعه تاني بعد ما خذلني قدامهم

سليمان//واقفه عندك ليه......اتحركي

بيمسك ايدي وبيطلعني قدامه......بيسيب الشنط قدام الباب.....قبل ما يخرج المفاتيح...بيكون الباب اتفتح.....وبتكون ماما....اللي ببقي مش قادره ارفع عنيا واشوفها.....وللحظات بكره الساعة اللي شوفته وحبيته فيها...... 

موده//هتفضلي واقفه عندك؟؟ 

رؤيه//............

موده//تعالي ياا رؤيه مش ابن فيروز اللي يخليكي تقفي كده.... 

برفع عنياا علي كلامها.....اللي بتكون كلها دموع.....بتحضني....وبتمني لو كانت زعلت مني كان هيبقي اهون عليا من شعوري بالقرف اتجاه نفسي

موده//رؤيه ياحبيبتي مش جوزك يعلمك النكد وتجيلي بيه هتعيطي هرميكي جمب الزبالة برة 

رؤيه//حنيتك بتكسفني

موده//وخدي من ده كتير ياعمري

سليمان//مالك بحبيبتي يابت

بيقرب مننا صوته بعد ما بيدخل الشنط جمب الباب وبيسيبنا ويدخل المطبخ وبيجيب عصير.......بيحطه علي الطربيزة....وبتدخل ماما تقعد جمبه.....وانا بقعد قدامهم....وانا بسأل بتردد....

رؤيه//هو فين داوود.....وعابد....وحور...يعني باقي البشر فين

سليمان//هتلاقيهم جايين دلوقتي....

مودة//ادخلي غيري هدومك وانا هجهز السفرة علي ما يوصلوا

سليمان//خليكي...انا هجهزها

بيطبطب علي ايدها....وبيقوم هو...من وقت تعب ماما وهو خايف عليها....كلنا واخدين بالنا من حبه ليها....جينا الدنيا واحنا شايفين حنيته خصوصا معاها.....واللي زادت لما تعبت....وزاد معاها خوفه....وانها تسيبه...رغم انهم صغيرين اصلا!!!!...بما انهم اتجوزو صغيرين.....لكن علاقتهم بالنسبالي كانت بيرفكت....حد كبرت معااه.....كان مشارك معاك مراحل حياتك.....بينهم موده ولغة حب غريبة....ونس يدفي القلب

موده//ابنك لسه مجاش؟؟ 

رؤيه//لا هيجي بكرة.....

ببدا ادخل الشنط بتاعتي....وبقفل باب الاوضه وانا عنيا علي كل ركن فيها......من ساعة ما خدت قراري ووافقت علي يونس....بعد اعتراض الكل انه شخص مش مناسب ليا.....وانا حياتي متغيرة.....او دخلت حياة مختلفه نهائي عن اللي كنت فيها.....لدرجة اني نسيت يعني ايه راحة؟......آمان.....وحياة سويه

سليمان//ممكن ادخل؟ 

رؤيه//اكيد اتفضل

بيدخل....وانا بقعد علي طرف السرير...بأبتسامة باهته لكن قدرت تظهر....اعتقد انها بفضل سليمان قادرة تخرج كل حاجة حلوة من جوايا مرة تانية....اعتقد الشمعة لسه فيها روح عشان تنور...رغم شدة البؤس

سليمان//...دراما كوين....اي الاجواء دي

رؤيه//كنت ناويه انام بس

سليمان//تنامي؟؟؟....النهاردة الجمعة 

بفتكر انهم عادتا بيتجمعوا يوم الجمعة.....بنسهر وبنقعد مع بعض....بكون فعلا نسيت اليوم ده خالص 

سليمان//مش عوزة ترجعي تشتغلي؟؟ 

كان سؤال غريب...مش اني اشتغل....ان سليمان هو اللي يقوله...بما انه كان رافض نهائي نزولي شغل 

رؤيه//انت اللي بتقول كده!!!! 

بيقطع كلامنا صوت ماما...اللي بتفتح الباب وغالبا مش بسمع قالت ايه اصلا.....وباخد بالي من عابد.......اللي اخر مرة شوفته فيها كان يوم فرحي......واكتر واحد مكنتش مستعده اقابله

ملامحه اتغيرت....شوية...يمكن الدقن اللي غيرتها.. واضح انه رجع الچيم تاني.....كان واقف بعيد عن الباب ملامحه جادة جدا....واضح عليه انه محبش وجودي

رؤية//عابد.....

اتحركت من مكاني....وقبل ما اخرج بيبعد هو.... وبيدخل اوضته....من غير كلام 

داوود//رؤيه؟؟؟ 

باخد بالي من داوود اللي فتح باب الشقة....وهو مستغرب...بيقفل الباب وبيعلق المفتاح بتاعه وبحس انه مش عارف يعمل ايه.....او المفروض يتصرف معايا ازاي..... 

لذالك بقرر اعفيه من التشتت ده وبدخل اوضتي... وبتخرج ماما تكلم حور تشوف اتاخرت ليه؟.... 

وسليمان خرج من غير كلام....لكن كنت متاكده انه خرج لعابد

♡_♡_♡_♡_♡_♡_♡_♡_♡_♡_♡_♡_♡_♡_♡_♡

يونس//مفيش اكل؟ 

فاطمة//انت سبت بيتك كده ليها!! 

يونس//امي لو سمحت خلاص بقي انا تعبت هو مش هنخلص من سيرتها 

فاطمة//نخلص ايه ده تعبك وشقاك تسيبه وكمان لسه ياعالم هتقول عوزة مصاريف ايه لابنها انا مش فاهمه لو كان عندها اربع ولا خمس عيال كانت صرفت ايه 

يونس//خلاص يا امي بقي انا كده كده عارف مصاريف مدرسته كام

فاطمة//مدرسة ايه ياا بابا...هي عشان تكبر دماغها من ابنها وترتاح تدخله مدرسة دخلي وانت تدفع خليها تخرجه من المدرسة دي ويدخل مدرسة زيه زي اللي قده بلاش دلع ماسخ

يونس//انا هدخل انام 

بسيبها وبدخل اوضتي.....من جوايا كان في جزء مش راضي عن اللي بيحصل....واللي عملته بنفسي....كان في جزء مستني يسمع صوتها...يحس بحركتها وهي جايه...حاسس ان حياتي فجاة....بقي ناقصها شيء مش مفهوم

لكن جزء تاني ارتاح من زن وخناق كل شوية... وخلافات بينها وبين امي....كان جوايا هدوء أخيراً من دوشة كبيرة جدا ومحاولة ارضاء جميع الأطراف 

وعلي الاقل المرادي الجوازة هتعجب فاطمة.....مش هتتخانق معاها وتصدعني....بما انها بنت اختها...يعني اخيرا هعيش في هدوء شوية 

♡_♡_♡_♡_♡_♡_♡_♡_♡_♡_♡_♡_♡_♡_♡_♡

عابد//سليمان...لو سمحت هي رجعت تاني محدش معترض ده بيتها.....وكده كده كنا عارفين انها هترجع لكن اني اتعامل معاها تاني ده مستحيل يحصل

سليمان//دي اختك يا عابد وانا مربتكش علي كده لما تسيبها في وقت زي ده هتبقي جمبها امتي!!! 

يعني انا لو مكنتش موجود كنت هتعمل كده وتخلي واحد مالوش اي لازمة يخليك بتبعد عنها في الوقت ده؟؟؟ 

عابد//انا مش ببعد ولو احتاجت حاجة انا اكيد مش هسيبها لكن كلام معاها وان الموضوع يكون عادي كده لا

سليمان//تقدر تفهمني السبب

عابد//بجد مش عارف السبب!!!! 

سليمان//عوزك تقوله بنفسك يمكن تاخد بالك انك بتعمل معاها نفس الحاجه دلوقتي.....

عابد//انا عاوز تقارني بالشيء ده؟؟؟؟ 

سليمان//عابد....فكر كويس هتلاقي نفسك بتجافيها وبتقسي.....انا معاك ان اللي حصل غلط خصوصا مشكلتها معاك لكن انت شايف ان ده وقت عقابك ليها؟ 

عابد//وانا مش قادر.....صدقني مش هقدر اكلمها بعد اذنك يا بابا بلاش تضغط عليا 

سليمان//انت لسه بتحب غفران؟؟ 

عابد//................

سليمان//عابد.....متنساش ان صحبك يكون ابوك.... ومهما اختلف الموضوع اللي بنتكلم فيه مفيش بينا اسرار او انك تخبي عني اللي في قلبك....ما انا بقولك اني بحب امك وعادي يعني

عابد//يااااربي عليك....انت عارف هتصحي في يوم هتلاقيني خطفتهالك عشان اريحك وتبطل تقولي بحب امك دي

سليمان//بتحبها؟ 

عابد//بحس اني محتاج اخلي عيوني بعيد عنها... عشان هتفضح اووي.... لما بشوفها بحس ان عنيا بتتعقم كده مش معقول كل الحلاوة دي في بنت واحده

سليمان//ياحنين

عابد//يعني انت تضحك عليا وتخليني احكي واول ما انطق تبدا تحفل عليا

سليمان//خلاص خلاص اصل انا معذور برضو كلامك مش لايق علي شكلك

عابد//ماله شكلي

سليمان//يعني بلطجي....تاجر كبد واكتاف بشر 

عابد//ننننعم بلطجي ده انا البنات هتموت نفسها عليا

سليمان//اردح يا بيئه اردح.....اقولك حاجة 

عابد//ايه؟ 

سليمان//امك بتحبني 

عابد//يااااااااااا اميييييييييييي

يتبع