رواية ثأر بلا نجاة من الفصل الاول للاخير بقلم زينب محروس

رواية ثأر بلا نجاة من الفصل الاول للاخير بقلم زينب محروس

رواية ثأر بلا نجاة من الفصل الاول للاخير هي رواية من كتابة زينب محروس رواية تحت رحمة الجبروت من الفصل الاول للاخير لاول مرة على موقع التواصل الاجتماعى فيسبوك رواية ثأر بلا نجاة من الفصل الاول للاخير حقق تفاعل كبير على الفيسبوك لذلك سنعرض لكم رواية ثأر بلا نجاة من الفصل الاول للاخير

رواية ثأر بلا نجاة من الفصل الاول للاخير بقلم زينب محروس

رواية ثأر بلا نجاة من الفصل الاول للاخير

فتحت صندوق العربية و خرجت شنطة هدومها عشان تدور على شيء ما، لكنها تفاجأت بصوت العربية اللي قربت منها فجأة و كلها ثواني و تصبح جثة هامدة بين العربيتين، لكنها قبل ما تستوعب اللي هيحصل العربية المرسيدس وقفت على آخر لحظة، لكن كرد فعل للخوف اتحركت سارة حركة عشوائية  بسببها وقعت شنطة هدومها من فوق الكوبري. 
مرت عليها ثواني ثقيلة و هي بتستوعب الموقف و اللي حصل، قبل ما تخرج من صدمتها و تضرب العربية بإيدها و قالت بغضب: 
_ هو أنت أعمى! كنت هتموتني يا حيوان! 
لسه قاعد مكانه و مش بيتحرك و مازالت إيده على عجلة القيادة،  استغربت سارة من سكوته لكنها لما دققت النظر، انتبهت لتنفسه الغير منتظم، و عيونه اللي بيشتد إحمرارها.
سألته سارة بقلق: 
_ أنت كويس؟؟ 
غمض عيونه بتعب، و رجع بدماغه لورا، اتحركت سارة و فتحت الباب و كانت المفاجأة إنه كان مصاب بطلق ناري، شهقت بصدمة و لمست خده بطرف السبابة، فتح عيونه و بصلها بزهق: 
_ هتفضلي مصدومة كدا كتير؟ 
سألته بشك:
_ هو أنت حقيقي؟؟ 
ابتسم بسخرية: 
_ طلع معاكي ايه لما لمستي خدي؟ 
_ إنسان.
اتنهد بتثاقل و قال بجدية: 
_  طيب هتساعديني و لا ايه؟؟ 
حركت دماغها باستعجال و قالت: 
_ طبعًا هساعدك، هتبقى كويس متقلقش.
ساعدته سارة ينزل من العربية، و خلعت الوشاح الصوف اللي حوالين رقبتها و غطت به كتف رامي عشان توقف النزيف، و اخدته معاه في العربية بتاعتها. 
                           ★★★★★★★
أول مستشفى في طريقها كانت خاصة، و هي مكنش معاها فلوس كافية و سابت محفظة رامي و تليفونه في عربيته، مكنش قدامها غير حل واحد إنها تبيع حلقها الدهب عشان تسدد رسوم المستشفى. 
دخلت تشوفه بعد ما الشرطة اخدت أقوال رامي و أقوال سارة بحكم البلاغ اللي قدمته المستشفى. 
قعدت على الكرسي و سألته بجدية: 
_ حاسس بوجع؟؟ 
ابتسم لها بخفة: 
_ حاجة بسيطة كدا، بس الحمدلله، أنا متشكر جدًا يا آنسة.........
سكت عند اسمها فردت عليه: 
_ سارة..... اسمي سارة.
_ و أنا رامي. 
ردت عليه سارة بنوع من السخرية: 
_ يا عم حفظته، دا أنت طول الطريق تقولي انا رامي أنا رامي. 
بصلها بتأمل قبل ما يوضح: 
_ كنت بحاول أطمنك عشان متنسحبيش في نص الطريق.
مد لها دراعه السليم عشان يصافحها و قال بامتنان: 
_ خدمتك دي على دماغي.... لو احتاجتيني في أي وقت هتلاقيني........ دا وعد مني أنا رامي عاشور.
شهقت بحماس لما سمعت لقبه و قالت باندفاع: 
_ رامي عاشور المغني! ........ثانية واحدة بس الملامح مختلفة، أنت عامل عملية تجميل؟؟ 
رد رامي بسخرية خفيفة: 
_ اه عملية تجميل!!
ردت سارة بإعجاب: 
_ مش مشكلة أنت حلو في الحالتين، ما تغني حاجة كدا، غنيلي مثلًا (هقولك سر) بحبها اوي.
كان بيبصلها باستغراب إنها صدقت موضوع عملية التجميل، و مكنش بيتكلم بينما قالت سارة بتراجع: 
_ و لا أقولك قبل ما تغني خلينا نتصور الأول، عشان أغيظ البت منة بنت الجيران، دي هتموت لما تعرف إني اتصورت مع فنان مشهور. 
و بالفعل قربت منه أكتر و لقطت صورة، و تغاضت تمامًا عن ظهوره بلبس المستشفى و كل اللي شغلها إنه مش بيضحك فرسمت ابتسامة بإيدها و قالت بتشجيع: 
_ اضحك يا فنان الصورة تطلع حلوة. 
و بالفعل ابتسم لها و اتصورا، و لما طلبت منه يغنى، رد عليها بمشاكسة: 
_ اسكتي مش أنا عملت كارير شِفت.
_ ليه بس دا انت صوتك حلو! 
ضحك بقوة على كلامها، و قال بنفي: 
_ انتي بتصدقي بسرعة كدا! الموضوع كله مجرد تشابه أسماء و شهرة مش أكتر.
عرفها رامي بنفسه و إنه مصمم أزياء مشهور،  و عرف إنها خريجة تمريض خاص بتشتغل في مستشفي خاص، و في نهاية الحوار طلب منها فونها عشان يتصل على حد من أهله. 
                          ★★★★★★★
رجعت سارة مكان الحادث عشان تحاول تجيب الشنطة اللي وقعت منها لانها بتحتوي على كل هدومها بالإضافة لأوراقها الشخصية و اوراق تانية مهمة و فلوسها، بعد محاولات كتير تأكدت انها مش ممكن تلاقيها و عشان كدا قررت تنسحب لكنها لما كانت هتمشي أخدت بالها إن عربية رامي لسه موجودة و مفتوحة، فقررت تاخد متعلقاته الشخصية و تقفل العربية لكنها يا دوب أخدت المحفظة و التليفون، و حست بضربة على دماغها أفقدتها الوعي......
لما فاقت لاقت نفسها في أوضة ضلمة و مفيش اي منفذ للضوء و هي أصلاً شخصية محبة جدًا للعتمة و الانعزال لكن كونها واحدة مخطوفة مكنش ينفع ترضي بالواقع ده، اتحركت تجاه الباب و هي بتخبط بشدة و بتطلب منهم يخرجوها و قالت جمل اعتراضية كتير عن كونهم غلطو لما خطفوها.
و في الآخر زهقت و قعدت ورا الباب و غمضت عيونها و هي بتغني بصوت واطي عشان تسلي نفسها،  بمرور الوقت خبطت على الباب بغيظ وقالت: 
_ هو انا منسية هنا كمان!! تعالوا عذبوني حتي بدل الزهق ده يا اللي منكم لله.
سندت ضهرها على الباب و نزلت دموعها لأنها في الفترة الأخيرة بقت مضغوطة و كل الدنيا جاية ضدها، مبتلحقش تخرج من مشكلة و تكون وقعت في مشكلة تانية، اتنهدت بحزن و همست لنفسها بتشجيع: 
_ أكيد الناس اللي خطفوكي يا سارة مش هيكونوا وحشين أكتر من عيلتك!!
في اللحظة دي سمعت صوت خطوات بتتجه للباب، قامت بسرعة و تحسست الباب لحد ما تمكنت من الترباس الجانبي و قفلته و هي بتقول بعند: 
_  و الله ما تدخلوا غير بمزاجي! 
حاولوا يفتحوا الباب لكنها كانت بتحاول تمنعهم، و قالت بضيق: 
_ مش عايزة أشوف حد، امشوا من هنا.
رد عليها الشاب بغضب: 
_ إحنا مش ولاد خالتك و هتهزري معانا! افتحي الباب انجزي.
ردت سارة بإصرار: 
_ و الله ما هفتح.
_ افتحي بدل ما افتحه و افتحلك دماغك.
ردت عليه باستهتار: 
_ وريني كدا هتعملها ازاي!! 
حاول يخبط الباب بجسمه الضخم، اول مرة فشل، و التانية بردو فشلت لكن التالتة الباب اتفتح و نتيجة الاندفاع المفاجئ اتنطرت سارة لآخر الأوضة فوقعت على الأرض.
عيونها دمعت، وقفت و هو بتتفقد معصمها و قالت بغيظ: 
_ تصدق إنك واحد حيوان! 
صرخ في وشها بغضب مكتوم: 
_ احترمي نفسك. 
شرعت بدماغها لما الإضاءة أشتغلت، فأخدت الصدمة لما شافت الشخص المصاب اللي واقف قدامها، و مكنش حد غير رامي اللي بيبصلها بجمود عكس الشخصية اللطيفة اللي سابتها في المستشفى.
يتبع............
انضم لجروب التليجرام ( هينزل فيه الرواية كاملة ) اضغط هنا
للانضمام لقناة الواتساب اضغط هنا
↚
عيونها وسعت لما استوعبت إن الشاب اللي أنقذت حياته، هو نفسه الشخص اللي خاطفها، قربت منه فجأة! 
وبدون إنذار  ضربته بقبضتها قرب كتفه و قالت بغضب: 
_ تصدق إنك حيوان! كان المفروض أسيبك تموت. 
كل جملة بضربة على جرحه اللي نسيت موقعه، مازال رامي على نفس جموده، لكن الجارد بتاعه شدها من دراعها بتهكم: 
_ احترمي نفسك،  و احمدى ربنا إنك عايشة لحد دلوقت. 
حاولت تنفض إيده لكنها معرفتش، فطبقت دراعه بين أسنانها و بمجرد ما رفعت دماغها الجارد سحب إيده بألم خفيف، و قبل ما يتكلم، سارة صرخت في وشه بغضب: 
_ مترفعش صوتك عليا، و اسلوب التهديد دا ميجيش معايا سكة! 
تدخل رامي في الحوار، و سألها بهدوء: 
_  مين اللي متفق معاكي يا سارة؟؟ 
بصتله سارة بتعجب و قالت باستنكار: 
_ اتفاق ايه!! يعني فوق ما أنا مخطوفة كمان بتستجوبني بخصوص حاجة معرفهاش؟؟ هو دا رد الجميل!! 
اتنهد رامي بزهق: 
_ أنا فعلاً كنت ممتن للمساعدة، لكن لما أعرف إن تواجدك في مكان الحادث كان مقصود عشان تسعفيني و إنك واحدة من أعدائي يبقى الموضوع مختلف. 
قهقهت سارة بنغمة ساخرة وهي بتضرب كفوفها ببعضها، و رددت بتعجب: 
_ أنا عملت دا كله؟!! دا أنا طلعت شريرة في قصة أحدهم و أنا معرفش!!! 
تغاضى رامي عن سخريتها، و سألها بهدوء: 
_ نهلة و لا سفيان ؟؟ و لا الاتنين؟ 
عقدت حواجبها و قالت بنفور: 
_ بلاش تذكر اسم سفيان عشان عندي تروما منه، و اه معرفش مين نهلة دي. 
اندفع الجارد بتهكم: 
_ اهي ذكرت بنفسها إنها تعرف سفيان. 
نقلت نظرها بينهم بزهق و قالت بحزم: 
_ أنا جعانة، و مش هتكلم و لا أقول حاجة غير لما تأكلوني!!! 
                               ★★★★★★
كان قاعد قصادها على الأرض بيتابعها و هي بتاكل باستمتاع و لا كأنها مخطوفة!!! 
إحساس داخلي بيقوله إن سارة ملهاش علاقة بمحاولة قتله، لكن في نفس الوقت الشخص اللي اتصل على الجارد الخاص ب رامي و اللي يعتبر دراعه اليمين، قال إن الطلق الناري دا مجرد قرصة ودن، و في حد تبعهم هيسعفه، و لسوء الحظ كانت سارة هي اللي أسعفته!!! 
من ثبات نظره عليها، اعتقدت سارة إن رامي عايز ياكل من البيتزا اللي معاها و محرج، و عشان كدا أخدت قطعتها الأخيرة و قربت منه و هي بتمدها قدامه و بتقول: 
_ طعمها حلو هتعجبك. 
انتبه لكلامها، فنقل نظره بينها و بين البيتزا، و هو بيفكر إزاي لسه بتتعامل بتهاون كدا و مش خايفة منه! 
معقول تكون بتتظاهر بالبراءة عشان تخدعه!! 
في الحقيقة هي فعلاً مكنتش خايفة منه السبب الأول إنها معملتش حاجة غلط تتعاقب عليها، و السبب التاني إنها مش مقتنعة إن رامي ممكن يكون شخص شيء و يؤذيها. 
زفر بحيرة و لفت نظره بعيد عنها: 
_ مش بحبها.
لوت شفايفها بسخرية و قالت بلامبالة: 
_ أنا أصلا مكنتش هعطيك، ملكش في الطيب نصيب. 
رد عليها بضيق مكتوم: 
_ ياريت تنجزي بقي و تقولي مين اللي بعتك؟ 
_ تصدق أنت معندكش ذوق! مجبتوش صودا ليه عشان أشربها بعد البيتزا! 
هو فعلاً ابتسم بجد ، دي بتتعامل فعلاً كأنه ابن خالتها! في حين تدخل الجارد و قال بتوبيخ: 
انضم لجروب التليجرام ( هينزل فيه الرواية كاملة ) اضغط هنا
للانضمام لقناة الواتساب اضغط هنا
↚
_ احترمي نفسك قولتلك، و بلاش تتعدي حدودك، مش عارف أنا خطف ايه اللي فيه الدلع ده!! 
حركت إيدها في الهوا كعلامة على عدم الاهتمام، فسألها رامي بجدية: 
_ انجزي يا سارة لو حابة ترجعي بيتك، غير كدا هتفضلي مشرفاني. 
اتحركت وقعدت قدامه مباشرة و سألته بجدية: 
_ عايز تعرف ايه؟؟ 
_ متفقة مع سفيان و لا نهلة.
_ مبدأيًا كدا أنا معرفش واحدة اسمها نهلة، و سفيان الوحيد اللي في حياتي كائن شبه البومة كدا و أنا و هو عمرنا ما اتفقنا على حاجة، غير كدا أنا معنديش كلام اقوله. 
و هو بيقوم مكنش عارف يسند على إيده، فقبل ما الجارد يقرب منه، لحقته سارة و ساعدته يقف فطبطب على إيدها وقال: 
_ انا محتاج ممرضة معايا، اتمنالك إقامة سعيدة عندنا في البيت. 
فهمت من كلامه إنها هتتخطف لفترة أطول، فقالت باعتراض: 
_ دا لما تشوف حلمة ودنك، ابقى اجي معاك.
استخدم الفون بسرعة و صور جانب وشه، و بص في الصورة قبل ما يحط الفون على مستوى نظرها: 
_ اهو شفتها، خليكي قد كلامك بقى بدل ما تيجي غصب عنك. 
                           ★★★★★★
أخدها معاه البيت اللي كان عبارة عن شقة واحدة دور أرضي، تدل على إن رامي هو شخصية متوسطة الدخل على عكس ثرائه و شهرته في مجال شغله. 
مكنش في جارد كتير بس بالنسبة..... لانها بنت و هما شباب.......... فمكنتش قادرة تهرب منهم. 
كانت قاعدة جنبه على طرف السرير و كل شوية تنقل نظرها بين رامي و بين تليفونها اللي تحفظ رامي عليه لحد ما هي تتكلم. 
رجعت لأوضة الأطفال اللي المفروض تستقر فيها طول فترة تواجدها مع رامي، فضلت قاعدة على سريرها و هي بتفكر في اللغز اللي اتحطت فيه!! 
وارد جدًا يكون سفيان اللي اتكلم عليه رامي هو واحد غير ابن عمها اللي بيكره يشوفها و بسببه فقدت والدتها في حادث و أختها بقت جليسة على كرسي متحرك، و من وقتها قرر والدها يسيب بيت العيلة و الثراء الفاحش اللي كانوا عايشين فيه و انعزل ببناته في الإسكندرية، لكن شاء القدر إن سارة يجيلها شغل في مستشفى خاص في القاهرة. 
ظنت إن رامي أكيد نام، عشان كدا دخلت لأوضته و هي بتتحرك على أطرافها، و أخيرًا وصلت للفون، و يادوب هتاخده.....أفزعها صوت رامي الجهورى: 
_ بتعملي ايه!!؟ 
أخدت الفون بسرعة و قالت بهزار: 
_ كنت زهقانة، قولت اتسلي شوية على الفون.
_ انتي ليه مش مقتنعة إنك مخطوفة!! 
انحنت شوية وقالت بثقة: 
_ عشان الوجه السمح اللي قدامي ده أكيد مش هيضرني.
تأمل عيونها لثواني و كأنه بيحاول يستشف منهم الحقيقة، و اخيرًا سحب الفون من إيدها، و من تمسكها بالفون كانت هتقع على رامي اللي مازال بيكلمها و هو مستلقي مكانه، و عشان تلحق نفسها ف سندت بكوعها اللي ضغط بشدة على الجرح.
تأوه رامي بوجع و زقها بعيد، فمكنش من سارة غير إنها تسيب الفون و ترجع تغير له على الجرح تاني لأن ضغطتها تسببت في نزفه مرة تانية، قبل ما تشيل الأدوات الطبية و تقوم سألها رامي بمشاكسة: 
_ ماقولتليش بقى عايزة تكلمي عمي سمير ليه؟؟ 
ابتسمت سارة بدهشة: 
_ عرفت ازاي؟؟ 
غمز لها بخفة و قال بثقة: 
_ عيب عليكي، أي حاجة عايز أعرفها بتجيلي لحد عندي.
ردت عليه بنفاذ صبر: 
_ خلي اللي يجبلك المعلومات يركز بقى عشان أنا خلقي ضيق و مش هستنى هنا كتير.
قامت عشان تخرج لكنه نادي اسمها و سمح لها تكلم والدها بشرط إنها متجبش سيرة رامي.
                             ★★★★★★
تاني يوم الصبح كانت بتتجول في البيت فانتبهت للباب المفتوح، لما قربت كان رامي بيهتم ب شتلات الزرع المرصوصة قدام الباب الخارجي، مكنش حد من الجارد موجود، و هو بيحاول ينقل النبتة الصغيرة في أصيص أكبر. 
كانت النبتة هتقع منه لكن لحقته سارة، و قالت بجدية:
_ خليني انقلها بدالك.
بالفعل زرعتها في أصيص أكبر، و بعدين سألته باستغراب: 
_ مفضلتش في سريرك ليه، و تطلب من الجارد ينقلها.
_ محدش موجود منهم، و المفروض كانت تتنقل بدري و بصراحة بكره قعدة السرير.
فضلت معاه تساعده في الاهتمام بالنباتات، و مفكرتش انها تهرب منه أو تمشي، بل كانت مبسوطة و هي بتساعده و بدأت تحكيله قد ايه والدتها كانت بتحب الزرع و النباتات، و إنها كانت دايمًا بتساعدها.
لكنه لما دخل يبدل هدومه خرج ملقهاش، دور عليها في البيت ملهاش أثر، فابتسم بسخرية و همس: 
_ وقعتي في الفخ يا سارة!! 
يتبع.............
انضم لجروب التليجرام ( هينزل فيه الرواية كاملة ) اضغط هنا
للانضمام لقناة الواتساب اضغط هنا
↚
_ وقعتي في الفخ يا سارة!! 
استخدم فونه و اتصل مباشرة على الجارد اللي كانوا معاه  و اتضح إنهم الجارد بتوع أسامة صاحبه اللي يعتبر فعلاً دراع رامي اليمين و شريكه في الشغل، و اتضح من خلال المكالمة إن رامي كان قاصد يمشي أسامة و رجالته عشان يختبر سارة لأنها لو مذنبة فعلاً هتهرب و أول حد هتقابله هيكون الشخص اللي اتفقت معاه، و لو بريئة زي ما بتقول فكانت هتفضل في البيت و مش هتغدر بيه.
رد  عليه أسامة بحيرة: 
_ أنا مش فاهم وجهة نظرك بصراحة يا رامي، أصل هي سواءًا كانت بريئة أو مذنبة في الحالتين هتحاول تهرب.
رد عليه رامي بتذكر: 
_ لاء، هي قالت و إحنا في المستشفى إن شنطتها و كل متعلقتها و فلوسها وقعوا مع شنطتها و المفروض ملهاش حد هنا تاخد منه فلوس عشان تقدر تسافر، و خصوصًا إننا احتجزنا العربية بتاعتها.
_ امال هتكون راحت فين؟؟ 
_ أكيد عند الشخص اللي اتفقت معاه، نهلة أو سفيان.
رد عليه أسامة بالنفي و هو بينزل من عربيته: 
_ معتقدش، لأن رجالتنا مراقبين نهلة و سفيان و لو هي ظهرت كان زمانهم عرفوها.
_ مش عارف بقى.
_ طيب اقفل دلوقت هجيبلك العلاج و جاي اهو.
                             ★★★★★★★
خرج لجزئية الزرع مرة تانية، و في اللحظة دي أخد الصدمة لما شاف سارة نازلة على درجات السلم اللي بتوصل لسطح البيت، و مكنتش لوحدها........دي في إيدها جوز من الحمام المدبوح و الدم مغرق قميصها الأبيض.....
ظهرت الصدمة على ملامحه و هو بيقول: 
_ نهارك اسود! دبحتي حمام اللاهور؟؟!!! 
وضحت رأيها بسذاجة: 
_ لاهور ايه! انتي عايز توقعني في البكستانين و لا ايه! دا حمام من العشة اللي عندك فوق.
قرب منها خطوة و اتكلم باستنكار: 
_ لاهور دا نوع الحمام يا جاهلة، و بعدين أنتي تقربي منهم ليه أصلًا!! 
ردت عليه سارة بتلقائية مستفزة: 
_ امال يعني هنتغدى ايه! العصر قرب و أنت معبرتنيش حتي بكوباية لبن!! شكلك هتطلع بخيل و لا ايه! 
حرك دماغه بيأس: 
_ يا بنتي و الله أنتي مخطوفة!! هو أنا تافه للدرجة دي!! 
مدت إيدها بفرد حمام و قالت بزهق: 
_ سيبك من الكلام الفارغ ده و تعالي ساعدني عشان نجهز الأكل، أنت تعبان و محتاج ترم عضمك.
ثانية واحدة، هو مش دا بردو قميصه الأبيض الجديد!! 
نزل بنظره للبنطالون المصنوع من قماش الكاشميري الغالي و دا المفروض إنه بنطالون بيجامة جديدة اشتراها رامي قبل الحادث بيوم!!! 
خرج صوته بتقطع من صدمته: 
_ انتي لابسة من هدومي!! 
حركت دماغها و قالت بتأكيد: 
_ ايوه، حلوين عليا صح؟ 
ابتسم رامي بهزلية، و قال  بغيظ مكتوم: 
_ حلوين خالص، لدرجة أني بفكر احنطك! 
ردت عليه سارة بتهكم: 
_ اعملك ايه يعني، ما أنا مش معايا لبس و لا فلوس اجيب بها لبس! 
اتحركت من قدامه من غير ما تستني رده، فهو تابع دخولها بذهول من رد فعلها، و في الوقت ده وصل أسامة اللي لما عرف اللي حصل انفجر في الضحك، و قال بتخمين: 
_ البنت دي ذكية، بدل ما تهرب منك و تدور عليه و ترجعها، عايزة تزهقك عشان انت اللي تطردها.
رد رامي باستسلام: 
_ تعالى تعالى خلينا نتغدي بالحمام الزينة بتاعي.
                         ★★★★★★
كانوا قاعدين الاتنين في أوضة رامي و بيتفقدوا تصاميم رامي الجديدة، و بعد وقت لا بأس به قفلوا اللاب و الملفات..
استنشق رائحة الأكل المنتشرة في الجو مرتين قبل ما يقول بإعجاب: 
_ شكلها ست  بيت شاطرة.
ابتسم أسامة، قبل ما يسأله بفضول: 
_ أنا مش فاهم أنت مصمم نحتجزها ليه! هتفرق معاك ايه لو اللي ورا الحادث نهلة أو سفيان كدا كدا الاتنين إيد واحدة.
اتنهظ رامي و قال بحزن: 
_ لاء طبعًا مش إيد واحدة، و أنا لازم أتأكد الأول لو نهلة ليها علاقة باللي حصل معايا، عشان لما أدمرهم مبقاش ظلمتها.
وقف أسامة و اتحرك لعند رامي و قال بحيرة: 
انضم لجروب التليجرام ( هينزل فيه الرواية كاملة ) اضغط هنا
للانضمام لقناة الواتساب اضغط هنا
↚
وقف أسامة و اتحرك لعند رامي و قال بحيرة: 
_ أنا بجد مش فاهم أنت خايف على نهلة دي كدا ليه!!! دا انت المفروض متبقاش عليها بعد اللي عملته، دي غدرت بيك و كنت هتتسجن بسببها! و كمان كنا هنخسر شغلنا و سمعتنا، و إحنا أصلا معانا الدليل اللي نرجع به حقنا و أنت بردو اللي مانعنا!!
بصله رامي بطرف عينه و خرج من غير ما يرد.
كانت سارة بترص أطابق الأكل و لما شافت أسامة هيمشي قالت بحماس: 
_ اتغدى معانا الأول يا كابتن.
انفجر في الضحك و هو بيضرب كف على كف، و بعدين بصلها و قال بهزلية: 
_ اتمني لو هيطلع حد فينا عبيط مكونش أنا و رامي!!
                          ★★★★★★★
قعدوا الاتنين قصاد بعض، لكن عيون رامي كانت مثبتة على الحمام المحشي بنظرات حسرة، طول عمره بيحب يربي الحمام بهدف المتعة مش أكتر. 
جت دلوقت سارة ببساطة طبخت له اللاهور اللي تعب جدًا عشان يشتري سلالة كويسة منه، كان بيستمتع و هو بيتفرج عليهم و هما بيطيروا لدرجة إنه ممكن يقعد جنبهم بالساعات يتأمل جمالهم. 
انتبهت سارة إنه مش بياكل، ففسرت سكونه هو قلة حيلة بسبب الإصابة اللي في كتفه و دراعه، فاتحركت و قعدت جنبه و حاولت تأكله.
تفاجأ رامي بحركتها، و فضل يبصلها بشرود، فهي نبهته لإيدها الممدودة، لكنه قام من جنبها وقال بنفور: 
_ مش بحبه.
سابها و رجع لأوضته تحت نظراتها المترقبة و ظهرت ابتسامة انتصار على وشها.
كان عايز ينام لكنه مستني حضورها عشان تغير له على الجرح، بس هي قصدت تتجاهله، و حبت تعصبه أكتر لما شغلت أغاني بصوت عالي جدًا و الساعة عدت اتناشر!!! 
زفر بضيق و نفض الغطا بعيد، و خرج يشوف أفعال المجنونة اللي خطفها عشان يعرف الحقيقة و يأدبها، بس شكلها هي اللي هتأدبه.
كانت سايبة باب الأوضة مفتوح، تمهيدًا لإثارة غضبه، لكنه بدل ما يغضب هو اتصدم لما شافها قالبة الأوضة، و حرفيًا مفيش اي حاجة في مكانها!! حتى الدولاب حركته من مكانه!! و المراتب على الأرض في جنب!!! 
ابتسمت باستفزاز: 
_ معلش ازعجتك، بس قولت أنضف الأوضة. 
حرك دماغه بهدوء مصطنع: 
_ مفيش مشكلة، بس لو حضرتك تيجي الأول تساعديني أغير على الجرح و ترجعي تكملي.
سبقها على اوضته، بينما هي اللي اتصدمت إنه معلقش على صوت الاغاني اللي أكيد هيسبب له مشاكل مع الجيران، بالإضافة لأنها بتتصرف في الأوضة بدون إذنه و مع ذلك معلقش!!!! 
قعدت تغير له على الجرح و هو متابعها بابتسامة مكر، هو دلوقت بقى متأكد إن أسامة كان معاه حق لما قال إنها بالتأكيد بتحاول تزهقه عشان يمشيها بمزاجه!!! 
خطت تجاه الباب عشان تخرج لكنها التفتت لما سمعت رامي بيقول: 
_ معلش يا سارة تبقى تعملي حملة نظافة لأوضتي أنا كمان.
عيونها وسعت بتعجب، قبل ما تبتسم بلطف مزيف و هي بتضغط على أسنانها، و أول ما خرجت من الأوضة خبطت الباب بغيظ، فاستفزها رامي أكتر: 
_ الصبح يا سارة مش دلوقت. 
                            ★★★★★★★
فضلت ترتب في الأوضة بتاعتها وقت طويل، و لما صحيت من النوم كان رامي مجهز لها الفطار.
حط قدامها كوب لبن و قال بمشاكسة: 
_ لبن اهو زي ما طلبتي، عشان تعرفي اني مش بخيل.
ابتسمت بخفة و قعدت تفطر بهدوء، و لما رن جرس الباب طلب منها رامي إنها تفتح بنفسها.
كان طالب اوردر كبير عشانها، حركت الكيس الكبير لعنده، فشاور لها رامي عشان تفتحه، و كانت المفاجأة إن الاوردر دا كله لبس عشانها.
اتكلم رامي ببرود: 
_ متفهميش غلط، أنا بس مش عايزك تلبسي من هدومي تاني.
عيونها دمعت، و سألته بترقب: 
_ أنت مشيت الجارد قصدًا عشان تشوفني ههرب و لا لاء، صح؟؟ 
اتنهد رامي بجدية: 
_ دي حقيقة، كنت متوقع إنك تمشي، بس وجودك هنا و استسلامك حيرني أكتر.
دموعها نزلت و قالت بحزم: 
_ مفيش داعي إنك تحتار، أنا هقولك الحقيقة.
بصلها رامي بتركيز فهي كملت: 
_ أنت كان معاك حق، أنا متفقة مع سفيان. 
يتبع.............
انضم لجروب التليجرام ( هينزل فيه الرواية كاملة ) اضغط هنا
للانضمام لقناة الواتساب اضغط هنا
↚
_  أنا هقولك الحقيقة.
بصلها رامي بتركيز فهي كملت: 
_ أنت كان معاك حق، أنا متفقة مع سفيان. 
ساب قطعة الملابس اللي كانت في ايده، و بصلها بانتباه، و لأول مرة بيتمنى إنها تكون بتكذب، فسألها بثبات: 
_ تقصدي ايه؟ وضحي أكتر.
مسحت سارة الدمعة اللي نزلت من عيونها: 
_ أنا متفقة مع سفيان، بس مش حاجة تخصك و الله الموضوع كله عائلي، و أنا معرفش سفيان اللي انت بتتكلم عنه هو نفسه ابن عمي و لا لاء.
_ هو ابن عمك فعلاً.
ابتسمت سارة بتوقع ساخر، و سألت رامي بترقب: 
_ هو أنت مسألتش نفسك أنا ليه قاعدة معاك لحد دلوقت؟ مع إن أنا كان ممكن أهرب منك بسهولة، أبسط حاجة ممكن اطلع على السطح و ألم عليك الجيران و اقول انك خاطفني.
_ كنت مستني منك رد الفعل ده، لكنك خالفتي كل التوقعات بصراحة و دا حيرني أكتر، بس كنت بقنع نفسي إنك عشان تسافري اسكندرية عند والدك محتاجة فلوس و انتي مش معاكي! 
بدأت تخرج قطع الملابس من الكيس الكبير و هي بتقول بهدوء: 
_ كنت عايزة استغلك، بما إنك قدرت تجمع معلومات عني فقولت ممكن تقدر تساعدني أعرف السر ورا موت ماما، لأن بابا رافض يتكلم لكن سفيان قال إني لو قدرت امضي بابا على تنازل عن نصيبه في الورث ساعتها هيقولي الحقيقة.
                          ★★★★★★★★
وقفت عربية أسامة قدام البيت الخاص بوالد سارة، نزل رامي اللي كان راكب قدام جنب صاحبه، فتح الباب ل سارة اللي ابتسمت له بمجرد نزولها و قالت: 
_  أنا حقيقي كان نفسي أساعدك في موضوعك بس انا معرفش حاجة نهائي.
اتنهد رامي و هو بيمسح على شعرها بهدوء: 
_   متقلقيش أنا هدور على الحقيقة بنفسي و أوعدك إني هعرف السر اللي يخص والدتك.
خرج أسامة شنطة هدومها الجديدة اللي جابها رامي، بالإضافة لشنطة هدومها اللي وقعت منها يوم الحادث، فشهقت بفرحة: 
_ ايه دا جبتوها ازاي؟
ضحك أسامة و هو بيخبط على كتف رامي: 
_ معانا من اول يوم حضرتك.
رجع أسامة للعربية تاني، بينما وضح لها رامي إن الشنطة فعلاً كانت معاهم من البداية لكنه خباها عشان يعجزها عن السفر و يجبرها تفضل معاه.
فسألته سارة باستغراب: 
_ الله! طب و اشتريت لي هدوم جديدة ليه؟ 
_ اعتبريها تعويض عن الحلق اللي بعتيه و دفعتي بتمنه مصاريف المستشفى.
_ ايوه بس المستشفي دا كان وضع طارئ لكن اللبس الغالي اللي انت جبته دا مكنش له لازمة و خصوصًا في وجود اللبس بتاعي!!!
رد عليها رامي و هو بيحط إيده على قلبه و بحزن مصطنع: 
_ بلاش موضوع اللبس ده عشان بفتكر اللبس بتاعي و اللاهور اللي طبختيه، ادخلي يا سارة، ادخلي الله يكرمك. 
ضحكت بشدة على شكله اللطيف، و شكرتهم عشان وصلوها البيت و بالرغم من إنها اخدت عربيتها إلا إنه ركبت معاهم و الجارد ركبوا بتاعتها عشان يتأكدوا إنها وصلت بيتها بأمان.
حطت الشنطة على السرير و بدأت ترتب هدومها في الدولاب، لكن مع اول هودي شالته انتبهت لعلبة مجوهرات قطيفة و كانت المفاجأة إنه الحلق بتاعها اللي باعته عشان تدفع مصاريف المستشفى.
                        ★★★★★★★
خطواته كانت بطيئة، كل ما يقف عند اي أثاث في الأوضة يفتكر شكل سارة وهي بتنظمه بعد الكركبة اللي كانت عملتها، طلع يقعد جنب اللاهور لكنه و لأول مرة مش مبسوط بأي حاجة، حاسس بوحدة شديدة.
هو شخص شديد التعلق بالأشياء و بأي حاجة تخصه، مابالك بقى بإنسانة دخلت حياته فجأة و انقذته و اهتمت بصحته و بأكله و صنعت جو ممشاكس لطيف!
ايوه صح عصبته كام مرة ........لكنه كان مبسوط إنه مش وحيد!!! 
و هو بيفرد الشاش على كتفه، نفض رامي إيده بعيد و قال بتهكم: 
_ مش كدا يا أسامة، سارة كانت بتلفها بطريقة تانية، حلوة عن كدا!!! 
ابتسم أسامة بمداعبة: 
انضم لجروب التليجرام ( هينزل فيه الرواية كاملة ) اضغط هنا
للانضمام لقناة الواتساب اضغط هنا
↚
_ سارة! 
_ ايوه سارة، كانت بتلفها حلو عن كدا، انت مش عارف تعملها.
حرك أسامة دماغه بيأس و قال بغيظ: 
_ معلش اصل أنا أول مرة اشتغل شغل تمريض، مضطر حضرتك تستحملني لأن سارة مش هنا.
اتنهد رامي بضيق: 
_ ماشي هستحملك، أنت كدا كدا مش نافع في حاجة!!! 
ثبت قطعة البلاستر الطبي، و خبطه بخفة على كتفه المصاب: 
_ يكش يطمر يا بتاع سارة.
شال أسامة علبة الإسعافات الطبية عشان يرجعها مكانها لكنه نسي بكرة البلاستر الطبي، فرد عليه رامي باستنكار:
_ ايه بتاع سارة دي ما تحترم نفسك ! هي بتلعب معاك؟ اسمها مس سارة!!
التفت له أسامة و ابتسم بمشاكسة: 
_ يعني انت اللي زعلك اني قولت اسمها من غير لقب! مش إن أنت بتاع سارة فعلاً!!
حدفه رامي بالبلاستر اللي جنبه: 
_ احترم نفسك قولتلك. 
_ دا شكلها سيطرت عليك في الأربع ايام اللي قعدتهم معاك!!! و الله جامدة مس سارة.
و كأنه كان قاصد يستفزه، فالمرة دي صرخ رامي بغضب و غيرة: 
_ احترم نفسك قولتلك! 
ربع أسامة دراعه و سأله بغيظ: 
_ أنت قولت احترم نفسك أكتر ما اتكلمت، هو أنا يعني مش محترم.
_ بصراحة لاء، متعرفش حاجة عن الاحترام.
ضيق أسامة عيونه و قال بترقب: 
_ حتى لو قولتلك إني جبتلك معلومات جديدة تخص والدة سارة؟؟ 
اتعدل رامي في قعدته و قال بمدح: 
_ دا انت كدا اكتر واحد محترم في اللي مش محترمين.
ضحك أسامة بخفة: 
_ مقبولة منك يا صاحبي، المهم قولي......سارة قالتلك والدتها ماتت ازاي؟؟ 
_ قالت إنها وقعت من الدور العاشر في الأوتيل بتاعهم، و دخلت العناية فترة ولما فاقت كانوا بينقلوها لمستشفى تانية فعربية الإسعاف عملت حادثة فماتت والدتها و أختها بقت قعيدة على كرسي متحرك.
_ سفيان هو اللي ورا الحادثة، وعارف ايه السبب إنه يتخلص منها؟ 
_ ايه؟ 
_ والدة سارة هي نفسها مدام هناء، مصممة الأزياء اللي اتسرقت تصاميمها، و طبعًا لو كانت كشفت الموضوع كان سفيان أعلن إفلاسه......
                         ★★★★★★★★
كانت قاعدة على سطح العمارة مع ولاد الجيران، لما رن فونها اتحركت بعيد عنهم عشان ترد على رامي اللي بدأ يطمن عن أحوالها و طمنها على نفسه، وعرف منها إنها قاعدة مع أولاد الجيران بتتفرج عليهم و هما بيلعبوا بالطيارات الورق، فبعد ما كان رانن عليها عشان يقولها الأخبار اللي عنده تراجع و قرر إنه ياخدلها طيارة ورقية و يروح لها بنفسه، ويطمن عليها و يشوفها. 
لكنه مكنش يعرف إن الموضوع هيتقلب عليه، لأنه أول ما فصل معاها جاله مكالمة من أسامة اللي قال إن والدها احتمال يكون له دخل في اللي حصل لهناء.
و هنا بقى كان مضطر إنه يداري عنها المعلومات اللي وصلها لحد ما يتمكن من المعلومات كاملة.
                            ★★★★★★
اشترت طلبات للبيت و في طريقها للبيت، تفاجأت بوجود سفيان اللي ابتسم لما شافها و قرب منها بثبات و نظراته الماكرة، و بدون مقدمات سألها لو والدها وقع على أوراق التنازل.
و لما عرف إنها مجبتش سيرة لوالدها بخصوص الورق، قال سفيان بتراجع: 
_ عمومًا أنتم مش مضطرين تتنازلوا عن الميراث، أنا هقولك على الحقيقة.
بصت له بترقب و بلعت ريقها: 
_ ايه اللي حصل؟؟ 
_ كل اللي أقدر أقوله، إن مصمم الأزياء رامي عاشور هو اللي ورا حادث مرات عمي.
يتبع...........
انضم لجروب التليجرام ( هينزل فيه الرواية كاملة ) اضغط هنا
للانضمام لقناة الواتساب اضغط هنا
↚
مش معقول الشخص اللي وثقت فيه و أمنته على سرها، يكون هو السبب في خسارة والدتها...... دي حياتها كدا تدمرت!!! 
دا لو كلام سفيان صح....تبقى سارة كدا مش هتقدر تثق في حد، لا قريب كويس و لا حتى الغريب!! 
استشف سفيان من نظراتها إنها مش مصدقة، فقال بخبث: 
_ لو مش مصدقة يا سارة، تقدري تجيبي دليل كلامي دا بنفسك.
ضيقت عيونها و سألته باستفسار: 
_ ايه الدليل؟؟ 
_ هتلاقي عنده دفتر الرسم الخاص بمرات عمي الله يرحمها.
هو مش بس قال كدا دا كمان أقنعها إنها لو حبت تجيب حق أمها من رامي، هو كمان هيساعدها، لأنها طبعًا بنت عمه و مستعد يعمل اي حاجة عشانها...
و بالفعل سارة قطعت إجازتها و رجعت القاهرة تاني، و توجهت مباشرة لبيت رامي، اللي أول ما فتح لها الباب  كانت ملامح الجمود اللي على وشه بتدل على صدمته بوجودها. 
ابتسمت سارة و قالت بإحراج زايف: 
_ بعتذر اني جيت فجأة، بس السكن بتاعي فيه مشكلة و ملقتش مكان أروحه.
طلعت سارة كمان بتكذب زي كل اللي عرفهم!!! في اللحظة دي افتكر رامي اللي حصل معاه قبل وصول سارة بيوم.
كان بيسقي الزرع بتاعه، لما انتبه لصوت البوابة اللي اتفتحت، شرع بعيونه تفاجأ إنها نهلة!! بنت عمه اللي غدرت بيه و كانت هتدمر حياته المهنية تحت مسمى الحب!!! 
كانت بنت جميلة و أنيقة و محجبة، كانت خطواتها مرتبكة، خايفة من رد فعل رامي، و بصراحة هو لو كسر دماغها دلوقت يبقى معاه حق.......طب ما يمكن رامي يكون غلطان و نهلة على حق!!! 
ساب مرشة الزرع البلاستيك من ايده، و ابتسم بسخرية و هو بيسألها بعتاب: 
_ ايه اللي رماكي عليا دلوقت؟ جاية تشوفني لسه بتنفس و لا مت؟؟ 
كانت هترد عليه لكنه منعها، لم كمل: 
_ و لا لسه في حاجة عايزة تدمريها في حياتي؟؟
اتنهدت نهلة بحزن، و فتحت شنطتها اليدوية و طلعت دفتر رسم و قالت بجدية: 
_ أنا جيت أرجعلك ده.
رامي نقل نظره بينها و بين الدفتر، و كمل باستهزاء:
_ سفيان عارف إنك سرقتي منه الدفتر و جاية ترجعيه للمنافس؟؟ ممكن ينفصل عنك و ساعتها هتخسري كل حاجة يا أستاذة نهلة!؟
ابتسمت نهلة بحب و قالت بثقة: 
_ أنا متأكدة إن عمرك ما هتتخلي عني يا رامي.
بدون إذنه دخلت البيت و توجهت للصالون، و هو دخل وراها و هو بيسخر من نفسه لأن كلامها صح و هو عمره ما هيتخلى عنها!! أصل العشرة و التعلق مش هيروحوا ببساطة!!! 
قعد قصادها وحط رجل على التانية ونظراته مثبتة عليها بجمود عكس الحيرة اللي جواه، بينما نهلة حطت الدفتر على الركنة و قالت بجدية: 
_ سفيان هو اللي طلب مني اجيبلك الدفتر، كان المفروض ادخل هنا وأغفلك وأسيب الدفتر بين اي كتب او ملفات وامشي، و المفروض إن هتيجي سارة بنت عم سفيان و تشوف الدفتر و تتهمك بقتل مامتها، مدام هناء.
اتعدل في قعدته و هو بيتطرف على الركنة: 
_  و المفروض إني هاخد منك الدفتر و أشيل التهمة عادي كدا!!! مازلتي كل مرة تصدميني بشخصيتك اللي متوقعتهاش يا نهلة!!! 
اتنهدت نهلة وقربت  تقعد جنبه وبدأت تشرحله القصة من أولها، و إنها كانت مجبرة تختار سفيان عشان تحافظ على حياة رامي، هي كانت سكرتيرة في مكتب رامي، ولما تعاقدوا مع مدام هناء في الوقت ده بدأ سفيان يقرب من نهلة ويوهمها بالحب عشان يقدر ياخد منها التصميم لكن نهلة رفضت و حصلت خناقة بينهم.
لكن سفيان قدر يسرق التصاميم من هناء بسهولة و دا لأنها مرات عمه و عايشين في نفس البيت، و كان الدليل الوحيد اللي يثبت إن التصاميم و الأفكار تخص هناء كان هو الدفتر اللي سلمته هناء ل رامي قبل ما تموت. 
انضم لجروب التليجرام ( هينزل فيه الرواية كاملة ) اضغط هنا
للانضمام لقناة الواتساب اضغط هنا
↚
و من هنا بدأ تهديد سفيان بأنه مستعد يتخلص من رامي بأي شكل من الأشكال عشان خاطر سرقة التصاميم متتكشفش، فكانت مجبرة إنها تسرق الدفتر من رامي في نفس يوم العرض على لجنة التحقيق و بذلك خسر رامي و أسامة خسائر مادية كبيرة و كمان تصاميمهم اللي اتسرقت مع تصاميم هناء، بينما فاز سفيان بتعاقد خمس سنين مع شركة تصاميم عالمية و بدعم سنوي مقداره خمسين مليون دولار. 
نهلة المرة دي مش راجعة عشان تنفذ خطة سفيان، و إنما راجعة عشان تساعد رامي و ترجع له حقه و تسلمه الأدلة اللي جمعتها ضد سفيان في السنتين اللي فاتوا. 
انتهي الفلاش باك
                         ★★★★★★★
ابتسم رامي بمجاملة و سمح لها تدخل، لكنه خرج فورًا عشان يقابل أسامة اللي كان في المكتب و أول ما دخل رامي، سأله باستغراب: 
_ الله ايه اللي جابك؟ مش قولتلك هخلص و هعدي عليك ؟؟ 
اتحرك رامي للشباك و هو بيتابع حركة العربيات: 
_ سارة رجعت. 
لف أسامة بكرسي المكتب و ضيق حواجبه باستغراب: 
_ طيب ما المفروض تكون مبسوط مش وحشتك، ايه اللي مزعلك بقى؟؟ 
احتفظ بكفوف إيده في جيب الجاكت وظهرت ابتسامة منكسرة: 
_ سارة راجعة عشان تنتقم مني. 
اتحرك لعنده و هو بيسأله بحيرة: 
_ تنتقم ليه؟ آمال لو مكنتش طلبت منك تساعدها!!!
اتنهد رامي و شرد بعقله و هو بيحكي الحوار اللي دار بينه و بين نهلة، فقال أسامة بجدية: 
_ أولًا الدفتر ده وجوده زي عدمه لازمته انتهت في اليوم اللي خرجنا فيه من المسابقة! حاليًا ملهوش أي تأثير قانوني. ثانيًا بقى سفيان يبقى عرف أننا بنراقبه  وهنوقعه فبيحاول يلحق نفسه و يوقع بينك و بين سارة عشان لو هي كرهتك و بطلت تثق فيك ساعتها دا ممكن يساعده لأنها هتبقى وثقت في ابن عمها ومش هتصدق عليه حاجة.
★★★★★★★ 
على الطرف التاني كان سفيان قاعد مع والده اللي طلب منه يكلم عمه، و اول ما فتح الخط، خرج صوت سفيان بتهكم: 
_ حضرتك نايم على ودنك يا عمي و الأستاذة الممرضة بدأت تدور ورانا ولو حصلنا حاجة يا عمي أنت كمان هتيجي في الرجلين، أنا حذرتك أهو. 
★★★★★★★
 قاعدة على طرف السرير و بتهز رجلها بتوتر، كانت مترددة بين أفكارها، خايفة تصدق إن رامي مذنب و تظلمه، و خايفة تثق فيه و تضيع حق والدتها.
حسمت أمرها وقررت تدور في البيت على الدفتر، كدا كدا رامي مش موجود، فلو لقت الدفتر يبقى سفيان معاه حق و لو ملقتش الدفتر تبقى مخسرتش حاجة و كدا كدا رامي مش هيعرف إنها شكت فيه.
اتجهت مباشرة لأوضته و بدأت تدور على المكتب الجانبي و أوراق شغله، لكنها ملقتش حاجة، فمكنش قدامها غير أنها تدور في دولاب الهدوم لكنها استغربت أنه محتفظ بقميصه الأبيض اللي باظ بسبب الاهور و هي معرفتش تنضفه.
هي فاكرة كويس إنه وقتها رد عليها رامي ببردو: 
_ ارميه، كدا كدا مش هلبسه!!! 
لكنه دلوقت محتفظ به و بنفس البقع!!!
تغاضت عن الموضوع و بدأت تدور على الدفتر لكنه مكنش موجود........استمرت في تحريك اللبس الموجود على الشماعة و المرة دي انتبهت إن جيب القميص الخاص بالاهور فيه حاجة، و هنا بقى دفعها فضولها تاخد الورقة الموجودة في جيب القميص، لكن قبل ما تفتحها، تفاجأت ب رامي اللي طل على باب الأوضة وقال بهدوء: 
_ بتدوري على ده؟
يتبع.............
انضم لجروب التليجرام ( هينزل فيه الرواية كاملة ) اضغط هنا
للانضمام لقناة الواتساب اضغط هنا
↚
دفعها فضولها تاخد الورقة الموجودة في جيب القميص، لكن قبل ما تفتحها، تفاجأت ب رامي اللي طل على باب الأوضة وقال بهدوء: 
_ بتدوري على ده؟ 
بلعت ريقها بمشاعر كتير متلغبطة، واتحركت لعنده و سحبت الدفتر من ايده و تفقدته بتمعن و كان فعلاً دفتر والدتها.....هي حافظة توقيع والدتها اللي كانت بتسيبه على كل تصميم، و كانت بتكتب أفكارها بخصوص القماش تحت التصميم.
قفلت الدفتر، فنزلت دمعتها على الغلاف و هي بتسأله بتحفز و غضب: 
_ بيعمل معاك ايه؟؟ دفتر أمي أنت محتفظ به ليه؟؟؟ 
صرخت سارة في سؤالها الأخير، فشد رامي على ايده عشان ميتعصبش، و خرج رده بهدوء: 
_ ممكن مثلاً عشان والدتك كانت متعاقدة معانا؟!!
بصتله بضياع و عيونها بتبحث عن الحقيقة في عيونه، لما رددت بحيرة: 
_ متعاقدة معاك ازاي!! و التصاميم دي نفسها اللي قدمت بها شركتنا في مسابقة فرنسا العالمية اللي كانت من سنتين!!؟ 
كان حاسس بسهام الاتهام اللي خرجت من كلامها بتخترق قلبه، و دا كان مسبب وجع و خذلان كبير بالنسبة ، لكنه تظاهر بالبرود وقال: 
_ حابة تعرفي الحقيقة بجد؟ و لا هتسمعي كلام سفيان و تتهميني بقتل والدتك و خلاص؟!؟!
تفاجأت سارة لما فهمت إنه على علم بالاتفاق اللي بينها و بين سفيان، فضيقت حواجبها باستغراب: 
_ أنت عارف و مع ذلك جاي تسلمني إثبات إن سفيان على حق!!!
اتنهد رامي بحزن: 
_ كنت اتمني تكوني واثقة فيا و تيجي تحكيلي اللي حصل مباشرة! بس خالفتي توقعاتي يا سارة.
مسحت دموعها بضهر إيدها و قالت: 
_ و انت يعني متوقع مني ايه؟ المفروض أثق في مين و أنا مش واثقة في والدي نفسه.
_ والدك ملهوش علاقة بالموضوع، يا سارة. 
انسحبت سارة من المواجهة و دخلت أوضتها لأنها كانت محتاجة تحدد موقفها قبل ما تسمع كلام رامي، هي فعلاً ضايعة ومبقتش عارفة من كذاب و مين صادق.
طول الليل هي مش عارفة تنام من كتر التفكير، بس لو المفروض تثق في حد يبقى تثق في رامي لأنهم اتقابلوا صدفة و كان على حافة الموت و من قبل ما يعرف هي مين كان بيتهمها إنها متفقة مع سفيان، و طالما سفيان حاول يقتل رامي يبقى رامي على حق و ماسك سر على سفيان، بالإضافة لأن سفيان عمره ما حبها و دايمًا كانت منبوذة هي و أمها و أبوها و أختها من عمها و جدها و باقي العيلة. 
أول ما الشمس طلعت اتحركت لأوضة رامي اللي معرفش ينام هو كمان، دقت الباب مرتين و هو سمح لها تدخل في المرة التالتة.
بدون مقدمات قالت بهدوء: 
_ أنا عايزة أعرف كل المعلومات اللي عندك، مش هسمح لسفيان يضللني. 
ابتسم لها بخفة لأنها وثقت فيه، و بدأ يحكلها إن اليوم اللي والدتها وقعت فيه من الاوتيل في الوقت ده كان سفيان موجود في الجناح الخاص بهناء و خرج مباشرة بعد ما هي وقعت، بالإضافة لأن اليوم اللي حصل فيه الحادث مع عربية الإسعاف اللي كانت بتنقل هناء، بعدها مباشرة عربية والد سفيان راحت ورشة تصليح و الكسر اللي كان فيها من الجزء الأمامي يدل إنها تعرضت لحادث، و طبعًا سفيان عمل كدا لأن والدتها كانت قادرة تثبت إن التصاميم ليها و ساعتها كانت شركة العيلة هتعلن إفلاسها. 
مسحت سارة دموعها اللي نزلت و قالت بحزن: 
_ تعرف إن ماما حاولت كتير عشان تشتغل كمصممة في شركة جدي لكن عمي كان بيرفض كل مرة، و بابا كان ضعيف الشخصية و مكنش بيتناقش مع عمي في اي حاجة حتى لو بابا على حق كان كلام عمي هو اللي بيمشي، كنت لما بغلط و أنا صغيرة كان عمي هو اللي يعاقبني مش بابا أبدًا.
طبطب رامي على كتفها بمواساة: 
_ متقلقيش يا سارة، حق والدتك هيرجع احنا معانا إثباتات كافية. 
 بصت له بترقب: 
_ طيب أنت دلوقت تقدر تسترجع المشروع دا تاني لو أثبتنا إن التصاميم بتاعة ماما؟ 
_ بصراحة مش عارف، و مش مهتم ناخد المشروع تاني، أنا كل اللي كان هاممني في الحرب دي هو خسارة نهلة، بس الحمدلله علاقتنا اتصلحت تاني.
قطع حديثهم جرس الباب، فاستغربوا مين هيزورهم الساعة سبعة الصبح!! 
اتحرك رامي للباب و من وراه سارة اللي شهقت اول ما شافت الشخص اللي على الباب و قالت بصدمة: 
_ بابا!!؟ 
تخطي والدها رامي وكان رده عليها هو الكف اللي نزل على وشها ، قبل ما يقول بغضب: 
_ واضح إني سبتلك حرية زيادة عن اللزوم، لدرجة إنك عايشة في بيت راجل غريب!! 
حطت ايدها على خدها و سألته بخفوت: 
_ عرفت مكاني ازاي؟؟ 
صرخ في وشها: 
_ هو دا كل اللي همك؟ مش إنك قاعدة مع شاب في بيت لوحدكم!! طيب يا ستي اهو بسببك بقي لسفيان فرصة جديدة عشان يذلني. 
ابتسمت سارة بحسرة: 
_ سفيان!! كان لازم اتوقع إنه اكيد هيكلمك عشان تمنعوني أكشف الحقيقة اللي انت عارفها و مخبيها و مش بعيد تكون مشترك معاهم كمان!! 
ارتبك والدها وتظاهر الجهل: 
_ حقيقة ايه اللي بتتكلمي عنها؟ 
مبقتش قادرة تتحكم في غضبها اكتر من كدا، فصرخت: 
_ حقيقة وفاة أمي اللي اشترك عمي وسفيان في قتلها! 
مكنش لاقي مخرج ينفي بيه الحقيقة لأن هو أكتر واحد عارف الحقيقة و مع ذلك كان مجبور يفضل ساكت عشان مصلحة بناته و حياتهم، لأنه لما أكتشف الحقيقة واجه تهديد من أخوه و سفيان اللي أجبروه ياخد بناته و يمشي من الڤيلا بدون ما يقدم أي مبرر لحد و لا حتى بناته. 
صرخت سارة في وشه و كملت: 
_ أنا سمعتك و أنت بتتكلم مع عمي و بتقوله إنك هتاخد بناتك و تعيش في مكان منفصل و مش هتسمح لحد يعرف الحقيقة!! فكان لازم أدور على الحقيقة بنفسي.
رد والدها بتهكم: 
انضم لجروب التليجرام ( هينزل فيه الرواية كاملة ) اضغط هنا
للانضمام لقناة الواتساب اضغط هنا
↚
_ انتي هتعيشي طبيعي و لا كأنك عرفتي حاجة، عمك و سفيان مش هيسبونا في حالنا يا سارة.
ابتسمت سارة بسخرية: 
_ أنت خايف علينا من عمي! و لا خايف عمي يقول إنك مشترك معاهم!!! 
حرك والدها دماغه بخذلان و قال بحزن: 
_ يا خسارة يا سارة، أنت متوقعة إني ممكن أشارك في جريمة زي دي؟ معقول أنا هسمح لحد يئذي هناء و اشترك معاهم كمان!؟؟
بدأت تضرب بقبضتها موضع قلبها و هي بتقول بحيرة من بين دموعها: 
_ مش سهلة عليا! مكنتش سهلة و أنا عايشة وبشك فيك! بس مفيش مبرر، اعطيني مبرر يخليك تخبي اللي حصل و تتنازل عن حق ماما، عايزة مبرر يخليك تسمع كلام عمي و تاخدنا و تسافر و توهمنا إن دا كان قرارك!! 
تدخل رامي في الحوار و قال بجدية: 
_ والدك كان مجبور يعمل كدا عشانك انتي و أختك يا سارة، أنا معايا الدليل إن والدك بريء.
حان الآن دور الأدلة اللي جبتها نهلة و الڤيديو ده كانت صورته سكرتيرة سفيان القديمة عشان تستغله و تاخد منهم فلوس، و كان الڤيديو بيوضح خناقة والد سارة مع سفيان و أبوه و تهديدهم بأنه لو حاول يعمل حاجة هيتخلصوا من بناته زي ما تخلصوا من مراته. 
مبقاش له لزوم إنهم يستنوا أكتر من كدا، بقي من الضروري إنهم يفتحوا قضية موت هناء و يقدموا الأدلة اللي معاهم، و بالفعل بمرور الوقت اتقبض على سفيان و أبوه و الجد طلب من سمير يرجع الڤيلا هو و بناته، لأنهم دلوقت مش مجبورين يعيشوا بعيد عن عيلتهم. 
و نظرًا لأن سمير هو اللي هيبقى مسؤول عن شغل العيلة فمحاولش رامي إنه يسترد المشروع اللي اتسرق منهم من سنتين، و دا كان سبب عشان يلح سمير على رامي و أسامة إنهم يبقوا شركاء في الشغل بدل ما يكونوا منافسين لبعض، و هما رحبوا بالفكرة لأن شركة العيلة دي من أكبر و أنجح الشركات في البلد.
و بالنسبة لرامي كانت فرصة حلوة عشان يشوف سارة، لكن حصل العكس و مبقاش يشوفها خالص و لا حتي صدفة!! حتى الحفلات الخاصة بالشركة كانت أختها بتحضر و هي لاء و كأنها قاصدة تتهرب منه!
و في الحقيقة هي فعلاً كانت بتتهرب منه لأنها خافت مشاعرها تكبر و تتعلق به و في الآخر قلبها ينكسر، بس هي كدا كدا اتعلقت ومشي الحال و الوجع اللي خافت منه على وشك إنها تعيشه.
كانت بتكوي طقم الشغل بتاعها لما دخل والدها، وجايب معاه نوع الآيس كريم المعلب اللي بتحبه سارة.
قعد على طرف السرير و هو متابعها بنظره، فهي ابتسمت و قالت: 
أنا واخدة بالي، بس هخلص الأول و بعدين استفرد بالآيس كريم.
ضحك سمير بخفة و ساب العلبة على الكومود، و اتحرك عشان يخرج لكنه وقف و قال: 
_ بالحق يا سارة خطوبة نهلة بعد بكرا و إحنا معزومين، هتيجي معانا و لا ايه؟؟ 
بدأ قلبها يدق جامد و هي بتختبر إحساس جديد من الوجع، لكنها تظاهرت بالجمود: 
_ مش عارفة يا بابا، انا يومها عندي سهر يعني احتمال معرفش أحضر. 
_ لاء لو على الشغل هتكون الحفلة خلصت أصلًا، لأنها بالنهار في قاعة فندقنا المفتوحة.
سكتت شوية و هي بتفكر لأنها مش هتقدر تروح و تشوف رامي بيخطب غيرها، فقال سمير بتشجيع: 
_ على فكرة رامي بنفسه أكد عليا حضورك.
واضح إنها مش فارقة معاه نهائي! حسمت أمرها وقررت تحضر الخطوبة، المفروض أصلا مكنتش تتوقع منه حاجة واحد قالها إن نهلة أهم حاجة بالنسبة له! شخص فات على آخر مقابلة بينهم سبع شهور و مفكرش يبعت لها رسالة او حتي يكلمها!! 
انزوت شفايفها بابتسامة ساخرة و رددت بحزن: 
_ و أنا اللي فكرت احتفاظه بقميص اللاهور عشان ذكري عني!! 
افتكرت دلوقت الورقة اللي كانت في جيب القميص و اللي لحد دلوقت مقرأتهاش!! و مش فاكرة أصلا هي سابت الورقة فين! 
هي عمرها ما تبقى ضعيفة و لا بكاءة، و عشان كدا لبست فستان و تأنقت بمكياچ خفيف و استعدت و كأنها أخت العروسة بل ممكن تكون العروسة نفسها! 
كان متحمس لما عرف من والدها إنها موجودة في القاعة مع المعازيم، فتوجه مباشرة و سلم عليها وعلى أفراد العيلة، و بعدين وقف جنبها و مال بدماغه شوية و قال: 
_ وحشتيني.
بصتله باستغراب ما هو مش معقول سايب عروسته ورايح يقولها إنه مفتقدها، و مع ذلك هي ردت باقتضاب: 
_ متشوفش وحش.
ابتسم رامي وقال بحب: 
_ وحش ايه بس، دا أنتي الحلو كله.
بصتله سارة و سكتت، لكنه رجع سألها بمشاكسة: 
_ ايه موحشتكيش و لا ايه؟؟ 
كانت معتقدة إن إجابتها مش هتفرق معاه، فقالت بجدية: 
_ بلاش تتأخر على عروستك.
هو دلوقت فهم سبب تهكمها في الكلام، فقال بحماس: 
_ معاكي حق، مش لازم أتأخر أكتر عن كدا.
مع آخر كلمة نطق بها، كان قابض على معصمها و سحبها وراه من غير ما يهتم بضربات ايدها الخفيفة على قبضته.
لما ركبوا الأسانسير هي كانت هتخرج، لكنه منعها وقال بمشاكسة: 
_ بلاش تأخرينا بقى. 
بصت له بضيق و قالت بعصبية: 
_ مش فاهمة واخدني معاك ليه!! 
قرب منها جامد و قال بتوضيح: 
_  نهلة هتتخطب ل أسامة، مش أنا
انضم لجروب التليجرام ( هينزل فيه الرواية كاملة ) اضغط هنا
للانضمام لقناة الواتساب اضغط هنا
↚
بعد عنها و وقف مكانه بهدوء، فهي سألته بحزن: 
_ هي رفضتك؟ 
ضحك رامي بيأس و قال بمرح: 
_ نهلة تبقى بنت عمي و أختي في الرضاعة، مش معنى إني قولت عنها مهمة في حياتي يبقى بينا حب جوازات.
هنا ابتسمت تلقائي، و وقفت جنبه بهدوء لحد ما وصلوا سطح الفندق، و هنا تفاجأت بوجود طيارة ورقية كبيرة نوعًا ما .
نقلت نظرها بين رامي و بين الطيارة باستغراب، فهو ابتسم بحب و قال: 
_ قولتيلي قبل كدا إن نفسك تجربي تلعبي بالطيارات الورقية. 
معقول لسه فاكر! يعني هي فعلاً مهمة بالنسبة له؟؟ خالف توقعاتها و غير مودها الحزين ١٨٠ درجة، دي من كتر السعادة كانت حاسة إنها ممكن تطير بدل الطيارة، اهو رامي اللي أنقذت حياته...... النهاردة أنقذ قلبها من وجع و انكسار هي مش قده!!! 
أضاف رامي بغموض: 
_ بس لو قبلتي الطيارة يبقى لازم تقبليها كلها.
مفهمتش قصده، لكنها حركت دماغها بموافقة. 
بدأوا سوا يرفعوا الطيارة و بمرور دقايق، استقرت الطيارة في السما و هنا ظهرت المفاجأة الأساسية.
و هي كلمة "بحبك" اللي تشكلت بالأكياس الملونة كجزئية ممتدة من الطيارة.
ضحكت بسعادة شديدة، و قالت: 
_ اتمنى دا ميكونش حلم.
_ لاء دا واقع، و كان ممكن نعيش اللحظة دي في وقت أبكر من كدا لو كنتي قرأتي الورقة اللي اخدتيها من قميص اللاهور. 
سألته بفضول: 
_ ايوه صح كان مكتوب فيها ايه؟ 
احتوى رامي كفوفها بين ايده، و قال بحب: 
_ تمنيت فيها إن الونس و الدفا اللي حسيت به يوم اللاهور يكون هو الواقع في حياتي بنفس الشخص. 
سألته سارة بمشاكسة: 
_ حتى لو خلصت لك على سلالة الاهور اللي عندك؟ 
رد عليها رامي بهيام: 
_ حتى لو خلصتي عليا انا شخصيًا.
ضحكت سارة و قالت بحسم: 
_ يبقى أنا موافقة نخليه واقع. 
تمت بحمد الله 

انضم لجروب التليجرام ( هينزل فيه الرواية كاملة ) اضغط هنا
للانضمام لقناة الواتساب اضغط هنا