موسى بصلها بحدة خلت غزل تحس انها قدام جهاز كشف كذب بشري .

وعينيه كانت بتخترق ملامحها كأنه بيحاول يقرأ اللي ورا عينيها.

موسى بصوت حاد:وأنا ايه اللي يخليني أصدقك؟! .. مش يمكن دي خطة جديدة من خطط ممدوح الصاوي وبعتك انتي المرة دي عشان توقعي بيني وبين مراتي وتشتتي انتباهي عن الصفقة؟!!

غزل ملامحها اتغيرت فورا وفقدت هدوئها وقامت وقفت وهي بتخبط بايدها على المكتب بقوة ووشها احمر من الغضب:أنا غزل الصاوي يا موسى بيه .. والاسم ده لوحده يعني كرامة فوق اي صفقة واى فلوس .. أنا عمي مد ايده عليا وضربني بالقلم عشان وقفت في وشه ورفضت أكون أداة في قذارته .. أنا جاية هنا مش عشان سواد عيونك أنا جاية عشان مسمحش لشيطان زي ممدوح انه يكسب وعشان أثبت لنفسي قبل الكل ان تربية أبويا ليا لسه موجودة .. أنا مش محتاجة أوقع بينك وبين مراتك الورق اللي صورته ده هو اللي هيوقع الكل ولو خايف على مشاعرك من الحقيقة فدي مشكلتك انت مش مشكلتي!!! .

موسى فضل باصص لها بهدوء غريب بعد الانفجار ده وكأنه كان بيختبر ثباتها رجع سأل ببرود:وقدرتي توصلي للورق ده ازاي؟! .. على حد علمي الورق ده يا مع ممدوح يا مع انجي مراتي .. وانتي لا ليكي علاقة بده ولا دي!! 

غزل أخدت نفس عميق:هحكيلك اللي حصل بالظبط..

••فلاش باك••

غزل خارجة من الشركة اليوم اللى شافت انجى فيه عند عمها ممدوح ولمحتها واقفة ساندة على عربيتها ووشها باهت وباين عليها التعب .

غزل قربت منها:انتي كويسة يا مدام؟! .. مالك؟!!

انجي بتوتر:أنا كويسة .. بس الضغط شكله وطى فجأة.

غزل بصت للورق اللي انجي كانت ماسكاه في ايدها بفضول وقررت تسايرها طب تعالي اطلعي الشركة اغسلي وشك وهتبقي كويسة.

انجي:لا مش قادرة اطلع تاني.

غزل:خلاص فيه حمام في الدور الأرضي قريب من هنا تعالي أوصلك ليه.

دخلوا الحمام وغزل كانت بتفكر بسرعة:ادخلي انتي لأن الحمام صغير جدا وأنا هستناكي هنا .. وهاتي شنطتك والورق عشان مفيش مكان تحطيهم فيه جوه وممكن يتبلوا.

انجي من كتر التعب وعدم التركيز سلمتها الشنطة والملف ودخلت .

غزل في ثواني فتحت الملف واتصدمت من اللي شافته وصورت كل ورقة بموبايلها بسرعة البرق ورجعت الملف مكانه.

لما انجي خرجت غزل عطيتها حاجتها ببرود:أحسن دلوقتي؟!

انجي:الحمد لله .. شكراا ليكي جدا .

غزل:العفو .. تحبي أوصلك؟!

انجي:لا شكرا .. أنا هقابل واحدة صاحبتي في المطعم اللي جمب الشركة.

••باك••

غزل بتكمل كلامها لموسى:وده اللي حصل .. وقتها مكنتش أعرف مين جوزها بس لما شوفتها معاك في كتب الكتاب الشك أكلني .. كلمت واحدة صاحبتي شغالة في الشركة وطلبت منها تراقب الوضع والنهاردة بلغتني ان صاحبة مراتك اللي اسمها ايمي كانت عند ممدوح وهي اللي بتخطط معاه لكل ده والأدهى من كدة ان عمي واعدها بالجواز لما تخلص المهمة وتوقعك.

موسى سكت تماما وعينيه كانت بتلمع بنظرة مرعبة .. غزل حست انها رميت قنبلة في المكتب ومستنية الانفجار.

موسى بص لغزل بنظرة باردة وهادية جدا وقال بجمله واحدة نزلت عليها زي الصاعقة:بس أنا فعلا مضيت الورق يا انسة غزل.

غزل بصدمة وذهول وقفت مكانها:أنت بتهزر؟! .. مضيته؟! .. يعني كل اللي قولته ده ملوش لازمة؟! .. أنت بجد رميت نفسك وشركتك في النار بايدك يا موسى بيه؟!

موسى بمنتهى الهدوء:أنا عارف بمقابلات مراتي لممدوح الصاوي من أول يوم.

غزل برقت عينيها:لا ده جنان!!! .. عارف وساكت كدة عادي؟ .. وسايبها تمضيك على خراب بيتك وأنت بتتفرج؟!! 

موسى قام من مكانه ببطء وراح وقف قدام الشباك الكبير اللي كاشف الشركة كلها حط ايديه في جيوبه وبص للفراغ:مراتي رجعت متأخر في يوم وحالتها مكنتش عاجباني الخوف كان باين في عينيها بطريقة مش طبيعية .. ووقتها كلفت حد تبعي يراقبها وعرفت انها بتروح شركة الصاوي مع صاحبتها ايمي .. وبطريقتي الخاصة عرفت كل اللى بيحصل ما بينهم وعرفت التهديد اللي ممدوح بيهددهالها.

غزل قامت وقفت وقربت منه بذهول:ولما أنت عارف كل ده .. ازاي تمضي على الورق؟! .. أنت كدة بتسلم رقبتك لعمي على طبق من دهب .

موسى لف وبصلها وعينيه كانت بتلمع بذكاء حاد ونظرة مرعبة:أنا موسى الراعي يا انسة غزل .. يمكن لسه متعرفنيش كويس بس ممدوح الصاوي هو اللي بدأ اللعبة وأنا اللي هنهيها بطريقتي.

غزل بصت له باستغراب وحيرة:أنا مش فاهمة حاجة من الغموض ده بس اللي متأكدة منه دلوقتي انك شخص مبيضحكش عليه بسهولة أبدا .. والورق اللي أنت مضيته ده أكيد وراه مصيبة لعمي.

موسى ابتسم ابتسامة خفيفة وواثقه:كويس انك عارفة وقدرتي تستنتجي ده.

غزل كشرت فجأة وافتكرت اتهامه ليها واتكلمت بعصبية:ولما حضرة جنابك عارف ومراقب وعامل فيها المفتش كرومبو ازاي تتجرأ وتتهمني اني جاية من طرف عمي وتشكك في كلامي؟!! .

موسى ضحك ضحكة رجولية واضحة لأول مرة:كنت عايز أشوف قوتك هتتهز ولا لأ .. كنت بختبر بنت الصاوي هتقدر تصمد قدام نظراتي وشكي ولا هتتراجع؟! .. والحقيقة .. ابهرتيني بردك.

غزل نفخت بضيق وهي بتحاول تداري اعجابها بشخصيته اللي مبتقهرش:ابهرتك؟! .. شكرا يا سيدي على الامتحان الصعب ده .. بس دلوقتي العمل ايه؟! .. الورق الممضي ده لو وصل لممدوح الصفقة هتم.

موسى بهدوء:خليه يوصل .. خليه يفرح بالانتصار الوهمي شوية عشان لما يقع وقعته تكون من سابع سما.

ـــــ★ــــ

في قصر الراعي

انجي كانت بتمشي في الأوضة زي المجنونة الموبايل على ودنها وايدها التانية بتترعش وصوتها كان واطي بس مليان غضب وخوف.

انجي بصوت مخنوق وعصبية:انتي اكيد اتجننتي يا ايمي!! .. شقة ايه اللي أروحله فيها؟! .. انتي عايزاني أروح لممدوح الصاوي شقته!! .. أنتي شكلك اتعميتي ومش عارفة انتي بتقولي ايه يا بنتي!! .

ايمي ببرود ونبرة هادية:يا انجي اهدي بس وافهمي .. الراجل مش في مكتبه النهاردة والشركة كلها عيون وهو عايز يسلمك الوصلات والصور بعيد عن دوشة الموظفين والشركات .. وبعدين يا ستي أنا هكون معاكي مش هسيبك لوحدك.

انجي بسخريه:هتكوني معايا؟!! .. أنتي كل مرة تقوليلي الكلمة دي وفي الاخر بتسيبيني في نص الطريق وتمشي .. وبسببك أنتي وبسبب أفكارك أنا بقيت في المصيبة دي!! .. أنا بقيت بخون جوزي وبحط ايدي في ايد واحد شيطان بسبب تشجيعك ليا.

ايمي بتمثيل الحزن والزعل:بسببي أنا يا انجي؟! .. بقى ده جزاتي اني خايفة عليكي وعايزة مصلحتك؟! .. أنا اللي شجعتك عشان تفتحي السنتر اللي كنتي بتحلمي بيه وعايزاكي تكوني بيزنس وومان معروفة في مصر كلها وليكي اسمك وشأنك .. بدال ما انتي قاعدة مستنية المصروف من موسى الراعي اللي بيعاملك كأنك حتة ديكور في البيت .

انجي سكتت لحظة وكلام إيمي بدأ يلعب في دماغها:بس الشقة صعبة يا ايمي .. موسى لو عرف أو حد شافني هتبقى نهايتي.

ايمي بخبث:موسى في الشركه ومحدش هيعرف حاجة .. احنا هندخل ونخرج في عشر دقايق خدي معاكي الورق اللي مضاه وبايد تسلمي الورق وبالايد التانية تاخدي الصور والوصلات وتقطعيها قدام عينيكي .. وكدة تبقي حرة لا ممدوح يهددك ولا أنا أوجع دماغك تاني .. ها قلتي ايه؟! .

انجي بتردد:والصور والوصلات هيمسحها من على موبايله كمان اكيد معاه نسخ؟!

ايمي:طبعا يا حبيبتي ده كان شرطي عليه .. يلا بقى البسي وجهزي نفسك أنا مستنياكي في العربية قدام القصر اصلا .. متضيعيش فرصة العمر انك تخلصي من الكابوس ده.

انجي اتنهدت بقهر واستسلام:ماشي يا ايمي .. ربع ساعة وهكون عندك بس لو حصلت حاجة أنا مش هسامحك يا ايمي .. أبدا .

قفلت انجي السكة وهي حاسة انها بتسلم رقبتها للمشنقة .

بقلم الكاتبه جنات

ـــــ★ــــ

فى مكتب موسي وغزل قاعده قدامه لسه .

موسى بحده وعينيه مركزة في عينيها:بصي يا انسة غزل .. لحد هنا ودورك خلص اطلعي انتي برا الموضوع ده خالص وما تحاوليش تتدخلي تاني .. عمك شيطان وأنا متأكد انه لو عرف باللي بتعمليه وبمحاولتك لتحذيري مش هيعديها لك مرور الكرام وممكن يأذيكي بجد.

غزل بابتسامة:يأذيني؟!! .. ومين قالك انه لسه ما بأذنيش؟! عمي مدي ايده عليا وضربني بالقلم يا موسى بيه .. ضربني عشان رفضت أكون زيه عشان قولتله لا في وشه .. تفتكر اللي ياخد قلم عشان كرامته ممكن يخاف من شوية تهديدات؟!

موسى ملامحه اتصلبت لما سمع سيرة القلم وعروق ايده برزت:مد ايده عليكي؟!!