رواية زين وعاليا الفصل العشرون 20 بقلم ملك ابراهيم

رواية زين وعاليا الفصل العشرون 20 بقلم ملك ابراهيم

رواية زين وعاليا الفصل العشرون 20 هى رواية من كتابة ملك ابراهيم رواية زين وعاليا الفصل العشرون 20 صدر لاول مرة على موقع التواصل الاجتماعى فيسبوك رواية زين وعاليا الفصل العشرون 20 حقق تفاعل كبير على الفيسبوك لذلك سنعرض لكم رواية زين وعاليا الفصل العشرون 20

رواية زين وعاليا بقلم ملك ابراهيم

رواية زين وعاليا الفصل العشرون 20

"زين رجع لقى حبيبته بقت واحدة تانية خالص، مش هي عاليا حبيبته اللي يعرفها.. دي بقت واحدة ساكته طول الوقت.. بتبقى سامعة كل كلمة، وحاسة بلمسة إيده، وجسمها بينتفض لما بيقرب، ودموعها بتنزل، بس مش قادرة تقوم وتقوله هاتلي حقي من اللي عمل فيا كدا"
وصل زين القاهرة واتجه بأقصى سرعة للمستشفى.. استقبله زياد وسأله زين بلهفة عن عاليا.. بص له زياد وهو مش عارف يقول له إيه وشاور على أوضة عاليا ودخل زين بسرعة واتصدم لما شافها.. قرب منها وهو بينطق اسمها بلهفة ومنتظر ترد عليه.. لكن عنيها ماكنتش بتتحرك وكانت ثابتة وكأنها متجمدة.. حط إيده على جروح وشها وهو بيعتذر لها إن هو السبب وإنه المفروض مكنش يسيبها ويسافر.. انتفض جسمها مع لمسة إيده ونزلت دموعها وهي مش قادرة تعبر عن اللي جواها.. مش قادرة تقوله على اللي حصل فيها.. مش قادرة تقوله إن أحمد دمر حياتها وسرق فرحتها.. مش قادرة تقوله إنها ما تستهلوش وما تستهلش إنها تعيش.. بص لها بذهول مع انتفاض جسمها ودموعها اللي بتنزل من عنيها بدون أي حركة... قرب إيده يمسح دموعها وجسمها انتفض مرة تانية مع لمسة إيده.. استغرب من اللي بيحصلها أول ما يلمسها وقعد على طرف السرير وهو بيبص لعنيها وبيكلمها بحزن وبيطلب منها تحرك رموشها بطريقتها اللي بتخطف قلبه.. تأمل عنيها بحزن وهو شايفها ثابتة ومفيش فيها أي روح.. مش مصدق إن دي عيون حبيبته الشقية.. العيون اللي كان بيشوف فيها كل مشاعرها.. ليه دلوقتي مفيش فيها روح.. يا ترى إيه اللي حصلها.. فضل يسأل نفسه ويسألها وهو هيتجنن نفسه يعرف إزاي وصلت للحالة دي وليه.
دخل الدكتور اللي بيتابع حالة عاليا الأوضة وقابل زين وسأله: "حضرتك مين.. الزيارة ممنوعة".
زين بحزن وهو بيبص لعاليا: "أنا أبقى جوزها".
بص له الدكتور بدهشة: "حضرتك جوزها..!!".
هز زين راسه بحزن وهو بيبص لعاليا: "لو سمحت يا دكتور أنا عايز أعرف حالة مراتي إيه بالظبط وإزاي أقدر أساعدها عشان ترجع للحياة تاني".
بص الدكتور لعاليا بحزن: "الحالة اللي مدام حضرتك فيها دلوقتي دي حالة نفسية.. ممكن تكون مؤقتة وممكن تفضل معاها عمرها كله".
تأمل زين عاليا بصدمة وكمل الدكتور كلامه بتوضيح.
الدكتور: "والأكيد إن فيه صدمة اتعرضت ليها والواضح إنها رافضة الحياة وعايزة تهرب من الواقع وعشان كده دخلت في الحالة اللي هي فيها.. يعني دي حالة هروب من الواقع.. بتشبه الغيبوبة".
زين بحزن وهو بيفكر: "هتكون إيه الصدمة اللي وصلتها للحالة دي..".
الدكتور بهدوء: "هو فيه احتمال طبعا إن تكون الصدمة دي حصلتلها وقت اصطدامها بالعربية بس الأكيد إن فيه سبب قوي جدا هو اللي دخلها في حالة الهروب من الواقع".
اتكلم زين بأمل: "طب فيه طريقة لعلاجها.. يعني ممكن أسافرها بره".
الدكتور برفض: "هي مش محتاجة السفر.. هي محتاجة دكتور نفسي كويس يتابع معاها باستمرار وكمان محتاجة تطمن عشان تخرج من الصدمة دي".
زين بحزن وهو بيبص لعاليا: "أنا مستعد أعمل أي حاجة في الدنيا بس عاليا ترجع زي الأول..".
ابتسم الدكتور بهدوء: "فيه حاجة مهمة كنت حابب أتكلم مع حضرتك فيها".
زين بانتباه: "اتفضل".
بص الدكتور على عاليا وبص لزين وبدأ يتكلم معاه. 
رواية زين وعاليا بقلمي ملك إبراهيم. 
بعد وقت خرج زين مع الدكتور من أوضة عاليا بعد انتهاء الحديث بينهم..
قرب زياد من زين بقلق وسأله عن عاليا.. هز زين راسه بحزن وقاله إن حالتها صعبة وإنهم محتاجين دكتور نفسي في أسرع وقت والأفضل تكون دكتورة عشان تكون مع عاليا طول الوقت.
طمنه زياد إنه هيبحث عن أحسن دكتورة في التخصص ده وهتكون موجودة معاهم في أسرع وقت.
بص زين حواليه وسأل عن جده وجدته.. طمنه زياد إنهم بخير وإن والده أخدهم ورجعوا البيت لأنهم تعبوا جدا طول اليوم.. بص زين لزياد واتكلم بهدوء: "وانت كمان لازم تروح يا زياد عشان ترتاح".
زياد برفض: "لا طبعا أنا مستحيل أسيبك لوحدك.. أنا هفضل جنبك".
زين بحزن وهو بيفتكر شكل عاليا اللي قطع قلبه: "ما تقلقيش يا زياد احنا كلنا هنرجع البيت.. أنا اتكلمت مع الدكتور وطلبت إن عاليا تكمل علاجها في البيت والدكتور وافق".
زياد بإصرار: "يبقى أنا هفضل معاك لحد ما نرجع البيت كلنا وعاليا معانا".
زين بحزن: "عاليا هترجع معانا بجسمها بس من غير روح".
كمل كلامه بحزن أكبر: "أنا مش قادر أشوفها في الحالة دي".
وانفعال أكتر وبدأ يلكم الحائط اللي قدامه بقوة وهو بيردد بغضب من نفسه: "أنا السبب.. أنا السبب.. مكنش لازم أسيبها وأسافر أبدا.. مكنش لازم أزعلها أبدا".
وقف زياد قدامه بسرعة وهو بيمسك إيده: "زين ماينفعش كده.. انت لازم تكون أقوى من كده عشان تقدر تساعدها".
اتكلم زين بحزن: "نفسي أعرف إيه اللي حصلها.. إيه اللي وصلها للحالة دي.. نفسي أشيل من قلبها أي خوف أو حزن".
بص له زياد بحزن وهو مش عارف يقول له إيه وكان عارف إن صعب عليه جدا يشوف حبيبته بالحالة دي وكان بيدعي من قلبه إن ربنا يشفي عاليا وترجع السعادة لحياة أخوه تاني برجوع حبيبته.
رواية زين وعاليا بقلمي ملك إبراهيم. 
في الصباح اتصل أحمد على جانيت عشان يسألها عن الفلوس.. ردت عليه جانيت بغضب.
جانيت بانفعال: "فلوس إيه اللي انت عايزها وزين جنب مراته دلوقتي".
أحمد بسخرية: "جنبها إزاي يعني.. هي عاليا لسه ما طلبتش منه الطلاق".
جانيت بسخرية: "عاليا ما بقتش بتطلب أي حاجة خالص ولا بتتكلم ولا حاسة بأي حاجة حواليها".
وكملت كلامها بغضب وانفعال أكتر: "عاملة زي القطط بسبع أرواح".
أحمد بقلق على عاليا: "فيها إيه عاليا انتي قلقتيني".
جانيت بقسوة: "قلقتك.. نفسي أعرف هي عملالكم إيه".
رد أحمد بانفعال: "ردي عليا بسرعة.. عاليا مالها".
جانيت ببرود: "عملت حادثة وتقريبا في غيبوبة.. يعني خطتنا هتقف لحد ما الهانم تفوق".
وقف أحمد بصدمة وسألها بلهفة: "وهي فين دلوقتي".
جانيت بسخرية: "ليه بتفكر تزورها..".
أحمد بإصرار: "طبعا".
جانيت بانفعال: "انت اتجننت.. انت عايز زين يدفنك مكانك.. أوعى تقرب من عاليا خالص لحد ما تفوق.. انت سامعني".
قفل أحمد التليفون في وشها وهو هيـ..موت من القلق على عاليا .. بصت جانيت للتليفون وهي غضبانة جدا من أحمد.
رواية زين وعاليا بقلمي ملك إبراهيم.
البنت اللي خطبت عاليا بالعربية. 
قعد والد مريم مع زين في قسم الشرطة وهو بيشرح له إن بنته مظلومة واتأكد زين من كلامه بعد ما شاف فيديو الحادثه وعرف أقوال الشهود واتأكد إن عاليا هي اللي رمت نفسها قدام العربية وزادت صدمته أكتر لما عرف إن عاليا عملت في نفسها كده بقصد الانتـ.. حار وبدأ يسأل نفسه.. ليه عاليا عايزة تنـ.. تحر ليه عايزة تهرب من الواقع.. إيه اللي حصل عشان تكره الدنيا بالشكل ده.
خرجه الظابط من تفكير وهو بيسأله: "حضرتك موافق تتنازل عن المحضر".
وافق زين إنه يتنازل بعد ما اتأكد إن البنت ملهاش ذنب.. وخرجت مريم من القسم وشكره والدها جدا وشكرته مريم : "شكرا لحضرتك يا باشمهندس وبعتذر مرة تانية على اللي حصل لمدام عاليا وياريت لو تسمحلي إني أزورها".
ابتسم زين بهدوء: "آه طبعا تقدري تزوريها في أي وقت".
شكرته مريم ومشت مع والدها ورجع زين المستشفى وطلب سيارة إسعاف مجهزة عشان ينقل عاليا البيت وفي أقل من ساعتين كانت عاليا على الفراش في أوضة زين.. وقف الجد وزياد ووالدهم وجانيت.
وجدة زين قعدت جنب عاليا وهي بتعيط بحزن وبدأت تصفف لعاليا شعرها زي ما كانت بتحب.. وقف زين وهو بيتأمل عاليا بحزن وافتكر لما شافها عند جدته وهي عاملة شعرها ضفيرتين.. وابتسم غصب عنه وهو بيفتكر شقاوتها ومشاكستها ليه.. بدأ الكل يخرج من الأوضة وفضل زين مع حبيبته وقرب منها وقعد قدامها وهو بيكلمها بعشق: "تعرفي إن انتي وحشتيني أوي".
ومسك إيديها بهدوء وكمل كلامه بحزن: "انا كنت بعد كل لحظة عشان أرجع وأشوف عنيكي".
وتأمل عنيها بحزن: "بس مكنتش متخيل إن هشوف عنيكي كده.. مفيهاش أي حياة".
حط إيده على الجروح اللي في وشها بحنية وكمل كلامه: "أنا عارف إن اللي انتي فيه ده بسببي.. مكانش لازم أسيبك زعلانة وأسافر.. كان لازم أكون جنبك".
وقبل إيديها مرة تانية: "أنا ما قدرتش أحافظ عليكي يا عاليا.. أنا سيبتك وسافرت بدل ما أكون جنبك وأطمنك..".
دموعه كانت محبوسة جوه عنيه وهو شايفها قدامه بالشكل ده.. فين شقاوتها.. فين مرحها.. فين دلعها عليها.. فين مشاكستها ليه.. فين حركات عنيها ورموشها اللي كانت بتخطف قلبه.. كان بيتأملها بعشق ومستعد يعمل أي حاجة في الدنيا بس ترجع للحياة تاني.
خرجه من تفكير صوت دق خفيف على الباب بعد عن عاليا وفتح.. لقى زياد ومعاه الدكتورة.
زياد بهدوء: "دكتورة سلا اللي هتتابع حالة عاليا".
رحب بيها زين وسمح لها بالدخول.. دخلت وهي بتبص على عاليا وقربت منها وحطت إيديها على شعرها بلطف: "زوجة حضرتك".
زين وهو بيبص لعاليا بعشق: "مش بس زوجتي.. دي حبيبتي وروحي وأجمل وأغلى حاجة في حياتي".
ابتسمت الدكتورة بهدوء: "ربنا يخليكم لبعض.. ما تقلقش حضرتك أنا تواصلت مع إدارة المستشفى وعرفت حالتها وإن شاء الله هتكون بخير".
زين من قلبه: "يااارب".
اتكلمت الدكتورة بعملية: "ينفع حضرتك تكلمني عنها شوية عايزة أعرف إيه أكتر حاجة بتفرحها وإيه أكتر حاجة بتزعلها وإيه اللي ممكن يكون سبب إنها تدخل في حالة الهروب دي".
رد زين بهدوء وهو بيتأمل عاليا بعشق: "عاليا إنسانة رقيقة وجميلة جدا.. أبسط حاجة في الدنيا بتفرحها وأقل حاجة بتزعلها".
وقرب من عاليا أكتر وهو بيتأمل عنيها واتكلم بحزن: "عنيها كانت بتعكس كل حاجة جواها.. فرحها، حزنها، شقاوتها".
وابتسم بعشق وكمل كلامه: "عاليا أجمل وأرق بنت في الدنيا وقلبها أنضف وأطيب قلب في الكون".
ابتسمت الدكتورة وهي بتبص له بإعجاب وقلبها دق من رقة كلامه وهو بيوصف حبيبته وتأملته بهدوء وسألته: "لدرجة دي بتحبها".
زين وهو عنيه على عاليا: "عاليا دي روحي وحتة من قلبي وكلمة حب أقل بكتير من اللي في قلبي ليها".
ابتسمت الدكتورة بهدوء: "هو ينفع حضرتك تسيبني مع الحالة لوحدنا شوية".
قبل زين مقدمة راس عاليا واتكلم بهدوء: "آه طبعا.. بس ياريت بلاش كلمة حالة.. اسمها عاليا".
ابتسمت الدكتورة بهدوء: "حاضر".
خرج زين وترك الدكتورة مع عاليا.. قربت منها واتكلمت وهي بتعرفها على نفسها: "أنا اسمي سلا الدكتورة النفسية اللي هتابع معاكي.. أنا عرفت إن اسمك عاليا على فكرة اسمك حلو أوي".
وسرحت الدكتورة لحظة واتكلمت بشرود: "وجوزك كمان حلو أوي".
خدت بالها من كلامها وكملت بتوتر: "أقصد شكله بيحبك أوي".
وبصت قدامها بهدوء: "تعرفي طول عمري بتمنى أقابل شخص يحبني كده".
وبصت لعاليا مرة تانية وكملت كلامها: "وبصراحة مستغربة إن انتي بتهربي من حب صادق زي ده".
واتنهدت بحزن وقربت من عاليا وبدأت تحاول معاها في تحريك أجزاء معينة من جسمها عشان تساعد الجسم في إصدار بعض الإشارات للمخ وكتبت على بعض الأدوية اللي هتحتاجها.. وخرجت من الأوضة.
رواية زين وعاليا بقلمي ملك إبراهيم. 
بعد خروج الدكتورة من أوضة عاليا تسللت جانيت بهدوء ودخلت وقفلت الباب عليها وهي بتبص لعاليا بحقد واتكلمت بشر: "هو انتي يعني مكنتيش عارفة تموتي.. رايحة تدخلي في غيبوبة عشان تكسبي تعاطف الكل معاكي".
أنهت جانيت كلامها وبصت حواليها بتوتر وكملت كلامها بقسوة وهي بتقرب أكتر من عاليا: "بس ما تقلقيش.. أنا هخلصك من حياتك دي خالص..".
قربت منها وهي بتمسك وسادة صغيرة عشان تكتم نفسها بيها.. لكنها قبل ما تقرب منها الباب اتفتح فجأة ودخلت جدة زين.. وقفت جانيت بتوتر واتكلمت بارتباك: "أأنا أنا كنت بحاول أفوقها".
جدة زين وهي بتقرب من عاليا بخوف عشان تطمن عليها: "يعني إيه تفوقيها.. هو حد قالك إنها نايمة ولا أغمى عليها".
اتوترت جانيت أكتر: "أنا هروح أشوف كمال.. عن إذنك".
وخرجت جانيت بسرعة وهي هتموت من الغيظ إنها مش قادرة تتخلص من عاليا ودايما في اللي بيحرسها.
رواية زين وعاليا بقلمي ملك إبراهيم. 
بعد مرور شهرين.. وعاليا على نفس الحالة مفيش أي تقدم.. وحالتها كانت بتسوء أكتر وبدأ الكل يفقد الأمل إنها ترجع للحياة تاني وكان حزن زين بيزيد عليه كل يوم أكتر من اللي قبله وهو بيتأمل عنيها ونفسه يشوف شقاوتها.. وحركاتها وهي بتتكلم ودلعها اللي كان بيجننه وأكتر شيء كان بيعذبه لما ينام ويصحى وهي جنبه وما تتحركش من مكانها وأكتر حاجة كانت بتصبره لما يقعد يحكي عنها وعن حبه ليها مع سلا الدكتورة اللي بتتابع حالة عاليا وأصبحت متابعة لزين أكتر لأنه كان محتاج في الفترة دي اللي يقف جنبه ويدعمه ويشعر بيه من غير ما يتكلم ونجحت سلا في ده وفي خلال الشهرين اللي أقامت فيهم معاهم في نفس البيت لمتابعة حالة عاليا.. قدرت تقرب من زين أكتر وتفهم شخصيته بحكم وظيفتها.. وبدأت تستغل ده في التقرب منه.
وقف زين بداخل أوضته يتأمل عاليا بحزن.
دخل والده الأوضة وهو بيتكلم بجمود: "الدكتورة بتقول إن مفيش أمل إن عاليا ترجع زي الأول.. أنا بقول ننقلها مستشفى أحسن لها".
بص له زين بحزن ورجع بعينه يتأمل عاليا وهي شبه جثة هامدة قدامه.. كمل والده كلامه بحزن: "انت بقالك أكتر من شهرين موقف حياتك يا زين ورافض ترجع شغلك أو تخرج من البيت وطول الوقت هنا معاها".
بص زين لوالده بدهشة واتكلم بغضب: "وإيه الغريب في اللي أنا بعمله ده يا بابا.. هي عاليا دي مش مراتي ومسئولة مني.. ولا المفروض إني أرميها أول ما تتعب وأشوف حياتي زي ما بتقول".
والده بهدوء: "أنا ما قلتش ترمي مراتك يا زين.. احنا هننقلها أحسن مستشفى ودايما هنزورها ونطمن عليها".
اتكلم زين بغضب وانفعال شديد جدا: "أنا مش هتخلى عن مراتي حتى لو فضلت في الحالة دي العمر كله.. وهتفضل معايا وجنبي حتى لو اضطريت إني أسيب البيت ده وهاخد بيت تاني ليا أنا وهي بس".
رد والده بحزن: "يا زين الكلام اللي انت بتقوله ده مش صح أبدا.. أنا كنت بقول نفس الكلام ده لما والدتك ماتت.. بس الحياة ما بتقفش على حد.. وأديك شايف أنا دلوقتي اتجوزت وكملت حياتي".
رد زين بانفعال: "بس عاليا ما ماتتش.. عاليا لسه عايشة وأنا مستحيل أكمل حياتي من غيرها".
بص له والده بغضب وخرج من الأوضة.
قرب زين من عاليا وهو بيقبل إيدها وبيطمنها: "حبيبتي أنا مستحيل أسيبك صدقيني.. انتي روحي يا عاليا ومستحيل أعيش من غيرك".
نزلت دموعها بصمت وبدون ما تحرك عنيها.. جفف دموعها وهو حزين جدا عليها.
دخلت سلا وهي بتبص لزين وشعرت بالغيرة عليه من قربه من عاليا.
بعد زين عن عاليا وكان غضبان جدا من كلام والده وكلم سلا بجمود: "هو ليه مفيش تحسن في حالة عاليا".
سلا بتوتر: "لأن من الواضح إنها معندهاش الإرادة عشان ترجع للحياة تاني.. شكلها مش حابة ترجع للحياة اللي كانت عايشاها".
بص لها زين بغموض وسألها: "يعني إيه مش عايزة ترجع للحياة اللي كانت عايشاها.. قصدك إنها بتهرب مني أنا".
حاولت تشككه في حب عاليا بذكاء وردت بهدوء: "ممكن".
بص لها زين بصدمة وبص لعاليا بحزن واتكلم بجمود: "أنا طلبت دكتور من ألمانيا متخصص في حالات مشابهة لحالة عاليا وهيوصل في خلال يومين وإن شاء الله يقدر يساعد في علاجها".
وبص لعاليا واتكلم بحزن: "أنا حاسس إنها عايزة ترجع للحياة بس فيه حاجة منعاها".
بصت له سلا بهدوء وهزت راسها بتوتر.
استأذن منها وخرج وتركها مع عاليا.
وقفت تبص له بعد ما خرج واتكلمت بحزن: "ياريتك تحس بيا زي ما بتحس بيها".
اتفاجأت بصوت من وراها بيسألها: "= بتحبيه بجد".
التفتت سلا بصدمة لما سمعت الصوت............بقلمي ملك إبراهيم.
... يتبع

انضم لجروب التليجرام ( هينزل فيه الرواية كاملة ) اضغط هنا
للانضمام لقناة الواتساب اضغط هنا