"في كل حكاية، في خير وشر قصاد بعض.. والخير في حكايتنا هو الحب اللي من غير مصلحة.. حب واحد شايل هم أبوه ومراته وجده، وبيجري لوحده عشان يحميهم.. وحب واحدة بتدعي من قلبها للي حواليها، حتى لو هما اللي أذوها.

والشر في الحكاية دي هو الطمع.. طمع في فلوس، طمع في اسم، طمع في حياة مش من حقك.. والطمع ده بيخلي الإنسان يدوس على أقرب الناس ليه، ويبيع ضميره، ويفتكر إنه كده بياخد حقه"

زين قرر إنه يصارح عاليا بكل حاجة بتحصل ويعرفها حقيقة جدته وكل اللي حواليهم.

أخد نفس وهو بيضمها واتكلم بهدوء: "عاليا فيه موضوع مهم لازم أتكلم معاكي فيه".

بعدت عنه بهدوء وهي بتبص له واتكلمت بقلق: "موضوع إيه...؟".

بص في عينيها وشاف القلق الواضح في عينيها وهي مستنية تسمعه.. حاول يتكلم لكن خوفه عليها كان بيمنعه..

اتنهد بتعب وهو مش عارف يبدأ منين ولا يقول إيه.. طال انتظار عاليا واتكلمت بدهشة: "إيه يا حبيبي هو الموضوع صعب أوي كده..".

رد زين بتلقائية: "صعب جدا..".

هزت راسها بتفهم واتكلمت بهدوء: "طب هو بخصوص إيه".

رد زين بحيرة: "عاليا أنا........... أنا.. عايزك.....".

هزت راسها: "آه يا حبيبي عايز إيه.. قول أنا سامعاك".

زين بحيرة: "عاليا.. أنا عايزك تاخدي بالك من كل اللي حواليكي".

اندهشت عاليا وردت بعدم فهم: "أخد بالي من إيه... زين هو فيه إيه أنا مش فاهمة حاجة..".

اتنهد زين وهو مش عارف يتكلم.. خوفه عليها من الصدمة بيمنعه من الكلام.

زين بهدوء: "عاليا أنا عايزك ما تصدقيش الوشوش اللي انتي شايفاها قدامك... فيه ناس حوالينا عاملين بيحبونا لكن الحقيقة إنهم عمرهم ما حبونا وهدفهم الوحيد هو أذيتنا".

هزت عاليا راسها بتفهم واتكلمت بهدوء: "ناس زي مين..؟".

حاول زين ينطق ويقولها على جدته لكن الموضوع كان صعب عليه جدا.

(قاطعهم صوت رنة تليفون زين)

سمع زين رنة تليفونه وأخد التليفون وكان المتصل رقم غير مسجل..

رد زين: "ألو".

المتصل..: "ألو.. حضرتك احنا مستشفى بشرم الشيخ.. حضرتك الباشمهندس زين الشافعي".

زين: "أيوا أنا".

المتصل..: "والد حضرتك كمال الشافعي..؟".

زين بقلق: "أيوا والدي.. خير".

المتصل..: "للأسف والد حضرتك حاول الانتـ .. حار وتم نقله للمستشفى عندنا".

اتصدم زين وبص حواليه بعدم تصديق واتكلم بصوت متقطع: "قولت.. إيه".

المتصل..: "والد حضرتك كمال الشافعي حاول الانتـ .. حار وحالته خطـ.. يرة جدا واحنا بحثنا عن طريقة للتواصل مع أهله وما قدرناش نوصل غير لحضرتك".

اتكلم زين بقلق: "وحالته إيه دلوقتي؟".

المتصل..: "للأسف.. حالته خـ.. يطرة جدا وياريت حضرتك تيجي بسرعة لأنه تقريبا بين الحياة والموت".

وقع التليفون من إيد زين وهو مش مصدق إن والده ممكن يعمل في نفسه كده .. قربت منه عاليا واتكلمت بقلق: "زين فيه إيه.. إيه اللي حصل".

بص لها زين وما كانش شايف قدامه أي حاجة غير صورة والده.. كل ذكريات طفولته عدت قدام عينيه.. كلام والده.. ضحكه.. غضبه.. معقول ممكن ما يشوفوش تاني.. معقول ممكن ما يسمعش صوته تاني..

اتكلمت عاليا مرة تانية وهي شايفة دموعه المحبوسة جوه عينيه.

عاليا: "زين حبيبي إيه اللي حصل".

رد زين بصوت ضعيف: "بابا...".

عاليا برعب: "ماله..".

زين بصدمة وهو مش مصدق: "حاول الانتـ ... حار وحالته خطـ... يرة".

شهقت عاليا وكتمت صوت صر.. ختها بإيديها بسرعة..

وقف زين وهو بيبص حواليه بعيون دامعة.. وأخد تليفونه من على الأرض بسرعة واتصل على تليفون والده بأمل إنه يرد عليه لكنه لقى تليفون والده مقفول.. بص قدامه وهو حاسس إنه عاجز عن التفكير أو الحركة..

قربت منه عاليا وهي بتبكي واتكلمت ببكاء: "زين أنا جاية معاك".

هز زين راسه برفض واتكلم بجمود: "لا يا عاليا مش هينفع ولازم محدش يعرف أي حاجة دلوقتي".

بصت له عاليا بدهشة وسألته: "يعني إيه يا زين.. لازم جدك وزياد يعرفوا ويكونوا جنبك".

رد زين بحزن: "جدي مش هيستحمل يسمع خبر زي ده وزياد كمان.. أنا لازم أسافر شرم الشيخ حالا وعشان خاطري يا عاليا مش عايز أي حد يعرف".

وقفت عاليا وهي بتكتم بكائها بإيديها وهزت راسها بهدوء وبتأكيد إنها مش هتقول لحد.. خرج زين بسرعة من الأوضة واتجه لتحت وركب عربيته بسرعة وانطلق بيها بسرعة جنونية وهو في عالم تاني وحاسس بالذنب اتجاه والده لأنه من بعد ما والده سافر وهو ما حاولش يتصل يطمن عليه وانشغل في كل المشاكل اللي حواليه ونسي والده.. لكنه في الحقيقة ما نسيهوش.. هو كان عارف إن والده عايش عشان يستمتع بحياته وبس.. وزين كان شايل كل الحِمل لوحده وانشغل بمشاكل الشركة والمصانع ومشاكل الأرض وحادثة جانيت وخطط جدته وباسل وجيلان وقسمت وكل المؤامرات اللي كانت بتتعمل عليهم.. لكنه بيلوم نفسه دلوقتي وهو عارف إن كل دي أعذار وهمية بيحاول يقنع نفسه بيها وعارف إن كل ده ما كانش المفروض يشغله عن والده... وأكتر شيء وجعه إن والده تهون عليه نفسه ويعمل كده .. إيه وصله إنه يعمل في نفسه كده .. ده كان السؤال اللي بيتردد في تفكير زين طول الطريق. 

رواية زين وعاليا بقلمي ملك إبراهيم. 

ضمت عاليا نفسها في أوضتها وهي بتبكي وخايفة إن والد زين يمو.. ت وافتكرت يوم وفاة والدها وقد إيه بيكون شعور صعب.. كان قلبها وجعها على زين وبتتمنى لو تكون جنبه في الوقت ده.

وقفت جدة زين في بلكونة أوضتها بعد ما شافت زين وهو خارج بعربيته بسرعة جنونية وفكرت إن أكيد حصل مشكلة بينه وبين عاليا بسبب شغلها مع حمزة واتجهت بسرعة لأوضة عاليا عشان تعرف منها إيه اللي حصل.

سمعت عاليا دقات على باب أوضتها وكان جسمها كله بيرتعش من الخوف.. فتحت لقت جدة زين.. ارتمت عاليا في حضنها وهي بتبكي.. استغربت جدة زين وطبطبت على ضهرها بمكر واتكلمت بصوت هادي.

جدة زين: "عاليا حبيبتي.. إيه اللي حصل.. هو انتي وزين اتخانقتوا ولا إيه".

فكرت عاليا تقولها لكنها وعدت زين إنها مش هتقول لحد وهزت عاليا راسها بآه وهي جوه حضن جدة زين.

ابتسمت جدة زين بمكر واتكلمت بهدوء: "طب إيه سبب الخناقة.. أوعي يكون موضوع شغلك".

بعدت عاليا عن حضنها وهي بتحاول تمسح دموعها واتكلمت ببكاء: "أيوا بسبب الشغل".

ردت جدة زين بمكر: "إيه زين مش عايزك تشتغلي مع حمزة".

كانت عاليا في عالم تاني وتفكيرها كله مع زين وقلبها بيدعي إن ربنا يشفي باباه وكانت بتهز راسها بتأكيد على كل كلمة بتقولها جدة زين وهي مش مركزة هي بتقول إيه.

ابتسمت جدة زين بمكر لما عرفت إن بدأ يحصل مشاكل بين عاليا وزين والسبب حمزة..

حاولت تهدي عاليا وتتكلم معاها بهدوء.

جدة زين: "ما تزعليش يا حبيبتي.. هما الرجالة كلهم كده.. مش بيحبوا يشوفوا الواحدة فينا ناجحة".

هزت عاليا راسها وهي بتبكي وبتفكر في زين ومش سامعة أي حاجة من اللي بتقوله جدته.

بعد وقت لاحظت جدة زين عدم اهتمام عاليا بكلامها ولاحظت بكائها المستمر..

جدة زين: "هسيبك ترتاحي انتي يا حبيبتي لأنك شكلك مش قادرة تتكلمي دلوقتي وما تقلقيش.. شوية كده وهتلاقي زين راجع".

هزت عاليا راسها وهي بتبكي.. خرجت جدة زين وهي بتبص قدامها بدهشة ورجعت على أوضتها تاني.

وقفت جيلان وهي بتتابع خروج جدتها من أوضة عاليا ودخلت عشان تبلغ باسل إن جدتها كانت في أوضة عاليا.

باسل: "إيه الأخبار عندك طمنيني".

جيلان: " زين وعاليا شكلهم اتخانقوا مع بعض والعلاقة بينهم اتوترت جدا وشكل كده تيتة هي اللي ورا كل ده".

رد باسل بسخرية: "عرفتي بقى إن كل واحد بقى بيلعب لحسابه".

جيلان بقلق: "بس الموضوع بدأ يكبر وأنا خايفة".

باسل: "ما تخافيش.. أنا بس عايزك بكره الصبح تكلمي عاليا وتعرفيها إن ابنك جه مصر وإن انتي هتروحي تاخديه من صاحبتك.. وبسرعة تعملي موضوع رجلك ده وإنك وقعتي عليها ومش هتقدري تمشي عليها وتطلبي منها إنها تروح هي على العنوان ده تبلغ صاحبتك إنك مش هتقدري تروحي".

ردت جيلان بتوتر وقلق: "وافرض ما عرفتش تخرج لوحدها وزين جه معاها".

باسل: "أكدي عليها بس ما تعرفش أي مخلوق وهي أكيد هتسمع كلامك".

اتكلمت جيلان بخوف: "ربنا يستر.. أنا مش مطمنة".

باسل: "خلاص يا جيلان ما بقاش قدامنا وقت ولازم ننفذ بسرعة".

جيلان باستسلام: "حاضر يا باسل هعمل كل اللي انت عايزه بس اعمل حسابك أول ما ناخد الفلوس تديني النص وملكش دعوة بيا بعد كده".

رد باسل بمكر: "طبعا يا حبيبتي ما تقلقيش".

في أوضة جدة زين.

قعدت على السرير ومسكت تليفونها اتصلت على حمزة.. رد حمزة عليها بهدوء.

حمزة: "مساء الخير".

جدة زين: "انت فين يا حمزة".

حمزة بهدوء: "أنا في شقتي".

جدة زين: "طب أنا عيزاك تحاول تيجي الفيلا دلوقتي تسأل على زياد بحجة إنك جاي تشوفه وأنا هقول لعاليا إنك موجود وهخليها تنزل هي تقابلك".

رد حمزة بتوتر: "ما أنا لما أسأل على زياد أكيد هو هيقابلني.. هقوله إيه".

جدة زين: "زياد مش موجود وزين كمان مش موجود وجدهم نام من بدري ومفيش غير عاليا".

اتوتر حمزة واتكلم بقلق: "طب أجي ليه دلوقتي وهما مش موجودين".

اتكلمت جدة زين بتأكيد: "لأن عاليا اتخانقت مع زين دلوقتي وهو خرج وساب البيت.. عيزاك انت بقى تتكلم معاها وطبعا مش هوصيك.. عيزاك تكسبها بالحنية".

رد حمزة بتأكيد: "لو على الحنية.. يبقى هتوصى بيها ما تقلقيش".

اتكلمت جدة زين بتأكيد: "حمزة مش هوصيك.. أنا عيزاك تكسب ثقة عاليا بسرعة جدا وعاليا غبية وساذجة ويقدر أي حد يكسب قلبها بسهولة".

لتتابع بمكر: "حاول تخترع أي حجة تخص الشغل واتكلم معاها أكتر وقت ممكن.. وأنا هصوركم وانتوا قاعدين مع بعض وهبعت الصور دي لزين".

رد حمزة بهدوء: "ممكن أسأل حضرتك سؤال سألتهولك قبل كده".

اتكلمت جدة زين بقوة: "لما سألتهولي قبل كده أنا ما ردتش عليك".

حمزة: "آه".

جدة زين: "يبقى برضه مش هرد عليك المرة دي كمان لأن لو سؤالك كان له إجابة عندي كنت رديت عليه من أول مرة".

لتتابع بتأكيد: "المهم عندي دلوقتي إن انت تنفذ اللي أنا قلت عليه.. ويلا مع السلامة عشان تلحق تيجي قبل ما زين وزياد يرجعوا".

قفلت الهاتف وبصت قدامها واتكلمت بشر: "لازم زين يطلق عاليا في أسرع وقت ويتجوز جيلان... خلاص ما بقاش فيه وقت يضيع أكتر من كده".

خرجت من أوضتها واتجهت لأوضة جيلان..

كانت جيلان لسه بتكلم باسل في التليفون.

(سمعت صوت دق على الباب)

اتكلمت جيلان بقلق: "طب أنا هقفل دلوقتي وأشوف مين اللي بيخبط".

قفلت جيلان التليفون وقربت من الباب وفتحت.. بصت لها جدتها بدهشة واتكلمت باستغراب: "قافلة على نفسك ليه جيلان".

ردت جيلان بتوتر: "مما.. مفيش يا تيتة.. أصل أنا كنت هنام".

دخلت جدتها الأوضة وهي بتبص حواليها واتكلمت بمكر: "لا تنامي إيه.. ده مش وقت نوم خالص.. أنا عيزاكي تركزي معايا لأن خلاص كلها يومين وهتتجوزي زين وهنعيش في العز ده العمر كله".

اتوترت جيلان واتكلمت بارتباك: "يعني إيه يا تيتة مش فاهمة".

ردت جدتها بثقة: "انتي ما عرفتيش اللي حصل بين عاليا وزين ولا إيه".

جيلان بتوتر: "لا ما عرفش.. هوو إيه اللي حصل".

اتكلمت جدتها بثقة: "اللي حصل بينهم ده البداية والنهاية هتحصل في خلال يومين".

اتوترت جيلان وهي بتفكر بحيرة.. هتعمل إيه وهتكون مع مين مع جدتها ولا باسل.

اتكلمت جدتها وخرجتها من تفكيرها: "أنا عيزاكي تجهزي نفسك وكلها يومين بالكتير وهنخرج عاليا من هنا وانتي اللي هتاخدي مكانها.. بس فيه حاجة".

جيلان بارتباك وتوتر: "حاجة إيه".

جدتها بتأكيد: "لما تتجوزي زين.. مهما أطلب منك ما تقوليش ليه وكل اللي أطلبه تدهولي من غير حساب".

اندهشت جيلان واتكلمت بفضول: "طب ليه يا تيتة مش بتطلبي من زين بدل اللف والدوران ده وأكيد زين مش هيستخسر فيكي حاجة".

ردت جدتها بقسوة: "هو فعلا مش هيستخسر.. بس لو اداني مرة أكيد مش هيديني التانية ولو اداني أكيد هيسأل ليه والفلوس دي بتروح فين وأنا ما بحبش حد يحاسبني".

ردت جيلان: "يعني أنا لو اتجوزت زين وطلبت منه فلوس كل شوية هو مش هيقولي ليه وبتروح فين الفلوس دي".

اتكلمت جدتها بمكر: "ما انتي مش هتطلبي منه لأن كل حاجة هتبقى في إيديكي".

جيلان بذهول: "يعني إيه.. هو انتي بتفكري تقـ.. تلي زين وأنا أورثه ولا إيه".

اتكلمت جدتها بمكر: "لا طبعا.. ده مهما كان حفيدي وأنا ما أقدرش أأذيه".

اتكلمت جيلان بدهشة: "أومال هنعمل إيه".

جدتها: "هنوصله لنفس الحالة اللي فيها كمال دلوقتي".

جيلان بعدم فهم: "وإيه الحالة اللي فيها أونكل كمال دلوقتي".

ابتسمت جدتها بمكر وهي بترفع قدام عينيها دواء واتكلمت وهي بتبص للاقراص بخبث.

جدتها: "انتي شايفة ده".

جيلان بدهشة: "آه.. إيه ده".

جدتها: "ده سِحر.. كل يوم حباية في القهوة أو العصير.. بيعلي الدماغ وبيرخي الأعصاب وبيوقف المخ عن العمل واللي بياخده بيفضل تحت تأثيره 24 ساعة.. وطول الـ 24 ساعة بيكون عايش في عالم لوحده.. مش عايز يشغل باله بأي حاجة تخرجه من الحالة اللي هو فيها.. يعني بيكون عايش في عالم خاص به من غير مسئوليات ولا مشاكل ولا دوشة".

بصت جيلان لجدتها بذهووول: "يعني أونكل كمال طول الفترة دي كان تحت تأثير الدوا ده... هو الدوا ده مخد... رات".

ردت جدتها بخبث: "ده بقى اللي أقوى من المخد... رات".

بصت جيلان لجدتها بذهول وخو.. ف ور.. عب وبدأت تحس إن جدتها مش سهلة أبدا وسألتها بدهشة.

جيلان: "وكنتي بتديه الدوا ده إزاي؟".

جدتها: "زمان كان في بنت من الخدم هنا بتشتغل تبعي.. وكانت هي اللي بتحطله الحباية يوميا في القهوة ولما سافر بعد موت شهيرة بنتي.. ما قدرتش أوصله وكان جسمه محتاج للمخد.. ر ده.. ودخل في اكتئاب.. وطبعا كان الكل فاكر إن ده بسبب موت شهيرة.. ولما دخلت جانيت حياته بدأت تحطله هي الحباية من تاني.. وخرج من حالة الاكتئاب ورجع تحت تأثير المخد.. ر تاني".

جيلان بعدم تصديق: "يعني الحالة اللي كان فيها أونكل كمال دي كان تحت تأثير المخد.. ر وإزاي محدش خد باله".

جدتها: "لأنه كان بياخده بانتظام وهو ده اللي هنعمله مع زين بس اسمك يرتبط باسمه الأول وتبقى مراته رسمي...".... بقلمي ملك إبراهيم.

... يتبع