رواية اخر نفس صبر الفصل الثالث والخمسون 53 بقلم حنين عادل

رواية اخر نفس صبر الفصل الثالث والخمسون 53 بقلم حنين عادل

رواية اخر نفس صبر الفصل الثالث والخمسون 53 هى رواية من كتابة حنين عادل رواية اخر نفس صبر الفصل الثالث والخمسون 53 صدر لاول مرة على موقع التواصل الاجتماعى فيسبوك رواية اخر نفس صبر الفصل الثالث والخمسون 53 حقق تفاعل كبير على الفيسبوك لذلك سنعرض لكم رواية اخر نفس صبر الفصل الثالث والخمسون 53

رواية اخر نفس صبر بقلم حنين عادل

رواية اخر نفس صبر الفصل الثالث والخمسون 53

كانت قاعدة حاضنة نفسها من البرد عينيها موجهة علي الازاز :
الدنيا برد من غيرك يا حضرة الظابط .
صوت الأجهزة بتصفر...بتقف بسرعة وهي مخضوضة الدكاترة بتيجي تجري ووراهم الممرضين وبيدخلوا اوضة العناية وهي بتبُص عليهم برعب وعلي راغب اللي باين بإضاءة بسيطة من الازاز وهما بيحاولوا يعملوا انعاش القلب بإيديهم .
وفي نفس الوقت حد بيحضر جهاز الصدمات الكهربائية ..
بيناوله للدكتور وبيحطه علي صدره ومع كل مرة كان جسمه بيطلع لـ فوق وبينزل بـ قوة 
بيفقد الدكتور الأمل بعد دقايق من عدم الاستجابة وبيهز رأسه للدكتور اللي قدامه وبيقول : 
للأسف ...القلب وقف.
حطت ايدها علي بوقها وهي بتبلع ريقها بصعوبة وعيونها مليانة دموع وضربات قلبها عالية :
القلب وقف؟!
ثواني عدوا لحد ما عقلها ترجم الكلمة
جرت علي الباب وفتحته واقتحمت الأوضة والممرضين بيحاولوا يبعدوها ..
زقتهم ودموعها بتنزل علي وشها: راغب ..
هز الدكتور دماغه وهو بيبُص لـ الممرضين بمعني سيبوها..
قعدت جنب السرير علي ركبتها ومسكت ايده : انتَ حبيبي يا راغب...هتسيبني ؟
هتسيب ميادة قلبك!
حد يسيب قلبه يا سيادة الظابط!
رفعت ايده وحطتها علي وشها: 
والله ماهستحمل بعدك عني 
والله ما هقدر اعيش في الدنيا دي ثانية واحدة بعدك .
انهارت في العياط : طب ليه ...ليه ظهرت في حياتي من الأول .
ليه خليتني أعشقك وأتعلق بيك ..
لما أنت هتفارق وتسيبني .
رد عليا ..
رد عليا ..
كانت بتهز فيه بعنف : راااااغب....
انت عايش أنت بتعمل كده عشان تشوف غلاوتك عندي ؟
ابتسمت وسط دموعها: طيب يا سيدي أنت أغلي الغاليين ...لا أنت الغالي الوحيد ...
يلا بقا ...فوق بقا ...
عيطت بانهيار: عشان خاطري ياراغب ...عشان خاطري ما تسبنيش .
وطت علي ايده تبوسها وهي بتغمض عينيها و شايفة الدنيا بتضلم تدريجيًا وثواني وما حستش بـ نفسها ..
فاقت ومي جنبها ماسكة ايديها وباين عليها الحزن.
قعدت بسرعة وهي بتبُص حواليها باستغراب
وبعدين بصت لها بخوف وتوتر: 
راغب ....راغب يامي !
اتفتحت في العياط : راغب مات...
حضنتها وهي بتقول : الشر بره وبعيد راغب ماماتش !
بعدت عن حضنها وهي بتبُص لها وعيونها مليانة دموع ..
ابتسمت مي : انتِ أكيد كنتي بتحلمي يا ميادة 
راغب زي ماهو لسه في العناية ووضعه مستقر .
خدت نفس طويل وطلعته بالراحة وهي بتضحك وسط دموعها: 
يعني راغب عايش ..
ابتسمت مي: اه يا حبيبتي وربنا هيشفيه ويقوملك سالم بإذن الله ...
هزت راسها بفرحة وهي بتضحك بصوت :
راغب عايش ...راغب عايش ...
اتنهدت بعد وصلة من الضحك وبعدين بصت لها باستغراب: طب أنا ايه اللي جابني هنا ؟
مي: ضغطك وطي واغمي عليكي يا ستي مطرح ما أنتِ قاعدة قدام العناية وجابوكي هنا وكلموني ...
بصت ميادة علي ضوء الشمس اللي طالع من الشباك وهي بتقول : يعني أنا هنا طول الليل!
هزت مي راسها بالموافقة: ايوه . 
شدت سلك المحلول من ايدها وهي بتقف ..
مي : رايحة فين يا ميادة ؟
ميادة بابتسامة: رايحة اتطمن علي حبيبي .
مي: طيب وباقي المحلول ..
ميادة : أنا بقيت كويسة يا مي روحي انتِ ارتاحي يا حبيبتي 
مشت بسرعة قبل ما تسمع ردها والإبتسامة علي وشها بتختفي لما تفتكر المشهد اللي بيقف فيه قلبه..
بتهز راسها وكأنها بتطرد الحلم من دماغها وهي بتتنهد وبتبتسم وهي بتقول بصوت مسموع :
راغب كويس...راغب هيعيش مش هيسبني...
بتوصل لحد العناية المركزة ...بيقف الحارس اللي عليها وهو بيقول : أنتِ مين ؟
بيكون غير اللي كان واقف بالليل.
ميادة : أنا مراته ...مرات سيادة الظابط...
وقفت قدام الازاز وحطت كف ايدها عليه وهي بتبتسم والدموع في عينيها : قوم بقا يا راغب ...اصحي وكلمني ...طمن قلبي عليك .
بيمر الدكتور وبيدخل وهي واقفة تتفرج عليه 
وبيطلع فـ بتقرب منه بخطوات سريعة: طمني عليه يادكتور ...
ابتسم : المؤشرات طبيعية بس هيفضل تحت الملاحظة ...
ردت بسرعة: طب هيفوق امتي؟
الدكتور : دي حاجة مش هنقدر نحددها مش في ايدينا بس بإذن الله خير. 
مشي الدكتور وهي واقفة مكانها حطت ايدها علي قلبها بشرود: قلبي مش قادر يستحمل ...حاسة أن في حجارة وزنها طن محطوطة عليه ..
عاوزة اغمض عيني وافتحها الاقيه كويس وبيكلمني ..
يارب ....يارب وحياة حبيبك النبي تقومه ليا بالسلامة .
*ـــــــــــــــــــــــــــــــــــــــــ*
الباب بيخبط ...
بيفتح سعيد وبيبتسم لما بيلاقيها فرحة ..
فرحة بابتسامة : صباح الخير يا سعيد 
سعيد بابتسامة : صباح الفل والورد والياسمين 
فرحة بدلع : أنا ياخويا لقيتني قلقت بدري فـ قومت عملت قورصتين بعجوة وقولت اجي ادوقك منها مش بتحب العجوة برده ؟
سعيد بابتسامة: بحبها بس ده أنا بموت فيها.
يوه ماتدخلها يا واد هتفضل موقفها علي الباب خشي يا فرحة ادخلي يا حبيبتي...
بعد سعيد عن الباب ..فـ دخلت فرحة وحطت الكيسة علي الطرابيزة: صباح الخير يا حاجة ...
ابتسمت ام سعيد : صباح النور يا حبيبتي ...حماتك بتحبك ....اللي هو انا يعني ..
اقعدي بقا افطري معاها...
ضحكت فرحة : بس كده ...ده أنا اتشرف ..
ام سعيد : يشرف مقدارك ...
مسكت فرحة الكيسة اللي فيها القرص وقعدت 
علي الأرض جنب ام سعيد وسعيد قعد والطبلية قدامهم .
طلعت فرحة القُرص وهي بتبُص لسعيد بابتسامة وام سعيد مبتسمة وبتقول في نفسها :
ربنا يسعدكم يا ولاد ...وأشوف ابنك يا سعيد يا بني قبل ما اموت ...
فرحة بابتسامة: حلوة القرص؟
سعيد : تسلم ايدك ...مافيش أحلي من كده  .
ام سعيد: دي أحلي من اللي بيعملها المخبز ما هو الحلو مابيعملش الا الحلو .
ضحكت فرحة وكملوا فطارهم وسط نظرات سعيد ليها اللي كل ما بيلاحظ أمه بيتبُص له بيتحرج ويبُص في أي حتة تانية ...
*ـــــــــــــــــــــــــــــــــــــــــ*
وقفت عربية مروان قدام بيت عزمي ...
اتنهدت رُقية بتوتر ...
فـ قال مروان لما لاحظ توترها وخوفها : مالك بس !
خايفة من ايه ؟
رُقية بابتسامة بتداري بيها توترها: مفيش ...مفيش حاجة ...
نزل مروان من العربية ونزلت رُقية ...
شافتها اختها الصُغيرة فجريت تعرف مامتها..
مسك مروان ايدها عشان يطمنها فـ شدت ايدها : 
مروان ...ممنوع التلامس !
داس علي شفايفه بغيظ وهو بيقول : ده لو التلامس ده شخص كنت فرتكته !
بس هانت..
ضحكت رُقية : طيب يلا ...
بيدخلوا من باب البيت ...لحد ما يوصلوا لـ باب الشقة...
بتخبط رُقية علي الباب وايديها فيها رعشة بسيطة ..
مروان بابتسامة: اهدي يا رُقية..
هزت رُقية راسها : أنا هادية جدا !
فتحت صابرين الباب بابتسامة وحضنت رُقية اللي ايديها بتكون لـ تحت وبتكون هترفعها بس مترددة
ومابترفعهاش.
بعدت صابرين عنها ورحبت بمروان وهي بتقول : ادخلوا ...
قعدت رُقية ومروان جنب بعض ...
صابرين بابتسامة : اخباركم ايه ؟
مروان : الحمد لله ...
اتنهدت رُقية وقالت بابتسامة : احنا ...هنكتب كتابنا الخميس الجاي 
الابتسامة اللي كانت علي وش صابرين اختفت تدريجيًا وبصت في الأرض ..
السكوت كان سيد الموقف ...
رُقية كانت بتبُص لـ صابرين مستنيه رد منها
ومروان بيبُص لها ...
مروان: احم احم ...ايه مافيش مبروك ولا ايه ؟
رفعت صابرين عينيها لـ رُقية وابتسمت : الف مبروك يا حبيبتي..
ردت رُقية بابتسامة : الله يبارك فيكي
سكتت رُقية ثواني وبعدين قالت وهي بتبُص لها: هتيجوا؟
خدت صابرين نفس طويل وقالت : 
اكيد لو كان في ظروف تانية كنت هاجي ..
بس أختك متوفية ما بقالهاش ...
قاطعتها رُقية بابتسامة والدموع مالية عينيها: 
خلاص ...أنا بس قولت اعرفكم ...
بصت لـ مروان وعلي وشها نفس الابتسامة : يلا يا مروان ...
وقفت هي ومروان ...
صابرين : طب استنوا أما احط لكم الغدا ولا اعمل اي واجب !
رُقية بابتسامة وهي بتتنهد :مالوش لزوم واجبك وصل ...
طلعت من البيت بخطوات سريعة ومروان وراها ...
ركبت العربية وركب مروان ...
بص لها مروان فـ قالت بنفس الابتسامة : امشي من هنا يا مروان ..
هز رأسه وساق العربية ...وهي بتبُص من الشباك ...
لحد ما طلعوا علي الكورنيش ....
مسك ايديها فـ بصت له بابتسامة .
مروان: طلعي اللي في قلبك يا رُقية..
نزلت دموعها المحبوسة علي خدها وقالت وعلي وشها ابتسامة مزيفة : أنا كويسة ...
بص مروان في عينيها فـ اختفت ابتسامتها وقالت ودموعها بتنزل : ما انا بنتها برده ...
المفروض كانت تبقي معايا في يوم زي ده
بقول لـ نفسي أنا اتخطيت وعادي ومش فارقة ..
بس لأ ...هي فارقة ...
فارقة اوي ...أن أمي ماتحبنيش ومكنش فارقه معاها ...
لا فارق فرحتي ولا حزني ولا حياتي ولا حتي هيفرق موتي..
خدت نفس طويل وهي بتحاول تكتم صوت عياطها : بنتك ماتت اه...بس أنتِ كمان بتموتي العايشة ..
رفع ايده ومسح دموعها بايده: اهدي يا رُقية ...اهدي يا حبيبتي...
طيب أنتِ كنتي متوقعة أنها هتيجي؟
هزت راسها بالرفض: لأ ...بس كان نفسي توقعي يطلع غلط ...كان نفسي تحس ولو احساس بسيط بالذنب من ناحيتي وتحاول تعوضني ..
وانا عبيطة ...كنت هرضي والله ما أنا عمري برضي بـ قليلي !...
اتنهد مروان : انا عارف ان انتي لسه جواكي البنت الصغيرة اللي نفسها أمها تحضنها وتبين لها حبها 
بس اسمعيني كويس... 
بص لها بابتسامة:
إنتِ مش محتاجة تثبتي لحد إنك تستاهلي الحب  إنتِ تستاهلي تتحبي من غير ما تطلبي واللي مايحطكيش في أول الأولويات عنده ..
يبقي ما يستاهلش تزعلي عليه
اتنهدت رُقية : بس دي مش حد يا مروان ...دي ..
كملت بسخرية : دي الست الوالدة .
بس عارف..
العيب في قلبي ...اللي مش بيتعلم ...ده اتعلم عليه من طوب الأرض ولسه حنين !
هز رأسه بالنفي: تؤ ...العيب فيهم هما ...هما اللي عُمي ...ماشافوش جمال قلبك ...
طب اقولك أنا عندي أغنية بحب اشغلها تحبي تسمعيها ..
هزت راسها بالموافقة بدون كلام ...
ابتسم وهو بيضغط علي الزراير: دي أحلي من اي دكتور نفسي ...
شغل مروان الكاسيت ...
بكلم نفسي عن نفسي
وبخرج بيا من يأسي
بمد إيديا أنا ليا 
مشيت مشوار قطع نفسي
أنا فاهمني وبكلمني
وبقويني وبطمني
باخدني في حضني
واوعدني في حزني 
عمري ما هسيبني
ابتسمت رُقية وهي بتبُص في الفراغ وبعدين بتبُص لمروان ..
أنا حبيبي ومليش غيري
وانا طبيبي اللي بداويني 
ومهما يطول سهر ليلي 
ما انامش ودمعتي في عيني
أنا الكنز اللي في الرحلة
وانا الحاجة اللي تستاهل
ولا هقبل في يوم إنه
يضيع الحلم بالساهل
أنا هكمل عشان خاطري
عشان عندي أمل فيا 
أنا كفاية أنا معايا
وانا أقرب واحد ليا
ابتسمت رُقية وهي بتبُص لمروان ...قفل الكاسيت وهو بيقول : رائعة من روائع عم البلد بهاء سلطان !...
بس عندي تعديل بسيط بس ...
بصت له رُقية باستغراب : ايه هو؟
مروان : أن أنت الكنز اللي في رحلتي واكتر حاجة تستاهل ...
ابتسمت رُقية وهي بتبُص له بحب: 
وانتَ كنز حياتي وعوض قلبي..
صفر بفرحة : يا دين النبي...ايه ده !
ضحكت رُقية: ايه يا مروان!
قال مروان بـ فرحة: لقد هرمنا من أجل هذه اللحظة ...دي رُقية هانم قالت لي وأخيرًا كلام رومانسي !
ضحكت رُقية: طب ما تاخدش عليها بقا !
هرش في شعره: طب ليه طيب!
ردت بمشاكسة: عشان ماافسد اخلاقك !
ضحك مروان: افسديها يا ستي ...أنا عاوزها تتفسد ..طب أنتِ عارفه لو انا شكل هندسي كنت هميل للانحراف !
*ـــــــــــــــــــــــــــــــــــــ*
بصت ميادة علي باب العناية وهي بتحرك دماغها بألم يمين وشمال : ده تاني يوم يارب عديه علي خير بقا !...
قرب دكتور لابس نضارة سودة وكمامة...
بصت ميادة عليه باستغراب: هو لابس نضارة سودة بالليل ليه !...
دخل من باب العناية وميادة بتبُص علي ضهره بقلق .
طلع من جيبه حقنة وقرب بخطوات ثابتة وعينه علي راغب لحد ما وقف جنب سريره ورفع وشه لـ المحلول .
رفع ايده وجهز الحقنة 
فتحت ميادة الباب فجأة فـ وقعت الحقنة من ايده.
بصت ميادة علي ايده اللي حطها جنبه بسرعة لقيتها بتترعش ولاحظت ارتباكه.
ميادة بـ شك: هو اسم حضرتك ايه ؟
*اسمي ...اسمي محمد ..
ميادة : طيب ...بس يعني ماشوفتكش هنا من ساعة ماجيت!
* عشان  ..ده...ده الشيفت بتاعي ...
ميادة بصت له بشك: هو حضرتك لابس نضارة سودة بالليل ليه؟
*عشان عيني ....عيني حساسة للضوء ...
ميادة قربت منه اكتر ومدت ايديها تشد الكمامة وهي بتقول : طيب ممكن اشوف شكلك ؟!
زقها بعيد عنه وجري فـ صرخت وهي بتقع بخوف وحاطة ايدها علي بطنها ولكن بتكون وراها كنبه جلد بتقع عليها بتمتص اصطدامها بيها ..
وفي نفس الوقت صوابع ايد راغب بتتحرك حركة خفيفة ...
قامت ميادة بسرعة وهي بتتنهد براحة وكانت لسه ماسكه بطنها وطلعت بره العناية بخطوات سريعة 
بيكون اتنين عساكر ماسكين الراجل المتنكر في لبس دكتور ..
قربت ميادة منه ورفعت ايديها وادته بالقلم علي وشه فجأة ..
بص لها العساكر بـ صدمة والراجل اللي اتضرب بصدمة..بعدها بثواني اتحولت لـ غضب. ..
وكان بيحاول يفك نفسه من العساكر ويهجم عليها ..
قالت ميادة وهي بتبُص عليه وبتبعد عنه بخوف بصوت متقطع : دُكــ ...دكتور...
دكتور هنا بسرعة ...
*ــــــــــــــــــــــــــــــــــــ*
وفي ڤيلا مروان ...
كانت رُقية في حضن سلوي ...
سلوي بابتسامة : أنتِ زعلانة ليه ...مش أنا أمك برده ...
بالله لو كنتي بنت بطني ما كنت هـ حبك اكتر من دلوقتي .
ضحكت رُقية وقالت بتنهيدة: ياريتك كنتي أمي ..
*والله وكنت هتجوزك ازاي بقى 
ضحكت سلوي : ما اكيد ماكنتش هتبقي ابني ...
قعد مروان جنبهم وحط رجل علي رجل : نظرية برده!
بصت لهم الاتنين سوا: افرحوا يا ولاد. ..وعيشوا
انسوا اي حاجة وحشة مريتوا بيها..
اعملوا سعادتكم بايديكم ...
كملت وهي بتغمز لـ مروان: واملوا لي البيت ده عيال !
رفع مروان ايديه بـ تحية عسكرية وقال بضحك: 
أنا جاهز!
بصت سلوي لـ رُقية بضحك : والنبي دمه خفيف!
تربيتي !
*ــــــــــــــــــــــــــــــــــــــــــ*
وفي مركب علي النيل ....
يا ما عيون شاغلوني
لكن ولا شغلوني
الا عيونك أنتَ 
دول بس اللي خدوني خدوني 
وبحبك أمروني ...
كان سعيد قاعد جنب فرحة وفي بينهم مسافة طويلة ...
قال وهو مبتسم وبيبُص في عينيها بحب :
أنتِ عارفة أن عينيكي حلوة اوي !
ضحكت فرحة : لا أول حد يقول لي الصراحة ...
دي عينك الحلوة هي اللي شافتني حلوة بس..
رد سعيد : ماعتقدش لأ....أنت حلوة كده ...رباني ..
ضحكت بخجل ...
فـ بص لها وهو بيقول : خلاص هنكتب كتابنا قُريب ...
هزت راسها بابتسامة فـ كمل كلامه:
اتنين وهنبقي واحد ...روح واحدة 
عاوزك لو في يوم قصرت ...تقوليلي 
وان كان خارج عن إرادتي اعذريني 
لو لقيتيني بميل تسنديني .
لو بـ حيد عن الحق فوقيني.
ابتسمت وهي بتسمع له باهتمام. 
كمل كلامه بابتسامة :
وعاوزك تعرفي إنك مش لازم تكوني قوية طول الوقت
لو تعبتي اتسندي عليا ولو زعلتي احكيلي 
ولو الدنيا ضاقت بيكي هتلاقيني جنبك.
في الحلوة والمُرة .
هنعدي اي حاجة سوا ...مع بعض 
ابتسمت وهي بتبُص في عينيه : 
وأنا مش عاوزة منك أكتر من كده 
 أنا عاوزة راجل لما أتعب يسندني ولما نختلف ما ينساش إننا بنحب بعض وينكر عشرتنا.
نفتح قلوبنا لـ بعض ومانخبيش أي حاجة عن بعض...
مد ايده ناحيتها فـ مسكت ايده بابتسامة 
والكوبليه بتاع الست شغال ...
أمروني أحب لقيتني بحب 
لقيتني بحب وأدوب في الحب
وأدوب في الحب وصبح وليل علي بابه!
*ـــــــــــــــــــــــــــــــــــــــ*
ميادة كانت رايحة جاية بقلق وهي بتبُص من الازاز علي الدكتور اللي بيفحص راغب ...
طلع الدكتور فـ قربت منه بسرعة : هو كويس يا دكتور ؟
الدكتور : اطمني يا مدام ميادة هو الحمد لله حالته مستقرة والمؤشرات الحيوية كويسة واستجابته للعلاج ممتازة.
ميادة بـفرحة: يعني هو بقى كويس يا دكتور؟
الدكتور: الحمد لله عدى مرحلة الخطر وده شيء مطمئن جدًا لكن لسه محتاج متابعة وراحة خصوصًا بعد الإصابة والعملية اللي عملها.
ميادة وهي بتبُص لـ فوق : الحمد لله... الحمد لله يا رب.
الدكتور: إحنا هننقله من العناية المركزة لغرفة عادية خلال الساعات الجاية.
ردت ميادة بسرعة : طب هو فاق؟
الدكتور : لسه بس خير بإذن الله .
*ـــــــــــــــــــــــــــــــــــــــــ*
بصت مي لـ كوثر وهي بتقول : 
ابويا وحشني اوي ياما ..صعبان عليا بهدلته في السن ده
ابتسمت كوثر بسخرية : مايصعبش عليكي غالي ياختي ...ما كله من عمايل ايده !
مسكت تليفونها وهي بتقول: اللي مطمني عليه أنه عند عمتي زينات ..بس هيفضل بعيد عن بيته لحد امتي..
فتحت سجل المكالمات وضغطت علي اسم عمتي زينات ردت عليها.
مي بابتسامة : ايوه يا عمتي اخبارك ايه..
والولاد عاملين ايه...وابويا أخباره ايه!
اتغيرت ملامحها للقلق وهي بتقول:
يعني هو مشي من عندك بقاله يومين طب هو فين ؟
قفلت معاها التليفون وكوثر بتبُص لها باهتمام...
عيونها اتملت دموع : هو مش عند عمتي ياما يكون الناس دول عملوا فيه حاجة...
طب ماجاش ليا ليه ...ده لو ماشالتوش الأرض اشيله فوق راسي ..
بصت لها كوثر بقلق بتحاول تخفيه ورا أسلوبها الحاد: ده ...ده زي الجن ما تخافيش عليه .
تلاقيه كانن في أي حتة كده يومين تلاتة يرستأ أموره ...
مي بدموع: ربنا يرجعك بالسلامة يا بابا يا حبيبي .
*ـــــــــــــــــــــــــــــــــــــــــ*
وفي السجن ...
بص المحامي لـ ممدوح الجندي وهو بيقول:
اللي بعتناه يخلص من راغب ...اتمسك واعترف انك اللي بعته.
بص له ممدوح بصدمة : ايه !
طب وليالي ؟
ماتت ؟
كمل كلامه وهو بيتنهد : لأ....واحدة صاحبتها باتت بدالها الليلة إياها .
وحطوها تحت الحراسة ...
والحراسة اللي علي حضرة الظابط اتشددت ...
مسك ممدوح دماغه بغضب: يعني ايه ...
يعني يعملوا فيا كل ده وماعرفش أخد حقي وحق بنتي ..
ملامحه اتبدلت للحزن وعيونه اتملت دموع : 
طب وسُهي !
اتدفنت؟
هز المحامي رأسه بالنفي: 
لا يا سعادة الباشا ...ماحدش جه استلم جثتها ..
ممدوح باستغراب : اختي دُرية ما جاتش استلمتها ؟
انت ما قولتلهاش ؟
رد المحامي: قولت لها وقالت إنها مش فاضية...
ضحك بسخرية: مش فاضية اه ...لكن كانت فاضية وهي مذلولة تحت رجلي عشان ارمي ليها شوية فلوس هي وجوزها ...صح ..
قبض ايده بغضب وقال: وصل الرسالة دي للباشا الكبير وقول له أنا جبت أخري ..
أنا كل ده مستنيه ينفذ وعده ليا ويتصرف لكن ماعملش حاجة 
أنا مش كبش فداء وهقع لوحدي 
أنا هوقعهم كلهم نفر نفر ..
وعليا وعلي أعدائي...
رد المحامي : اهدي يا ممدوح باشا الكلام ده لو وصل الباشا الكبير مش هيكون في صالحك !
رد ممدوح بغضب:
راحت اللي كنت بخاف عليها !
ومابقاش عندي حاجة اخسرها!
*ــــــــــــــــــــــــــــــــــــــــ*
وفي غرفة في المستشفي...
مسكت ميادة ايد راغب وهي مبتسمة 
بصت علي ايده وهي بتقول : ايدك متلجة يا حبيبي بردان !
مسكتها بايديها الاتنين وهي بتقول:
انا ماعدش عندي صبر ...وحشتني ...وحشني اسمع صوتك يا حضرة الظابط...
ايه بقا ما تحن يا جن أنا مستنظر !
ايه ده ..
ايه اللي انا بقوله ده بس ؟
ضحكت : انا شكل قلة النوم عملت معايا عمايلها...
أنا عاوزة استحمي يا راغب ريحتي بقت وحشة اوي 
ياربي..الحمد لله انك مش سامعني...
بس قلبي مش مطاوعني اسيبك وامشي ..
ولا البيبي عاوز يسيبك ...
حطت ايدها علي بطنها بحب : ابننا يا راغب...
مستحيل انزل حتة من حبيبي !
*انت قولتي ايه !.......يتبع

انضم لجروب التليجرام ( هينزل فيه الرواية كاملة ) اضغط هنا
للانضمام لقناة الواتساب اضغط هنا