رواية بيننا شبه خفي من الفصل الاول للاخير بقلم بسمة هلوان

Novelesta Novelesta

رواية بيننا شبه خفي من الفصل الاول للاخير بقلم بسمة هلوان

رواية بيننا شبه خفي من الفصل الاول للاخير هي رواية من كتابة بسمة هلوان رواية بيننا شبه خفي من الفصل الاول للاخير لاول مرة على موقع التواصل الاجتماعى فيسبوك رواية شاءت الاقدار من الفصل الاول للاخير حقق تفاعل كبير على الفيسبوك لذلك سنعرض لكم رواية بيننا شبه خفي من الفصل الاول للاخير

رواية بيننا شبه خفي من الفصل الاول للاخير

عربية ماشية على الطريق من كام يوم، فيها واحد ومراته راكبين قدام، وسايبين ولد وبنت توأم سنهم 5 سنين ورا.. 
وهمّ ماشيين الأم كانت بتلاعب العيال وبتقول لهم بضحكة: 
ـ بعرف أشوف المستقبل، أوريكم؟؟ 
الأولاد اتحمسوا، والولد بعينين خُضر بص لها بنص عين علشان كان متضايق وقال: 
ـ أنتِ قلتِ الكدب حرام يا ماما، ماحدش يعرف الغيب إلا ربنا. 
الأمّ بُهتت وهي بتبص للأب اللي كان بيضحك على حوارهم، لفت له تاني وهي بتقول بكلام منطقي: 
ـ لما تكبر هتعرف إن فيه حاجة اسمها تنبُّؤ، استنى هوريك مثال. 
بصت قدامها لقت مطبّ هييجي كمان ثواني فقالت له بابتسامة: 
ـ العربية هتتهز دلوقتي، خلِّ بالك كدا. 
ماعدتش ثواني غير والمطبّ جه فعلا بيحقق كلامها، الولد بص لها بصدمة والبنت اللي جنبه ضحكت وهي بتقول بطفولية: 
ـ ماما بطلة خارقة، بتشوف المستقبل بجد! 
الولد كان لسة باصص بصدمة وقال لمامته: 
ـ أنتِ عرفتِ ازاي؟ 
التانية ضحكت بهزار وقالت له: 
ـ سر، هاقول لك لما تكبر. 
ـ يُسر، هاتي تليفوني وقع تحت، علشان بيرنّ. 
قالها الراجل لمراته فنزلت تدور عليه وتحاول تجيبه لكن إيديها ماوصلتش، قالت له بضيق:
ـ دا بعيد أوي يا عزيز، تعالى شوفُه أنت جيبه برجلك هتوصل له. 
عزيز بص تحت وفضل يحاول يجيببه وهو عمال بيرنّ، بس اللي حصل بعدها فاق كل التوقعات!! المِقود فلت من بين إيديه فجأة والعربية لفّت على الطريق الصحرا قدامهم، وعدت ثواني قليلة وسط الصريخ والخوف والرّعب اللي نشأ في قلوب الأولاد، العربية وقعت من فوق المنحدر اللي كان صغير بس الحجارة والصحرا أثروا في العربية.. وفي الناس اللي فيها! 
الناس اللي كانوا ماشيين على الطريق لاحظوا اللي بيحصل، كذا واحد وقف عربيته وهم بيتصلوا على الطوارئ والإسعاف، وجريوا علشان ينقذوا الناس!
بمجرد وصولهم للعربية عينيهم لمعت من النار اللي كانت منعكسة عليها، بس النار كانت بتكبر واحدة واحدة، والطوارئ مش هتلحق تعمل حاجة!! 
فتحوا باب العربية بصعوبة بعد ما خبطوه بالحجارة، واحد منهم صرخ في الناس: 
ـ تعالوا ساعدوني، العيال بينزفوا ولسة مفتّحين عينيهم. 
بعد ما قالها الرجالة جُم معاه طلعوا الأولاد، بس الأب والأم حالتهم كانت أصعب، يُسر راسها داخل فيها قطع من الإزاز، وعزيز وشه مشوه من خبطته في المِقود قدامه. 
حاولوا يطلعوهم بسرعة، بس بعد ما بَعدوا العيال ـ اللي في حالة لا يعلمها إلا الله ـ طلعوا يُسر وعزيز بصعوبة. 
واحد من الستات الواقفين قالت بقلق: 
ـ وسعوا أنا دكتورة. 
وسعوا لها بسرعة البرق واتلموا حواليها، وهي كشفت على نبض يُسر وعزيز، بس.. ايه الفايدة؟؟ فارقوا الحَياة. 
بصت للناس بأسف وقالت لهم الخبر، وكانوا بيقولوا: 
ـ لا حول ولا قوة إلا بالله! العيال اتيتّموا بدري، هيعملوا ايه دلوقتي؟ 
بلَا وعي الدكتورة بصت لهم، كانوا فايقين لكن بيعانوا من اللي هم فين، وشكل فيه كُسور في أماكن كتير في جسمهم، راحت تشوفهم فيهم ايه، كشفت عليهم كانت الطوارئ جات، وبمجرد ما جُم لقوا العربية انفجرت وصمّت آذانهم.. 
ابن يُسر بص للي حصل بصدمة وهو بيصرخ بصوت مبحوح وبيقول: 
ـ ماما! فين ماما وبابا؟ عاوزهم.. ودوني ليهم! 
الدكتورة حاولت تهديه وقالت له بابتسامة: 
ـ ماتخافش يا حبيبي هتشوفهم كمان شوية، لازم بس نروح المستشفى. 
عيّط وهو بيقول بتعب: 
ـ لا، أنا عاوز أروح لبابا وماما، هم فين؟ وديتوهم فين؟ 
اتنهدت وحاولت تهدأ علشان ماتخوفهوش، مش عارفة ازاي تقول له اللي حصل، دا ولد 5 سنين ومش هيفهم! بس قالت له بهدوء وهي بتسايسُه: 
ـ دلوقتي شايف هدومك باظت ازاي وراسك بتنزل دم؟ عاوز ماما وبابا يشوفوك كدا؟ هيخافوا عليك صح؟ أنت عاوزهم يخافوا؟ 
سكت وعيونه اللي بتلمع من الدموع بصت لها وركز معاها أخيرا، راحت قالت له ببسمة بتهدّيه: 
ـ دلوقتي هنروح أنا وأنت وأختك للمستشفى، أول ما نخلَّص هنروح نشوف بابا وماما، اتفقنا؟ 
وبكل تردد وثق فيها وهو بيحرك راسه بالموافقة، قالت له:
ـ أنت بقى اسمك ايه، وأختك القمورة كمان؟ 
ـ اسمي "سيف"، وأختي "نور". 
مسحت على راسه بهدوء وأخدته لعربية الطوارئ، بلغتهم بحالته، وقالت لهم:
ـ حالة البنت صعبة، لازم تهتموا بيها كويس، واضح إن عندها كسر في رجليها مش سهل. 
قالتها للمُشرف ووافق، أخد العيال ومشي في طريقُه بعد ما الموضوع اتحلّ، وأخدوا جثمان الأب والأم.. وكلنا عارفين نهايتهم فين. 
كل تفكير "سيف" ساعتها وهو في العربية ازاي هيقابل أمه وأبوه تاني؟ بص لأخته اللي عطوها مسكن علشان وجعها وكانت بتعرق وحالتها وحشة، كبت عياطه وافتكر كلام باباه اللي قال له من كام يوم: 
ـ جبت 100٪ في الماث؟ دا أنت ليك عندي هدية بقى. 
"سيف" ضحك له فباباه قال له بفخر: 
ـ أنا بعتمد عليك، أنت عارف "نور" درجاتها عاوزة تتحسن، روح ذاكر معاها وأنا هاجي كمان شوية أختبركم، أنا عارف إنك شطور وهتعرف تخلي بالك منها لحد ما آجي صح؟
التاني وافق بسرعة وهو بيحرك راسه بحماس وهو فرحان من مدح باباه ليه، وجِري بسرعة لأخته وسط ضحك أبوه عليه. 
رجع للواقع وهو بيفكر نفسه بكلام باباه وبيبص لأخته: 
ـ هاخد بالي منها يا بابا.. لحد ما تيجي. 
عقلُه الصغير ماكانش مستوعب اللي حصل وبيحصل، مايعرفش إن رجوع باباه ومامتُه.. مستحيل! 
ـــــــــــــــــــــــــــــــــــــــــــــــــــــــــــــــــــــ
بعد مرور عشرين عام.. 
ـ كام مرة قلت لك اغسلي الأبيض لوحده.. أطلع ملوِّن كدا ازاي يعني؟؟ 
ـ سيبك بس شكلك تُحفة بالألوان، بتفكرني باللي مايتسموش. 
ـ يا بنت الـ.. والله لو مسكتك لهعذبك يا "نور"! 
قالها "سيف" وهو بيتوعد لأخته اللي ماعندهاش أدنى خبرة في شُغل البيت وهو اللي كان بيهتم بكل حاجة، بس سابها تجرب مرة علشان مشغول. 
كانوا هم الاتنين قصاد بعض حوالين السفرة، وهو كان بيجري علشان يمسكها بس بتهرب دايما وهي بتقول بخوف: 
ـ أنا ماعرفش هم كانوا طقمين فحطتهم مع بعض، كان لازم تقول لي! 
كان باصص لها يكل حدة وهو بيقول: 
ـ هي دي حاجة بتتقال؟ عندك خمسة وعشرين سنة يا طايشة، هتغتحي بيت ازاي أنتِ؟ 
حطت إيديها في جنبها وهي بتقول بغرور: 
ـ وأنت مالك؟ أنا هتجوز ثري مصري وهخليه يجيب لي خدامة، وأكون أنا الهانم سيدة القصر. 
ماتمالكش نفسُه وهو بيحدفها بشبشب البيت بتاعه فتفادته وهي بتقول له بتغيظه: 
ـ وماجاش فيّ! 
ماعملتش حسابها في الفردة التانية وهي بتخبط في وشها، وهو استغل صدمتها وقفشها وهي ماعرفتش تهرب، قال بغضب: 
ـ حلو كدا دلوقتي؟ أقتلـك ازاي بقى؟ بالحرق ولا بالشنق ولا بالسلخ؟ لو محتارة فأنا بفكر أعمل التلاتة. 
ـ "سيف" سيبني علشان خاطري والمرة الجاية هاخد بالي.
قال بتهكم: 
ـ وهو أنتِ هتبقي عايشة علشان يبقى فيه مرة جايَّة؟ أنتِ عارفة الفلوس دي بكام؟ دا أنتِ تدفعي لي عشرة آلاف جنيه من مُرتبك. 
رفعت حاجبها وهي بتصرخ بصدمة: 
ـ يا نهار ألوان! عشرة آلاف ليه؟ دول قميصين وجاكت ياض! 
سكت وبص لها برفعة حاجب فهي بعدت عينيها وبتقول بكل غرور: 
ـ مش مشكلتي، فلوسي فلوسي، وفلوسك فلوسي برضه. 
اداها قلم على قفاها فبصت له بصدمة وهي بتردهوله بكل قوتها، وماعدتش ثانية غير وكانوا بيجروا ورا بعض تاني زي القط والفار. 
ـــــــــــــــــــــــــــــــــــــــــــــــــــــــــــــــــــــــــ
ـ أنا رايحة الشغل، تعالى وصلني. 
قالتها ليه بعد مرور ساعات من الخناقة، وهو ماردش عليها بل بص لها بسخرية وقال: 
ـ ما تروحي بعربيتك، أنا مالي! 
ـ عربيتي في التصليح بسبب واحد كددا خبطها لي امبارح.. 
ملامحها اتحولت لغيظ وهي بتقول: 
ـ أول حرف من اسمه "سيف". 
بص لها ببسمة كلها استفزاز فراحت بكل قوتها تشده من إيده، بس هتقدر عليه ازاي؟ هي الـ50 كيلو تيجي ازاي جنبه وهو 80 كيلو مربيهم عضلات؟ 
انتهز فرصته وهو بيرفع ايده يتفاخر بعضلاته قدامها وبيتريق عليها: 
ـ يلا يا عُقلة غوري من وشي، مش هوصل حد أنا. 
ـ خلاص هات مفاتيح عربيتك! 
ـ بس يا بت، الغالية محدش يركبها غيري. 
قالها بحنق فهي ضيقت عينيها بشر وتفكيرها الخبيث وصلها لفكرة! 
أخدت المفاتيح اللي كانت قدامه وجريت على برة وفي إيديها شنطتها، بس هو لما استوعب الموضوع جرب وراها وهو بيقول بصراخ: 
ـ على جثتي إنك تركبيها! 
ـــــــــــــــــــــــــــــــــــــــــــــــــــــ
بعد دقايق كان "نور" و"سيف" جنب بعض في المقاعد الأمامية للعربية، و"سيف" باصص لها بضجر وهو شايفها مستريحة وقربت تنام على الكرسي وبتقفل عينيها. 
وصلوا لمكان شغلها ولما نزلت بعتت له بوسة مستفزة وهي بتقول: 
ـ بونسوار بقى يا قلبي، يلا مع السلامة. 
سابته ومشيت قبل ما تشوف قلبته عليها وهو وراها بيضحك بيأس على حركاتها، شخصيتهم بقت واحدة من كتر ما عايشوا بعض، مرة يستفزوا بعض ومرة يصرخوا كإن الدنيا كلها ملكهم. 
بص لها بيتطمن عليها وهي بتعدِّي جوة المبنى بتاع الشغل بس لاحظ عربية تانية غالية وفاخرة بتُقف وحدّ ماشي وراها للمبنى، دا يبقى مين علشان يبقى معاه عربية زي دي.. 
بس اتصدم من اللي شافه لما لقى صاحب العربية مع أخته.. دا عمل لها ايه؟ ثانية.. ايه اللي بيحصل دا؟ 
ـــــــــــــــــــــــــــــــــــــــــــــــــــــــــــــــــــــــــــــــــــ
انضم لجروب التليجرام ( هينزل فيه الرواية كاملة ) اضغط هنا
للانضمام لقناة الواتساب اضغط هنا
↚
اتصدم من اللي شافه لما لقى صاحب العربية مع أخته.. دا عمل لها ايه؟ ثانية.. ايه اللي بيحصل دا؟ 
قرَّب منها وهو بيشيل عنها الصندوق اللي كانت جاية بيه من البيت، كانت "نور" قالت لـ"سيف" إنه تبع الشغل فماقربش منه، بس إنه يشوف صاحب العربية بيكلمها بالودّ دا فكان لازم ينزل ويشوف فيه ايه! 
اتحرك لحد ما وصل لمكانهم ووقفها قبل ما تدخل بينادي عليها بصوت عالي بحدة: 
ـ "نور"! 
لفت راسها باستغراب لما لاقته هوّ، وصاحب العربية الشاب التاني استأذن منها واتحرك على جوة ركب الأسانسير، كانت شركة كبيرة فماعرفش يوقفه. 
بس"سيف" بص لأخته وقال لها: 
ـ مين دا؟ 
وهي كان التعجب على وشها وبترد على سؤاله بسؤال: 
ـ ليه فيه ايه؟ أنت تعرفه؟
ملامحه الحادّة لسة زي ما هي وهو بيقول لها: 
ـ قاعدة بتبتسمي له وهو بيكلمك كدا، وبعدين أخد منك الصندوق ليه؟  مش قلتِ بتاع الشغل؟ 
ضيّقت عينيها وقالت بابتسامة شك وهي عرفت اللي بيدور في باله: 
ـ الصندوق كان تبعه هو، ودا زميلي في الشغل، والعلاقة ما بيننا ماتعدتش الشغل. 
اتنهد وكان لشة هيتكلم لولا إنها قالت بابتسامة نصر إنها قفشته واتريقت عليه بضحكة وهي بتنكش شعره: 
ـ ليه يا سيّوفي بتغير على أختك؟ ماتخافش أنا محافظة على نفسي، وهنا كلهم ودودين وهاديين. 
بَعد إيديها عن شعره بضيق وهو بيقول: 
ـ حاضر يا ست، همشي أنا بقى، وهعدِّي عليكِ الساعة 6 بالليل تكوني خلصتِ. 
قالت بدهشة: 
ـ وه؟ هتوصلني البيت كمان؟ ايه الحنية المفاجئة دي؟ 
ضحك عليها بيأس وسابها ومشي، وهي شاورت له بإيديها وقالت بصخب:
ـ ماتنساش تجيب لي حاجة حلوة معاك، عشرة آلاف جنيه مثلا! 
ـ عشرة آلاف عفريت لما ينططوكِ، غوري يا بت. 
راح على شغله وسابها، وهي ضحكت ودخلت لجوة مبتسمة، خدت الأسانسير للدور السابع وخلاص هتبدأ شغلها كمُسوِّقة لمنتجات الشركة على الإنترنت، بمجرد وصولها للدور بتاعها لقت زميلها دا في وشها، قالت بابتسامة: 
ـ ازيَّك يا أستاذ "مهند"، بدأتوا شغل ولا ايه؟ 
رد عليها بجمود عكس الودّ اللي كان مبينه لها تحت: 
ـ لا، احنا جايين بدري شوية.
وسكت وسابها وراح لمكتبه، بصت باستغراب لرد فعله وهي بتقعد على مكتبها وبتقول بهمس: 
ـ ماله دا؟ حد ضايقه ولا ايه! 
فتحت موبايلها تلعب فيه عقبال ما زمايلها التانيين يوصلوا، كانوا كلهم رجالة وهي بالفعل تذمّرت قبل كدا بسبب الشأن دا وإنها البنت الوحيدة في التيم، بس هتعمل ايه! هي مش الـHR.. 
ولكن طول ما هم كويسين معاها خلاص، هو شغل هتعمله وبتروّح.
ماكانتش واخدة بالها من النظرات اللي هتخرم ضهرها و"مهند" بيهمس لنفسه بضيق وبيتريق عليها:
ـ ازيك يا "مهند"، زي الزفت ياختي. 
كان كل تفكيره وضيقه في اللي شافُه لما كان "سيف" معاها وهو بيبص له بحدة، شكلها مخطوبة ومش قايلة. 
ـ وأنت مالك أنت تقول لك ليه؟ أنت مين في حياتها؟ 
قالها لنفسه وهو بيفكر بأسف، بس موبايله رنّ فجأة ففتحه يشوف مين المتصل، وياريته ما فتح، كان مكتوب بالإنجليزية إنها والدتُه.. بص حواليه لزمايله وخرج يردّ عليها، وأول ما رد ولسة بيقول آلو، لقاها زعقت فيه لدرجة إنه بعد الفون عن ودانه: 
ـ "مهند"! ماجيتش لعشا العيلة ليه؟ استنيناك كتير امبارح وبرضه ماجيتش، أنا مش قايلة لك قبلها لازم تيجي علشان تشوف "تيا"؟ 
ـ يا ماما قلت لك مش طايقها، مش بحبها، هاجي أشوفها مخصوص؟ 
ـ ما هو أنت لازم تتجوز زي ما أبوك قال، اسمع كلامه يا "مهند"، عدِّي عليّ النهاردة ماتروحش بيتك.
اتنهد وهو بيجاريها وبيقول: 
ـ حاضر يا ماما من عينيَّ. 
قفل تليفونه ورجع تاني لمكان وهو بيتنهد بتعب، اتخضّ فجأة أول ما لقى ضل قدامه، اتعدل ورفع عينيه.. كانت "نور" ماسكة في ايديها ورق وبتديهوله: 
ـ دي تقارير امبارح اللي قلتِ لي عليها، خلصتها لك، وديها للمدير النهاردة. 
وافق وهو بياخدها منها بعينين تايهين فقالت له بشك: 
ـ أنت غريب النهاردة، أنت تعبان؟
سكت، مش عارف يرد عليها يقول لها ايه، يحكي لها عن مشاكله؟ ازاي وهي أكبر مشكلة فيهم ولسة حتى ماصارحش نفسُه بإنه مُعجب بيها! ازاي هيقول لها حتى بعد الراجل اللي شافه معاها النهاردة؟
ابتسم لها وهو بيقول: 
ـ الحمد لله، عندي صداع بس، شوية وهيروح لحاله. 
قالت له بإدراك: 
ـ عندي مسكن في شنطتي، استنى دقيقة هجيبه. 
انضم لجروب التليجرام ( هينزل فيه الرواية كاملة ) اضغط هنا
للانضمام لقناة الواتساب اضغط هنا
↚
جابته من شنطتها وحطته قدام مكتبه، وهو شكرها رغم إنه ماعندوش صداع بس كان تعبان نفسيا، وبيحاول ينفي دا. 
مشيت تكمل شغلها وهو باصص لأثرها وبيهمس لنفسه بابتسامة: 
ـ نفسي تبطل تصرفاتها اللي بتجذبني ليها. 
بدأ يشغل نفسه في الشغل والتيم كله اكتمل والكل بدأ ينشغل، عدت ساعات لحد ما حس بضهره في ذمة الله فحاول يتعدل وهو بيتمدد بس بص لها وهي مركزة في شغلها وبيقول بتعجب: 
ـ هي مابتتعبش ولا ايه؟ 
ـــــــــــــــــــــــــــــــــــــــــــــــــــــــــــــ
ـ آآآه.. ضهري يا "سيف"، ورقبتي هتموتني!! 
قالتها وهي بتدخل البيت بعد ما رقدت على الأنتريه اللي في الصالة، و"سيف" باصص لها بملل وهي بدأت صياح كل يوم، قال لها الأسطوانة المعتادة: 
ـ لو مش عاجبك سيبي الشغل، حد قال لك تشتغلي؟ 
اتعدلت فجأة وهي بتدافع عن شغلها باستماتة: 
ـ إياك تقول كدا مرة تانية، أنت عارف إن الشغل حياتي، لو سبته كإني بفارقها! 
ـ طب يلا يا ست المرأة العاملة، اعملي بلقمتك في البيت دا وحضري لنا العشا..
قامت من مكانها وهي راحت له تمسك إيده لزقت فيه وبتبتسم ببراءة: 
ـ ما تعمله أنت النهاردة، يرضيك أختك التعبانة واللي ضهرها في ذمة الله هي اللي تعمل العشا؟ 
رفع حاجبه وقال: 
ـ آه يرضيني، يلا يا بت على المطبخ. 
ـ طب ما تعمله أنت المرة دي بس وأنا هعمله بكرة. 
ـ آه زي امبارح لما ضحكتِ عليّ؟ وبعدين احنا متفقين، أنا الفطار وأنتِ العَشا.
بصت له بضيق وبعدين راحت للمطبخ علشان هي التانية هتموت من الجوع، والجو البرد طول اليوم ماكانش بيخليها تتحرك. 
عملت العَشا عقبال ما هو غيَّر هدومه ولبس واتشيّك، بصت له باستغراب: 
ـ رايح فين؟ 
اتحولت ملامحها لشك وهي بتبتسم له وبتغمز له: 
ـ رايح تقلّب رزقك ولا ايه؟ 
بعَد وشها بكفّ إيده وهو بيقول بضيق: 
ـ لا ياختي، هروح أقعد مع صحابي النهاردة، وهناكل برة. 
ـ بتهزر! أومال خلتني أعمل عَشا ليه بقى لما أنت هتطلع برة؟ 
ـ علشان عارف إنك هتكسّلي وهتعملي إندومي وهتتخمدي، كُلي بقى، أنا خارج. 
مسكت إيديه وهي بتقول له برجاء: 
ـ ما تاخدني معاك عشان خاطري، عاوزة آكل برة. 
بص لها بصدمة وهو بيبعدها: 
ـ بس يا مجنونة عاوزة تيجي تقعدي وسط رجالة؟ دا أنا كنت وأدتك، وبعدين أنتِ ماعندكيش صحاب؟ 
ـ يعني هو أنت بترضى أخرج لوحدي؟ 
ـ علشان بخاف عليكِ، لو هتروحي هبقى معاكِ. 
بصت له بضيق وسابتُه وقالت وهي بتضيق عينيها بتحسده: 
ـ هحسدك وهقُرّ عليك خلي في بالك. 
وبعدين سابته ودخلت المطبخ تاني، وهو بص لأثرها بسخرية وخرج من البيت لصحابه، وهي بتقول في البيت وبتبص للسقف: 
ـ يا رب أكل المطعم يبقى طعمه وحش. 
ــــــــــــــــــــــــــــــــــــــــــــــــــــــــــــ
كان "سيف" قاعد مع صحابه ومستنيين الأكل، لما الأكل جه وقعدوا ياكلوا اتصدم فجأة لما حسّ بحاجة في بُقه، خرجها من بُقه ولقاها شعراية وسط الأكل.. غمض عينيه وقال بغضب: 
ـ آه يا "نور"  الـ... 
ـــــــــــــــــــــــــــــــــــــــــــــــــــــــــــــــــــــــــ
وفي مكان تاني كان "مهند" لسة واصل بيت باباه، ڤيلا برغم إنها كبيرة إلا إنه بيحس بضيق تنفس كل ما يدخلها! 
ركن عربيته ودخل على جوة، لقى أبوه في وشه وأمه مستنياه، سلّم عليهم وراح لأمه حضنها بس ماعملش كدا مع أبوه وهو بيبعد عنه. 
ـ أنا حضرت عَشا النهاردة مخصوص بإيدي علشانك، يلا بقى تعالى. 
قالتها أمه بابتسامة فمشي وراها وهو بيبتسم لها، بس لما وصل اتصدم من اللي شافه قدامه، وهو بيقول بدهشة: 
ـ "تيا"؟؟ 
ــــــــــــــــــــــــــــــــــــــــــــــــــــــــــــــــــــــــــ
انضم لجروب التليجرام ( هينزل فيه الرواية كاملة ) اضغط هنا
للانضمام لقناة الواتساب اضغط هنا
↚
ـ "تيا"؟؟
البنت بصت له بكل هدوء، كان لبسها مكشوف زي ما اتعودت من صغرها، بتتلزق فيه دايما رغم هدوءها اللي بتمثله قدام عيلته، كل مرة لما بيشوفها بيقارن بينها وبين "نور" غصبًا عنه! 
رجع من تفكيره على صوتها الهادي وهي بتسلم عليه، وهو كتم سخريته بالعافية.. دول مايعرفش اللي بيحصل لما بيلفوا وشهم بس.. الهدوء دا كله بيتبخر!
قعد معاهم ووسط الأكل بعد ما عدت دقايق أم "مهند" اتكلمت بابتسامة صادقة من كل قلبها: 
ـ عاوزين نفرح بيكم بقى، عاوزة أشوف أحفادي قبل ما أموت. 
اللقمة وقفت في زوره وبدأ يكح وسط صدمة الكل وأمُّه بتدي له مياه وهو شرب بالعافية، ونظراته ليها عبارة عن دهشة وحدة، عنده كلام كتير نفسه يقوله بس ماينفعش! 
بعد ما قعدوا مرة تانية رجعت ابتسامة أمه كمان فكان لسة هيتكلم لولا إن "تيا" اتكلمت بهدوء غريب عليها: 
ـ بس أنا مش هتجوز "مهند" يا خالتو. 
ساب معلقته واستناها تكمل كلامها، هي الصدمات مش بتبطل تحصل ليه؟ "تيا" بقت عاقلة وبتفكر؟؟ 
ـ ليه يا بنتي، أنا عارفة إنه مُتعب بس ايه اللي مش عاجبك فيه؟ دا بيعرف يطبخ! 
وكإن آخر جملة هي اللي هتخليها توافق! 
ـ خلاص يا ماما أنتِ بتتعاملي معايا كإني سلعة؟ ما خلاص البنت قالت مش عاوزة! 
ما صدق لقى كلمة يلزق فيها علشان يهرب من الحوار دا، الكل سكت.. وكل دا الأب كان ساكت من غير حتى ما يبص لهم، وكإنه عارف الحوار هينتهي ازاي في النهاية. 
بعد الأكل استأذنت "تيا" للحمام فـ"مهند" انتهز الفرصة ومشي وراها، كلمها بعيد عن الكل وهو بيقول: 
ـ "تيا"!
لفّت له فبص لها باستغراب: 
ـ أنتِ بتخططي لحاجة صح؟ مش عاوزة تتجوزيني؟ متأكدة؟ 
ـ ليه بتسأل؟ أنت عاوز تتجوزني؟ 
شاور براسه بسرعة بالنفي وهو بيقول: 
ـ لا لا، دا مش قصدي، أنا بسأل بس. 
ـ عاوز السبب؟ 
شاور براسه بهدوء فلقاها بتقول بنبرة هادية بس نظراتها كإنها يائسة: 
ـ فيه إننا المفروض مخطوبين، بس أنت ماسألتش عني بقى لك شهر وأنا اللي ببدأ أسأل دايما، فيه إنك مش مهتم بيّ ولا فيك حتى رُبع صفات الشخص اللي أنا عاوزاه بجد، يمكن ماتكونش كدا مع الكل.. علشان أنا عارفاك كويس، فدوّر على واحدة تديها كل اللي عندك، وتكون مشاعرك صادقة ناحيتها.. تكون تستاهلها.. علشان أنا ماستاهلتهاش.
سكت، ماعرفش يرد عليها بايه غير إنه ابتسم لها بامتنان وخرج، وهي بتبتسم بيأس وراحت للحمام وبتهمس: 
ـ برضه لسة غبي زي ما هو. 
ـــــــــــــــــــــــــــــــــــــــــــــــــــــــــــــــــــــــــــــــــــــــــ 
يوم جديد، على عكس "مهند" اللي متفائل ببداية اليوم بسبب اللي حصل امبارح، كانت "نور" بتبص حواليها لكل مكان بقرف وكإنها قاعدة في مقلب زبالة! 
كانت بتفكر في نفسها وبتقول بهمس بنبرة تعب:
ـ أنا عاوزة أروَّح. 
ـ ما أنتِ لازم تروحي فعلا، حد ييجي الشغل في عيد ميلاده؟ 
صححت لزميلها التاني اللي واقف قدامها بيسلمها تقارير: 
ـ يوم ميلاده*. 
ـ آه صح. 
افتكر كلامها ليهم عن إن مافيش غير عيدين بس، ولا يجوز إننا نخترع عيد تالت من عندنا ونحدد له وقته واسمه، لإن الأعياد ليها قدسيتها لكل البشر، مش يوم واحد يهمها هي بس في حياتها يتسمى عيد. 
ـ دا راجعت عليه امبارح، تقارير الحملة اللي هنعملها الشهر الجاي، بس لازم المدير يظهر فيها بنفسه، وتدخلي تكلميه بنفسك. 
قالت بصدمة: 
ـ بس أنا مش قائدة التيم! 
ـ وأنتِ اللي عملتِ الحملة دي وصممتِ مسارها، فلازم تكلميه بنفسك علشان ماحدش هيشرحها أفضل منك. 
قالها لها ببسمة هادية فأخدت التقرير وهي بتسأله بحماس: 
ـ طب عجبتك؟ الحملة هتنجح؟ 
ـ بقى لك 3 سنين شغالة على حمَلات عمر ما واحدة فيهم فشلت وجاية تسألي تاني دلوقتي؟ 
ـ أصل أول مرة في الشغل هدخل للمدير لوحدي كدا. 
ـ مين قال لوحدك؟ 
صوت تالت اتدخل في الحوار كلن صوت "مهند" قائد التيم وهو بياخد تقريرها وبيبعد زميلها التاني أخد مكانه وبيقول لها: 
ـ في خلال ساعة واحدة هتدخلي تقدمي البريزنتشين دا للمدير معايا. 
وسابها ومشي.
انضم لجروب التليجرام ( هينزل فيه الرواية كاملة ) اضغط هنا
للانضمام لقناة الواتساب اضغط هنا
↚
بالبساطة دي؟؟ هي ليه حاسة إن فيه حاجة غلط بقى له كام يوم؟ ولا هو كدا دايما؟ 
ـ في خلال ساعة؟ يا لهوي لازم أجهز نَفسي! 
سابت الشغل وهي بتجري على الحمام، وعلى عكس باقي البنات في الفرق التانية بييجوا هنا علشان يعدلوا الميكب بتاعهم كانت هي بتتكلم بكل توتر لنفسها في المراية وكل شوية بتعيد الجُمَل اللي هتقولها قدام المدير! 
ــــــــــــــــــــــــــــــــــــــــــــــــــــــــــــــــــ
وفي حتة تانية كان "سيف" ماشي في الطريق بعربيته لحد ما لقى بنت لابسة لبس رجالي وفاتحة عربيتها بتحاول تصلح فيها أو تشوف مشكلتها فين.. 
وقف لها وركن جنبها، وهو بيكلمها بهدوء: 
ـ حضرتك محتاجة مساعدة؟ 
بصت له وكإنه نجدة من السما وهي بتقول بدهشة: 
ـ وأنا اللي بقول ماحدش هيقف لي من المجتمع الذكوري المتعفن دا، أن ماكانتش البنت حلوة ولابسة مقطع مايقفولهاش! 
رفع حاجبه وهو بيقول لها ببرود: 
ـ أفهم من كدا إنك مش عاوزة مساعدة؟ طب سلام. 
قالت باستماتة وهي بتعدل من ملامحها الساخرة: 
ـ استنى يا اسمك ايه، أنت خفيف كدا ليه.. زعلت؟ معلش تعالى شوف لي العربية بقى. 
ـ هو أنا خدامك؟ ما تتكلمي عدل يا ست أنتِ! 
ـ أتكلم عدل ازاي؟ أقف باستقامة وأسجد لك وأنا بكلمك ولا ايه؟ 
ـ أستغفر الله العظيم! 
كل ما بيبقى في أقصى مراحل غضبه لازم يقول الجملة دي، مش كفاية اللي حصل له امبارح في المطعم والنهاردة في الشغل.. وجاية دي فوق المصايب هدية؟ 
خلاها تبعد من قدام العربية وهو جاي يشوف مشكلتها ايه، ورجع لعربيته بسرعة فقالت له بصدمة: 
ـ رايح فين يا أستاذ هتسيبني ولا ايه؟ 
ـ محسساني إني جوزك ليه؟ 
قالها وهو بيجيب شنطة مُعدات وأدوات من شنطة عربيته، وجه بيصلح حبة حاجات في العربية فقالت له بابتسامة مندهشة: 
ـ أنت ميكانيكي؟ 
ـ أنا مهندس! 
ـ ميكانيكي يعني. 
ـ أنا مهندس! لو جبتِ لي طيارة بايظة دلوقتي هقدر أصلحها لك، وتقولي لي في الآخر ميكانيكي؟ 
ـ ومالُه يعني مهندس ولا ميكانيكي؟ دا أعلى رتبة من دا مثلا؟ ما أنتم الاتنين بتصلحوا في حاجات. 
ساب العربية وقام بيشاور لها باللي في إيده بتحذير: 
ـ اللسان دا ماينطقش تاني لو عاوزاني أصلح لك البتاعة دي. 
ـ بتاعة؟ أنت عارف البتاعة دي بكام؟ 
جاب آخره وهو بياخد معداته وراح يوقف لها تاكسي، قالت له باستجداء: 
ـ خلاص طيب مش هتكلم، صلحها بس. 
ـ كدا كدا لازم تروح الورشة تتصلح علشان العطل اللي فيها مش هينفع أصلحه هنا. 
استوعبت الأمر وهي بتفتح تليفونها لما لقت حد رن عليها، بصت للاسم بزهق وقفلت في وشه، لقت رسالة اتبعتت لها بتقول: 
ـ "تيا"! دقايق وتكوني في البيت! لازم نروح للدكتور.
ابتسمت بسخرية وهي بتبص للتليفون، بعتت للرقم التاني رسالة بعد ما ركبت التاكسي: 
ـ بس أنا مش "تيا". 
قفلت فونها وهي بتبص لـ"سيف" بابتسامة وبتشاور له وبتقول: 
ـ شكرا على المساعدة يا هندسة، اطلع ياسطا.
واتحرك التاكسي بعيد عن "سيف" اللي باصص لأثرها باستغراب، البنت.. بلاش بنت.. دي بنت بس بلسان راجل وقح! 
ــــــــــــــــــــــــــــــــــــــــــــــــــــــــــــــــــــــــــــــــــــــــ  
على جانب آخر كانت "نور" بتبص لنفسها مرة أخيرة في المراية ورجعت مكانها، لقت "مهند" جاي لها بعد ساعة وبيقول: 
ـ هندخل دلوقتي. 
قامت تدخل معاه لمكتب المدير اللي كان واسع جدا، وطبعا لازم يكون واسع في شركة مرموقة وكبيرة زي دي. 
بدأت البريزينتشين وهي بتتكلم عن مميزات الحملة ومسارها وايه النهاية المتوقعة للمبيعات بنسبة كام في الميَّة. 
وخلال كلامها اللي خلَا من التوتر بعد الثقة اللي دخلت في قلبها من وجود قائد التيم معاها، و"مهند" كان بيبص لها بهدوء وبطمأنينة، على عكس ملامح المدير اللي كان ملاحظ كل حاجة.. المدير اللي.. كان أبوه. 
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
انضم لجروب التليجرام ( هينزل فيه الرواية كاملة ) اضغط هنا
للانضمام لقناة الواتساب اضغط هنا
↚
ـ "تيا"! دقايق وتكوني في البيت! لازم نروح للدكتور.
ابتسمت بسخرية وهي بتبص للتليفون، بعتت للرقم التاني رسالة بعد ما ركبت التاكسي: 
ـ بس أنا مش "تيا". 
قفلت فونها وهي بتبص لـ"سيف" بابتسامة وبتشاور له وبتقول: 
ـ شكرا على المساعدة يا هندسة، اطلع ياسطا.
واتحرك التاكسي بعيد عن "سيف" اللي باصص لأثرها باستغراب، البنت.. بلاش بنت.. دي بنت بس بلسان راجل وقح! 
ــــــــــــــــــــــــــــــــــــــــــــــــــــــــــــــــــــــــــــــــــــــــ  
على جانب آخر كانت "نور" بتبص لنفسها مرة أخيرة في المراية ورجعت مكانها، لقت "مهند" جاي لها بعد ساعة وبيقول: 
ـ هندخل دلوقتي. 
قامت تدخل معاه لمكتب المدير اللي كان واسع جدا، وطبعا لازم يكون واسع في شركة مرموقة وكبيرة زي دي. 
بدأت البريزينتشين وهي بتتكلم عن مميزات الحملة ومسارها وايه النهاية المتوقعة للمبيعات بنسبة كام في الميَّة. 
وخلال كلامها اللي خلَا من التوتر بعد الثقة اللي دخلت في قلبها من وجود قائد التيم معاها، و"مهند" كان بيبص لها بهدوء وبطمأنينة، على عكس ملامح المدير اللي كان ملاحظ كل حاجة.. المدير اللي.. كان أبوه. 
في خلال ما هي بتتكلم لاحظت الابتسامة اللي ظهرت على وش "مهند"، وكإنه مش مركز في الحملة، بل.. في حاجة تانية! 
خلصت كلامها وهي بتبتسم للمدير اللي كان في الخمسينيات، والتاني بص لها بهدوء أقرب للبرود ورد قال: 
ـ الفكرة ممتازة، بس مش أنا اللي هكون واجهة الحَملة دي. 
استغربت وهي بتفكر، أصل من غير وجوده شخصيا الحملة هتكون ناقصة، وفيه احتمال كبير إنها تفشل، هو قصده ايه وهو عارف مخاطر كلامه دا؟ 
المُدير فجأة بص على "مهند" وقال اللي "مهند" دايما كان عاوز يخبيه: 
ـ ابني هو اللي هيكون فيها. 
"مهند" بص له بصدمة، الحاجة الوحيدة اللي كان بيتهرب منها إنهم يعرفوا إنه ابن المدير، بس "نور" ماجاش في بالها كدا وهي بتكلمه بتقول مبتسمة بتحفيز: 
ـ دا هيكون أفضل إننا نستغل وجه شاب في الحَملة، حضرتك هتبلغه بالموضوع دا قريب؟ لأن زي ما قلت البداية بعد أسبوع واحد. 
ووسط ما المدير بيبص لـ"مهند" ابنه، لقى ملامحه بتنفي إنه يقول لها دلوقتي إن هو ابنه ما دام هي ماعرفتش، وفعلا باباه فهم نظراته وقال لها: 
ـ أكيد هيكون حاضر في جلسة التصوير، ماتقلقيش هو عارف كل التفاصيل. 
وملامح "مهند" قربت تزرقّ من الشحوب، خاصة "نور" مش لازم تعرف.. على الأقل دلوقتي. 
خرجت من المكتب هي و"مهند" وهي بتتنفس براحة وبتقول: 
ـ أنا كنت هموت من الخوف من هدوءه، بحسب الفكرة ماعجبتهوش. 
"مهند" ظهر على وشه ضحكة خفيفة، هي ماتعرفش إنها بتتكلم عن أبوه، مش متخيل صدمتها لما تعرف وهي متغفلة طول السنين دي. 
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
وفي حتة تانية التاكسي وصل البيت أخيرا، فتحت الباب ودخلت للبيت اللي ماكانش مجرد بيت عادي، بل ڤيلا دورين والجنينة واسعة، ودا بيفسر كلامها لـ"سيف".. إن عربيتها غالية! 
خبطت على الباب، وأول ما فتحوا كانت مامتها اللي استقبلتها بغضب وهي بتمسك إيدها: 
ـ "تيا"! ماردتيش عليّ ليه؟ هنفوت ميعاد الدكتور.. غيري هدومك، لازم نروح له. 
التانية بصت لها بحدة وهي بتبعد إيدها وبتقول: 
ـ أنا مش هروح في حتة، وكام مرة قلت لك.. أنا مش "تيا" المتدلعة بتاعتك، أنا "ياسمين" هتفهمي امتى؟ 
الأم بصت لها بدهشة، كل ما الوقت بيعدي كل ما حالتها بتسوء أكتر، عندها اضطراب الهوية التفارقي من سنتين من ساعة ما صاحبتها "ياسمين" ماتت، "ياسمين" اللي كأن روحها عاشت جواها دلوقتي.. 
مامتها ماكانتش ملاحظة أي شيء في بداية المرض، بس حصل في يوم واكتشفت. 
ـــــــــــــــــــــــــــــــــــــــــــــــــــــــــــــــــــــ
قبل سنتين... 
صوت الباب بيتفتح في نص الليل، أم "تيا" اتخضت لأن بنتها لسة مارجعتش.. ونزلت بسرعة تشوف مين اللي دخل.. 
لقتها "تيا" لابسة هدوم عادية وشعبية، بنطلون جينز وبلوزة واسعة ورابطة شعرها.. بصت لها بصدمة ونزلت تشوفها وهي بتقول بصوت عالي: 
ـ أنتِ كنتِ فين وقالقاني عليكِ طول الوقت دا؟ وايه اللي أنتِ لابساه دا؟ 
ماظهرش على وش التانية غير ابتسامة وهي سايباها وماشية، بس أمها ماسابتهاش وهي بتمسكها من ايدها بحدة: 
ـ رايحة فين وسايباني يا "تيا"؟ اخلصي قولي كنتِ فين؟ 
ـ"تيا"؟ "تيا" مين؟ 
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
وبَعد وقت طويل من الشغل "نور" خرجت من أسانسير الشركة ولسة هتمشي لقت "مهند" بينادي عليها، لفت راسها وهي بتبتسم له بهدوء وبتقول بعفوية: 
ـ لو عاوزني في شغل مش هعتّب الشركة دي تاني، أنا اتهدّيت!
مسح بإيده على وشه علشان ماتشفش ابتسامته وهو بيقول: 
ـ لا مش شغل ولا حاجة، كنت شايفك شايلة صندوق فاستغربت. 
"نور" بصت للصندوق اللي بين إيديها وحاضناه بالعافية لا يقع وقالت باستيعاب: 
ـ دا أستاذ "محمد" طلب مني آخدهم وأنا نازلة لـ"عم أمين رئيس الأمن".. فيه حاجة ولا ايه؟
قالتها بترقب لقته في ثانية واحدة خدُه من بين إيديها وقال:
انضم لجروب التليجرام ( هينزل فيه الرواية كاملة ) اضغط هنا
للانضمام لقناة الواتساب اضغط هنا
↚
ـ هوديه أنا، روّحي أنتِ دلوقتي علشان تعبانة.
ما صدقت لبّست المهمة لحد تاني وشكرته ومشيت بس هو نادى عليها فجأة:
ـ "نور"!
لفّت له مرة تانية رغم استغرابها إنه ماقالّهاش "آنسة نور" كعادته، لقته بيقول لها بملامح جامِدة: 
ـ كل سنة وأنتِ طيبة بمناسبة يوم ميلادك. 
ردت عليه ببسمة تعجب:
ـ وحضرتك طيب. 
وبعدين مشيت وهي بتكلم نفسها وبتضحك باستغراب: 
ـ ومالُه قالها كدا ليه؟ هو كان بيهنِّيني ولا بيواسيني بالملامح دي؟ 
رجعت للبيت أخيرا بكل تعب، وأول ما دخلت رمت نفسها على الأنتريه في الصالة زي كل مرة، بس استغربت إن أخوها لسة ماوصلش ومش مسموع له حس في البيت مع إنه بيوصل قبلها دايما. 
دخلت تشوفه في أوضته، خبطت ماردش.. فتحت الباب الدنيا كانت مضلّمة، ظهر على وشها ملامح الشكّ وهي لسة هتفتح النور لقت حد بيمسك إيدها فجأة.. صرخت بكل قوتها وهي بترجع لورا لقت "سيف" بيفتح النور وهو ميّت من الضحك عليها.. 
ـ يا لهوي، شوفي شكلك كان عامل ازاي! 
فضل يضحك وهي مفزوعة، بصت له بغضب وقامت وهي بتجيب المخدات وبتحدفها عليه: 
ـ يا رخم! بقى دي هدية يوم ميلادي؟؟ 
مسك المخدة اللي حدفته بيها وسند عليها على الحيطة وقال بغرور: 
ـ هو فيه هدية أغلى مني في حياتك؟ المفروض تبوسي إيدك وش وضهر على وجودي أصلا. 
ملامحها اتحولت للحدة وهي بتقول: 
ـ تصدق بالله أنا ماربيتكش! شكلك محتاج تتربى بجد! 
ورمت عليه المخدات التانية وهو مش متأثر مهما المخدة تيجي فيه فين مش بيتحرك وبيضحك لها باستفزاز.. 
بعِد فجأة بعد ما هي يئست وراح للمطبخ: 
ـ هروح أجيب العَشا عقبال ما تغيري هدومك، قلت لك احمدي ربنا عليّ أنا مافيش مني اتنين، فين الرجالة اللي بيحضروا أكل لإخواتهم دلوقتي؟ 
"نور" بصت له بطرف عينيها باشمئزاز وهي داخلة أوضتها وماردتش عليه، أول ما قفلت الباب قالت بحدة: 
ـ رخم!! 
وبينما "سيف" في المطبخ بينقل الأكل ابتسم لما لقاها بتصرخ بفرحة وهي خارجة من أوضتها عليه جري وهي بتبص له بصدمة وفرحة: 
ـ أنت لقيت الشنطة دي فين؟ أنت عارف دي بكام؟
قال بلا مبالاة: 
ـ لقيتها على باب جامع فقلت صدقة ليكِ يمكن تعقلي. 
ـ "سيف" ماتهزرش! دي غالية أوي. 
ضحك وهو بيقول لها: 
ـ ما أنتِ اللي داوشاني وعمالة تغني كل يوم عاوزة شنطة جوتشي ولبس شانيل وقرفتيني، فقلت أخلص من قرفك. 
وبكل هوس حضنته فجأة وهي بتقول: 
ـ رغم إنك عيّل رخم ولسة عقلك ماكملش، بس أخويا برضه العيّل اللي عاوز يتربى بحنية.
بص لها باستنكار وقال: 
ـ بعد دا كله وبتقولي عيّل عاوز يتربّى برضه؟ 
ردت عليه باستنكار وهي بتشاور لنفسها: 
ـ مين اللي قالت الكلام الفاحش دا؟ لا عاش ولا كان.. دا أنتَ سيد العيال كلهم. 
حط إيده على وشه بيأس فضحكت عليه وهي بتسرق بطاطس من الأكل اللي حضّره وطلعت تجري على أوضتها.. 
بص لأثرها بدهشة وهو بيكلم نفسه: 
ـ الله يرحمكوا يا بابا ويا ماما، خلفتكم عاقلة أوي. 
ـــــــــــــــــــــــــــــــــــــــــــــــــــــــــــــــــــــ
في مكان تاني.. 
كان "مهند" وصل لبيته بعد ما كان آخر اللي روّحوا من الشغل، لقى عربية سودا مستنية قدام العمارة فعرف بتاعة مين.. وتوقع اللي هيحصل، طلع لشقته.. فتح الباب ودخل.. كان أبوه مستنيه جواها في أوضة الضيوف.. ضحك أول ما سمع صوت كرتون توم وجيري.. 
راح لأوضة الضيوف لقى أبوه مستجمّ فيها وجايب أكل جاهز وقاعد بياكل تسالي، ضحك وقال له بعتاب وهو بيهزر: 
ـ من غيري يا أبو حميد؟ دا حتى بيننا توم وجيري وسَهَرات من ورا الحاجّة! 
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
انضم لجروب التليجرام ( هينزل فيه الرواية كاملة ) اضغط هنا
للانضمام لقناة الواتساب اضغط هنا
↚
في مكان تاني.. 
كان "مهند" وصل لبيته بعد ما كان آخر اللي روّحوا من الشغل، لقى عربية سودا مستنية قدام العمارة فعرف بتاعة مين.. وتوقع اللي هيحصل، طلع لشقته.. فتح الباب ودخل.. كان أبوه مستنيه جواها في أوضة الضيوف.. ضحك أول ما سمع صوت كرتون توم وجيري.. 
راح لأوضة الضيوف لقى أبوه مستجمّ فيها وجايب أكل جاهز وقاعد بياكل تسالي، ضحك وقال له بعتاب وهو بيهزر: 
ـ من غيري يا أبو حميد؟ دا حتى بيننا توم وجيري وسَهَرات من ورا الحاجّة!
أبوه لف وشه ليه وهو بيضحك: 
ـ ادخل يا عم، وحشتني القعدة معاك. 
وعلى عكس الوش الجامد اللي بيظهره دايما بسبب أم "مهند" اللي معروفة بصرامتها، وعاوزة كل حاجة تمشي على مزاجها.. 
كان أبوه هنا بيرتاح وبيعمل اللي هو عاوزه وبيظهر على طبيعته. 
"مهند" قعد جنبه بهدوء فأبوه لف له وقال له بشك وهو بيبتسم: 
ـ صحيح، البنت اللي شفتها النهاردة دي.. كان اسمها ايه.. ايه!!
التاني بص له باهتمام وهو بيفكره: 
ـ قصدك "نور". 
ولسة الابتسامة الخبيثة على وش أبوه وهو بيقول له: 
ـ احكي لي بقى. 
"مهند" استغرب وقال: 
ـ أحكي لك ايه؟ 
ـ ايه اللي شدّك فيها خلّى نظراتك فاضحاك بالشكل دا؟ 
التاني حاول يتوّه الموضوع وهو بيقول بلا مبالاة: 
ـ قصدك ايه مش فاهم؟ 
أبوه ضربه على راسه بخفة والتاني اتصدم، الأب قال لـ"مهند": 
ـ هتعمل لي فيها عبيط؟ ما تنجز اتكلم أنت عارف مفيش حاجة بتستخبى عني، ايه اللي عاجبك فيها. 
بعد ما تعافى من آثار الصدمة من الضربة المفاجأة، رد عليه بهدوء:
ـ كل حاجة، حيويتها والبهجة اللي بتوصلها لكل اللي تقابله، شغفها في الشغل واهتمامها بكل تفصيلة، ضحكتها لما بتفرح.. حتى عينيها كا..
ـ خلاص هترغي كتير! عرفت إنك ميت فيها، وايه اللي مانعك يا خويا تاخد خطوة ما دام مُتيم كدا؟ 
رغم انزعاجُه من فصلات أبوه ليه لما بيفكر فيها، اتنهّد تنهيدة أظهرت كل إحباطُه.. أبوه أخد الموضوع بجدية وهو بيقول: 
ـ متجوزة؟ 
ـ لا. 
ـ معاها عيال؟ 
ـ لا. 
ـ مطلقة؟ 
ـ لا. 
ـ أرملة ولا ايه؟ 
ـ لا إله إلا الله، بتفوّل على البنت ليه هحرّم أتكلم معاك. 
ـ أومال ايه اللي مانعك تنجرّ تُخطبها يا مُتخلف؟؟؟ 
ـ شفت خطيبها قدام الشركة بعد ما مشيت من جنبها، وشكله كان غيران عليها مني علشان كنت جنبها.. 
أبوه اندهش وهو بيقول: 
ـ خطيبها؟ هي مخطوبة؟ 
و"مهند" بكل ضيق رد وقال وهو بيلعب في شعر أبوه بغضب: 
ـ ولقيتها بتصالحه وهي بتلعب في شعره كدا هو.. 
أبوه بعَده عنه بسرعة وهو بيقول بصدمة: 
ـ أنت شكلك اتجننت، ماتلمسش شعري تاني. 
رد عليه بضيق وهو بيهمس: 
ـ على أساس إنك عندك شعر أوي! 
أبوه سمعه وهو بيقول بوعيد: 
ـ بتقول ايه؟ 
"مهند" نفى براسه، وأبوه قال له بجدية بعد ما فكر: 
ـ بس أنا حسيتها محترمة، ازاي خطيبها وبتلمسه وكمان في وسط الشارع! 
وبكل حدة "مهند" دافع عنها: 
ـ لا.. دي محترمة جدا.. دي مابتتكلمش معايا غير السلام عليكم وعليكم السلام! أنا مش مصدق أساسا إنها عملت كدا.. أكيد غصبًا عنها. 
وبكلّ الشكوك اللي في الدنيا أبوه بص له، وأخد تليفونه فجأة.. 
ـ طلّع لي رقمها.
ـ رقمها؟ ليه؟ 
انضم لجروب التليجرام ( هينزل فيه الرواية كاملة ) اضغط هنا
للانضمام لقناة الواتساب اضغط هنا
↚
أبوه بص له بصة خلته يفتح التليفون في ثانية وطلع رقمها، وأبوه رنّ عليها، "مهند" اتصدم وهو بيقول: 
ـ بتعمل ايه يا بابا؟؟ ليه كدا؟
ـ لازم نتأكد دا خطيبها فعلا ولا لا. 
التاني مالحقش يرد إلا ولقاها فتحت: 
ـ آلو، أستاذ "مهند"؟ 
أبوه دبسه وعطاه التليفون فهو رد بتردد: 
ـ آه.. آلو يا آنسة "نور"، ازيك عاملة ايه؟ 
ردت عليه باستغراب: 
ـ الحمد لله بخير، فيه حاجة ضرورية ولا ايه؟ حضرتك مارنتش عليّ قبل كدا. 
ماعرفش يرد يقول ايه فاخترع جملة فجأة: 
ـ كنت هقول لك كل سنة وأنتِ طيبة، مش يوم ميلادك النهاردة برضه؟ 
استغرابها زاد وهي بتبتسم وبتقول: 
ـ آه، بس أنت قلتِ لي قبل كدا في الشركة، شكل حضرتك نسيت. 
حط إيده على بقه وهيموت ويعض حد من كُتر التوتر فضحك بسماجة وقال: 
ـ آه.  شكلي نسيت معلش، معلش عطلتك تلاقي خطيبك معاكِ دلوقتي. 
ـ خطيبي؟ 
ـ آه، مش خطيبك اللي جه آخر مرة للشركة دا؟ سلمي لي عليه. 
قالها وهو بيعافر الغلّ اللي جواه على أبوه إنه خلاه يضطر يقول كدا. 
ـ آه اللي جه الشركة، بس دا أخويا مش خطيبي، أنا لسة ماتخطبتش. 
بُقه وقع من الصدمة ونسي يرد عليها وهو بيبص لأبوه، لقى التاني بيضربه على رجله يفوقه علشان يرد فاتأوه من الضربة.. "نور" قالت بقلق: 
ـ حضرتك تعبان ولا ايه؟ 
كتم بقّه وهو بيشتم نفسه على اللي عملُه، وقال: 
ـ رجلي بس اتخبطت في ترابيزة بجحة وقليلة الأدب. 
قالها وهو بيبص لأبوه اللي بص له بصدمة ومسكه من ودانُه فكتم تأوهه ورد عليها، أكيد مصدومة دلوقت: 
ـ آسف لازم أقفل، سلام. 
قفل بسرعة وبص لأبوه بغضب، اللي ساب ودانه وهو بيقول برفعة حاجب: 
ـ ترابيزة بجحة.. وقليلة أدب كمان؟ 
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
كانت "نور" بتحط التليفون على الترابيزة وهي بتبتسم باستغراب، و"سيف" جنبها راقد على الكنبة بيسمع التليفزيون، وقال لها: 
ـ دا زميلك؟ كان عاوز ايه؟ 
قالت بلا مبالاة: 
ـ كان بيقول لي كل سنة وأنتِ طيبة، على عكسك أول ما دخلت وقفت قلبي، دا أنا حاسة إن طلعت لي شعراية بيضة من الخضة. 
وكالعادة التاني ماردش عليها وهو مشغول بمتابعة الماتش، قالت له بضيق: 
ـ ما تشغل لنا حاجة عدلة بقى، نفسي أفهم ايه فايدة الماتش لما أنت كدا كدا هتعرف النتيجة في النهاية! 
لف لها راسه وقال باستفزاز: 
ـ نفسي برضه أفهم ايه فايدة سماع المسلسلات لما ممكن تشوفي آخر حلقة وخلاص؟ 
أقنعها وكبتها فسكتت غصب عنها. 
قالت وهي بتكلم نفسها: 
ـ أنا عاوزة أتجوز ثري عربي. 
"سيف" سمعها فقال: 
ـ مفيش أجدع من المصريين، ادعي بواحد مصري. 
غيرت رأيها في ثواني وهي بتقول: 
ـ عندك حق، يا رب أتجوز ثري مصري. 
التاني لف لها راسه باستفزاز وهو بيقول: 
ـ ثري؟ آدي دقني أهي هحلقها لو اتحققت الدعوة. 
ـــــــــــــــــــــــــــــــــــــــــــــــــــــــــــــــــــــــــــــــــــــــــــــ
انضم لجروب التليجرام ( هينزل فيه الرواية كاملة ) اضغط هنا
للانضمام لقناة الواتساب اضغط هنا
↚
ـ ما تشغل لنا حاجة عدلة بقى، نفسي أفهم ايه فايدة الماتش لما أنت كدا كدا هتعرف النتيجة في النهاية! 
لف لها راسه وقال باستفزاز: 
ـ نفسي برضه أفهم ايه فايدة سماع المسلسلات لما ممكن تشوفي آخر حلقة وخلاص؟ 
أقنعها وكبتها فسكتت غصب عنها. 
قالت وهي بتكلم نفسها: 
ـ أنا عاوزة أتجوز ثري عربي. 
"سيف" سمعها فقال: 
ـ مفيش أجدع من المصريين، ادعي بواحد مصري. 
غيرت رأيها في ثواني وهي بتقول: 
ـ عندك حق، يا رب أتجوز ثري مصري. 
التاني لف لها راسه باستفزاز وهو بيقول: 
ـ ثري؟ آدي دقني أهي هحلقها لو اتحققت الدعوة. 
ــــــــــــــــــــــــــــــــــــــ
في اليوم التاني في الشركة كانت "نور" تعبانة وهي عمّالة ترنّ على أرقام كتير علشان تحجز مواقع لتصوير إعلانات الحَملة. 
و"مهند" جه متأخر على غير عادته وأول ما دخل ابتسم بسمة واسعة وهو بيشاور لها وبيقول: 
ـ صباح الخير، عاملة ايه؟ 
شكل مزاجُه حلو أوي النهاردة، ابتسمت ليه وقالت بهدوء: 
ـ الحمد لله في زحام من النعم، ايه سر الانبساط دا؟ ربنا يديمه! 
سكت وهو مش عارف يقول ايه بس ابتسامته وسعت وهو نفسه يقول لها، إن دا بسبب مكالمته ليها امبارح وكلمة واحدة خليته يرجع لمزاجه الحلو.. أخوها!! مش خطيبها المزعوم! 
و"تيا" كمان قطعت علاقتها بيه، فيه يوم أحسن من كدا علشان يبقى مبسوط؟
قعد في مكتبُه وهو مُصر إنه بمجرد ما يكشف عن سرّه إنه ابن مدير الشركة آخر الأسبوع، هيصارحها ويطلب ميعاد علشان يتقدم لها رسمي، وبيتمنى تقبل بيه. 
كان برغم انشغاله بمكتبه إلا أنه كل شوية بيرفع نظرُه ليها كأنه بيتطمن عليها، لاحظ إرهاقها الشديد وهي مركزة جدا في الشغل بس وشها أصفر، قلق عليها ولسة هيقوم من مكانه يكلمها ترتاح لولا إنها قامت بسرعة تجري للحمام وهي ماسكة بُقها. 
كان مصدوم وكل زمايلها لاحظوا اللي حصل وواحد منهم قال: 
ـ هي تعبانة؟ شكلها مش كويسة. 
واحد تاني رد عليه بهدوء:
ـ من امبارح وأنا ملاحظ وشها أصفر، لما تيجي نبقى نتطمن عليها.
قلق "مهند" زاد وهو لسة واقف مكانُه، زمايله استغربوا وقفته: 
ـ فيه حاجة يا "مهند"؟ 
ماردش عليهم وكأن نطقهم لاسمه فوّقه وطلع وراها بسرعة، واقف قدام حمامات النساء وكل لما تيجي بنت من الشركة يحس بإحراج ويخبي وشه علشان مستني كدا. 
جات له فكرة وهو بيدخل حمام الرجالة وحاطط ودانه على الباب علشان لما يسمع صوتها وهي بتطلع يروح وراها يتطمن عليها. 
ـ بيعمل ايه دا؟ بتعمل ايه يا جدع أنت؟؟ 
"مهند" لفّ راسه للصوت لقى فيه راجلين باصين عليه باستغراب وهم بيتوضّوا علشان صلاة الظهر، كانوا مستغربين ودانه اللي لازقة في الباب كأنه مستخبي ولا عامل عَملة..  
اتكلم وهو بيدافع عن نفسه وبص لهم بإحراج: 
ـ احم.. أنا جاي أتوضى بس. 
راح بالفعل وهو بيتوضى بالرغم إنه متوضي بالفعل من شوية قبل الأذان بس عاد الوضوء مرة تانية، خلّص وكان لازم يخرج برة، أول ما فتح الباب لقاها برة ساندة على الحيطة ومغمضة عينيها وبتمشي بالراحة، 
وشّها وطرحتها متغرقين ميّاه. 
اتحرك قدامها بسرعة وهو بيقول بقلق: 
ـ "نور" أنتِ كويسة؟ 
ناداها من غير لقب "آنسة" بدون وعي، وهي ماكانتش عندها الرفاهية إنها تركز في دا دلوقتي، رفعت نظرها ليه، كانت عينيها حمرا وهي بتقول: 
ـ هبقى كويسة كمان شوية، صداع شديد بس. 
استدرك كلامها وهو بيقول بسرعة: 
ـ هنزل أجيب لك دوَا بسرعة أو مسكن، عاوزة حاجة من تحت؟ 
نفَت براسها وهي بتقول بضعف: 
ـ ماتتعبش نفسك، معايا مسكن الصداع في الشنطة. 
نادى بنت من الواقفين تساندها لحدّ مكتبها، وهو نازل تحت يجيب لها حاجة تاكلها وتشربها، وأول ما تيجي هيخليها تروّح علشان مش هتقدر تكمل اليوم كدا. 
طلع بعد شوية وهو بيدور عنها بعينيه، كانت في مكتبها ساندة راسها عليه وشبه نايمة، قرب من مكانها وهو بيحط شنطة قدامها وبيصحيها بهدوء: 
ـ آنسة "نور"؟ يا آنسة؟ 
رفعت راسها اللي كانت حاسة إنها بتُقل الجبل بتبص له بترقّب، شافت الشنطة اللي جابها فقالت بعدم رضا: 
ـ قلت لك ماتتعبش نفسك، ماسمعتش كلامي ليه؟ 
ماردّش عليها وقال لها كأنه بيؤمرها: 
ـ كُلي بس وفوّقي نفسك كدا، ايه اللي تعبك للدرجة دي؟ 
واحد من التيم ميّل على زميله وهو بيقول بضحكة خبث:
ـ ايه اللي بيحصل قدام عينيّ دا؟
زميله ميّل عليه أكتر وهو بيقول بهمس:
ـ شكله واقع خالص. 
انضم لجروب التليجرام ( هينزل فيه الرواية كاملة ) اضغط هنا
للانضمام لقناة الواتساب اضغط هنا
↚
وكانت"نور" ساعتها بترد عليه بتعب: 
ـ كنت سهرانة طول الليل مع أخويا وشكلي لغبطت في الأكل، هبقى كويسة كمان شوية، المسكّن عمل مفعول. 
رفض بقوة وهو بيساعدها تلم حاجاتها في الشنطة وبيقول: 
ـ لازم تروّحي، أنتِ مش كويسة، ارتاحي النهاردة بس. 
كان كلامه ليها كأنه جردل مياه ساقعة وقع عليها في عز الشتاء، تروح؟ وهي اللي ماغابتش ولا يوم ولا أخدت أجازة قبل كدا غير علشان أخوها لما عمل عملية وكانت بتهتم بيه؟؟
و"مهند" عارف هوسها بالشغل ومع ذلك كان لازم يوقفها عند حدّها لما تهمل صحتها للدرجة دي. 
ـ لا، أنا فُقت فجأة وبقيت زي الفل. 
قالتها وهي بتنشط فجأة وبتاخد الورق اللي شايلُه بين ايديه وبتركز في الشغل تاني وبتراجعهم، بص لها بحدة غريبة وهو بيقول: 
ـ بقول لك هتروّحي، أنتِ ليه مش مصدقة إنك تعبانة؟ 
استغربت صوته اللي عِلي فجأة، وهي بتعقد حاجبيها وبتقول بعدم رضا عن كلامه وصوته العالي: 
ـ وحضرتك دا شغلي وإرادتي، شكرًا لاهتمامك بس ماسمحلكش ترفع صوتك عليّ بشكل غير مبرَّر. 
اللي من التيم وميّل على صاحبه قبل كدا عملها تاني وهو بيقول بذهول: 
ـ احنا حسدناهم ولا ايه؟ 
ـ شكلها كدا يا وش السعد. 
ـــــــــــــــــــــــــــــــــــــــــــــــــــــــــــــــــــــــ
عدّت أيام بينهم بجمود من ساعة التاتش اللي حصل بينهم، "مهند" مش فاهم ليه عملت كدا وهو بس كان بيهتم بيها، أنّب نفسه إنه رفع صوته عليها بدون وعي، ماكانش يقصد بس لا زال غلطان. 
وهي متضايقة من ساعتها وكل التعاملات معاه بقت من خلال حد تاني بيوصل له أوراقها، ومابقاش فيه أي معاملة خاصة بينهم الاتنين. 
والنهاردة جه يوم تصوير الإعلان، والمفروض باباه يعلن إنه هبكون الوجه الشاب في الإعلان دا، هتكون صدمة للكل، وخايف "نور" تزعل أو تتصدم إمها ماقالهاش قبل كدا.. خايف على مشاعرها؟ جدا.. جدا. 
بس هي هتهتم ليه وهي متضايقة منه أصلا؟ 
الكل اتجمع والكاميرات جاهزة، والمفروض دلوقتي في انتظار ابن المدير، "نور" بصت بضجر وهي بتقول: 
ـ مالُه أخر كدا ليه؟؟ هو نسي؟ 
سمعت صوت المدير من وراها وهو سمع كل اللي بتقوله: 
ـ بيجهز، أصل الموضوع مش سهل برضه. 
اتصدمت إنه سمع كلامها وتأففها، وهي بتلفّ بابتسامة متوترة حاولت تخبيها، لقت المدير ابتسم لها بهدوء وكأنه بيطمنها إنه عادي. 
ـ هرنّ عليه دلوقتي. 
قالها وهو بيرفع موبايلُه وبيبتسم بخبث وبيرفع حاجبه وهو بيبص على "مهند" اللي قصاده بعيد باستفزاز، وكان "مهند" مستغرب مش فاهم فيه ايه.. 
فجأة صوت موبايل "مهند" طلع في المكان وهو بيطلعه يشوف مين، كان باباه.. اتصدم وهو بيبص له وبيبلع ريقُه، باباه جنب "نور" دلوقتي! وهو وسط ناس كتير! 
قفل في وشه وهو بيعمل موبايله صامت راح باباه بص بحدة وهو بيقول لـ"نور": 
ـ قليل الأدب قفل في وشي. 
ابتسمت "نور" بتبرير: 
ـ يمكن يكون جاي في السكة وقرب يوصل فماردش عليك.
رد عليها وهو بينفي وملامحه كانت حادة: 
ـ لا، هو قليل الأدب.. دا أنا اللي مربيه. 
"مهند" جه فجأة من بعيد وهو بيبتسم لـ"نور" بهدوء بيخفي توتره وهو بيجر باباه وراه على جنب تحت صدمة التانية من اللي بيعمله! دا بيجرّ المدير بالطريقة دي كأنه عيّل صغير؟ 
ـ عاوز ايه مني؟
رد باباه عليه وهم بعدوا ماحدش سامعهم: 
ـ مش هنخلص تصوير النهاردة ولا ايه؟ ولا أنت عاوز الحَملة تفشل؟ 
ـ مش جاهز أنا دلوقتي. 
ـ مستني اللحظة المناسبة؟ مافيش لحظات مناسبة يالَا فوق معايا، اخلص روح بنفسك وإلا وربّي لأقوم دلوقتي أقول لهم كل حاجة، أنا مش جاي هنا أستنى دا كله وأتهزق.
"مهند" اتكتم، وراح غصب عنه وهو بيجز على أسنانه من الغصب اللي فيه، راح لـ"نور" بالذات اللي استغربت وهي بتقول: 
ـ نعم يا أستاذ "مهند" فيه حاجة؟
ـ يلا هنبدأ تصوير. 
قالها بسرعة وهو مداري سنانه اللي بتاكل في بعضها من كتر ما بيجز عليها، بصت باستغراب وهي بتقول: 
ـ احنا صورنا كل المشاهد فاضل لما ييجي ابن المدير ويظهر، أنا مش عارفة قال لي اسمه ايه، وماعييش رقمه حتى أستعجله. 
قالتها بضيق وهي بتبص في الأرض، وهو قبل ما تتكلم قال: 
ـ بس ابن المدير جه. 
رفعت راسها بصدمة وهي بتلف عينيها في كل مكان:
ـ جه؟ فين دا؟ ماحدش قال لي حتى! 
ـ أنا.. أنا ابن المدير. 
ــــــــــــــــــــــــــــــــــــــــــــــــــــــــــــــــــــــــــــــــ
انضم لجروب التليجرام ( هينزل فيه الرواية كاملة ) اضغط هنا
للانضمام لقناة الواتساب اضغط هنا
↚
ـ يلا هنبدأ تصوير. 
قالها بسرعة وهو مداري سنانه اللي بتاكل في بعضها من كتر ما بيجز عليها، بصت باستغراب وهي بتقول: 
ـ احنا صورنا كل المشاهد فاضل لما ييجي ابن المدير ويظهر، أنا مش عارفة قال لي اسمه ايه، وماعييش رقمه حتى أستعجله. 
قالتها بضيق وهي بتبص في الأرض، وهو قبل ما تتكلم قال: 
ـ بس ابن المدير جه. 
رفعت راسها بصدمة وهي بتلف عينيها في كل مكان:
ـ جه؟ فين دا؟ ماحدش قال لي حتى! 
ـ أنا.. أنا ابن المدير. 
كانت بتحسبه بيهزر فرفعت عينيها بتبص له ونظرتها بتقول (هتهزر معايا)، ونظرتها ماكانتش ودودة بالمرة وبعدين قالت له: 
ـ مش وقت هزار يا أستاذ "مهند" الله يكرمك. 
بص لها بعدم تصديق، دي مش مصدقاه؟؟ اه طبعا ما هي ازاي هتصدقه وهو بيتعامل لمدة 3 سنين مع باباه كأنه المدير قدامها.. كانوا بيمثلوا كويس ساعتها!! 
بس دلوقتي بص لها بضيق وهو بيقول: 
ـ بقول لك أنا ابن الراجل اللي واقف هناك دا، مهند أحمد البحيري. 
ماصدقتش غير لما رفع بطاقته ليها بيأس وهو بيتنهد، في حين هي كانت باصة له بدهشة ومستنية أي حاجة تقول إنه بيهزر، هي كانت مغفلة طول الفترة دي؟ أكبر تغفيلة في حياتها كان هو! "مهند" ابن المدير بجد! 
أبوه قرّب فجأة وهو بيبص لـ"نور" بودّ وبيقول: 
ـ هنبدأ يا آنسة التصوير؟
بصت لهم الاتنين وهي بتحاول تستخرج الشبه بينهم، "مهند" بعينيه السّود وشعره الفحمي، بشرته قمحية ولايقة عليه، على عكس "أحمد البحيري" عينيه واسعين بلون عسلي وماعندوش شعر كافي علشان تقارن بينه وبين شعر "مهند".. وايه التشابه بينهم في الآخر؟ ابتسامتهم الهادية وهم باصين لها كدا وهي مصدومة.. بيتريقوا عليها ولا ايه؟ 
ـ مقلب دا طيب؟ ابنك ازاي دا يا حاجّ بس؟ جايبه من ملجأ؟ 
قالتها بدون وعي وهي مذهولة لما شافت ملامحهم وأدركت إنها فكرت بصوت عالي، كان "مهند" ظاهر عليه الدهشة بينما أبوه بيضحك عليها كأنها قالت نكتة وهو بيرد عليها: 
ـ مافيش في وسامتي، صعبة تتورث دي. 
كان نفسها تبتسم باستهزاء وتقول له إن ابنه هو اللي وسيم بس سكتت فجأة لما أدركت هي بتفكر في ايه، شافت المدير حط إيده على كتف "مهند" وهو بيقول: 
ـ دا ابني الوحيد، خلي بالك عليه يا آنسة "نور" لا أحسن يفلت من التصوير علشان مكسوف الباقي يعرفوا حقيقته. 
ماشي، هي دلوقتي مش هتتكلم ولا كلمة، وهتتجاهل نغزة "مهند" لأيوه قدامها دلوقتي، تجاهلتهم الاتنين وهي سايباهم ومشيت، كانوا بيحسبوها ااجننت من الصدمة لولا إنهم سمعوا صوتها العالي وهي بتنبههم: 
ـ ابن المدير وصل، هنبدأ في 5 دقايق يا شباب. 
وبعد ما قالت جملتها كشفت عن هوية "مهند" وسط الكل وهي بتقول كأنها بتتشفى فيه بعد ما عرفت إنه بيتكسف من معرفتهم لهويته: 
ـ الأستاذ "مهند أحمد البحيري" نجل الأستاذ "أحمد البحيري" يتفضل على الساحة. 
و"مهند" اللي كان لسة في صدمته والكل عمال يتكلم بدهشة، أبوه خبطه وهو بيشجعوا يروح لمكان "نور" (على الساحة زي ما قالت كأنها بتناديه لساحة القتـال). 
ــــــــــــــــــــــــــــــــــــــــــــــــــــــــــــــــــــــ
ـ يا "سيف" طلع ابن مدير الشركة وأنا متغفلة بقى لي 3 سنين! هو اللي كويس في التمثيل ولا أنا اللي عبيطة؟ 
وبدون ذرة تردد رد "سيف" عليها بلا مبالاة: 
ـ أنتِ اللي عبيطة، الراجل جايب عربية بـ13 مليون وأنتِ جاية تقولي لي ماتعرفيش؟ ناقص يقول لك إنه ابن وزير علشان تحسي إنه مش شخص عادي. 
نظرت له فجأة بسرعة وهي بتقول لما سمعت سعر العربية: 
ـ قول اللهم بارك، أعوذ بالله من عينيك تلاقيها طقّت دلوقتي! 
رفع حواجبه وهو بيقول لها بتقزز: 
ـ وأنا أبص لعربيته ليه مثلا؟ ما أنا عندي الغالية اللي ماعنديش أغلى منها في الدنيا دي. 
ختم كلامه وهو بيبص من شباك أوضة "نور" على حبيبته اللي راكنها تحت وكأنه بيوعدها إنه مش هيسيبها مهما عفي عليها الزمن. 
ــــــــــــــــــــــــــــــــــــــــــــــــــــــــــــ
في مكان تاني عند "مهند" ماكانش فاهم ايه اللي بوظ عربيته وخرم إطاراتها لدرجة إنه كان هيعنل حادثة لولا إنه ركنها بخبرة على جنب لحد ما يجيب الونش، علشان دا مش كاوتش واحد اللي باظ في العربية.. دول.. تلاتة. 
ضرب العربية برجله بضيق وهو بيقول: 
ـ هي عين راجل أعمى باصص في حياتي، لا عارف أتهنى على حبّ ولا مال. 
ما طبعا لازم يحصل! مش كفاية إن "نور" ماعاطاتكش وشّ النهاردة وطنّشتك وروّحت قبل حتى ما تقول لها على طلبك إيدها للجواز! 
ــــــــــــــــــــــــــــــــــــــــــــــــــــــــــــــــــــــــــــــــ
في الأيام اللي بعدها الدنيا اتغيرت، زمايله مابقوش شايفينه قائد التيم بل بقى بالنسبة لهم ابن المدير اللي المفروض يحترموه ومايفكروش يحتكوا بيه. 
إلا هي أول ما جه حطت قدامه ورق وهي بتقول له بهدوء مش مبين هي بتفكر في ايه: 
ـ دي أوراق صفقتنا مع الشركة الناشئة اللي المفروض نتعاقد معاها آخر الشهر، راجع الشروط وبلّغ المدير علشان الميتينج، وميعاد فعالية الشركة لحملة التبرعات الخيرية قرب. 
وبمجرد ما خلصت كلامها سابته قاعد في مكتبه ومشيت رجعت لمكتبها قدامه على بُعد منه، ماقدرش يفهم جمودها والكل باصص لهم بريبة وهم ملاحظين حاجة غريبة بتحصل. 
انضم لجروب التليجرام ( هينزل فيه الرواية كاملة ) اضغط هنا
للانضمام لقناة الواتساب اضغط هنا
↚
و"نور" ماكانتش مهتمة إذا كان ابن مدير أو غيره، في خلال التلت سنين اللي فاتوا بذلت جهدها علشان توصل للي هي فيه دلوقتي بعد ما كانت معدومة الخبرة، ومع أول حَملة ليها الكل توقع فشلها بس هي فاجأتهم لما دخلت للشركة ملايين من خلال أفكارها اللي برة الصندوق. 
وآدي حَملة كمان علشان تسوّق المنتج الجديد وتعزز وجوده في السوق، ومش ابن مدير اللي هيخوفها بمنصبه المفاجئ ليها!
خلص اليوم من غير أي اشتباكات وجه ميعاد المرواح، كانت الساعة دخلت على 8 وهي أخرت في الشغل ساعتين زيادة وكدا هتروح متأخر لأخوها اللي تلاقيه مستنيها دلوقتي. 
فتحت موبايلها ولقت مكالمات كتير من "سيف"، رنت عليه ولسة مابدأتش تتكلم ولقته بيصرخ في وشها: 
ـ دا كله برة البيت يا "نور"؟ ماجيتيش من بدري ليه؟ 
كانت لسة هتبتسم إنه خايف عليها وهتستفزه لولا جملته التانية وهو بيقاطعها: 
ـ هموت من الجوع، أنتِ نسيتِ إن أنتِ اللي عليكِ العَشا؟ 
بعدت الموبايل عن ودانها وهي بتبص له بحدة وقالت: 
ـ تصدق أنك عيل مايهمكش غير مصلحتك! 
ـ غلط! هو ايه اللي عيل مايهمنيش غير مصلحتي؟ أنا آه بمشي ورا  مصلحتي بس أنا مش عيّل! 
ـ لا والله؟ طب شوف مين هيعشّيك بقى، عندك إيدين ورجلين اعمل الأكل بيهم، ولا روح اتجوز لك خدامة.. سلام! 
قفلت في وشه بضيق وهو دايما بيستفزها بكلامه، المفروض عربيتها تكون متصلحة دلوقتي ولازم تعدي علشان تاخدها، بس مش الليلة دي. 
فتحت موبايلها نذلب أوبر بس سمعت صوت فجأة من وراها: 
ـ آنسة "نور"! 
لفّت راسها ليه، ما طبعا لازم يتأخر في الشغل، مش ابن المدير؟ 
ـ كنت مفكراك مش هتروّح بعد ما قعدت عند المدير ساعة! 
قالتها كدا بصراحة وماحاولتش حتى تجمّل الجملة، وهو اللي اتفاجأ وهو بيبص لها بتبرير: 
ـ كنت بتناقش معاه في الفعالية اللي بعد تلت أيام وتفاصيلها. 
ـ ماسألتش. 
بص لها باستنكار وبُقّه مفتوح مش عارف يرد عليها بإيه وهي بتكلمه بوقاحة عكس ما بتتكلم دايما، قال لها برفعة حاجب: 
ـ ملاحظ إنك بقى لك كام يوم متضايقة، أنا عملت حاجة زعلتك؟ 
نَفت بسرعة وهي بتحاول تصطنع الاحترام بسخرية: 
ـ حاشا، ازاي أزعل من ابن المدير بس؟
يبقى دا هو السبب اللي مزعلها!! علشان حست إنها متغفلة! 
وهي كانت بتفكر، هي ليه متضايقة منه بدون سبب؟ دا حاجة ما بينه هو وأبوه وفي حياته وبراحته، هي مالها؟ وليه حاسة بإحساس الخيانة إنها ماكانتش تعرف؟ مش هي دايما اللي مش بيفرق معاها حد في المكان دا غير الشغل ومش مهتمة بحياة حد غير نفسها؟ مالها بقى بيه دلوقتي؟ 
ـ عاوز أكلمك في موضوع.. 
قال كللمته فجأة بهدوء وهو بيلمح ملامحها بتخفت وبتهدأ أكتر، لفت راسها ليه بترقب وعينيها فضولية تعرف عاوز يقول لها ايه، وهو اللي كان مستني الوقت المناسب بس لازم يعرف إن مفيش حاجة اسمها وقت مناسب إلا لو عمله هو، مش هيستني ييجي راجل يكون خطيبها بجد وبعد كدا ياكل صوابعه من الندم: 
ـ عاوز رقم والدك. 
اتفاجأت، ماكانتش متوقعة النوع دا من المواضيع، بس واضح إنه بيتكلم بجد فمش لازم تتريق دلوقتي وهي بترد عليه بجدية: 
ـ والدي؟ ليه؟ 
"مهند" حارب نفسه وهو بيرمي كلامه في وشها، مش مهم ازاي المهم يوصل لها معناه: 
ـ عاوزك. 
ـ نعم؟؟؟ 
وشها كله بقى عبارة عن علامة استفهام كبيرة وهي باصة له بصدمة، فيحين إن هو استوعب فجأة اللي قاله فعدّل كلامه بسرعة: 
ـ قصدي.. عاوز أطلب إيدك. 
ودي كانت صدمة أعمق من اللي قبلها كأنها اتصعقت وهي بتحاول تفلتر الكلام في دماغها وتستوعبه، و"مهند" لما شاف صدمتها قال وهو بيحكّ قفاه بتردد: 
ـ من زمان كنت مستني الوقت المناسب علشان أقول لك، بس.. مالقيتش وقت أنسب من دا. 
حصل، شادّين مع بعض آخر مرة غير إنها متضايقة منّه، مفيش وقت أنسب من كدا علشان يتأكد من موافقتها. 
وفوق دا كله مايعرفش حاجة عنها غير اسمها وإن عندها أخ، مايعرفش إن باباها ومامتها مابقوش موجودين في عالمهم. 
كانت ضربات قلبها عالية وهي أول مرة تفكر فيه كرجل خارج إطار الشغل، ماكانتش عارفة ترد عليه، قاطع كلامهم فجأة عربية جات قدامهم بسرعة ووقفت، أول ما "مهند" بص للي قاطع كلامهم اتصدم وهو بيقول: 
ـ "تيا"؟ 
التانية بصت له بسخرية وهي في العربية لابسة لبس رجالي وهي بتقول: 
ـ بونسوار يا أبو عيون سُود، "تيا" في أجازة النهاردة وأنا عاوزاك في موضوع. 
كانت "نور" مرة تبص على "مهند" ومرة تبص على البنت التانية اللي فاردة شعرها بيطير وراها بجموح، ماكانتش فاهمة مين دي؟ وايه اللي جابها دلوقتي. 
شهقت بصوت مسموع لفت أنظارهم ليها، وهي بتستوعب الاستنتاج اللي جابه عقلها وهي بتقول لـ"مهند": 
ـ أنت مصاحب بنات؟؟ 
ــــــــــــــــــــــــــــــــــــــــــــــــــــــــــــــــــــ
انضم لجروب التليجرام ( هينزل فيه الرواية كاملة ) اضغط هنا
للانضمام لقناة الواتساب اضغط هنا
↚
شهقت بصوت مسموع لفت أنظارهم ليها، وهي بتستوعب الاستنتاج اللي جابه عقلها وهي بتقول لـ"مهند": 
ـ أنت مصاحب بنات؟؟
عينيه وسعت بذهول من اللي هي بتفكر فيه وهو كان هيصحح لها لولا إن "تيا" قالت بسخرية: 
ـ دا يمسك نار ولا يفكّر في بنت، معدنه صالح بس غبي. 
التاني مش ملاحق عليهم الاتنين، كل شوية واحدة تصدمه بكلامها، بص لـ"تيا" اللي بقت وقحة فجأة وهو بيقول باستنكار: 
ـ أنتِ ايه اللي جابك هنا؟ 
"تيا" رفعت حاجبها وهي بتقول: 
ـ هو ماينفعش أزور ابن عمّي ولا ايه؟ 
ـ بنت عمك؟ 
الكلمتين دول خرجوا من "نور" اللي بتبتسم بسمة مالهاش معني وهي مش مصدقة اللي بيحصل قدام عينيها، ايه اللي كان هيحصل لو روحت بدري النهاردة وتجاهلت كل دا؟ 
"تيا" قالت وهي بتبص لهم: 
ـ اركب العربية هوصلك للبيت.
بص لها بحدة وقال: 
ـ معايا عربيتي، شكرا. 
ـ بقول لك اركب، لازم أتكلم معاك.
وهو بص لـ"نور" اللي واقفة، وشكل مافيش مهرب من بنت عمه الليلة دي، فقال لها: 
ـ طيب يلا هنوصلك يا "نور". 
قالها وهو بيفتح لها الباب، فقالت وهي بتحرك راسها بالرفض: 
ـ لا، أنا هطلب أوبر. 
ماعجبهوش كلامها وهو بيقول بضيق: 
ـ هتركبي مع راجل غريب في الليل دا؟ 
ـ طب ما أنت راجل غريب. 
ـ بس على الأقل فيه "تيا"! 
قالها وهو بيشاور على التانية اللي لوّحت لها بإيديها وهي بتبتسم، هي ليه حاساها مجنونة؟ ولا هي جريئة؟ مالها طيب؟ 
ـ ما دا اللي مخوفني أكتر. 
قالتها بدون وعي قدامهم الاتنين، وأول ما شافت ملامحه المرتابة راحت ركبت على طول، أمر "تيا" ترجع ورا جنبها وهي اللي هيسوق العربية، و"تيا" أول ما شافت "نور" جنبها مدّت إيديها تسلم عليها وهي بتقول: 
ـ عاملة ايه؟ أنا "ياسمين". 
سلمت عليها وهي حاسة بالغرابة وبتقول: 
ـ "ياسمين" ولا "تيا"؟ 
التانية رجعت لورا بتغمض عينيها وهي ساندة على الكرسي وبتقول: 
ـ "تيا" جبانة وضعيفة، أنا مش كدا. 
الحالة المرضية لـ"تيا" كانت بسبب تعلقها الشديد بصاحبتها، أو بالأحرى.. شخصيتها! فهي ماكانتش هادية بل منطلقة، متهورة وبتجازف بأي حاجة علشان تنجح في حياتها عكس "تيا" اللي كانت عندها كل سبل الراحة وماعندهاش هدف في حياتها! ما هي عندها كل حاجة.  
وبعد موت صاحبتها شخصيتها عاشت فيها، ولسة أثرها موجود.. بل تضخّم لحد ما بقى اللي عليه دلوقتي. 
بس ماحدش كان يعرف غير مامتها و... "مهند".. يمكن علشان كدا ماتفاجئش بكلامها أول ما جات قدامه، وكانت دايما غريبة كدا من ساعة ما بدأت خطوبتهم وشخصيتها المجنونة بتظهر قدامه هو وهي بتطلع رغباتها في إنها تعمل نفس اللي كانت بتعمله "ياسمين" الله يرحمها.
ـ كنتِ عاوزة تكلميني في ايه؟ 
كانت دي جملة "مهند" وهو باصص لـ"تيا" من المراية، وهي ابتسمت وهي بتبص له كأنها بتهدده:
ـ بعد ما لغينا الخطوبة، لو "تيا" الجبانة كلمتك وحاولت ترجع عن الكلام دا لما تعرف إياك تسمع لها. 
"نور" كانت بتتصدم من كلامها، هو "مهند" كان خاطب؟ هو ليه كل شوية بيفاجئها بتفاصيل حياته؟
و"مهند" كان باصص بيأس، عين على الطريق وعين على ملامح "نور" اللي بيراقبها من المراية بعد ما سمعت الكلام وهي بتداري تفاجؤها. 
وماكانش ليه رد على "تيا" بشخصيتها الحالية غير إيماءة بسيطة من راسه وهو بيوافق على كلامها، علشان عارف إن "تيا" واقعة في حبه، بينما شخصية ياسمين جواها بتنفر منه ومش طايقاه، ودا بيدل على رغبتها الحقيقية في رفضه واللي "تيا" الأصلية أضعف إنها تصارح نفسها بيها. 
غمضت عينيها وسندت على الكرسي، ودقايق ولقت نفسها غاصت في النوم. 
"مهند" اتنهد بتعب وقال: 
ـ دقيقتين وهتلاقيها قايمة مصدومة. 
ورغم استغراب "نور" اللي كانت لسة هتسأله بفضول إلا أن "تيا" قامت بدري عن اللي قاله وهي بتقول بعدم فهم وبتعقد حاجبيها: 
ـ أنا فين؟ أنتِ مين؟ وايه اللي جابني هنا؟ 
وجهت جملتها التانية والتالتة لـ"نور" وهي بتسألها، بينما "نور" كانت هي المصدومة وهي بتبص لها، بصت فجأة لـ"مهند" وهي مستنية منه تفسير دلوقتي حالا! 
ـــــــــــــــــــــــــــــــــــــــــــــــــــــــــــــــــــــــــــــــ
بعد أيام في فعالية الشركة... 
كانت "نور" بتصرخ في البيت على "سيف" وهي بتقول: 
ـ اخلص يا وش السعد أخرنا عليهم!! 
رد عليها بضيق وهو في أوضته بيلبس قميصه الأسود على بنطلونه القماش اللي كان أسود كذلك، وفتح أول زرارين من القميص وشمره لحد قبل كوعه بشوية علشان مش هيضطر يلبس بدلة.. قال لها: 
ـ وأنا مالي أصلا؟ هي شركتك أنتِ ولا أنا؟ 
وهي فتحت الباب عليه بعد ما خبطت بحدة، أول ما دخلت عقدت حاجبيها وقالت: 
ـ يرضيك أروح لوحدي وهنوصل الساعة 10 أصلا ويا عالم هروّح امتى؟ 
بص لها وهو بيبتسم بسماجة ومش بيفوت فرصة في استفزازها: 
ـ هكون أكتر من راضي، يمكن تتخطفي وماتلاقيش طريق البيت، هكون في أسعد لحظات حياتي.
اتغاظت منه جامد وهي بتدور على أي حاجة تحدفها عليه، مسكت لبسه اللي مرمي في الأرض بعشوائية وحدفته على وشه، وهو قال لها باستفزاز وهو بيرفع حاجبه: 
ـ كدا هأخرك أكتر علشان بوظتِ لي شعري! 
وهي ولا اهتمت بكلمة، قربت من مكانه وبوظت له شعره بالكامل وبتشفّي، خلته كأنه لسة صاحي من النوم وبعدين شدت إيده وراها وهو ماشي مصدوم مش عارف يعمل ايه مع المجنونة دي، مش يمكن يلاقي عروسته المستقبلية هناك وأول ما تقابله تقابله بالشكل دا؟؟ 
"نور" جرته وراها لحد عربيتها اللي أخدتها من التصليح، وبقت في أحسن حالاتها، لونها أسود وعليها القيمة برغم إنها متواضعة.. 
وهو اللي قعد في مكان السواقة وبدأ يسوق بالراحة.. 
ـ بالسرعة دي هنوصل بعد ما الفجر يأذن! 
انضم لجروب التليجرام ( هينزل فيه الرواية كاملة ) اضغط هنا
للانضمام لقناة الواتساب اضغط هنا
↚
ابتسم لها وهو بيقول: 
ـ حلو، هنبقى نصليه في المسجد ونروّح. 
قال لكامه وساب "نور" بتتعافى من صدمتها ومش هتعجبه أفكارها دلوقتي وهي بتفكر في أنسب طريقة لقتــله. 
ـــــــــــــــــــــــــــــــــــــــــــــــــــــــــــــ
وصلوا لمكان الفعالية وأخيرا، واللي كانت في أرض واسعة كبيرة ماحدش هيصدق إنها جنينة لڤيلا العيلة المالكة للشركة.. بس لازم يصدقوا. 
أول ما وصلت هناك وورت الأمن بطاقة الشركة الخاصة بيها راحوا دخلوها ومعاها "سيف" اللي كان قرفان منها وبيحاول يعدّل من شعره اابايظ قبل ما يدخل، ومالاحظش نظرات "نور" اللي باصة له بشماتة. 
دخلوا لجوة كان فيه ناس كتيرة جدا، صحفيين ورجال أعمال ومستثمرين هيشاركوا في حملة التبرع السنوية للشركة. 
ناس "نور" مش بتحلم إنها تقابلهم في صفقاتها اللي بتجهزها للمدير. 
كانت بتبص للبنات اللي في كل مكان ولبسهم معظمه مكشوف دا إن ماكانش كله، بصت على "سيف" بشكّ تشوفه بيعمل ايه جنبها لقته حاطط عينه في الأرض فابتسمت غصب عنها ولولا الملامة كانت لعبت في شعره تاني: 
ـ أخويا الشطور اللي مش بيبص على حد، مراتك محظوظة بيك والله. 
ـ أخيرا اعترفتِ إني وسيم طويل كتافي عريضة وشخصيتي جامدة ومتدين و.. 
ـ خـــــلاص! أنا غلطانة إني نطقـــت! 
قالتها بحنق وهي بتبص له بنصّ عين بقرف، وهي بتدور في الوشوش عن حد تعرفه، ووسط ما هي بتدور لاحظت "تيا" بنت عمّ "مهند" وست جنبها ملامحها شبهها بالظبط. 
أول ما شافت لبسها عرفت إنها "تيا" اللطيفة الـ"جبانة" زي ما هي وصفت نفسها، فستانها الأحمر خطف الأضواء من الكل وهي بتتكلم برقة وبتبتسم لزوجات رجال الأعمال اللي متجمعين حواليها كأنهم بينقّوا عروسة.. 
ماكانتش مصدقة إن هي دي نفسها "تيا" اللي كانت لابسة شبابي وجاية تاخد "مهند" في اليوم إياه واتعرفت عليها ساعتها.
اتحركت لها بابتسامة، هي الشخص الوحيد اللي تعرفه، وقالت لـ"سيف" قبل ما تمشي: 
ـ دوّر على حد ترغي معاه في هندسة الطيران بقى، بونسوار. 
سابته واتحركت بسرعة سايباه في دهشته من هربها منه وهو واقف زي العامود وسط كل الناس اللي متجمعين وبيتكلموا، لولا إن فيه شخص غريب قرب منه فجأة وهو بيبتسم.. واللي كان نفسه "مهند" اللي عرف إنه أخو "نور" من أول لمحة ليه. 
ـ السلام عليكم يا بشمهندس. 
"سيف" رد عليه بعدم فهم، ماكانش فاهم مين دا بس عارف إنه شافه قبل كدا، راح قال: 
ـ أنا شفتك قبل كدا؟ 
"مهند" اتفاجئ، معقولة يكون شافه ساعة اليوم اللي شافه هو مع "نور" ساعتها؟ 
رد عليه باستيعاب: 
ـ يمكن، أنا "مهند" ليدر تيم الآنسة "نور" في الشركة، أخت حضرتك. 
"سيف" رجعت له ذاكرته بإدراك، هو هواه نفس الشخص اللي شافها معاه في الشركة وبتبتسم له، كان هاين عليه دلوقتي يبص له بسماجة بس ابتسم بيحاول يبين الهدوء وهو بيقول: 
ـ اتشرفنا. 
ـ ليّ الشرف يا بشمهندس. 
الأجواء ما بينهم هديت و"مهند" مش عارف يبدأ كلامه معاه بإيه علشان يعرف عن حياة "نور"، وازاي يوصل لرقم باباها، و"سيف" اللي ماكانش طايقه بس هو الوحيد اللي عرف يتكلم معاه هنا. 
انضمّ لهم شخص جديد وهو بيتعرف على "مهند" وبيقول بودّ: 
ـ ازيّك يا مستر "مهند"، شكل والد حضرتك مجهز لنا مفاجأة كبيرة الليلة دي. 
"مهند" رد عليه بابتسامة، والراجل قال تاني: 
ـ بس أنا زعلان جدا الحقيقة. 
"سيف" كان هيموت ويرن الراجل الملزق دا علقة، لو عنده كلام يقوله مباشر وبصراحة وخلاص، ايه فايدة اللعب والدوران؟ 
ـ ليه بس كدا؟ الحفلة ماعجبتكش؟ 
كان "مهند" بيتكلم معاه بهدوء علشان دا واحد من أهم المستثمرين في الشركة الفرعية في لندن، والتاني رد عليه بنفي: 
ـ الحفلة ممتازة، بس والدك شكله مستقصدني، رافض يدّيني أسهم في الشركة الأم في مصر، مع إن سِعري مايترفضش. 
"سيف" ساعتها حاول يستوعب الراجل دا بيتكلم عن ايه.. ومع مين؟؟ 
هو مش "مهند" قال إنه ليدر التيم في الشركة؟ ايه علاقته بالمدير؟ 
والدُه؟ "مهند" يبقى ابن المدير؟ 
ـــــــــــــــــــــــــــــــــــــــــــــــــــــــــــــــــــــــــــــ
وفي ركن تاني كانت "نور" مندمجة باجتماعية كبيرة مع "تيا" وباقي النساء هناك، مع إن بعضهم كان بيبص لها بقرف لأنها مش لابسة زيهم ومش مظهرو جمالها، إلا أنها ماهتمتش وهي بتتعرف عليهم بودّ وبتضحك مع "تيا" اللي اتعرفت عليها في العربية مع "مهند".. 
ـ بس مستر أيمن في الصفقة الأخيرة كان قرب ينفجــر من الغضب علشان تنازل الإيرادات على الاستثمار اللي حاطه في الشركة..  
كانت مرات مستر "أيمن" قدامها، في الأربعينيات وهي بتضحك لها وبتقول: 
ـ دايما "أيمن" عصبي في كل حاجة لو مامشيتش على مزاجه، بس بفضلك في الإعلان الأخير الشركة توسعت كتير في استثماراتها وتسويقها، "أيمن" بقى بيرجع لي مبسوط الأيام دي. 
"نور" شكرتها وهي بتضحك وبتقول: 
ـ كله بتوفيق ربنا، بس أنا مستغربة ازاي مستر "أيمن" بكل عصبيته قدر يتعرف على جميلة زيّك، هادية وواعية، وشكلك أصغر مني اللهم بارك. 
قالتها بكل عفوية فالتانية ضحكت وهي بتقول: 
ـ بتعرفي تجاملي كويس يا "نور". 
"نور" نفت بكل قوتها وهي بتبتسم: 
ـ لو فاكراني بجامل فحضرتك لازم تشوفي نفسك في المراية، وهاتعرفي إني بوصفك مش أكتر. 
عرفت ازاي تكسب ودّهم وهم بيضحكوا عليها وعلى قصصها اللي كل شوية تحكيها عن تفاصيل الشركة وازاي أزواجهم كانوا بيتصرفوا لنا ييجوا الشركة وبتمدحهم بصفات هي فيهم في الحقيقة مش بتجاملهم أبدا. 
ـ وأنتِ كمان جميلة يا "نور"، وأنتِ لابسة حجابك ومغطية علينا كلنا بجمالك، والحمد لله إنك محجبة وإلا كنتِ سرقتِ مننا الأضواء. 
ابتسامتها وسعت وهي بتكمل كلامها معاهم بكل اجتماعية، تحت نظرات "تيا" اللي بدأت تشوف "نور" زي "ياسمين" بس نسخة أكتر لباقة، وأجمل، و"تيا" سحبت نفسها بهدوء وهي بتمشي بعيد عن الحفلة في ركن مختفي علشان ترتاح من الدوشة. 
وأول ما وصلت وهي باصة في الأرض سمعت صوت متفاجئ بدهشة بيقول: 
ـ أنتِ؟؟؟ 
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
انضم لجروب التليجرام ( هينزل فيه الرواية كاملة ) اضغط هنا
للانضمام لقناة الواتساب اضغط هنا
↚
ـ أنتِ؟؟؟
رفعت عينيها باستغراب للصوت، لقت راجل قدامها واللي ماكانش غير "سيف"  وهو بيبص لها بدهشة، بعَد عينيه عنها لما أخد باله إنه بص لها كتير وهو بيستغفر ربنا في سره، بصت له بهدوء وهي بتقول: 
ـ حضرتك تعرفني؟ 
هي مش فاكراه؟ ثانية هي قالت.. حضرتك؟؟ 
افتكر محادثته الأخيرة معاها ساعة العربية ومش عارف ازاي اتغيرت بكل سرعة كدا، يمكن تكون واحدة شبهها.. أصل ايه احتمالية إنه يشوف بنت غريبة مرة تانية صدفة زي كدا؟؟ 
مالحقش يتكلم لقى وشها شاحب وهي بتسند على الشجرة اللي قدامها، كانت تعبانة فقال لها بقلق: 
ـ أنتِ كويسة؟ فيه ايه مالك؟ 
هو ماكانش خوفه عليها قدّ ما هو خوفه من إن يفتكروه عمل لها حاجة! وهو مستخبي هنا علشان مالقاش حد يكلمه! 
ردت عليه بتعب: 
ـ دماغي مصدعة بس ودا بيتكرر كتير، هبقى كويسة. 
كانت بتكدب، كل ما تحصل معاها الحالة دي بيغمى عليها ولما بتصحى بتلاقي نفسها في مكان مختلف وهي عملت حاجات ماتخيلتش إنها تعملها في يوم.. علشان كدا كانت بتروح للدكتور يشوف لها حلّ في مشكلة مرضها النفسي دا.. واللي نصَحها تلاقي لها هدف في حياتها وتنشغل بيه علشان ماتحسش إنها مالهاش لازمة وجبانة.. بس هي.. لسة جبانة.. ولسة خايفة تبدأ في حاجة وتفشل فيها! 
"سيف" قال لها بقلق قبل ما يمشي: 
ـ هجيب حد يساعدك.  
وماسابهاش حتى تعترض ولا ترد عليه، بل هروَل بعيد عنها بقلق وعينيه بتبص في كل مكان وهو بيدور على "نور" بتوتر. 
لقاها وسط مجموعة من الستات فراح هناك وهو بيسلّم عليهم شفهيا وعينيه في الأرض، "نور" استغربت وهي بتستأذن منهم وبتقول له بتعجب: 
ـ فيه ايه؟ عملت مصيبة ولا ايه؟ 
ـ مش أنا اللي عملت، فيه بنت هناك تعبانة ماعرفش اسمها ايه، بس شكلها هيغمى عليها من التعب. 
راحت معاه جري لهناك و"مهند" من بعيد كان مراقبها، لاحظ خوفها المفاجئ وهي بتجري لمكان معين ووراها "سيف" أخوها اللي اختفى من جنبه من دقايق، اتحرك وهو بيستأذن من الرجالة اللي واقف معاهم وراح وراهم. 
كانوا همّ هناك مصدومين و"سيف" بيقول: 
ـ دي أُغمى عليها بجد! الحقيها يا "نور"! 
والتانية كانت عارفة اللي بيحصل لـ"تيا" زي ما "مهند" فسر لها المرض اللي أعراضه شديدة جدا عندها، ومش سهل تتعالج منه. 
"نور" قعدت على الأرض وأخدت راس "تيا" على حجرها ومستنياها تفوق، في دخلة "مهند" المفاجئة و"سيف" اللي استغرب وجوده وهو باصص له بحدة، في حين إن التاني بص لـ"نور" بقلق: 
ـ فيه ايه يا "نور"؟ ايه اللي حصل؟ 
ماكانش شايف غير "نور" اللي مدياله ضهرها، بعدت شوية وهي بتشاور على التانية اللي كأنها ميتة على حجرها، "مهند" فزع وهو بيقرب: 
ـ هي أغمى عليها دلوقتي؟ ماينفعش، الحفلة لسة بادئة من شوية.. كدا مش هتعرف تكمل. 
و"سيف" اللي ماستحملش المستفز اللي قدامه وهو بيستنكر: 
ـ وأنت هامّك الحفلة ولا اللي مرمية على الأرض دي؟ تولع الحفلة! 
التاني بص له وهو بيتنهد مش هينفع يقول له عن مرضها، وأخته بتشاور له يسكت، فـ"سيف" استنكر اللي بيعملوه، ومالحقش يتكلم غير ولقى "تيا" بتصحى من مكانها وهي بتمددّ إيديها وبتتاوب، وباصة لهم بتقول وهي بتحك راسها: 
ـ ايه اللي حصل؟
كانوا مصدومين من اللي بتعمله وأكبر صدمة فيهم كانت "سيف"، و"تيا" بصت لهدومها وهي بتقول بغضب: 
ـ المجنونة دي بتلبس اللبس المقرف دا ازاي؟ ايه الضيق دا؟
قامت من مكانها وكانوا باصين لها فادّارت ورا "نور" وهي بتقول للاتنين التانيين بحدة: 
ـ نعم؟ بتبصوا على ايه؟؟ 
كانت بتحاول تنزل الفستان اللي كان عند ركبتها، "سيف" بعد راسه بسرعة وهي لاحظته فقالت باستدراك: 
ـ الميكانيكي؟؟ ايه اللي جابك هنا؟؟ 
التاني لف لها راسه بحدة و"نور" بتقول لها باستغراب: 
ـ ميكانيكي؟ وبعدين أنتِ تعرفي "سيف" منين؟ 
قالت بلا مبالاة: 
ـ عربيتي باظت على الطريق وهو الوحيد اللي نزل يساعدني وقتها. 
"نور" رفعت لأخوها حاجبها في حين هو اللي اتأكد دلوقتي إنها هي نفس البنت، وهو بيستغرب وبيقول: 
ـ هي مش كانت بتموت من شوية؟
"تيا" اللي كانت بشخصية "ياسمين" حاليا ماهتمتش بكلامهم وهي بتمشي وواخدة في إيديها "نور" علشان تداريها وهي بتقول: 
ـ هروح أغير هدومي بعد كدا نتكلم. 
ـ طب روحي أنتِ، واخدة أختي في إيدك ليه؟ 
بصت له بحدة وهي بتقف فجأة، وبعدين كملت طريقها وهي جارّة وراها "نور" اللي ملامحها مذبهلّة من اللي بيحصل. 
في حين "سيف" بص لـ"مهند" اللي متابع أثرهم وهو بيقول بنرفزة: 
ـ أنت ساكت ليه؟ مين البنت دي بالظبط؟ ومالها كدا؟ هي مجنونة؟ 
"مهند" رفع عينيه ليه ومش مصدق إنه هيشرح اللي بيحصل لبنت عمه لحدّ تاني، والحد التاني دا يبقى.. أخو زوجته المستقبلية.
ـــــــــــــــــــــــــــــــــــــــــــــــــــــــــــــــــــــــ
كانت "نور" هناك مع "تيا" اللي بدأت تخرّج حاجات من أوضتها اللي في ڤيلا عمها، لبست هدومها العادية.. بنطلون أسود واسع وبلوزة أوسع لونها بنّي، ورفعت شعرها على شكل كعكة وهي بتغسل كل الميكب من وشها. 
طلعت لـ"نور" اللي كانت قاعدة على السرير مستنياها تخلص، وراحت لها بابتسامة وهي بتقول: 
ـ على فكرة "مهند" حمّض من الانتظار. 
ـ مش أنتِ اللي متأخرة وبتغيري هدومك؟ أنا مالي؟ 
"تيا" ردت عليها وهي بتبتسم بخبث: 
ـ مش قصدي الانتظار دا.. 
ـ أومال قصدك ايه؟
ـ بقى له كتير معجب بيكِ وأنتِ مش مدياله وش، ليكِ حق بصراحة.. ماحدش هيقبل بالأهبل دا. 
"نور" بصت لها بحنق وهي بتقول: 
ـ مش أهبل. 
التانية رفعت حاجبها بمكر وهي بتبص لها بشكّ، بينما "نور" سكتت فجأة وهي بتعيد جملة "تيا" في دماغها.. معجب بيها من زمان؟ أومال كان ساكت دا كله ليه..؟ وليه مافيش حاجة بيّنت إنه.. لا ثواني.. هو عمل حاجات كتير لما كانت تعبانة وماخدتش بالها من اهتمامه الزايد. 
شهقت فجأة وهي مذهولة من اللي بتفكر فيه و"تيا" بصت لها بسخرية وهي بتهمس في سرّها: 
ـ لسة واخدة بالها، مواضيع الحب المقرفة دي! 
"نور" ماكانش في دماغها دلوقتي غير ازاي تهرب من هنا؟ وازاي تستقيل من الشغل من غير ما يشوفها؟ كان عندها استعداد تضيع سنين من شغلها وتعبها بسببه.. هتموت من الإحراج! الراجل معجب بيها بقى له زمن وهي كانت عامية!
طلعت من الأوضة بتجري علشان تمشي بسرعة و"تيا" ماشية وراها باستغراب، وهي بتنادي عليها باستهزاء: 
ـ رايحة تعترفي له ولا ايه؟ 
"نور" عقدت حواجبها وهي بتلف لها بحدة، وقفتها وقالت:  
ـ دا أنا هوريكوا النجوم في عز الضهر. 
سابتها والمرة دي اتحركت بهدوء وبخطوات واثقة ومش فارق معاها إحراج ولا نيلة، تُحرج ليه؟ هي عملت حاجة غلط؟ 
طلعت برة، كان "سيف" و"مهند" قاعدين وسط الصالة الكبيرة مستنيين نزولهم، وبالفعل بعد نزولهم "نور" ماعطيتش "مهند" وش وهي مسكت إيد "سيف" وبتقول له: 
ـ يلا نمشي من هنا. 
والتاني اللي استغرب اللي بيحصل، بس مِشي وقبل ما يمشي سمع صوت "تيا" اللي بتقول:
ـ لا سيبي الميكانيكي هنا، هنتكلم. 
ماوقفتش برضه وأخدته وبتمشي في حين إن "سيف" لف راسه لـ"تيا" وهو بيشاور على دماغه بعلامة الجنون وبيقول لها بشفايفه اللي قرأتهم: 
ـ على الله حكايتك. 
شهقت وهي باصة له وهتموت وتجري وراه تموته، بس لقت طريقة أسهل من كدا وهي بتقرب على "مهند" وبتقول له بهمس: 
ـ لو سيبتها تمشي دلوقتي مش هتلاقيها خالص بعد كدا، اضرب الحديد وهو سخن. 
التاني رفع عينيه بيبص لهم وهم ماشيين، ما صدق يسمع كلامها وحد يفوقه، جري وراهم ووقف قدام "نور" وهو بيلهث، في حين إن "سيف" بعَد "نور" ورا ضهره وهو بيقول للتاني: 
ـ أفندم؟؟؟ 
"مهند" استقام بضهره بعد ما خد أنفاسه، بعدين قال بكل صراحة مباشرة وهو بيبص لـ"سيف" بتحدي مقترن بالهدوء: 
ـ أنا طالب إيد الآنسة "نور". 
ـــــــــــــــــــــــــــــــــــــــــــــــــــــــــــــــــــــــــــــــــــــــــــــ 
انضم لجروب التليجرام ( هينزل فيه الرواية كاملة ) اضغط هنا
للانضمام لقناة الواتساب اضغط هنا
↚
ـ أنا طالب إيد الآنسة "نور".
"سيف" حس إنه ماسمعوش كويس، فقال تاني باستغراب: 
ـ نعم؟؟ 
و"مهند" اختلس نظرة لـ"نور" اللي واقفة ورا "سيف" وباصة له بدهشة إنه قالها لأخوها صراحة كدا، وهي خايفة من رد فعل أخوها، "مهند" قال وهو بيبص للي قدامه بهدوء: 
ـ أنا عمري ما حبيت اللف والدوران، والآنسة "نور" بالنسبة لي ماقدرش أعتبرها مجرد زميلة، بل أكتر من كدا.. إلا.. 
أخد تنهيدة بأسى وهو بيبص لـ"نور" بصة خلتها تبعد نظرها بعيد بكسوف وهو بيقول: 
ـ إلا إذا هي رفضتني بنفسها. 
ـ مين الغبية دي اللي ترفضك؟ 
جُملة لولا إن "نور" مسكت بقّها كانت قالتها والكل سمعها، وبعدين لازم تتقل شوية بدل دماغها اللي بتقول لها اقبلي بسرعة وخليكِ رخيصة.. كانت معجبة بشخصية "مهند" لأنه ماكانش مجرد راجل ولا قائد تيم همّه وظيفته وبس.. بل كان بيطبق كلمة قائد بمعنى الكلمة وهو بيوجّه كل اللي تحت إيده لمصلحتهم الخاصة ومصلحة الشركة العامة. 
كان "سيف" ساعتها بيمدح جرأة "مهند" في سرّه، بس عقله نش راضي يسكّته عن إنه يتخيله بيضربه وبيعذبه بأبشع الوسائل.. مين دا اللي عاوز يسرق أخته من بين إيديه بعد أكتر من 25 سنة مع بعض؟! 
كان عارف إن اللحظة دي هتيجي في يوم، بس هو مش مستعد ليها.. هيعيش وحيد؟؟ 
لقى نفسُه بيبص لـ"مهند" بحدة وهو بيقول: 
ـ ماعندناش بنات للجواز. 
التاني فتح عينيه على آخرهم من الصدمة وهو مش مصدق كلامه، فبصّ له بتحدي وهو بيقول: 
ـ كلامي مش معاك، كلامي مع والدك المسؤول عنها. 
و"نور" سكتت وهي بتبص لـ"سيف" اللي بص لها بسخرية: 
ـ هو مايعرفش حتى المعلومة دي؟ وجاي يطلب إيدك كدا بكل بجاحة؟ 
ـ بجاحة؟؟ فيه ايه يا "نور"؟ 
ـ اسمها الآنسة "نور"، وماتنطقش اسمها على لسانك حتى، وأنت تنادي لها ليه؟؟ 
كانت "نور" بتبص لهم الاتنين بحيرة، بس لما سمعت كلام "سيف" الوقح شوية.. شويتين، راحت وقفته بغضب وهي بتقول وخلاص فقدت أعصابها:
ـ هو أنتوا عبط؟؟ 
لفت راسها فجأة لـ"مهند" وهي بتقول: 
ـ ماما وبابا توفاهم الله، مافاضلش غير "سيف" في حياتي. 
و"مهند" كان مذهول، معلومة مهمة زي دي هو ماكانش يعرفها؟ دا أخوها معاه حق.. هو جاهل بيها! جاهل حتى بتفاصيل حياتها اللي واضحة زي الشمس! يعني حياته دلوقتي متعلّقة بإيده هو؟ أخوها؟ 
بس دا مامنعهوش إنه يبتسم لـ"سيف" وهو بيلغي العداوة اللي كانت في دماغه معاه وبيحضنه بسرعة: 
ـ حبيبي أبو السيوف ماليش غيرك. 
والتاني بص له بعدم تصديق، وهو بيبعده عنه كدا وبيقول لـ"نور": 
ـ أنتِ ليه ماقولتيليش إن مديرك في الشغل مجنون؟؟ الشغل دا مش هتخطّيه تاني وهجيب لك وظيفة أحسن في شركة أحسن. 
"مهند" بص لـ"سيف" بصدمة وهو بيقول: 
ـ ماتهزرش، دا أنا هقفلها عليكم ميّاه ونور.. 
استوعب آخر كلمة فبص لـ"نور" بسرعة: 
ـ لا مؤاخذة. 
وكمل كلامه وهو بيمسك "سيف" من إيده وبيخرج برة بعيد عن البنات، سايبين "نور" مع "تيا" اللي بتضحك ورا وهي بتتريق وبتقول: 
ـ شكل اليوم دا مش هيعدّي على خير.. لا.. هو مش هيعدّي. 
التانية بصت لها بحدة فـ"تيا" رفعت كتفها كأنها بتقول ماليش دعوة.
وبرة كان "مهند" جارر أخوها وراه لحد ما وصلوا لمكان فاضي، "سيف" قال بملل: 
ـ قلت لك ماعنديش بنات للجواز.. ماتفكرش. 
"مهند" ماكانش بيهزر المرة دي، كان واخد الموضوع بجد وهو بيقول: 
ـ كلمتين جدّ يا أستاذ "سيف"، وياريت تسمعني للآخر. 
ــــــــــــــــــــــــــــــــــــــــــــــــــــــــــــــــــ
كانت "نور" واقفة عمّالة تتحرك يمين وشمال وكل شوية تبصّ برة مستنياهم يرجعوا وهي ماتعرفش راحوا فين، قدام "تيا" اللي كانت راقدة على الأنتريه في الصالة وبتبص لها بملل وبتقول: 
ـ اهمدي شوية، كلها دقايق وهييجوا وهنشوف مين فيهم اللي فاز، وهيكون "مهند" أكيد. 
"نور" بصت لها بسخرية وهي بتربع دراعاتها وبتقول: 
ـ ومين قال لك؟ أنتِ ماتعرفيش "سيف" راسه ناشفة ازاي. 
ـ يبقى صدقيني، أنتِ اللي ماتعرفيش "مهند" مُثابر ازاي لما بيصرّ على حاجة عاوزها. 
ـ حاجة عاوزها؟ هو أنا لعبة في إيديه؟
ومش عارفة ازاي "تيا" قالت بالهدوء دا وهي بتحط دراعها فوق عينيها علشان الضوء وبتقول: 
ـ عاوزك، من العوَز.. الاحتياج، "مهند" محتاجك يا "نور". 
التانية سكتت، فكرت في كلامها واقتنعت بيه، لدرجة إنها عينيها نزلوا في الأرض وهي بتتكسف من مجرد التفكير إن فيه حد فكّر فيها ومُصرّ علشانها.. علشان تبقى معاه.. بدأت تخاف عليه من "سيف" من دلوقتي.. يا ترى بيعملوا ايه؟ 
كانوا ساعتها داخلين و"مهند" ابتسامته من الودن دي للودن دي وحاضن في إيديه دراع "سيف" اللي ماشي وراه كأنه مُجبَر وبيبص بزهق ليه، لحد ما وصلوا لجوة و"تيا" قامت بتبص على المنظر وضحكت وهي بتخبط "نور" في كتفها وهمست لها في ودانها:
ـ مش قلت لك؟؟ هي حاجة من تلاتة، تلاقيه فضل يزنّ عليه لحد ما وافق، أو هدده بحاجة، أو عرَض عليه صفقة مربحة للطرفين. 
و"نور" اللي كانت باصة بذهول للوضع و"مهند" باصص لـ"سيف" بترقب كأنه مستنيه يعلن إعلان، والتاني بص له بزهق وبعدين قال بعدم رضا: 
ـ الرأي رأي العروسة. 
و"مهند" رمى عينيه على "نور" اللي كانت واقفة متصنمة مكانها من ساعة ما سمعت جملته، أخوها رضخ بالسهولة دي؟؟ وبعدين.. وبعدين هي لازم تقول رأيها؟ دلوقتي؟؟ 
يا أرض انشقي وابلعيني! 
ـ ايه رأيك يا عروسة؟ 
كانت دي جملته هو.. اللي المفروض هيبقى.. عريسها! 
رفعت عينيها المتوترة وهي كل ما تحاول تتكلم بتتراجع، مش لاقية جملة تقولها، ولما "سيف" لاحظ التردد عليها راح ضرب "مهند" بخفة على راسُه وقال بحنق: 
ـ قلنا هنستنى أسبوع لحد ما تفكَّر، غور من وشي يلا، وسيب دراعي خدّرته. 
بِعد عنه وهو رايح ياخد في إيديه "نور" اللي مشيت معاه بطاعة وهي أكبر أمنياتها دلوقتي تختفي من قدامُه، ولا كأنها هي نفس البنت اللي عمر ما لسانها سكت ودايما فصيحة في كلامها.. ودلوقتي عجزت حتى عن الرد. 
هي ماعجزتش، كان عندها الرد، اللي كان موافقتها على عرضه.. بس لو وافقت بسرعة كدا هيقول ايه عنها؟ ابن مدير الشركة وليه مركزه، ما صدقت؟ 
ـــــــــــــــــــــــــــــــــــــــــــــــــــــــــــــــــــــــــــــ
بعد مرور أسبوع... 
كانت "نور" متعودة تروح الشغل في الأسبوع كله، بس كان أصعب أسبوع في حياتها.. كل شوية تقابل "مهند" اللي كل ما يبص لها يبتسم في وشها وكأنه بيغريها بلطافته علشان توافق، وهي ضربات قلبها بتعلى من التوتر والخوف.. لدرجة إنها نفسها تمسك أي فازة تحدفها على راسُه يمكن يقعد في البيت ومايجيش الشغل!! 
ولما جه اليوم الموعود لقتُه اختفى، ماجاش الشغل النهاردة! كانت مصدومة فهو ماعملهاش غير لما بيكون في أشد لحظات تعبُه، كان منظبط على المواعيد بشكل فظيع واتعلمت الانضباط دا منه في سنينها في الشركة. 
ودلوقتي؟ معقولة يكون تعب؟ أو.. غير رأيه وهرب؟ 
دماغها كانت بتودّي وتجيب وهي بتخرج برة الشركة، كانت الساعة ستّة وخلصت شغلها كله بعد تعب بسبب انعدام تركيزها النهاردة، ووصلت الشقة بالعافية. 
خبطت على الباب بتعب وهي بتقول: 
ـ "سيف"، افتح الباب.. أنت نايم؟ 
الباب اتفتح، وهي كانت باصة من الأرض من التعب.. كان واقف قدامها وماتكلمش حتى سألها أنتِ مالك؟ 
حدفت راسها عليه وهي بتقول: 
ـ أنا عاوزة أنام. 
وماحسيتش غير برجوع الجسم اللي قدامها بعيد بسرعة وهي كانت ساندة عليه بكل قوتها فوقعت على الأرض وهي بتصرخ، رفعت راسها بحدة وهي حالفة لا تطيّن عيشته، بس بُقها اتفتح ببلاهة وهي بتبص للي واقف قدامها.. "مهند" بشحمه ولحمُه، باصص لها بصدمة.. صرخت فجأة وهو صرخ معاها وهم بيفتكروا اللي حصل و"نور" بتتمنى دلوقتي لو القيامة تقوم، أو اللي قدامها دا يتعمي فتهرب من قدامه بسرعة. 
"سيف" جه بفزع على صوت صراخهم الاتنين ولقى أخته مرمية على الأرض، بص لـ"مهند" بصدمة: 
ـ أنتَ اللي وقعتها؟؟ 
رد عليه التاني وهو بيرفع إيديها بيبرأ نفسه من التهمة: 
ـ لا والله أبدا، هي اللي وقعت.. لوحدها، مش لوحدها أوي يعني بس هي السبب. 
"سيف" قوّم اللي كانت مذهولة وقاعدة على الأرض وهو بيقول لها: 
ـ ايه اللي حصل؟ 
قالت بتلعثم وهي بتبص بعيد: 
ـ لا، لا.. مافيش حاجة.. اتزحلقت. 
"سيف" لف للتاني بحدة وهو بيشاور له على الأوضة: 
ـ قلت لك ادخلها وماتخرجش منها! خرجت ليه؟ 
ولسة التاني هيقدم تبريره لولا إن "سيف" لفّ لأخته تاني وقال بنفس الحدة: 
ـ وأنتِ معاكِ مفتاحك، كان لازم تخبطي؟ 
ـ هو.. هو بيعمل ايه هنا؟؟ 
وبكل ذرة تهكم في عين "سيف" بص لـ"مهند" وهو بيقول: 
ـ هيكون ليه؟ البيه قاعد قدام الشقة مستنيني لما آجي من الشغل، كأن الدنيا هتطير! 
ـ هي هتطير فعـ.. 
وماكملش كلمته لقى التاني بيهتف فيه بحدة: 
ـ انجرّ على الأوضة!! 
"مهند" مشي غصب عنه، وأول ما دخل وقفل الباب راح قال بعصبية: 
ـ وربّي لما أتجوزها مش هاخلّيك تشوف ضفرها! 
كان "سيف" برة بيتطمن على أخته، قال لها بحنان عكس الحدة اللي كان بيتكلم بيها لأنه متعصب من وجود وش السعد التاني: 
ـ أنتِ وشك تعبان كدا ليه؟ كلتِ حاجة من الصبح؟ 
حكّت راسها وهي بتبص له بابتسامة بلهاء كأنها طفلة مذنبة، فهو رجعت نبرته للحدة تاني وقال:
ـ أنتِ ناوية تموتي نفسك؟ ماطفحتيش حاجة من الصبح ليه؟ 
ـ شربت قهوة.. 
ـ وهي القهوة هتعمل ايه؟ 
ـ بلبن. 
التاني رفع حاجبه ورد عليها بسخرية: 
ـ حجّة البليد! 
سابها ودخل المطبخ وهي دخلت وراها، أول ما شافها راح قال: 
ـ أنا اللي عملت العَشا النهاردة، روحي غيري هدومك الأول وتعالي هنتعشى. 
ـ مع..
ماكملتش كلامها لقته بيقاطعها بزهق وعدم رضا: 
ـ اه مع البني آدم الرخم اللي قاعد برة دا. 
كتمت ضحكتها عليه رغم توترها من اللي جاي، غيرت هدومها وطلعت بالفعل كانوا حطوا كل حاجة على السفرة، و"سيف" كان بيخلي "مهند" يساعده قسرًا.. هي ليه حاسة إنهم متربيين مع بعض من زمان؟ كأنهم أعز أصحاب بقى لهم أكتر من خمس سنين؟؟ 
"مهند" رفع عينيه ليها لما لقاها طلعت، وكانت دي أول مرة يشوفها بلبس مش رسمي، كانت بإسدال البيت اللي كان واسع ومش مبهرج، بل هادي و.. شبهها. 
قعدوا مع بعض على السفرة، وإيد "نور" كانت متوترة ولولا إنهم مركزين في أكلهم كانوا لاحظوا رعشة إيديها وهي بترفع معلقتها وبتعاني علشان توصلها لبُقها بسلام. 
وكان "مهند" بالفعل ملاحظ توترها علشان كدا ماحاولش حتى يرفع عينيه ليها بالغلط علشان ماتتوترش أكتر. 
خلصوا أكل، و"نور" قامت تشيل السفرة، بس "سيف" قعّدها تاني وهو بيقول: 
ـ خليكِ قاعدة، والَا.. قوم شيل الأطباق. 
"مهند" رفع عينيه باعتراض وهو بيقول: 
ـ ايه شغل الحماوات دا؟ 
ـ عندك مانع؟؟؟ 
قالها "سيف" وهو بيرفع له حواجبه بتحذير، و"مهند" اللي اتغيرت ملامحه بسرعة وهو بيبتسم وبيقول جملة عارف إنها هتستفز اللي قدامه: 
ـ من عيوني، كله علشان عيونها. 
التاني انتفض وهو ناوي ياكلُه علقة لولا إنه خَد الأطباق وهروَل من قدّامه بيهرب بحياته. 
ــــــــــــــــــــــــــــــــــــــــــــــــــــــــــــــــــــــــــــــــــ
انضم لجروب التليجرام ( هينزل فيه الرواية كاملة ) اضغط هنا
للانضمام لقناة الواتساب اضغط هنا
↚
كانوا قاعدين بقى في أوضة الضيوف وشكلهم هم الضيوف و"مهند" الخدام.. اللي "سيف" أصر عليه هو اللي يعمل الشاي عقابا ليه، ولأن "نور" مابتحبش الشاي فعمل عصير فراولة ليها بأمر الأستاذ الملك السيد الكبير الرئيس "سيف" طبعا. 
كانت "نور" هتموت من الإحراج بسبب اللي بيحصل، بعد كل دا ازاي هو موافق ومُصر يدخل العيلة دي؟ ماتعرفش إن "مهند" كان بيجاري "سيف" بس لحد ما يخطفها ويهرب بيها منه. 
شربت عصيرها بحرَج، بينما "سيف" أول ما أخد شفطة من الشاي رجّعه مكانه تاتي وهو بيبص لـ"مهند" بصدمة: 
ـ أنت متقّله كدا ليه؟ دا سم مش شاي دا! 
والتاني حرك كتفيه ببراءة وهو بيقول: 
ـ أصلي مابشربش الشاي، فماعرفش بيتعمل ازاي. 
"سيف" كان نفسه يقول له دلوقتي: 
ـ أنت غبي؟؟ 
بس مسك نفسه في آخر لحظة وأخد تنهيدة كبيرة بيهدّي تفسه علشان مايقمش يطحنه، يعني عاوز يتجوز أخته وفوق كدا بيستفزه! 
"نور" غصب عنها كانت حاطة إيديها على بُقها بتكتم ضحكها علشان أخوها مايلاحظش، وبعدين "مهند" قال بهدوء غريب وبصوت جاد: 
ـ أظن إني استنيت كتير لحد دلوقتي، وعاوز أعرف الرد يا "نور". 
ـ آنسة "نور"؟؟ 
ـ الآنسة الشريفة المبجّلة "نور". 
ورغم تريقة كلامهم إلا إنها الوحيدة اللي ماكانتش عاوزة اللحظة دي تيحي رغم أنها كانت منتظراها، بصت جنبها.. كان "مهند" باصص لها بترقب فـ"سيف" حجب عنه الرؤية وقال لها: 
ـ بصي لي أنا، قلتِ ايه؟ 
وهي بكل كسوف تجاهلت نظرة "مهند" اللي كان بيختلس النظر ليها من ورا أخوها، وحركت راسها بخفة بالموافقة.. فـ"سيف" قال بانتصار وهو بيلف راسُه للتاني:
ـ شفت؟؟ بتقول لك مش موافقة، هي مش طايقاك أصلا! 
و"مهند" اللي جاب آخره زقّه بتهكم وهو بيقول: 
ـ يا كداب! بتكدب عيني عينك كدا؟ إشحال ماشفتش بعينيّ! 
و"سيف" بصّ له بصدمة وهو بيقول: 
ـ بتزقني؟ طب مش هتتجوز في ليلة أمك السودة دي. 
ـ ارحمنــــــــي يـــــــا رب!! 
ــــــــــــــــــــــــــــــــــــــــــــــــــــــــــــــــــــــــــــــــــ
كانت الأجواء هادية، خطوبة راقية بدون معازف، في عز النهار في ڤيلا "مهند" واللي جاب هدية لـ"نور" كان فستانها اللي لابساه دلوقتي، فستان أبيض واسع، تفاصيله هادية وفيه وشاح مغطي كل حاجة من قدام وضهرها كله، ومطرز بجواهر بتلمع زي الألماس.. كان من براند مشهور.. وهو مش هيستخسر في "نور عينيه" حاجة.   
"سيف" واقف جنبها لابس كاجوال ومبوظ سيستم الناس اللي كلهم لابسين بِدَل حواليهم، كان مبتسم وهو بيبص على أخته، واللي أخيرا.. لقت حد يقدّرها ويكون لها سند غيرُه.. رغم إنه مش هيسيبها بس حاسس بفُرقة، أخته الحاجة الأخيرة اللي باباه وصاه عليها. 
ـــــــــــــــــــــــــــــــــــ
ـ جبت 100٪ في الماث؟ دا أنت ليك عندي هدية بقى. 
"سيف" ضحك له فباباه قال له بفخر: 
ـ أنا بعتمد عليك، أنت عارف "نور" درجاتها عاوزة تتحسن، روح ذاكر معاها وأنا هاجي كمان شوية أختبركم، أنا عارف إنك شطور وهتعرف تخلي بالك منها لحد ما آجي صح؟
التاني وافق بسرعة وهو بيحرك راسه بحماس وهو فرحان من مدح باباه ليه، وجِري بسرعة لأخته وسط ضحك أبوه عليه. 
رجع للواقع وهو بيفكر نفسه بكلام باباه وبيبص لأخته: 
ـ هاخد بالي منها يا بابا.. لحد ما تيجي. 
ـــــــــــــــــــــــــــــــــــــــــــــــــــــــــــ
خرج من ذكرياته وهو بيبتسم بألم وبفرحة لأخته اللي واقفة قددامه وبتشاور له وبتضحك، وأول ما لف عينيه لجنبها وبص لـ"مهند" اللي كان بيضحك ابتسامته اختفت وقلب عينيه بزهق.. ازاي سمح للكائن الملزَّق دا ياخد نور عينيه؟؟ 
ـ بارك الله لكما وبارك عليكما وجمع بينكما في خير. 
كانت دي كلمات المأذذون اللي "مهند" أصرّ إنه يكتب له كتابه في نفس يوم الخطوبة، واتعهد بالفعل لـ"سيف" إنه مش هيتخلى عن "نور" أبدا حتى لو هي تخلت عنه، كان "سيف" بعَد إيديه عن إيد "مهند" اللي كانت ماسكة فيه بشدة طول ما هم بيكتبوا الكتاب وباصص له بحدة. 
و"مهند" اللي خلاص تخطى خوفُه في اللحظة دي وراح علشان يكلم "نور" اللي كانت واقفة وسط البنات بتكتم ابتسامتها بكسوف، كان كله فرحة وهو رايح لها لولا إنه شاف "سيف" وقف قدامه فجأة وهو بيقول له: 
ـ على فين يا حلو؟ 
رفع حاجبه، هو دلوقتي في موضع قوة فراح قال له: 
ـ على حضن مراتي. 
وأول ما خلص جملته من هنا مالحقش يقول حاجة تانية غير ولقى ضربة جته من مكان مجهول.. هو مش مجهول.. هو كان "سيف" اللي باصص له بشر وماسكه من ياقته وبيقول بصوت عالي وسط المعازيم: 
ـ نعم؟؟ قول كدا تاني؟؟  
"مهند" كلن مصدوم والباقيين اتجمعوا و"نور" جات وسطهم، راح "سيف" أخدها في حضنه وهو بيقول: 
ـ مش هتشوفها إلا لما تتربى. 
وخبّاها ورا ضهره فـ"مهند" بص له بدهشة واتحولت ملامحه للحدة وهو بياخدها من وراه وشد إيدها ناحيته، بس التاني عمال ينازع وهو بيمنعه ياخدها وبيقول بغضب: 
ـ سيب إيدها بقول لك، أنت مفكر نفسك جوزها ولا ايه؟؟ 
ـ أيوة جوزها، أومال علبة سردين؟؟
مش عارف ايه اللي بيقوله دلوقتي دا، و"سيف" ماكانش متقبل أبدا اللي التاني بيقوله، لحد ما "نور" بعدت عنهم الاتنين بحدة وهي بتقول: 
ـ بس بقى، اتجننتوا ولا ايه؟؟ 
سكتوا الاتنين، وهي باصة لـ"سيف" بعتاب فبعد نظره عنها بعدم رضا، وبعدين بصت لـ"مهند" وقالت: 
ـ هو أنتوا عيال صغيرة؟ الناس كلها عمالة تبص عليكم! 
"مهند" رد عليها وهو بيبص لـ"سيف" بغضب: 
ـ هو اللي غلطان. 
التاني رد عليه بحدة كالسيف فعلا: 
ـ أنت اللي بتقول ألفاظ. 
ـ ألفاظ؟ دا كله علشان بقول لك رايح لحضن مراتي؟ أومال أحضن مين؟ أحضنك أنت؟؟ 
"نور" شهقت وهي حاطة إيدها على بُقها، فـ"مهند" بص لها بصدمة: 
ـ اوعي أنتِ التانية تكوني فاكرة إن دا لفظ فعلا، دا كدا يبقى هباب. 
ـــــــــــــــــــــــــــــــــــــــــــــــــــــــ
وبعد مشاحنات طويلة وضحك المعازيم على الخناقة اللي أشبه بلعب أطفال قدامهم، كويس.. لقوا حاجة يرغوا فيها السنتين الجايين. 
"مهند" أخد "نور" واختفوا فجأة من وسط المعازيم، و"سيف" كان بيدور عليهم يمين وشمال مش لاقيهم، سمع صوت "تيا" وراه فجأة: 
ـ خدها ومشي علشان يتكلموا لوحدهم. 
"سيف" دمّه حمِي وهيتعصب لولا إنها وقفته بهدوء: 
ـ دي بقت مراته، خلاص اسمها على اسمُه، فاتطمن عليها، "مهند" هيخلي باله منها وهيفديها بعينيه. 
وبعد كلامها مش عارف ليه هِدي، يمكن لما الكلام دا اتقال له من حد تاني ارتاح، ولازم يسيب أخته تخرج من عشها فعلا، علشان تبني عشّ جديد.
"تيا" مشيت من قدامه ولا زالت شخصية ياسمين متلبساها، يمكن مانقدرش نقول إن دي ياسمين.. بل دي.. "تيا"  الحقيقية.. 
عينيه مشيت وراها وهو بيبتسم، فـ.. هل دي حكاية جديدة لسة بتتكتب بين السطور؟؟ 
ــــــــــــــــــــــــــــــــــــــــــــــــــــــــــــــ  
وفي مكان تاني، ماكانش النيل، ماكانش إسطبل خيول، بل أغرب مكان ممكن يجيبها ليه في يوم زي دا.. 
ـ الملاهي؟؟ 
قالتها بدهشة وهي بتبتسم ابتسامة أقرب لضحكة، وهو ضحكته وسعت بسبب ضحكتها وأخد إيديها ومشي بسرعة جوّة. 
ـ تيجي نجرب دي؟ ولا بتخافي؟ 
بصت للدايرة الكبيرة اللي فيها مقاعد الملقبة بلعبة الـ"غسالة"، وكان نفسها تقول له إنها بتخاف، آخر مرة لعبت فيها اللعبة دي مع "سيف" قعدت تلت أيام دماغها مصدعة. 
بس راحت معاه وركبوها، كانت مقاعدهم جنب بعض وهو لاحظ إنها خدت الكرسي اللي جوة علشان مش عاوزة تشوف الارتفاع وخايفة، مسكت إيده وهي بتقول ونبضات قلبها عليت: 
ـ لا.. نزلني، أنا خايفة! 
بس للأسف.. كانت اللعبة بدأت! 
بدأت الدايرة تلف بيهم وسرعتها بتزيد وإيد "نور" مافارقتش إيده وهي بتبص له وبتصرخ، وهي رغم إنه كان قلقان عليها إلا إنه ضحك غصب عنه فبصت له وهي بتصرخ فيه: 
ـ شايف دا موقف يضحــك؟؟ 
حرك راسه بـ"آه" وهو بيضحك على آخره راحت ضربته بكتفه بكل غيظ، ازاي ممكن يكون شبه أخوها للدرجة دي؟؟ حتى تصرفاته الغبية هي هيّاها! 
أول ما نزلوا من اللعبة مسكن بطنها بتعب وهو قلق المرة دي وخاف بجد وهو بيقول: 
ـ أنتِ تعبتِ جامد؟ 
حركت راسها بنفي لما شافت خوفه عليها، استقامت في وقفتها وفتحت عينيها لما الصداع بدأ يروح، راحت قالت له وهي بتصربه في كتفه بجد المرة دي بغيظ:
ـ كنت بتضحك عليّ يا "مهند"؟ 
وهو كتم ابتسامته وهو بيقول: 
ـ حقك على قلبي. 
سكتت فجأة أول ما سمعت جملته، وبلعت ريقها بكسوف وهي بتلف وشها بعيد عنه فحرك وشها بيرجعه علشان تبص له تاني وهو بيضحك: 
ـ اتكسفتِ يا صغننة؟
والمرة دي جات له الضربة في رجليه وهي بتدوس على جزمته بكعبها فاتأوه وهو ماسك رجليه وبيتنطط زي الأرنب في كل مكان، فراحت هي ضحكت عليه. 
يمكن الفُرص تكون بعيدة، أو عاميين عن إن احنا نشوفها، بس اللي أنا متأكدة منه إنها قدام عينينا، منا اللي شايفها بس بيكسل يتحرك علشان يمسكها، ومنا اللي مش شايفها بس بيدور عليها رغم إنها قدام عينيه، ومنا اللي عارف طريقه، ومابيترددش أبدا إنه يتنازل عن أي شيء في سبيل نجاحه إنه يلحق فرصته. 
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ 
تمت بحمدلله

انضم لجروب التليجرام ( هينزل فيه الرواية كاملة ) اضغط هنا
للانضمام لقناة الواتساب اضغط هنا
Novelesta
Novelesta